Chiqa yupaychäwi tuqit taqi chuyma saytʼasiñäni
Chiqa yupaychäwi tuqit taqi chuyma saytʼasiñäni
“Cosecha apthapiñax waljawa, ukampis irnaqirinakax jukʼanikirakiwa.” (MAT. 9:37.)
1. ¿Kunjamsa wali urgentïtap uñachtʼaytanxa? Uk qhanañchtʼma.
KUNAPACHATÏ mä documento ukürpach maynin revisañap munktan ukhaxa, ¿kunsa lurtanxa? URGENTE sasin qillqxatasaw apaytanxa. Amuytʼañäni, mä chiqar puriñasax wali wakiskirïki ukhaxa, ¿kunsa luraraktanxa? Tʼijtamp tʼijtampiw sartanxa. Ukat wali wakiskir luräw phuqañax waktʼistu, tiempos takxatistu ukhax jan kamachtʼirjamäsax sustukïtanwa. Kunattix adrenalina sat hormonaw wilasan jilxatti, ukatwa jankʼakix kuns lurtanxa. Chiqas wali apuratäktan ukhaw ukhaman jikxatastanxa.
2. ¿Kuna luräwis cristianonakatakix wali urgentepunixa?
2 Chiqpach cristianonakatakixa, taqi kunat sipansa, Diosan reinopat taqi markanakar yatiyir saraña, ukat jaqinakarus Jesusan arkirip tukuyañaw jukʼamp urgentexa (Mat. 24:14; 28:19, 20). Akapachan janïr tukuskipanxa, Diosan arunakapaw “nayraqat” yatiyasiñapa sasaw Jesusax säna kunjamatï Marcos libron siski ukhama (Mar. 13:10). Chiqas ukhamapuniw phuqasiskani. Jesusax akham sarakïnwa: “Cosecha apthapiñax waljawa, ukampis irnaqirinakax jukʼanikirakiwa” sasa, uka arunakampixa, yatiyasiñapax wali urgentïtap uñachtʼayäna, ukhamäskapuniwa cosechax tiempoparuw apthapisiñapa, suyañax janiw walïkaspati (Mat. 9:37).
3. ¿Kunjamsa cristianonakax Diosat yatiyañax wali urgentïtap uñachtʼayapxi?
3 Niyakixay Diosan Arupat yatiyañax wali wakiskirïchixa, chʼamsa ukat tiempsa apstʼasiñasapuniwa. Jïsa, walja jilat kullakanakaw ukham sum phuqasipki. Yaqhipasti, munañanakap apanukusaw Diosatak taqi chuyma irnaqtʼasipki, sañäni: precursorjama, misionerjama ukat betelitjama. Taqiniw jan tiempon wal irnaqtʼasipki. Chiqas jan waltʼäwinakansa uñjasipxarakiwa, ukampis Jehová Diosax jukʼampwa bendisiraki. Ukatwa jupanakat wal kusistanxa (Mateo 19: 27, 29 liytʼasiñapawa). Yaqhip jilat kullakanakax janis precursorjam irnaqtʼirjamäpkchixa, taqi chuymaw utap jakʼankirinakarusa ukat wawanakaparus Diosan qhispiyir arunakap yatiyapxaraki (Deu. 6:6, 7).
4. ¿Kunatsa yaqhip cristianonakatakix Diosatak irnaqtʼañax chʼamakïspa?
4 Kunapachatï phuqañatak urux purinxi jan ukax tiempos tukusxi ukhaxa, apur apurakiw jaqinakax irnaqañ yattanxa. Jiwasasti qhip qhipa urunakanwa jakasktanxa, Bibliansa ukat jaqinakan sarnaqäwipansa qhanaw ukax amuyasxi (Mat. 24:3, 33; 2 Tim. 3:1-5). Ukampis kuna urus akapachax tukuspachäni ukxa, janiw khitis yatktanti. Jesusasti ‘akapachax tukuskani uka urun chimpupat’ parlkasax wali qhanwa uka tuqit arsuwayäna, akham sasa: “Kuna horasäkanitix jan ukax kuna urükanitix ukxa janiw khitis yatkiti, ni alaxpachankir angelanakasa ni Diosan Yuqapasa, jan ukasti Dios Awki sapakiw yati” sasa (Mat. 24:36). Niyakixay kuna urünis uk jan yatkstantixa, walja maranak Diosar luqtasipki uka jilat kullakanakatakixa, urgenciampi Diosatak irnaqtʼañax chʼamakïxaspawa (Pro. 13:12). ¿Jumax ukhamänti uñjasirakta? Kuna lurañanaktï Jehová Diosampi ukat Jesucristompix jaytawaykistu ukanak phuqañatakix ¿kunas yanaptʼistaspa?
Jesusat yatiqasipxañäni
5. Jesusatakix Diosatak irnaqtʼañaw nayrankäna, ¿kunjamsa uk uñachtʼayäna?
5 Jesusatakix taqi kunat sipans Diosatak irnaqtʼañaw nayrankäna, janiw khitis ukham yatiqaskay irnaqtʼawaykiti. ¿Kunatsa? Walja lurañanïnwa, ukampis kimsa mara chikatanakwa taqi ukanak phuqañapäna. Uka maranakanxa jaqinakat sipansa jukʼampwa chiqa yupaychäw laykux irnaqtʼawayäna. Jesusax Awkipan sutipsa ukat amtanakapsa yatiyänwa, ukat Diosan Apnaqäwipat qhanañchäna. Kʼari yupaychäw pʼiqtʼirinakan kʼari chuymanïpxatapsa, ukat kʼari yatichäwinakapsa jan axsarasaw qhanstayäna, ukat jiwañkamarakiw Jehová Diosan Apnaqäwip tuqit saytʼasiwayi. Ukatxa jan qarjtasaw markpachan yatichäna, yanaptʼäna ukat usutanakarus qulläna (Mat. 9:35). Chiqpachansa, janiw khitisa jupjamax jukʼa tiemponak walja luräwinak lurawaykiti. Kunjamtï irnaqtʼasiñapäki ukhampun irnaqtʼawayäna (Juan 18:37).
6. ¿Kun lurañas Jesusatakix jukʼamp wakiskirïnxa?
6 ¿Kunjamatsa Jesusax Diosan arunakapat jankʼaki yatiyañapätap yatisïna? Luräwip phuqañatakix qhawqha tiempos utjaskäna uk yatiñatakixa, Danielan profeciapaw yanaptʼpachäna. Uka profeciarjamax ‘chika semanaru’, mä arunxa, kimsa mara chikataniruw Jesusan yatiyäwipax tukusxañapäna (Daniel 9:27). Kunapachatï 33 maran Jesusax Reyjam Jerusalenar mantkäna uka qhipatxa, Jesusax akham sänwa: “Jaqin Yuqapan jachʼañchatäñap horasax purinxiwa” sasa (Juan 12:23). Kunjamtï uñjktanxa, Jesusax jiwañap jakʼankatapxa sum yatïna. Ukampis janiw uka laykukix chʼamachaskänti, jan ukasti Awkipan munañap phuqaña ukat jaqi masipar munasiñaw taqi kunat sipans nayrankäna. Ukham munasiñanïtap laykuw qalltatpach arkirinakaparux ajllïna ukat markpachan yatiyapxañapatakis wakichtʼarakïna. Ukhamatwa kuntï qalltawaykäna ukampi phuqasipkakiñapatakisa ukat jukʼamp lurapxañapatakisa jaytawayäna (Juan 14:12 liytʼasiñapawa).
7, 8. ¿Kunatsa Jesusax alakip luririnakarux templot alissüna, ukat uk uñjasax kunsa arkirinakapax amtapxäna?
7 Yatiyañ qalltkän ukat mä qhawqha phaxsitxa, pascua fiestan 30 maranwa Diosar taqi chuyma munasitap Jesusax uñachtʼayäna. Arkirinakapamp chika Jerusalenar mantkän ukhaxa, “templo manqhansti jikxatänwa vacanaka, ovejanaka, palomanaka aljiri, ukhamarak qullqi trokirinaksa”. ¿Ukanak uñjasax kunsa luräna ukat arkirinakapas kuns amtapxäna? (Juan 2:13-17 liytʼasiñapawa.)
8 Kuntï Jesusax arskäna ukat lurkäna ukanak uñjasaxa, arkirinakapax Davitan akïr profeciapat amtasipxäna: “Utamar munañaw nayar tukuntitu” sasa (Sal. 69:9). ¿Kunatsa uka qillqatat amtasipxpachäna? Chiqas jan waltʼäwir purirjamaw yatichiripax may luräna. Amuytʼañäni, templon pʼiqtʼirinaka, mä arunxa, sacerdotenaka ukat ley yatichirinakampiw (escribas) uka jan wali alakipanak pʼiqtʼasipkäna. Jesusasti jan axsartʼasaw uka urunakan kʼari yupaychäw pʼiqtʼirinakarux saykataskäna, kunattix jan wali luräwinakap jarktʼäna ukat qhanstayarakïna. Chiqas Diosan utapar wal munasitapwa uñachtʼayäna, mä arunxa, chiqa yupaychäwir wal munasitap laykuw uk luräna, ukwa arkirinakapax amuyapxäna. Taqi chuyma munañampi ukat urgente lurañampix kunansa niya kikpakïpxi uka tuqit jichhax yatxatañäni.
Taqi chuyma munañampi, jankʼakïñampi
9. ¿Taqi chuyma lurañax kamsañs muni?
9 Kunapachatï maynix mä luräwi sum phuqañatakix chʼamachaski ukhaxa, taqi chuyma ukat kusisitaw lurawayi sisnawa. Uka arunakaxa, kunjam chuymampis Jesusax yatiyäna ukwa uñachtʼayi. Ukatwa discipulonakapax kuntï Jesusax templon lurkän uk uñjasax Davitan salmopat amtapxpachäna. Ukampis ¿kunatsa Jesusarux Diosan Utapar munañax ninjam tukuntäna ukat jan wali jaqinakarus ananuküna?
10. ¿Taqi chuyma ‘munaña’ siski ukax kunjamsa Biblian qhanañchasi?
10 Taqi chuyma ‘munaña’ sasin Davitax qillqkäna ukaxa, hebreo arut jutiriwa. Chiqas walja chiqanwa uka arux Biblian uñsti, ukat chuymar purtʼkir arunakarakiwa (Éxodo 20:5; 34:14 liytʼasiñapawa). Uka arunakaxa, kunjamtï mä chacha warmix apasipki uka tuqit qhanañchtʼañatakiw apnaqasi, sasaw Biblia tuqit parlir mä diccionariox qhanañchi. Kunjamtï casadonakax chachapan jan ukax warmipan jan yaqhampïpxañap munapki, ukat juparuki taqi chuyma munasiñap mayipkixa, ukhamarakiw jupankirinakarux Diosax Juparuki munasiñas mayistu. Ukhamasti, Biblian taqi chuyma siski uka arunakaxa, janiw mä ratuk kusistʼañat parlkiti, kunjamtï pelot anatir uñtirinakax mä ratuki wal kusisipki ukhama. Davitax taqi chuyma munasiñat parlkäna ukax mayni saparuki munasiña sañ muni, mä arunxa Diosan Jehová sutip taqi chuyma qʼumachaña, ukhamarak arxataña sañ muni.
11. ¿Kunjam chuymampis Jesusax Diosan sutip arxatäna?
11 Jesusar templon uñjasinxa, Davitan mä salmo qillqatap amtasax arkirinakapax janiw pantjasipkänti. Ukampis Jesusax janiw jukʼa tiemponïtap laykux ukham lurkänti, jan ukasti, chiqa yupaychäwi ukat Awkipan sutip arxatañatakiw ukham luräna. Ukatwa Diosan sutip jan wal uñjayiri ukat kʼarintiri uñjasax askichañ taqi chuyma munäna. Uka pachpa munasiñapaw kʼari yupaychäwi pʼiqtʼirinakan luräwinakap qhanstayañatakisa ukat jupanakan tʼaqhisiyat jaqinakar yanaptʼañatakis wiytäna (Mat. 9:36; 23:2, 4, 27, 28, 33).
Chiqa yupaychäwir taqi chuym arxatañäni
12, 13. ¿Kʼari cristianonakan pʼiqtʼirinakapax kunjamsa 1) Diosan sutip uñjapxi? 2) Diosan Apnaqäwiparux uñjapxi?
12 Akapachanxa, kʼari yupaychäwinakan pʼiqtʼirinakapax ukhamarakiw nayra maranakanjam jan walinak lurasipki, jan ukax jukʼamp jan walinakwa lurapxi. Kunjam chuymampis Diosan sutip uñjapxi uk amuytʼañäni. Kunapachatï Jesusax arkirinakapar Diosat mayisiñ yatichkäna ukhaxa, akham sänwa: “Sutimax jachʼañchatäpan” sasa (Mat. 6:9). Ukampis religionanakan pʼiqtʼirinakapaxa, jukʼampis kʼari cristianonakan pʼiqtʼirinakapax ¿Diosan sutip jachʼañchapxiti? Iglesiankirinakar Diosar sutipat mayisiña ukat uka sutir qullanarjam uñjañsa janiw yatichapkiti, jan ukasti Diosax trinidadawa, almax janiw jiwkiti ukat infiernon tʼaqhisiñäni sasin yatichasaw Diosan Jehová sutip qʼañuchapxi, ukat jan wal uñjayapxi. Ukatwa jaqinakax Diosax janis utjkaspa, jan sinttʼasirïkaspasa ukat axsarkañ jan chuymani Diosäkaspas ukham amuyapxi. Ukatxa, kʼari cristianonakan pʼiqtʼirinakapax jan phinqʼani sarnaqasaw Diosarux jan wal uñjayapxaraki (Romanos 2:21-24 liytʼasiñapawa). Diosan sutip chhaqtayañ walpun munapxi, ukatwa Biblia yaqha arur jaqukipasas chhaqtayapxi, ukhamatwa jaqinakax Diosar jan jakʼachasipkiti, ni uñtʼapkisa (Sant. 4:7, 8).
13 Jesusaxa, arkirinakaparux Diosan Apnaqäwipat mayisiñwa yaticharakïna, akham sasa: “Munañamampisti apnaqapxita. Munañamasti luratäpan akapachanxa, kunjämatï alaxpachana luratäki ukhama” sasa (Mat. 6:10). Kʼari cristianonakan pʼiqtʼirinakapax sapa kutis ukham arunakampi mayisisipkchixa, tamapankirinakarux politicanakaru ukat jaqin uñstayat institucionanakar atinisiñwa yatichapxi. Janiw ukakïkiti, Diosan Apnaqäwipat yatichirinakarus uñisipxarakiwa. Ukatxa, Diosan Apnaqäwipatxa awisakiw arsupxi, chiqas janiw atinisipkiti.
14. ¿Kʼari cristianonakan pʼiqtʼirinakapax kunjamsa Diosan Aruparux uñjapxi?
14 Awkipat mayiskäna ukhaxa, Jesusax qhanwa akham säna: “Arunakamasti chiqawa” sasa (Juan 17:17). Ukat alaxpachar janïr kutʼkasaxa, ‘Amuyasiri Chiqapa Uywataruw’ tamajar manqʼa tiempopar churañapatak uttʼayäxa sasaw Jesusax sarakïna (Mat. 24:45, MT). Iglesianakan pʼiqtʼirinakapaxa, jan pächasisaw Diosax nänakaruw arunakapat yatichañatakix ajlliwayapxitu sapxi. Ukampis ¿Uywirin mayitanakap phuqapxiti? Janiwa. Jupanakatxa, waljaniw Bibliax aliq siwsäwi kʼari arunakanikiwa sasin sapxi. Iglesiapankirinakar Diosar yupaychapxañapatak yanaptʼañata ukat chuymachtʼañat sipansa, jaqinakan uñstayat yatichäwinakwa yatichapxi, ukat ‘kunjamtix jaqinakax yatichayasiñ munapki’ ukanakakwa yatichapxaraki. Biblian kamachinakapsa pʼakintapxiwa, ukat kunjamtï akapachan sarnaqapki ukanakaruw uñtayapxi (2 Tim. 4:3, 4).
15. Kʼari cristianonakan pʼiqtʼirinakapar Diosan sutipxar jan walinak lurir uñjasax ¿kunjamakis jikxatasta?
15 Iglesia pʼiqtʼirinakar Diosan sutipxar jan walinak lurir uñjasaxa, waljaniw chuym ustʼayasipxi ukat Bibliarusa Diosarus janiw iyawsxapxiti, ukhamatwa Supayamp katuntayasipxi, jan wali pachaparus jaltʼapxi. Uka jan wali luräwinaka sapüru uñjasasa, Jehová Diosan sutip qʼañuchiri ukat Jupat jan wal parlir istʼasasa, ¿kunjamakis jikxatasta? ¿Uka jan walinak askichañ walpunxay munasmaxa? Jan wali pastoranakan kʼarintata ukat tʼaqhisiyata uñjasipki uka suma chuyman jaqinakarux ¿janit yanaptʼañ munkasma? Kunapachatï Jesusax jaqinakar “wali llaki[ta]” ukat “jan awatirin ovejanakjama” tʼaqhisir uñjkäna ukhaxa, janiw ukhamak sinttʼaskänti, jan ukasti, “walja yatichäwinak yatichañ qalltäna” (Mat. 9:36; Mar. 6:34). ¡Chiqa yupaychäwirux taqi chuymapuniw arxatäna! Ukhamasti, jan pächasisaw Jesusat yatiqasiñasa.
16, 17. 1) ¿Diosat taqi chuyma yatiyaskakiñatakix kunas yanaptʼistu? 2) ¿Kunsa jutïr yatichäwin yatiqañäni?
16 Jesusat yatiqasis lurañ amtktan ukhaxa, apóstol Pablon 1 Timoteo 2:3,4 (liytʼasiñapawa) qillqatan jikxataski uka arunakax chuymaruw purtʼistu. Chiqas janiw qhip qhipa urunakankxatas laykukix jankʼaki yatiyir sarktanti, jan ukasti, kunas Jehová Diosan munañapaxa ukwa sum amuytanxa. Diosax kunatï chiqäki ukwa taqinins uñtʼapxañap muni, ukatsti yupaychapxañapa, ukhamat bendicionanak katuqapxañap munaraki. Janiw tiempon tukusiskatap yatisakix ukham irnaqktanti, jan ukasti, Diosan sutip jachʼañchañataki ukat jaqi masisar Diosan munañap yatiyañatakiw chʼamachastanxa. Mä arunxa, chiqa yupaychäwir taqi chuyma munasitas laykuw ukham phuqtanxa (1 Tim. 4:16).
17 Jehová Diosaxa, kunsa aka Uraqitakisa jaqinakatakisa amti ukanak qhanañchatapax mä bendicionawa. Taqi ukanak yatisaw uta jakʼankirinakarus jichhürun kusisita jakasipxañapatak yanaptʼsna, ukhamat jutïrin sum jakasiñ suytʼäwinïpxañapataki ukat Supayan apnaqat akapachax tukjaskani ukhas qhispipxañapataki (2 Tes. 1:7-9). Ukatwa, Jehová Diosan urupax janirakis jankʼak purinkitixä sasin aynachtʼañat sipansa, chiqa yupaychäwir taqi chuyma arxatañatak tiempo utjaskipanxa, kusistaw chʼamachastanxa (Miq. 7:7; Hab. 2:3). Jutïr yatichäwinwa, kunjamsa chiqa yupaychäwir taqi chuyma munasiskaksna uk yatiqañäni.
¿Qhanañchtʼasmati?
• ¿Kunas Jesusarux jan qarjtas yatiyañapatakix yanaptʼäna?
• Bibliarjamaxa, taqi chuyma munaña siski ukax ¿kamsañsa muni?
• ¿Kuna jan walinak uñjasas chiqa yupaychäwir taqi chuyma arxatañatak wiytistu?
[Jisktʼanaka]
[8 janan fotopa]
Jesusatakix Awkipan munañap luraña ukat jaqinakar munasiñaw jukʼamp wakiskirïnxa
[10 janan fotopa]
Chiqa yupaychäwirux taqi chuyma munasitas uñachtʼayapxañäni