Beni Abapimpa mu Kutungilila Ukupepa kwa Cine

“Umulimo wa kulobolola ukalamba, lelo ababomfi bena nabacepa.”—MAT. 9:37.

1. Kuti mwalondolola shani umo calola ukwangufyanya?

BUSHE kuti mwacita shani nga namukwata amaformu ayo mulefwaya umuntu umo ukubombelapo ilyo takalawa? Kuti mwalembapo ati “NAFIPAMFYA, ANGUFYANYENI UKUBOMBELAPO!” Tutile muleya mu kukumana no muntu umo ku kulanshanya ifyacindama, nomba mwacelwa, kuti mwacita shani? Kuti MWAYANGUFYANYA. Kanshi nga namukwata umulimo mulefwaya ukubomba e lyo inshita yapwa, kuti mwabilingana. Kulaba ukubombesha na maka kabili lubilo lubilo. E mo calola ukwangufyanya!

2. Mulimo nshi uwapamfya sana uo Abena Kristu ba cine bafwile ukubomba muno nshiku?

² Umulimo wapamfya sana ku Bena Kristu ilelo, wa kushimikila imbila nsuma ya Bufumu no kulenga aba nko shonse ukuba abasambi. (Mat. 24:14; 28:19, 20) Ilyo umusambi Marko aleambula amashiwi ya kwa Yesu, alembele ukuti uyu mulimo ufwile ukubombwa “intanshi,” e kutila ilyo impela ishilaisa. (Marko 13:10, futunoti) Kwena, e fyo cifwile fye ukuba. Yesu atile: “Umulimo wa kulobolola ukalamba, lelo ababomfi bena nabacepa.” Te kuti tupembele; ifisabo fyena fifwile fye fyalobololwa ilyo inshita ya kulobolola tailapwa.—Mat. 9:37.

3. Finshi abengi baacita pa kuti babombeko umulimo uwapamfya uwa kushimikila?

³ Apo umulimo wa kushimikila walicindama nga nshi, tufwile ukupoosapo inshita yesu iikalamba, ukubomba na maka yonse, e lyo no kubikako sana amano. Icisuma ca kuti abengi e fyo balecita. Bamo balicefyako imitabotabo mu mikalile yabo pa kuti balebombako umulimo wa nshita yonse pamo nga bupainiya, bumishonari atemwa ukubombela pa Bethel. Balikwata imilimo iingi iya kubomba. Nalimo bali-ipusula ifingi, kabili balakwata amafya ayengi ilyo balebomba. Lelo Yehova alabapaala icine cine. Tulasekelela capamo nabo. (Belengeni Luka 18:28-30.) Bambi abashingabombako umulimo wa nshita yonse, balabomfya inshita yabo iikalamba mu kubombako umulimo wa kupususha abantu. Uyu mulimo usanshamo no kwafwa abana ukwisapusuka.—Amala. 6:6, 7.

4. Cinshi cingalenga bamo baleka ukumona ukuti nshita tuleikalamo naipamfya?

⁴ Nga fintu twamona, ilingi line ifilenga tumone ukuti icintu nacipamfya ni nshita batupimiine iya kubombelamo ico cintu, ne nshita ya kupwilapo ukubomba. Tuleikala mu nshita sha ku mpela, kabili kwaliba ubushininkisho ubwingi ubulanga ifyo; e kutila ubushininkisho bwa mu Malembo e lyo ne ficitika mu calo. (Mat. 24:3, 33; 2 Tim. 3:1-5) Na lyo line, takwaba umuntu uwaishiba inshita impela ikesa. Ilyo Yesu alelondolola ifyo “tukeshibilako” “ukuti icalo cili ku mpela,” alandile bwino bwino ukuti: “Ulwa bushiku bulya ne nshita takuli uwaishiba, nangu ni bamalaika ba mu muulu nangu Mwana, kano fye Tata.” (Mat. 24:36) Kanshi, bamo kuti cabakosela ukutwalilila ukumona ukuti impela naipalama, maka maka nga balilolela pa nshita yalepa. (Amapi. 13:12) Bushe na imwe e fyo mumfwa inshita shimo? Kuti twacita shani pa kuti tulemona ukuti impela naipalama no kulamona umulimo uo Yehova Lesa na Yesu Kristu batupeela ilelo ukuti naupamfya?

Tontonkanyeni Pali Yesu, Uo Tufwile Ukupashanya

5. Bushe Yesu alangile shani ukuti alemona umulimo wa kushimikila ukuti wali uwapamfya?

⁵ Pa bantu bonse, Yesu Kristu e walangile sana  ukuti umulimo wa kwa Lesa wali uwapamfya. Cimo icalengele, ni co alingile ukubomba ifingi mu myaka fye itatu na hafu iyo ali pe sonde. Na lyo line, Yesu e watungilile sana ukupepa kwa cine ukucila umuntu uuli onse. Alishibishe ishina lya kwa Wishi no bufwayo bwakwe, alishimikile imbila nsuma ya Bufumu, aletele pa bwelu ubumbimunda bwa bashimapepo ne fisambilisho fyabo ifya bufi, kabili alitungilile bumulopwe bwa kwa Yehova ica kuti afwilapo no kufwila. Alesambilisha, aleafwa abantu, no kundapa abalwele konse fye uko aleya. (Mat. 9:35) Takwaba uwabomba ifintu ifingi mu nshita fye iinono nga ilya Yesu abombeelemo. Yesu abombele na maka yakwe yonse.—Yoh. 18:37.

6. Cinshi Yesu abikileko sana amano mu bumi?

⁶ Cinshi calengele Yesu ukubombesha umulimo wakwe onse? Afwile alishibe ifyo ukusesema kwa kwa Daniele kwalandile pa nshita iyo Yehova apimine ukuti e yo ali no kubombamo uyu mulimo. (Dan. 9:27) E ico, nga fintu tumwene, umulimo wakwe uwa pe sonde wali no kupwa “muli hafu wa mulungu umo,” nangu pa numa ya myaka itatu na hafu. Pa numa fye ya kwingila kwa lulumbi mu Yerusalemu muli shinde wa mu 33 C.E., Yesu atile: “Inshita naisa iya kuti Umwana wa muntu acindamikwe.” (Yoh. 12:23) Nangu ca kuti Yesu alishibe ukuti imfwa yakwe yali mupepi, ico te co abikileko sana amano kabili te calengele alebombesha. Lelo, abikile sana amano ku kubomfya inshita yonse ku kucita ukufwaya kwa kwa Wishi no kulanga ukuti alitemwa abantu banankwe. Uko kutemwa e kwalengele afwaye abasambi no kubakansha, e lyo no kubatuma mu mulimo wa kushimikila. Acitile ifyo pa kuti bena bakashale bakonkanyapo ukubomba umulimo uo atampile kabili baali no kucita imilimo iyacila pa yo ena acitile.—Belengeni Yohane 14:12.

7, 8. Bushe abasambi bacitile shani ilyo Yesu asangulwile itempele, kabili mulandu nshi Yesu acitile ifyo?

⁷ Icintu cimo icacitike mu bumi bwa kwa Yesu cilalangilila bwino sana ifyo ali uwapimpa. Ku kutendeka kwa umulimo wakwe, pa nshita ya Ca Kucilila mu 30 C.E., Yesu na basambi bakwe baile ku Yerusalemu no kusanga mwi tempele muli “abaleshitisha ing’ombe ne mpaanga ne nkunda na balekabula indalama nabekala.” (Yoh. 2:13-17) Finshi Yesu acitile, kabili cinshi abasambi bakwe baishileishiba pali ena?—Belengeni Yohane 2:13-17.

⁸ Ifyo Yesu acitile no kusosa pali ilya nshita fyalengele abasambi ukwibukisha amashiwi ya mu kusesema ayaba mwi lumbo limo ilya kwa Davidi ayatila: “Nalitemwisha ing’anda yenu.” (Amalu. 69:9) Mulandu nshi? Pantu filya Yesu acitile, aibikile mu kapoosa mweo. Na kabushe, abalashi ba pe tempele, e kutila bashimapepo, bakalemba, na bambi, e bashingemwe na bulya bukwebo bwa kuliila abantu amasuku pa mutwe. Pa kusansalika imicitile ya balya bantu no kufulunganya amakwebo yabo, Yesu alengele abalashi ba mipepele ya ilya nshita bamupate. Abasambi tabalubile mu fyo bamwene, pantu calimoneke apabuuta ukuti ‘alitemenwe sana ing’anda ya kwa Lesa,’ nelyo ali uwapimpa mu  kutungilila ukupepa kwa cine. Lelo bushe ukupimpa e cinshi? Bushe kwalipusana no kwangufyanya?

Ifyo Ukwangufyanya no Kupimpa Fyapalana

9. Bushe kuti mwatila ukupimpa cinshi?

⁹ Dikishonari imo ilondolola ukuti “ukupimpa” cipilibula “ukukalabana pa kufwaya icintu cimo,” kabili itila amashiwi yambi ayapalana ne li shiwi kufwaisha, ukufundumana, ukuswangana, no kucincila. Cine cine aya mashiwi yonse kuti twayabomfya ku kulondolola ifyo Yesu alebomba umulimo wakwe. E co Baibolo ya Today’s English Version isosela ukuti: “Ukutemwa ing’anda yenu mwe Lesa, kupya ngo mulilo muli ine.” Mu ndimi shimo isha ku Kabanga, ishiwi lya kuti “ukupimpa” lyapangwa na mashiwi yabili ayapilibula “uwa mutima uwakaba,” kwati umutima ulepya. E mulandu wine kanshi abasambi baibukishishe amashiwi ya kwa Davidi ilyo bamwene ifyo Yesu acitile pe tempele. Lelo, cinshi calengele ukuti umutima wa kwa Yesu ulepya, no kulenga ukuti asangulule itempele?

10. Bushe ishiwi lya “ukupimpa” lyalola mwi ukulingana na Baibolo?

¹⁰ Ishiwi lya kuti “ukutemwisha,” nangu “ukupimpa” mwi lumbo lya kwa Davidi, lyafuma kwi shiwi lya ciHebere ilyo ilingi line bapilibula ati “ubufuba” mu Malembo yambi. Muli Baibolo ya Amalembo ya Calo Cipya, inshita shimo balipilibula ati ‘uufwaya ukupepwa fye eka,’ nga balelanda pali Lesa. (Belengeni Ukufuma 20:5; 34:14; Yoshua 24:19.) Dikishonari imo iilondolola amashiwi ya mu Baibolo ilanda pali ili shiwi ati: “Balibomfya sana ukukuma ku cupo . . . Nga filya fine fye ubufuba bwa mulume nangu umukashi bulenga aleumfwa ukuti umwina mwakwe afwile ukuba uwakwe fye eka, e fyo na Lesa omfwa ubufuba pali abo abafwile ukuba abakwe fye eka.” Kanshi, ukulingana na Baibolo, ukupimpa te kufundumana fye nangu ukucincila ukucita cimo, nga filya abatemwa ifyangalo bacita pa kulumba ibumba lyabo. Ukupimpa kwa kwa Davidi kwali kukanasuminisha uwa kucimfyanya na Yehova nangu ukuseebanya ishina Lyakwe. Uku e kupimpa ukwingalenga umuntu ukucingilila ishina ilisuma ilya munankwe nangu ukulandilako uyo muntu pa fyo bamubepesha.

11. Cinshi calengele Yesu ukupimpa sana?

¹¹ Kanshi abasambi ba kwa Yesu balilungike filya baibukishe amashiwi ya kwa Davidi ilyo bamwene ifyo Yesu acitile pe tempele. Yesu alibombeshe, pa mulandu wa kuti inshita yalipwile, e lyo na pa mulandu wa kuti ali uwapimpa, atemwa ali no bufuba pe shina lya kwa Wishi na pa kupepa kwa cine. Ilyo amwene ifyo abantu baleseebanya ishina lya kwa Lesa no kulipontela, ali uwapimpa, nangu uwa bufuba, kabili alicitilepo fimo pa kuti afumyepo uyo museebanya. Ilyo Yesu amwene abalanda nababatitikisha no kubacusha kuli bashimapepo, ukupimpa kwakwe kwalengele abalubuleko e lyo no kulanda amashiwi ya kusenuka bashimapepo ba mutitikisha.—Mat. 9:36; 23:2, 4, 27, 28, 33.

Beni Abapimpa mu Kutungilila Ukupepa kwa Cine

12, 13. Finshi bashimapepo ba mu macalici ya batila Bena Kristu baacita (a) kwi shina lya kwa Lesa? (b) ku Bufumu bwa kwa Lesa?

¹² Ifilecitika mu fya mapepo ilelo nafipalana nangu fye ukubipilako ukucila ifyo fyali mu nshiku sha kwa Yesu. Ku ca kumwenako fye, muleibukisha ukuti icintu ca kubalilapo ico Yesu asambilishe abasambi bakwe, ca kuti bafwile ukupepela ishina lya kwa Lesa. Abebele ukupepa ati: “Ishina lyenu libe ilya mushilo.” (Mat. 6:9) Bushe tulomfwapo bashimapepo, maka maka aba mu macalici ayatila ya Bena Kristu, balesambilisha abantu ukwishiba ishina lya kwa Lesa no kulilenga ukuba ilya mushilo, nangu ukulicindika? Iyo, lelo balenga abantu ukukanaishiba Lesa ukupitila mu fyo basambilisha ukuti Lesa abamo batatu, e lyo no kusambilisha ukuti umweo wa muntu taufwa, no kuti Lesa aloca abantu mu mulilo. Ne co calenga abantu ukufilwa ukwishiba Lesa bwino bwino, e lyo no kulamumona ukuti munkalwe, uwatemwa ukucululusha abantu. Na kabili baliseebanya Lesa ku fye shiku ifyo bacita no bumbimunda bwabo. (Belengeni Abena Roma 2:21-24.) E lyo balyesha  na maka yonse ukufisa ishina lya kwa Lesa, balilifumya fye na mu maBaibolo yabo. Kanshi balicilikila abantu ukuti bepalama kuli Lesa no kuba ifibusa fyakwe.—Yako. 4:7, 8.

¹³ Yesu asambilishe abasambi bakwe no kuti balepepela Ubufumu bwa kwa Lesa ilyo abebele ukupepa ati: “Ubufumu bwenu bwise. Ukufwaya kwenu kucitwe pano isonde nga mu muulu.” (Mat. 6:10) Nangu ca kutila bashimapepo ba mu macalici ayatila ya Bena Kristu libili libili balapepa ili pepo, bacincisha abantu ukutungilila ifya mapolitiki no tubungwe twapangwa na bantu. Kabili balasuula abashimikila pali ubu Bufumu. Kanshi, abengi abaitunga ukuba Abena Kristu, tabalandapo pa Bufumu, kabili tababucetekela.

14. Bushe bashimapepo ba mu macalici ya batila Bena Kristu bayangusha shani Icebo ca kwa Lesa?

¹⁴ Ilyo Yesu alepepa kuli Lesa, alondolwele bwino bwino ukuti: “Icebo cenu e cine.” (Yoh. 17:17) Kabili ilyo talafuma pano isonde, Yesu atile ali no kusonta “umusha wa cishinka kabili uwashilimuka” uwali no kulapeela abantu bakwe ifya kulya fya ku mupashi. (Mat. 24:45) Nangu ca kuti bashimapepo ba mu macalici ya batila Bena Kristu balangufyanya ukuitunga ukuti e bo Shikulu apeela umulimo wa kusambilisha abantu Icebo ca kwa Lesa, bushe batini balibomba bwino bwino uyo wine mulimo? Iyo. Batila ifyo Baibolo isosa milumbe fye nangu inshimi. Ukucila ukuliisha abantu babo ifya kulya fya ku mupashi pa kuti babasansamushe no kubalenga beshibe icebo, bashimapepo beba abasangwa ku mapepo amano ya buntunse ayo bafwaya ukumfwa. Ukulunda pali ifyo, balyangusha ifyo amafunde ya kwa Lesa yasosa pa mibele isuma pantu tabafwaya ukukalifya abaya ku mapepo, lelo beba aba mu macalici yabo ukuti balikwata imibele isuma nangu ca kuti abo bantu tabakonka ifyo Lesa alanda.—2 Tim. 4:3, 4.

15. Bushe mumfwa shani pali fyonse ifyo bashimapepo bacitila mwi shina lya kwa Lesa?

¹⁵ Pa mulandu wa fyacitika, ifyo batila bacitila mwi shina lya kwa Lesa uyu wine walembwa mu Baibolo, abantu ba bufumacumi abengi balilengwa insoni nangu fye ukuleka ukutetekela Lesa na Baibolo. Bawila mu maboko ya kwa Satana ne calo cakwe. Bushe mumfwa shani ilyo mwaumfwa ifintu fya musango yo no kumona uko filecitika cila bushiku? Apo muli babomfi ba kwa Yehova, bushe umutima wenu taumulenga ukufwaya ukucitapo cimo ilyo mwamona ifyo baseebanya ishina lya kwa Lesa no kulipontela? Bushe tamumfwa ukuti mufwile fye ukusansamusha abantu abo batitikisha ilyo mwamona ifyo abantu ba bufumacumi bababepa no kubacusha? Ilyo Yesu amwene abantu “balebacusha kabili bali abapaswa nge mpaanga ishabula kacema,” tabomfwilile fye uluse, lelo “atendeke ukubasambilisha ifintu ifingi.” (Mat. 9:36;  Marko 6:34) Kanshi tufwile ukuba abapimpa mu kutungilila ukupepa kwa cine, nga filya na Yesu ali.

16, 17. (a) Cinshi cifwile ukutucincisha ukubombesha mu mulimo wa kushimikila? (b) Finshi tuli no kusambilila mu cipande cikonkelepo?

¹⁶ Nga twaba abapimpa mu kubomba umulimo wa kwa Lesa muli iyo nshila, tulomfwikisha sana umwalola amashiwi ayo Paulo alembele ayasangwa pali 1 Timote 2:3, 4. (Belengeni.) Ico tubombela na maka umulimo wa kushimikila, ni co twalishiba ukuti tuleikala mu nshiku sha kulekelesha e lyo no kuti kufwaya kwa kwa Lesa. Afwaya abantu ukwishiba icine pa kuti na bo basambilile ifya kumupepa no kumubombela pa kuti akabapaale. Icilenga tubombeshe mu mulimo wa kushimikila, mulandu wa kuti inshita isheleko naicepa, e lyo kabili tufwaya no kucindika ishina lya kwa Lesa no kwafwa abantu ukwishiba ukufwaya kwakwe. Ico tucitila ifi fyonse, ni co tufwaya ukutungilila ukupepa kwa cine.—1 Tim. 4:16.

¹⁷ Fwe bantu ba kwa Yehova twalishiba bwino bwino ico Lesa apangiile abantunse ne fyo afwaya isonde ukuba. Twalikwata inshila sha kwafwilamo abantu ukusanga insansa no kukwata isubilo line line ilya ku ntanshi. Kuti twabalanga ifyo bengesapusuka ilyo ubonaushi bukesa pa calo ca kwa Satana. (2 Tes. 1:7-9) Mu nshita ya kukalipa nangu ukufuupuka nga camoneka kwati ubushiku bwa kwa Yehova bulekokola ukwisa, tufwile ukutemwa ukuti inshita e ko icili iya kuti tube abapimpa mu kutungilila ukupepa kwa cine. (Mika 7:7; Haba. 2:3) Kuti twacita shani pa kuti tube abapimpa? Ifyo e fyo tuli no kusambilila mu cipande cikonkelepo.

Bushe Kuti Mwalondolola?

• Cinshi calengele Yesu alebomba umulimo apeelwe na maka yakwe yonse?

• Ukulingana na Baibolo, “ukupimpa” calola mwi?

• Finshi tumona ilelo ifingalenga twaba abapimpa mu kutungilila ukupepa kwa cine?

[Ifipusho]

[Icikope pe bula 8]

Yesu abikile sana amano ku kucita ukufwaya kwa kwa Wishi no kulanga ukuti alitemenwe abantu banankwe

[Icikope pe bula 10]

Na ifwe tufwile ukuba abapimpa mu kutungilila ukupepa kwa cine