Magmasiboton sa Matuod nga Pagsimba
Magmasiboton sa Matuod nga Pagsimba
“Dako ang alanihon, apan diyutay ra ang mga mamumuo.”—MAT. 9:37.
1. Unsaon nimo paghubit ang pagkadinalian?
IKAW may dokumentong kinahanglang susihon sa usa ka tawo sa dili pa matapos ang adlaw. Unsay imong buhaton? Imo kining markahag “URGENT!” Ikaw padulong sa usa ka importanteng apoyntment apan ulahi ka na. Unsay imong buhaton? Ingnon nimo ang drayber, “Palihog paspasi; DINALIAN ni!” Tinuod, kon may buluhaton kang kinahanglang humanon ug diyutay na lang ang panahon, matensiyon ka. Motaas ang lebel sa adrenaline sa imong lawas, mao nga mopaspas ka sa pagtrabaho. Kanay buot ipasabot sa pagkadinalian!
2. Unsa ang labing dinaliang buluhaton sa matuod nga mga Kristohanon karon?
2 Ang labing dinaliang buluhaton sa matuod nga mga Kristohanon karon mao ang pagsangyaw sa maayong balita sa Gingharian ug paghimog mga tinun-an sa tanang kanasoran. (Mat. 24:14; 28:19, 20) Ang tinun-ang si Marcos mikutlo kang Jesus, ug misulat nga ang maong buluhaton kinahanglang himoon “una” sa dili pa moabot ang kataposan. (Mar. 13:10) Kana gayod ang angayng mahitabo. Si Jesus miingon: “Dako ang alanihon, apan diyutay ra ang mga mamumuo.” Ang alanihon dili angayng malangan; kinahanglan kining anihon sa dili pa matapos ang yugto sa ting-ani.—Mat. 9:37.
3. Unsay gihimo sa daghan tungod sa dinaliang panginahanglan sa pagsangyaw?
3 Sanglit ang pagsangyaw hinungdanon kaayo, angay natong hatagan kinig dakong panahon, kusog, ug pagtagad kutob sa atong mahimo. Dalayegon nga daghan ang naghimo niini. Ang pipila nagpasimple sa ilang kinabuhi aron makaalagad sa bug-os panahon ingong payunir, misyonaryo, o Bethelite. Puliki kaayo ang ilang kinabuhi. Lagmit sila daghag gisakripisyo ug nagsagubang ug daghang kalisdanan. Bisan pa niana, sila dagayang gipanalanginan ni Jehova. Ug nalipay sab kita kanila. (Basaha ang Lucas 18:28-30.) Ang uban, bisag dili bug-os panahong mga alagad, naghatag sa ilang labing dakong panahon niining nagaluwas-sa-kinabuhi nga buluhaton, nga naglakip sa pagtabang sa ilang mga anak aron maluwas.—Deut. 6:6, 7.
4. Nganong ang pipila lagmit dili na maghunahuna nga dinalian ang buluhaton?
4 Sa ato nang nasabtan, ang pagkadinalian sagad nalambigit sa usa ka panahong gitagal. Nagkinabuhi na kita sa panahon sa kataposan, ug daghang Kasulatanhon ug makasaysayanhong ebidensiya ang makapamatuod niana. (Mat. 24:3, 33; 2 Tim. 3:1-5) Apan walay tawong nahibalo sa eksaktong panahon nga moabot ang kataposan. Sa dihang si Jesus naghatag ug mga detalye bahin sa “ilhanan” nga magtimaan “sa kataposan sa sistema sa mga butang,” siya miingon: “Mahitungod nianang adlawa ug taknaa walay nahibalo, ni ang mga manulonda sa mga langit ni ang Anak, kondili ang Amahan lamang.” (Mat. 24:36) Busa, lagmit ang pipila dili na mobati nga dinalian ang buluhaton, ilabina kon dugay na silang nag-alagad. (Prov. 13:12) Mobati ka ba usahay niana? Unsay makatabang kanato aron maugmad o mahuptan ang panghunahuna nga dinalian ang buluhatong gisugo ni Jehova nga Diyos ug ni Jesu-Kristo kanato karon?
Tagda ang Atong Ehemplo, si Jesus
5. Sa unsang mga paagi gipakita ni Jesus nga dinalian ang ministeryo?
5 Sa tanan nga nagpakitag pagkadinalian diha sa ilang pag-alagad sa Diyos, si Jesu-Kristo ang kinalabwang ehemplo. Ang usa ka rason mao nga daghan kaayo siyag kinahanglang buhaton sa tulo lang ka tuig ug tunga. Apan, mas daghag nalampos si Jesus alang sa matuod nga pagsimba kay ni bisan kinsa. Iyang gipaila ang ngalan ug katuyoan sa iyang Amahan, giwali ang maayong balita sa Gingharian, giyagyag ang kasalingkapaw ug bakak nga mga pagtulon-an sa relihiyosong mga lider, ug gidapigan ang pagkasoberano ni Jehova hangtod sa iyang kamatayon. Gilibot niya ang tanang siyudad ug balangay—nga nagtudlo, nagtabang, ug nag-ayo sa mga sakit sa katawhan. (Mat. 9:35) Walay lain nga nakahimog daghan kaayo sulod lang sa mubong panahon. Si Jesus nagkugi gayod kutob sa iyang mahimo.—Juan 18:37.
6. Unsay gihatagag pangunang pagtagad ni Jesus?
6 Unsay nagtukmod kang Jesus sa pagkugi diha sa ministeryo? Sa tagna ni Daniel, nahibalo si Jesus sa gitas-on sa panahon nga gitakda ni Jehova sa pagtuman sa iyang buluhaton. (Dan. 9:27) Sumala sa tagna, ang iyang yutan-ong ministeryo matapos “sa katunga sa semana,” o human sa tulo ka tuig ug tunga. Wala madugay human sa iyang masadyaong pagsulod sa Jerusalem sa tinghunlak sa 33 K.P., si Jesus miingon: “Miabot na ang takna aron pagahimayaon ang Anak sa tawo.” (Juan 12:23) Bisan tuod nahibalo si Jesus nga nagkaduol na ang iyang kamatayon, wala niya isentro ang iyang hunahuna diha niana ni kana ang pangunang rason sa iyang pagkugi. Hinunoa, gipahimuslan niya ang matag kahigayonan sa pagbuhat sa kabubut-on sa iyang Amahan ug sa pagpakitag gugma sa iyang isigkatawo. Ang maong gugma nagtukmod kaniya sa pagtigom ug sa pagbansay ug mga tinun-an, nga nagsugo kanila sa pagsangyaw. Gibuhat niya kana aron ilang ipadayon ang buluhaton nga iyang gisugdan ug makahimog mga buhat nga labaw pa sa iyang nahimo.—Basaha ang Juan 14:12.
7, 8. Unsay reaksiyon sa mga tinun-an sa paglimpiyo ni Jesus sa templo, ug nganong gibuhat kadto ni Jesus?
7 May usa ka panghitabo sa kinabuhi ni Jesus nga nagpasundayag sa iyang kasibot. Panahon kadto sa Paskuwa sa 30 K.P., ug bag-o pa siyang nagsugod sa iyang ministeryo. Si Jesus ug ang iyang mga tinun-an nangadto sa Jerusalem ug ilang nakita sa templo “ang mga namaligyag mga baka ug mga karnero ug mga salampati ug ang mga magpapatigayon sa salapi sa ilang mga lingkoranan.” Unsay reaksiyon ni Jesus, ug unsay impresyon sa iyang mga tinun-an bahin niana?—Basaha ang Juan 2:13-17.
8 Ang gibuhat ug gisulti ni Jesus niadtong higayona nagpahinumdom sa mga tinun-an sa tagna ni David: “Ang tumang kasibot alang sa imong balay naglamoy kanako.” (Sal. 69:9) Ngano? Tungod kay peligroso kaayo ang gibuhat ni Jesus. Sa tinuoray, ang mga awtoridad sa templo—mga saserdote, eskriba, ug uban pa—ang nagpaluyo sa salawayong mga patigayon didto. Pinaagi sa pagyagyag ug pagbalda ni Jesus sa ilang patigayon, gihimo niya ang iyang kaugalingon nga kaaway sa relihiyosong mga lider. Ingon sa gihunahuna sa mga tinun-an, tinuod nga si Jesus may ‘kasibot alang sa balay sa Diyos,’ o kasibot alang sa matuod nga pagsimba. Apan, unsay kahulogan sa kasibot? Lahi ba kana sa pagkadinalian?
Pagkadinalian ug Kasibot Gitandi
9. Sa unsang paagi mahubit ang kasibot?
9 Ang usa ka diksiyonaryo naghubit sa “kasibot” ingong “kaikag ug dulot nga interes sa pagkab-ot sa usa ka butang,” ug kini naghatag usab ug susamag-kahulogan nga mga pulong—kainit ug kadasig. Kining mga pulonga naghubit gayod sa ministeryo ni Jesus. Ang Bag-ong Maayong Balita Biblia naghubad sa maong bersikulo: “Nagdilaab nga daw kalayo ang gugma ko sa imong Templo.” Makaiikag nga sa pipila ka pinulongan sa Sidlakan, ang pulong alang sa “kasibot” sa literal nagpasabot ug “init nga kasingkasing,” nga daw nagdilaab ang kasingkasing. Busa dili ikatingala nga ang mga tinun-an nahinumdom sa mga pulong ni David sa dihang nakita nila ang gihimo ni Jesus didto sa templo. Apan, unsay nakapadilaab sa kasingkasing ni Jesus, ug nagtukmod kaniya sa pagbuhat niadto?
10. Unsay kahulogan sa “kasibot” sumala sa pagkagamit diha sa Bibliya?
10 Ang pulong “kasibot” diha sa salmo ni David naggikan sa Hebreohanong pulong nga sagad gihubad ug “abughoan” o “pangabugho” diha sa ubang bahin sa Bibliya. May mga higayon nga kini gihubad sa Bag-ong Kalibotang Hubad nga “nagapangayo ug bug-os nga pagkamahinalaron.” (Basaha ang Exodo 20:5; 34:14; Josue 24:19.) Ang usa ka diksiyonaryo sa Bibliya nag-ingon bahin niining pulonga: “Kini sagad gamiton may kalabotan sa relasyon sa kaminyoon . . . Maingon nga ang pangabugho sa bana o asawa maoy usa ka puwersadong pagpahayag sa iyang linaing katungod, ang Diyos usab adunay linaing katungod sa debosyon sa Iyang mga sakop, ug Iyang panalipdan ang maong katungod.” Busa diha sa Bibliya, ang kasibot wala lamang magpasabot sa kainit ug kadasig sa pagkab-ot sa usa ka butang, sama sa gipakita sa mga magdadayeg alang sa ilang paboritong esport. Ang kasibot ni David maoy pangabugho sa positibong diwa—ang dili-pagtugot sa panag-indig o pagpakaulaw—nga maoy kusganong tinguha nga panalipdan ang maayong ngalan o tul-iron ang usa ka kadaotan.
11. Unsay nagtukmod kang Jesus nga magmasiboton?
11 Husto ang mga tinun-an ni Jesus sa ilang pagkonektar sa mga pulong ni David sa gibuhat ni Jesus didto sa templo. Si Jesus nagkugi dili lang tungod kay may tagal ang iyang panahon, kondili tungod kay siya masiboton—o abughoan—alang sa ngalan sa iyang Amahan ug sa putling pagsimba. Sa dihang iyang nakita nga gipakaulawan ug gipasipalahan ang ngalan sa Diyos, siya may katarongan nga magmasiboton, o mangabugho, ug iyang gitul-id ang maong kahimtang. Sa dihang nakita ni Jesus ang mga timawa nga gidaogdaog ug gibentahaan sa relihiyosong mga lider, ang iyang kasibot nagpalihok kaniya sa paghatag ug kahupayan sa katawhan ug sa pagsaway sa madaogdaogong mga lider sa relihiyon.—Mat. 9:36; 23:2, 4, 27, 28, 33.
Magmasiboton sa Matuod nga Pagsimba
12, 13. Unsay gihimo sa relihiyosong mga lider sa Kakristiyanohan karon maylabot sa (a) ngalan sa Diyos? (b) Gingharian sa Diyos?
12 Karong adlawa, ang tinamdan ug binuhatan sa mga tawong nag-angkong nagsimba sa Diyos susama—o mas grabe pa—kay sa panahon ni Jesus. Pananglitan, hinumdomi nga ang unang butang nga gitudlo ni Jesus nga iampo sa iyang mga sumusunod maoy bahin sa ngalan sa Diyos: “Pagabalaanon unta ang imong ngalan.” (Mat. 6:9) Ang relihiyosong mga lider, ilabina ang klero sa Kakristiyanohan, nagtudlo ba sa mga tawo kon unsay ngalan sa Diyos ug nga kana angayng balaanon, o dayegon? Sa kasukwahi, gidaot nila ang Diyos pinaagi sa bakak nga mga pagtulon-an sama sa Trinidad, imortalidad sa tawhanong kalag, ug impiyernong kalayo, nga gipaila nga ang Diyos misteryoso, lisod-sabton, mabangis, ug mapintas pa. Gipakaulawan sab nila ang Diyos pinaagi sa ilang eskandalosong mga buhat ug kasalingkapaw. (Basaha ang Roma 2:21-24.) Dugang pa, gihimo nila ang tanan aron itago ang ngalan sa Diyos, nga gitangtang pa gani kana sa ilang mga hubad sa Bibliya. Busa ilang gibabagan ang mga tawo sa pagpakigsuod sa Diyos ug sa pag-ugmad ug personal nga relasyon kaniya.—Sant. 4:7, 8.
13 Si Jesus nagtudlo sab sa iyang mga tinun-an nga iampo ang Gingharian sa Diyos: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mat. 6:10) Bisan pag ang relihiyosong mga lider sa Kakristiyanohan nag-ampo nga balikbalik niana, sila nagdasig sa mga tawo sa pagsuportar sa politikal ug ubang tawhanong mga institusyon. Dugang pa, sila nagtamay niadtong nagsangyaw bahin sa Gingharian. Ingong resulta, ang daghang nag-angkong Kristohanon dili na maghisgot bahin sa Gingharian sa Diyos, ni sila nagtuo pa niana.
14. Sa unsang paagi gipasipalahan sa klero sa Kakristiyanohan ang Pulong sa Diyos?
14 Sa pag-ampo ni Jesus sa Diyos, siya miingon: “Ang imong pulong maoy kamatuoran.” (Juan 17:17) Ug sa wala pa siya mosaka sa langit, gipasabot ni Jesus nga siya magtudlo sa “matinumanon ug maalamong ulipon” aron magtaganag espirituwal nga pagkaon sa iyang katawhan. (Mat. 24:45) Bisan pag ang klero sa Kakristiyanohan nangangkon nga nagtudlo sila sa Pulong sa Diyos, gituman ba nila ang buluhaton nga gipiyal kanila sa Agalon? Wala. Lagmit moingon pa sila nga ang mga asoy sa Bibliya tumotumo lamang. Imbes pakan-on sa espirituwal ang ilang panon, ug sa ingon mahupayan ug makabatog tukmang kahibalo, gigitik hinuon sa klero ang dalunggan sa ilang mga membro pinaagi sa tawhanong pilosopiya. Lain pa, ilang giusab ang moral nga mga sukdanan sa Diyos aron ipasibo sa gitawag nilang bag-ong moralidad.—2 Tim. 4:3, 4.
15. Unsay imong gibati bahin sa tanang gihimo sa klero sa ngalan kono sa Diyos?
15 Tungod sa tanang gihimo sa relihiyosong mga lider—sa ngalan kono sa Diyos sa Bibliya—daghang sinserong tawo ang nahigawad o nawad-ag pagtuo sa Diyos ug sa Bibliya. Sila nabiktima ni Satanas ug sa iyang daotang sistema sa mga butang. Inigkakita ug inigkadungog nimo niining mga butanga nga nagakahitabo adlaw-adlaw, unsay imong bation? Ingong alagad ni Jehova, sa dihang pakaulawan ug pasipalahan ang ngalan sa Diyos, dili ka ba matukmod sa pagtul-id niana? Kon imong makita nga ang sinsero ug matinud-anog-kasingkasing nga mga tawo gilimbongan ug gipahimuslan, dili ka ba matukmod sa paghupay kanilang mga dinaogdaog? Sa dihang nakita ni Jesus ang mga tawo nga “pinanitan ug nagkatibuagsa sama sa mga karnero nga walay magbalantay,” siya wala lamang basta maluoy. Siya “misugod sa pagtudlo kanila ug daghang butang.” (Mat. 9:36; Mar. 6:34) May katarongan kita nga magmasiboton sa matuod nga pagsimba, sama kang Jesus.
16, 17. (a) Unsay angayng magtukmod kanato sa pagpanglimbasog sa ministeryo? (b) Unsay atong hisgotan sa sunod artikulo?
16 Kon kita masiboton sa atong ministeryo, mas makahuloganon kanato ang giingon ni apostol Pablo sa 1 Timoteo 2:3, 4. (Basaha.) Kita nagkugi sa ministeryo dili lang tungod kay nasayod kita nga nagkinabuhi na kita sa kataposang mga adlaw, kondili tungod usab kay kini kabubut-on sa Diyos. Buot niya nga ang mga tawo makadangat sa kamatuoran aron sila magsimba ug mag-alagad kaniya ug mapanalanginan. Kita manglimbasog gayod sa ministeryo, dili tungod kay mubo na lang ang panahon, kondili buot natong pasidunggan ang ngalan sa Diyos ug tabangan ang mga tawo nga mahibalo sa iyang kabubut-on. Kita masiboton alang sa matuod nga pagsimba.—1 Tim. 4:16.
17 Ingong katawhan ni Jehova, nakapribilehiyo kita sa pagkat-on sa kamatuoran bahin sa katuyoan sa Diyos alang sa katawhan ug sa yuta. Makatabang na kita sa mga tawo sa pagkaplag sa kalipay ug seguradong paglaom sa umaabot. Atong ikapakita kanila kon sa unsang paagi sila maluwas sa dihang laglagon ang sistema ni Satanas. (2 Tes. 1:7-9) Imbes mahigawad kay morag nalangan ang adlaw ni Jehova, angay kitang malipay nga may panahon pa kita nga magmasiboton sa matuod nga pagsimba. (Miq. 7:7; Hab. 2:3) Sa unsang paagi maugmad nato ang maong kasibot? Hisgotan nato kini sa sunod artikulo.
Makapatin-aw Ka Ba?
• Unsay nagtukmod kang Jesus sa pagkugi diha sa ministeryo?
• Unsay kahulogan sa “kasibot” diha sa Bibliya?
• Unsay atong makita karon nga magtukmod kanato nga magmasiboton sa matuod nga pagsimba?
[Mga Pangutana sa Pagtuon]
[Hulagway sa panid 8]
Giuna ni Jesus ang pagbuhat sa kabubut-on sa iyang Amahan ug ang pagpakitag gugma sa isigkatawo
[Hulagway sa panid 10]
May katarongan kita nga magmasiboton sa matuod nga pagsimba