Jaservíkena ñande pyʼaite guive Jehovápe

‘Pe kóga oñemonoʼõvaʼerã hetaiterei oĩ, umi omonoʼõva katu mbovy.’ (MAT. 9:37, NM)

1. Mbaʼépa jajapo jepi jajapura jave?

 ÑAPENSAMÍNA jaguerahahañaína ospitálpe peteĩ imembypotaitéva, ajépa jajaporáta jahávo heseve. Térã jaháramo taxi-pe peteĩ rreunionhápe, ha tárdema ñandehegui, mbaʼépa jaʼéta pe choférpe? “Jaha pyaʼevéna ikatúramo, ajapuraitereíngo, ag̃uahẽvaʼerã órape.” Péicha jahecha, jareko jave peteĩ mbaʼe iñimportánteva jajapovaʼerã, katuete jajapura ha jajepyʼapy.

2. Mbaʼépa koʼág̃a tekotevẽterei jajapo?

² Koʼág̃a tekotevẽterei ñamombeʼu pe marandu porã ha ñaipytyvõ mayma ñande rapichápe oservi hag̃ua Jehovápe (Mat. 24:14; 28:19, 20). Jesús heʼivaʼekue pe marandu porã ‘ojepredika raẽ vaʼerãha’ oñehundi mboyve ko múndo aña (Mar. 13:10). Ha péva ojejapovaʼerã, upévare Jesús heʼivaʼekue voi pe ‘kóga oñemonoʼõvaʼerã hetaiterei oĩha, umi omonoʼõva katu mbovy’. Péicha ohechauka jajapuravaʼerãha ñamombeʼu hag̃ua pe marandu porã. Jaikuaa ningo pe kosécha tiémpo og̃uahẽ vove pyaʼe oñemonoʼõvaʼerãha umi kóga, ndaikatúi oñehaʼarõiterei (Mat. 9:37).

3. Mbaʼépa heta ermáno ojapo koʼág̃a rupi?

³ Jahechágui iñimportantetereiha pe predikasión, tekotevẽ ñañemotiémpo ha jajapo opa ikatúva ñamombeʼu hag̃ua pe marandu porã. Javyʼa jahechávo heta ermáno ojapoha upéicha. Pór ehémplo oĩ omboykéva heta mbaʼe oservi hag̃ua Betélpe, de prekursór térã misionéro. Haʼekuéra heta hembiapo, ojesakrifika ha ombohovái heta mbaʼe ijetuʼúva, péro Jehová hetave mbaʼe porã omeʼẽ chupekuéra. Ha ñande javyʼaiterei avei hendivekuéra (elee Lucas 18:28-30). Oĩ avei ambue ermáno ndaikatúiva ojapo pe prekursorádo, péro ojapo ikatúva entéro omboʼe hag̃ua hapichápe ha ifamiliakuérape Ñandejára rembipota (Deu. 6:6, 7).

4. Mbaʼérepa heta kristiáno sapyʼánte ikatu ikangy ha naikyreʼỹvéi Jehová servísiope?

⁴ Jahecháma haguéicha pe ehémplope, ñande rapichakuéra pyaʼe ojapo jepi hembiapo, ohechakuaágui saʼipaitemaha itiémpo. Ha ñande ningo koʼág̃a jaiko ko múndo aña ára pahápe, ha upéva ohechauka ñandéve umi profesía oñekumplíva (Mat. 24:3, 33; 2 Tim. 3:1-5). Upéicharõ jepe, ni peteĩ yvypóra ndoikuaái arakaʼetépa oñehundíta ko múndo. Upéva ohechauka porã vaʼekue Jesús heʼírõ guare ‘mbaʼe mbaʼépa oikóta pe ára pahápe’. Haʼe heʼi: ‘Upe ára ha upe óra katu avave ndoikuaái, ni umi ánhel yvagapegua, ni pe Taʼýra. Pe Túva añoite oikuaa’ (Mat. 24:36, NM). Upévare, heta kristiáno sapyʼánte ikatu ikangy ha naikyreʼỹvéi Jehová servísiope, ha koʼýte ijetuʼu umi heta áñorema oservívape Jehovápe (Pro. 13:12). Oimérõ oiko ñanderehe upéicha, mbaʼépa ikatu ñanepytyvõ jahechakuaa hag̃ua tekotevẽha jajapura jajapo hag̃ua umi tembiapo Jehová ha Jesucristo omeʼẽvaʼekue ñandéve?

Jasegíkena Jesús ehémplo

5. Mbaʼéichapa Jesús ohechauka kyreʼỹme ojapo hague umi mbaʼe Jehová ojeruréva chupe?

⁵ Jesucristo ningo kyreʼỹme ojapopaitevaʼekue umi mbaʼe Jehová ojeruréva chupe, ha péicha oheja ñandéve pe ehémplo  iporãvéva. Haʼe ojapo upéicha, orekógui hetaiterei mbaʼe ojapovaʼerã tres áño imédiope. Péro mbykýramo jepe upe tiémpo orekóva, hetaitereive mbaʼe ojapo mayma yvypóragui Jehová servísiope. Haʼe oikuaauka Ñandejára réra ha hembipota, omombeʼu pe marandu porã, ohechauka umi rrelihión omoakãva hovamokõi ha ijapuha. Jesús ningo omano meve ohechaukavaʼekue Jehová orekoha derécho ogovernávo. Ha oho heta hendárupi omboʼe, oipytyvõ ha omonguera hag̃ua la héntepe (Mat. 9:35). Añetehápe Jesús ojapo haguéicha, ndaipóri ótro ojapóva hetaite mbaʼe sapyʼaitépe. Haʼe ojapopaitevaʼekue Jehová ohaʼarõva chugui (Juan 18:37).

6. Mbaʼépa iñimportantevevaʼekue Jesúspe g̃uarã?

⁶ Mbaʼéichapa Jesús oikuaarakaʼe tekotevẽha kyreʼỹme ombaʼapo omohuʼã pyaʼe hag̃ua ipredikasión? Oiméne, oipytyvõ chupe pe profesía ohaivaʼekue proféta Daniel ohechakuaa hag̃ua pe Mesías rembiapo opavaʼerãha “pe semána mbytépe”, térã tres áño imédiope heʼiháicha upe profesía (Dan. 9:27). Upéi, oike rire Jerusalénpe áño 33-pe, Jesús heʼi: ‘Og̃uahẽma pe óra yvypóra Raʼy oñembotuicha hag̃ua’ (Juan 12:23, ÑÑB). Péicha jahecha haʼe oikuaa hague ojejukapotaitemaha chupe. Péro ndahaʼéi upévarente oñehaʼãmbaitéva, Jesúspe g̃uarã iñimportanteve ojapo Itúva rembipota ha opa árape ohechauka ohayhuha hapichakuérape. Upe mborayhu omomýi chupe oiporavo hag̃ua hemimboʼerã ha omboʼe chupekuéra oho hag̃ua opredika opárupi upe tetãme. Upéicha ojapo ikatu hag̃uáicha hemimboʼekuéra osegi ojapo pe tembiapo omoñepyrũvaʼekue ha ojapo hag̃ua hetave mbaʼe haʼe ojapovaʼekuégui (elee Juan 14:12).

7, 8. Mbaʼérepa Jesús omosẽ pe témplogui umi ombaʼevendévape, ha mbaʼérepa imanduʼa hemimboʼekuéra ohechávo upéva?

⁷ Omoñepyrũ riremi ipredikasión, pe Pascua aja áño 30-pe, Jesús ohechauka ohayhu ha omombaʼeha ipyʼaite guive Jehovápe. Og̃uahẽvo Jerusalénpe hemimboʼekuérandi ‘ohecha pe témplope oĩ umi ovendéva tóro, ovecha ha palóma. Ohecha avei oguapyhína upépe umi okambiáva pláta’. Mbaʼépa ojapo, ha mbaʼépa opensa hemimboʼekuéra upévare? (Elee Juan 2:13-17.)

⁸ Jesús heʼi ha ojapovaʼekue upérõ omomanduʼa hemimboʼekuérape ko profesía rréi David ohaivaʼekuére: ‘Cherakateʼỹetereígui nde róga guasu rehe, tatáicha okaru cherehe’ (Sal. 69:9, ÑÑB). Mbaʼérepa imanduʼa hikuái ko profesíare? Imboʼeharakuéra ojapógui peteĩ mbaʼe ombopochýtava umi mburuvichakuéra templopeguápe. Umíva apytépe oĩvaʼekue umi saserdóte ha mboʼeharakuéra leipegua. Jesús omosarambi chuguikuéra inegósio, ha ohechauka ivaiha pe ojapóva hikuái. Hemimboʼekuéra ohechakuaa  Haʼe ojapo hague upéicha hakateʼỹgui Jehová rógare, térã ohayhu ha omombaʼetereígui Ñandejárape. Koʼág̃a jahecháta mbaʼépa heʼise ñanerakateʼỹ peteĩ mbaʼére, ha mbaʼéichapa upéva ñanepytyvõta ñambaʼapo kyreʼỹ hag̃ua Jehová servísiope.

Ñamombaʼe Jehovápe ha kyreʼỹme jaservi chupe

9. Mbaʼépa heʼise ñanerakateʼỹ?

⁹ Ñanerakateʼỹ heʼise ñamombaʼetereiha peteĩ mbaʼe. Heʼise avei japorohayhuetereiha, ñanekyreʼỹ ha ñaneakãrakuha peteĩ mbaʼére. Ajépa koʼã mbaʼe ohechauka porã mbaʼéichapa Jesús ojapovaʼekue hembiapo! Pe Biblia, ojapovaʼekue Sociedad Bíblica Paraguaya, otradusi kóicha rréi David heʼivaʼekue: ‘Ne témplo ahayhuetereígui tatáicha okaru cherehe’. Ndareíri Jesús remimboʼekuéra imanduʼa ko téystore ohechávo mbaʼépa ojapo Imboʼeharakuéra pe témplope. Upéicharõ, mbaʼépa omomýi Jesúspe odefende hag̃ua Jehová róga?

10. Mbaʼéichapa ojetradusi jepi la Bíbliape pe ñeʼẽ evréo oiporuvaʼekue David?

¹⁰ Pe ñeʼẽ evréo oiporuvaʼekue David heʼi hag̃ua ohayhu ha omombaʼeha Ñandejára róga ojetradusi jepi avei la Bíbliape ‘ñamombaʼeguasuvaʼerãha Jehovápe añoiténte’ (elee Éxodo 20:5; 34:14 ha Josué 24:19). Peteĩ diksionário vívliko heʼi: “Pe ñeʼẽ evréo ojeporu jepi avei oñeñeʼẽ jave umi omendávare [...]. Umi ména hakateʼỹva hembirekóre, ohechauka oipotaha chupe añoiténte ohayhu. Upéicha avei, Ñandejára oipota chupe añoiténte ñamombaʼeguasu”. Jahechaháicha la Bíbliape heʼi jave ñanerakateʼỹ ha ñamombaʼeha peteĩ mbaʼe, ndeʼiseihína ñane akãraku reinteha peteĩ partidohápe ohóvaicha. Rréi David heʼírõ guare omombaʼe ha hakateʼỹha Jehová rógare, ohechauka oipotaha Jehovápe añoiténte oñemombaʼeguasu, ha ndoipotaiha avave opuʼã ni oñembohory hese. Ndohejái avei oñeñeʼẽ vai Jehová rérare ha oñehaʼã omopotĩ oĩramo omongyʼáva.

11. Mbaʼépa ojapo Jesús omombaʼégui ipyʼaite guive Ñandejára réra?

¹¹ Ndareíriraʼe Jesús remimboʼekuéra imanduʼa pe rréi David heʼivaʼekuére ohechávo mbaʼépa ojapo Imboʼehára pe témplope. Péro ñanemanduʼavaʼerã Jesús ndojapói hague upéicha ohechakuaágui mbykymaha pe tiémpo orekóva, ojapo guei odefende hag̃ua pe rrelihión añetegua ha Itúva réra. Upévare oĩ jave oñeʼẽ vaíva ha oñembohorýva Ñandejára rérare, odefende ipyʼaite guive. Ha ohechauka avei umi rrelihión omoakãva ijapuha, ha oñehaʼã ombopyʼaguapy umi hénte ohasa asývape (Mat. 9:36; 23:2, 4, 27, 28, 33).

Ñadefendékena ñande pyʼaite guive pe rrelihión añetegua

12, 13. Umi rrelihión omoakãvapa omombaʼe a) Ñandejára réra? b) Ñandejára Rréino?

¹² Yma primer síglope heta oĩ nomombaʼéiva Ñandejárape, péro koʼág̃a rupi hetaitevéntema oĩ upeichagua. Pór ehémplo, heta oĩ nomombaʼéiva Ñandejára réra. Péro Jesús omboʼérõ guare hemimboʼekuérape oñemboʼe hag̃ua, heʼi tenondete ojerurevaʼerãha: ‘Toñemomarangatu nde réra’ (Mat. 6:9, NM). Ha mbaʼépa ojapohína koʼág̃a rupi umi rrelihión omoakãva? Haʼekuéra omboʼerangue la héntepe oiporu hag̃ua Ñandejára réra ha omomarangatu, ijapu heʼívo Túva, Taʼýra ha espíritu sánto peteĩnteha; ñane álma nomanoiha ha iñañáva omano rire ohoha infiérnope. Upévare heta oĩ opensáva Ñandejára ijapuha, ipyʼahatã ha iñañaha. Umi rrelihión omoakãva hekovai ha hovamokõi rupi omongyʼa Ñandejára réra (elee Romanos 2:21-24). Haʼekuéra oipeʼa avei ivívliagui Ñandejára réra, péicha ndohejái la  héntepe oñemoag̃ui Jehováre ha oiko iñamígoramo (Sant. 4:7, 8).

¹³ Jesús omboʼevaʼekue avei hemimboʼekuérape oñemboʼe hag̃ua kóicha: ‘Tou ne rréino, tojejapo ne rembipota ko yvy ape ári yvagapeguáicha’ (Mat. 6:10, NM). Péro umi rrelihión omoakãva orrepetíramo jepe heta vése ko ñemboʼe, omokyreʼỹ la héntepe ojerovia hag̃ua umi polítikore ha ambue organisasiónre. Ha ivaiveha katu oapoʼi umi opredikávape Ñandejára Rréino. Umi kristiáno guaʼu ndojeroviái Ñandejára Rréinore, upévare haʼekuéra noñeʼẽi voi hese.

14. Mbaʼépa ojapo umi rrelihión omoakãva nomombaʼéigui Ñandejára Ñeʼẽ?

¹⁴ Jesús oñemboʼérõ guare Itúvape, heʼi porã: ‘Ne ñeʼẽ ningo añetegua’ (Juan 17:17, ÑÑB). Ha oho mboyve yvágape, heʼi ohejataha peteĩ ‘tembiguái jeroviaha ha iñarandúva’ omoĩ hag̃ua opa mbaʼe oikotevẽva omombarete hag̃ua kongregasión jerovia (Mat. 24:45). Péro umi rrelihión omoakãva notĩri voi heʼi hag̃ua oñemoĩha chupekuéra omboʼe hag̃ua Ñandejára Ñeʼẽ. Ha ojapópa hikuái opa mbaʼe Jesús heʼivaʼekue? Nahaniriete, haʼekuéra heʼi la Biblia omombeʼuha heta káso reínte. Okonsola ha omboʼerangue hikuái la héntepe Ñandejára rembipota, omboʼe umi mbaʼe opensávante ha heʼi chupekuéra ‘ohendusévante’. Nomombaʼéi avei hikuái la Biblia heʼíva ha oporomboʼe ogusta hag̃uáicha umi hekovaívape (2 Tim. 4:3, 4).

15. Mbaʼéichapa reñeñandu rehechávo umi rrelihión omoakãva ojapoha heta mbaʼe vai Ñandejára rérape?

¹⁵ Heta oĩ ndojeroviavéimava Ñandejárare ha la Biblia heʼívare, ohechávo umi rrelihión omoakãva ojapoha heta mbaʼe vai. Ha péicha hoʼa hikuái Satanás ha imúndo aña poguýpe. Mbaʼéichapa nde reñeñandu rehechávo ára ha ára oikoha péicha? Mbaʼépa rejapo oĩ jave oñeʼẽ vaíva Jehováre ha omongyʼáva héra marangatu? Ajépa reñehaʼãmbaitéta redefende ha remopotĩ héra? Ha rehechávo hetaite ipyʼaporãva ohasa asy ombotavy rupi chupekuéra umi omoakãva irrelihión, ajépa reñehaʼãmbaitéta rekonsola umívape? Jesús ohechárõ guare oĩha hetaiterei ‘oiko asy ha isarambipáva umi ovecha ijaraʼỹvaicha’, ndahaʼéi oiporiahuverekónteva umi héntepe, oñepyrũ voi katu omboʼe chupekuéra (Mat. 9:36;  Mar. 6:34). Péicha jahecha haʼe ipyʼaite guive omombaʼe hague Ñandejárape! Upévare iporã jasegi iñehémplo.

16, 17. a) Mbaʼérepa ñañehaʼãmbaite jajapo ñane rembiapo Jehová servísiope? b) Mbaʼépa jahecháta pe artíkulo oúvape?

¹⁶ Jajapóramo péicha ñane rembiapo, ñamombaʼeterei apóstol Pablo ohaivaʼekue 1 Timoteo 2:3, 4-pe (elee). Ñande ningo ndahaʼéi ñañehaʼãmbaitéva japredika jaiko rupi ára pahápente, sino jahechakuaágui mbaʼépa Jehová rembipota. Haʼe oipota voi enterove oikuaa ha omombaʼeguasu chupe, ha ohupyty heta mbaʼe porã. Ñande kyreʼỹme jaservi Jehovápe ndahaʼéi hiʼag̃uíma rupi hiʼára guasu, sino ñamombaʼeguasuségui héra ha jaikuaaukaségui ñande rapichakuérape hembipota. Añetehápe ñamombaʼégui ñande pyʼaite guive Jehová rembipota ñaipytyvõ ñande rapichakuérape (1 Tim. 4:16).

¹⁷ Jehová ñanevendesi oikuaaukávo ñandéve mbaʼépa hembipota ko yvy ha yvyporakuérape g̃uarã. Upévare ñande ikatu ñaipytyvõ ñane vesinokuérape ovyʼa hag̃ua koʼág̃ama voi, oreko hag̃ua esperánsa ha ani hag̃ua oñehundi Satanás múndo ndive (2 Tes. 1:7-9). Upéicharõ, ani ñanekangy nog̃uahẽi gueteri haguére Jehová ára, javyʼa guei ikatúgui jahechauka ñande pyʼaite guive jahayhu ha ñamombaʼeha Jehovápe (Miq. 7:7; Hab. 2:3). Pe artíkulo oúvape jahecháta mbaʼépa ikatu jajapo akóinte kyreʼỹme jaservi hag̃ua Jehovápe.

Ikatúpa remyesakã?

• Mbaʼérepa Jesús ombaʼapo kyreʼỹ vaʼekue Jehovápe g̃uarã?

• Mbaʼépa heʼise ñanerakateʼỹ peteĩ mbaʼére?

• Mbaʼérepa tekotevẽ ñadefende ñande pyʼaite guive pe rrelihión añetegua?

[Porandu ñahesaʼỹijóva]

[Nóta oĩva taʼanga ndive páhina 8]

Jesúspe g̃uarã iñimportantevevaʼekue ojapo Itúva rembipota ha oporohayhu

[Nóta oĩva taʼanga ndive páhina 10]

Ñamombaʼevaʼerã ñande pyʼaite guive Jehová rembipota