Mangin Makugi Para sa Matuod nga Pagsimba
Mangin Makugi Para sa Matuod nga Pagsimba
“Ang alanyon bugana, apang pila lamang ang mamumugon.”—MAT. 9:37.
1. Paano mo ilaragway ang pagkahilingagawon?
KON may dalal-on ka sa ospital nga isa ka manugbata nga babayi, ano ang himuon mo? Indi bala nga magdalidali ka? Kon may importante ka nga appointment sa isa ka tawo apang ma-leyt ka na, ano ang himuon mo? Indi bala nga mas madasig ang imo paglakat? Huo, kon may ginahingagaw ka kag kulang na ang imo tion, ginanerbios ka kag indi mapahamtang. Nagadasig ang produksion sang imo adrenaline, kag nagadalidali ka. Amo sina ang pagbatyag sang pagkahilingagawon.
2. Ano ang labing hilingagawon nga hilikuton sang matuod nga mga Cristiano sa karon?
2 Para sa matuod nga mga Cristiano sa karon, wala na sing mas hilingagawon pa nga hilikuton sangsa pagbantala sang maayong balita sang Ginharian kag paghimo sang mga disipulo sa tanan nga pungsod. (Mat. 24:14; 28:19, 20) Ang disipulo nga si Marcos nagsulat nga suno kay Jesus, ini nga hilikuton dapat himuon “anay” antes mag-abot ang katapusan. (Mar. 13:10) Nagakaigo gid ina kay si Jesus nagsiling: “Ang alanyon bugana, apang pila lamang ang mamumugon.” Ang alanyon indi puede nga pabuyanbuyanan; dapat ini tipunon antes matapos ang tig-alani.—Mat. 9:37.
3. Bangod sa pagkahilingagawon sang pagbantala nga hilikuton, ano ang ginhimo sang madamo?
3 Bangod amo sina ka importante ang pagbantala nga hilikuton para sa aton, nagakaigo lamang nga hatagan naton ini sang daku nga tion, kusog, kag igtalupangod. Madamo ang nagahimo sina kag takus gid sila hatagan sing komendasyon. Ginpasimple sang iban ang ila pagkabuhi para makasulod sa bug-os tion nga pag-alagad subong mga payunir, misyonero, ukon Bethelite. Masako gid sila. Ayhan madamo sila sang ginsakripisyo, kag madamo pa nga hangkat ang ila pagaatubangon. Apang, ginapakamaayo sila ni Jehova sing bugana kag nalipay gid kita para sa ila. (Basaha ang Lucas 18:28-30.) Bisan pa ang iban indi makaalagad sing bug-os tion, ginahimo nila ang ila bug-os nga masarangan para sa sining nagaluwas kabuhi nga hilikuton, nga nagalakip sa pagbulig sa ila mga kabataan nga maluwas.—Deut. 6:6, 7.
4. Ngaa mahimo madula sang iban ang pagbatyag sang pagkahilingagawon?
4 Subong sang nakita naton, ang pagkahilingagawon masami naangot sa limitado nga tion ukon katapusan. Nagakabuhi na kita sa tion sang katapusan, kag madamo kita sing pamatuod sini sa Biblia kag sa kasaysayan. (Mat. 24:3, 33; 2 Tim. 3:1-5) Apang wala gihapon sing tawo nga nakahibalo kon san-o ang eksakto nga tion sang katapusan. Sang naghatag sia sing detalye sang “tanda” sang “katapusan sang sistema sang mga butang,” si Jesus espesipiko nga nagsiling: “Tuhoy sa amo nga adlaw kag oras wala sing nakahibalo, bisan pa ang mga anghel sa langit ukon ang Anak, kundi ang Amay lamang.” (Mat. 24:36) Bangod sini, mahimo mabudlayan ang iban nga mahuptan ang pagbatyag sang pagkahilingagawon, ilabi na kon malawig na nga tion ang ila paghulat. (Hulu. 13:12) Amo man bala sina ang imo ginabatyag kon kaisa? Ano ang makabulig sa aton nga mapalambo ukon mahuptan ang pagbatyag sang pagkahilingagawon sa mga hilikuton nga ginapahimo ni Jehova nga Dios kag ni Jesucristo sa aton karon?
Binagbinaga ang Aton Huwaran, si Jesus
5. Sa ano nga paagi ginpakita ni Jesus ang pagkahilingagawon sa iya ministeryo?
5 Si Jesucristo amo ang panguna nga halimbawa sang mga nagbatyag sang pagkahilingagawon. Ang isa ka rason sini bangod madamo sia sang dapat himuon sa sulod lang sang tatlo ka tuig kag tunga. Walay sapayan sini, mas madamo sing nahimo si Jesus para sa matuod nga pagsimba sangsa iban. Ginpakilala niya ang ngalan kag katuyuan sang iya Amay, ginbantala ang maayong balita sang Ginharian, ginbuyagyag ang pagkasalimpapaw kag butig nga mga panudlo sang relihiosong mga lider, kag ginbindikar niya ang pagkasoberano ni Jehova tubtob sa iya kamatayon. Wala sia sing gin-uyang nga tion sa paglakbay para magpanudlo, magbulig, kag magpang-ayo sa mga tawo. (Mat. 9:35) Si Jesus lamang ang nakahimo sing amo sina ka daku nga hilikuton sa malip-ot lang nga tion. Ginhimo gid ni Jesus ang iya bug-os nga masarangan.—Juan 18:37.
6. Sa ano nasentro ang kabuhi ni Jesus?
6 Ano ang nagpahulag kay Jesus nga magpanikasog sing lakas sa ministeryo? Base sa tagna ni Daniel, mahimo nahibaluan ni Jesus nga malip-ot lang nga tion ang gintalana ni Jehova para tapuson niya ang iya hilikuton. (Dan. 9:27) Suno sa gintagna, dapat niya tapuson ang iya ministeryo sa duta “sa tunga sang semana,” ukon pagligad sang tatlo ka tuig kag tunga. Wala madugay sa tapos sang iya pagsulod sa Jerusalem subong hari sang tigpamulak sang 33 C.E., si Jesus nagsiling: “Nag-abot na ang tion agod himayaon ang Anak sang tawo.” (Juan 12:23) Bisan pa nahibaluan ni Jesus nga nagahilapit na ang iya kamatayon, indi ina ang sentro sang iya kabuhi, ukon ang panguna nga rason kon ngaa nangabudlay sia sing lakas. Sa baylo, nagkonsentrar sia sa paghimo sang kabubut-on sang iya Amay kag sa pagpakita sang gugma sa katawhan. Ina nga gugma amo ang nagpahulag sa iya nga magtipon kag maghanas sang mga disipulo, kag ipadala sila para magbantala. Ginhimo niya ina agod mapadayon nila ang hilikuton nga ginsugdan niya kag mas madamo pa ang ila mahimo sangsa iya.—Basaha ang Juan 14:12.
7, 8. Ano ang reaksion sang mga disipulo ni Jesus sa ginhimo niya sa templo, kag ngaa ginhimo ini ni Jesus?
7 Maathag nga ginpakita sang isa ka hitabo sa kabuhi ni Jesus kon daw ano sia kakugi. Natabo ini sang maaga nga bahin sang iya ministeryo sa tion sang Paskua sang 30 C.E. Sang si Jesus kag ang iya mga disipulo nagkadto sa Jerusalem, nakita nila “ang mga nagabaligya sang mga baka kag mga karnero kag mga salampati kag ang mga manugbaylo sing kuarta nga yara sa ila pulungkuan.” Ano ang ginhimo ni Jesus, kag ano ang epekto sini sa iya mga disipulo?—Basaha ang Juan 2:13-17.
8 Ang ginhimo kag ginsiling ni Jesus sadto nga tion nagpahanumdom sa iya mga disipulo sang matagnaon nga pinamulong sa isa ka salmo ni David: “Ang kakugi sa imo balay naglamon sa akon.” (Sal. 69:9) Ngaa? Bangod ang ginhimo ni Jesus nagbutang sa iya sa daku nga katalagman. Ang mga saserdote, escriba, kag ang iban pa nga may awtoridad sa templo amo ang sa likod sang makahuluya nga pagnegosyo nga ginahimo didto. Bangod ginbuyagyag ni Jesus ang ila pahito, nangin kaaway sia sadtong relihiosong mga lider. Gani, husto gid ang ginsiling sang mga disipulo, maathag nga ginpakita ni Jesus ang ‘kakugi sa balay sang Dios’ ukon kakugi sa matuod nga pagsimba. Apang, ano bala ang kakugi? Tuhay bala ini sa pagbatyag sang pagkahilingagawon?
Ang Kinatuhayan sang Pagkahilingagawon kag Kakugi
9. Paano mahimo ilaragway ang kakugi?
9 Suno sa isa ka diksionaryo, ang “kakugi” amo ang “kalangkag kag matuod nga interes sa isa ka butang” kag nagakahulugan man ini sang kainit, kaimon, kag kapagsik. Huo, ini tanan nga tinaga mahimo gamiton sa paglaragway sa ministeryo ni Jesus. Ang Maayong Balita nga Biblia nagbadbad sini nga bersikulo nga: “Ang akon katutom sa imo Templo daw kalayo nga nagadabadaba sa sulod nakon.” Sa pila ka lenguahe sa Sidlangan, ang tinaga para sa “kakugi” literal nga nagakahulugan nga “mainit sing tagipusuon,” nga daw subong bala nga ang tagipusuon nagadabdab. Indi katingalahan nga nadumduman sang mga disipulo ang pinamulong ni David sang nakita nila ang ginhimo ni Jesus sa templo. Apang, ano ang nagpadabdab sa tagipusuon ni Jesus sa paghimo sina?
10. Ano ang kahulugan sang “kakugi” sa Biblia?
10 Ang tinaga nga “kakugi” sa salmo ni David naghalin sa Hebreong tinaga nga masami ginabadbad sa iban nga bahin sang Biblia subong “maimon” ukon “kaimon.” Kon kaisa ginabadbad ini sa New World Translation subong “nagapatuman sang eksklusibo nga debosyon.” (Basaha ang Exodo 20:5; 34:14; Josue 24:19.) Tuhoy sa sini nga tinaga, ang isa ka diksionaryo sa Biblia nagasiling: “Masami ini ginagamit sa kaangtanan sang mag-asawa . . . Subong nga ang bana ukon asawa may kinamatarong nga magbatyag sang kaimon sa isa kag isa, ang Dios may kinamatarong man sa pagpatuman sang eksklusibo nga debosyon sa mga ginapanag-iyahan Niya.” Gani, ang paggamit sang tinaga nga kakugi sa Biblia wala lamang nagapatuhoy sa kainit ukon kapagsik sa isa ka butang, subong sang ginapakita sang mga tawo sa ila paborito nga sport. Ang kakugi ni David isa ka positibo nga kaimon, nga nagapahangop sang indi pagtugot sang kaagaw ukon kahuy-anan, isa ka mabaskog nga balatyagon nga amligan ang isa ka maayo nga ngalan ukon tadlungon ang isa ka kahalitan.
11. Ano ang nagpahulag kay Jesus nga magpakita sing kakugi?
11 Husto gid ang mga disipulo ni Jesus sa pagpatuhoy sa pinamulong ni David sang nakita nila ang ginhimo ni Jesus sa templo. Si Jesus nangabudlay sing lakas indi bangod diutay na lang ang iya tion kundi bangod makugi sia—ukon maimon—para sa ngalan sang iya Amay kag para sa putli nga pagsimba. Sang nakita niya nga ginpakahuy-an kag ginpasipalahan ang ngalan sang Dios, nagpakita sia sing nagakaigo nga kakugi, ukon kaimon, kag nanghikot agod tadlungon ini. Sang nakita ni Jesus nga ginapigos kag ginahingalitan sang relihioso nga mga lider ang kubos nga mga tawo, napahulag sia sang iya kakugi nga paumpawan sila kag pakamalauton ang mapiguson nga relihiosong mga lider.—Mat. 9:36; 23:2, 4, 27, 28, 33.
Mangin Makugi Para sa Matuod nga Pagsimba
12, 13. Ano ang ginhimo sang mga lider sang Cristiandad sa karon (a) sa ngalan sang Dios? (b) sa Ginharian sang Dios?
12 Ang panimuot sang mga tawo sa pagsimba sa Dios sa karon pareho man sang panahon ni Jesus ukon mas malala pa gani. Halimbawa, dumduma nga ang una nga gintudlo ni Jesus sa iya mga sumulunod nga ipangamuyo amo ang tuhoy sa ngalan sang Dios: “Pakabalaanon ang imo ngalan.” (Mat. 6:9) Ginatudlo bala sang relihiosong mga lider, ilabi na sang klero sang Cristiandad, nga kilalahon ang ngalan sang Dios kag pakabalaanon ukon padunggan ini? Wala. Sa baylo, sala ang ila ginatudlo tuhoy sa Dios. Paagi sa pagtudlo sang Trinidad, pagkadi-mamalatyon sang kalag, kag kalayuhon nga impierno, ginapakita nila nga ang Dios misteryoso, indi mahangpan, kag mapintas. Nagdala man sila sang kahuy-anan sa Dios paagi sa ila makahuluya nga mga buhat kag pagkasalimpapaw. (Basaha ang Roma 2:21-24.) Dugang pa, ginhimo nila ang ila bug-os nga masarangan nga taguon ang ngalan sang Dios, kag gindula pa gani nila ini sa ila mga badbad sang Biblia. Sa amo, ginapunggan nila ang mga tawo nga mangin suod sa Dios kag magpalambo sang personal nga kaangtanan sa iya.—Sant. 4:7, 8.
13 Gintudluan man ni Jesus ang iya mga sumulunod nga ipangamuyo ang Ginharian sang Dios: “Magkari ang imo ginharian. Matuman ang imo kabubut-on sa duta, subong sang sa langit.” (Mat. 6:10) Bisan pa amo ina pirme ang ginapangamuyo sang mga lider sang Cristiandad, ginapilit gihapon nila ang mga tawo nga sakdagon ang pulitika kag ang iban pa nga institusyon sang tawo. Ginapakanubo man nila ang mga nagabantala kag nagapanaksi tuhoy sa sini nga Ginharian. Subong resulta, madamo sa nagapangangkon nga Cristiano ang wala na nagapakighambal tuhoy sa Ginharian sang Dios ukon nagatuo sa sini.
14. Paano ginabalewala sang mga klero sang Cristiandad ang talaksan sang Pulong sang Dios?
14 Sa iya pangamuyo sa Dios, si Jesus maathag nga nagsiling: “Ang imo pulong kamatuoran.” (Juan 17:17) Antes sang iya pagkayab sa langit, nagsiling si Jesus nga magatangdo sia sang “matutom kag mainandamon nga ulipon” para mag-aman sang espirituwal nga pagkaon sa iya katawhan. (Mat. 24:45) Bisan pa nangangkon ang mga klero sang Cristiandad nga sila ang gintulinan sang Agalon sa pagtudlo sang Pulong sang Dios, matutom bala nila ini nga ginatuman? Wala. Kundi para sa ila, ang ginasiling sang Biblia himuhimo lamang nga mga sugilanon ukon mito. Sa baylo nga pakan-on ang ila panong sang espirituwal nga pagkaon agod mahatagan sing kaumpawan kag kasanagan, ginapakalam sang mga klero ang dulunggan sang mga tumuluo paagi sa tawhanon nga mga pilosopiya. Dugang pa, ginabalewala nila ang moral nga mga talaksan sang Dios agod pasundan ang huyog sang mga tawo.—2 Tim. 4:3, 4.
15. Ano ang ginabatyag mo sa tanan nga ginhimo sang mga klero sa ngalan sang Dios?
15 Bangod sa tanan nga ginhimo sa ngalan sang Dios—madamo nga sinsero nga tawo ang nagbatyag sing kalugaw-an ukon nadulaan sing pagtuo sa Dios kag sa Biblia. Nangin biktima sila ni Satanas kag sang iya malaut nga sistema sang mga butang. Kon amo sini ang imo makita kag mabatian sa adlaw-adlaw, ano ang batyagon mo? Subong alagad ni Jehova, kon makita mo nga ginapakahuy-an kag ginapasipalahan ang ngalan sang Dios, indi ka bala mapahulag nga pangapinan ini? Kon makita mo ang sinsero kag bunayag nga katawhan nga ginadayaan kag ginahingalitan, indi ka bala mapahulag nga paumpawan sila? Sang nakita ni Jesus ang katawhan nga “ginpanitan . . . kag nag-alaplaag kaangay sa mga karnero nga wala sing manugbantay,” wala lamang sia nagbatyag sang kaluoy kundi ‘gintudluan niya sila sang madamo nga butang.’ (Mat. 9:36; Mar. 6:34) Gani, kaangay ni Jesus madamo gid kita sing rason nga mangin makugi para sa matuod nga pagsimba.
16, 17. (a) Ano dapat ang magpahulag sa aton nga magpanikasog sing lakas sa ministeryo? (b) Ano ang binagbinagon naton sa masunod nga artikulo?
16 Kon makugi kita sa aton ministeryo, may pinasahi nga kahulugan sa aton ang pinamulong ni apostol Pablo sa 1 Timoteo 2:3, 4. (Basaha.) Nagapangabudlay kita sing lakas sa ministeryo indi lamang bangod nahibaluan naton nga nagakabuhi na kita sa katapusan nga mga adlaw kundi bangod nahangpan man naton nga ini ang kabubut-on sang Dios. Luyag niya nga ang katawhan makatigayon sang sibu nga ihibalo sa kamatuoran agod makasimba sila kag makaalagad sa iya kag makatigayon sang pagpakamaayo. Napahulag kita nga manikasog sing lakas sa ministeryo, indi lamang bangod malip-ot na lang ang aton tion kundi bangod luyag naton padunggan ang ngalan sang Dios kag buligan ang katawhan nga mahibaluan ang iya kabubut-on. Huo, makugi kita para sa matuod nga pagsimba.—1 Tim. 4:16.
17 Subong katawhan ni Jehova, nahibaluan naton ang katuyuan sang Dios para sa katawhan kag sa duta. Mahimo naton mabuligan ang mga tawo nga makasapo sing kalipay kag pat-od nga paglaum sa palaabuton. Sarang naton mapakita sa ila kon paano maluwas kon laglagon na ang sistema sang mga butang ni Satanas. (2 Tes. 1:7-9) Sa baylo nga magbatyag sing kalugaw-an ukon kaluya sing buot bangod daw nagapalantang ang adlaw ni Jehova, dapat kita malipay nga may tion pa kita para mangin makugi sa matuod nga pagsimba. (Miq. 7:7; Hab. 2:3) Paano naton mapalambo ina nga kakugi? Binagbinagon naton ini sa masunod nga artikulo.
Mapaathag Mo Bala?
• Ano ang nagpahulag kay Jesus nga magpanikasog sing lakas sa ministeryo?
• Ano ang kahulugan sang “kakugi” sa Biblia?
• Ano nga mga hitabo sa karon ang nagapahulag sa aton nga mangin makugi para sa matuod nga pagsimba?
[Mga Pamangkot sa Pagtinuon]
[Retrato sa pahina 8]
Nagkonsentrar si Jesus sa paghimo sang kabubut-on sang iya Amay kag sa pagpakita sang gugma sa katawhan
[Retrato sa pahina 10]
May rason gid kita nga mangin makugi para sa matuod nga pagsimba
