Pyasakena Mutōtelo wa Bine
Pyasakena Mutōtelo wa Bine
“Byakwangula umbudimi i bivule bīne, nanshi bakuputuminamo i batyetye.” —MAT. 9:37.
1. Le ukashintulula namani kampeja-bukidi?
LANGA’PO bidi shi udi na mukanda usakilwa muntu kutanga’o enka mu difuku’dya. Le ukalonga namani? Ukandika’po amba “WA BUKIDIBUKIDI!” Wenda mwishinda ku kilaeno kya mvubu, ino nsaa ke mipite. Ukalonga namani? Ubanena shofele amba, “Peja’ko; twende BUKIDIBUKIDI!” Bine, shi udi na mwingilo ufwaninwe kwingila ino kitatyi kibapite, ukasela mutyima kūlu ne kupēlakana. Dityima ke ditu, koingila bukidibukidi na bukomo bonso. Kano ko kampeja-bukidi!
2. I mwingilo’ka le wa kampeja-bukidi kutabuka ku Bene Kidishitu ba bine dyalelo?
2 Ku Bene Kidishitu ba bine dyalelo, i kutupu mwingilo mukwabo wa kampeja-bukidi utabukile kusapula myanda miyampe ya Bulopwe ne kulonga bantu ba mizo yonso ke bana ba bwanga. (Mat. 24:14; 28:19, 20) Pa kupituluka mu binenwa bya Yesu, mwana bwanga Mako wāsonekele amba uno mwingilo ufwaninwe “kubadikila” kwingilwa, kumeso kwa mfulo kufika. (Mako 13:10) Kino bine i kyendele’mo. Yesu wānene amba: “Byakwangula umbudimi i bivule bīne, nanshi bakuputuminamo i batyetye.” Byakwangula kebilaijangapo; bifwaninwe kwangulwa pa kitatyi.—Mat. 9:37.
3. I bika biloñanga bavule pa kuyuka’mba mwingilo wa kusapula i wa kampeja-bukidi?
3 Mwingilo wa kusapula byoudi na mvubu uno muswelo, tufwaninwe kwiupa kitatyi kyetu, bukomo, ne kwiuta mutyima pakatampe pene. Kintu kya kutendelwa, bavule baloñanga kala namino. Bamo i bapēleje būmi bwabo mwa kwingidila mwingilo wa kitatyi kyonso bu bapania, bamishonele, nansha kwingila ku mobo a Betele kujokoloka ntanda yonso. Badi na bya kulonga bivule mu būmi bwabo. Padi i besuminwe bintu bivule ne kutanwa na bikoleja bingi. Nansha nankyo, Yehova wibeselanga madyese mavule. Twibasangadile. (Tanga Luka 18:28-30.) Bakwabo nabo, byo kebabwanyapo kwilunga ku mulongo wa basapudi ba kitatyi kyonso, bapityijanga kitatyi kilampe mu uno mwingilo upandija būmi mungya bukomo bwabo, kubadila’mo ne kukwasha betu bana bakapande.—Kup. 6:6, 7.
4. Mwanda waka bamo ke bakimbe kujimija mutyima wa kampeja-bukidi?
4 Enka motwekimwenanga, mutyima wa kampeja-bukidi wikalanga divule ukwatañene na kitatyi kishele’ko, kya kwingila, penepa ke mfulo. Tudi mu kitatyi kya ku mfulo, ne bukamoni buvule—bwa mu Bisonekwa ne mu mānga—bulombola’kyo patōka. (Mat. 24:3, 33; 2 Tem. 3:1-5) Kufika ne pano, i kutupu muntu uyukile kitatyi kine kikafika mfulo. Yesu pa kutela bintu bya ‘kuyukilapo’ bilombola “pamfulo ya panopantanda,” wāshintulwile amba: “Ne dyodya difuku nadyo kekudi muntu widiyūkile, nansha umo, shi dyuba ka, kadi shi dyuba pi? ehe, nansha bamwikeulu ba mūlu bene, poso’nka Tata.” (Mat. 24:36) O mwanda, bamo bakakomenwa kulama mutyima wa kampeja-bukidi mwaka ne mwaka, nakampata shi badi balamine’o mu kitatyi kilampe. (Nk. 13:12) Le nobe wiivwananga kyaba kimo uno muswelo? I kika kiketukwasha tutamije ne kulama mutyima wa kampeja-bukidi mu mwingilo witusakila Yehova Leza ne Yesu Kidishitu dyalelo?
Tutalei Yesu Kimfwa Kyetu
5. Yesu wālombwele mutyima wa kampeja-bukidi mu mwingilo mu miswelo’ka?
5 Mu bonso bālombwele mutyima wa kampeja-bukidi mu mwingilo wabo kudi Leza, Yesu Kidishitu ye kimfwa kitabukile bonso. Bubinga bumo bwaāikadile na mutyima wa kampeja-bukidi i mwanda wādi na bivule bya kulonga enka mu myaka isatu ne kipindi kete. Inoko, Yesu wālongele bivule mu mutōtelo wa bine kutabuka bantu bonso. Wāyukije dijina ne mpango ya Shandi, wāsapula myanda miyampe ya Bulopwe, wātanda patōka buzazangi ne mfundijo ya bubela ya bendeji ba bipwilo, ne kukwatakanya bubikadi bwa Yehova kufika ne ku lufu. Wādi unanga mu matanda mavule—ufundija, ukwasha, ne kundapa bantu. (Mat. 9:35) I kutupu muntu wālongele bintu bivule namino mu kitatyi kityetye nabya. Yesu wāingile bikomo kebikokejapo muntu mukwabo.—Yoa. 18:37.
6. Le i bika byādi bitele’ko Yesu mutyima kutabuka?
6 I bika le byātonwene Yesu engile pampikwa kukōka mu bula bwa mwingilo wandi? Mungya bupolofeto bwa Danyele, Yesu wādi uyukile bula bwa kitatyi kyaādi wa kwingila mwingilo wandi mungya kalandadiye ka Yehova. (Dan. 9:27) O mwanda, enka mokilombwedilwe, mwingilo wandi pano panshi wādi wa kufula “mu kipindi kya yenga’wa,” nansha myaka isatu ne kipindi. Yesu pa kupwa kutwela mu Yelusalema bya ntumbo ku muketeko wa 33 K.K., wānene amba: “Mwaka ubafika wa Mwanā muntu atumbijibwe ntumbo.” (Yoa. 12:23) Nansha Yesu byaādi uyukile amba lufu lwandi ke ludi pabwipi, kātele’kopo mutyima bipitepite, bu bubinga bubajinji bwa kwingidila bikomo. Ino, wādi utele mutyima ku kwingidija mukenga o-onso mwanda wa kulonga kiswa-mutyima kya Shandi ne kulombola buswe ku bantu nandi. Buno buswe bwāmutonwene akongakanye ne kufundija bana ba bwanga, kwibatuma mu kampanye ka busapudi. Wālongele namino mwanda wa bendeleje mwingilo waāshilwile ne kuvuija mingilo mikatampe kutabuka ne yaālongele mine.—Tanga Yoano 14:12.
7, 8. Le bana ba bwanga pa kumona Yesu utōkeja tempelo bālongele’po namani, ne mwanda waka Yesu wālongele nabya?
7 Kinkumenkume kimo kyālongekele mu būmi bwa Yesu kyālombwele patōka mwādi mwikadile bupyasakane bwandi. Kwādi ku ngalwilo kwa mwingilo wandi, kitatyi kya Pashika 30 K.K. Yesu ne bandi bana ba bwanga bāendele mu Yelusalema, bāmona mu tempelo “bantu . . . bēpota bañombe, ne mikōko, ne bankunda, ne bēshintamo ndalama nabo bashikete monka.” Lelo Yesu wālongele’po namani, ne kino kyāpele bandi bana ba bwanga milangwe’ka?—Tanga Yoano 2:13-17.
8 Byālongele Yesu ne byaānene dyodya difuku byāvulwije na bubine bana ba bwanga binenwa bya bupolofeto bya mu mutōto umo wa Davida amba: “Kupyasakena nzibo yobe kwansasamwine.” (Mit. 69:10, Bisonekwa Bitokele) Mwanda waka bālangile namino? Mwanda byālongele Yesu kwādi kwitūla mu kyaka kikatampe. Ne kadi, bakatampe ba mu tempelo—bapidishitu, basonekeji, ne bakwabo—bādi bamwena mu bya busunga byampikwa kwendela’mo byādi bilongwa’mo. Yesu pa kutanda ne kutyumuna nkuku yabo, wādi witūla bu walwana na bendeji ba bipwilo ba mu kine kitatyi’kya. Enka mwājingulwidile’kyo bana ba bwanga, ‘bupyasakane pa mwanda wa njibo ya Leza,’ nansha bupyasakane pa mwanda wa mutōtelo wa bine, bwādi bumweke patōka. Ino, le bupyasakane i bika? Le i bwishile na kampeja-bukidi?
Kampeja-Bukidi ne Bupyasakane I Bishile
9. Le bupyasakane bubwanya kushintululwa namani?
9 Dikishonele dimo dishintulula “bupyasakane” bu “bukankamane ne kuta mutyima bikatampe mu kulonga kintu kampanda,” kadi dileta bishima bidi na buluji bumo bonka pamo bwa kisanso, kininga, kutakamana, ne buzanzamuke. Na bubine mwingilo wa Yesu ubwanya kutelelwa bino bishima byonso. O mwanda, mu bwalamuni bumo (Today’s English Version) uno vese i mwalamunwe namino: “Lulamato lwami ku njibo yobe, Abe Leza, ludyendyemuka munda mwami pamo bwa mudilo.” Kintu kisangaja, mu ndimi imo ya Kutunduka, kishima “bupyasakane” i kibundwe na bishima bibidi bishintulula pa bute pa bute “mutyima mukabe,” na ao udyendyemuka. Ke kya kutulumukapo shi bana ba bwanga bāvulukile binenwa bya Davida kitatyi kyobāmwene byālongele Yesu mu tempelo. Penepo, i bika byādyendyemwine mudilo mu mutyima wa Yesu, byāmutonona alonge nabya?
10. Le mungya Bible, “bupyasakane” budi na buluji’ka?
10 Kishima “bupyasakane” mu mutōto wa Davida i kitambe ku kishima kya Kihebelu kyalamunwanga divule bu “wa mukao” nansha “mukao” mu bipindi bikwabo bya Bible. Kyaba kimo bwalamuni New World Translation bwalamuna kino kishima bu “kulamatwa enka aye kasuku kandi kete.” (Tanga Divilu 20:5; 34:14; Yoshua 24:19.) Dibuku dimo dishintulula bishima bya mu Bible dinena pa kino amba: “Kingidijibwanga mu myanda itala busongi . . . Enka mwikadilanga mukao wa mulume nansha mukaji na bukomo bwa kulandula kintu kimufwaninwe enka aye kete, Leza nandi ulandulanga kintu kimufwaninwe, ne kubingija’kyo, ku bantu Bandi bunka bwandi.” Nanshi, kishima bupyasakane mungya Bible kidi na buluji butabukile bukankamane nansha buzanzamuke bwa kulonga kintu kampanda, na mwikadilanga bantu basenswe makayo kabidye. Bupyasakane bwa Davida i mukao mwendele’mo, ko kunena’mba, kuleka kutala kilomo-nyeka kwitāka na Yehova nansha kumubenga, ulwila kulama dijina diyampe nansha kōlola kibi.
11. I kika le kyātonwene Yesu engile na bupyasakane?
11 Bana ba bwanga ba Yesu bānene bya bine pa kukwatañanya binenwa bya Davida na byobāmwene Yesu ulonga mu tempelo. Yesu wādi uputumina mu mwingilo ke pa mwandapo’tu wa kitatyi kityetye kyādi kimushadile’ko ino i mwanda wādi mupyasakane—nansha na mukao—wa dijina dya Shandi ne mutōtelo utōka. Kitatyi kyaāmwene dijina dya Leza ditukwa ne kupunikwa, wādi na bubinga bwa kupyasakena, nansha kukwatwa mukao, nandi wālonga’po kintu mwanda wa kolola myanda. Yesu paāmwene bantu ba munshi basusulwa ne kumweshibwa malwa na bendeji ba mitōtelo, bupyasakane bwandi bwāmutonwene atūkije bantu mutyima ne kutanda patōkelela boba bendeji ba bipwilo ba kasusu.—Mat. 9:36; 23:2, 4, 27, 28, 33.
Pyasakena Mutōtelo wa Bine
12, 13. Lelo i bika bilongele bendeji ba bipwilo bya Kine Kidishitu dyalelo pa bitala (a) dijina dya Leza? (b) Bulopwe bwa Leza?
12 Ngikadila ya bipwilo bidi’ko dyalelo i mibi kutabuka enka na ya mu mafuku a Yesu. Kimfwa, vuluka kintu kibajinji kyāfundije Yesu balondi bandi kulombela kitala dijina dya Leza amba: “Dijina dyobe dijile kijila.” (Mat. 6:9) Le ke tudi bamone bendeji ba bipwilo, nakampata bendeji ba Kine Kidishitu, bafundija bantu bayuke dijina dya Leza ne kwidijidika, nansha kwidilēmeka? Mhm, ino bamwekejanga Leza bibi na mfundijo ya bubela pamo bwa Busatu, kubulwa kufwa kwa muya, ne kalunga-nyembo ka mudilo, bamwekeja Leza bu mukomo kuyuka ne kwimvwanija, wa nshikani, ne ñumauma. Kadi bapunikijanga Leza na bilongwa bya kiboja ne buzazangi. (Tanga Loma 2:21-24.) Kadi, baloñanga bukomo bwabo bonso bwa kufya dijina dya Leza, beditalula enka ne mu malamuni abo a Bible. Namino, bakankajanga bantu kufwena kudi Leza ne kupwana nandi.—Yak. 4:7, 8.
13 Yesu wāfundije ne bandi bana ba bwanga balombele Bulopwe bwa Leza amba: “Bulopwe bobe bufike. Muswidile mutyima obe mūlu ne panopantanda pene i monka.” (Mat. 6:10) Nansha bendeji ba bipwilo bya Kine Kidishitu byo bapitulukanga divule mu ino milombelo, bakankamikanga bantu bakwatakanye malongolodi a politike ne a bantu. Kibi kutabuka, bapunikanga boba balonga bukomo bwa kusapula ne kutwala bukamoni bwa buno Bulopwe. Penepa, mu boba betela bu Bene Kidishitu, kebakisambilangapo pa Bulopwe bwa Leza, nansha kwibukulapila kwine.
14. Bendeji ba bipwilo bya kine Kidishitu batyimpilanga panshi Mwanda wa Leza namani?
14 Mu milombelo yandi kudi Leza, Yesu wānene patōka amba: “Mwanda obe kyo kyabinebine.” (Yoa. 17:17) Kadi kumeso kwa kukanda mūlu, Yesu wālombwele amba ukatūla’ko “umpika wa binebine, udi na manwa” wa kuleela bantu bandi bidibwa bya ku mushipiditu. (Mat. 24:45) Nansha bendeji ba Kine Kidishitu byo betela bukidi amba bo balamine Mwanda wa Leza, le bine belombolanga bu ba binebine mu mwingilo wibapele Mfumwabo? Nansha dimo. Balambikwanga yoya itela Bible bu mfumo. Pa kyaba kya kudisha luombe bidibwa bya ku mushipiditu, mwa kwibakankamikila ne kwibapa buyuki, bendeji bakanyanga matwi a ba mu bipwilo byabo na mafilozofi a bantu. Kadi, batyimpilanga panshi misoñanya ya Leza ya mu mwikadilo pa kwitūdila’ko mwikadilo obeta bu mupya.—2 Tem. 4:3, 4.
15. Le wiivwananga namani pa bilonga bendeji ba bipwilo mu dijina dya Leza?
15 Mwanda wa bino byonso bilongwa—bitelwa bu biloñwanga mu dijina dya Leza utelelwe mu Bible—bantu ba mityima myoloke i batyumunwe mityima nansha kujimija jimijē lwitabijo mudi Leza ne mu Bible. Abakwatwa na Satana ne ngikadilo yandi mibi ya bintu. Pomonanga ne kwivwana bintu bya uno muswelo bilongeka difuku ne difuku, le wiivwananga namani? Byodi mwingidi ba Yehova, kitatyi kyomona dijina dya Leza ditukwa ne kufutululwa, le mutyima obe ukutononanga kulonga’po kintu mwanda wa kolola kibi? Kitatyi kyomona bantu ba mityima myoloke batyumukwa mityima ne kususulwa, le kutononwangapo kusenga boba ba mityima mityumuke? Yesu kitatyi kyaāmwene bantu ba mu abo mafuku “basusukile ne kususuka, ne kusansana badingakana pamo na mikōko yampikwa mukumbi,” kēbakwatyilwepo enka lusa kete. Ino wādi “kebafundija bingi bingi.” (Mat. 9:36; Mako 6:34) Tudi na bubinga bwa kupyasakena mutōtelo utōka, na mwālongele Yesu.
16, 17. (a) I bika biketutonona tutakamene mu mwingilo? (b) I bika byotukabandaula mu kishinte kilonda’ko?
16 Shi tumone mwingilo wetu uno muswelo, binenwa bya mutumibwa Polo bitanwa mu 1 Temote 2:3, 4 bikekala na buluji bwa pa bula. (Tanga.) Tuputuminanga mu mwingilo ke mwandapo’tu tudi mu mafuku a mfulo ino mwanda tuyukile amba i kiswa-mutyima kya Leza. Usakanga bantu bonso bafike pa kuyuka bubinebine amba nabo befunde kumutōta, kumwingidila ne kweselwa nandi. Mutyima wetu witukunkanga tutakamene mu mwingilo, bubinga bubajinji ke kitatyipo kyatyepa, mhm, ino i mwanda tusakanga kulēmeka dijina dya Leza ne kukwasha bantu bayuke kiswa-mutyima kyandi. Tupyasakenine mutōtelo wa bine.—1 Tem. 4:16.
17 Byotudi bantu ba Leza, twi beselwe pa kuyuka bubinebine butala mpango ya Leza pa bantu ne ntanda. Tudi na muswelo wa kukwasha bantu batane nsangaji ne lukulupilo lwa bine lutala mafuku a kumeso. Tukokeja kwibalombola dishinda dya kupandila’mo kitatyi kisa konakanibwa ngikadilo ya bintu ya Satana. (2 Tes. 1:7-9) Pa kyaba kya kufītwa nansha kukōka pa difuku dya Yehova dimweka bu dibaije, tufwaninwe kusangala mwanda tukidi na kakyaba ka kupyasakena mutōtelo wa bine. (Mika 7:7; Hab. 2:3) I muswelo’ka otukatamija buno bupyasakane? Tusa kubandaula kino mu kishinte kilonda’ko.
Le Ukokeja Kushintulula?
• I bika le byātonwene Yesu engile pampikwa kukōka mu mwingilo wandi?
• Le mungya Bible, kishima “bupyasakane” kidi na buluji’ka?
• Le i bika byotumona dyalelo bifwaninwe kwitutonona tupyasakene mutōtelo wa bine?
[Bipangujo bya Kifundwa]
[Kifwatulo pa paje 16]
Yesu wātele mutyima ku kulonga kiswa-mutyima kya Shandi ne kulombola buswe ku bantu nandi
[Kifwatulo pa paje 18]
Tudi na bubinga bonso bwa kupyasakena mutōtelo wa bine