Ikalenu Neyena Mukudifukula Kwalala
Ikalenu Neyena Mukudifukula Kwalala
“Mbutu jajivulu jinahi dehi, ilaña akwakukalakala anakehi.”—MAT. 9:37.
1. Munateli kulumbulula ñahi izu dakunyakala?
FWIKIJENU nenu mukweti mukanda wunakukeñeka muntu mukwawu kuzatilahu swayi henohu itañwa kanda dihumi. Chumanyi chimukwila? Mukusonekahu nenu “NYAKALENU!” Neyi munakuya nakudimona namuntu imwadikana nindi, ilaña munalabi. Chumanyi chimukwila? Mukumuleja ñendeshi nenu, “Mwani endeshenuku; NYAKALENU!” Neyi kudi chuma chimunakukeña kwila ilaña mpinji yinamani, mukushaku muchima nikwakamena. Muchima hiwukusweja kuha mwivumu, himukusweja kudikita. Dikwila nawu munakunyakala!
2. Mudimwinyi watela kuzatawu akwaKristu alala makonu nakunyakashana?
2 Mudimu wakushimwina nsañu yayiwahi yaWanta nikwilisha atumbanji akunyunza yejima himudimu wazatañawu akwaKristu alala makonu nakunyakala. (Mat. 24:14; 28:19, 20) Kambanji Maku wasonekeli mazu ahosheliyi Yesu nindi iwu mudimu atela ‘kusambila’ kuwuzata henohu kukuma kanda kwinzi. (Maku 13:10) Dichi chichatela kwikala. Yesu wahosheli nindi: “Mbutu jajivulu jinahi dehi, ilaña akwakukalakala anakehi.” Mudimu wakumuna hiwunateli kuhembelelaku; ilaña antu atela kumuna henohu chilaka kanda chimani.—Mat. 9:37.
3. Yumanyi yineluwu antu amavulu hakwila nawu azati mudimu wakushimwina nakunyakala?
3 Chineli mudimu wakushimwina walema nankashi kudi etu, twatela kwikala nampinji yeneni nikuzata nañovu nikushaku muchima nankashi. Dichi tunakuyisakilila amana kwetu niahela anakudikita iwu mudimu. Antu amakwawu anapeleshuku chihandilu chawu kulonda atweshi kukalakala mudimu wampinji yejima chidi neyi wupayiniya hela wumishonali hela kuzatila hamutayi. Wenawa amana kwetu azataña nankashi muniwu mudimu. Hadaha kudi yuma yayivulu yashiyawu, nawa anakumona kukala kwakuvulu. Ilaña, Yehova wayikiswilaña nankashi. Komana twatela kuyisakilila hanyidimu yinakudikitawu. (Tañenu Luka 18:28-30.) Hela chakwila anakwetu niahela amakwawu hiyakwakushimwina ampinji yejimaku, ilaña adikitaña chikupu mumudimu wakupulwisha antu, mudimu wunabombelumu kukwasha anyanetu kulonda akapuluki.—Kuhit. 6:6, 7.
4. Muloñadi antu amakwawu chakañenyañawu kuzata yuma nakunyakala?
4 Neyi chitunamoni, kakavulu kuzata mudimu nakunyakala chakeñekaña kwiluka mpinji yinashaluku, nikukuma kwampinji. Tunakushakama mumpinji yakukuminina, nawa tukweti wunsahu wawuvulu wamuNsona niwayuma yamwekeni kumashiita wunakumwekesha nawu tunakushakama mumpinji yakukuminina. (Mat. 24:3, 33; 2 Tim. 3:1-5) Hela chochu, kwosi muntu weluka mpinji yayeni yamba kakuma nyaka yamakonuku. Hakushimuna yuma yidi ‘muchinjikijilu’ ‘chakwiluka nachu kukuma kwanyaka yamakonu,’ Yesu wahosheli hatooka nindi: ‘Itañwodu hela mpinji oyu kwosi wayilukaku, hela añelu amwiwulu, chiña Tata hohu.’ (Mat. 24:36) Chineli kwosi muntu weluka, antu amakwawu chinateli kuyikalila kwila yuma mukunyakala chaaka nichaaka, sweje-e neyi adiña nayitoñojoka yamuchidiwu hadi yaaka yayivulu. (Yish. 13:12) Komana dichimwatoñojokaña mpinji jikwawu? Chumanyi chikutukwashaku kwikala namuchima wakuzata nakunyakala mudimu watwinkawu Yehova Nzambi niYesu Kristu nawu tuzati makonu?
Mwimbujolenu Yesu, Chakutalilahu Chetu
5. Munjilanyi mwamweniyi Yesu mudimu wakushimwina nindi watela kuwuzata mukunyakala?
5 Yesu Kristu wemika chakutalilahu chachiwahi, diyi wembujolañawu antu ejima adikitaña mumudimu waNzambi nakunyakala. Chuma chimu chamuleñeleli yazateña nakunyakala, muloña wadiña nanyidimu yayivulu yateleleli kuzatayi muyaaka yisatu nachikunku hohu. Hela chochu, Yesu wakoñeli yuma yayivulu mukudifukula kwalala kubadika antu ejima. Watiyakesheli ijina daTata yindi ninkeñelu yindi, washimwinini nsañu yayiwahi yaWanta, wafuñunwini tufuta twawanfwikiji nintañishilu yakutwamba yatañishileñawu anlomboli amunsakililu nawa watuumbakesheli chiyuulu chaYehova ndo-o nikukufwa kwindi. Yesu wadiheni kwendujola mumudimu wakutañisha antu, kuyikwasha nikuyuka. (Mat. 9:35) Kwosi muntu wazatahu dehi mudimu wamuchidiwu mukapinji kantesha. Yesu wadikitileña nankashi.—Yow. 18:37.
6. Indi Yesu washili muchima hachumanyi?
6 Chumanyi chamuleñeleli Yesu kudikita nankashi mumudimu windi wakushimwina? Kwesekeja nawuprofwetu waDanyeli, Yesu welukili mpinji yasheliyi nayu yakukalakala mudimu windi kwesekeja nampinji yapimayi Yehova. (Dan. 9:27) Neyi chitunamoni, mudimu windi wahamaseki wateleleli kumana “hakachi kamulungu,” hela hanyima yayaaka yisatu nachikunku. Chimwahitili mafuku antesha kufuma heñililiyi muYerusalema munjila yakushinda munooña yachaaka cha 33 C.E., Yesu wahosheli nindi: “Mpinji yakulemeshawu Mwana kamuntu yenza dehi.” (Yow. 12:23) Hela chakwila Yesu welukili nindi wadiñi kwakwihi nakufwa, hashili maana haniyi nsañuku, nawa bayi neyi dikwamuleñeleli yazateña nañovuku. Ilaña, washili muchima hakuzatisha mpinji yantesha yashaliluku hakwila yuma yakeñañayi Tata yindi nikukeña akwawu antu. Kukeña kwamuleñeleli yatachiki kupompesha nikudizisha atumbanji nikuyitemesha mumudimu wakushimwina. Wakeñeleña nindi atumbanji twindi akatwalekuhu kukalakala mudimu watachikiliyi nikukoña nyidimu yamaneni kubadika yakoñeliyi.—Tañenu Yowanu 14:12.
7, 8. Indi atumbanji elili ñahi chelili Yesu yatookeshi mutembeli, nawa muloñadi Yesu chakoñeleliyi chuma chamuchidiwu?
7 Kudi chuma chimu chamwekeni muchihandilu chaYesu chamwekeshaña nawu Yesu wadiña neyena. Chamwekeni muyaaka yatachi yakutachika mudimu windi, muchilaaka chaPaseka mu 30 C.E. Yesu niatumbanji twindi ayili kuYerusalema nawa amweni mutembeli “antu adi nakulandisha añombi ninyikoku nitupompa; akwakuhimpa mali anashakami.” Indi Yesu welilidi, nawa chuma cheliliyi chaleñeleli atumbanji twindi kwiladi?—Tañenu Yowanu 2:13-17.
8 Chuma chakoñeliyi Yesu nimazu ahosheliyi haniyi mpinji aleñeleli atumbanji kwanuka mazu awuprofwetu amwisamu daDavidi akwila nawu: “Iyena dinatiyilaña itala deyi kumuchima dinañudyi; nimatuka anana akutukili ananshikenami.” (Mas. 69:9) Muloñadi? Muloña chuma cheliliyi Yesu chadi kumuletela kukala kweneni. Akulumpi jatembeli, atupristu, ansoneki niantu amakwawu, diwu adiña namudimu wakuselujola mwawanineñawu mali amavulu hatembeli. Kuhitila mukufuñununa nikulekesha tufuta twawu, Yesu wadiña nakudokwela makala akesi kudi akulumpi jansakililu. Kwesekeja nachamwenuwu chikupu atumbanji yuma yamwekeni, ‘iyena detala daNzambi,’ hela netu iyena dakukeña kudifukula kwalala damwekeneni muyuma yakoñeliyi. Indi iyena hichumanyi? Komana dambuka nakwila yuma mukunyakala?
Chaambu Chidi Hakunyakala Nikwikala Neyena
9. Indi iyena tunateli kudilumbulula ñahi?
9 Dikishonali yimu yalumbulula izu dakwila nawu “iyena” nawu “hikwikala nampwila hela muchima wakufwila chuma,” hela “kwikala neyena dakumuchima dakwila chuma” neyi kwiji muchima wunakuha nakesi. Eñañi, awa mazu itunashimuni amwekeshaña chatiyileñayi Yesu hamudimu wakushimwina. Dihafuma Bayibolu yaToday’s English Version kuhosha haniyi vasi nawu: “Kwakama itala deyi, Eyi Nzambi, kwañochaña neyi kesi.” Dichaleñeleli atumbanji kwanuka mazu ahosheliyi Davidi chamwenuwu yuma yakoñeliyi Yesu hatembeli. Hanu dinu, yumanyi yaleñeleleña muchima waYesu wutaateña neyi kesi, nikumusañumuna kwila yuma yakoñeliyi?
10. Indi izu dakwila nawu “iyena” dazatishawu muBayibolu datalisha mudihi?
10 Izu dakwila nawu “iyena” didi mwisamu daDavidi dafuma kwizu dachiHeberu davula kubalumunawu nawu “mukawu” munsona jikwawu jamuBayibolu. Mpinji jikwawu Bayibolu yaNew World Translation yadizatishaña nawu “kudifukula kudi Nzambi hohu.” (Tañenu Kwidika 20:5; 34:14; Yoshuwa 24:19.) Dikishonali yimu yalumbulula mazu amuBayibolu yahosha hanidi izu nawu: “Idi izu adizatishaña kudi antu adisumbula . . . Neyi chochatiyañayi iyala hela mumbanda mukawu nindi mwinikwindi windi hohu nkawindi, niNzambi dichakonkomwenañayi, nawa wayiñishaña mwahoshañayi, hadi antu jindi.” Dichi izu dazatishawu muBayibolu nawu iyena dabadika heyena hela muzañalu wutwatiyaña hachuma chitunakufwila, neyi chatiyañawu antu amavulu anakutala yisela yakeñawu. Iyena hela mukawu watiyiliyi Davidi wadiña wawuwahi, muloña wakeñeleña kulekesha antu kuzuñañana nikuleta kasawutu, wafwilileña nankashi kuhemba ijina dadiwahi hela kufumishahu kutama.
11. Chumanyi chamuleñeleli Yesu kudikita nañovu?
11 Atumbanji twaYesu ahosheli mwalala hakwesekeja mazu ahosheliyi Davidi nachuma chamwenuwu Yesu nakwila hatembeli. Yesu wadikitileña nankashi muloña mpinji yakeheli nawa cheñi wadiña neyena hela watiyilena mukawu, muloña wejina daTata yindi nawa wakeñeli kudifukula kwalala. Chamweniyi nindi antu anakusawula ijina daNzambi, iyena hela mukawu hiwukumudya kumuchima nawa wazatili nañovu nakufumishahu kasawutu. Yesu chamweniyi atuzweñi anakuyimwesha ikezeñi nikuyikuzañesha kudi akulumpi jansakililu, iyena dadiñiyi nadu damuleñeleli kukwasha awa antu nikuhosha chakadi woma hakuyinka nyiloña akulumpi jansakililu alukambu.—Mat. 9:36; 23:2, 4, 27, 28, 33.
Ikalenu Neyena Mukudifukula Kwalala
12, 13. Indi akulumpi jansakililu yaKristendomu anelidi makonu kutalisha (a) Hejina daNzambi? (b) Wanta waNzambi?
12 Yililu niyitoñojoka yawantu aditenaña nawu akakwitiya yinakutaminaku, hela yinabadiki yililu yawantu adiñaku mumafuku aYesu. Chakutalilahu, anukenu nenu Yesu wasambilili kuleja atumbanji twindi kulomba nikwakamena ijina daNzambi nindi: “Tata yetu wekala mwiwulu, ijina deyi dijili.” (Mat. 6:9) Komana twayimonahu dehi akulumpi jansakililu, sweje-e anlomboli amuKristendomu, anakuleja antu kulonda amwiluki Nzambi hejina nikudilemesha, hela kudituumbakesha? Akayi mwani, ilaña amusawulaña Nzambi nantañishilu yawu yakutwamba yidi neyi Anzambi asatu, wumi hiwafwañaku, kesi kahelu nintañishilu yakwila nawu Nzambi himuntu wakala kwiluka, wawukatu, nawa woma muchima. Cheñi amusawulaña Nzambi nayishimashima yakoñañawu niwunfwikiji. (Tañenu Aroma 2:21-24.) Kubombelahu cheñi, aneseki nañovu jawu jejima kusweka ijina daNzambi, nikudifumisha mumaBayibolu awu abalumunañawu. Anakañeshi antu kukundama kwakwihi naNzambi nikukwata wubwambu nayena.—Yak. 4:7, 8.
13 Yesu walejeli cheñi atumbanji twindi kulombela Wanta waNzambi nindi: “Wanta weyi winzi. Muchima weyi awili hamaseki neyi chawilañawu mwiwulu.” (Mat. 6:10) Hela chakwila kudi akulumpi jansakililu yaKristendomu kulomba kwamuchidiwu kwekala neyi kamina, akonkomwenaña antu kudiñija munsañu jamapolitiki ninyitayi yikwawu yakutuña kudi antu. Kubombelahu, asekeshaña antu afwilaña kushimwina nikuhana wunsahu waniwu Wanta. Chinafumimu, antu amavulu aditenaña nawu hiyakwaKristu, aleka dehi kuhanjeka haWanta waNzambi nawa hiyawukuhwelelaku.
14. Indi akulumpi amuKristendomu adiwulaña ñahi Izu daNzambi?
14 Hakulomba kudi Nzambi, Yesu wahosheli chachiwahi nindi: “Mazu eyi hinsañu yalala.” (Yow. 17:17) Henohu kanda yafunti mwiwulu, Yesu wahosheli nindi wukatonda ‘nduñu wamaana nikashinshi’ wakaloñeshelaña antu jindi yakudya yakuspiritu. (Mat. 24:45) Hela chakwila anyakalaña kuhosha nawu wena diwu anduñu Ezu daNzambi, komana akulumpi amuKristendomu akalakalaña nakashinshi mudimu wayinkawu kudi Mwanta? Inehi. Ahoshaña nawu nsañu yamuBayibolu hitwanu hohu. Chatela adyisheña anyikoku jawu yakudya yakuspiritu, nakuyikundeja nikuyizañalesha, wena kwawu akuminaña dakuuwa antu jawu kumatu nantañishilu yawantu. Cheñi, anadiwuli nshimbi jaNzambi jajiwahi nawa akoñaña mwenimu kulonda abuleña kuneñesha antu jawu atoñojokeña nawu akweti yililu yayiwahi.—2 Tim. 4:3, 4.
15. Mwatiyaña ñahi hakumona yuma yejima yineluwu akulumpi jansakililu mwijina daNzambi?
15 Hamuloña wayuma yejimiyi yinakoñeluwu mwijina daNzambi washimunawu muBayibolu, antu amavulu ashinshika anakuneña nankashi nawa analeki kumukuhwelela Nzambi niyuma yahosha Bayibolu. Anafwi mumuhetu waSatana niituña dindi datama. Neyi mumona nikutiya yuma yamuchidiwu yinakumwekana hefuku hefuku, mwatiyaña ñahi? Hakwikala kambuña Yehova, neyi antu anakusekesha ijina daNzambi, komana himwafwilaña kufumishahu kasawuntu kamuchidiwuku? Neyi mumona antu alumbuluka nawa ashinshika anakuyidimba nikuyikuzañesha, komana mwafwilaña kukundeja antu amuchidiwu anakukabishawuku? Yesu chamweniyi antu “akabakeni, apalañeni neyi nyikoku yakadi kabiña,” hayitiyilili hohu wushonaku. Ilaña, ‘watachikili kuyileja yuma yayivulu.’ (Mat. 9:36; Maku 6:34) Anetu nawa twatela kwikala neyena mukudifukula kwalala neyi chadiñayi Yesu.
16, 17. (a) Chumanyi chatela kutwinka iyena dakudikita mumudimu wakushimwina? (b) Mpanjinyi yitukahanjekahu muchibaaba chinalondeluhu?
16 Neyi twikala neyena dakudikita mumudimu wakushimwina, mazu ahosheliyi kapostolu Pawulu ekala ha 1 Timotewu 2:3, 4 akutuleñela kwikala namuchima wakudikita chikupu. (Tañenu.) Twashimwinaña nankashi muloña tudi mumafuku akukuminina nawa cheñi tweluka netu diyi nkeñelu yaNzambi. Nakukeña antu ejima eluki chalala kulonda atachiki kudifukula kudi yena nikumukalakela kulonda akayikiswili. Twadikitaña nankashi mumudimu wakushimwina bayi hamuloña wakukeha kwampinji yinashalukuku, ilaña twakeñaña kulemesha ijina daNzambi nikukwasha antu kulonda eluki yuma yakeñañayi. Twekala neyena mukudifukula kwalala.—1 Tim. 4:16.
17 Hakwikala antu jaYehova, tweluka chalala hayuma yafuukulayi Nzambi kumuchidi wamuntu niiseki. Tweluka njila yakukwashilamu antu kulonda ekali namuzañalu nikuchiñeja yuma yikamwekana kumbidi. Tunateli kuyileja chatela kubatamawu hampinji yakajilumunawu ituña daSatana. (2 Tesa. 1:7-9) Chatela tuhilashaneña nikuneña hamuloña wakushimbula kwefuku daYehova, twatela kuzañalala netu kuchidi mpinji yakwikala neyena mukudifukula kwalala. (Mika 7:7; Hab. 2:3) Tunateli kwikala ñahi neyena mukudifukula kwalala? Iyi diyi mpanji yitwakahanjekahu muchibaaba chinalondeluhu.
Munateli Kulumbulula?
• Chumanyi chamuleñeleli Yesu kudikita nankashi mumudimu windi wakushimwina?
• Izu dakwila nawu “iyena” dazatishawu muBayibolu datalisha mudihi?
• Yumanyi yitunakumona makonu yikutuleñela kwikala neyena mukudifukula kwalala?
[Malwihu aKuzatisha haKudiza]
[Mwevulu wudi hefu 8]
Yesu washili muchima hakwila nkeñelu yaTata yindi nikukeña akwawu antu
[Mwevulu wudi hefu 10]
Anetu twatela kwikala neyena mukudifukula kwalala