Kwon Kijejeto kin Kabuñ eo Emol

“Elap jonikõn, a eiet dri jerbal.”​​​—MATU 9:​37.

1. Enaj ewi wãwen am kemelele kin ekaiuriur?

 EOR juõn peba eaurõk kwoj aikwiji an juõn lale mokta jen jemlokõn ran eo. Ta eo kwonaj kõmõne? Kwonaj kar je ilo peba eo “JUÕN MENIN EKAIURIUR!” Kwoj etal ñõn juõn am appointment eaurõk ak kwo rumij. Ta eo kwonaj kõmõne? Kwonaj kar jiroñ armij eo ej kattõre wa eo ilo ien eo, “Joij im mõkõj bwe ij KAKAIURIUR!” Aet, ñe eor juõn jerbal kwoj aikwij kõmõne im ebak ñõn ien eo ej aikwij rerelok, kwonaj kar ikũmkũm. Kiõ elaplok wõt am ikũmkũm im kwoj ekaiuriur ilo am jerbal im kate yuk joñõn wõt maroñ. Eñin wãwen ekaiuriur!

2. Ta jerbal eo me elap an dri Kristian ro remol ekaiuriur kake ranin?

² Ranin, jerbal eo me elap an dri Kristian ro remol ekaiuriur kake ej jerbal in kwalok nan kin nuuj eo emõn kin Ailiñ eo im kõmõn dri kalor ro ilo ailiñ ko otemjej. (Matu 24:14; 28:​19, 20) Dri jilik Mark ear eliji nan ko an Jisõs ke ear je bwe rej aikwij kõmõne jerbal in “mokta” jen an naj itok jemlokõn jukjuk im ber in. (Mark 13:​10) Emol, men in ej eindrein kinke Jisõs ear ba: “Elap jonikõn, a eiet dri jerbal.” Ien jonikõn eban kõtar kij, eñin unin jej aikwij marmir ilo ien eo wõt, mokta jen an jemlok ien jonikõn eo.​​​—Matu 9:​37.

3. Ta eo elõñ rar emakõt in kõmõne ikijen aikwij eo elap ñõn kwalok nan?

³ Kinke kwalok nan ej juõn jerbal elap an aurõk ñõn kij, ej tellokin ar kajerbal aolepen ien im kajur eo ar ilo joñõn eo jej maroñwe ñõn ar kõtõbrõke. Jej mõnõnõ bwe elõñ ro jeer im jãter rej kõmõne men in. Jet rar kõmõn bwe en lamwan wãwen air mour bwe ren maroñ bõk jerbal in full time einwõt pioneer, mejinede, ak jerbal ilo juõn ian Betel ko ibelakin jukjuk im ber in. Elap air boub. Jej mõnõnõ kin ir kinke meñe rar aikwij karmijeteik elõñ kõnan ko air mõke im rar iion elõñ wãwen ko rebin, ak Jeova elap an kar kejerammõn ir. (Riit Luk 18:​28-​30.) Ak ikijen ro im rejjab maroñ bõk jerbal in kwalok nan full-time, rein rej bõk kwonair joñõn wõt air maroñ ilo jerbal in lomor in me ej kitibuj air jibõñ ro nejiir ñõn bõk lomor.​​​—Dut. 6:​6, 7.

4. Etke jitõbõn ekaiuriur emaroñ driklok iben jet armij?

⁴ Einwõt ar kar etale, jitõbõn ekaiuriur ekkã an walok ñe eor iber joñõn ien eo ñõn ar kõtõbrõk juõn men. Jej mour kiõ ilo ran ko eliktata, im elõñ kein kamol ko jemaroñ loi ikijen men in ilo Baibel eo im bwebwenato ko an armij. (Matu 24:​3, 33; 2 Tim. 3:​1-5) Bõtab, ejelok juõn armij ejela kin ien eo enaj itok jemlokõn jukjuk im ber in. Ke Jisõs ear kwalok kin tibrikin “kakõlõn . . . lokõn lõl,” ear ba: “A ran eo im auõ eo ejelok juõn e jela kake, im jab enjel ro i lõñ, jab Nejin, a Jema wõt.” (Matu 24:​36) Kin an eindrein men in, jet remaroñ lo bwe ebin ñõn air drebij juõn jitõbõn ekaiuriur kin jerbal in kwalok nan kajjojo yiõ, elaptata elañe rar kõmõne men in iomin juõn ien eaitok. (Ken. 13:​12) Kwoj ke kile bwe jet ien kwoj bõk ejja lemnok in wõt? Ta eo emaroñ jibõñ kij ñõn kadrek ak drebij wõt juõn jitõbõn ekaiuriur ñõn kõmõne jerbal eo Jeova Anij im Jisõs Kraist rej kõnan bwe jen kõmõne ranin?

 Jen Etale Eo ej Juõn Joñok Emõn ñõn Kij, Jisõs

5. Ilo wãwen it ko Jisõs ear kwalok bwe eor jitõbõn ekaiuriur iben kin jerbal in kwalok nan?

⁵ Ian aolep armij ro im rar kwalok jitõbõn ekaiuriur ilo jerbal eo air ñõn Anij, Jisõs Kraist ej joñok eo emõntata. Juõn ian un ko unin ear kwalok jitõbõn ekaiuriur ej kinke ear jela bwe elõñ men ko ear aikwij in kõtõbrõki iomin wõt jilu im jimõtõn yiõ ko. Mekarta, Jisõs ear kõtõbrõk elõñlok men ko ikijen kabuñ eo emol jen jabrewõt armij. Ear kwalok kin etan Jemen im kin karõk ko an, ear kwalok nan kin Ailiñ eo, kajedmatmat katak ko rejjab mol an dri tel in kabuñ ko, im ear rejetake iroij potata eo an Jeova ñõn mij. Jisõs ear lukkun kamat an maroñ ñõn katakin, jibõñ, im kemour armij ro ilo aolep jikin ko ear ber ie. (Matu 9:​35) Ejelok juõn ear kõtõbrõk joñõn eo Jisõs ear kõmõne iomin juõn ien ekaru. Ear lukkun lap an Jisõs jerbal.​​​—Jon 18:⁠37.

6. Ta eo ear lap an aurõk ilo mour eo an Jisõs?

⁶ Ta eo ear kamakõt Jisõs bwe en niknik wõt in kõmõne jerbal eo an iomin aolepen yiõ ko ear kwalok nan? Jen kanan eo an Daniel, Jisõs emaroñ kar jela kin ewi joñõn ien eo ear or iben ñõn kõtõbrõk jerbal eo an ekkar ñõn lajrõk in ien eo an Jeova. (Dan. 9:​27, UBS) Kin men in, einwõt kar je, enaj kar bwijrõk an jerbal in kwalok nan elikin “jilu im jimõtõn yiõ” ko. Ejjabto elikin an kar dreloñ ilo Jerusalem ilo yiõ eo 30, Jisõs ear ba: “Auõ e mottok, bwe Nejin armij en aibujuij.” (Jon 12:​23) Meñe Jisõs ear jela bwe ear ebak ien an mij, ear jab kõtlok bwe men in en un eo elaptata ilo mour eo an ñõn an kate e ñõn jerbal. Jen an eindrein, ear kajerbal aolepen ien ko rebellok ñõn an kõmõnmõn ankilan Jemen im ñõn kwalok an yokwe armij ro. Yokwe in ear kamakõt e ñõn an ainitok im kamineneik dri kalor ro an im jilkinlok ir ñõn air kõmõne jerbal in kwalok nan eo. Ear kõmõne men in kinke ear kõnan bwe ren maroñ kowõnmanlok jerbal eo ear kajutõke im ñõn air kõtõbrõk elõñlok men ko.​​​—Riit Jon 14:⁠12.

7, 8. Ewi wãwen an kar dri kalor ro emakõt ke rar lo men eo Jisõs ear kõmõne ilo tempel eo, im etke Jisõs ear emakõt ilo wãwen eo?

⁷ Eor juõn men ear walok ilo mour eo an Jisõs im ear kamol kin joñõn kijejeto eo an. Men in ear walok ilo tujinoin jerbal in kwalok nan eo an, ilo ien Kwojkwoj in Kijone eo ilo yiõ eo 30. Jisõs im dri kalor ro an rar itok ñõn Jerusalem im rar lo iloan tempel eo armij “ro rej wiakake kau koman im s̃ip ko im muli ko, im ro rej wia kin mõnni rej jijõt.” Ewi wãwen an kar Jisõs emakõt, im men eo ear kõmõne ear jelet dri kalor ro an ilo wãwen it?​​​—Riit Jon 2:​13-​17.

⁸ Men eo Jisõs ear kõmõne im ba ilo ien eo, ear kakememej dri kalor ro an kin nan in kanan ko ilo juõn ian sam ko an Devid: “Bwe aõ  kijejeto kin mweo imõm e ar kãñiõ.” (Sam 69:⁠9) Etke? Kinke men eo Jisõs ear kõmõne ear likit mour eo an ilo kauwatata. Men in ear eindrein kinke dri utiej ro an tempel eo, einwõt pris ro, skraib ro, im ro jet, rar ber ilikin jerbal eo enana ñõn koorlok jããn ilo tempel eo. Ilo an kajedmatmat im kabwijrõk jerbal in air etao, Jisõs ear kõmõn bwe en erom dri kijirãt an dri tel in kabuñ ko ilo ien eo. Einwõt an kar dri kalor ro kile, Jisõs ear kwalok ‘kijejeto kin mweo imõn Anij,’ ak kin kabuñ eo emol. Bõtab, ta melelen kijejeto? Eoktõk ke jen juõn eo ej kwalok jitõbõn ekaiuriur?

Jen Keiri Jitõbõn Ekaiuriur Iben Kijejeto

9. Ta melelen kijejeto?

⁹ Ekkar ñõn juõn tikjinere ej ba bwe nan in “kijejeto” ej melelen “juõn kõnan im itoklimo ekajur ñõn jibarek juõn men,” im juõn ian nan ko me rej einlok wõt nan in ej bõplolin. Emol, jemaroñ kajerbal aolep nan kein ñõn kwalok kin jerbal in kwalok nan eo an Jisõs. Eñin unin bar juõn ukok in Baibel ej ukote eon in ilo wãwen in: “Buruõ ej urur einwõt kijeek kin aõ kijejeto kin Temple eo am.” Ekaitoktoklimo ñõn jela bwe ilo jet kajin ko ilo Esia, nan in “kijejeto” ej ejaakin ruo nan ko me ej lukkun melelen “buru-ebwil,” einwõt ñe buruen armij eo ej urur. Eñin unin dri kalor ro rar kememej nan ko an Devid ke rar lo men eo Jisõs ear kõmõne ilo tempel eo. Bõtab, ilo kõkkar, ta eo ear kõmõn bwe buruen Jisõs en eurur im lujur e bwe en emakõt ilo wãwen eo?

10. Ta melelen “kijejeto” ñe ej walok ilo Baibel eo?

¹⁰ Ilo sam eo an Devid, nan eo “kijejeto” ej itok jen juõn nan ilo kajin Hibru im ekkã air ukote ñõn “kamo” ilo mõtõn ko jet ilo Baibel eo, ak jet ien ilo ukok ko jet, rej ukote nan in ilo wãwen in, “ijjab kõnan bwe kwon kabuñ” ak yokwe “jabrewõt men ijellokũ.” (Riit Exodus 20:5; 34:14; Joshua 24:​19, UBS.) Ikijen nan in, juõn tikjinere kin Baibel eo ej ba: “Ekkã air kajerbale nan in ñõn dri belele ro . . . Einwõt an juõn leo ak lio belele kõnan bwe eo belen en yokwe wõt e, eindrein Anij ekõnan bwe armij ro an ren kabuñ wõt ñõn e.” Kin men in, kijejeto ilo Baibel eo elaplok melelen jen baj juõn kõnan im itoklimo ekajur kin juõn men, einwõt an elõñ armij ro kwalok ñe rej aluije ikkure eo emõntata ibeir. An Devid kijejeto ilo an kamo ear alikar ilo wãwen eo emõn kinke ear jab kõnan bwe jabrewõt en jumae ak katton etan Anij. Bareinwõt ear or iben juõn kõnan ekajur ñõn jojomare armij ro ejelok rueir im ñõn kajime wãwen ko rejjab jime.

11. Ta eo ear kamakõt Jisõs ñõn an lukkun kijejeto?

¹1 Dri kalor ro an Jisõs rar jime ilo air kar lemnok kin nan ko an Devid ke rar lo men eo Jisõs ear kõmõne ilo tempel eo. Jisõs ear jab kate e kinke ear ebak an jemlok jerbal eo an ion lõl, ak ej kinke ear kijejeto ak kamo kin etan Jemen im kabuñ eo emol. Ke ear lo aolep wãwen ko kar katton im blaspim nae etan Jemen, ear ekkar an kijejeto ak kamo, im emakõt ñõn an kajime wãwen eo. Ke Jisõs ear lo wãwen an kar dri tel in kabuñ ko kaiñtan armij ro retã im jerbal ibeir ilo jab jime, kijejeto eo an ear kamakõt e ñõn an bõktok ainemõn im kakije ñõn armij ro im bareinwõt ear kananaik dri tel in kabuñ ko.​​​—Matu 9:​36; 23:​2, 4, 27, 28, 33.

Kwon Kijejeto kin Kabuñ eo Emol

12, 13. Ta eo dri tel in kabuñ ko an ro rej ba rej Kristian rar kõmõne ranin ikijen (a) etan Anij? (b) Ailiñ eo an Anij?

¹² Lemnok im kõmõn ko an armij ro im rej ba rej kabuñ ñõn Anij ranin rej einlok wõt ak nanalok jen ro ilo ran ko an Jisõs. Ñõn wanjoñok, kememej bwe men eo moktata Jisõs ear katakin dri kalor ro an ñõn air jar kake ear ikijen etan Anij: “En kwojarjar Etõm.” (Matu 6:⁠9) Jej ke lo an dri tel in kabuñ ko, elaptata ro rej ba bwe rej tõmak ilo Kraist, katakin armij ro ñõn air jela kin etan Anij im  ñõn air kokwojarjare, ak koutiej etan? Jen air kõmõne men in, rar kwalok kin katak ko rejjab mol einwõt Jilu Anij ilo Juõn, eor juõn an iloan armij eo im ej mour manlok wõt elikin mij, an armij ro renana iñtan ilo jikin kijeek, im rej kõmõn bwe en bin an armij ro melele kin Anij, im rej kwalok bwe ej juõn eo elej im ej kaiñtan armij ro. Rar bareinwõt katton etan Anij ikijen kõmõn ko air rekajookok im retao. (Riit Dri Rom 2:​21-​24.) Im rar kõmõn joñõn wõt air maroñ ñõn kabwijrõk armij ro jen air jela kin etan Anij, im juõn ian men ko rar kõmõne ej ilo air kar jolok etan jen ukok in Baibel ko air. Ilo wãwen in rej bõprae armij ro jen air druaklok ñõn Anij im ñõn air ejaak juõn kõtan ebak iben.​​​—Jem. 4:​7, 8.

¹³ Jisõs ear bareinwõt katakin dri kalor ro an ñõn air jar kin Ailiñ eo an Anij: “En itok Am ailiñ. Ren kõmõnmõn ankil Am einwõt i lõñ, bareinwõt ion lõl.” (Matu 6:​10) Meñe ekkã an dri tel ro an kabuñ ko me rej ba bwe rej Kristian eliji jar in, ak rar rejañ armij ro bwe ren rejetake kien ko an lõl im rolul ko jet an armij. Bareinwõt, rej kõrraate ro im rej kate ir ñõn kwalok nan im keañ kin Ailiñ eo. Tokjen men in, elõñ ian ro im rej ba bwe rej tõmak ilo Kraist rejjab konono im tõmak kin Ailiñ eo an Anij.

14. Ewi wãwen an kar dri tel ro an kabuñ ko ukot Nan eo an Anij?

¹⁴ Ilo jar eo an Jisõs ñõn Anij, ear ba ilo alikar: “Am in nan mol eo.” (Jon 17:​17) Im mokta jen an kar wõnliñlok ñõn lõñ, Jisõs ear kalikar bwe enaj jitõñ “dri korijer e tiljek im meletlet” ñõn air lelok katak ko an Anij ñõn armij ro an. (Matu 24:​45) Meñe dri tel ro an kabuñ ko rej ba bwe rej katakin armij ro kin Nan in Anij, ak rar ke kajejit jerbal eo Iroij ear lelok ñõn ir ilo tiljek? Jaab. Ekkã air ba bwe men eo Baibel ej ba ej juõn inoñ bajjek. Jen air katakin armij ro kin Anij, me ej wãwen eo ñõn kainemõn im kalaplok melele eo air kin E, dri tel ro an kabuñ ko rar karemõm lojilñin dri tõmak ro air ikijen katak ko an armij. Bareinwõt, rar ukot jidrik kien ko an Anij kin mour erreo ekkar ñõn kõnan ko air.​​​—2 Tim. 4:​3, 4.

15. Ewi wãwen am lemnok kin aolep men ko dri tel ro an kabuñ ko rar kõmõni ilo etan Anij?

¹⁵ Kin aolep men ko me rej ba rar kõmõni ilo etan Anij, elõñ armij ro emol burueir rar oktõk im illu ak luji tõmak eo air ilo Anij im Baibel eo. Rar bo ilo aujir eo an Setan im jukjuk im ber in an enana. Ñe kwoj lo im roñ bwe aolep ran men kein rej walok, ewi wãwen am lemnok? Einwõt juõn ian dri korijer ro an Jeova, ñe kwoj lo an ro jet kananaik im blaspim nae etan Anij, men in ejjab ke kamakõt  yuk ñõn am kõmõn joñõn wõt am maroñ ñõn kajime men kein rebwir? Ñe kwoj lo an ro jet mone ro emol burueir im jerbal ñõn ir ilo jab jime, men in ejjab ke kamakõt yuk ñõn kainemõn ro rej iñtan? Ke Jisõs ear lo an armij ro ilo ran ko an “barõk, im jibliklik einwõt s̃ip ko ejelok air s̃eperd,” ear jab baj tiriamokake ir wõt, ak ear “katakin ir men ko relõñ.” (Matu 9:​36; Mark 6:​34) Eor iber un ko remõn ñõn ar kijejeto kin kabuñ eo emol einwõt kar Jisõs.

16, 17. (a) Ta eo en kar kamakõt kij ñõn ar kate kij joñõn wõt ar maroñ ilo jerbal in kwalok nan? (b) Ta eo jenaj etale ilo katak eo tok juõn?

¹⁶ Ñe jej kijejeto ilo ar jerbal in kwalok nan, enaj mulõllok melelen nan ko an dri jilik Paul ilo 1 Timote 2:​3, 4 ñõn kij. (Riit.) Jej kate kij ilo jerbal in kwalok nan kinke jejela bwe jej mour ilo ran ko eliktata, im jej kile bwe ej ankilan Anij. Ekõnan bwe armij ro ren bõk jelalokjen eo emol, bwe ir bareinwõt ren maroñ katak ñõn air kabuñ im korijer ñõn e im kin men in renaj bõk jerammõn. Un eo elaptata unin ar kate kij joñõn wõt ar maroñ ilo jerbal in kwalok nan ej kinke jekõnan koutiej etan Anij im jibõñ armij ro ñõn air jela kin ankilan, im jab kin an karu ien wõt. Jej kijejeto kin kabuñ eo emol.​​​—1 Tim. 4:​16.

¹⁷ Einwõt armij ro an Jeova, jar bõk jerammõn eo kin jelalokjen eo emol kin karõk eo an Anij kin armij im lõl in. Eor iber men ko jemaroñ kajerbali ñõn jibõñ armij ro ñõn air lo mõnõnõ eo emol im bõk juõn kejatrikrik emõn kin ilju im jeklaj. Jemaroñ kwalok ñõn ir kin wãwen eo remaroñ bõk wõt kejbãrok ñe enaj itok ien eo ñõn kokkure jukjuk im ber in an Setan. (2 Tes. 1:​7-9) Jen ar illu ak ebwer kin an to an ran eo an Jeova itok, jej aikwij mõnõnõ bwe eor wõt ien ñõn ar kijejeto kin kabuñ eo emol. (Maik. 7:7; Hab. 2:​3, UBS) Ewi wãwen jemaroñ kalaplok ar kijejeto? Jenaj etale kin men in ilo katak eo tok juõn.

Kwomaroñ Ke Kemelele?

• Ta eo ear kamakõt Jisõs bwe en niknik wõt in kõmõne jerbal eo an iomin aolepen yiõ ko ear kwalok nan?

• Ewi wãwen Baibel eo ej kwalok kin “kijejeto”?

• Ta ko jej loi ranin im en kar kamakõt kij ñõn ar kijejeto kin kabuñ eo emol?

[Study Questions]

[Caption on page 8]

Jisõs ear lemnok wõt ñõn kõmõnmõn ankilan Jemen im ñõn kwalok an yokwe armij ro

[Caption on page 10]

Eor iber un ko remõn ñõn ar kijejeto kin kabuñ eo emol