Tʋm-y tũudum hakɩkã yĩng ne yẽesem
Tʋm-y tũudum hakɩkã yĩng ne yẽesem
“Tigsgã yaa wʋsgo, la tigisdbã yaa bilfu.”—MAT. 9:37.
1. Wãn to la y tõe n bilg yãgbo?
TAGS-Y n ges-y wa yãmb sẽn na n tʋm ned t’a kẽng zĩ-zãrgẽ n tɩ togs koɛɛga, n dat tɩ koɛɛgã ta a soabã tɩ wĩndgã pa kẽ ye. Bõe la y na n maane? Y na n yeela nedã t’a zẽk a naoor n kẽng tao-tao! D rɩk makr me wa y sẽn na n tar sɛk sẽn tar yõod wʋsg ne neda, la y yaool n pa yi pĩnd ye. Y na n maana wãna? Y na n zẽka y naoor n kẽn tao-tao! Woto fãa wilgdame tɩ y sã n tar tʋʋmd y sẽn segd n maan tɩ wakatã yaool n loogdẽ, y yɛɛsda na n wa pa tõoge. Y sũurã kiuusdame, hal tɩ y maand tao-tao. Woto yaa yãgbo!
2. Sã n yaa ne kiris-nebã, tʋʋm-bʋg n baood yãgb n yɩɩda?
2 Sã n yaa ne kiris-nebã, tʋʋmd ka be rũndã n baood yãgb n ta koɛɛgã moonego, la sõng buud toɛy-toɛy neb tɩ b lebg karen-biisã ye. (Mat. 24:14; 28:19, 20) Karen-biig a Mark wilgame t’a Zezi yeelame tɩ b segd n “deng” n tʋma tʋʋm-kãngã nand tɩ saabã yaool n ta. (Mark 13:10) Woto sɩd zemsame. A Zezi yeela woto: “Tigsgã yaa wʋsgo, la tigisdbã yaa bilfu.” Tigsg wakate, b pa segd n tʋm yaal-yaal ye. Bala tigsgã wakat bee loogre.—Mat. 9:37.
3. Moonegã sẽn yaa tʋʋm-yãgdmã kɩtame tɩ wʋsg maand bõe?
3 Koe-moonegã sẽn yaa tʋʋmd sẽn tar yõod woto fãa ne tõndã yĩnga, segdame tɩ d rɩk d sẽkã n tʋm-a, la d tʋm-a me ne d pãng fãa wa d sẽn tõe tɛka. Saam-biis la saam-bi-pogs wʋsg sɩd maanda woto hal tɩ sek pẽgre. B wʋsg toeema b yɛlã tɩ kɩt tɩ b tõog n lebg so-pakdba, misioneer dãmb wall Betɛllẽ tʋm-tʋmdba. B tʋmda ne b sũy fãa la b mongd b mens yɛl wʋsgo. Sẽn paase, b maooda ne zu-loees toor-toore. La baasgo, a Zeova ningd-b-la bark wʋsgo. D fãa sũy nooma rẽ yĩnga. (Karm-y Luk 18:28-30.) Baa sẽn pa kiris-nebã fãa n tõe n tʋm tʋʋm-kãensã wã, b fãa rɩkda b sẽkã wʋsg n moond koɛɛgã sẽn yaa tʋʋmd sẽn fãagd yõyã, la b modgd n sõngd b kambã sẽn na yɩl tɩ b wa paam fãagrã.—Tõo. 6:6, 7.
4. Bõe n tõe n wa kɩt tɩ neb kẽer pa le tʋmd Wẽnnaam tʋʋmdã ne yãgbo?
4 Wa d sẽn wilg sõsgã sɩngrẽ wã, ned sã n wa yãgdẽ, yaa a sẽn segd n maan bũmb tɩ sẽka yaool n yaa bilf yĩnga. D vɩya saabã wakate. Biiblã bãngr-goam wʋsg la yɛl toor-toor sẽn maand dũniyã zug wilgda rẽ vẽenega. (Mat. 24:3, 33; 2 Tɩm. 3:1-5) Baasgo, ned baa a ye pa mi saabã raar takɩ ye. A Zezi sẽn wa n gomd bãnd ning sẽn na n wilg tɩ saabã kolgame wã yellã, a yeela woto: “Ned baa a yembr ka mi daar kãnga, la wakat kãng ye, baa malɛk rãmbã sẽn be saasẽ wã, baa Wẽnnaam Biigã meng ka mi ye, yaa Ba wã bala.” (Mat. 24:36) Woto kɩtame tɩ pa nana ne kẽer tɩ b ket n tʋmd tʋʋmdã ne yãgbo, sẽn yɩɩd fãa, sẽn sɩng-b n tʋmd-a hal sẽn kaoosã. (Yel. 13:12) Rẽ yĩnga mi n yaa toog ne yãmb me bɩ? Bõe n tõe n sõng-d tɩ d tõog n tʋm tʋʋmd ning Wẽnnaam a Zeova ne a Zezi Kirist sẽn bobl-dã ne yãgbo, la d ket n tʋmd-a woto?
A Zezi kõo tõnd mak-sõngo
5. Wãn to la a Zezi wilg t’a miime t’a tʋʋmdã yaa tʋʋm-yãgdem?
5 Neb nins fãa sẽn tʋm Wẽnnaam tʋʋmdã n da miẽ t’a yaa tʋʋm-yãgdmã sʋka, a Zezi Kirist n kõ mak-sõng sẽn ka to. Bũmb a ye sẽn kɩt t’a tʋm ne yãgb woto wã yaa t’a tʋʋmã ra yaa wʋsgo, t’a yaool n da segd n maan dẽ fãa yʋʋm a tã la pʋɩ-sʋk pʋgẽ bala. La baasgo, ninsaal baa a ye zɩ n tõog n tʋm tũudum hakɩkã yĩng wa a Zezi ye. A sõngame tɩ b bãng a Ba wã yʋʋrã la a raabã, a moona Rĩungã koe-noogã, a puka tũudmã taoor dãmb bãong n wilg tɩ b yaa pʋ-lik rãmb sẽn zãmsd nebã sẽn pa sɩda. A teela a Zeova naamã, hal meng n sak n ki a poorẽ. A maana modgr wʋsg n gilg Israɛll tẽngã n zãms nebã, n sõng-b la a maag kẽer bãase. (Mat. 9:35) Ned baa a ye zɩ n tõog n tʋm wʋsg woto wakat bilf pʋgẽ wa a Zezi ye. A sɩd tʋma a tʋʋmdã ne a pãng fãa.—Zã 18:37.
6. Bõe n da pak a Zezi n yɩɩda?
6 Bõe n kɩt t’a Zezi tʋm a tʋʋmdã ne a sũur fãa n pa zoe yaamse? Sẽn zems ne a Daniɛll bãngr-gomdã, a Zezi ra mii a tʋʋmdã sẽn da segd n kaoos wakat ning tɩ zems ne a Zeova sẽn mag yɛlã to-to wã. (Dan. 9:27) Wa bãngr-gomdã sẽn yeelã, a tʋʋmdã ra segd n teka ‘yʋʋm a yopoe pʋɩ-sʋka,’ rat n yeel tɩ yʋʋm a tã la pʋɩ-sʋka. Sɩd me, a Zezi sẽn wa n kẽng Zerizalɛm yʋʋm 33 soabã Pakã yĩng tɩ nebã reeg-a ne ziirã bilf poore, a yeela woto: “Wakat taame tɩ Ninsaal Biigã na n paam waoogre.” (Zã 12:23) La baa a Zezi sẽn da mi tɩ pa na n kaoos la b kʋ-a wã, a pa bas tɩ rẽ pak-a n yɩɩda, tɩ lebg rẽ yĩng n kɩt t’a tʋmd wʋsgã ye. A ra pʋd n tũnugda ne segb buud fãa n maand a Ba wã raab la a wilgdẽ t’a nonga ninsaalbã. Nonglem kãng kɩtame t’a tigim karen-biisi, n zãms-ba, la a tʋm-b tɩ b tɩ moon koe-noogã. A maana woto sẽn na yɩl tɩ b wa tõog n kell n tʋm tʋʋmd ning yẽ sẽn sɩngã, la b tʋm tɩ yɩɩg a sẽn tʋmã menga.—Karm-y Zã 14:12.
7, 8. A Zezi sẽn dig lɛɛbdbã wẽnd-doogẽ wã kɩtame t’a karen-biisã tags bõe yelle, la bõe yĩng t’a maan woto?
7 Daar a yembre, a Zezi maana bũmb tɩ wilgd vẽeneg t’a sɩd ra nonga a tʋʋmdã hali n tʋmd-a ne yẽesem. Yɩɩ yʋʋmd 30 soabã Pakã sasa. Yẽ ne a karen-biisã waa Zerizalɛm, n ta n yã wẽnd-doogã sẽn pid ne “neb sẽn koosd lols la piis ne wala, la ligd tekdba.” A Zezi manesem yɩɩ wãna, la rẽ kɩtame t’a karen-biisã tags bõe yelle?—Karm-y Zã 2:13-17.
8 A Zezi sẽn yeel la a maan bũmb ning baraarã tẽega a karen-biisã bãngr-gomd a Davɩɩd sẽn togs a yɩɩll a ye pʋgẽ. Be a yeela woto: “Yãmb doogã nonglem n so maam zãnga.” (Yɩɩl 69:10) Bõe yĩng tɩ karen-biisã tẽeg gom-kãensã? A Zezi sẽn maan bũmb ningã ra tõe n kɩtame t’a paam yelle. Sɩd me, maan-kʋʋdbã, gʋlsdbã la nin-bɛd a taab sẽn yaa wẽnd-doogã taoor dãmb n da teend lɛɛbdbã sẽn da wẽgd nin-buiidã. A Zezi sẽn puk tũudmã taoor dãmb bãong la a sãam b leebgã, kɩtame t’a lebg b bɛ. Wa a karen-biisã sẽn bãng vẽenegã, a sẽn maan bũmb ningã wilgdame t’a sɩd ra ‘nonga Wẽnnaam doogã,’ rat n yeel t’a ra tʋmda tũudum hakɩkã yĩng ne yẽesem. La yẽesem yaa bõe? Rẽ yĩnga a yaa toor ne yãgb bɩ?
Yãgb ne yẽesem yaa a ye bɩ?
9. Wãn to la d tõe n bilg yẽesem?
9 Sebr a yembr yeelame tɩ b sã n yeel tɩ ned tʋmda a tʋʋmd ne yẽesem, rat n yeelame t’a nonga a tʋʋmdã hal tɩ kɩt t’a tʋmd-a ne a pãngã fãa la ne a sũur fãa. Yaa vẽeneg t’a Zezi tʋma a tʋʋmdã woto bal kɛpɩ. Rẽ n so tɩ Sebr Sõng pʋgẽ wã, b lebg Yɩɩl Sõamyã 69:10 soabã woto: “M basame tɩ yãmb ne y ro-sõngã nonglem dɩ-m zãnga.” Sɩd me, Israɛll la a tẽn-yags kẽer buud-goam pʋsẽ, b sã n gomd “yẽesem” yelle, b pʋta gom-biis a yiib sẽn naag taaba, tɩ b sã n lebg-a zugẽ-zugẽ bɩ a võor yaa “sũur sẽn tʋʋle,” tɩ yaa wa bugum n dɩt-a. Rẽnd a Zezi sẽn maan bũmb ning wẽnd-doogẽ wã sẽn kɩt t’a karen-biisã tẽeg a Davɩɩd goamã pa lingr ye. La bõe n wɩng a Zezi sũurã wa bugum n kɩt t’a maan woto?
10. Yẽesem ning yell b sẽn gomd Biiblã pʋgẽ wã võor yaa bõe?
10 A Davɩɩd yɩɩllã pʋgẽ, gom-bil ning b sẽn lebg tɩ “nonglmã” võorã meng yaa yẽesem. B lebga hebre wã gom-bi-kãngã Biiblã zĩis a taab tɩ “sũ-kiiri.” Traduction du monde nouveau wã pʋgẽ, zĩis kẽere, b lebg-a lame tɩ “sẽn dat tɩ b nong yẽ n yɩɩd sẽn ketã fãa.” (Yik. 20:5; 34:14; Zoz. 24:19, NW ) Sebr a ye goma a yell n yeel woto: “Naoor wʋsgo, yaa kãadmã pʋgẽ zĩid-n-taarã wɛɛngẽ la b wae n pʋt gom-bilã n yɩɩda. . . . Wa rao sẽn na n maand sũ-kiir a pag poorẽ wall pag sẽn na n maand sũ-kiir a sɩd poorẽ tɩ wilgdẽ tɩ b ned kam fãa ratame t’a to wã nong-a n yɩɩdã, Wẽnnaam me sẽn yeel t’a yaa sũ-kiir soabã rat n yeelame t’a ratame t’a nin-buiidã yɩ yẽ a ye bal rẽnda.” Rẽnd Biiblã pʋgẽ, b sã n gomd yẽesem yelle, pa tek maan bũmb ne f sũur fãa wall ne sũ-noog bala, wa neb kẽer sẽn mi n nong ɛspoorã reem ning n teend-a ne b sũur fãa wã ye. A Davɩɩd yẽesmã yaa a sẽn da maand sũ-kiiri, n pa rat tɩ b nong bũmb a to n yɩɩd Wẽnnaam wall b sãam a yʋʋrã, tɩ kɩt t’a maand a sẽn tõe fãa n na n kogl yʋ-kãnga, la a kɩtdẽ t’a paamd waoogrã.
11. Yɩɩ bõe n kɩt t’a Zezi tʋm ne yẽesmã?
11 A Zezi karen-biisã sẽn yã a sẽn maan bũmb ning wẽnd-doogẽ wã n tẽeg a Davɩɩd goamã yellã, b bee bʋʋm. A Zezi sẽn da wɩsg a meng n tʋmd woto fãa wã pa a sɛkã sẽn da paoodã yĩng ye. Yaa a sẽn da tar yẽesmã yĩnga, rat n yeel t’a sẽn da maand sũ-kiir a Ba wã yʋ-noogã la tũudum hakɩkã poorẽ wã. A sẽn da ne b sẽn da paoogd Wẽnnaam la b sãamd a yʋʋrã, a sɩd ra bee bʋʋm a sẽn tall yẽesem, rat n yeel tɩ sũ-kiiri, tɩ kɩt t’a maan bũmb n toeem yɛlã. A Zezi sẽn yã tũudmã taoor dãmb sẽn da weoogd nin-buiidã, a yẽesmã kɩtame t’a sõng-ba, la a puk tũudmã taoor dãmb bãongo.—Mat. 9:36; 23:2, 4, 27, 28, 33.
Tʋm-y tũudum hakɩkã yĩng ne yẽesem
12, 13. a) Rũndã-rũndã, kiris-neb ne yʋʋrã tũudmã taoor dãmb tara manesem bʋg ne Wẽnnaam yʋʋrã? b) La manesem bʋg la b tar ne Wẽnnaam Rĩungã?
12 Rũndã-rũndã, neb wʋsg sẽn yet tɩ b tũuda Wẽnnaam manesem wõnda a Zezi wakatẽ tũudmã taoor dãmb manesmã. Pa gũusi, wẽnem yɩɩda rẽ menga. Wala makre, a Zezi sẽn wa n zãmsd a karen-biisã pʋʋsgã, pipi bũmb a sẽn wilg-b tɩ b kos yaa Wẽnnaam yʋʋrã yĩnga. A yeel-b lame tɩ b kos woto: “Yãmb yʋʋr yɩ ne waoogre.” (Mat. 6:9) Rẽ yĩnga tũudmã taoor dãmba, la sẽn yɩɩd fãa, kiris-neb ne yʋʋr taoor dãmbã sõngda nebã sẽn na yɩl tɩ b bãng Wẽnnaam yʋʋrã la b waoog-a bɩ? B pʋd n wilgda nebã yɛl sẽn pa sɩda. Wala makre, b yetame tɩ Wẽnnaam yaa mens a tãabo, tɩ ninsaal tara sɩɩg sẽn pa kiidi, la tɩ bugum yir n be. Woto fãa kɩtame tɩ nebã pa tol n tõe n bãng Wẽnnaam sẽn yaa a soabã, la b tagsdẽ t’a yaa toaag la wẽnem soab menga. B tʋʋm-yood toor-toorã ne b ziri wã me sãamda Wẽnnaam yʋʋrã. (Karm-y Rom dãmb 2:21-24.) Sẽn paase, b maanda b sẽn tõe fãa sẽn na yɩl tɩ nebã ra bãng Wẽnnaam yʋ-peellã, hal n yãk-a Biibl dãmb nins b sẽn yiisdã pʋsẽ. B sẽn maand woto wã kɩtame tɩ nebã pa tõe n bãng Wẽnnaam la b bao a zood ye.—Zak 4:7, 8.
13 A Zezi leb n wilga a karen-biisã tɩ b pʋʋs tɩ Wẽnnaam Rĩungã wa. A yeel-b lame tɩ b kos woto: “Yãmb soolem wa, tɩ yãmb daab maan dũniyã zug wa sẽn maand [saasẽ wã].” (Mat. 6:10) Baa kiris-neb ne yʋʋrã tũudmã taoor dãmb sẽn pʋʋsd pʋʋs-kãngã n yɩlemdẽ wã, b baas n sagenda b nebã tɩ b teend politikã la ninsaalbã sigls a taaba. Sẽn paase, b paoogda neb nins sẽn modgd n moond Rĩungã koɛɛgã. Woto kɩtame tɩ neb wʋsg sẽn yet tɩ b yaa kiris-neb pa le gomd Wẽnnaam Rĩungã yelle, tɩ b sokd a tẽeb ye.
14. Wãn to la kiris-neb ne yʋʋrã tũudmã taoor dãmb golemd Wẽnnaam Gomdã?
14 Daar a ye, a Zezi pʋʋsa Wẽnnaam, n yeel woto: “Yãmb goamã yaa sɩda.” (Zã 17:17) La a sẽn da wa n ket tẽngã zugã, a wilgame t’a ra na n wa yãka “tʋm-tʋmd sẽn tũud sɩd la sẽn tar yam,” n kɩt t’a yõdg n sõngd a nin-buiidã tɩ b bãngd Wẽnnaam la a raabã. (Mat. 24:45) Baa kiris-neb ne yʋʋrã taoor dãmb sẽn yet tɩ b zãmsda nebã Wẽnnaam Gomdã, rẽ yĩnga b tʋmda tʋʋmd ning Zusoabã sẽn bobl-bã sɩda? Ayo. B pʋd n mi n yetame meng tɩ Biiblã kibay kẽer yaa soalma. Wall tɩ b vẽneg nebã tɩ b bãng Wẽnnaam la a raabã n paam belsgã, b bas n zãmsd-b-la filozofi rãmba, n salemd b tʋbã ne ninsaalb tagsa. Sẽn paase, b golemda Wẽnnaam noyã n kõt nebã sor tɩ b vɩ yaare.—2 Tɩm. 4:3, 4.
15. Yãmb tagsg yaa wãn ne kiris-neb ne yʋʋrã taoor dãmb sẽn maand bũmb nins n yetẽ tɩ yaa Wẽnnaam yʋʋr yĩngã?
15 B sẽn maand woto fãa n yetẽ tɩ yaa Wẽnnaam yʋʋrã yĩnga, la tɩ yaa Biiblã n kõt-b sorã, kɩtame tɩ neb wʋsg sẽn da baood Wẽnnaam ne b sũur fãa koms raoodo, wall b pʋd n pa le tẽed Wẽnnaam la Biiblã goam ye. Nin-kãens lebga a Sʋɩtãan ne a dũniyã yembse. Y sẽn ne la y wʋmd yel-kãensã sẽn maand beoog sẽn vẽeg fãa wã, y tagsg yaa wãna? Y sẽn tũud a Zeova wã, y sẽn ne b sẽn paoogd-a la b sãamd a yʋʋrã, pa kɩtd tɩ y tʋll n maan bũmb n dems yɛlã sɩda? Y sã n ne b sẽn tudgd sẽn baood-b a Zeova ne b sũy fãa wã la b wẽgd-bã, pa kɩtd tɩ y rat n maan bũmb n yols-b sɩda? A Zezi sẽn da ne a wakatẽ neb kẽer sẽn da “wẽnd wa piis sẽn ka tar pe-kɩɩmã,” a pa zoe b nimbãaneg bal ye. A “sɩngame n zãms bãmb bũmb wʋsgo.” (Mat. 9:36; Mark 6:34) Tõnd me segd n tʋma tũudum hakɩkã yĩng ne yẽesem wa a Zezi.
16, 17. a) Bõe n segd n kɩt tɩ d moond koɛɛgã ne yẽesem? b) Bõe yell la d na n gom sõsg ning sẽn pʋgdã pʋgẽ?
16 D sã n tʋmd Wẽnnaam tʋʋmdã ne yẽesem, tʋm-tʋmd a Poll goam nins sẽn be pipi Tɩmote 2:3, 4 na n talla võor wʋsg ne-do. (Karm-y.) Na n kɩtame tɩ d tʋmd wʋsg koɛɛgã mooneg pʋgẽ, d sẽn mi tɩ d vɩya yaoolem dayã sasa wã, la d sẽn mi me tɩ yaa Wẽnnaam daabã. A ratame tɩ neb wʋsg bãng sɩdã, n wa tõog n lebg tũudum hakɩkã neb n tũ yẽ n paam barka. D sẽn na n wɩsgd d mens n moond koɛɛgã pa d sẽn mi tɩ wakatã lebga bilfã yĩng bal ye, yaa d sẽn dat n waoogd Wẽnnaam yʋʋrã la d sõngd nebã tɩ b bãngd a raab yĩngã. D sã n maand woto, wilgdame tɩ d tʋmda tũudum hakɩkã yĩng ne yẽesem.—1 Tɩm. 4:16.
17 D sẽn yaa Wẽnnaam a Zeova nin-buiidã, d tara a barka, d sẽn paam n mi a raabã ne tẽngã la ne ãdem-biisã. D tõe n sõnga nebã tɩ b paam sũ-noog la b kɩs sɩd tɩ manegr n wate. D tõe n wilg-b-la b sẽn segd n maan to-to n wa paam n põs a Sʋɩtãan dũniyã sãoong sasa. (2 Tes. 1:7-9) Sẽn wõnd wa a Zeova daarã kaoosdame wã pa segd n kɩt tɩ d sũur sãame, wall koms d raood ye. D segd n noogda d sũyã, d sẽn ket n tar sẽk n tõe n tʋm tũudum hakɩkã yĩng ne yẽesmã. (Mii. 7:7; Hab. 2:3) Bõe la d tõe n maan tɩ kɩt tɩ d yẽesmã paase? Sõsg ning sẽn pʋgdã gomda rẽ yelle.
Y tõe n wilga a võor bɩ?
• Bõe n kɩt t’a Zezi ra tʋmd wʋsg koɛɛgã mooneg pʋgẽ?
• Yẽesem ning yell b sẽn gomd Biiblã pʋgẽ wã võor yaa bõe?
• Bõe n be rũndã-rũndã n kɩt tɩ d segd n tʋmd tũudum hakɩkã yĩng ne yẽesem?
[Zãmsgã sogsgã]
[Foto, seb-neng 16]
Sẽn da pak a Zezi yaa a maan a Ba wã raabo, la a wilg t’a nonga ninsaalbã
[Foto, seb-neng 18]
D tara bʋʋm toor-toor sẽn segd n kɩt tɩ d tʋmd tũudum hakɩkã yĩng ne yẽesem