Ngoangki Kaudok Mehlel

“Rahket me inenen laud, a tohndoadoahk kan me malaulau.”​—MAD. 9:37.

1. Ia duwen omw pahn kawehwehda karuwaru?

 MIE kisinlikou kesempwal ehu me ke anahne aramas emen en kilang mwohn rahno pahn nekla. Dahme ke kin wia? Ke pahn ndaiong aramaso, “Menlau tehk kisinlikou wet. E inenen KARUWARU!” Ke alialu kohlahng tuhkihong mehkot kesempwal rehn emen aramas, ahpw ke pwandehr. Dahme ke kin wia? Ke kin alu seimek de tepida tang. Ei, ma mie doadoahk ehu me ke anahne kanekehla mwadang ahpw ahnsou mwotomwotala, ke kin salohda oh pwunodikihda. Ke kin doadoahk ni uwen laud oh marahra me ke kak. Met iei wehwehn karuwaru.

2. Mehnia doadoahk me keieu karuwaru ong Kristian mehlel kan rahnwet?

² Doadoahk me keieu karuwaru ong Kristian mehlel kan rahnwet iei en kalohkiseli rongamwahu en Wehio oh katohnpadahkihala aramas en wehi kan koaros. (Mad. 24:14; 28:19, 20) Mark ntingihedi dahme Sises mahsanih me doadoahk wet anahne wiawi “mahs,” mwohn imwi leledo. (Mark 13:10) Met konehng. Sises mahsanih: “Rahket me inenen laud, a tohndoadoahk kan me malaulau.” Rikirikpene en wahn rahk anahne wiawi mwohn ahnsoun rahk pahn imwisekla.​—Mad. 9:37.

3. Ia duwen me tohto ar kin mwekidki anahn karuwaru wet en kalohk?

³ Pwehki doadoahk en kalohk kin kesempwal ong kitail, e konehng kitail en kihong atail ahnsou, kehl, oh madamadau ni uwen atail kak. Riatail Kristian tohto kin wia met. Ekei kin koasoanehdi arail irair kan pwe re en kihong arail ahnsou laud ong doadoahk en kalohk nin duwen pioneer kan, de misineri kan, de pil tohn doadoahk kan en Pedel nan sampah pwon. Irail kin uhdahn kedirepw. Ele irail kin wiahda tounmetei laud kan, oh mie kahpwal tohto me re kin lelohng. Ahpw Siohwa kin ketin kapaiahda laud irail. Kitail kin perenki met. (Wadek Luk 18:28-30.) Meteikan, mendahki irail sohte kak iang wia doadoahk pwukat, re kin kihong arail ahnsou laud ong doadoahk en komour wet, me iangahki en sewese neirail seri kan.​—Deud. 6:6, 7.

4. Dahme kahrehda ekei kin kakete katihasang arail pepehm en karuwaru?

⁴ Nin duwen me kitail kilangehr, pepehm en karuwaru kin kalapw dokedoke ahnsou ehu me pahn imwisekla. Kitail kin mihmi nan ahnsoun imwi, oh mehn kadehde tohto sang Paipel oh pil sang poadopoad kin kasalehda met. (Mad. 24:3, 33; 2 Tim. 3:1-5) Ahpw sohte emen me uhdahn ese iahd me imwio pahn leledo. Ni ahnsou me e ketin oaritikiada duwen “kilel” me kasalehda duwen imwin koasoandi wet, Sises mahsanih: “A duwen rahno oh ahnsowo, sohte emen me ese iahd e pahn leledo, oh tohnleng en nanleng kan, pil Sapwellimen Sahmo sohte mwahngih, Sahmohte me mwahngih.” (Mad. 24:36) Pwehki met, ekei kin diarada me e apwal en kolokol arail pepehm en karuwaru sounpar koaros, ahpw mehlel ma irail kin wiewia met ahnsou reirei. Ke kin ekei pak ahneki pepehm wet? Dahme kak sewese kitail en kakairada de kolokol pepehm en karuwaru ong doadoahk me Siohwa Koht oh Sises Krais kupwurki kitail en wia rahnwet?

Tehk Sapwellimen Sises Kahlemeng Mwahu

5. Ia duwen Sises eh ketin kasalehda pepehm en karuwaru ong doadoahk en kalohk?

⁵ Nanpwungen irail koaros me kasalehda karuwaru nan arail kin papah Koht, Sises Krais iei me keieu ketikihda mehn kahlemeng mwahu. Ehu kahrepen eh kin ketin karuwaru iei me e anahne ketin wia soahng tohto erein sounparte siluh elep. Mendahki met, Sises ketin kapwaiada soahng tohto me pid  kaudok mehlel laudsang meteikan koaros. E ketin kasalehda mwaren Semeo oh kupwure, kalohki rongamwahu en Wehio, oh kasalehda mwalaun oh padahk likamw kan en kaunen pelien lamalam kan. E pil kin utungada sapwellimen Siohwa kaunda lao lel mehla. E kin ketin pwerisek ni eh ketin padapadahk, sewese, oh kamwahwihala aramas soumwahu kan wasa koaros me e ketila ie. (Mad. 9:35) Sohte emen me wiahda laudsang dahme Sises ketin wiahda nan erein ahnsou kiste. Sises kin uhdahn ketin doadoahk laud.​—Sohn 18:37.

6. Dahme Sises kin ketin keieu kesempwalki?

⁶ Dahme kin kamwakid Sises en pwerisek erein sapwellime doadoahk en kalohk? Sang kokohp en Daniel, Sises kak ese ia uwen ahnsou me e ahneki pwe en kanekehla eh doadoahk nin duwen sapwellimen Siohwa koasoandi en ahnsou. (Dan. 9:27) Kahrehda, sapwellime doadoahk en kalohk nin sampah imwisekla ni “erein sounpar siluh elep.” Ahnsou kis mwurin eh ketilong nan Serusalem nin duwen nanmwarki men ni ahnsoun Pahsohpa en pahr 33, Sises mahsanih: “Awao leledohr me Nein-Aramas pahn linganla.” (Sohn 12:23) Mendahki Sises mwahngih me e pahn kereniong pwoula, e sohte ketin mweidohng met en keieu kesempwal nan eh mour, de wia kahrepe keieu me e kin ketin doadoahk laud. Ahpw, e kin kupwurkihte doadoahngki ahnsou mwahu koaros en wia kupwuren Semeo oh kasalehda limpoak ong aramas akan. Limpoak wet kin kamwakid ih en ketin rikpene oh kaiahnehda tohnpadahk kan, oh pil poaronepeseng irail en wia doadoahk en kalohk. E ketin wia met pwe irail pahn pousehlahte wia doadoahk me e ketin tapiada oh pahn wia laudsang me e ketin wiahda.​—Wadek Sohn 14:12.

7, 8. Ia duwen sapwellimen Sises tohnpadahk kan ar mwekidki ni Sises eh ketin kamwakele tehnpas sarawio? Dahme Sises ketin wiahki met?

⁷ Ehu ahnsou Sises uhdahn ketin kasalehda ngoang laud. Met wiawi erein tepin sapwellime doadoahk en kalohk, ni ahnsoun Pahsohpa nan pahr 30. Sises oh sapwellime tohnpadahk kan kohla Serusalem oh diarada nan tehnpas sarawio “ohl ekei me kin netinetki kou, sihpw oh mwuroi, oh pil ekei ohl me kin kawiliali mwohni, wie mwomwohd ni arail tehpel kan.” Eri ia duwen Sises eh ketin mwekidki met, oh dahme met wiahiong sapwellime tohnpadahk kan?​—Wadek Sohn 2:13-17.

⁸ Dahme Sises ketin wia oh mahsanih ahnsowo katamandohng sapwellime tohnpadahk ko kokohp me mi nan en Depit melkahka me koasoia: “Ei ngoangki lingan en Tehnpasomwi kin ngkengken loalei.” (Mel. 69:9) Dahme kahrehda re tamanda kokohpo? Pwehki ihte aramas men me mwekidki soangen ngoang wet pahn wia mehkot me kin kahrehiong ih nan keper laud. Samworo kan, sounkawehwehn Kosonnedo oh pil meteikan kin utungada wiepen ale wihn en netinet kan me kin wiawi wasao. Pwe en kasalehda oh kauhdi arail wiewia kanamenek wet, Sises ketin wiahkihla pein ih imwintihti en kaun en pelian lamalam ako ni ahnsowo. Nin duwen tohnpadahk ko arail wehwehki,  ‘ngoangki lingan en Tehnpesen Koht,’ de ngoangki kaudok mehlel uhdahn sansalda rahno. Ahpw ia wehwehn ngoang? E kin weksang karuwaru?

Wekpeseng en Karuwaru oh Ngoang

9. Ia duwen atail kak kawehwehda ngoang?

⁹ Ehu dikseneri kawehwehdi “ngoang” nin duwen met, “uhdahn men oh nantihong wia mehkot.” Soangen ngoang wet kin uhdahn sansalda nan sapwellimen Sises doadoahk en kalohk. Ihme kahrehda iretikitiko mahsanih: “Maing Koht, ei loalenohng tehnpasomwi kin okohk loalei duwehte kisiniei.” Iei met me kahrehiong tohnpadahk ko ar tamanda dahme Depit koasoia ni ahnsou me re kilang dahme Sises ketin wia nan tehnpas sarawio. Ahpw, dahme kahrehiong kupwuren Sises en okohk duwehte kisiniei oh kamwakid ih en ketin wia dahme e wiadahro?

10. Ia duwen Paipel eh kin kawehwehda “ngoang”?

¹⁰ Lepin lokaia “ngoang” ni lokaiahn Ipru oh Krihk pil kak wehwehki “luwak ni ahl pwung.” (Wadek 2 Korint 11:2.) Ehu dikseneri en Paipel kawehwehdi nin duwen met: “Met kin kalapw dokedoke nanpwungen pwopwoud . . . Duwehte ni en ohl pwopwoud men de lih pwopwoud men eh luwak kin kasalehda me e ahneki pwuhng rehn eh pwoudo, Koht pil kin ketin kasalehda sapwellime pwuhng ong irail akan me e sapwellimanki.” En Depit ngoang iei soangen luwak me sohte kin mweidohng mehkot en uhwong de kauwe Siohwa. E kin nantihong perehla mwareo, de kapwungala karaunlikamw me kohwong Siohwa.

11. Dahme kamwakid Sises en ketin kasalehda ngoang?

¹¹ Sapwellimen Sises tohnpadahk ko sohte sapwung ni arail kapahrekihpene en Depit eh koasoi kan ong dahme Sises wia nan tehnpas sarawio. Sises ketin nantihong kaidehn pwehki eh ahnsou mwotomwot ahpw pwehki eh ngoangki de luwangki mwaren Semeo oh kaudok min. Ni ahnsou me e mahsanihada duwen karaun likamw oh lahlahwe me kowohng mwaren Koht, e ketin ngoangkihla oh kupwurehda en kapwungala irairo. Ni eh pil mahsanihada kaunen pelien lamalam ako arail isaneki oh lemei ong aramas aktikitik kan, sapwellime ngoang kahrehiong ih en ketin sewesehda aramas ako oh pil ketin doadoahngki mahsen kehlail ong irail pwe en kasalehda arail wiewia suwed kan.​—Mad. 9:36; 23:2, 4, 27, 28, 33.

Ngoangki Kaudok Mehlel

12, 13. Dahme kaunen pelien lamalam en Kristian likamw kan rahn wet kin wia duwen (a) mwaren Koht? (b) Wehin Koht?

¹² Madamadau oh wiewia kan en aramas me dene irail kaudokiong Koht rahnwet kin duwehte ni mwehin Sises. Karasepe, tamanda me ire keieu me Sises ketin padahkihong sapwellime tohnpadahk ko duwen kapakapki mwaren Koht iei: “Mwaromwi en sarawihla rehn aramas koaros.” (Mad. 6:9) Ia duwe, kitail kin kilang kaunen pelien lamalam en Kristian likamw akan ar kin padahkihong aramas akan en esehla Koht ni arail pahn esehla mware oh kasarawihla de wauneki mwareo? Weksang met, re kin kihong irail padahk likamw akan me duwehte Koht kin wiawihkihda meh silimen, mie mehkot me momour mwurin mehlahn aramas, oh wasahn kalokolok nan kisiniei. Padahk pwukat kin wiahiong Koht en mwomwen lemei oh kupwurki kaloke aramas oh pil apwal en wehwehki. Arail wiewia kanamenek kan oh arail mwalaun pil kin kahrehiong aramas en kaulime Koht. (Wadek Rom 2:21-24.) Patehng met, re kin wia soahng koaros me re kak pwe ren ekihla mwaren Koht, oh re kin kihsang mwareo sang ni arail kawehwe kan en Paipel. Eri, re kin irehdi aramas akan en karanihala Koht oh kakairada nanpwungmwahu reh.​—Seims 4:7.

¹³ Sises pil ketin padahkihong sapwellime tohnpadahk ko en kapakapki Wehin Koht: “Mweimwi [“Wehiomwi,” NW] en pweida wasa koaros, kupwuromwi en kin wiawi nin sampah duwen eh kin wiawi nanleng.” (Mad. 6:10) Mendahki kaunen pelien lamalam en Kristian likamw akan kin kalapw wia kapakapo, re kin kangoange aramas akan en utungada pwihn en palien politik kan oh pwihn teikan. Re sohte pil  kin katapanki irail me kin nantihong kalohk oh kadehde duwen Wehi wet. Kahrehda, me tohto me dene irail Kristian kan sohte kin koasoia duwen Wehin Koht oh pil re sohte kin kamehlele met.

14. Ia duwen kaunen pelien lamalam en Kristian likamw kan ar kin katikala kesempwalpen Mahsen en Koht?

¹⁴ Nan sapwellime loulou ong Koht, Sises mahsanih ni sansal: “Sapwellimomwi mahsen, iei me mehlel.” (Sohn 17:17) Oh mwohn eh ketidahla nanleng, Sises ketin kasalehda me e pahn idihada “ladu lelepek oh loalokong” pwe ren kihong sapwellime aramas akan padahk mehlel nan Paipel. (Luk 12:42) Mendahki irail dene me re kin padahkihong aramas akan Mahsen en Koht, ia duwe, kaunen pelien lamalam en Kristian likamw kan kin lelepek kapwaiada doadoahk me Mwohnsapw ketikihong irail? Soh. Re kin nda me dahme Paipel padahngki soai pwoat. Re sohte kin padahkihong aramas akan padahk mehlel me kin kamweit oh kamarainih irail, ahpw re kin koasoiaiong tohn arail sarawi kan duwen loalokong en aramas. Patehng met, re kin katikala kesempwalpen sapwellimen Koht koasoandi kan ni arail wekidala koasoandi pwukat pwe ren dehr kansensuwedihala tohn arail sarawi kan me kin kamehlele me re kin wia tiahk mwahu.​—2 Tim. 4:3, 4.

15. Ia pahn omw pepehm duwen soahng koaros me kaunen pelien lamalam kan kin wiahda ni mwaren Koht?

¹⁵ Pwehki soahng koaros dene kin wiawi ni mwaren Koht en nan Paipel, aramas mwahu tohto kin mworusala oh solahr pwoson Koht oh Paipel. Re kin lohdi pahn Sehdan oh eh koasoandi suwed. Ni omw kin kilang oh rong duwen soahng pwukat ar kin wiawi rahn koaros, ia pahn omw pepehm? Nin duwen sapwellimen Siohwa ladu men, ni omw kin kilang karaun likamw oh lahlahwe me kin koasoakoasoakda pohn mwaren Koht, ke kin pehm me ke anahne kapwungala karaun likamw oh lahlahwe pwukat? Ni omw kin kilang aramas teikan kin pitihdi oh isaneki aramas mohngiong mehlel kan, ke kin pehm me ke anahne kamweitala irail me pahtou pwukat? Ni Sises eh mahsanihada aramas “pwunod akan oh sohte epwelparail, pwe re rasehng sihpw kei me sohte silepahr,” e sohte kupwureiraillahte. E “ketin tapihada kawehwehiong irail soahng tohto.” (Mad. 9:36; Mark 6:34) Kitail anahne ngoangki kaudok mehlel, duwehte Sises.

16, 17. (a) Dahme kin kamwakid kitail en nantihong kalohk? (b) Dahme kitail pahn tehkpene nan iren onop en mwuhr?

¹⁶ Ni atail kin ngoangki kalohk, dahme wahnpoaron Pohl koasoia nan 1 Timoty 2:3, 4 kin wehwe laud ong kitail. (Wadek.) Kitail kin doadoahk laud nan kalohk kaidehn ihte pwehki atail ese me kitail kin momour ni  imwin rahn akan ahpw pwehki atail pohnese me met iei kupwuren Koht. E kupwurki aramas akan en esehla padahk mehlel pwe ren pil kak sukuhlki ren kaudokiong oh papah ih oh pil paiekihda. Kitail anahne nantihong kalohk, kaidehn pwehki ahnsou eh mwotomwotlahr, ahpw pwehki atail kin men wauneki mwaren Koht oh sewese aramas en esehla kupwure. Kitail kin ngoangki kaudok mehlel.​—1 Tim. 4:16.

¹⁷ Nin duwen sapwellimen Siohwa aramas akan, kitail kin paiekihda ese padahk mehlel duwen kupwuren Koht ong aramas oh sampah. Mie soahng kan me kitail kin doadoahngki pwe en sewese aramas en diar peren oh koapworopwor mehlel ong ahnsou kohkohdo. Kitail kak kasalehiong irail ia duwen ar pahn ale pereparail ni ahnsou me Koht pahn ketin kasorehla ahn Sehdan koasoandi kan. (2 Des. 1:7-9) Kitail en dehr tihwohla de mworusala pwehki sapwellimen Siohwa rahno eh mwomwen pwapwand, ahpw kitail anahne perenda pwe miehte ahnsou ong kitail en ngoangki kaudok mehlel. (Maika 7:7; Apak. 2:3) Ia duwen atail kak kakairada soangen ngoang wet? Kitail pahn tehkpene met nan iren onop en mwuhr.

Ke Kak Kawehwehda?

• Dahme kin kamwakid Sises en ketin pousehlahte wia sapwellime doadoahk erein sapwellime kalohk?

• Ia wehwehn “ngoang” me kin kadoadoahk nan Paipel?

• Dahme ke kin kilang rahn pwukat me kin kamwakid uhk en ngoangki kaudok mehlel?

[Peidek en Onop]

[Kilel nan pali 10]

Sises kin ketin kesempwalki wia kupwuren Seme oh kasalehiong aramas akan limpoak

[Kilel nan pali 12]

Kitail anahne ngoangki kaudok mehlel