Shonqupita patsë Diospa kaqta kuyashun

“Cosecha poqicaqnomi nunacuna ellipaq quecayan. Tseno captinpis, wallcallam elloqcuna cayan.” (MAT. 9:37.)

1. ¿Imatataq rurantsik imatapis ichik tiempollachö ushëta munarqa?

HUK hunaq manaraq ushaptin pillapis huk documentota rikänan kaptinqa, ¿imataraq tsë documentopa hananman churashwan? “RASLLAM WANÄ” nishpachi qellqarishwan. Y huk precisaq reunionman hunaqashqa ëwëkarqa, ¿imataq nishwan taxi manejaqta? “RASLLA apëkamë” nishwanchi. Awmi, ichik tiempollachöna imatapis ushanantsik kaptinqa rasllam rurar qallëkuntsik. Y llapan cuerpontsikmi yanapamantsik imëka máquina cuenta rurarinapaq.

2. Kanan witsan cristiänokunapaq, ¿ima rurëtaq alläpa precisan?

² Cristiänokunapaq kanan witsan más precisaq rurëqa, Diospa Gobiernompita yachatsikïmi, y hinantin nacionchö nunakunata Jehoväta serviyänampaq yanapëmi (Mat. 24:14; 28:19, 20). Marcosmi qellqarqan Jesus kënö ninqanta: “Manaraq que patsa ushacaptinmi, alli willaquinïta jinantin nasioncunacho nunacunata willapäyanqa” (Mar. 13:10).

3. ¿Imanötaq atskaq cristiänokuna rikätsikuyan yachatsikï alläpa preciso kanqanta?

³ Diospita yachatsikï alläpa preciso kaptinmi, llapan tiempontsikwan y kallpantsikwan yachatsikïta tïranantsik. Kushikïpaqmi atskaq cristiänokuna këta rurayanqan. Wakinkunaqa wanayanqanllawan kawayänampaqmi churapakäyashqa, tsënöpa llapan tiemponkunawan precursornö, misionëronö, o betelïtanö Jehoväta serviyänampaq. Awmi, pëkunaqa atska rurëyoqmi kayan, tsëpaqqa tukïtam haqiyashqa y imëkatapis pasayanmi, pero tsë llapan rurayanqampitam Jehová bendecin. Pëkuna rurayanqampitaqa alläpam kushikuntsik (lei Lucas 18:28-30). Wakin cristiänokuna precursor këta mana puëderpis, sinchikuyanmi wambrankunata y vecïnonkunata salvakuyänampaq yachatsirnin (Deu. 6:6, 7).

4. ¿Imanirtaq wakin cristiänokunaqa Diosnintsik mandanqanta ichikllapaq churayan?

⁴ Rikanqantsiknömi, nunakunaqa raslla imëkatapis rurayan trabäjota entregayänampaq ichikllana pishiptin o hora chaptin. Noqantsikqa ushanan hunaqkunachönam kawëkantsik, y këtaqa musyantsik Biblia ninqankuna cumplikaptinmi (Mat. 24:3, 33; 2 Tim. 3:1-5). Pero Jesus ninqannömi, ushakë hunaq imë chämunantaqa ni pï musyantsu. Pëmi kënö willakurqan: “Que nishqäcuna ime öra o ime junaq cumplicänanpaq caqtaqa manam pipis musyayantsu, ni sielucho quecaq anjelcunapis, ni noqa Diospa tsurinpis, sinoqa quiquin Dios Yayallam musyan” (Mat. 24:36). Tsënö kaptinmi wakin cristiänokunaqa, atska watapana tsë hunaqta shuyaraqkunanäqa alläpa preciso kanqantanönatsu rikäyan (Pro. 13:12). ¿Tsënöku qampis pensanki? ¿Imataq yanapamäshun Jehová y Jesucristu mandamanqantsikkunata alläpa precïsotanö rikänapaq?

Jesus ruranqankunata qatishun

5. ¿Imanötaq Jesus rikätsikurqan yachatsikï alläpa preciso kanqanta?

⁵ Jesus Teytanta servir yachatsimanqantsiknöqa manam pipis yachatsimarquntsiktsu. Tsëtaqa Jesus rurarqan kima wata pullanllachö tukïta ruranan kaptinmi. Pero tsë watakunallachömi  Diosta servirnin mana ni pï nuna ruranqanta rurarqan. Diospa munëninta y shutimpitam yachatsikurqan, huk alli Gobiernopaqmi yachatsikurqan, y hanan shonqulla Diosta sirveqkunatam mana alli yachatsikïninkunapita mana mantsakushpa rasun kaqta nirqan, y Jehovälla Ciëlochö y Patsachö Autoridadyoq kanqantam wanunqanyaq rikätsikurqan. Hinamampis, hinantin nacionpam ëwarqan nunakunata yachatsinampaq, kachakätsinampaq y yanapanampaq (Mat. 9:35). Manam ni pï nunapis ichik tiempollachö pë ruranqannöqa rurashqatsu. Diospaq huk nuna llapan ruranantam rurarqan (Juan 18:37).

6. ¿Imataq Jesuspaq más precisaq karqan?

⁶ ¿Imanötaq Jesus musyarqan Teytampita yachatsikunan alläpa preciso kanqanta? Itsa tsëpaqqa yanaparqan profeta Daniel qellqanqan, pëmi qellqarqan Mesias kima wata pullan yachatsikunampaq Diosnintsik disponinqanta (Dan. 9:27). 33 watachö Jerusalen markaman Jesus yëkurirmi, kënö nirqan: “Canan si tincuramunna öra Diospita Shamushqa Nunapa alli queninta ricayänanpaq” (Juan 12:23). Këchö rikanqantsiknöpis wanunampaq ichikllana pishinqantaqa musyarqanmi. Pero manam tsëta musyarllatsu llapan ruranampaq kaqta rurarqan. Tsë llapantaqa rurarqan Teytampa munëninta rurëwan nuna mayinta kuyë más preciso kaptinmi. Tsënö kuyakurmi nunakunata akrarqan qateqnin kayänampaq, y yachatsirqan hinantin markakunapa yachatsikuyänampaq. Tsënöpam, ruranqannölla qateqninkunapis rurayänampaq alli patsätsirqan (lei Juan 14:12).

7, 8. ¿Imanirtaq Jesus negociantekunata templopita qarqurirqan, y tsëta rikar imatataq qateqninkuna yarpäyarqan?

⁷ Yachatsikur qallanqampita wallka killakuna pasarishqanllachö, 30 wata Pascua witsanchömi, Jesus Teytampa kaqta alläpa kuyanqanta rikätsikurqan. Jerusalenman discïpulonkunawan yëkurirmi “tarirerqan templupa patiuncho toritucunata, üshacunata, y palumacunata rantiquicayaqta. Waquincunanam qelleta trocarnin tëcayarqan”. Tsëta rikëkur, ¿imatataq Jesus rurarqan, y qateqninkunaqa imatataq niyarqan? (Lei Juan 2:13-17.)

⁸ Këchö Jesus ninqan y ruranqanmi, qateqninkunata yarpätsirqan David kënö qellqanqanta: “Wanurpis wanurïmanmi wayikirëkurqa” (Sal. 69:9). ¿Imanirtaq David qellqanqanta yarpäyarqan? Yachatseqninkuna Jesus mana pipis rurananta rurëkuptinmi. Tsë negocioqa karqan templota rikaq sacerdötekunapam, y Leyta yachatsikoqkunapam. Negocionkunata ushakätsirnin y mana allita rurëkäyanqanta rikätsikurmi, pushaq religiösokunapa contran churakëkarqan. Qateqninkunaqa tsëchömi rikäyarqan Jesus shonqupita patsë Teytampa wayimpaq o Diospa kaqpaq celoso kanqanta. Qateqnin pärrafokunachömi celoso kë ima kanqanta, y Diospa kaqta ras rurë alläpa preciso kanqanta yachakushun.

 Celoso kë, y precisaq kaqta puntaman churë

9. ¿Ima ninantaq celoso këqa?

⁹ Huk diccionariom celoso këpaq kënö nin: “Nunata o imata karpis pasëpa kuyëmi”, hina llapan shonquwan, o shonqu achachëpa o alläpa kushikïwan kuyakïmi. ¿Manaku Jesus Teytampa kaqpaq tsënö celoso karqan? Tsëmi Traducción en lenguaje actual nishqan Bibliaqa, David ninqanta kënö tumatsin: “Wayikita kuyanqämi imëka ninanö rupaman”. Wakin idiömakunachöqa “celoso” palabraqa, “shonqu” y “rupakoq” ninanmi, tsëqa rikätsikun shonqu rupëkaqnö kanqantam. Tsëchi Jesuspa qateqninkunapis Maestron templochö ruraqta rikarnin yarpäriyarqan David ninqanta. Pero ¿imanirtaq Jesuspa shonqunqa rupaqnö achacharqan, y imanirtaq negociantekunata qarqurqan?

10. Bibliachö, ¿ima ninantaq “wanurpis wanurïmanmi” y celoso palabrakunaqa?

¹⁰ David, hebreo idiömachö “wanurpis wanurïmanmi” ninqantam wakin textokunachöqa “celoso” niyan. Höraqa Traducción del Nuevo Mundo nishqan Bibliantsikmi kë palabrapaq ‘noqallata adorayämë’ nin (lei Éxodo 20:5 *; 34:14 * y Josué 24:19 *). Huk diccionariom kë palabrapaq parlarnin kënö nin: “Kë palabrataqa parlayan casädokunapaq parlarmi [...]. Casädokuna majankunapaq cëlakurninqa, pëllata kuyayänantam munayan. Tsënö kaqllam Diospis pëpaq kaqkunataqa, pëllata adorayänanta mañakun”. Këman pensarishun, pelötawan pukllayaptinqa, equïponkuna gananantam nunakuna munëkuyan, pero Bibliachö celoso këpaq parlarqa, manam tsënöllapaqtsu parlëkan. David parlanqan cëloqa manam kuyanqan kaqkunapita chikikïllatsu, sinöqa kuyanqanta chikiyaptin o qallapäyaptin mana rikarë y shutinta respetatsïmi, hina mana allita rurayaptin imëkanöpapis altsëta tirëmi.

11. ¿Imanirtaq Jesusqa shonqupita patsë Teytampita yachatsikurqan?

¹¹ Rasuntachi Jesuspa qateqninkunaqa, Maestron templochö ruranqanta rikëkur David ninqanta yarpäyarqan. Pero yarpänantsikmi willapäkïnin ichik tiempolla ushakänanta musyarninlla tsëta mana ruranqanta, sinöqa Teytampa shutinta llapan shonqunwan kuyar, y alli kaq religionta respetatsita munarmi. Tsëmi Teytampa shutinta mana respetarnin mana allita rurayaptin pëqa rikaräkoqtsu. Y tsënö karmi mana mantsakushpa pushaq religiösokunata mana allikunata rurayanqampita qayaparqan, y tsë religiösokuna allqutsayanqan nunakunatam yanaparqan (Mat. 9:36; 23:2, 4, 27, 28, 33).

Rasumpa kaqta mana mantsakushpa rikätsikushun

12, 13. ¿Imanötaq rikan religión catölicapa pushaqninkuna a) Jehoväpa shutinta? b) Diospa Gobiernonta?

¹² Kanan witsan religionkunaqa unënöllam tukï mana allikunata rurayan. Diospa shutinta imanöpis rikäyanqanman pensarishun. Diosman mañakuyänampaq qateqninkunata Jesus yachatsirmi kënö nirqan: “Jutillequi allapa respetuwan alabashqa catsun” (Mat. 6:9). Pero ¿Diospa shutinta respetayanku religión catölicapa pushaqninkuna y wakin religionkunapa pushaqninkunapis? Diosta shutimpa mañakuyänampaq y tsë shutita respetayänampaq yachatsiyänampa rantinmi, nunakunata pantatsiyashqa kima Dios hukllëllachö kanqan yachatsikïwan, mana wanoq almapaq yachatsikïwan y infiernopaq yachatsikïwan. Tsëmi wakin nunakunaqa Diosta mana reqipaqtanö rikäyan, hina hipatsikoq y castigakoq  Diostanömi rikäyampis. Hinamampis religión catölicapa pushaqninkuna melanëpaq rurayanqanwan, y allitukur rurayanqanwanmi Diospa shutinta penqakïman churayan (lei Romanos 2:21-24). Hina Diospa shutintapis Bibliankunapita horqayashqam, tsëmi nunakunaqa Jehová reqita ni kuyëta puëdeyantsu (Sant. 4:7, 8).

¹³ Jesusqa qateqninkunata yachatsirqan Diospa Gobiernonta kënö mañakuyänampaqmi: “Llapan nunacuna mandadiquicho catsun. ¡Sielucho caqcuna qam mandaconqequita rurayanqannolla, que patsachopis nunacuna rurayätsun!” (Mat. 6:10). Religión catölicapa pushaqninkuna kutin kutin kënö mañakurpis, nunakunatam polïticokunata yanapayänampaq niyan. Y manam tsëllatsu, Diospa Gobiernompita yachatsikoqkunatam chikiyan. Y kë religionchö nunakunaqa manam Diospa Gobiernompita yachatsikuyantsu ni markäkuyantsu.

14. ¿Religión catölicapa pushaqninkuna Bibliata respetayanku?

¹⁴ Teytanman mañakurmi Jesusqa kënö nirqan: “Qamqa rason caqllatam willacunqui” (Juan 17:17). Y ciëlota manaraq kutirmi, willakurqan markanta rikänampaq ‘mäcoq, mäcoq, cumplidu sirweqta’ churanampaq kaqta (Mat. 24:45). Pero religionkunapa pushaqninkunaqa, noqakunatam Dios akrayämashqa Palabrampita yachatsikuyänäpaq niyanmi. Pero ¿mandakunqanta rurayashqaku? Manam. Wakinkunanäqa huk cuentotanöllam Biblia willakunqanta rikäyan. Hina llakishqa y hipaq nunakunata Bibliawan yanapayänampa rantinmi, nunakunapa yachatsikïninta yachatsiyan, o ‘pecunapaqnollata yachatsiyan’. Hinamampis Dios ninqantam ichikllapaq churayan nunakunapa mana alli rurëninkunata rikaräkur (2 Tim. 4:3, 4).

15. ¿Ima ninkitaq religión catölicapa pushaqninkuna Diospa shutinchö rurayanqankunata musyar?

¹⁵ Diospa y Bibliapa shutinchö yachatsikoqkuna mana allita rurayanqanta rikarmi, wakin nunakuna Diosman ni Palabranman markäkuyannatsu, tsënöpam ishkiyashqa Satanaspa makinman y mana alli rurëkunaman. ¿Imanötaq këkuna pasanqanta musyarnin qam tikrarinki? ¿Imanötaq tikrarinki kuyanqëki Diospa shutinta pasëpa mana alliman churayaptin? ¿Manaku imanöpapis altsëta munanki? Y yachatsikoqkuna atskaq nunakunata mana allipa rikäyanqanta rikar, ¿manaku imanöpapis yanapëta munanki? ‘Mitseqninnaq üsha cuenta pantacashqa puriquicaqta’ Jesus rikar, manam llakiparqanllatsu, sinöqa “tuquilayapa[m] pecunata yachatserqan” (Mat. 9:36; Mar. 6:34). ¡Teytampita rasumpa kaq yachatsikïtaqa alläpam kuyëkoq! Noqantsikpis Jesus ruranqanta rurashwanmi.

16, 17. a) ¿Imataq yanapamäshun yachatsikur sinchikunapaq? b) ¿Imatataq yachakushun qateqnin semänachö?

 ¹⁶ Jesus yachatsikunqannölla yachatsikushqaqa, noqantsikpis rurëkäshun apóstol Pablu 1 Timoteu 2:3, 4 (lei) ninqantam. Pero manam ushanan witsanchö kawëkanqantsikta musyarllatsu yachatsikuntsik, sinöqa Jehoväpa munënin ima kanqantapis musyarmi. Pëqa munan nunakuna rasun kaqta reqiyänanta, pëta adorayänanta y bendicionninkunata chaskiyänantam. Awmi, manam ushakë këllachöna kaptinllatsu yachatsikuntsik, sinöqa Jehoväpa shutinta respetarnin y Diospa munëninta nunakuna musyayänanta munarmi. Kë llapantaqa rurantsik rasumpa kaq yachatsikïta shonqupita patsë kuyarmi (1 Tim. 4:16).

¹⁷ Jehoväqa bendicemarquntsik nunakunapaq y Patsapaq ruranampaq kaqta musyatsimarnintsikmi. Tsëmi, kanan witsan vecïnontsikkuna kushishqa kawayänampaq, y mushoq Patsachö shumaq kawakuyänampaq yachatsishwan, tsënöpa Satanaspa mundon ushakaptin salvakuyänampaq (2 Tes. 1:7-9). Tsëmi, Jehoväpa hunaqnin mana chämunqanta llakikunantsikpa rantin, Jehoväpa kaqta rikätsikunapaq tiempo kanqantaraq kushikuntsik (Miq. 7:7; Hab. 2:3). Qateqnin kaq semänam yachakushun rasumpa yachatsikïta imëpis kuyëkänapaq.

[Päginapa ura kuchunchö willakïkuna]

¿Yarpankiku?

• ¿Imanirtaq Jesus mana utishpa Teytampita yachatsikurqan?

• ¿Ima ninantaq Bibliachö celo palabraqa?

• ¿Imata rikanqantsiktaq yanapamantsik rasun kaq religionpita yachatsikunapaq?

[Yachakunapaq kaqpa tapukïninkuna]

[15 kaq päginachö dibüju]

Teytampa munënin rurë y nunakunata kuyëmi, Jesuspaqqa más preciso karqan

[17 kaq päginachö dibüju]

¿Imanötaq rasumpa kaq yachatsikïta kuyanqantsikta rikätsikushwan?