Cheqap yupaychaymanta sientisqanchikta qawachisun

“Achkallañam kachkan cosechanapaqqa, cosechaqkunam ichaqa aslla.” (MAT. 9:37.)

1. ¿Ima ejemplokunam qawachin imapas urgente kaptin ima ruranamanta?

HUK documentota punchaw manaraq tukuchkaptin huk runa qawananta munaspaykiqa, ¿imatam ruranki manaraq apachichkaspayki? Hawanpim churanki “URGENTE” nispa. Chaynataq, ¿imatam rurawaq ancha valorniyoq kaqta ruranaykipaq urgente kaptin piwanpas tupaq rispaykiqa? Mana tardeyanaykipaqmi UTQAYMAN purinayki. Arí, imapas chaylla rurananchikpaq tiempo manaña haypawaptinchikqa manam hawkaqa tarikunchikchu. Cuerponchikta cerebronchik kamachiptinmi imatapas utqayllamanña ruranchik. Chaynam tarikunchik imapas urgente rurananchik kaptinqa.

2. ¿Ima ruraymi cristianokunapaq kunan aswan urgente kachkan?

² Cheqap cristianokunapa kunan tiempopi imamantapas aswan urgente rurananchikqa kachkan, Diospa Munaychakuyninmanta willakuywan lliw nacionniyoqkunata Jesuspa  qatiqnin kanankupaq yachachiymi (Mat. 24:14; 28:19, 20). Marcospa qellqasqan libropim Jesus nirqa puchukay tiempo “manaraq” chayamuchkaptin chaykuna rurakunanmanta (Mar. 13:10). Chaynam kanqa. Jesusqa nirqataqmi: “Achkallañam kachkan cosechanapaqqa, cosechaqkunam ichaqa aslla”, nispa. Chaywanmi qawachichkarqa chay ruray urgente kasqanta, cosecha tiempoqa manam suyanmanchu: chaytaqa rurana cosechanapaq tiempo manaraq tukuchkaptinmi (Mat. 9:37).

3. ¿Imatam achka cristianokuna ruranku predicacion urgente kasqanta yachaspanku?

³ Predicananchik urgente kasqanraykum chayta ruranapaq masta tiempochakunanchik hinaspa kallpanchakunanchik. Chaynatam rurachkanku achka iñiqmasinchikkuna. Wakinkuqa ima munasqankutapas saqerunkum precursor, misionero otaq betelita kanankupaq. Paykunaqa achka rurayniyoqmi kanku. Arí, tukuy imata saqeptinkupas hinaspa sasachakuypi tarikuptinkupas, Diosmi achka bendicionta qon. Paykunamantam kusikunchik (leey Lucas 18:28-30). Wakin cristianokuna precursor kayta mana atispankupas, atisqankuman hinam tukuy tiemponkuwan vecinonkunata hinaspa warmankunata Diosmanta yachachinku (Deu. 6:6, 7).

4. ¿Imanasqataq wakin cristianokunaqa urgente rurananchikta qonqarunmanku?

⁴ Yachamusqanchikman hinaqa, runakunam imatapas utqayman ruranku plazo qosqanku tiempo asuykamuptin. Ñoqanchikqa kawsanchik tukupay tiempopim, chaytam Biblia qawachin hinaspa tukuy imapa pasasqanpas (Mat. 24:3, 33; 2 Tim. 3:1-5). Ichaqa, manam pi runapas yachanchu puchukay haykapi kanantaqa, chaytam Jesus qawachirqa ‘kay pacha puchukananmanta’ rimasqanpi. Nirqam: ‘Manam pipas yachanchu ima punchaw otaq imay hora kutimunaytaqa, hanaq pachapi angelkunapas [. . .] nitaq Diospa Churinpas [. . .], aswanqa Taytallaymi’, nispa (Mat. 24:36). Chayna kaptinmi wakin cristianokunaqa, astawanraq unay tiempoña chay punchawta suyaqkuna hukmanyanmanku hinaspa urgente rurananchikta qonqarunmanku (Pro. 13:12). ¿Chaynachu wakinpi tarikunki? ¿Imataq yanapawachwan Jehová Diospa hinaspa Cristopa encargawasqanchik llamkayta urgente kasqanta qawanapaq?

Ejemplonchik Jesusta qatipakusun

5. ¿Imaynatam Jesus qawachirqa Taytanmanta willakuy urgente kasqanta?

⁵ Manam pipas urgente kasqanta yachaspa Jesucristo hinaqa Diosta servirqachu. Puntata, chaynataqa rurarqa tukuy rurayninkunawan kimsa wata partellanpi cumplinan kaptinmi. Ichaqa, chay tiempollapim pi runamantapas masta rurarqa cheqap yupaychayrayku. Willarqam Taytanpa sutinmantawan ima rurananmanta hinaspa Gobiernonmantapas, qawachirqam religionkunapi punta apaqkunapa iskay uya kasqankutawan pantasqa yachachisqankuta chaynataq wañunankamam defienderqa Diospa Llapallan Kamachiq kasqanta. Chaymantapas nacionpim runakunata mana pisipaspan yachachirqa, yanaparqa hinaspa sanoyachirqa (Mat. 9:35). Manam pipas pay hinaqa achkata pisi tiempollapi rurarqachu. Runapa lliw ruray atisqantam rurarqa (Juan 18:37).

6. ¿Ima ruraytaq Jesuspaq ancha allin karqa?

⁶ Jesusqa Taytanpa munaynintam tukuy sonqonwan rurarqa ima tiempopi kasqanta entiendespan. Yaqachá Danielpa nisqankunawan yacharqaña hayka tiempopi rurayninta tukunanmanta, chaypim nirqa Mesiasqa rurayninta ‘chawpi semanallapi’ otaq kimsa wata parten pasayllata tukunanmanta (Dan. 9:27). Jerusalenman yaykusqan qepallatam 33 watapi, plantakunapa waytarimusqan tiempopi Jesus nirqa: ‘Ñam tiempoña Diosmanta Hamuq Runa hatunchasqa kananpaq’, nispa (Juan 12:23). Yacharqañam wañukunam chayllaña kananmanta. Ichaqa manam chayraykullachu anchata kallpanchakurqa.  Chaytaqa rurarqa Taytanpa munaynin ruray hinaspa runamasinta kuyay paypaq ancha allin kasqanraykum. Chayna kasqanmi qallariymantapacha Jesusta kallpancharqa qatiqninkunata huñunanpaq hinaspa chay nacionpa cantonkama predicayta yachachinanpaqpas. Chaynata ruraspanmi yanaparqa qallarichisqan llamkayta hinalla ruranankupaq hinaspa rurasqanmantapas mastaraq ruranankupaq (leey Juan 14:12).

7, 8. ¿Imanasqataq Jesusqa templopi rantikuqkunata qarqorqa, hinaspa imatam chayta qawaspanku qatiqninkuna yuyarirqaku?

⁷ Predicay qallarisqanmanta killakuna pasayllatam otaq 30 kaq wata Pascuapim, Jesusqa qawachirqa tukuy sonqomanta ruray munasqanta. Qatiqninkunawan Jerusalenman chayaruspanmi ‘templopi tarirurqa bueyeskuna, ovejakuna hinaspa palomakuna rantikuq runakunata chaynataq qollqe cambiaqkunatapas’. ¿Imatam rurarqa hinaspa imaynam qatiqninkunaqa chayna rurasqanwan karqaku? (Leey Juan 2:13-17.)

⁸ Chay kutipi Jesuspa nisqanwan rurasqanmi qatiqninkunata yuyarichirqa Salmos libropi Davidpa kayna nisqanta: “Llumpaytam sientini qampa wasikimantaqa” (Sal. 69:9). ¿Imanasqataq chay textota yuyarirurqaku? Yachachiqninkum vidanta peligropi churaspa chayta rurarqa. Chay achka qollqe ganachiq hinaspa mana allin negociopa qepanpim karqaku templopi gobiernaqkuna, paykunaqa sacerdotekunawan Diospa leynin yachachiqkunam karqaku. Rurasqankuta Jesus saqerachispa hinaspa rurasqanku mana allin kasqanta qawachispanmi, paykunapa enemigonpi rikurirurqa. Qatiqninkunam allinta entienderqaku Diospa wasinmanta llumpayta sientisqanmanta otaq cheqap yupaychayta tukuy sonqonwan defiendey munasqanmanta. Qatiqninpi qawasun tukuy sonqomanta ‘sientiy’ ima ninan kasqanmanta hinaspa imatapas urgente ruraywan imapi tupasqanta.

Tukuy sonqowan sientiymanta hinaspa urgente ruranamanta

9. ¿Ima ninantaq sientiyqa?

⁹ Huk diccionariopa nisqanman hinaqa sientiyqa ‘runakunamanta otaq imamantapas anchata interesakuymi chaynataq imatapas ganaswan hinaspa kusisqa ruraymi’. ¡Chaynatamá Jesusqa rurarqa Diosta servispa! Traducción en lenguaje actual sutichasqa Bibliam Davidpa nisqanta kaynata tikran: “Temploykita anchata kuyaspa sientisqaymi nina hina rupawan”, nispa. Chaychá qatiqninkunaqa salmospi nisqanta yuyarirqaku Yachachiqninkuta templopi qawaspanku. Ichaqa, ¿imataq Jesuspa sonqonta nina hina ruparichirqa hinaspa tanqarqa imayna rurasqanman hina rurananpaq?

10. ¿Imaynatam Bibliaqa “sientini” niq palabrata wakinpi servichikun?

¹⁰ Bibliapa nisqanman hinaqa hebreo rimaymanta  “sientini” nispa tikrakusqan palabratam Traducción del Nuevo Mundo Biblia wakin textokunapi tikran: ‘[Payllata] yupaychana munaq’, nispa (Exo. 20:5; Jos. 24:19, NM). Bibliamanta huk diccionariom chay palabramanta nin: “Chaytaqa sapa kutim servichikunku casado vidamanta rimaspa”. Nintaqmi: “Qosapas warmillanpi otaq warmipas qosallanpi interesakuspanqa, qawachinkum casado kasqankurayku payllapaq kananta munasqankuta. Chaynam Diospas derechoyoq payllata yupaychanapaq, chaytam payqa mañawanchik”, nispa. Diospa contranpi pipas churakunanta otaq insultananta mana saqenamantam sientiymanta Davidpa nisqanqa qawachichkan, chaynataq sonqopi nina hina rupariywan honorninta defiendenamantapas.

11. ¿Imanasqataq Jesusqa Diosta servispam tukuy sonqonmanta rurarqa?

¹¹ Templopi Jesuspa rurasqanta Salmospi Davidpa nisqanwan tupachispankuqa, qatiqninkunaqa manam pantarqakuchu. Jesusqa tukuy sonqonmantaqa rurarqa manam rurayninta cumplinanpaq plazo hichpamusqanraykullachu, chaytaqa rurarqa cheqap religiontawan Taytanpa honorninta defiendeq kasqanraykum. Chaymi Diospa sutinmanta llullakuspa mana allinta rimaptinku hinaspa despreciaptinku, payqa tukuy sonqonmanta munarqa chay allicharuyta. Chayna sientisqanmi tanqarqa religionkunapi punta apaqkunapa imayna kasqankuta mana manchakuspa qawachinanpaq hinaspa ñakarichisqanku humilde runakunata yanapananpaqpas (Mat. 9:36; 23:2, 4, 27, 28, 33).

Tukuy sonqomanta defiendesun cheqap yupaychayta

12, 13. Cristiano tukuqkunapa punta apaqninkuna, ¿imaynatam qawanku: a) Jehová Diospa sutinta? b) Diospa Gobiernonta?

¹² Kunanpas punta pachak watapi hina otaq wakinpiqa astawanraqmi, achka religionkunapiqa Diospa sutinta mana allinta qawanku. Qatiqninkunata imayna mañakunankupaq yachachispanmi Jesusqa puntata nirqa: “Sutiki yupaychasqa [otaq chuyanchasqa] kachun”, nispa (Mat. 6:9). Ichaqa, ¿imatam rurachkanku religionkunapi punta apaqkuna, aswanraq cristiano tukuqkunapa punta apaqninkuna? Chay religionniyoqkunata Diosman sutinta rimaspa asuykunankupaqwan respetanankupaq yachachinankumantaqa, pantaykunatam yachachinku, ninkum hukllapi kimsa Dios kasqanta, alma mana wañusqanta hinaspa runakuna ninapi kañasqa kaspa ñakarisqankutapas. Chaymi piensanku Diosqa mana reqsiy atina, sasa entiendey, mana kuyakuq hinaspa hukkunata ñakarichispan kusikuq kasqanta. Chaynataq, mana allinta portakusqankuwan hinaspa iskay uya kasqankuwanmi religionpi punta apaqkuna Diospa sutinta penqaypi churanku (leey Romanos 2:21-24). Chaynataq, wakinpim Diospa sutin mana reqsisqa kananpaq Bibliankumanta qechunku otaq imatapas ruranku, chaymi runakunata sasachan Diosman asuykunankupaq hinaspa amistadnin kanankupaqpas (Sant. 4: 7, 8).

¹³ Jesusqa qatiqninkunatam yachachirqataq Diospa Gobiernonmanta kaynata mañakunankupaq: “Munaychakusqayki hamuchun. Munasqaykiyá rurasqa kachun kay pachapipas hanaq pachapi hina” (Mat. 6:10). Religionpi gobiernaqkuna chaynata sapa kuti mañakuspankupas, religionninpi kaqkunatam ninku gobiernokunatawan runapa rikurichisqan institucionkunata yanapanankupaq. Mana allintataqmi qawanku Diospa Gobiernonmanta predicaqkunata. Cristiano tukuqkunaqa manam Diospa Gobiernonmantaqa rimankuchu nitaq iñinkuchu.

14. ¿Imaynatam religionpi punta apaqkunaqa Bibliata mana valorniyoqta hina qawachinku?

¹⁴ Taytanta mañakuspanmi Jesusqa sutillata nirqa: “Palabraykiqariki cheqapmi”, nispa (Juan 17:17). Manaraq hanaq pachaman kutichkaspam nirqa cristianokuna yachachisqa  kananpaq ‘allin yuyayniyoq confianza sirvienteta’ nombrananmanta (Mat. 24:45). Mana iskayrayaspankum religionkunapi punta apaqkuna ninku Diospa Palabranmanta yachachinankupaq nombrasqa kasqankuta. Ichaqa, ¿cumplinkuchu Patronpa ima ruranankumanta nisqanwan? Manam. Wakinkum ninku Bibliapa willakuyninkuna cuentolla kasqanta. Consuelaq hinaspa cheqap yachachikuyta qonankumantaqa, runakunapa piensasqankumantam yachachinku chaynapim ‘munasqallankuta uyarichinku’ otaq yachay munasqankumanta rimanku. Chaynataq, imayna kawsanamanta Bibliapa nisqanta mana kasukuspankum imayna kawsasqankuta allinpaq hapinku (2 Tim. 4:3, 4).

15. ¿Imaynam tarikunki religionkunapi punta apaqkuna Diospa sutinpi mana allin rurasqankuta qawaspa?

¹⁵ Paykunapa mana allin rurasqankumanta yacharuspankum allin sonqoyoq runakuna hukmanyasqa tarikunku otaq Diospi hinaspa Palabranpi manaña iñinkuchu, chaynapim Satanaspa chaynataq munaychakusqan runakunapa makinpi tarikunku. ¿Imaynam tarikunki chayna rurasqankuta sapa kuti qawaspayki? ¿Imaynam sientekunki kuyasqanchik Taytanchikpa contranpi mana allinta rimaptinku hinaspa sutinta mituwan hina qachachasqankuta qawaspa? ¿Manachu imatapas rurayta munanki chayta allichanaykipaq? Llampu sonqo runakunata pastorninku engañaptin hinaspa mana allinta ruraspa ñakarichiptin, ¿manachu consuelayta munanki? Achka runakuna ‘wischusqa, cheqesqa hinaspa mana michiqniyoq ovejakuna hina kasqankuta’ qawaspanmi, llakipayaspanpas Jesusqa “willarqa achka yachachikuykunata” (Mat. 9:36; Mar. 6:34). ¡Tukuy sonqomantam defienderqa cheqap yupaychayta! Manam yanqachu munanchik pay hina ruraytaqa.

16, 17. a) ¿Imam kallpanchawanchik tukuy sonqomanta predicanapaq? b) ¿Imamantam yachasun qatiqnin estudiopi?

¹⁶ Diosmanta willakuyta Jesus hina ruranapaq piensaspanchikqa, astawanmi chaninchanchik Pablopa 1 Timoteo 2:3, 4 (leey) qellqasqanta. Tukuy sonqomantaqa predicanchik manam tukupay tiempopi kasqanchikraykullachu, aswanqa Jehová Diospa munasqan ima kasqanmanta entiendesqanchikraykum. Payqa munanmi runakuna cheqapmanta yachanankuta, yupaychanankuta hinaspa bendicionkuna chaskinankutapas. Chaytaqa ruranchik manam tiempo asllaña kasqanraykullachu, aswanqa Diospa sutinta hatunchanapaq  hinaspa paypa munasqanmanta runamasinchikman yachachinapaqmi. Huk rimaypiqa, chaytam ruranchik cheqap religionta tukuy sonqomanta defiendesqanchikrayku (1 Tim. 4:16).

¹⁷ Diosmi ñoqanchikta bendeciwanchik runapaq hinaspa kay Pachapaq ima rurananmanta willawaspanchik. Chay yachaywanmi hukkunata yanapachwan kunan aswan kusisqa kanankupaq, hamuq tiempopaq sumaq suyakuyniyoq kanankupaq hinaspa Satanaspa munaychakusqan puchukachisqa kaptin salvakunankupaqpas (2 Tes. 1:7-9). Chaymi, Diospa punchawnin demoramusqanman rikchakuwaptinchik hukmanyanamantaqa, kusikunchik tukuy sonqomanta cheqap yupaychayrayku rurananchikpaq tiempo kasqanmantaraq (Miq. 7:7; Hab. 2:3). Qatiqnin estudiopim yachasun tukuy sonqomanta hinalla servinapaq ima ruranamanta.

¿Atiwaqchu explicayta?

• ¿Imataq Jesusta kallpancharqa kay pachapi rurayninta mana pisipaspa rurananpaq?

• ¿Imataq sientiyqa Bibliapa nisqanman hinaqa?

• ¿Imakunata qawasqanchikmi kallpanchawanchik cheqap religionta tukuy sonqomanta defiendenapaq?

[Kay yachachikuypa tapukuyninkuna]

[8 kaq paginapi dibujo]

Jesusmi Taytanpa munayninta puntata rurarqa hinaspa runamasinta kuyarqa

[10 kaq paginapi dibujo]

Achka razonkunam kachkan tukuy sonqomanta cheqap yupaychayta defiendenapaq