Rawrashaq sonqowan Diospaq llank’asun

“Cosechanaqa askhapunin, llank’aqkunataq ichaqa pisilla.” (MAT. 9:37.)

1. Ima ruwanapaqpas pisillaña tiempo kashaqtin, ¿imatan ruwanchis?

SICHUS huk warmi onqokunanpaqña kashanman chayri ¿imatan qosan ruwanman? Apurayllachá hospitalman apanman. Chaymantapas mayman chayanaykipaqpas tardeña kashasqanta reparaspaykiqa usqhayllachá puriwaq chayman temprano chayanaykipaq. Qhawarisqanchis hina, imapaqpas pisillaña tiempo kashaqtinqa usqhayllan chayta ruwanchis.

2. ¿Imatan kay tiempopi cristianokuna usqhaylla ruwananchis?

² ¿Imatan kay tiempopi cristianokuna usqhaylla ruwananchis? Diospa Gobiernonmantan predicananchis, runakunamanpas yachachinanchismi Jesuspa qatikuqnin kanankupaq (Mat. 24:14; 28:19, 20). Jesusqa willarqanñan chay llank’ay ‘ñawpaqta’ aparikunanta, manaraq p’uchukay chayamushaqtin (Mar. 13:10). Chay willasqanqa hunt’akunanpunin. Jesusqa nillarqantaqmi: “Cosechanaqa askhapunin, llank’aqkunataq ichaqa pisilla”, nispa. Chhaynapin qhawarichirqan chay llank’ayta usqhaylla aparikunan kasqanta, yachasqanchis hina, cosechana tiempoqa manan unaychu, cosechataqa usqhayllan hoqarinanchis manaraq tarpuy tiempo chayamushaqtin (Mat. 9:37).

3. ¿Imatan wakin cristianokuna ruwanku Diospaq k’uchi llank’anankupaq?

³ Usqhayllataq predicay llank’ayta aparinanchis chayqa, tukuy tiemponchiswan kallpanchiswan iman chayta ruwananchis. Askha cristianokunan imaymana ruwanankuta saqepuspanku tukuy tiemponkuwan Diospaq llank’ashanku. Wakinmi kanku precursor, misionero otaq betelita. Imaymanataña saqepurqanku, sasachakuykunapiña tarikunku chaypas, Jehová Diosqa anchatan paykunata yanapan. Maytan kusikunchis chay iñiqmasinchiskunamanta (leey Lucas 18:28-30). Wakin cristianokunan ichaqa mana atinkuchu precursor kayta, chaywanpas paykunaqa tukuy atisqankutan ruwanku runakunaman wawankumanpas qespikuy ñanta yachachinankupaq (Deu. 6:6,7).

4. ¿Imaraykun wakin cristianokunapaq sasa kay tiempopi rikch’asqa kashay?

⁴ Qallariypi qhawarisqanchis hina, imapaqpas pisillaña tiempo kaqtinqa usqhayllan chayta ruwanchis. Yachanchisñan tukukuy tiempopi kawsashasqanchista, chaytaqa sut’itan rikuchin kay pachapi imaymana mana allinkuna sucedeshasqan, hinallataq Bibliaq nisqanpas (Mat. 24:3, 33; 2 Tim. 3:1-5). Ichaqa manan mayqen runapas yachanchu p’uchukay hayk’aq chayamunanta, Jesusmi nirqan: “Chay p’unchayta chay horatawanmi ichaqa mana pipas yachanchu, manallataq hanaq pachapi kaq angelkunapas, Churipas, aswanpas Yayallan yachan”, nispa (Mat. 24:36). Chaymi wakin cristianokunapaqqa sasa kay tiempopi rikch’asqa kashay, astawanqa unayña Diosta servishaqkunapaq (Pro. 13:12). ¿Qanpas chay cristianokuna hinachu kashanki? ¿Iman yanapawasunman Jehová Diospa Jesucristoq kamachiwasqanchis llank’ayta usqhaylla ruwananchispaq? Chaymantan yachasunchis.

 Jesús hina Diospaq llank’asun

5. ¿Imaynapin yachanchis Jesusqa kay pachapi ruwanankunata usqhaylla hunt’asqanta?

⁵ Jesusmi ñoqanchispaqqa ancha allin ejemplo Diospaq usqhaylla llank’ananchispaq, manan pipas pay hinaqa llank’arqanchu. Payqa kinsa wata kuskallapin kay pachapi ruwanankunata hunt’anan karqan, chaymi usqhaylla llank’arqan. Runakunamanmi yachachirqan Taytanpa sutinmanta, imachus ruway munasqanmanta, Gobiernonmanta allin willakuykunata, religionpi umallikunaq iskay uya kasqankutapas pantasqa yachachisqankutapas sut’imanmi horqorqan, wañupunankamataq qhawarichirqan Dioslla kamachinanpaq derechoyoq kasqanta. Hinaspapas Israel suyuntintan purirqan runakunata yachachispa, yanapaspa, onqoyninkumanta qhaliyachispa ima (Mat. 9:35). Manan pi runapas pay hinaqa chay pisi tiempollapi chhaytukuyta Diospaq llank’arqanchu (Juan 18:37).

6. ¿Iman Jesuspaq aswan importante karqan?

⁶ Jesusqa yacharqanmi kay pachapi Diospaq usqhaylla llank’anan kasqanta. Danielpa qelqasqan profeciaq nisqanwanmi yacharqan ima tiempopichus tarikusqanta, chaypin willarqan kay pachapi Jesuspa ruwanan ‘kuskan semanapi’ tukupunanta, chayqa karqan kinsa wata kuskanmi (Dan. 9:27). 33 watapi rey hina Jerusalén llaqtaman haykusqan qhepallamanmi nirqan: “Ñan tiempoña Runaq Churin hatunchasqa kananpaq”, nispa (Juan 12:23). Jesusqa yacharqanmi pisi tiempollamantaña wañupunanta. Ichaqa manan chayraykuchu tukuy atisqantaqa llank’arqan, paypaqqa aswan importante karqan Taytanpa munayninta ruwaymi, runakunamanpas munakuyninta rikuchiymi. Runakunata munakusqanraykun huk t’aqa qatikuqninkunata yachachirqan Israel nacionnintinpi predicanankupaq. Chhaynapin qatikuqninkunaqa ruwashallankuman kay pachapi paypa qallarisqan llank’ayta, paymantaqa astawanraqmi ruwananku karqan (leey Juan 14:12).

7, 8. ¿Imaraykun Jesús vendeqkunata qarqomurqan yupaychana wasimanta? ¿Imatan yachachisqankuna yuyarirqanku?

⁷ Predicayninta qallarisqan qhepallamanmi Jesusqa sut’ita rikuchirqan rawrashaq sonqowan Diospaq llank’asqanta, 30 wata Pascua fiestapi. Yachachisqankunawan Jerusalenman chayaspan “Dios yupaychana wasi patiopi tarirqan torokuna, ovejakuna, palomakuna vendeqkunata, hinallataq tiyaykuspa qolqe cambiaqkunatapas”. ¿Imatan Jesús ruwarqan? ¿Ima nirqankun chay ruwasqanmanta yachachisqankuna? (Leey Juan 2:13-17.)

⁸ Chay kutipi rimasqanta ruwasqanta ima rikuspankun yachachisqankunaqa yuyarirqanku: “Yupaychana wasiykimantan anchatapuni  sientini”, nispa Davidpa qelqasqanta (Sal. 69:9). ¿Imaraykun yachachisqankuna chayta yuyarirqanku? Yachachiqninkuq ruwasqan mancharikunapaqraq kasqanraykun. Dios yupaychana wasipi umallikunan chay negociotaqa ruwachiqku, paykunan karqanku sacerdotekuna kamachikuy simita yachachiqkuna ima. Jesusqa vendeqkunata qarqomuspa, chay umallikunaq mana allin ruwasqankutapas sut’iman horqospan paykunaq enemigonman tukupusharqan. Chaymi yachachisqankunaqa sut’ita repararqanku Jesusqa anchatapuni Diospa yupaychana wasinmanta sientesqanta otaq rawrashaq sonqowan Diosta servisqanta. Qatiqninpin yachasun imaynata rawrashaq sonqowan Diosta serviy kallpachawasunman paypaq usqhaylla llank’ananchispaq chaymanta.

Rawrashaq sonqowan usqhaylla llank’asun

9. Iman rawrashaq sonqowan Diosta serviy?

⁹ Jehová Diosta rawrashaq sonqowan serviyqa tukuy atisqanchista kusisqa paypaq llank’aymi. Jesuspas chhaynatan Diospaqqa llank’arqan kay pachapi kashaspa. Chaychá yachachisqankunaqa Davidpa qelqasqanta yuyarirqanku yupaychana wasipi ruwasqanta rikuspanku. ¿Imanaqtinmi Jesús rawrashaq sonqowan Diosta yupaycharqan?

10. ¿Ima ninantan David nisharqan “sientini” nisqa simiwan?

¹⁰ Hebreo rimaypi “sientini” nispa Salmo takipi Davidpa nisqanqa, mayninpin Traducción del Nuevo Mundo nisqa Bibliapi chay simita t’ikrakun ‘Diosllata yupaychaychis’, nispa (leey Éxodo 20:5; 34:14; Josué 24:19). Hebreo rimaypi “sientini” simimantan huk diccionario nin: “Imaynan casado runaqa munan esposan otaq qosan payllapaq kananta, chhaynallatataqmi Jehová Diospas serviqninkunamanta munan payllata yupaychanankuta”, nispa. Chhaynaqa “sientini” simiqa manan imatapas yanqa kusikuywan ruwayllamantachu rimashan imaynan pukllaqkunata kallpachaqkuna kusikunku hinataqa. Aswanpas Davidqa rimasharqan hukpa contranpi mana allin ruwasqankuta rawrashaq sonqowan allichaymantan, chhaynapi allinta qhawarichinanpaq.

11. ¿Imanaqtinmi Jesús rawrashaq sonqowan Diospaq llank’arqan?

¹¹ Jesuspa yachachisqankunaqa manan pantarqankuchu yupaychana wasipi Yachachiqninkuq ruwasqanta Davidpa qelqasqan Salmowan tupachispanku. ¿Imanaqtinmi Jesús rawrashaq sonqowan Diospaq llank’arqan? Manan kay pachapi ruwanankunata hunt’ananpaq pisi tiempollaña kasqanraykuchu, aswanpas tukuy sonqo Jehová Diosta yupaychasqanraykun, hinallataq Taytanta allinta qhawarichinanrayku. Chaymi Diospa sutinta pisichasqankuta qhawarispaqa rawrashaq sonqowan chayta allichaq. Chayraykun religionpi umallikunaq mana allin ruwasqankutapas sut’iman horqoq, chay umallikuna hawa ñak’ariq runakunatapas yanapaq (Mat. 9:36; 23:2, 4, 27, 28, 33).

Rawrashaq sonqowan Diosta yupaychasun

12, 13. ¿Imaynatan “cristianon kayku” niq religionkunapi umallikuna qhawarinku a) Jehová Diospa sutinta? b) Diospa Gobiernonta?

¹² Kay tiempopipas religionkunaqa Jesuspa tiemponpi hinan mana allin kaqta ruwashanku, mayninpiqa aswan mana allintaraqmi kanpas. Paykunaqa manan respetankuchu Diospa sutinta. Yachachisqankunaman mañakuyta yachachishaspan Jesús khaynata qallarirqan: “Sutiyki yupaychasqa kachun”, nispa (Mat. 6:9). ¿Imatan ruwashanku religionpi umallikuna, astawanqa “cristianon kayku” niq religionkunaq umallinkuna? Paykunaqa manan yachachinkuchu sutinmanta Diosta waqyakuyta, nitaq sutintaqa ch’uyapaqchu qhawarichinku. Aswanpas yachachinkun: “Diosqa kinsapin huklla, almaqa manan wañunchu, millay  runakunaqa rawrashaq ninapin ñak’arishanku”, nispa. Chaymi runakunaqa Diosta qhawarinku mana reqsiyta atinankupaq, millay ñak’arichiqta hina. Chaymantapas chay religionkunaq umallinkunaqa mana allin kawsasqankuwanmi Diospa sutinta qhellichanku (leey Romanos 2:21-24). Tukuy atisqankutataq ruwanku Diospa sutinta runakuna mana yachanankupaq, hap’isqanku Bibliapipas manan churachinkuchu sutintaqa, chaymi runakunaqa mana atinkuchu Jehová Diosta reqsiyta, paywan amigontin kaytapas (Sant. 4:7, 8).

¹³ Jesusqa yachachillarqantaqmi Diospa Gobiernon kamachimunanpaq mañakunankuta, khaynatan nirqan: “Qhapaqsuyuyki hamuchun, munayniyki kay pachapi ruwakuchun, imaynan hanaq pachapipas ruwakun hinata”, nispa (Mat. 6:10). Religionkunaq umallinqa yapa-yapamantaña chay mañakuyta ruwashanku chaypas, runakunatan kallpachanku kamachikuqkunaman sayapakunankupaq, huk institucionkunamanpas. Diospa gobiernonmanta willaqkunatataq pisichanku. Chay religionkunapiqa mana rimankuchu Diospa Gobiernonmanta, nitaq chaypiqa iñinkupaschu.

14. ¿Imaynatan religionkunaq umallinkuna Diospa Siminta pisichanku?

¹⁴ Taytanmanta mañakuspan Jesús nirqan: “Simiykiqa cheqaq-kaypunin”, nispa (Juan 17:17). Manaraq hanaq pachaman kutipushaspataq willarqan Dios serviqkunaman espiritual mikhunata qonanpaq “allin yuyayniyoq hunt’aq kamachi[ta]” churananpaq (Mat. 24:45). Religionkunaq umallinkunan ninku paykuna Diospa Siminmanta yachachinankupaq churasqa kasqankuta. Ichaqa manan hunt’ashankuchu Patronpa kamachisqanta. Wakinmi ninku: “Bibliaq willakuyninkunaqa cuentokunallan”, nispa. Diosmanta yachachispa runakunaq sonqonta llanllarichinankumantaqa, runakunaq uyariy munasqankuman hinallan yanqa yachachikuykunata yachachinku. Hinaspapas Diospa kamachikuyninkunatan pisichanku mana allin kaqta allinpas kanman hinata qhawarichispanku (2 Tim. 4:3, 4).

15. ¿Imaynan sientekunki Diospa sutinpi religionkunaq umallinkuna imaymana mana allin ruwasqankumanta?

¹⁵ Religionkunaq umallinkunaqa Diospa sutinpin mana allinkunata ruwarqanku, chaykunata yachaspankun askha runakuna nishu k’irisqa sientekunku manañataq Diospipas Simin Qelqapipas iñipunkuchu, chhaynapin Satanaspa makinman urmanku. ¿Imaynan sientekunki sapa kutilla chayta rikuspa, hinallataq munakuq Taytanchismanta mana allinta rimaqtinku, ch’uya sutintapas qhellichaqtinku? Tukuy atisqaykitachá ruwayta munanki Taytanchismanta cheqaq kaqta rimanaykipaq. Religionkunaq umallinkuna mana allin ruwasqankurayku sonqo nanaypi tarikushaq runakunatapas kallpachaytachá munanki. Jesusqa manan khuyapayallarqanchu runakunata “mana michiqniyoq ovejakunata hina wikch’usqata, ch’eqechisqata” rikuspaqa, aswanpas ‘yachachiytan qallarirqan’ (Mat. 9:36; Mar. 6:34). Payqa tukuy sonqopunin Diospaq llank’arqan.  Chaymi ñoqanchispas pay hina kananchis.

16, 17. a) ¿Imaraykun tukuy atisqanchista Diospaq llank’anchis? b) ¿Imamantan qatimuq estudiopi yachasun?

¹⁶ Rawrashaq sonqowan Diospaq llank’asun chayqa, apóstol Pabloq nisqantan aswan allinpaq qhawarisun (leey 1 Timoteo 2:3, 4). Manan tukukuy tiempopi kawsasqanchisraykullachu tukuy atisqanchista Diospaqqa llank’anchis, chaytaqaastawan ruwanchis imachus munaynin kasqanta yachasqanchisraykun. Payqa munanmi runakuna cheqaq kaqta yachaspa yupaychanankuta, yanapayninta chaskinankutapas. Chhaynaqa manan p’uchukay cercapiña kasqanta yachasqanchisraykullachu usqhaylla Diospaqqa llank’anchis, aswanpas sutinta allinta qhawarichinanchisraykun, munayninta runakunaman yachachinanchisrayku ima. Rawrashaq sonqowan payta serviymi kallpachawanchis chay hinata llank’ananchispaq (1 Tim. 4:16).

¹⁷ Ñoqanchisqa yachanchismi imachus Jehová Diospa munaynin kay pachapaq runakunapaqpas kasqanta. Chay yachasqanchiswanmi runakunata yanapananchis kusisqa kawsanankupaq, hamuq tiempopi sumaq kawsay kananpi suyakunankupaq, Satanaspa kaqninkuna tukukapuqtin chaypi ama wañunankupaqpas (2 Tes. 1:7-9). Chayrayku Diospa hatun p’unchaynin manaraq hamusqanmanta iñiyninchispi pisipananchismantaqa, kusikunanchis rawrashaq sonqowan Diosta servinanchispaq tiempo kashasqanmantaraq (Miq. 7:7; Hab. 2:3). Qatimuq estudiopin yachasun imaynatan rawrashaq sonqowan Jehová Diosta servishallasunman chayta.

¿Imaynatan kutichisunman?

• ¿Imanaqtinmi Jesús tukuy atisqanta Diospaq llank’arqan?

• ¿Ima ninantan David nisharqan “sientini” nisqa simiwan?

• ¿Imanaqtinmi kunan rawrashaq sonqowan Diospaq llank’ananchis?

[Tapuykuna]

[8 paginapi dibujo]

Jesuspaqqa aswan importante karqan Taytanpa munayninta ruwaymi runakunata munakuy ima

[10 paginapi foto]

Tukuy sonqopuni Jehová Diospaq llank’asun