Shisekela Kukhonta Kweliciniso
Shisekela Kukhonta Kweliciniso
“Kuvuna kukhulu, kodvwa tisebenti timbalwa.”—MAT. 9:37.
1. Ungakuchaza njani kuphutfuma?
ASESITSI uphetse timphepha lokudzingeka tifike kumuntfu lotsite lingakashoni lilanga. Yini loyentako? Kuto, ubhala kutsi “KUYAPHUTFUMA!” Uyohlangana nemuntfu lotsite mayelana nendzaba lebalulekile, kodvwa sewushaywa sikhatsi. Yini loyentako? Ucala ‘KUPHANGISA!’ Kuliciniso kutsi nangabe kukhona umsebenti lokufanele uwente bese ushiywa sikhatsi, utiva ucindzetelekile futsi ukhatsatekile. Umuva wakho wekwesaba ucala kukhula, bese ucala kusebenta ngekushesha nangekutimisela. Loko kusho kuphutfuma!
2. Ngumuphi umsebenti lophutfuma kuyendlula yonkhe lokufanele wentiwe ngemaKhristu eliciniso lamuhla?
2 KumaKhristu eliciniso lamuhla, kute umsebenti lophutfuma kwendlula kushumayela tindzaba letinhle teMbuso kanye nekwenta bantfu bato tonkhe tive babe bafundzi. (Mat. 24:14; 28:19, 20) Acaphuna emavi lashiwo nguJesu, umfundzi Makho watsi lomsebenti bekufanele wentiwe “kucala,” ngembikwekutsi kufike kuphela. (Mak. 13:10) Lena yintfo lokufanele yentiwe nakanjani. Jesu watsi: “Kuvuna kukhulu, kodvwa tisebenti timbalwa.” Sikhatsi sekuvuna angeke sihlehliswe, futsi sivuno kufanele sibutfwe singakendluli sikhatsi.—Mat. 9:37.
3. Labanye bantfu basabele njani kulesidzingo lesiphutfumako sekushumayela?
3 Ngesizatfu sekutsi umsebenti wekushumayela ubaluleke kakhulu kitsi, kufanele sinikele ngaso sonkhe sikhatsi setfu, emandla, kanye nekunaka kwetfu. Kuyajabulisa kutsi bazalwane kanye nabodzadze labanyenti bayakwenta loko. Labanye bente kuphila kwabo kwaba melula kute bakwati kungenela umsebenti wasikhatsi sonkhe wekuba ngemahlahlandlela, titfunywa telivangeli, nobe wekukhonta kulelinye lemakhaya aseBethel lasemhlabeni wonkhe. Kuphila kwabo kumatasatasa kakhulu. Bente kutinikela lokukhulu, futsi bunyenti bumatima labahlangabetana nabo. Nanobe kunjalo, Jehova ubabusisa kakhulu, futsi natsi sijabula kanye nabo. (Fundza Lukha 18:28-30.) Nanobe labanye bangakhoni kungenela umsebenti wasikhatsi sonkhe, banikela ngesikhatsi lesengetiwe kulomsebenti losindzisa kuphila, lohlanganisa nekusita bantfwana betfu kutsi nabo basindze.—Dut. 6:6, 7.
4. Yini lengenta kutsi labanye bantfu balahlekelwe ngumuva wekuphutfuma?
4 Njengobe sibonile, umuva wekuphutfuma uvame kuhambisana nesikhatsi lokufanele kucedvwe ngaso umsebenti lotsite, nobe kufika kwekuphela. Siphila esikhatsini sekuphela, futsi sinebufakazi lobunyenti lobusemiBhalweni kanye nebemlandvo bekutsi loko kuliciniso. (Mat. 24:3, 33; 2 Thim. 3:1-5) Nanobe kunjalo, kute umuntfu lowati sikhatsi lesicondzile sekufika kwekuphela. Ngalesikhatsi Jesu asho imininingwane lemayelana ‘nesibonakaliso’ lesiveta ‘kuphela kwetikhatsi,’ ngalokucondzile watsi: “Noko kute lowatiko kutsi lelo langa nemzuzu kuyawufika nini, ngisho netingilosi ezulwini neNdvodzana ayati, lowatiko nguBabe kuphela.” (Mat. 24:36) Ngesizatfu saloko, bantfu labanyenti bangase bakutfole kumatima kulondvolota umuva wekuphutfuma ngaso sonkhe sikhatsi, ikakhulukati nangabe sekusikhatsi lesidze benta njalo. (Taga 13:12) Kuyenteka yini kutsi nawe utive ngaleyondlela ngaletinye tikhatsi? Yini lengasisita kutsi sakhe nobe silondvolote umuva wekuphutfuma ngemsebenti Nkulunkulu Jehova kanye naJesu Khristu labafuna siwente?
Cabanga NgaJesu, Losibonelo Setfu
5. Jesu wakuveta ngatiphi tindlela kutsi abenemuva wekuphutfuma ngemsebenti wekushumayela?
5 Jesu Khristu usibonelo lesibendlula bonkhe labo labake baba nemuva wekuphutfuma ngemsebenti waNkulunkulu. Lesinye sizatfu lesamenta waphutfuma kutsi kunyenti lokwakufanele akwente ngesikhashana nje lesiminyaka lemitsatfu nencenye. Nanobe kunjalo, kunyenti Jesu lakufeza ekukhonteni kweliciniso kwendlula nobe ngabe ngumuphi lomunye umuntfu. Walenta latiwa libito laBabe wakhe kanye nenjongo yakhe, washumayela tindzaba letinhle teMbuso, wembula batentisi kanye netimfundziso temanga tebaholi benkholo, futsi wasekela bukhosi baJehova kwate kwaba sekufeni. Watinikela ngalokuphelele—ngekutsi afundzise, nangekutsi asite bantfu futsi abelaphe. (Mat. 9:35) Kute umuntfu loke wakwati kufeza tintfo letingaka ngesikhashana njengaye. Jesu wasebenta ngekutimisela lokukhulu.—Joh. 18:37.
6. Yini Jesu labeyinaka kakhulu ekuphileni kwakhe?
6 Yini leyenta Jesu wasebenta ngenkhutsalo kuso sonkhe sikhatsi lasicitsa alapha emhlabeni? Ngekwesiphrofetho saDanyela, Jesu bekati kutsi singakanani sikhatsi labenaso sekufeza umsebenti wakhe ngekuvumelana naloko lobekuhlelwe nguJehova. (Dan. 9:27, NW.) Ngako-ke, njengobe kuvetiwe, umsebenti wakhe lebekufanele awente ngesikhatsi asemhlabeni bewutawutsatsa ‘incenye yeliviki,’ nobe iminyaka lemitsatfu nencenye. Ngemuva nje kwekungena kwakhe ngemphumelelo eJerusalema, entfwasahlobo ya-33 C.E., Jesu watsi: “Sesifikile sikhatsi sekutsi iNdvodzana yemuntfu ikhatimuliswe.” (Joh. 12:23) Nanobe Jesu bekati kutsi kufa kwakhe bekutawukwenteka nakanjani, akazange acabange ngako kakhulu, futsi akazange akuvumele kutsi kube ngiko lokumenta asebente ngenkhutsalo. Kunaloko, wanaka kakhulu kusebentisa onkhe ematfuba lawatfolako kute ente intsandvo yaBabe wakhe kanye nekutsi atsandze bantfu labekanye nabo. Lolotsandvo lwamenta wacecesha bafundzi bakhe, futsi wabatfuma kutsi bayawukwenta umsebenti wekushumayela. Loko wakwenta ngesizatfu sekutsi abefuna bachubeke nemsebenti labewucalile, kanye nekutsi bafeze umsebenti lomkhulu lowendlula loyo yena abewufezile.—Fundza Johane 14:12.
7, 8. Yini bafundzi labayikhumbula ngalesikhatsi Jesu ahlanta lithempeli, futsi kungani Jesu enta njalo?
7 Loko lokwentiwa nguJesu ngalelinye lilanga kwaveta kutsi abenenshisekelo lenkhulu. Kwakungesikhatsi asandza kucala umsebenti wekushumayela, ngeliPhasika la-30 C.E. Jesu nebafundzi bakhe baya eJerusalema, nabefika ethempelini bakhandza “bantfu batsengisa tinkhomo, timvu, nematuba; labanye bebantjintja timali bahleti ematafuleni.” Yini Jesu layenta, futsi loku kwabakhumbutani bafundzi bakhe?—Fundza Johane 2:13-17.
8 Loko Jesu lakusho futsi wakwenta ngalelolanga kwakhumbuta bafundzi bakhe emavi lasiphrofetho lahlatjelwa nguDavide: “Ngidliwa kushisekela indlu yakho.” (Hla. 69:9) Kungani bakhumbula lawo mavi? Kungobe loko Jesu lakwenta bekungamfaka engotini lenkhulu. Ngetulu kwaloko, labo labaneligunya kulelithempeli—baphristi, babhali, kanye nalabanye, ngibo labebente lelibhizinisi kute batfole imali. Ngekuveta futsi aphatamise lelichinga labo, Jesu abetenta sitsa sebaholi benkholo. Njengobe bafundzi bakhe bebabukele, bayibona kahle ‘inshisekelo yendlu yaNkulunkulu,’ nobe inshisekelo yekukhonta kweliciniso labenayo. Kodvwa-ke, iyini inshisekelo? Ayifanani yini nekuphutfuma?
Umehluko Emkhatsini Wekuphutfuma Nenshisekelo
9. Singayichaza njani inshisekelo?
9 Lesinye sichazamagama sitsi “inshisekelo” isho “kulangatelela kwenta intfo letsite,” futsi sitsi lamanye emagama lanenchazelo lefananako ngulatsi sifiso kanye nemdlandla. Kuliciniso kutsi nemsebenti lowentiwa nguJesu singawuchaza ngalamagama. Ngakulokunye, i-Today’s English Version itsi: “Ngidliwa kushisekela indlu yakho.” Kuletinye tilwimi tase-Asia, leligama lelitsi “inshisekelo” lakhiwa tincenye letimbili letisho “inhlitiyo levutsako” natihunyushwe njengobe tinjalo, lokunemcondvo wekusha kwenhlitiyo. Kungako bafundzi bakhe bakhumbula lamavi aDavide ngalesikhatsi bambona ahlanta lithempeli. Ngako-ke, yini leyenta Jesu waba nenshisekelo nobe wenta ngaleyo ndlela?
10. NgekweliBhayibheli, isho kutsini ‘inshisekelo’?
10 Ligama lelitsi ‘inshisekelo’ engomeni yaDavide lelitsetfwe egameni lesiHebheru, livame kuhunyushwa ngekutsi ‘sikhwele’ kuletinye tincenye teliBhayibheli. Ngaletinye tikhatsi “INguqulo Yezwe Elisha” ilichaza ngekutsi “kutinikela kuye kuphela.” (Fundza Eksodusi 20:5; 34:14; Joshuwa 24:19.) Naku lokwashiwo ngulesinye sichazamagama seliBhayibheli ngaleligama: “Livame kusetjentiswa ngendlela lehlobene nesikhwele lesifanele lesiba khona emshadweni . . . Ngendlela lefananako, Nkulunkulu unelilungelo lekukhontwa ngulabo labaseluhlangotsini lwakhe, futsi uyalilwela lelo lungelo.” Ngako-ke, ngekweliBhayibheli inshisekelo ingetulu kwekumane ube nemfutfo ngentfo lofuna kuyenta, njengobe kwenta bantfu ngemdlalo labawutsandzako. Inshisekelo yaDavide beyisikhwele kodvwa ngendlela lenhle, lokusho kungavumeli lokubi, kumelela emaciniso, kuba nesifiso lesikhulu sekuvikela umuntfu longenacala, nobe kulungisa umonakalo.
11. Yini leyenta Jesu waba nenshisekelo?
11 Bafundzi baJesu bebangenti liphutsa ngekuhlobanisa emavi aDavide naloko labakubona kwentiwa nguJesu ethempelini. Jesu akazange ente loko ngobe nje afuna kucedza umsebenti wakhe, kodvwa wakwenta ngesizatfu sekutsi abenenshisekelo—nobe sikhwele ngelibito laBabe wakhe nangekukhonta kweliciniso. Ngalesikhatsi abona libito laNkulunkulu lingcoliswa futsi ledzelelwa, waba nenshisekelo, nobe sikhwele lesifanele, futsi wasilungisa leso simo. Ngalesikhatsi Jesu abona bantfu labatfobekile baphatfwa kabi futsi bagcilatwa baholi benkholo, inshisekelo yakhe yamenta wabaletsela inkhululeko labo bantfu. Ngemavi lacinile, wasola tento tebaholi benkholo.—Mat. 9:36; 23:2, 4, 27, 28, 33.
Shisekela Kukhonta Kweliciniso
12, 13. Yini leyentiwe baholi beTinkholo Letitsi TebuKhristu mayelana (a) nelibito laNkulunkulu? (b) neMbuso waNkulunkulu?
12 Simo kanye netento talabo labatsi batikhonti taNkulunkulu lamuhla siyafanana naleso lesasikhona esikhatsini saJesu, nangabe singasisibi kakhulu kunaso. Nasi sibonelo: Khumbula kutsi intfo yekucala Jesu latsi balandzeli bakhe bayithandazele beyitsintsa libito laNkulunkulu, watsi: “Alingcweliswe libito lakho.” (Mat. 6:9) Baholi benkholo, ikakhulukati labo beTinkholo Letitsi TebuKhristu, bayabafundzisa yini bantfu kutsi bati libito laNkulunkulu futsi balingcwelise, nobe balidvumise? Ngalokwehlukile, bakhuluma kabi ngaNkulunkulu batsi unguMtsatfu Amunye, bafundzisa ngemphefumulo longafi, kanye nangesihogo, baphindze bente Nkulunkulu abonakale angumuntfu lowehlukile, lokungasimelula kumcondza, lonelunya, nalohluphekisa bantfu. Baphindze bahlambalate Nkulunkulu ngemikhuba yabo lemibi kanye nekutentisa kwabo. (Fundza Roma 2:21-24.) Ngetulu kwaloko, bente konkhe lokusemandleni abo kute bafihle libito laNkulunkulu, bate balikhipha nasemahumushweni abo eliBhayibheli. Ngekwenta njalo, bente kutsi bantfu bangakwati kusondzela kuNkulunkulu futsi bangabi nebuhlobo naye.—Jak. 4:7, 8.
13 Jesu waphindze wafundzisa balandzeli bakhe kutsi bathandazele uMbuso waNkulunkulu, batsi: “Umbuso wakho awute. Intsandvo yakho ayentiwe emhlabeni, njengobe yentiwa ezulwini.” (Mat. 6:10) Nanobe baholi beTinkholo Letitsi TebuKhristu bavame kuwusho kanyenti lomthandazo, baye bakhutsata bantfu kutsi basekele tinhlangano tebantfu nobe tetembusave. Ngetulu kwaloko, bababukela phansi labo labetama kushumayela futsi bafakaze ngaloMbuso. Ngesizatfu saloko, bantfu labanyenti labatsi bangemaKhristu abasakhulumi ngeMbuso waNkulunkulu, futsi sebete kukholwa kuwo.
14. Bafundisi beTinkholo Letitsi TebuKhristu balifulatsele njani liVi laNkulunkulu?
14 Ngesikhatsi athandaza kuNkulunkulu, Jesu washo ngalokucacile watsi: “Livi lakho liliciniso.” (Joh. 17:17) Ngembikwekutsi abuyele ezulwini, Jesu watsi abetawubeka ‘sisebenti lesetsembekile nalesihlakaniphile’ kute sinikete bantfu bakhe kudla kwakamoya. (Mat. 24:45) Nanobe bafundisi beTinkholo Letitsi TebuKhristu batsi bafundzisa bantfu ngeliVi laNkulunkulu, bawente ngekwetsembeka yini umsebenti iNkhosi lebaphatsise wona? Cha. Bavame kutsi loko lokuseBhayibhelini kuyinganekwane. Kunekutsi bafundisi bondle umhlambi wabo ngekudla kwakamoya futsi bawunikete indvudvuto nekukhanya kweliciniso, bakitata tindlebe temakholwa ngekufundzisa emafilosofi ebantfu. Ngetulu kwaloko, baye batifulatsela timiso taNkulunkulu tekutiphatsa kute bafundzise timiso tabo letiphambene.
15. Utiva njani ngato tonkhe tintfo letentiwa baholi benkholo ngelibito laNkulunkulu?
15 Ngesizatfu sato tonkhe letintfo letiye tentiwa ngelibito laNkulunkulu longumnikati weliBhayibheli, bantfu labanyenti labacotfo baye badvumateka nobe balahlekelwa kukholwa kwabo kuNkulunkulu kanye naseBhayibhelini. Baye batfunjwa nguSathane nalelive lakhe lelibi. Utiva njani nawubona nobe uva ngaletintfo letenteka malanga onkhe? Njengesikhonti saJehova, nawubona lelihlazo kanye nekuhlanjalatwa kwelibito lakhe, awutiva yini ufuna kwenta konkhe lokusemandleni akho kute ulungise lesimo? Nawubona bantfu labacotfo nalabanetinhlitiyo letinhle badukiswa futsi baphatfwa kabi, akukwenti yini ufune kubadvudvuta labo labacindzetelekile? Ngesikhatsi Jesu abona bantfu bangesikhatsi sakhe ‘bakhatsatekile futsi bahlakatekile, banjengetimvu letite umelusi,’ akazange agcine nje ngekuba nesihawu ngabo. “Wabafundzisa ngetintfo letinyenti.” (Mat. 9:36; Mak. 6:34) NjengaJesu, natsi sinato tonkhe tizatfu tekushisekela kukhonta kweliciniso.
16, 17. (a) Yini lokufanele isikhutsate kutsi sitimisele emsebentini wekushumayela? (b) Yini lesitawucoca ngayo esihlokweni lesilandzelako?
16 Nangabe sikhutsele emsebentini wekushumayela, emavi emphostoli Pawula latfolakala ku-1 Thimothi 2:3, 4 aba nenchazelo lebaluleke kakhulu kitsi. (Fundza.) Umsebenti wekushumayela asiwenti ngenshisekelo ngobe nje sati kutsi siphila emalangeni ekugcina, kodvwa sentiwa kucaphela kutsi loko kuyintsandvo yaNkulunkulu. Ufuna kutsi bantfu bati liciniso kute nabo bamkhonte, futsi batfole tibusiso. Intfo lesikhutsata kutsi sitimisele emsebentini wekushumayela akusiko kutsi sikhatsi siyaphela, kodvwa kutsi sifuna kudvumisa libito laNkulunkulu futsi sisite bantfu bati intsandvo yakhe. Sinenshisekelo ngekukhonta kweliciniso.—1 Thim. 4:16.
17 Njengebantfu baJehova, sibusiswe ngelwati lolumayelana neliciniso ngenjongo yakhe ngebantfu kanye nemhlaba. Siyakwati kusita bantfu kutsi batfole injabulo kanye nelitsemba lelicinisekile lelikusasa. Singabakhombisa indlela yekutfola sivikelo nasekubhujiswa lelive lelibi laSathane. (2 Thes. 1:7-9) Kunekutsi sikhatsateke nobe siphele emandla ngobe sibona shengatsi lilanga laJehova alifiki, kufanele sijabule ngekutsi sisekhona sikhatsi sekutsi sibe nenshisekelo yekukhonta kweliciniso. (Mik. 7:7; Hab. 2:3) Singayakha njani inshisekelo lenjalo? Sitawucoca ngalendzaba esihlokweni lesilandzelako.
Ungachaza Njani?
• Yini leyakhutsata Jesu kutsi asebente ngenkhutsalo kuso sonkhe sikhatsi lasicitsa alapha emhlabeni?
• NgekweliBhayibheli, lisho kutsi ligama lelitsi ‘inshisekelo’?
• Yini leyentekako lamuhla lokufanele isikhutsate kutsi sibe nenshisekelo ngekukhonta kweliciniso?
[Imibuto Yesihloko Lesifundvwako]
[Sitfombe ekhasini 16]
Jesu wanaka kakhulu kwenta intsandvo yaBabe wakhe kanye nekutsandza labanye bantfu
[Sitfombe ekhasini 18]
Natsi sinato tonkhe tizatfu tekuba nenshisekelo ngekukhonta kweliciniso