Lu A Gbashima Sha Kwagh U Mcivir U Mimi
Lu A Gbashima Sha Kwagh U Mcivir U Mimi
“Sunda ngee je, kpa mbasundan yô, mba di kpeghee tsô.”—MAT. 9:37.
1. U pase inja i u eren kwagh torough torough la nena?
ALUER u ngu a ngeren u i gbe u orgen nana er kwagh sha mi fele fele nahan, u er nena? U nger sha mi wer “KWAGH GBA SHA MI FELE FELE!” “U ngu zan angahar u za nengen a or mape, man u gba leti, nahan u er nena? U ZENDE KPASE KPASE!” Sha mimi yô, ka wea lu a tom u i gbe u a er u keng man shighe a nôngon u karen nahan ishima i nyian we shi u hingir kera ke kera kpaa. Ka i torough we iyol, nahan u gba eren kwagh tsong tsong shi u er sha tahav ou cii. Ka u eren kwagh torough torough je la!
2. Ka tom u nyi i gbe u Mbakristu mba mimi vea hemba eren nyian torough torougho?
2 Tom u i gbe u Mbakristu mba mimi vea hemba eren u nyian torough torough yô, ka tom u pasen loho u dedoo u Tartor shi geman akuraior cii hingir mbahenen la. (Mat. 24:14; 28:19, 20) Orhenen Marku ngur ôron mkaanem ma Yesu yô, a kaa ér a “vande” eren tom ne, inja na yô, a er u cii ve mkur una va ye. (Mar. 13:10) Man kape i gbe u a lu kpaa je la. Yesu kaa ér: “Sunda ngee je, kpa mbasundan yô, mba di kpeghee tsô.” Mba timbir a sunda ga, ka i gba u a sunda iyiav cii shighe u sunda una kar ye.—Mat. 9:37.
3. Ior kpishi er nena, er i gbe u a pase kwagh torough torough ne?
3 Er tom u pasen kwagh la u lu hange hange nahan yô, ú kuma u se ver ishima sha u shi se er u a shighe wase man sha agee a ase cii. Kwagh er doo yô, anmgbianev mba nomso man mba kasev mba eren kwagh ne. Mbagenev gema eren akaa ken uma ve akuma akuma sha er vea er tom u pasen kwagh hanma shighe la sha iantom i pania shin mbamishen gayô za eren tom hen iyaagh ki Betel ki hen tar ve. Ve ngee a ityom i eren. Alaghga ve de akaa kpishi saa ve shi mba tagher a mbamtaver kpishi. Nahan cii kpa, Yehova ver ve dedoo. Saan se iyol a ve. (Ôr Luka 18:28-30.) Shin er mbagenev ve fetyô u eren tom u pasen kwagh hanma shighe ga nahan kpa, ve na shighe kpishi sha u eren tom u yiman uuma mba iorov kua mbayev asev kpaa.—Dut. 6:6, 7.
4. Alaghga a lu mbagenev ican u eren tom u pasen kwagh la torough torough sha ci u nyi?
4 Er se nenge nahan, shighe u eren kwagh ka a nôngon u karen shin kuren shin been ve i gba u a er kwagh shon torough torough ye. Yiase man akav a ken Ruamabera kpishi tese ér se mba ken shighe u mkur. (Mat. 24:3, 33; 2 Tim. 3:1-5) Nahan kpa, or môm fa shighe u mkur una va jighilii ga. Shighe u Yesu lu pasen kwagh u una lu “ikyav” i tesen ér ‘mkurtar’ zulum la, a kaa jighilii ér: “Kwagh u iyange la man shighe la yô, ma or fa ga, shin mbatyomov mba Shaav shin Wan kpaa ga, saa Ter tseegh.” (Mat. 24:36) Er kwagh a lu nahan yô, alaghga a lu mbagenev ican u eren tom u pasen kwagh la torough torough hanma inyom, hemban cii je yô, aluer mba vanden pasen kwagh shighe kar yô. (Anz. 13:12) Ashighe agen ka i lu u nahanaa? Kanyi ia wase se ve se er tom u Aôndo man Yesu ve soo ér se er nyian la torough torough, shin se za hemen u eren nahana?
Dondo Yesu, u A Ver Se Ikyav La
5. Ka sha nyi igbenda nahan Yesu yange er tom u pasen kwagh la torough torougho?
5 Ken ior mba yange ve er tom u Aôndo torough torough cii, ka Yesu Kristu a lu ikyav i tseer tseer ye. Ityôkyaa i môm i yange na ve Yesu er u torough torough yô, lu sha ci u gba u una er u kpishi ken atô u anyom atar man tiôn tseegh. Nahan kpa, Yesu er tom ken mcivir u mimi hemba hanmaor sha won cii. Yange pase iti man awashima u Ter na, shi pase loho u dedoo u Tartor, shi pon imanger man atesen a aiegh a mbahemenev mba kwaghaôndo, shi sue mtemtor u Yehova zan zan ar ken ku. Ape Yesu yange una za cii, a tange iyol u tesen ior shi wasen ve shi been ve angev ga. (Mat. 9:35) Ma or nan ngu a er tom kpishi sha anshighe kpuaa er Yesu yange er nahan ga. Yange er tom sha gbashima.—Yoh. 18:37.
6. Lu nyi i hemba gban Yesu u eren ken uma naa?
6 Kanyi yange i mgbegha Yesu ve pase kwagh a uwergban shio zan zan kar kurene? Kwaghôron u profeti u Daniel ôr la yange wase Yesu u fan shighe u gba u una kure tom na sha shighe u Yehova ver la. (Dan. 9:27) Sha nahan yô, er se vande ôron nahan, lu u tom na u pasen kwagh shin tar la ua kure “ker atô lahadi,” shin ken anyom atar man tiôn. Ken fam u inyom i 33 la, Yesu yange nyôr ken Yerusalem sha wanjaki, ica gba ga maa a kaa ér: “Shighe kuma u á na Wan u or icivir ve.” (Yoh. 12:23) Shin er Yesu fa ér ica a gba ga tsô a wua un nahan kpa, yange hemba veren ishima sha kwagh la sha u a̱ hingir ityôkyaa i vesen i una er tom sha gbashima ga. Kpa hemba gban un u eren ishima i Ter na sha hanma ian i í dugh cii shi tesen uumace mbagenev dooshima. Dooshima la mgbegha un u kohol mbahenen shi tesen ve, shi tindin ve sha u ve za pase kwagh. Yange er kwagh ne sha ci u ve̱ er tom u un hii la, ve̱ er ityom i hemban i un er la je kpaa.—Ôr Yohane 14:12.
7, 8. Mbahenen mba Yesu yange ve er nena sha mwanger u a wanger tempel laa, man er nan ve Yesu er kwagh nahala?
7 Kwagh ugen yange er, u tese gbashima u Yesu tseer tseer yô. Kwagh ne er shighe u Yesu hii tom na u pasen kwagh ica i lu a gba ga, sha shighe u iniongo i Paseka u inyom i 30 la. Yesu man mbahenen nav za ken Yerusalem, ve za zua a “mba ve lu teen ibua kua iyôngo man mkungum ken tempel, man shi mbamusaninyaregh kpaa ve tema ker.” Yesu nenge kwagh ne nahan a er nena, man kwagh la bende a mbahenen nav nena?—Ôr Yohane 2:13-17.
8 Kwagh u Yesu er shi ôr sha ihyongo la umbur mbahenen kwaghôron u profeti, u Davidi yange ôr ken Pasalmi na ugen yô, a kaa ér: “Ishima i veren [shin gbashima NW,] sha [kwagh u] iyou You la wuam.” (Ps. 69:9) Sha ci u nyi? Sha ci u kwagh u Yesu er la na yô, a ver uma na sha zongo. Kera ga je kpa, upristi man mbangeren kua mbagenev mba ve nengen sha tempel la sue kpenga u vihin tsung u i lu eren ken tempel keren mtsera sha igyosough la. Er Yesu za num ve shi pon ieren ve la yô, lu hingir orihyom u mbahemenev mba kwaghaôndo mba sha ayange la. Er mbahenen kav kwagh u lu zan hemen la vough nahan, ‘gbashima sha kwagh u iyou i Aôndo,’ shin gbashima sha kwagh u mcivir u mimi yange due tseer tseer. Kpa kanyi i lu gbashima? Ngu kposo a u eren kwagh torough toroughoo?
I Tôô Mlu u Torough Torough i Kar sha Gbashima
9. A fatyô u pasen inja i gbashima ér nyi?
9 Dikishenali igen pase inja i “gbashima” ér “ka u kwagh girim or iyol man u or taver ishima sha u keren kwagh u nan soo u zuan a mi yô,” shi i̱ na asember agen a á ze ikyua a gbashima yô; asember shon yô, ka ishimatseen man ishima i môm. Sha mimi yô, a fatyô u kaan ér asember ne cii zua sha gbenda u Yesu pasen kwagh la. Sha nahan yô, Bibilo i í yer ér Today’s English Version la gema ivur la ér: “Gbashima wam sha kwagh u iyou you, Aôndo, ngu yeghen ken amo er usu nahan.” U zuan sha kwagh ne yô, ken ijô igen ken ityar i sha ityoughkitaregh la, ishember la ngi ker avegher ahar, man inja i i̱ ér “tsee-ishima,” inja er ishima shon yegh usu nahan. Nahan kera kpiligh iyol er hii ve mbahenen umbur mkaanem ma Davidi zum u ve nenge kwagh u Yesu er ken tempel la ga. Kpa lu nyi i na ve ishima i Yesu gba usu, nahan tsue un ken ishima shin ishima mgbeghan un u eren kwagh nahana?
10. Inja i “gbashima” u i er kwagh na ken Bibilo la ér nyi?
10 I zua a ishember i “gbashima,” i í nger ken Pasalmi u Davidi la ken ishember i ken zwa Heberu, i ashighe kpishi ka i gema i sha ajiir agen ken Bibilo ér “gba iyuhwe” shin “iyuhwe” yô. Ken mgem u Bibilo i New World Translation la yô, ashighe agen ka i gema i̱ ér “soon ér i civir un tseegh.” (Ôr Ekesodu 20:5; 34:14; Yosua 24:19.) Dikishenali igen i pasen asember a Bibilo ôr kwagh u ishember ne ér: “Ashighe kpishi ka i yar tom a ishember ne sha kwagh u mlu u nom man kwase . . . Er iyuhwe i ken ishima i nom shin kwase ka i mgbegha nan u lumun ér ikyar u nan a hingir u orgen ga nahan, kape Aôndo kpa a lumun ér mba ve lu mba nav ve civir kwagh ugen ga je la.” Sha nahan yô, gbashima u i er kwagh na ken Bibilo la hemba di u or taver ishima sha u keren kwagh u nan soo u zuan a mi shin u kwagh girim or iyol, er ka i girim mbasoon anumbe iyol sha kwagh u iniumbe i i hembe doon ve ishima la nahan. Gbashima u Davidi la lu iyuhwe i dedoo, inja na yô, ka u lumun ér i hendan a na ga shin lumun ilyahan sha iyol na ga, shi ka isharen i lu a mi taveraa ér una kura iti i dedoo shin una sôr kwagh u i er shami ga yô.
11. Kanyi yange i mgbegha Yesu u eren kwagh sha gbashima?
11 Mbahenen mba Yesu yange ve tsume sha u tôôn mkaanem ma Davidi mara zuan sha kwagh u ve nenge Yesu er ken tempel la ga. Yesu yange er kwagh nahala sha ci u un ngu a shighe kpuaa tsô ga, kpa lu sha ci u a lu a gbashima shin iyuhwe sha kwagh u iti i Ter na man mcivir u mimi. Yesu yange nengen er i lu lahan iti i Aôndo shi vihin i yô, gbashima mgbegha un shin a gba iyuhwe i vough, nahan a er kwagh sha u sôron mlu la. Er Yesu nenge mbahemenev mba kwaghaôndo lu kighir mbaatsanev a ican yô, gbashima na mgbegha un u nan ve myôhôryol shi vendan ieren i mbahemenev mba kwaghaôndo mbara taveraa ken igbar je.—Mat. 9:36; 23:2, 4, 27, 28, 33.
Lu a Gbashima sha Kwagh u Mcivir u Mimi
12, 13. Mbahemenev mba Mbakristu mba aiegh er nena nyian sha kwagh u (a) iti i Aôndo? (b) Tartor u Aôndo?
12 Aeren man anza a ior mba ve senge ér ve mba civir Aôndo nyian la kpa nga kwaghmôm a aeren a ior mba sha ayange a Yesu la, man alaghga ga je yô, aa hemba vihin cii. U tesen ikyav yô, umbur wer kwagh u hiihii u Yesu kaa a mbadondon un ér ve sôn yô, lu sha kwagh u iti u Aôndo, a kaa ér: “I̱ tsegha iti You.” (Mat. 6:9) Mbahemenev mba kwaghaôndo, hemban je yô, mbahemenev mba Mbakristu mbaaiev mba tesen ior iti i Aôndo shi mba tesen ve u tseghan i shin nan i icivir kpa? U ma ve er nahan la yô, mba gem mba er ior kwagh u Aôndo sha mimi ga. Mba tesen ior atesen a aiegh er ityesen i Ter Man Wan Man Icighan Jijingi Ka Aôndo Môm, man i uma kpen ga, man i igyamusu la nahan; kwagh ne na yô, hingir inja er taver u fan Aôndo shi a wa tswam shi ne ior ican je kpaa nahan. Ve va a ilyahan sha iti i Aôndo sha aeren ve a hôngorough man ikpamberashe ve la. (Ôr Mbaromanu 2:21-24.) Heela tseegh ga, shi ve nôngo sha afatyô ve cii ér vea yer iti i Aôndo, je yô, ve dugh i ken mbamgem mba Bibilo vev sha kpaa. Sha nahan yô, mba yangen ior u kporom ikyua a Aôndo shi yan ikyar a na kôôsôô.—Yak. 4:7, 8.
13 Yesu shi yange tese mbadondon un ér ve sôn tartor u Aôndo, ér: “Tartor Wou u̱ va, i̱ er ishima You shin tar kpaa vough er i eren i Sha nahan.” (Mat. 6:10) Shin er mbahemenev mba Mbakristu mba aiev ve kimbir asember a ken msen la nahan kpa, mba taver ior asema ér ve dondo iniongo i patii man mbamzough mba uumace mbagenev kpaa. Heela tseegh ga, mba ve nôngon u pasen kwagh shi eren shiada sha kwagh u Tartor la cii ka ve nahan ve tar. Kwagh ne na yô, mbakpishiv mba ve senge ér ve mba Mbakristu la kpa mba er kwagh u Tartor u Aôndo ga, shi ve na jighjigh a u cuku kpaa ga.
14. Mbahemenev mba aduaav kôr atindi a Aôndo goom a mi nena?
14 Yesu yange kaa wang ken msen u er hen Aôndo yô ér: “Ka kwaghôron Wou je a lu mimi ye.” (Yoh. 17:17) Shi cii man Yesu kôndo yem sha yô, a ôr kwagh u tesen ér una ver “wanakiriki u jighjigh man u fan kwagh” sha er una naan ior nav kwaghyan sha ashighe ashighe yô. (Mat. 24:45) Shin er mbahemenev mba Mbakristu mba aiegh ve senge ér ve mba tesen ior Mkaanem ma Aôndo nahan kpa, mba eren tom u Ter a ne ve la sha mimi je he? Ei. Ka i lu inja er mba kaan ér kwagh u Bibilo i tese la ka di kwaghhir tsô nahan. U ma ve koso iyôngo ve sha kwaghyan u ken jijingi shi ma ve na ve msurshima man mkav la yô, mbahemenev mba aduaav ka ve ngiligh ato a mbadondon ve sha kwaghfan u taregh. Shi kwagh ugen yô, mbahemenev mba aduaav kôr atindi a Aôndo goom a mi, mba tesen a sha gbenda u a doo mbadondon ve, mba ve senge ér mba a aeren a dedoo la a ve yô.—2 Tim. 4:3, 4.
15. Ka wea nenge akaa a mbahemenev mba aduaav ve er ken iti i Aôndo la cii nahan, i lu u ken ishima nena?
15 Er i er ambaakaa ne cii ken iti i Aôndo u Bibilo i lu mkaanem nam la yô, due mbaasemaamimi kpishi ishima, mbagenev je yô, kera na Aôndo shin Bibilo jighjigh tsô kpaa ga. Ve gba ken to u Satan man tar na u ifer ne. Ka wea nengen shi wea ungwan akaa ne a lu eren ayange ayange nahan, i lu u ken ishima nena? Er u lu or u civir Yehova yô, ka wea nenge a lahan iti i Aôndo shi a vihin i nahan, ishima ka i tsue u ker u eren kwagh u sôron mvihi la ga he? Ka wea nenge a tsughun ior mba mimi shi a tumbur a ve nahan, i sar u u̱ nan mba i nzughul a ve la msurshima ga he? Yesu yange nenge a ior mba sha ayange a na mba “i tumbul a ve, ve sambe wuee er iyôngo i i lu a orkuran i ga nahan” la nahan, mhôônom kôr un a kôr a ve tseegh ga. “A hii u tesen ve akaa kpishi.” (Mat. 9:36; Mar. 6:34) Se mba a atôakyaa a injaa a lun a gbashima sha kwagh u mcivir u mimi, er Yesu nahan.
16, 17. (a) Kanyi i doo u ia mgbegha se u pasen kwagh kpoghuloo? (b) Kanyi se time sha mi ken ngeren u dondon nee?
16 Ka sea lu a gbashima sha tom wase u pasen kwagh yô, mkaanem ma apostoli Paulu ma i nger ken 1 Timoteu 2:3, 4 la ma hemba lun se a inja cii. (Ôr.) Se mba pasen kwagh kpoghuloo ka sha ci u se fa ser se mba ken ayange a masejime tseegh ga, kpa shi se fa ser Aôndo soo ér se er nahan.. A soo ér ior cii ve fa mimi sha er vea hen u civir un nahan vea zua a iveren yô. Ishima mgbegha se ker u eren tom u pasen kwagh kpoghuloo sha ci u shighe ngu been yum ga, kpa ka sha ci u se soo u nan iti i Aôndo icivir shi wasen ior sha u ve fa awashima na yô. Se mba a gbashima sha kwagh u mcivir u mimi.—1 Tim. 4:16.
17 Er se lu ior mba Yehova yô, se fa mimi sha kwagh u awashima u Aôndo sha ci u uumace man tar ne. Se fa er se wase ior vea zua a msaanyol shi vea lu a ishimaverenkeghen i bunden ga sha kwagh u mlu ve u ken hemen yô. Se fatyô u tesen ve kwagh u vea er ve vea war zum u mtim una va sha tar u Satan ne yô. (2 Tes. 1:7-9) Doo u ishima ia vihi se shin iyol ia kpe se sha ci u se nenge ser iyange i Yehova ngi timbir yum ga, kpa i̱ saan se iyol er shighe a lu her u se tese gbashima sha kwagh u mcivir u mimi yô. (Mika 7:7; Hab. 2:3) Se er nan ve se lu a imba gbashima laa? Se time sha kwagh ne ken ngeren u a dondo ne.
U Fatyô u Pasen Kpa?
• Kanyi yange i mgbegha Yesu ve pase kwagh a uwergban shio zan zan kar kurene?
• Inja i “gbashima” u i nger ken Bibilo la ér nyi?
• Kanyi se nengen a mi nyian i ia mgbegha se u lun a gbashima sha kwagh u mcivir u mimi?
[Mbampin mba ngeren u henen]
[Foto u sha peeji 8]
Yange hemba gban Yesu u eren ishima i Ter na
shi tesen uumace mbagenev dooshima
[Foto u sha peeji 10]
Se mba a atôakyaa a injaa a lun a gbashima sha kwagh u mcivir u mimi