Tumu Goynuwau Mishettiyaagaa Gida

“Kattai daro; shin cakkiya asai guutta.”—MAA. 9:37.

1. Eesotiyoogaa waatada qonccissuutii?

ISSI maccaasiyo yeloy oyqqin haakime soo efaydda deˈiyaakko waanuutii? Ellellada hemettaasa. Keehi koshshiyaabau keerido sohuwaa baydda deˈaasa; shin pooˈissadasa. Yaatin waatuutii? Kaamiyaa laaggiyaagaa, “Hayyanaa ellella; EESOYIYAABA!” yaagaasa. Ee, polettana koshshiya allaallee neeyyo deˈiyo wodenne wodee wuri wuri biyo wode, keehippe unˈˈettaasa. Unˈˈettiyo wode haroode oottennabaa oottiyo gishshau, neeyyo danddayettida keenan eesotaasanne minnada oottaasa. Eesotiyoogaa giyoogee hegaa!

2. Ha wodiyan tumu Kiristtaaneti keehi eesuwan oottana bessiya oosoy aybee?

² Ha wodiyan, Kawotettaa mishiraachuwaa sabbakiyoogaanne saˈa ubban deˈiya asaa erissiyo ashkkara oottiyo oosuwaadan tumu Kiristtaaneti keehi eesuwan oottana bessiyaabi baawa. (Maa. 24:14; 28:19, 20) Erissiyo ashkkaraa Marqqoosi, Yesuusi giidobaa yootiiddi, wurssettay yaanaappe kase he oosoy ‘koyro’ oosettana bessiyoogaa xaafiis. (Mar. 13:10) Hegee tumukka bessiyaaba. Yesuusi, “Kattai daro; shin cakkiya asai guutta” yaagiis. Cahaa wodee wurennan kattaa shiishshana koshsheesippe attin, cakkiyo wodee aadhanaashin naagana koshshenna.—Maa. 9:37.

3. Keehippe eesoyiya sabbakiyo oosuwan shaahettanau daroti ay oottidonaa?

³ Sabbakiyo oosoy nuussi keehippe koshshiyaaba gidiyo gishshau, nuuyyo danddayettida keenan nu wodiyaanne wolqqaa an peeshshiyoogeenne nu xeelaa an wottiyoogee bessiyaaba. Daroti hegaadan oottiyoogee ufayssees. Issoti issoti aqinye woy misoonaawe woy alame yuushuwan deˈiya Beeteelen oottiyaageeta gididi kumetta wodiyaa haggaazanau bantta deˈuwaa hanotaa sima oottidosona. Etau oosoy keehi daro. Eti hegaa gishshau darobaa aggidaba gidana danddayoosona; qassi eti xoonana bessiya daro paacee deˈees. Gidikkokka, Yihooway eta keehippe anjjiis. Eta hanotan keehi ufayttoos. (Luqaasa 18:28-30 nabbaba.) Harati kumetta wodiyaa haggaazanau danddayennaba gidikkonne, shemppo ashshiya ha oosuwan banttau danddayettida keenan daro wodiyaa aattoosona; hegee nu naati deˈuwaa demmanaadan maaddiyoogaakka gujjees.—Zaa. 6:6, 7.

4. Issoti issoti eesotiyoogee keehi koshshiyoogaa akeekanau metootana danddayiyoy aybissee?

⁴ Nuuni beˈidoogaadan, eesotiyoogee darotoo keerettida wodiyaara woy issibay kuuyettiyo wodiyaara gayttidaba. Nuuni deˈiyoy wurssetta wodiyaana; qassi hegee tuma gidiyoogaa bessiya daro naqaashaa Geeshsha Maxaafaynne taarikee yootees. (Maa. 24:3, 33; 2 Xim. 3:1-5) SHin, wurssettay ay saatiyan yaanaakko eriya asi baawa. Yesuusi “wodiyaa wurssettaayyo” ‘malaata’ gidiyaabata yootido wode, “He gallassaanne he saatiyaa Aawaa xalaalaappe attin, harai atto saluwan de7⁠iya kiitanchchata gidin, woi tana Na7aa gidinkka ooninne eriyaabi baawa” yaagiis. (Maa. 24:36) Hegaadaana gidiyo gishshau, issoti issoti ubba qassi eesotiyoogee keehi koshshiyoogaa adussa wodiyau akeekidi deˈidaba gidikko, wodiyaappe wodiyan hegaadan deˈanau metootana danddayoosona. (Lee. 13:12) Neeyyookka issi issitoo hegaadan siyettii? Xoossaa Yihoowaynne Yesuus Kiristtoosi nuuni ha wodiyan oottanaadan koyiyoobaa xeelliyaagan eesotiyoogee keehi koshshiyoogaa akeekidi deˈanau woy hegaa dichanau nuna aybi maaddana danddayii?

Nuussi Leemiso Gidiya Yesuusa Hassaya

5. Yesuusi haggaazuwaara gayttidaagan keehippe eesotiyoogaa bessidoy ayba ogiyaanee?

⁵ Xoossaayyo oottiyoogan eesotiyoogaa  bessida ubbaappe, Yesuus Kiristtoosi keehi aadhiya leemiso. I eesotido gaasotuppe issoy, heezzu layttanne bagga xalla gidiya wodiyan oottiyo darobay deˈiyoogaa. Gidikkokka, Yesuusi tumu goynuwaara gayttidaagan hara oogaappenne aadhiyaabaa oottiis. I ba Aawaa sunttaynne halchoy erettanaadan oottiis, Kawotettaa mishiraachuwaa sabbakiis, haymaanootiyaa kaalettiyaageetu worddo timirttiyaanne eti iita gidiiddi loˈˈo malatiyoogaa qoncciyaa kessiis, qassi hayqqana gakkanaassi Yihooway ubbaa haariyo maatau exatiis. Asaa tamaarissiyoogan, maaddiyoogaaninne harggiyaappe pattiyoogan xibennan ubbasaa yuuyiis. (Maa. 9:35) Hegaa keena guutta wodiyan hegaa mala darobaa oottida uri baawa. Yesuusi bau danddayettida ubbabaa oottiis.—Yoh. 18:37.

6. Yesuusi ba deˈuwan xeelaa wottidoy aybiinee?

⁶ Yesuusi haggaazo wode ubban xalalennan oottanaadan denttettiday aybee? Yesuusi Yihooway keerido wodiyan ba oosuwaa polanau ayyo ay keena wodee attidaakko Daaneela hiraagaappe akeekiis. (Dane. 9:27) Hegaa gishshau, qommoora beˈidoogaadan, i saˈan oottiyoobay “laappun laittatu gina shaahuwan” woy heezzu layttanne baggaappe guyyiyan wurees. Yesuusi 33 M.Ln, badheesaa heeran, bonchuwan Yerusalaame geli simmidi takkennan, “Asa Na7ai, bonchchettiyo saatee gakkiis” yaagiis. (Yoh. 12:23) Yesuusi hayqqiyo wodee matidoogaa eriyaaba gidikkonne, i minnidi oottanaadan denttettida waanna gaasoy hegaa gidenna. Hegaappe dumma hanotan, i demmido injje ubbaa ba Aawaa sheniyaa polanaunne asaa naatuyyo siiquwaa bessanau goˈettiis. He siiqoy erissiyo ashkkarata dooridinne loohissidi, sabbakana mala eta kiittanaadan a denttettiis. I doommido oosuwaa eti oottanaadaaninne ubba aagaappekka aaruwan polana mala hegaadan oottiis.—Yohaannisa 14:12 nabbaba .

7, 8. Yesuusi beetamaqidasiyaa geeshshiyo wode erissiyo ashkkaratuyyo aybi siyettidee, Yesuusi hegaadan oottidoy aybissee?

⁷ Yesuusi ay keena mishettiyaakko a deˈuwan gakkida issibay loyttidi qonccissees. Hegee hanidoy 30 M.Ln, Paasikaa Baalaa wodiyan, i haggaazuwaa doommido heeraana. Yesuusinne i erissiyo ashkkarati Yerusalaame biidi, beetamaqidasiyan “miizzaa, dorssaanne haraphphiyaa baizziya asaa” demmidosona; “qassi harati bantta oidiyan uttidi, miishshaa laammiyaageeta” demmidosona. Yesuusi ay oottidee, qassi hegee erissiyo ashkkaratuyyo aybi siyettanaadan oottidee?—Yohaannisa 2:13-17 nabbaba.

⁸ Yesuusi he wode giidobaynne oottidobay Daawiti, “Taani ne keettau mishettiyo mishoi tana tamadan xuuggees” yaagidi yexxido hiraagaa erissiyo ashkkarati hassayanaadan oottiis. (Maz. 69:9) Aybissi? Hegee Yesuusi oottidobay metoynne qohoy a bolli gakkanaadan oottiyaaba gidiyo gishshataassa. Beetamaqidasiyan maatay deˈiyoogeeti, giishin qeeseti, higgiyaa tamaarissiyaageetinne harati woriyaa demmiyo he bessenna zalˈˈiyaa zalˈˈissoosona. Yesuusi eta halchuwaa qoncciyaa kessiyoogaaninne guutta wodiyau teqqiyoogan, he wode haymaanootiyaa kaalettiyaageetuura eqettiis. Erissiyo ashkkarati  he hanotaa akeekidoogaadan, i ‘Xoossaa keettau’ woy tumu goynuwau mishettiyo mishoy qoncciis. SHin, mishettiyoogaa giyoogee woygiyoogee? Hegee eesotiyoogaappe dummatii?

Eesotiyoogaanne Mishettiyoogaa Geeddarssuwaa

9. Mishettiyoogee ayba ogiyan qonccana danddayii?

⁹ “Mishettiyoogaa” giya qaalaa issi dikshineeree “issibaa oottanau keehippe yeemottiyoogaa” yaagidi birshshiis; qassi keehippe koyiyoogaa, keehippe amottiyoogaanne keehippe siiqiyoogaa giya qaalatuura issi mala birshshettay ayyo deˈiyoogaa yootees. Yesuusa haggaazoy ha qaalatun qonccida hanotaara issi mala gidiyoogee tuma. Wolayttatto Geeshsha Maxaafay, “Taani ne keettau mishettiyo mishoi tana tamadan xuuggees” yaagidi birshshidoy hegaassa. Issi issi Arshsho bagga biittaa qaalati, “mishettiyoogaa” giya qaalaa wozanay xuugettiyaabadan, “michiya wozanaa” yaagiya sitta birshshettay deˈiyo naaˈˈu qaalatun qonccissoosona. Yesuusi beetamaqidasiyan oottidobaa beˈidi, erissiyo ashkkarati Daawita qaalaa hassayidoogee garamissiyaaba gidenna. SHin, Yesuusa wozanay xuugettiis giyoogaa mala hanotan, hegaadan oottanaadan a denttettiday aybee?

10. Geeshsha Maxaafan qonccidaagaadan “mishettiyoogaa” birshshettay aybee?

¹⁰ Daawita mazamuriyan “mishettiyoogaa” geetettida qaalay Geeshsha Maxaafan hara sohotun “qanaatiyaagaa” woykko “qanaatiyoogaa” geetettidi darotoo birshshettida Ibraysxxe qaalaappe yiis. Ooratta Alamiyaa Birshshettay he qaalaa issi issitoo Xoossay ‘ba xallau goynnanaadan koyiyoogaa’ qonccissanau goˈettees. (Kessaabaa 20:5; 34:14; Yaasa 24:19 nabbaba.) Issi Geeshsha Maxaafaa dikshineeree he qaalaa xeelliyaagan hagaadan giis: “He qaalay darotoo aqo deˈuwaara gayttidaagan goˈettiyooba . . . Azinay woy machiyaa qanaatiyoogee bantta xallau bessiyaabaa keehippe koyiyoogaa gidiyoogaadan, baageeti ba xallau aqanaadan oychiyo maatay Xoossau dees; qassi i he maatay naagettanaadan oottees.” Yaatiyo gishshau, mishettiyoogee Geeshsha Maxaafan qonccidaagaadan daroti bantta dosiyo ispporttiyan bessiyoogaadan issibaa oottanau keehippe koyiyoogaappe aadhiyaaba. Daawiti mishettidoy bessiya ogiyan qanaatiyoogaana; giishin loˈˈo sunttay moorettennaadan naaganau woy moorettidaagaa giigissanau keehippe koyidoogaa, morkkiyaa woy cayiya uraa coˈˈu giidi xeellibeennaagaa malaatees.

11. Yesuusi mishettiyoogan minnidi oottanaadan denttettiday aybee?

¹¹ Erissiyo ashkkarati Yesuusi beetamaqidasiyan oottishin beˈidobaa Daawita qaalaara gatti xeellidoogee bala gidenna. Yesuusi minnidi oottidoy keerettida wodee deˈiyo gishsha xallaassa gidennan, ba Aawaa sunttaunne tumu goynuwau mishettiyo, woykko qanaatiyo gishshataassa. Xoossaa sunttaa mooridonne cayido hanotaa ubbaa beˈido wode, Yesuusi mishettidoogee woykko qanaatidoogee, qassi hanotaa giigissanau tangguwaa ekkidoogee bessiyaaba. Haymaanootiyaa kaalettiyaageeti ashkke asaa huqqunniyoogaanne naaqqiyoogaa Yesuusi beˈido wode, asaa shemppissanaadaaninne haymaanootiyaa kaalettiya huqqunniyaageetu bolli pirdday gakkanaagee attennaagaa mintti yootanaadan mishettiyoogee a denttettiis.—Maa. 9:36; 23:2, 4, 27, 28, 33.

Tumu Goynuwau Mishettiyaagaa Gida

12, 13. Ha wodiyan Kiristtaane giyo haymaanootiyaa kaalettiyaageeti (a) Xoossaa sunttaa, (b) Xoossaa Kawotettaa xeelliyaagan ay oottidonaa?

¹² Ha wodiyan Xoossaayyo goynnays giya asaa qofaynne oosoy Yesuusa wodeegaara issi mala; ubba yaa iita. Leemisuwau, Yesuusi bana kaalliyaageeti woossanaadan tamaarissido koyrobay Xoossaa sunttaara gayttida, “Ne geeshsha sunttai anjjetto” yaagiyaagaa gidiyoogaa hassaya. (Maa. 6:9) Haymaanootiyaa kaalettiyaageeti, ubba qassi Kiristtaane giyo haymaanootiyaa qeeseti asay Xoossaa a sunttan eranaadaaninne he sunttaa geeshshanne boncho gididabadan xeellanaadan tamaarissishin siyi eriyoo? Hegaappe dumma ogiyan, Sillaasiyaa, shemppoy hayqqenna giyoonne, siˈooliyaa tamaa milatiya worddo timirttetun  bala ogiyan Xoossaa qonccissoosona; yaatiyoogan abay erettennabadan, Xoossaa iitadan, ubba meqetti baynnabadan qonccissoosona. Eti borssobaa oottiyoogaaninne loˈˈo milatiya iita gidiyoogankka Xoossay cayettanaadan oottidosona. (Roome 2:21-24 nabbaba.) Hegaa bollikka, eti Xoossaa buzo sunttay erettennaadan oottanau banttau danddayettida ubbabaa oottidosona; ubba bantta Geeshsha Maxaafaa birshshettatuppe he sunttaa kessidosona. Yaatiyoogan, eti asay Xoossaakko shiiqennaadaaninne aara dabbotaa medhennaadan xube gididosona.—Yaaq. 4:7, 8.

¹³ Yesuusi bana kaalliyaageeti Xoossaa Kawotettaa xeelliyaagan, “Ne kawotettai yo; ne shenee saluwan hanidoogaadan, sa7ankka hano” yaagidi woossanaadankka tamaarissiis. (Maa. 6:10) Kiristtaane giyo haymaanootiyaa kaalettiyaageeti he woosaa zaaretti zaaretti woossiyaaba gidikkokka, asi essido polotikaa dirijjitiyaanne hara dirijjitiyaa kaafanaadan asaa minttettoosona. Hegaa bolli, he Kawotettaabaa sabbakanaunne markkattanau baaxetiyaageeta karoosona. Hegaappe denddidaagan, banttana Kiristtaane giya daroti Xoossaa Kawotettaa ammaniyoogee atto shin, abaa denttanaukka koyokkona.

14. Kiristtaane giyo haymaanootiyaa qeeseti Xoossaa Qaalaa ayba ogiyan shugissidonaa?

¹⁴ Yesuusi Xoossaakko woossiiddi qoncciyan, “Ne qaalaikka tumatettaa” yaagiis. (Yoh. 17:17) Yesuusi saluwaa baanaappe kase, ba asau ayyaana qumaa giigissanaadan ‘ammanettida wozannaama ashkkaraa’ sunttanaagaa yootiis. (Maa. 24:45) Kiristtaane giyo haymaanootiyaa qeeseti asaa Xoossaa Qaalaa tamaarissoos giyaaba gidikkokka, Goday etau immido oosuwaa ammanettidi polidonaa? CHii. Eti Geeshsha Maxaafay yootiyoobay hayse gaanau koyoosona. Qeeseti wudiyaa minttettiyaanne eraa gujjiya ayyaana qumaa miziyoogaappe, etau siyanau ufayssiyaaba gidida, asa eraa tamaarissoosona. Hegaa bollikka, eti asaa ufayssiyaabaa tamaarissanau koyidi, Xoossay kessido kandduwaa maaraa shugissidosona.—2 Xim. 4:3, 4.

15. Qeeseti Xoossaa sunttan oottido ubbabaa xeelliyaagan neeyyo aybi siyettii?

¹⁵ He ubba hanotay Geeshsha Maxaafan qonccida Xoossaa sunttan oosettiyaaba milatiyo gishshau, daro ashkke asay hidootaa qanxxiis woykko Xoossaaninne Geeshsha Maxaafan ammaniyoogaa muleera aggiis. Eti Seexaanaaninne a iita siraatan cimettidosona. Galla galla hegaa malabay haniyoogaa beˈiyoonne siyiyo wode neeyyo aybi siyettii? Yihoowayyo oottiyaagaa gidiyoogaadan, asay Xoossaa sunttaa mooridonne cayido hanotaa ubbaa beˈiyo wode, he hanotaa suurissanaadan nena hegee denttettennee? Ashkkenne suure asaa cimmiyoogaanne naaqqiyoogaa beˈiyo wode, sugettidaageeta minttettanau wozanappe koyikkii? Yesuusi ‘heemmiya asi baynna  dorssadan hirggiyaanne maaddiyaabi baynna’ asaa beˈido wode, qarettidi aggiigibeenna. I eta “darobaa tamaarissuwaa doommiis.” (Maa. 9:36; Mar. 6:34) Yesuusaagaadan, nuuni tumu goynuwau mishettana koshshees.

16, 17. (a) Minnidi haggaazanaadan nuna denttettana koshshiyay aybee? (b) Kaalliya huuphe yohuwan ay beˈanee?

¹⁶ Nuuni nu haggaazuwaa hegaadan xeelliyo wode, kiitettida PHauloosi 1 Ximootiyoosa 2:3, 4n giidoban ciimma qofay deˈiyoogaa akeekoos. (Nabbaba.) Nuuni minnidi haggaaziyoy wurssetta gallassan deˈiyoogaa eriyo gishsha xallaassa gidennan, hegee Xoossaa shene gidiyoogaakka akeekiyo gishshassa. Asay ayyo waati goynnanaakkonne oottanaakko eridi anjjettanaadan, tumaa erana mala I koyees. Nuuni haggaazuwan minnidi oottanau koyiyo waanna gaasoy, wodee wuriiddi deˈiyo gishshataassa gidennan, Xoossaa sunttay bonchettanaadaaninne asay a sheniyaa eranaadan maaddanau koyiyo gishshataassa. Nuuni tumu goynuwau mishettoos.—1 Xim. 4:16.

¹⁷ Nuuni Yihoowa Markka gidiyoogaadan, Xoossay asaa naatuyyoonne saˈau halchidobaa tumaa eridoogan anjjettida. Asay ufayttanaadaaninne etau ammanttiya hidootay deˈanaadan maaddana danddayoos. Seexaanaa siraatay xayiyo wode, waani attana danddayiyaakko eta akeekissana danddayoos. (2 Tas. 1:7-9) Yihoowa gallassay gamˈˈiyaaba malatido gishshau hidootaa qanxxiyoogaappe, tumu goynuwau mishettanau haˈˈikka wodee deˈiyo gishshau nuuni ufayttana koshshees. (Mik. 7:7; Imb. 2:3) Hegaadan nuuni waanidi mishettana danddayiyoo? Hagaa kaalliya huuphe yohuwan beˈana.

Qonccissana Danddayay?

• Yesuusi haggaazido wode ubban xalalennan oottanaadan denttettiday aybee?

• Geeshsha Maxaafan qonccidaagaadan “mishettiyoogaa” birshshettay aybee?

• Nuuni tumu goynuwau mishettanaadan denttettana koshshiyay ayba gidiyoogaa akeekiyoo?

[Oyshata]

[Sinttaa 10n deʼiya misiliyaa]

Yesuusi ba Aawaa sheniyaa poliyoogaaninne asaa naatuyyo siiquwaa bessiyoogan xeelaa wottiis

[Sinttaa 12n deʼiya misiliyaa]

Nuuni tumu goynuwau mishettana koshshees