Unaj k-eʼesik celo yoʼolal u jaajil adoracionoʼ
Unaj k-eʼesik celo yoʼolal u jaajil adoracionoʼ
«Le joochoʼ jach yaʼab, baʼaleʼ le j-meyajoʼoboʼ jach junpʼíitoʼob.» (MAT. 9:37)
1. ¿Baʼaxoʼob ku beetik máak ken jáan kʼaʼabéetchajak?
KEN úuchuk junpʼéel nojoch loob tiʼ máakeʼ, ¿máasaʼ tu séebaʼanil ku jáan ilaʼal u bisaʼal hospital? Yéetel wa kʼaʼabéet k-jáan kʼuchul wa tuʼuxeʼ, ¿máasaʼ k-ilik k-xíimbal maas séeb utiaʼal k-kʼuchul? Wa kʼaʼabéet xan k-tsʼoʼoksik junpʼéel meyaj k-ilik chéen junpʼíit tiempo pʼaataltoʼoneʼ, ku joʼopʼol k-chiʼichnaktal yéetel k-uʼuyik bey saajkoʼoneʼ. Ku joʼopʼol u maas áalkab le adrenalina t-wíinkliloʼ yéetel k-maas séebkuntik k-meyaj. Lelaʼ letiʼe baʼaxoʼob k-beetik ken kʼaʼabéetchajak k-jáan beetik wa baʼaxoʼ.
2. ¿Baʼax meyajil unaj u séeb beetaʼal tumen le máaxoʼob meyajtik Diosoʼ?
2 Le máaxoʼob meyajtik Dios teʼ kʼiinoʼobaʼ, ku yilkoʼob jach kʼaʼabéet u séeb kʼaʼaytikoʼob le maʼalob péektsiloʼ yéetel u kaʼanskoʼob uláakʼ máakoʼob (Mat. 24:14; 28:19, 20). Tu Evangelioil Marcoseʼ, Jesuseʼ tu yaʼaleʼ le meyajaʼ kʼaʼabéet u beetaʼal «táanil» tiʼ le xuʼulsajiloʼ (Mar. 13:10). Lelaʼ letiʼe baʼax maas unaj u beetaʼaloʼ. Tsʼoʼoleʼ Jesuseʼ tu yaʼalaj xaneʼ, «le joochoʼ jach yaʼab, baʼaleʼ le j-meyajoʼoboʼ jach junpʼíitoʼob», lelaʼ ku yeʼeskeʼ jach kʼaʼabéet u beetaʼal tu séebaʼanil le meyajoʼ, tumen unaj u tsʼoʼoksaʼal le jooch táanil tiʼ u tsʼoʼokol u kʼiiniloʼ (Mat. 9:37).
3. ¿Bix u yeʼesik yaʼab sukuʼunoʼob ku naʼatkoʼob u kʼaʼabéetil u kʼaʼaytaʼal le maʼalob péektsiloʼ?
3 Tumen jach kʼaʼabéet u kʼaʼaytaʼal le maʼalob péektsiloʼ, unaj k-tsʼáaik tuláakal k-tiempo yéetel k-muukʼ utiaʼal k-beetik. Lelaʼ bey u beetaʼal tumen yaʼab sukuʼunoʼoboʼ. Yanoʼobeʼ ku yilik u kuxtaloʼob chéen yéetel junpʼíit baʼal utiaʼal u páajtal u beetik u precursoriloʼob, u misioneroiloʼob wa u binoʼob meyaj Betel. Jach ku tsʼáaik u yóol u beetoʼob le meyajoʼ. U jaajileʼ maʼ chéen chʼaʼabil u beetkoʼobiʼ, tumen yaʼab talmiloʼob ku aktáantkoʼob, baʼaleʼ jach ku beetaʼal u bin utsil tiʼob tumen Jéeoba. Le oʼolal jach kiʼimak k-óol yoʼolal le meyaj ku beetkoʼoboʼ (xokaʼak Lucas 18:28-30). Yaan sukuʼunoʼob xaneʼ maʼ tu béeytal u beetik u precursoriloʼob, baʼaleʼ ku yilik u jóoʼskoʼob u tiempoil utiaʼal u kaʼanskoʼob u maasil yéetel tiʼ u paalaloʼob baʼax unaj u beetikoʼob utiaʼal u salvarkubaʼob (Deu. 6:6, 7).
4. ¿Baʼaxten ku chan talamtal tiʼ jujuntúul sukuʼunoʼob u seguer u tsʼáaik u yóoloʼob teʼ kʼaʼaytajoʼ?
4 Jeʼex k-ojlileʼ, le máakoʼoboʼ ku séebkuntikoʼob u beetkoʼob wa baʼax ken u yiloʼob tsʼoʼok u kʼuchul u kʼiinil kʼaʼabéet u kʼubkoʼob wa u tsʼoʼokskoʼob wa baʼax. Le baʼaxoʼob ku yúuchloʼob bejlaʼaʼ ku yeʼesik kuxaʼanoʼon tu tsʼook kʼiinoʼob, jeʼex u yaʼalik le Bibliaoʼ (Mat. 24:3, 33; 2 Tim. 3:1-5). Baʼaleʼ mix máak u yojel jach baʼax kʼiin, jeʼex tu yaʼalil Jesús ka tʼaanaj tiʼ le baʼaloʼob kun eʼesik tsʼoʼok u náatsʼal u xuul «yóokʼol kaab[oʼ]». Letiʼeʼ tu yaʼaleʼ le «baʼax kʼiin wa baʼax hora ken úuchuk[oʼ], mix máak u yojel, mix u angeliloʼob kaʼan, mix u Paal Máak. Chéen Jajal Dios le Taata u yojeloʼ» (Mat. 24:36). Le oʼolal yaan máaxoʼob meyajtik Dios, maases le úuch káajkoʼoboʼ, yaan kʼiineʼ ku xuʼulul u jach tsʼáaik u yóoloʼob teʼ kʼaʼaytajoʼ (Pro. 13:12). ¿Bey wa u yúuchultechoʼ? ¿Baʼax jeʼel u yáantkoʼon k-il unaj k-séeb beetik le meyaj u yaʼalmaj Jéeoba yéetel Jesucristo ka k-beetoʼ?
Unaj k-beetik jeʼex tu beetil Jesuseʼ
5. ¿Bix úuchik u tsʼáaik u yóol Jesús u meyajt Dios?
5 Tiʼ tuláakal le máaxoʼob tsʼoʼok u meyajtkoʼob Diosoʼ, Jesucristoeʼ letiʼe máax maas tu yeʼesaj bix unaj u tsʼáaik u yóol máak u beet baʼax ku yaʼalik Diosoʼ. Junpʼéel baʼax oʼolal tu beetaj beyoʼ, tumen yaʼab baʼaxoʼob kʼaʼabéet u beetik ichil óoxpʼéel jaʼaboʼob kaʼa tak táanchumuk. Baʼaleʼ ichil le bukaʼaj tiempooʼ, maas yaʼab meyaj tu beetaj ichil u kaajal Dios tiʼ u maasil máakoʼob. Tu tsʼáaj kʼaj óoltbil u kʼaabaʼ u Taata, baʼax u tukulmaj u beetik, tu kʼaʼaytaj u maʼalob péektsilil le Reinooʼ, tu yeʼesaj maʼ maʼalob le baʼaxoʼob ku beetik yéetel ku kaʼansik u nuuktakil le judíoʼoboʼ yéetel tu tsʼáajuba tu tséel u gobernación Jéeoba tak ka kíimi. Tsʼoʼoleʼ tu xíimbaltaj tuláakal u luʼumil Israel utiaʼal u kaʼansik, u yáantik yéetel u tsʼakik le máakoʼoboʼ (Mat. 9:35). U jaajileʼ mix máak u beet le bukaʼaj meyaj ichil junpʼíit kʼiinoʼ. Tu beetaj tuláakal le ku páajtal u beetik le tiaʼan way Luʼum bey wíinikeʼ (Juan 18:37).
6. ¿Baʼax maas kʼaʼanaʼan ilaʼabik tumen Jesús?
6 Jesuseʼ tu tsʼáaj u yóol u meyajt Dios, tumen u yojel maʼ yaʼab tiempo yantiʼ utiaʼal u beetkiʼ. Yoʼolal le baʼax tu yaʼalaj profeta Danieloʼ, béeychaj u yojéeltik le meyaj ken u beet le Mesíasoʼ yaan u tsʼoʼokol «tu chúumuk le semana» aʼalaʼanoʼ, lelaʼ u kʼáat u yaʼaleʼ óoxpʼéel jaʼab ka tak táankoch (Dan. 9:27). Maʼ úuch okok tu kaajil Jerusalén bey juntúul rey tu kʼiiniloʼob jaʼajaʼal tiʼ u jaʼabil 33 tiʼ le yáax siglooʼ, Jesuseʼ tu yaʼalaj: «Tsʼoʼok u kʼuchul u yorail kun nojbeʼenkúuntaʼal u Paal Máak» (Juan 12:23). Lelaʼ ku yeʼeskeʼ, letiʼeʼ u yojel maʼ yaʼab u bin u kíimsaʼaliʼ. Baʼaleʼ maʼ le oʼolal tu jach tsʼáaj u yóol u beet le meyajoʼ. Baʼaxeʼ tumen u yojel maas kʼaʼanaʼan u beetik baʼax ku yaʼalik u Taata yéetel u yeʼesik u yaabilaj tiʼ wíinik. Le yaabilajoʼ le péeks u muchʼ u jaats tiʼ u disipuloʼob utiaʼal u maas kaʼansiktiʼob u kʼaʼaytoʼob le maʼalob péektsil tiʼ tuláakal u kajnáaliloʼob Israeloʼ. Lelaʼ tu beetaj utiaʼal u seguertkoʼob le meyaj tu káajsoʼ yéetel ka u beetoʼob meyajoʼob maas nuuktak (xokaʼak Juan 14:12).
7, 8. ¿Baʼaxten jóoʼsaʼab le máaxoʼob ku koonoloʼob teʼ templo tumen Jesusoʼ, yéetel baʼax kʼaʼaj tiʼ u disipuloʼob le ka tu yiloʼob?
7 Tu kʼiiniloʼob le Pascua tiʼ u jaʼabil 30 tiʼ le yáax siglo, le maʼ úuch u káajs u kʼaʼaytaj Jesusoʼ, tu yeʼesaj le celo yantiʼ utiaʼal u beetik baʼax ku yaʼalik u Taataoʼ. Ka kʼuch teʼ templo yaan kaʼach Jerusalén yéetel u disipuloʼoboʼ, «tu yilaj yaan máakoʼob táan u konkoʼob wakaxoʼob, tamanoʼob yéetel palomaʼobiʼ, tu yilaj xan le máaxoʼob ku kʼexkoʼob taakʼin kulukbaloʼob tu kʼáancheʼoboʼ». ¿Baʼax tu beetaj yéetel baʼax tu tuklaj u disipuloʼob? (Xokaʼak Juan 2:13-17.)
8 Le baʼax tu yaʼalaj yéetel tu beetaj Jesusoʼ tu kʼaʼajsaj tiʼ u disipuloʼob le baʼax tu yaʼalaj David tiʼ junpʼéel salmooʼ: «Tu tʼab[aj] in wóol u yaakunajil a najil» (Sal. 69:9, Los Salmos en Maya). ¿Baʼaxten kʼaʼajtiʼob le baʼax tu yaʼalaj Davidoʼ? Tumen Jesuseʼ tu beetaj junpʼéel baʼal jach sajbeʼentsil. Le bukaʼaj taakʼin ku yokol yoʼolal le baʼaxoʼob ku koʼonloʼ ku maas ayikʼalkúuntik j-kʼiinoʼob yéetel le escribaʼoboʼ. Úuchik u jóoʼsaʼaloʼob tumen maʼ maʼalob baʼax ku beetkoʼobeʼ, Jesuseʼ tu tsʼáajuba tu contra le máaxoʼob maas yaan páajtalil tiʼob ichil le judíoʼob teʼ kʼiin jeʼeloʼ. Le disipuloʼoboʼ tu naʼatoʼobeʼ Jesuseʼ tu beetaj tuláakal yoʼolal le celo ku yuʼubik yoʼolal u jaajil adoracionoʼ. Koʼoneʼex ilik jach baʼax u kʼáat u yaʼal le tʼaan celooʼ yéetel baʼax yaan yil yéetel u séeb beetik máak wa baʼax.
Le celo yéetel u séeb beetik máak wa baʼaxoʼ
9. ¿Bix jeʼel a tsolik baʼax u kʼáat u yaʼal celoeʼ?
9 Junpʼéel diccionarioeʼ ku yaʼalikeʼ le celooʼ, u kʼáat u yaʼal «u jach tsʼáaik u yóol máak u beet wa baʼax». ¿Máax jeʼel u yaʼalik wa Jesuseʼ maʼ bey tu beetiloʼ? Le oʼolal teʼ Biblia Traducción en lenguaje actual ku suʼutul bey le baʼax tu yaʼalaj Davidoʼ: «Le yaabilaj kin wuʼuyik yoʼolal a templooʼ ku tóokiken bey kʼáakʼeʼ». Ichil jujunpʼéel tiʼ le táanoʼob ku beetaʼal tu lakʼinil le yóokʼol kaabaʼ, ku meyaj le tʼaan «puksiʼikʼal» yéetel «tóochʼ» utiaʼal u yúuchul tʼaan tiʼ le «celooʼ», lelaʼ ku tsʼáaik naʼatbileʼ le puksiʼikʼaloʼ tʼaabal. Le oʼolal le disipuloʼoboʼ kʼaʼajtiʼob le baʼax ku yaʼalik le salmo ka tu yiloʼob le baʼax tu beetaj Jesús teʼ templooʼ. Baʼaleʼ ¿baʼax beet u tʼaʼabal u puksiʼikʼal Jesús utiaʼal ka líikʼik u beet le baʼax tu beetoʼ?
10. ¿Baʼax u kʼáat u yaʼal le tʼaan celo yéetel celoso ku meyaj ichil le Bibliaoʼ?
10 Le tʼaan hebreo ku suʼutul «celo» teʼ salmo tu tsʼíibtaj Davidoʼ, ku taal tiʼ le tʼaan ku suʼutul «celoso» wa «celos». Ichil le Biblia mayaoʼ ku meyaj le tʼaan «yaj óolal» yéetel «u pʼeek u kʼeʼexel» utiaʼal u suʼutul le tʼaanaʼ (xokaʼak Éxodo 20:5; 34:14 yéetel Josué 24:19). Junpʼéel diccionario ku tsolik baʼax u kʼáat u yaʼal u tʼaaniloʼob le Bibliaoʼ ku yaʼalik yoʼolal le tʼaan celosooʼ: «Lelaʼ ku meyaj maases utiaʼal u yúuchul tʼaan tiʼ le máaxoʼob tsʼokaʼan u beeloʼoboʼ [...]. Le ken joʼopʼok u yeʼesik celos juntúul íichamtsil wa atantsileʼ, ku beetik tumen maʼ utstutʼaan u kʼeʼexel yéetel yaanaliʼ. Dios xaneʼ ku kʼáatik wa ku kʼaʼajsik le derecho yantiʼ yóokʼol tuláakal le baʼaxoʼob utiaʼaloʼ». Bey túunoʼ, le tʼaan celo ku meyaj ichil le Bibliaoʼ, maas nojoch tiʼ le baʼax ku yuʼubik máak yoʼolal wa baʼax equipoiloʼ. Le celo tu yaʼalaj Davidoʼ junpʼéel baʼax ku péeksik máak utiaʼal maʼ u chéen ilik baʼax maʼ maʼalob ku beetaʼaliʼ, u jach taaktal u yeʼesik maʼ jaaj baʼax ku yaʼalaʼal tu yoʼolaliʼ wa u yutskíintik junpʼéel baʼax maʼ maʼalobiʼ.
11. ¿Baʼaxten tu jach tsʼáaj u yóol Jesús u beet le meyaj túuxtaʼab u beetoʼ?
11 Le disipuloʼoboʼ jach maʼalob úuchik u kʼaʼajaltiʼob le baʼax u yaʼalmaj David teʼ salmo le ka tu yiloʼob le baʼax tu beetaj Jesús teʼ templooʼ. Baʼaleʼ Jesuseʼ maʼ tu jach tsʼáaj u yóol u beet tuláakal chéen tumen junpʼíit kʼiinoʼob yantiʼ, baʼaxeʼ tumen jach u kʼáat ka adorartaʼak chéen Jéeoba yéetel ka ilaʼak maʼ jaaj le baʼax ku yaʼalaʼal tu contraoʼ. Le oʼolal ken u yil táan u yaʼalaʼal baʼal tiʼ u kʼaabaʼ Dios yéetel táan u mixbaʼalkúuntaʼaleʼ, ku yuʼubik kʼaʼabéet u yutskíintik le baʼax ku beetaʼaloʼ. Yéetel letiʼe celo péeks xan u yaʼal maʼ maʼalob le baʼax ku beetik u nuuktakil le judíoʼoboʼ bey xan utiaʼal ka u yáant le óotsiloʼob yoʼolal le baʼaxoʼob ku beetaʼaltiʼoboʼ (Mat. 9:36; 23:2, 4, 27, 28, 33).
Unaj k-eʼesik celo yoʼolal u jaajil adoracionoʼ
12, 13. ¿Baʼax ku beetik u nuuktakil le religionoʼob chéen ku yaʼalikoʼob táan u tsaypachtikoʼob Cristo yoʼolal 1)u kʼaabaʼ Jéeoba? 2)u Reino Dios?
12 Le baʼaxoʼob ku beetaʼal ichil le religionoʼob bejlaʼaʼ bey jeʼex le ku beetaʼal kaʼach teʼ yáax siglooʼ, wa maas kʼaas. Tuukulnakoʼon tiʼ bix u yilkoʼob u kʼaabaʼ Dios. Le ka tu kaʼansaj Jesús bix unaj u payalchiʼ u disipuloʼobeʼ, letiʼeʼ tu yaʼalaj ka u yáax kʼáatoʼob: «Kiliʼichkúunsaʼak a kʼaabaʼ» (Mat. 6:9). Baʼaleʼ ¿baʼax táan u beetik u nuuktakil le religionoʼob bejlaʼoʼ, maases le chéen ku yaʼalikoʼob táan u tsaypachtikoʼob Cristooʼ? Letiʼobeʼ maʼ tu kaʼanskoʼob u maasil u tʼanoʼob Dios tu kʼaabaʼ yéetel ka u yiloʼob kiliʼich le kʼaabaʼoʼ, baʼaxeʼ ku yaʼalikoʼobeʼ le Máax beet tuláakal baʼaloʼ óoxtúul diosoʼob ichil juntúul dios wa Trinidad, ku kaʼanskoʼob xaneʼ yaan baʼax ku pʼáatal kuxaʼanil tiʼ máak ken kíimik yéetel ku tóokaʼal máak tiʼ junpʼéel infierno. Le oʼolal le máakoʼoboʼ ku tuklikoʼobeʼ maʼ tu páajtal u maas kʼaj óoltikoʼob Dios, jach kʼasaʼan yéetel utstutʼaan u beetik loob tiʼ máak. Tsʼoʼoleʼ le baʼaloʼob kʼaastak ku beetik u nuuktakil le religionoʼoboʼ ku beetkoʼob u yaʼalaʼal baʼal tiʼ u kʼaabaʼ Dios (xokaʼak Romailoʼob 2:21-24). Tsʼoʼoleʼ ku yilkoʼob maʼ u kʼaj óoltaʼal, tumen ku luʼskoʼob ichil u bibliaʼob, lelaʼ ku beetik u talamtal u natsʼkuba le máakoʼob tiʼ Jéeoba yéetel u biskubaʼob tu yéeteloʼ (Sant. 4:7, 8).
13 Jesuseʼ tu yaʼalaj tiʼ u disipuloʼob ka u kʼáatoʼob ich payalchiʼ: «Taalak a [reino]. Beetaʼak baʼax a kʼáat way luʼumeʼ jeʼel bix u beetaʼal teʼ kaʼanoʼ» (Mat. 6:10). Kex u nuuktakil le religionoʼob ku sen aʼalikoʼob yaʼab juntéenel le payalchiʼaʼ, ku yaʼalikoʼob tiʼ u maasil ka u tsʼáaubaʼob tu tséel u gobernación chéen wíinik bey xan u maasil baʼaloʼob ku beetikoʼ. Baʼaleʼ maʼ chéen le ku beetkoʼobiʼ, ku tsʼáaikubaʼob xan tu contra le máaxoʼob kʼaʼaytik le Reinooʼ. Le oʼolal maʼatech u chʼaʼachiʼitkoʼob u Reino Dios le máaxoʼob yanoʼob ichil le religionoʼob chéen ku yaʼalikoʼob táan u tsaypachkoʼob Cristooʼ, tumen maʼatech u creertikoʼob.
14. ¿Bix u mixbaʼalkúuntaʼal le baʼax ku yaʼalik le Biblia tumen u nuuktakil u maasil religionoʼoboʼ?
14 Jesuseʼ tu yaʼalaj tiʼ u Taata ich payalchiʼ: «A tʼaaneʼ letiʼ u jaajil» (Juan 17:17, NM). Yéetel táanil tiʼ u kaʼa bin teʼ kʼaanoʼ, tu yaʼaleʼ yaan u tsʼáaik juntúul «palitsil chúukpajaʼan u yóol yéetel yaan u naʼat» utiaʼal u tsʼáaik le kaʼansaj ku keʼetel yéetel janal tiʼ le múuchʼuliloʼ (Mat. 24:45). U nuuktakil u maasil religionoʼoboʼ ku yaʼalikoʼob tsʼaʼanoʼob utiaʼal u kaʼansoʼob u Tʼaan Dios. Baʼaleʼ ¿tsʼoʼok wa u beetkoʼob le meyaj kʼubéentaʼan tumen le Tsʼuuloʼ? Maʼatech. Yaʼab tiʼ letiʼobeʼ ku yaʼalikoʼobeʼ yaan baʼaxoʼob maʼ jaajtak ku kaʼansik le Bibliaoʼ. Maʼatech u yáantkoʼob u maasil u kʼaj óoltoʼob Dios utiaʼal u líikʼil u yóoloʼob, baʼaxeʼ ku meyajtiʼob chéen u tuukul wíinik utiaʼal u kaʼanskoʼob «chéen le baʼax u kʼáat u yuʼub» le máakoʼoboʼ. Tsʼoʼoleʼ ku mixbaʼalkúuntikoʼob le baʼaxoʼob ku yaʼalik le Biblia utiaʼal u kʼaʼamal le baʼaxoʼob ku kaʼanskoʼoboʼ (2 Tim. 4:3, 4).
15. ¿Bix a wuʼuyikaba yoʼolal le baʼaxoʼob tsʼoʼok u beetik u nuuktakil le religionoʼob tu kʼaabaʼ Diosoʼ?
15 Ken ilaʼak tumen yaʼab máakoʼob uts u puksiʼikʼaloʼob le baʼax ku beetik u nuuktakil le religionoʼob tu kʼaabaʼ Diosoʼ, jach ku yaatal u yóoloʼob, wa ku pʼáatal minaʼan u fejoʼob tiʼ letiʼ yéetel tiʼ le Bibliaoʼ; beyoʼ ku pʼáatloʼob tu kʼab Satanás yéetel u kʼasaʼan yóokʼol kaab. ¿Bix a wuʼuyikaba yoʼolal le baʼaxoʼob ku yúuchul sáamsamaloʼ? ¿Bix a wuʼuyikaba ken a wuʼuy bix u yaʼalaʼal baʼal tiʼ k-Taata, yéetel bix u mixbaʼalkúuntaʼal u kiliʼich kʼaabaʼ? ¿Máasaʼ ku taaktal a weʼesik maʼ jaaj le baʼax ku yaʼalaʼaloʼ? Ken a wil bix u tuʼusul le máaxoʼob uts u puksiʼikʼaloʼob tumen u pastoroʼoboʼ, ¿máasaʼ ku taaktal a wáantikoʼob? Ka tu yilaj Jesús le máakoʼob «yajtak u yóoloʼob yéetel lubaʼantak u yóoloʼob jeʼel bix tamanoʼob minaʼan máax kanáantikoʼob[eʼ]», maʼ chéen tu chʼaʼaj óotsilil tiʼobiʼ, baʼaxeʼ «joʼopʼ u kaʼansiktiʼob yaʼabkach baʼaloʼob» (Mat. 9:36; Mar. 6:34). Letiʼeʼ jach tu yeʼesaj celo yoʼolal u jaajil adoracionoʼ. Toʼoneʼ unaj k-beetik xan beyoʼ.
16, 17. 1) ¿Baʼax péekskoʼon k-jach tsʼáa k-óol teʼ kʼaʼaytajoʼ? 2) ¿Baʼax ken k-il teʼ tuláakʼ xookoʼ?
16 Ken k-beet jeʼex tu beetil Jesuseʼ k-maas naʼatik le baʼax tu yaʼalaj apóstol Pablo tiʼ 1 Timoteo 2:3 yéetel 4 (xokaʼak). Bey túunoʼ, maʼatech k-tsʼáaik k-óol kʼaʼaytaj chéen tumen k-ojel kuxaʼanoʼon tu tsʼook kʼiinoʼob, baʼaxeʼ tumen k-naʼatik letiʼe u kʼáat Jéeoba ka k-beetoʼ. Letiʼeʼ u kʼáat ka kʼaj óoltaʼak u jaajil tumen tuláakal máak, ka u yojéeltoʼob unaj u adorartkoʼob utiaʼal ka u kʼamoʼob le utsiloʼob ku tsʼáaikoʼ. Toʼoneʼ k-tsʼáaik k-óol teʼ kʼaʼaytajoʼ maʼ tumen wa k-ojel baʼax kʼiin ken taalak le xuʼulsajiloʼ, baʼaxeʼ tumen k-kʼáat nojbeʼenkúunt u kʼaabaʼ Dios yéetel k-kʼáat k-kaʼans baʼax utstutʼaan tiʼ uláakʼ máakoʼob. Ichil uláakʼ tʼaanoʼobeʼ, k-celo yoʼolal u jaajil adoración péekskoʼon k-beete (1 Tim. 4:16).
17 Jéeobaeʼ tsʼoʼok u tsʼáaiktoʼon u jatsʼuts páajtalil k-ojéeltik baʼax u tukulmaj utiaʼal wíinik yéetel utiaʼal le Luʼumaʼ. Bey túunoʼ jeʼel u páajtal k-áantik u maasil máakoʼob utiaʼal ka yanak kiʼimak óolaltiʼob teʼ kʼiinoʼobaʼ, utiaʼal u páaʼtikoʼob le jatsʼuts baʼaloʼob ku taal u kʼiinoʼ yéetel ka u salvartubaʼob ken xuʼulsaʼak tiʼ u kʼasaʼan yóokʼol kaab Satanás (2 Tes. 1:7-9). Le oʼolal maʼatech k-chiʼichnaktal mix tech u lúubul k-óol tumen bey tsʼoʼok u xáantal maʼ kʼuchuk u kʼiinil Jéeobaiʼ, baʼaxeʼ ku kiʼimaktal k-óol, tumen láayliʼ yaan u tiempoil utiaʼal k-eʼesik celo yoʼolal u jaajil adoracionoʼ (Miq. 7:7; Hab. 2:3). Teʼ tuláakʼ xookoʼ yaan k-ilik baʼax jeʼel u yáantkoʼon utiaʼal maʼ u xuʼulul k-tsʼáaik k-óol k-meyajt Dioseʼ.
¿Jeʼel wa u páajtal a tsolkeʼ?
• ¿Baʼax péeks Jesús u jach tsʼáa u yóol teʼ meyaj túuxtaʼab u beetoʼ?
• ¿Baʼax u kʼáat u yaʼal le tʼaan celo ku meyaj ichil le Bibliaoʼ?
• ¿Baʼaxoʼob péekskoʼon teʼ kʼiinoʼob k-maas k-eʼes celo yoʼolal u jaajil adoracionoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 8]
Utiaʼal Jesuseʼ, le baʼax maas kʼaʼanaʼan kaʼachoʼ, u beetik baʼax u kʼáat u Taata yéetel u yeʼesik yaabilaj tiʼ u maasil
[U tsolajil le oochel teʼ táan juʼun 10]
Toʼoneʼ jach unaj k-eʼesik celo yoʼolal u jaajil adoracionoʼ