“Akpan Ini Eke Odotde Edi Emi”
“Akpan Ini Eke Odotde Edi Emi”
“Sese! Akpan ini eke odotde edi emi. Sese! Usen edinyan̄a edi emi.” —2 COR. 6:2.
1. Ntak anade idiọn̄ọ ini emi ikpanamde n̄kpọ kiet kiet?
SOLOMON ọkọdọhọ ete: “Ẹmenịm ini ẹnọ kpukpru n̄kpọ . . . ke idak ikpaenyọn̄.” (Eccl. 3:1) Enye eketịn̄ aban̄a ufọn edidiọn̄ọ nnennen ini emi ẹkpenamde n̄kpọ, nte utọin̄wan̄, ukaisan̄, mbubehe, m̀mê ndineme nneme. Edi inaha ifre ata akpan utom oro oyomde inam kpukpru ini. Se idọhọde edi nte ke ana idiọn̄ọ se ikpadade nte ata akpan n̄kpọ ke uwem.
2. Isan̄a didie ifiọk ke Jesus ama enen̄ede ọdiọn̄ọ utọ ini emi enye okodude ke ini enye ọkwọrọde ikọ ke isọn̄?
2 Ke ini Jesus okodude ke isọn̄, enye ama enen̄ede ọdiọn̄ọ utọ ini emi enye okodude ye se akpanade enye anam. Enye ama ọdiọn̄ọ se ikedide akpan n̄kpọ, nte ke ini ama ekem ndisu mme ntịn̄nnịm ikọ emi ẹkewetde ẹban̄a Messiah. (1 Pet. 1:11; Edi. 19:10) Enye ekenyene ndinam mme owo ẹdiọn̄ọ ke imọ idi Messiah oro ẹken̄wọn̄ọde, nnọ ọyọhọ ikọ ntiense mban̄a Obio Ubọn̄, nnyụn̄ nyom mbon emi ẹditienede enye ikara ke Obio Ubọn̄ emi. Akana enye esịn itiat idakisọn̄ ọnọ esop Christian man ẹka iso ke utom edikwọrọ ikọ ye edinam mbet ke ofụri isọn̄.—Mark 1:15.
3. Didie ke Jesus akanam n̄kpọ ndiwụt ke imọdiọn̄ọ utọ ini emi ikodude?
3 Jesus ndikọfiọk kpukpru emi ama enen̄ede enyene ufọn ọnọ enye, anam enye esịn ifịk anam uduak Ete esie. Enye ama ọdọhọ mme mbet esie ete: “Idọk okpon, edi mme anamutom iwakke. Mmọdo, ẹben̄e Enyene-idọk ẹte enye osion̄o mme anamutom ọnọ ẹdi ke idọk esie.” (Luke 10:2; Mal. 4:5, 6) Jesus ama emek owo 12, ekem emek owo 70 en̄wen ke otu mbet esie, ọnọ mmọ item onyụn̄ ọdọn̄ mmọ ẹkekwọrọ ẹte: “Obio ubọn̄ heaven ke asan̄a ekpere.” Nso kaban̄a Jesus ke idemesie? Bible ọdọhọ ete: “Edikem ke Jesus ama okokụre ndinọ mbet esie duopeba item, enye oto do adaha ndikekpep mme owo n̄kpọ nnyụn̄ n̄kwọrọ ikọ ke mme obio mmọ.”—Matt. 10:5-7; 11:1; Luke 10:1.
4. Didie ke Paul ekekpebe Jesus Christ?
4 Jesus ama enen̄ede ekpep mme anditiene enye ndinyene ifịk ke n̄kpọ Abasi. Se apostle Paul eketịn̄de aban̄a edi emi ke ini enye ọkọdọhọde nditọete esie ete: “Ẹkabade ẹdi mme andikpebe mi, kpa nte ami n̄kpebede Christ.” (1 Cor. 11:1) Didie ke Paul ekekpebe Christ? Akpa edi ke ndikesịn ofụri ukeme n̄kwọrọ eti mbụk. Ke uwụtn̄kpọ, ke leta oro enye ekewetde ọnọ mme esop, oyokụt mme utọ ikọ nte “ẹkûsịn ifu ke mbubehe mbufo,” “ẹdụk ufụn ẹnọ Jehovah,” “ẹnyene ekese ndinam ke utom Ọbọn̄ kpukpru ini,” ye “se ededi eke mbufo ẹnamde, ẹnam ke ofụri ukpọn̄ nte ẹnam ẹnọ Jehovah.” (Rome 12:11; 1 Cor. 15:58; Col. 3:23) Paul ikefreke se iketịbede inọ enye ke usụn̄ Damascus ke ini enye okosobode ye Ọbọn̄ Jesus Christ ye se Jesus eketịn̄de ọnọ Ananias, emi etiede nte Ananias ama etịn̄ ọnọ enye. Jesus ọkọdọhọ Ananias ete: “Owo emi edi owo eke mmekde nte ada enyịn̄ mi aka iso mme idụt ye ndidem ye nditọ Israel.”—Utom 9:15; Rome 1:1, 5; Gal. 1:16.
“Akpan Ini Eke Odotde”
5. Nso ikanam Paul esịn ifịk ke utom esie?
5 Edieke ikotde n̄wed Utom, iyokụt nte Paul ekesịnde ifịk ọkwọrọ ikọ uko uko. (Utom 13:9, 10; 17:16, 17; 18:5) Paul ama enen̄ede ọdiọn̄ọ utọ ini emi imọ ikodude. Enye ọkọdọhọ ete: “Sese! Akpan ini eke odotde edi emi. Sese! Usen edinyan̄a edi emi.” (2 Cor. 6:2) Isua 537 M.E.N. ekedi nnennen ini ọnọ mbon oro ẹketan̄de ẹka Babylon ndifiak nnyọn̄ obio emana mmọ. (Isa. 49:8, 9) Edi nso ke ikọ Paul ọkọwọrọ? Se idude ke 2 Corinth ibuot 6 anam idiọn̄ọ se enye ekenyenede ke ekikere.
6, 7. Nso akwa ukpono ke ẹnọ mme Christian emi ẹyetde aran mfịn, ndien mmanie idiana ye mmọ inam utom?
6 Paul ama etetịn̄ aban̄a akwa ukpono emi ẹnọde mmimọ mme Christian emi ẹyetde aran. (Kot 2 Corinth 5:18-20.) Enye ama anam an̄wan̄a ke Abasi okokot mmimọ kaban̄a akpan uduak, emi edide ndinam “utom edinam owo afiak etie ke emem ye [Abasi],” oro edi, ndikpe mme owo ubọk nte “ẹfiak ẹtie ke emem ye Abasi.” Emi ọwọrọ ndinam mme owo ẹfiak ẹdi mme ufan Abasi.
7 Ubonowo ẹma ẹdian̄ade ẹkpọn̄ Jehovah toto ke usen emi owo ọkọsọn̄de ibuot ye Abasi ke In̄wan̄ Eden. (Rome 3:10, 23) Ndidian̄ade n̄kpọn̄ Abasi esịn owo ke ekịm eke spirit, ndien emi esinyụn̄ anam owo ọbọ ufen onyụn̄ akpa. Paul ekewet ete: “Nnyịn imọfiọk ite ke kpukpru n̄kpọ oro ẹbotde ke ẹmụm mmụm ọtọkiet ẹnyụn̄ ẹdu ke ubiak ọtọkiet tutu esịm emi.” (Rome 8:22) Abasi emi nnyịn ikakam iduede akam edikpe nnyịn ubọk ete ifiak iditie ke emem ye imọ. Ẹkedọn̄ Paul ye mme Christian eken oro ẹkeyetde aran ẹte ẹnam mme owo ẹfiọk emi. Ini oro ekedi “usen edinyan̄a” ọnọ mbon emi ẹkebuọtde idem ye Jesus. Kpukpru mme Christian oro ẹyetde aran ye nsan̄a mmọ—oro edi, “mme erọn̄ en̄wen”—ke ẹkot mme owo ẹte ke ini edi emi nditie ke emem ye Abasi.—John 10:16.
8. Nso inam utom edidọhọ mme owo ẹditie ke emem ye Abasi edi n̄wọrọnda?
8 Se inen̄ede inam utom edidọhọ mme owo ẹditie ke emem ye Abasi edi n̄wọrọnda edi nte ke kpa ye edide owo akakam adian̄ade ọkpọn̄ Abasi, ke Abasi ke idemesie akakam anam n̄kpọ man mme owo ẹfiak ẹdidiana ye imọ. (1 John 4:10, 19) Nso ke Abasi akanam? Paul ọbọrọ ete: “Abasi ada Christ anam ererimbot afiak etie ke emem ye enye, ibatke idiọkn̄kpọ mmọ inọ mmọ, ndien enye ama ayak ikọ edinam owo afiak etie ke emem ye enye esịn nnyịn ke ubọk.”—2 Cor. 5:19; Isa. 55:6.
9. Nso ke Paul akanam ndiwụt esịtekọm mban̄a mbọm Abasi?
9 Ke ndinọ uwa ufak, Jehovah ama anam ẹkeme ndifen idiọkn̄kpọ mbon oro ẹnyenede mbuọtidem onyụn̄ anam mmọ ẹfiak ẹdidi ufan esie. Ke adianade do, Jehovah ọdọn̄ ikọt esie ẹkekpek mme owo ke kpukpru ebiet ẹte ẹditie ke emem ye imọ ke ini ifet osụk odude mi. (Kot 1 Timothy 2:3-6.) Paul ama ọfiọk uduak Abasi onyụn̄ okụt ke ini ekem ndinam ‘mme owo ẹfiak ẹditie ke emem ye Abasi,’ ntak edi oro enye ekenen̄erede esịn ifịk anam utom Abasi. Uduak Jehovah ikpụhọkede. Enye ke oyoyom mme owo ẹditie ke emem ye imọ. “Akpan ini eke odotde” ye “usen edinyan̄a ẹdi emi” n̄ko. Nso Abasi mbọm ye mfọn ke Jehovah edi ntem!—Ex. 34:6, 7.
Ẹkûtaba “Uduak Esie”
10. Didie ke mme Christian oro ẹkeyetde aran ke eyo mme apostle ye eke eyo nnyịn ẹda “usen edinyan̄a”?
10 Mbon emi ‘ẹbuanade n̄kpọ ye Christ’ ẹkedi akpa mbon oro ẹbọde mfọn Abasi emi owo mîdotke. (2 Cor. 5:17, 18) “Usen edinyan̄a” mmọ ọkọtọn̄ọ ke usen Pentecost isua 33 E.N. Toto ke ini oro ke ẹkedọn̄ mmọ utom edisian mme owo “ikọ edinam owo afiak etie ke emem ye [Abasi].” Mfịn, mme nsụhọ Christian oro ẹyetde aran ke ẹsịn ifịk ke ‘utom edinam mme owo ẹfiak ẹditie ke emem’ ye Abasi. Mmọ ẹdiọn̄ọ ke mme angel inan̄ oro apostle John okokụtde ke n̄kukụt ke ẹsọn̄ọ “ẹmụm ofụm isọn̄ mbinan̄ ẹkama man baba ofụm okûfụme ke isọn̄.” Mmọdo, mfịn emi osụk edi “usen edinyan̄a,” ye ata “akpan ini eke odotde.” (Edi. 7:1-3) Ntak edi oro nsụhọ oro ẹyetde aran ẹnen̄erede ẹsịn ifịk ke ofụri isọn̄ ẹnam “utom edinam owo afiak etie ke emem” ye Abasi toto ke ntọn̄ọ ntọn̄ọ iduọk isua 1900.
11, 12. Didie ke mme Christian emi ẹkeyetde aran ke ntọn̄ọ ntọn̄ọ iduọk isua 1900 ẹkewụt ke imọfiọk utọ ini emi mmimọ idude? (Se ndise oro ke page 15.)
11 Ke uwụtn̄kpọ, n̄wed Jehovah’s Witnesses—Proclaimers of God’s Kingdom owụt ke ntọn̄ọ ntọn̄ọ iduọk isua 1900, ke “C. T. Russell ye mme nsan̄a esie ẹma ẹnen̄ede ẹnịm ke mmimọ idu ke ini idọk ndien ke mme owo ẹnen̄ede ẹyom akpanikọ emi anamde owo ọbọhọ ufụn.” Nso ke mmọ ẹkenam ẹban̄a emi? Nditọete emi ẹma ẹfiọk ke idu ke ini idọk, kpa “akpan ini eke odotde” ndikot mme owo ẹditie ke emem ye Abasi, ntre mmọ ikekereke ke n̄kukụre se ikpanamde ekpedi ndikot mme owo ẹdidụk edinam ido ukpono, sia se mme ọkwọrọ ederi ẹkenamde edi oro ke ediwak isua. Mme Christian emi ẹyetde aran ẹma ẹtọn̄ọ ndiyom usụn̄ en̄wen emi ẹkpedade ẹsuan eti mbụk. Emi ama esịne edida ndutịm usuanetop emi okodude ini oro nnam utom emi.
12 Man ẹsuan eti mbụk Obio Ubọn̄, ekpri otu ifịk ifịk mme ọkwọrọikọ emi ẹma ẹda mme tract, n̄kpri babru, mme magazine, ye mme n̄wed ẹkwọrọ ikọ. Mmọ ẹma ẹsiwet ediwak etop Obio Ubọn̄ ẹnọ ẹmịn̄ ke ediwak tọsịn n̄wedmbụk n̄kpọntịbe. Mmọ ẹma ẹsikwọrọ ikọ ke ekebe ukopikọ idụt mmọ ye eke ofụri ererimbot. Mmọ ẹma ẹsion̄o mme ndise ẹnyụn̄ ẹnam ẹkop se ẹtịn̄de idem ke ini emi mme osion̄o vidio mîkọdiọn̄ọke utọ n̄kpọ oro. Nso idi utịp ofụri ifịk oro mmọ ẹkesịnde do ke utom Abasi? Utịp edi nte ke mbon oro ẹbede miliọn 7 ẹditie ke emem ye Abasi idahaemi, ẹnyụn̄ ẹtiene mmọ ẹdọhọ mbon en̄wen ẹte: “Ẹfiak ẹtie ke emem ye Abasi.” Ke akpanikọ, kpa ye emi nditọete nnyịn emi mîkenyeneke ofụri se nnyịn inyenede idahaemi, se mmọ ẹkenamde enen̄ede ekpep nnyịn ndinyene ifịk.
13. Ewe uduak Abasi ke nnyịn mîkpefreke?
13 Ata “akpan ini eke odotde edi emi” kpa nte Paul ọkọdọhọde. Nnyịn emi ima ikatabi mfọnido Jehovah oro owo mîdotke imenen̄ede idat esịt ke ifet oro inyenede ndikop nnyụn̄ nnyịme etop emem emi. Nnyịn idaha etop emi nte ikọ mbenusụn̄, m̀mê ndifre se Paul eketịn̄de mi ete: “Nnyịn n̄ko imekpe mbufo ubọk ite ẹkûbọ mfọnido Abasi oro owo mîdotke edi ẹtaba uduak esie.” (2 Cor. 6:1) Abasi ọnọ owo mfọnido esie oro owo mîdotke man ada Christ anam “ererimbot afiak etie ke emem ye enye.”—2 Cor. 5:19.
14. Nso ifet ke inyene ke ediwak idụt idahaemi?
14 Satan esịri enyịn ikike ata ediwak owo, iyakke mmọ ẹsịk ẹkpere Abasi, ẹnyụn̄ ẹfiọk ntak emi Abasi ọnọde mfọnido esie oro owo mîdotke. (2 Cor. 4:3, 4; 1 John 5:19) Edi nte n̄kpọ akade iso ọdiọk ke ererimbot anam ediwak owo ẹtọn̄ọ nditie ke emem ye Abasi ke ini ẹdọhọde mmọ ke ndidian̄ade n̄kpọn̄ Abasi anam ererimbot ọdiọk, ufen onyụn̄ okpon ntem. Mme owo ke ẹnyịme eti mbụk ẹnyụn̄ ẹyom usụn̄ nditie ke emem ye Abasi idem ke mme idụt emi ediwak owo mîkesimaha utom nnyịn. Emi anam inen̄ede ikụt ke “akpan ini eke odotde edi emi” ndinen̄ede nsịn ifịk n̄kpe mme owo ubọk nte: “Ẹfiak ẹtie ke emem ye Abasi.”
15. Nso ke iyom mme owo ẹdiọn̄ọ utu ke ndikwọrọ nte ke mmọ ẹma ẹkam ẹnanam n̄kpọ Abasi ke idinyeneke aba mfịna?
15 Utom nnyịn idịghe ndisan̄a ndọhọ mme owo ke mmọ ẹma ẹkam ẹnanam n̄kpọ Abasi, ke Abasi ọyọkọk kpukpru mfịna mmọ ndien ke mmọ idinyeneke aba mfịna ke uwem. Se isidade ediwak owo ika ufọkabasi edi oro, ndien mme enyene ufọkabasi n̄ko ẹben̄e idem ndinọ mmọ se ededi emi mmọ ẹyomde. (2 Tim. 4:3, 4) Idịghe se isikwọrọde edi oro. Isikwọrọ ite ke Jehovah ama nnyịn tutu enyịme ndida uwa ufak Christ mfen mme idiọkn̄kpọ nnyịn. Ntre, mbon emi ẹdian̄arede ẹkpọn̄ Abasi ẹkeme ndifiak nditie ke emem ye enye. (Rome 5:10; 8:32) Edi “akpan ini” emi ẹnọde mme owo ifet ndidi nditie ke emem ye Abasi ọmọn̄ ebebe.
“Ẹnyene Ifiopesịt ke Spirit”
16. Nso ikanam Paul enyene uko ye ifịk?
16 Edi didie ke ikeme ndikpep ndinyene ifịk nnyụn̄ n̄ka iso nsịn ifịk ke utuakibuot akpanikọ? Ndusụk owo ẹkeme ndidi mbon o-bụt mîdịghe ẹdi mbon emi mîsimaha nditịn̄ ediwak ikọ, ntre, ekeme ndisọn̄ mmọ nditịn̄ ikọ m̀mê ndinam ufan. Edi ikpanaha ikere ke nte owo asan̄ade m̀mê akamade iso m̀mê utọ owo emi owo edide anam ẹdiọn̄ọ ke enye enyene ifịk. Paul ama etịn̄ nte owo ekemede ndinyene ifịk ke ini enye ọkọdọhọde ekemmọ mme Christian ke eyo esie, ete: “Ẹnyene ifiopesịt ke spirit.” (Rome 12:11) Spirit Jehovah ama enen̄ede an̄wam apostle emi ndika iso n̄kwọrọ ikọ uko uko. Tọn̄ọ Jesus okokot Paul ete edidi mbet imọ tutu esịm ini emi ẹkesịnde enye ke ufọk-n̄kpọkọbi ke Rome ẹnyụn̄ ẹwot enye—emi edide ama ebe isua 30—Paul okosụk enyenyene ifịk ke n̄kpọ Abasi. Enye ọkọbuọt idem ke Abasi kpukpru ini, ndien spirit Abasi ama ọnọ enye ukeme ndiyọ. Paul ọkọdọhọ ete: “Mmenyene ukeme ndinam kpukpru n̄kpọ ebe ke enye emi ọnọde mi odudu.” (Phil. 4:13) Imekeme ndinen̄ede ndia ufọn edieke ikpebede uwụtn̄kpọ Paul.
17. Didie ke ikeme ‘ndinyene ifiopesịt ke spirit’?
17 Ikọ Greek oro ẹkabarede ifiopesịt ke Rome 12:11 ọwọrọ n̄kpọ ndifụt nte emi mmọn̄ esifụtde ke ikan̄. Edieke oyomde mmọn̄ aka iso ofụt, ana okụt ete ke ikan̄ inịmeke. Kpasụk ntre n̄ko, edieke iyomde ‘ndinyene ifiopesịt ke spirit,’ ana inyene spirit Abasi kpukpru ini. Man inyene spirit emi, ana ika iso idia kpukpru udia emi Jehovah ọnọde nnyịn man ọsọn̄ọ nnyịn idem ke n̄kan̄ eke spirit. Emi abuana ndinam ukpepn̄kpọ idemfo ye eke ubon kpukpru ini, ndibọn̄ akam, nnyụn̄ ndụk mme mbono esop. Emi editie nte ikan̄ emi anamde nnyịn ika iso ifiop ke n̄kan̄ eke spirit.—Kot Utom 4:20; 18:25.
18. Nso ke nnyịn oro ima ikayak idem inọ Abasi ikpetịn̄ enyịn inam?
18 Owo emi esịnde idem ke n̄kpọ esinen̄ede etịn̄ enyịn ke se enye anamde, ndien n̄kpọ isisọpke iwọn̄ọde enye ntịn̄enyịn m̀mê ndinam idem emem enye. Nnyịn idi mme Christian oro ima ikayak idem inọ Abasi, ndien uduak nnyịn edi ndinam se ededi emi Jehovah ọdọhọde inam ukem nte Jesus akanamde. (Heb. 10:7) Mfịn, Jehovah oyom ata ediwak owo ẹditie ke emem ye imọ. Ẹyak kpukpru nnyịn inen̄ede isịn ifịk nte Jesus ye Paul, inam ata akpan utom emi oyomde ẹsọsọp ẹnam mfịn mi.
Nte Afo Emeti?
• Nso idi “utom edinam owo afiak etie ke emem” ye Abasi oro ẹkedọn̄de Paul ye mme Christian eken oro ẹyetde aran?
• Didie ke mme nsụhọ Christian oro ẹyetde aran ẹda “akpan ini eke odotde” emi ẹnam n̄kpọ ke eti usụn̄?
• Didie ke mme Christian ẹkeme ‘ndinyene ifiopesịt ke spirit’?
[Mme Mbụme Ukpepn̄kpọ]
[Ndise ke page 12]
Paul ikefreke se iketịbede inọ enye ke ini enye okosobode ye Ọbọn̄ Jesus Christ