‘Koʼág̃a og̃uahẽma pe ára iporãvéva’
‘Koʼág̃a og̃uahẽma pe ára iporãvéva’
‘Péina! Koʼág̃a og̃uahẽma pe ára iporãvéva, koʼág̃a haʼehína pe salvasión ára.’ (2 COR. 6:2, BNP)
1. Mbaʼérepa tekotevẽ jahechakuaa mbaʼépa iñimportanteve jajapo?
“OPAITE mbaʼe hiʼára, ha opaite mbaʼe ojejapóva guive yvy apére hiʼóra avei.” (Ecl. 3:1, ÑÑB.) Salomón heʼi péicha ohechauka hag̃ua tekotevẽha jaiporu porã ñanetiémpo, tahaʼe ñañemitỹ hag̃ua, javiaha, ñambaʼejogua ha ñañemongeta hag̃ua. Péro jahechakuaavaʼerã avei mbaʼépa pe iñimportantevéva jajapo. Upéva ñanepytyvõta jahecha hag̃ua mbaʼépa ñamotenondevaʼerã ñande rekovépe.
2. Mbaʼérepa jaʼe Jesús ohechakuaa hague mbaʼépa oikovaʼerã upe tiémpope?
2 Jesús oĩrõ guare ko yvy ape ári, oikuaavaʼekue mbaʼépa oikovaʼerã upe tiémpope ha mbaʼépa ojapovaʼerã. Upévare haʼe ohechakuaa og̃uahẽmaha pe tiémpo oñekumpli hag̃ua umi profesía Mesías rehegua, ha oikuaa mbaʼépa omotenondevaʼerã (1 Ped. 1:11; Rev. 19:10). Upérõ Jesús oikuaaukavaʼerã haʼeha pe Mesías oñeprometevaʼekue, omombeʼu mbaʼépa ojapóta Ñandejára Rréino ha oiporavovaʼerã umi ogovernátavape hendive. Omopyendavaʼerã avei pe kongregasión kristiána, ojepredika ha oñemboʼe hag̃ua umi oikóvape mombyryvehápe jepe ko yvy ape ári (Mar. 1:15).
3. Mbaʼépa ojapo Jesús oikuaa rupi mbaʼépa oikovaʼerã upe tiémpope?
3 Jesús oikuaa mbaʼépa oikovaʼerã upe tiémpope, upéva omomýi avei chupe kyreʼỹme ojapo hag̃ua Itúva rembipota. Haʼe heʼi hemimboʼekuérape: ‘Pe kogatýpe hetaiterei oĩ oñemonoʼõvaʼerã, omonoʼõva katu mbovy. Upévare pejeruréna pe kogaty Járape tombou hetave omonoʼõvaʼerã’ (Luc. 10:2, NM; Mal. 4:5, 6). Ñepyrũrã hemimboʼekuéra apytégui oiporavo doce ha upéi setenta. Ha heʼi rire umi hemimboʼépe mbaʼépa ojapovaʼerã, omondo chupekuéra omombeʼu hag̃ua ko marandu porã: ‘Pe rréino yvagapegua hiʼag̃uíma’. Ha mbaʼépa Jesús ojapo upe rire? La Biblia omombeʼu: ‘Jesús ohekomboʼepa rire umi doce hemimboʼépe, osẽ oho umi tavaha rupi oporomboʼe ha opredika hag̃ua’ (Mat. 10:5-7; 11:1, JMP; Luc. 10:1).
4. Mbaʼéichapa apóstol Pablo osegi Jesús ehémplo?
4 Jesús ohayhu ha omombaʼetereivaʼekue Itúva Jehovápe, péicha oheja ehémplo ne porãva hemimboʼekuérape. Upéva voi apóstol Pablo ohechauka heʼírõ guare iñermanokuérape: ‘Peñehaʼã peiko che aikoháicha, che añehaʼãgui aiko Jesucristo oiko haguéicha’ (1 Cor. 11:1, ÑÑB). Mbaʼéichapa Pablo osegi Jesús ehémplo? Haʼe naiñateʼỹivaʼekue omombeʼu hag̃ua pe marandu porã. Upévare, ohaírõ guare kárta umi kongregasiónpe heʼi “ani peneateỹ”, ‘peservi Ñandejárape tembiguáicha’, ‘akóinte pembaʼapo kyreʼỹ Ñandejárape g̃uarã’ ha ‘opa mbaʼe pejapóva, pejapo pende pyʼaite guive, pejaporamoguáicha Ñandejárape g̃uarã’ (Rom. 12:11, BNP; 1 Cor. 15:58; Col. 3:23, BNP). Apóstol Pablo ndahesaráiri Jesucristo ojechaukárõ guare chupe Damasco rapére, ha pe marandu Jesús oguerahaukavaʼekuégui chupe idisípulo Ananías rupive. Upe marandu heʼi: ‘Che aiporavóma ko kuimbaʼépe omombeʼu hag̃ua che réra ambue tetãme, mburuvichakuérape ha Israel raʼykuérape’ (Hech. 9:15, ÑÑB; Rom. 1:1, 5; Gál. 1:16).
‘Og̃uahẽma pe ára iporãvéva’
5. Mbaʼépa omomyirakaʼe apóstol Páblope pyʼaguasu ha kyreʼỹme opredika ha oporomboʼe hag̃ua?
5 Jaleévo pe lívro de Hechos jahechakuaa mbaʼeichaitépa apóstol Pablo pyʼaguasu ha kyreʼỹme opredika ha oporomboʼevaʼekue (Hech. 13:9, 10; 17:16, 17; 18:5). Mbaʼépa omomýi chupe ojapo hag̃ua upéicha? Ohechakuaa mbaʼépa oikovaʼerã upe tiémpope. Upévare heʼi: ‘Péina! Koʼág̃a og̃uahẽma pe ára iporãvéva, koʼág̃a haʼehína pe salvasión ára’ (2 Cor. 6:2, BNP). Yma péicha ojeʼe umi Israelgua ojeítarõ guare Babilonia poguýgui, áño 537-pe Jesús ou mboyve (Isa. 49:8, 9). Péro, mbaʼépa heʼiserakaʼe apóstol Pablo imanduʼávo ko téystore? Ñanepytyvõta jaikuaa hag̃ua upéva umi mbaʼe heʼíva ko téysto mboyve ha upe rire avei.
6, 7. Mbaʼépa pe tembiapo iñimportantetereíva oñemeʼẽva umi unhídope ha mávapa oipytyvõ chupekuéra?
6 Upe téysto mboyve apóstol Pablo heʼíkuri tuichaiterei mbaʼeha pe oñemeʼẽvaʼekue chupe ha ambue unhídope (elee 2 Corintios 5:18-20). Omombeʼu Ñandejára oiporavo hague chupekuéra ojapo hag̃ua peteĩ tembiapo iñimportantetereíva. ‘Ojejokuái chupekuéra omoingo porã jey hag̃ua opavavépe Ñandejárandi.’ Ha ojerure asy vaʼerã hapichakuérape: ‘Peiko porã jeýna Ñandejárandi’. Péicha omokyreʼỹvaʼerã hapichakuérape oñemoag̃ui jey hag̃ua Ñandejárare ha oiko jey iñamígoramo.
7 Hardín de Edénpe yvyporakuéra opuʼãrõ guare Jehováre, oñemomombyry chugui (Rom. 3:10, 23). Ha noñemoĩvéivo Jehová poguýpe, oiko asy hikuái ha omano. Apóstol Pablo heʼi haguéicha: ‘Ñande ningo jaikuaa opaite Ñandejára rembiapokue ipyahẽha oñondivepa ha ohasa asy’ (Rom. 8:22, ÑÑB). Péro Ñandejára ojerure asy la héntepe oñemoag̃ui jey hag̃ua hese ha oiko porã jey hendive. Upéva hína pe tembiapo oñemeʼẽvaʼekue apóstol Pablo ha ambue unhídope síglo primérope. Upérõ ‘og̃uahẽ pe ára iporãvéva’ ha ‘pe ára ojesalva hag̃ua’ umi ojeroviáva guive Jesús rehe. Koʼág̃a rupi avei umi unhídope oipytyvõ ‘umi ambue ovechakuéra’ osegi hag̃ua ojerure asy hapichakuérape oaprovecha hag̃ua ko ‘tiémpo iporãvéva’ ha oñemoag̃ui Ñandejárare (Juan 10:16).
8. Mbaʼérepa ñamombaʼeterei Ñandejára ojerure haguére yvyporakuérape oiko porã jey hag̃ua hendive?
8 Mbaʼérepa ñamombaʼeterei Ñandejára ojerure haguére yvyporakuérape oiko porã jey hag̃ua hendive? Yvyporakuéra voi oñemomombyryvaʼekue Ñandejáragui, upéicharõ jepe Jehová ohecha mbaʼéichapa ikatu jaiko porã jey hendive (1 Juan 4:10, 19). Ha mbaʼéichapa ojapo upéva? Apóstol Pablo ombohovái, heʼívo: ‘Cristo rupive Ñandejára omoingo porã jey yvyporakuérape hendive, oheja rei chupekuéra hembiapo vaikue, ha omeʼẽ iñeʼẽ ojeiko porã jey hag̃ua hendive’ (2 Cor. 5:19; Isa. 55:6).
9. Mbaʼépa Pablo ojapo oagradeségui Ñandejárape oiporiahuvereko haguére chupe?
9 Jehová omeʼẽ Itaʼýra omano hag̃ua ñanderehehápe ha jajeroviáramo upe sakrifísiore ikatúta ñaneperdona ñane rembiapo vaikue ha ñañemoag̃ui jey hese. Ha omondo avei oparupiete ko yvy ape ári hembiguaikuérape oipytyvõ hag̃ua la héntepe oiko porã jey hag̃ua hendive oĩ reheve tiémpo (elee 1 Timoteo 2:3-6). Pablo ohechakuaa rire mbaʼépa Ñandejára rembipota ha mbaʼépa oikovaʼerã upe tiémpope, oñemeʼẽmbaite oipytyvõ hag̃ua hapichakuérape ‘oiko porã jey hag̃ua Jehovándi’. Ha iporãvéva ningo Jehová nokambiái hembipota. Koʼág̃a peve haʼe oipytyvõse yvyporakuérape. Upévare oipota jaʼe ñande rapichakuérape: ‘Péina! Koʼág̃a og̃uahẽma pe ára iporãvéva, koʼág̃a haʼehína pe salvasión ára’. Ajépa imbaʼeporãite ñanendive Ñandejára ha ñandeporiahuvereko! (Éxo. 34:6, 7.)
Akóinte pejapo Ñandejára rembipota
10. Mbaʼépa ojaporakaʼe umi unhído oñepyrũ guive ‘pe salvasión ára’ ha koʼág̃a avei?
10 Ñepyrũrã, Jehová imbaʼeporã umi unhídondi, ‘oĩva peteĩ ñeʼẽme Jesucrístondi’ (2 Cor. 5:17, 18, BNP). Chupekuéra g̃uarã ‘pe salvasión ára’ oñepyrũ Pentecostés áño 33-pe. Upe guive Ñandejára ojokuái umi unhídope ojerure hag̃ua yvyporakuérape ‘oiko porã jey hag̃ua hendive’. Koʼág̃a peve oĩ gueteri umi unhído ko yvy ape ári oipytyvõva hapichakuérape ‘oiko porã jey hag̃ua Ñandejárandi’. Haʼekuéra ohechakuaa umi cuatro ánhel apóstol Juan ohechavaʼekue peteĩ visión rupive, ‘ojokoha umi irundy yvytu ani hag̃ua oipeju ko yvy ape ári’. Ha oikuaa avei hikuái neʼĩraha opa ‘pe salvasión ára’, ‘pe ára iporãvéva’ (Rev. 7:1-3). Upévare, pe síglo veinte oñepyrũ guive umi unhído opárupi ko yvy ape ári, kyreʼỹme oipytyvõ hapichakuérape oiko porã jey hag̃ua Ñandejárandi’.
11, 12. Mbaʼépa ojapo umi unhído oñepyrũvo síglo veinte ohechakuaágui oikoha kosécha tiémpope? (Ikatu rehecha umi taʼanga oĩva páhina 15-pe.)
11 Pe lívro hérava Los Testigos de Jehová, proclamadores del Reino de Dios heʼi, oñepyrũvo síglo veinte “Russell ha iñirũnguéra oguerovia hague oikomaha kosécha tiémpope ha la hénte oikuaavaʼerãha mbaʼépa omboʼe la Biblia isãso hag̃ua”. Mbaʼépa ojapo hikuái? Haʼekuéra ohechakuaa oikoha kosécha tiémpope, upévare ndahaʼéi oinvitánteva la héntepe oho hag̃ua irreunionhapekuéra, ojapoháicha umi omoakãva rrelihión japu. Umi unhído oñepyrũ ohecha mbaʼépa ikatu ojapove omog̃uahẽ hag̃ua opárupi pe marandu porã. Ha upearã oiporu hikuái umi aparáto osẽ ramovéva.
12 Oikuaauka hag̃ua pe marandu porã, umi kristiáno oiporu tratádo, folléto, rrevísta ha lívro. Oguenohẽ avei heta diáriope umi diskúrso ha artíkulo ojapóva. Ombohasa avei rrádio rupi umi prográma omyesakãva Ñandejára Ñeʼẽ, ojapo upéva Estados Unidos ha ambue tetãme. Avei yma ojehecha tiémpope cine mudo, ojapo hikuái pelíkula orekóva músika ha kolór. Upéicha oñehaʼãmbaitégui umi unhído, koʼág̃a oĩma siete millón rupi oñemoag̃uíva Jehováre ha ojeruréva hapichakuérape ‘oiko porãmi jeýnte hag̃ua Ñandejárandi’. Umi kristiáno upe tiempopegua ohechauka ohayhuha Jehovápe ipyʼaite guive, ohasáramo jepe heta mbaʼe ijetuʼúva.
13. Mbaʼérepa ñamombaʼete apóstol Pablo heʼivaʼekue?
13 Koʼág̃a ikatu avei jaʼe apóstol Pablo heʼivaʼekue: ‘Koʼág̃a og̃uahẽma pe ára iporãvéva’. Jaagradeseterei Jehovápe imbaʼeporã haguére, oikuaaukávo ñandéve imarandu jaiko porã jey hag̃ua hendive. Upévare ñamombaʼeterei Pablo heʼivaʼekue: ‘Rojerure peẽme ani hag̃ua pemboyke Ñandejára mborayhu ha ndapejapovéi hembipota’ (2 Cor. 6:1). Jehová ningo imbaʼeporã rupi ‘omoingo porã jey yvyporakuérape hendive’ Cristo rupive (2 Cor. 5:19).
14. Mbaʼépa oiko koʼág̃a rupi heta tetãme?
14 Satanás oreko gueteri ipoguýpe heta ñande rapichápe, omomombyry chupekuéra Jehovágui ha ndoikuaái hikuái hembipota (2 Cor. 4:3, 4; 1 Juan 5:19). Upéicharamo jepe, hetaiterei oĩ okambiáva oikuaa rire yvyporakuéra opuʼãgui Ñandejárare oĩha heta iñañáva ha ohasa asýva ko múndope. Umi tetã noñehenduseihápe jepe marandu porã, heta ñande rapicha ohendu ha ojapo opa mbaʼe tekotevẽva oiko porã jey hag̃ua Jehovándi. Jahechakuaápa koʼág̃a tekotevẽha ñañehaʼã jaʼe ñande rapichakuérape: ‘Peiko porã jeýna Ñandejárandi’?
15. Mbaʼeichagua marandúpa jagueraha ñande rapichakuérape?
15 Ñande ndahaʼéi jahánteva jaʼe ñande rapichakuérape oñemoag̃uíramo Ñandejárare oipytyvõtaha chupekuéra ombohovái hag̃ua iprovléma ha oñeñandu porãvetaha. Upéva voi ningo umi hénte oheka jepi ijiglésiape, ha umi pastór katu heʼi chupekuéra ohendusévante ikatu hag̃uáicha oñeñandu porã (2 Tim. 4:3, 4). Péro ñande ndahaʼéi upearã jaháva japredika. Pe marandu porã ñamombeʼúva ou Jehovágui, ha ñanderayhúgui haʼe oĩ operdona hag̃uáicha ñane rembiapo vaikue Cristo rupive. Upéicha ikatu ñañemoag̃ui jey Jehováre ha jaiko porã jey hendive (Rom. 5:10; 8:32). Péro, pe ‘ára iporãvéva’ og̃uahẽmbotaitéma huʼãme.
‘Ñambaʼapo kyreʼỹ Jehovápe g̃uarã’
16. Mbaʼépa ombopyʼaguasuvaʼekue apóstol Páblope opredika hag̃ua kyreʼỹme?
16 Mbaʼépa ikatu jajapo ñanekyreʼỹve hag̃ua Jehová servísiope? Heta oĩ hiʼotĩva ha ikirirĩva, upévare hasy jepi chupekuéra oñemongeta hag̃ua hapichándi. Péro iporãta ñanemanduʼa ñanekyreʼỹ Jehová servísiope, ndeʼiseiha ñanderetiaʼénte, ha upéva nodependeiha avei ñande lájare. Apóstol Pablo heʼivaʼekue voi ‘ñanekyreʼỹtaha espíritu sánto rupive’ (Rom. 12:11). Upéicharõ, pe espíritu sánto ombopyʼaguasuvaʼekue chupe opredika hag̃ua kyreʼỹme. Ha treinta áño Jesús oiporavo haguépe chupe hemimboʼerã, ojegueraha kárselpe Rómape ha ojejuka, upe ára peve haʼe ikyreʼỹvaʼekue Jehová servísiope. Pablo ningo akóinte oñemboʼéva Ñandejárape, pe omombaretéva chupe ijespíritu sánto rupive. Upévare heʼi: ‘Opa mbaʼe ikatu ajapo Ñandejára chemombarete rupi’ (Fili. 4:13, BNP). Ajépa hetaite mbaʼe ñanemboʼe iñehémplo!
17. Mbaʼépa ñanepytyvõta akóinte ñanekyreʼỹ hag̃ua?
17 Pe ñeʼẽ griégo ojetradusíva kyreʼỹ heʼise avei “opupu”. Ñapensamína pe y opupuvahínare, mbaʼépa oikotevẽ osegi hag̃ua opupu? Tekotevẽ jajatapy meme hese. Upéicha avei ñanekyreʼỹ hag̃ua Jehová servísiope ñaikotevẽ ijespíritu sánto opa árape. Upearã tekotevẽ jaiporupaite opa mbaʼe Jehová omeʼẽva ñandéve ñamombarete hag̃ua ñande jerovia. Ñamombaʼeguasuvaʼerã Jehovápe ñande rogapýpe ha kongregasiónpe. Upéva heʼise akóinte jastudiavaʼerãha la Biblia ñaneañohápe ha ñande rogayguándi, ñañemboʼe ha jaha meme vaʼerã rreunionhápe. Koʼã mbaʼe haʼete voi pe tata ombopupúva pe y, péicha avei espíritu sánto ñanepytyvõ akóinte ñanekyreʼỹ hag̃ua (elee Hechos 4:20 ha 18:25).
18. Mbaʼépa ñañehaʼãmbaitevaʼerã jajapo?
18 Ñande ñañemeʼẽmbaitevaʼerã Jehová servísiope, térã ñañehaʼãmbaite jajapo Jehová rembipota Jesús ojapo haguéicha, ha ani jaheja mbaʼeve ñanemokangy (Heb. 10:7). Koʼág̃a ningo Jehová oipota oiko porã jey hendive opa ikatúva guive. Upévare jasegíkena Jesús ha apóstol Pablo ehémplo, ha kyreʼỹme jajapo pe tembiapo iñimportantevéva Jesús ohejavaʼekue ñandéve.
Nemanduʼápa koʼã mbaʼére?
• Mbaʼépa pe tembiapo iñimportantetereíva oñemeʼẽvaʼekue apóstol Pablo ha ambue unhídope?
• Mbaʼépa ojapo umi unhído ohechakuaágui oikoha kosécha tiémpope?
• Mbaʼépa ñanepytyvõta akóinte ñanekyreʼỹ hag̃ua?
[Porandu ñahesaʼỹijóva]
[Nóta oĩva taʼanga ndive páhina 12]
Apóstol Pablo ndahesaráiri Jesús ojechaukárõ guare chupe