“Amo Na Ini ang Labing Nahamut-an nga Tion”
“Amo Na Ini ang Labing Nahamut-an nga Tion”
“Yari karon! Amo na ini ang labing nahamut-an nga tion. Yari karon! Amo na ini ang adlaw sang kaluwasan.”—2 COR. 6:2.
1. Ngaa dapat naton hibaluon kon ano ang pinakaimportante nga hilikuton sa isa ka partikular nga tion?
“SA TAGSA ka butang may panag-on, kag [may] tion sa tagsa ka katuyoan sa idalum sang langit.” (Man. 3:1) Si Solomon nagsulat nga importante gid nga hibaluon ang nagakaigo nga tion para sa paghimo sang bisan ano nga mapuslanon nga hilikuton—pagpanguma man ini, pagbiyahe, pagnegosyo, ukon pagpakig-angot sa iban. Apang, dapat man naton hibaluon kon ano ang pinakaimportante nga hilikuton sa isa ka partikular nga tion. Buot silingon, dapat may maathag kita nga mga prioridad.
2. Paano naton nahibaluan nga sang nagabantala si Jesus, nahibaluan niya kon sa diin na sia sa lakat sang panahon?
2 Sang diri si Jesus sa duta, nahibaluan niya kon sa diin na sia sa lakat sang panahon kag kon ano ang iya dapat himuon. Bangod maathag sa iya kon ano ang iya mga prioridad, nahibaluan niya nga tion na para matuman ang madamo nga tagna tuhoy sa Mesias. (1 Ped. 1:11; Bug. 19:10) Madamo sia sing hilikuton nga dapat himuon agod pamatud-an nga sia amo ang ginsaad nga Mesias. Dapat sia magbantala sing maid-id tuhoy sa Ginharian kag magtipon sang iya mangin kaupod nga mga manunubli sa Ginharian. Kag dapat sia magpasad sang pundasyon para sa Cristianong kongregasyon nga amo ang magapadayon sa pagbantala kag sa paghimo sang disipulo nga hilikuton sa bug-os nga duta.—Mar. 1:15.
3. Ano ang nangin epekto kay Jesus bangod nahibaluan niya kon sa diin na sia sa lakat sang panahon?
3 Bangod sina nga ihibalo, nangin makugi si Jesus sa pagtuman sang kabubut-on sang iya Amay. Ginsilingan niya ang iya mga disipulo: “Sa pagkamatuod, ang alanyon bugana, apang pila lamang ang mamumugon. Busa pakiluoy kamo sa Agalon sang alanyon nga magpadala sia sang mga mamumugon sa iya alanyon.” (Luc. 10:2; Mal. 4:5, 6) Nagpili anay si Jesus sing 12 dayon sang 70 gikan sa iya mga disipulo, ginhatagan sila sang espesipiko nga instruksion, kag ginsugo nga ibantala ining makapahulag nga mensahe: “Ang ginharian sang langit malapit na.” Ano naman ang ginhimo ni Jesus? Mabasa naton: “Pagkatapos mahatagan . . . sing instruksion ang iya napulog-duha ka disipulo, nagbiya sia didto agod magpanudlo kag magbantala sa ila mga siudad.”—Mat. 10:5-7; 11:1; Luc. 10:1.
4. Sa ano nga paagi nangin manug-ilog ni Jesucristo si Pablo?
4 Nagpahamtang si Jesus sing himpit nga halimbawa sang kakugi kag debosyon sa tanan niya nga sumulunod. Amo sina ang ginpatalupangod ni apostol Pablo sang ginpalig-on niya ang iya mga masigkatumuluo: “Mangin manug-ilog kamo sa akon, subong nga ako man kay Cristo.” (1 Cor. 11:1) Sa ano nga paagi nangin manug-ilog ni Cristo si Pablo? Panguna na amo ang iya pagpanikasog sing lakas sa pagbantala sang maayong balita. Sa sulat ni Pablo sa mga kongregasyon mabasa naton ang mga ekspresyon subong sang “indi kamo magtinamad sa inyo hilikuton,” “magpaulipon kay Jehova,” “may madamo pirme nga ginahimo sa hilikuton sang Ginuo,” kag “bisan ano ang inyo ginahimo, himua ninyo ini sing bug-os kalag subong nga kay Jehova.” (Roma 12:11; 1 Cor. 15:58; Col. 3:23) Wala gid nalipatan ni Pablo ang pagpakighambal sa iya ni Ginuong Jesucristo sa dalan pa Damasco kag ang pinamulong ni Jesus nga ginsugid ni Ananias sa iya: “Ini nga tawo isa ka pinili nga suludlan para sa akon agod dalhon ang akon ngalan sa mga pungsod subong man sa mga hari kag sa mga anak ni Israel.”—Binu. 9:15; Roma 1:1, 5; Gal. 1:16.
“Ang Labing Nahamut-an nga Tion”
5. Ano ang nagpahulag kay Pablo nga mangin makugi sa iya ministeryo?
5 Samtang ginabasa naton ang tulun-an sang Binuhatan, makita naton ang kaisog kag kakugi ni Pablo sa pagtuman sang iya ministeryo. (Binu. 13:9, 10; 17:16, 17; 18:5) Nahibaluan ni Pablo kon daw ano ka importante ang tion nga iya ginakabuhian. Nagsiling sia: “Yari karon! Amo na ini ang labing nahamut-an nga tion. Yari karon! Amo na ini ang adlaw sang kaluwasan.” (2 Cor. 6:2) Para sa mga gintapok sa Babilonia nga nagbalik sa ila duta, ang tuig 537 B.C.E. amo ang nahamut-an nga tion. (Isa. 49:8, 9) Apang ano ang ginapatuhuyan diri ni Pablo? Ang konteksto makabulig sa aton nga mahangpan ini.
6, 7. Ano ang daku nga kadungganan nga ginhatag sa hinaplas nga mga Cristiano karon, kag sin-o ang kaupod sang mga hinaplas?
6 Sa nahauna nga bahin sang iya sulat, ginsambit ni Pablo ang tuhoy sa daku nga kadungganan nga ginhatag sa iya kag sa iya kaupod nga hinaplas nga mga Cristiano. (Basaha ang 2 Corinto 5:18-20.) Suno sa iya, gintawag sila sang Dios para sa isa ka espesipiko nga katuyuan, ang pagtuman sang “ministeryo sa pagpasag-uli,” nga nagapakiluoy sa mga tawo nga “magpasag-uli . . . sa Dios.” Nagakahulugan ini sang pagpanumbalik sang ila pagpakig-abyan ukon maayo nga kaangtanan sa Dios.
7 Sugod sang natabo ang pagrebelde sa Eden, ang tanan nga tawo nahamulag kay Jehova. (Roma 3:10, 23) Subong resulta, ang katawhan nahulog sa espirituwal nga kadudulman nga nagdul-ong sa pag-antos kag kamatayon. “Nahibaluan naton nga ang tanan nga tinuga padayon nga nagaugayong sing tingob kag ginasakitan sing tingob tubtob karon,” sulat ni Pablo. (Roma 8:22) Apang ang Dios naghimo sing paagi nga laygayan ukon ‘pakiluoyan’ pa gani ang mga tawo nga magpanumbalik sa iya. Amo sina ang ministeryo nga gintugyan kay Pablo kag sa iya kaupod nga hinaplas nga mga Cristiano. Inang “nahamut-an nga tion” mahimo mangin “adlaw sang kaluwasan” para sa mga nagatuo kay Jesus. Ang tanan nga hinaplas nga Cristiano kag ang “iban nga mga karnero” nga kaupod nila padayon nga nagaagda sa mga tawo nga magbenepisyo sa “nahamut-an nga tion.”—Juan 10:16.
8. Ngaa ang panawagan sa pagpasag-uli talalupangdon gid?
8 Ini nga panawagan sa pagpasag-uli talalupangdon gid kay bisan pa ang tawo ang nakasala—resulta sang pagrebelde sa Eden—ang Dios mismo ang naghimo sing paagi nga mapasag-uli ang ila maayo nga kaangtanan sa iya. (1 Juan 4:10, 19) Ano ang iya ginhimo? Si Pablo nagsabat: “Ang Dios paagi kay Cristo nagapasag-uli sang kalibutan sa iya kaugalingon, kag wala ginaisip sa ila ang ila mga paglapas, kag gintugyan niya ang pulong sang pagpasag-uli sa amon.”—2 Cor. 5:19; Isa. 55:6.
9. Ano ang ginhimo ni Pablo agod ipakita ang iya apresasyon sa kaluoy sang Dios?
9 Paagi sa pag-aman ni Jehova sang halad-gawad, nangin posible para sa mga nagapakita sing pagtuo ang kapatawaran sang ila mga paglapas kag pagpasag-uli sang ila pagpakig-abyan ukon maayo nga kaangtanan sa iya. Dugang pa, nagpadala sia sang iya mga tiglawas agod palig-unon ang mga tawo nga magpakighidait sa iya samtang may tion pa. (Basaha ang 1 Timoteo 2:3-6.) Bangod nahangpan ni Pablo ang kabubut-on sang Dios kag nahibaluan ang tion nga iya ginakabuhian, nagpangabudlay sia sing lakas sa “ministeryo sa pagpasag-uli.” Ang kabubut-on ni Jehova wala nagbag-o. Tubtob subong ginatan-ay niya gihapon ang iya kamot sa mga luyag manumbalik sa iya. Ang ginsiling ni Pablo nga “amo na ini ang labing nahamut-an nga tion” kag “amo na ini ang adlaw sang kaluwasan” naaplikar gihapon sa aton tion. Huo, maluluy-on kag mainawaon gid nga Dios si Jehova!—Ex. 34:6, 7.
Indi ‘Pagwasiha ang Katuyuan’ Sini
10. Ano ang kahulugan sang “adlaw sang kaluwasan” para sa hinaplas nga mga Cristiano sang una kag sa karon?
10 Ang una nga makabenepisyo sa wala tupong nga kaayo sang Dios amo yadtong mga “nahiusa kay Cristo.” (2 Cor. 5:17, 18) Para sa ila “ang adlaw sang kaluwasan” nagsugod sang Pentecostes 33 C.E. Sugod sadto, gintugyan sa ila ang pagpahayag sang “pulong sang pagpasag-uli.” Sa karon, padayon nga ginatuman sang nagkalabilin nga hinaplas nga mga Cristiano ang “ministeryo sa pagpasag-uli.” Nahangpan nila nga ang apat ka anghel nga nakita ni apostol Juan sa palanan-awon amo ang “nagapugong sa apat ka hangin sang duta, agod wala sing hangin nga maghuyop sa duta.” Gani tubtob karon, “adlaw [gihapon] sang kaluwasan” kag “labing nahamut-an nga tion.” (Bug. 7:1-3) Bangod sini, sugod pa sang maaga nga bahin sang ika-20 nga siglo, makugi na nga ginatuman sang nagkalabilin nga hinaplas ang “ministeryo sa pagpasag-uli” tubtob sa pinakamalayo nga bahin sang duta.
11, 12. Paano ginpakita sang hinaplas nga mga Cristiano sang nagahilapit na ang ika-20 nga siglo nga nahibaluan nila kon sa diin na sila sa lakat sang panahon? (Tan-awa ang laragway sa pahina 15.)
11 Halimbawa, subong sang ginpakita sa libro nga Jehovah’s Witnesses—Proclaimers of God’s Kingdom, sang nagahilapit na ang ika-20 nga siglo, “si C. T. Russell kag ang iya mga kaupod malig-on nga nagpati nga yara na sila sa tion sang tig-alani kag dapat mahibaluan sang mga tawo ang nagahilway nga kamatuoran.” Ano ang ginhimo nila tuhoy sa sini? Bangod narealisar nila nga yara na sila sa tion sang tig-alani, nga isa ka “labing nahamut-an nga tion,” wala sila nakontento nga agdahon lang ang mga tawo sa isa ka relihioso nga pagtinipon nga amo ang madugay na nga ginahimo sang mga klero sang Cristiandad. Sa baylo, yadtong hinaplas nga mga Cristiano nangita sing praktikal nga mga paagi sa pagpalapnag sang maayong balita. Lakip sa sini ang paggamit sang moderno nga teknolohiya sa pagpauswag sang ila hilikuton.
12 Inang gamay nga grupo sang makugi nga mga ministro naggamit sang mga tract, pulyeto, magasin, kag mga libro agod magpalapnag sang maayong balita sang Ginharian. Naghanda man sila sang mga sermon kag mga artikulo para sa linibo ka pamantalaan. Nagwaragwag sila sang pasad sa Biblia nga mga programa sa nasyonal kag internasyonal nga mga estasyon sang radyo. Nakahimo man sila sang nagahulag nga mga laragway nga ginadunganan sang narekord nga tunog antes pa ang industriya sang pelikula nagpagua sini sa publiko. Ano ang resulta sining wala nagaugdaw nga kakugi? Sa karon, may yara na kapin sa pito ka milyon nga nagbaton kag nagabuylog sa pagpaalinton sini nga mensahe: “Magpasag-uli kamo sa Dios.” Huo, ang mga alagad ni Jehova sang una nangin huwaran gid sang kakugi bisan pa diutay lang sila kag kulang pa sa eksperiensia.
13. Ano nga katuyuan sang Dios ang dapat naton tamdon sing serioso?
13 Ang ginsiling ni Pablo nga “amo na ini ang labing nahamut-an nga tion” matuod gihapon sa karon. Kita nga nakaeksperiensia na sang wala tupong nga kaayo ni Jehova dapat gid magpasalamat nga ginhatagan niya kita sing kahigayunan nga mabatian kag mabaton ang mensahe sang pagpasag-uli. Sa baylo nga mangin kampante kita, dapat naton tamdon sing serioso ang ginsiling ni Pablo: “Nagahingyo man kami sa inyo nga indi ninyo pagwasihon ang katuyuan sang wala tupong nga kaayo sang Dios nga inyo nabaton.” (2 Cor. 6:1) Ang katuyuan sang wala tupong nga kaayo sang Dios amo nga ‘ipasag-uli ang kalibutan sa iya kaugalingon’ paagi kay Cristo.—2 Cor. 5:19.
14. Ano nga mga kahigayunan ang nabuksan sa madamo nga lugar?
14 Ang kalabanan nga tawo ginbulag ni Satanas. Bangod sini, nahamulag gihapon sila sa Dios kag wala sing hinalung-ong sa katuyuan sang wala tupong nga kaayo sang Dios. (2 Cor. 4:3, 4; 1 Juan 5:19) Apang bangod sa nagalala nga kahimtangan sa kalibutan, madamo na ang may positibo nga reaksion kon ipakita sa ila nga ang kalautan kag pag-antos sang tawo resulta sang pagkanahamulag sa Dios. Bisan pa sa mga lugar nga madamo anay ang wala nagasapak sa aton pagbantala, madamo na karon ang nagabaton sang maayong balita kag nagapanikasog nga makapasag-uli sa Dios. Gani, nahangpan bala naton nga amo na ini ang tion nga dapat kita magpakigbahin sing makugi sa pagpalanog sang pakiluoy: “Magpasag-uli kamo sa Dios”?
15. Sa baylo nga paayunan lang ang gusto sang mga tawo, ano nga mensahe ang luyag naton ipahibalo sa ila?
15 Ang aton hilikuton indi lamang ang pagsugid sa mga tawo nga kon manumbalik sila sa Dios, buligan niya sila sa tanan nila nga problema kag mangin maayo na ang ila pamatyag. Madamo ang nagakadto sa simbahan nga amo lang sina ang ginapangita kag ginapaayunan ini sang mga simbahan. (2 Tim. 4:3, 4) Indi amo sina ang katuyuan sang aton ministeryo. Ang maayong balita nga aton ginabantala amo nga si Jehova, bangod sang iya gugma, handa magpatawad sang mga paglapas paagi kay Cristo. Gani, ang mga tawo mahimo na makabalik kag makapasag-uli sa Dios. (Roma 5:10; 8:32) Apang, “ang labing nahamut-an nga tion,” malapit na lang matapos.
“Magmainit sa Espiritu”
16. Ano ang rason sang kaisog kag kakugi ni Pablo?
16 Paano naton mahuptan ang aton kakugi sa matuod nga pagsimba? Mahimo nga ang pila sa aton mahuluy-on ukon hipuson kag nabudlayan sa pagpabutyag sang aton balatyagon. Apang, dumdumon naton nga ang kakugi indi lamang basta pagpakita nga may kaisog ka sing buot ukon kakunyag; wala man ini nagadepende sa personalidad sang isa. Ginpatalupangod ini ni Pablo sang nagsiling sia sa iya mga masigka-Cristiano: “Magmainit sa espiritu.” (Roma 12:11) Ang espiritu ni Jehova amo ang may panguna nga papel sa kaisog kag pagbatas ni Pablo sa iya pagbantala nga hilikuton. Sugod sang pagpakighambal ni Jesus sa iya tubtob sa iya katapusan nga pagkabilanggo kag kamatayon sa Roma subong martir—nga mga kapin sa 30 ka tuig—wala gid nag-ugdaw ang kakugi ni Pablo. Pirme sia nagapangayo sing bulig sa Dios nga amo ang naghatag sa iya sing kinahanglanon nga kusog paagi sa espiritu. “Sa tanan nga butang may kusog ako paagi sa iya nga nagapabakod sa akon,” siling niya. (Fil. 4:13) Makabenepisyo gid kita sing daku kon ilugon naton ang iya halimbawa!
17. Paano kita “magmainit sa espiritu”?
17 Ang tinaga nga ginbadbad “magmainit” literal nga nagakahulugan sing “nagabukal.” (Kingdom Interlinear) Agod nga indi mag-untat ang pagbukal sang tubig sa kaldero, dapat nga indi man mag-untat ang kalayo sa sini. Sing kaanggid, kinahanglan nga indi mag-untat ang pagsagahay sang espiritu sang Dios sa aton agod “magmainit [kita] sa espiritu.” Gani, panginpuslan naton ang tanan nga ginaaman ni Jehova agod palig-unon kita sa espirituwal. Ginapahangop sini nga indi naton dapat pagpasapayanan ang aton pangpamilya kag pangkongregasyon nga pagsimba. Buot silingon, dapat kita mangin regular sa aton personal kag pangpamilya nga pagtuon, pagpangamuyo, kag pagtambong sa Cristianong mga miting. Amo ina ang magahatag sa aton sing “kalayo” agod makapabilin kita nga “nagabukal” kag padayon nga “magmainit sa espiritu.”—Basaha ang Binuhatan 4:20; 18:25.
18. Subong dedikado nga mga Cristiano, sa ano nga katuyuan dapat nakasentro ang aton kabuhi?
18 Ang isa ka dedikado nga tawo nagakonsentrar sa isa ka katuyuan kag indi sia madali matublag ukon maluyahan sing buot sa paglab-ot sa sina nga katuyuan. Subong dedikado nga mga Cristiano, ang katuyuan naton amo ang pagtuman sang kabubut-on ni Jehova kaangay sang ginhimo ni Jesus. (Heb. 10:7) Sa karon, kabubut-on ni Jehova nga mapasag-uli sa iya ang pinakamadamo nga tawo tubtob posible. Gani, kabay nga himuon naton ang aton bug-os nga masarangan nga mangin makugi—subong pag-ilog kay Jesus kag kay Pablo—sa sining pinakaimportante kag hilingagawon nga hilikuton sa karon.
Madumduman Mo Bala?
• Ano ang “ministeryo sa pagpasag-uli” nga gintugyan kay Pablo kag sa iban pa nga hinaplas nga Cristiano?
• Paano gingamit sing maayo sang mga nagkalabilin nga hinaplas “ang labing nahamut-an nga tion”?
• Paano “magmainit sa espiritu” ang Cristianong mga ministro?
[Mga Pamangkot sa Pagtinuon]
[Retrato sa pahina 12]
Wala gid nalipatan ni Pablo ang pagpakighambal sa iya ni Ginuong Jesucristo
