“Itan ti Kangrunaan a Makaay-ayo a Tiempo”
“Itan ti Kangrunaan a Makaay-ayo a Tiempo”
“Adtoy! Itan ti kangrunaan a makaay-ayo a tiempo. Adtoy! Itan ti aldaw ti pannakaisalakan.”—2 COR. 6:2.
1. Apay a masapul nga ammotayo no ania ti rumbeng nga aramidentayo iti naituding a tiempo?
“TA ITI banag adda naituding a tiempo, ti mismo a tiempo iti tunggal aramid iti baba ti langlangit.” (Ecl. 3:1) Ibagbaga ni Solomon a masapul nga ammotayo ti kasayaatan a tiempo para iti aniaman a napateg nga aramid—panagtalon man dayta, panagbiahe, panagnegosio, wenno pannakisarita iti sabsabali. Nupay kasta, masapul nga ammotayo met no ania ti kapatgan a trabaho a rumbeng nga aramidentayo iti naituding a tiempo. Iti sabali a pannao, masapul a naipamaysa dagiti prioridadtayo.
2. Ania ti mangipakita nga ammo ni Jesus ti tiempo a pagbibiaganna idi adda ditoy daga?
2 Idi adda ni Jesus ditoy daga, ammona ti tiempo a pagbibiaganna ken no ania ti masapul nga aramidenna. Gapu ta nalawag kenkuana no ania dagiti prioridadna, ammona a tiempo idin a matungpal ti adu a Mesianiko a padto a nabayagen a masegseggaan. (1 Ped. 1:11; Apoc. 19:10) Adda trabaho nga aramidenna tapno maammuan dagiti tattao ti kinasiasinona kas ti naikari a Mesias. Masapul a naan-anay nga ikasabana ti kinapudno maipapan iti Pagarian ken ummongenna dagidiay kakaduana a makipagtawidto iti Pagarian. Ken masapul nga ipasdekna ti pundasion ti kongregasion Kristiano a mangitungpal iti trabaho a panangasaba ken panagaramid iti adalan agingga iti ungto ti daga.—Mar. 1:15.
3. Ania ti epektona ken Jesus ti pannakaammona iti tiempo a pagbibiaganna?
3 Dayta a pannakaammo ti nabileg a nangtignay ken Jesus a sireregta a mangitungpal iti pagayatan ni Amana. Kinunana kadagiti adalanna: “Kinapudnona, dakkel ti anien, ngem bassit dagiti trabahador. Gapuna ipakaasiyo iti Apo ti panagani a mangibaon kadagiti trabahador iti panaganina.” (Luc. 10:2; Mal. 4:5, 6) Nangpili nga umuna ni Jesus iti 12 kalpasanna 70 kadagiti adalanna, inikkanna ida kadagiti espesipiko nga instruksion, ken imbaonna ida a mangikasaba iti makatukay a mensahe: “Ti pagarian ti langlangit asidegen.” No maipapan a mismo ken Jesus, mabasatayo: ‘Idi nalpasen a nangted kadagiti pammilin iti sangapulo ket dua nga adalanna, pimmanaw sadiay tapno mangisuro ken mangasaba kadagiti siudadda.’—Mat. 10:5-7; 11:1; Luc. 10:1.
4. Iti ania a pamay-an a ni Pablo tinuladna ni Jesu-Kristo?
4 Ni Jesus ti perpekto nga ulidan ti kinaregta ken debosion para iti amin a pasurotna. Dayta ti impatuldo ni apostol Pablo idi indagadagna kadagiti kapammatianna: “Agbalinkayo a tumutulad kaniak, kas met iti panangtuladko ken Kristo.” (1 Cor. 11:1) Kadagiti ania a pamay-an a ni Pablo tinuladna ni Kristo? Ti kangrunaan a pamay-an ket ti panangaramidna iti amin a kabaelanna a nangikasaba iti naimbag a damag. Iti surat ni Pablo kadagiti kongregasion, mabasatayo dagiti sasao a kas iti “dikay agpalpallailang iti aramidyo,” “agpaadipenkayo ken Jehova,” “kankanayon nga aduankayo ti aramiden iti trabaho ti Apo,” ken “aniaman ti ar-aramidenyo, aramidenyo dayta nga amin-kararua a kas maipaay ken Jehova.” (Roma 12:11; 1 Cor. 15:58; Col. 3:23) Di pulos nalipatan ni Pablo ti pannakisarita kenkuana ti Apo a ni Jesu-Kristo iti dalan nga agturong idiay Damasco ken dagiti sasao ni Jesus nga imbaga kenkuana ni adalan nga Ananias: “Daytoy a tao ket napili a basehas maipaay kaniak tapno ipanna ti naganko kadagiti nasion kasta met iti ar-ari ken iti annak ti Israel.”—Ara. 9:15; Roma 1:1, 5; Gal. 1:16.
“Ti Kangrunaan a Makaay-ayo a Tiempo”
5. Ania ti nangtignay ken Pablo a sireregta a mangitungpal iti ministeriona?
5 No basaentayo ti libro nga Aramid, nabatad a makitatayo ti kinatured ken kinaregta ni Pablo a nangitungpal iti ministeriona. (Ara. 13:9, 10; 17:16, 17; 18:5) Ammo ni Pablo ti kinapateg ti tiempo a pagbibiaganna. Kinunana: “Adtoy! Itan ti kangrunaan a makaay-ayo a tiempo. Adtoy! Itan ti aldaw ti pannakaisalakan.” (2 Cor. 6:2) Idi 537 K.K.P. ti kasayaatan a tiempo kadagiti nakautibo idiay Babilonia nga agsubli iti pagilianda. (Isa. 49:8, 9) Ngem ania ti tuktukoyen ditoy ni Pablo? Tulongannatayo ti konteksto a mangammo iti pampanunotenna.
6, 7. Ania a dakkel a pribilehio ti naited kadagiti napulotan a Kristiano ita, ken siasino dagiti makitintinnulong kadagiti napulotan?
6 Iti umun-una a paset ti surat ni Pablo, dinakamatna ti dakkel a pribilehio a naited kenkuana ken kadagiti padana a napulotan a Kristiano. (Basaen ti 2 Corinto 5:18-20.) Kinunana a pinili ida ti Dios para iti maysa nga espesipiko a panggep, ti panangitungpalda iti “ministerio ti pannakikappia,” tapno ipakaasida kadagiti tattao a ‘makikappiada iti Dios.’ Kaipapanan dayta ti pannakaisubli ti nasayaat a relasionda iti Dios.
7 Sipud idi napasamak ti panagrebelde idiay Eden, naisina ti intero a sangatauan ken Jehova. (Roma 3:10, 23) Gapu iti dayta, awan ti pannakaammo ti kaaduan a tattao maipapan iti Dios, a nagresulta iti panagsagaba ken ipapatay. “Ammotayo a ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa agingga ita,” insurat ni Pablo. (Roma 8:22) Ngem nangaramid ti Dios kadagiti addang tapno idagadagna, kinapudnona, tapno ‘ipakaasina’ kadagiti tattao nga agsublida, wenno maikappiada kenkuana. Dayta ti ministerio a naitalek idi ken ni Pablo ken kadagiti padana a napulotan a Kristiano. Dayta a “makaay-ayo a tiempo” ket “aldaw ti pannakaisalakan” para kadagidiay mangipakita iti pammati ken Jesus. Amin a napulotan a Kristiano ken ti kakaduada a “sabsabali a karnero,” a makitintinnulong kadakuada, agtultuloy nga aw-awisenda dagiti tattao tapno magunggonaanda iti “makaay-ayo a tiempo.”—Juan 10:16.
8. Ania ti namagbalin a naisangsangayan iti awis a makikappia?
8 Ti namagbalin nga ad-adda a naisangsangayan iti awis a makikappia ket ti umuna a panangaramid ti Dios iti addang tapno maisubli ti nadadael a relasion kenkuana, nupay ti sangatauan laeng ti nakabasol idi nagrebelde ti tao idiay Eden. (1 Juan 4:10, 19) Ania ti inaramid ti Dios? Kuna ni Pablo: “Ti lubong inkappia ti Dios iti bagina babaen ken Kristo, saanna nga insingir kadakuada dagiti labsingda, ket intalekna kadakami ti sao ti pannakikappia.”—2 Cor. 5:19; Isa. 55:6.
9. Ania ti inaramid ni Pablo tapno maipakitana ti apresasionna iti kinamanangngaasi ti Dios?
9 Babaen ti panangipaay ni Jehova iti daton a subbot, pinagbalinna a posible ti pannakapakawan ti basbasol ken ti pannakaisubli ti nasayaat a relasion kenkuana dagidiay mangipakpakita iti pammati. Kanayonanna, nangibaon kadagiti pannakabagina tapno paregtaenda dagiti tattao a makikappia kenkuana agingga nga adda pay gundawayda. (Basaen ti 1 Timoteo 2:3-6.) Gapu ta ammo ni Pablo ti pagayatan ti Dios ken ti tiempo a pagbibiaganna, sipipinget nga intungpalna ti “ministerio ti pannakikappia.” Saan a nagbaliw ti pagayatan ni Jehova. Pagayatanna pay laeng a maikappia kenkuana ti sangatauan. Agaplikar pay laeng ita dagiti sasao ni Pablo nga “itan ti kangrunaan a makaay-ayo a tiempo” ken “itan ti aldaw ti pannakaisalakan.” Anian a kinamanangngaasi ni Jehova a Dios!—Ex. 34:6, 7.
Dikay ‘Maikapis iti Panggepna’
10. Ania ti kaipapanan ti “aldaw ti pannakaisalakan” para kadagiti napulotan a Kristiano idi ken ita?
10 Dagiti immuna a nagunggonaan iti dayta nga ebkas ti di kaikarian a kinamanangngaasi ket dagidiay “naikaykaysa ken Kristo.” (2 Cor. 5:17, 18) Para kadakuada, nangrugi idi Pentecostes 33 K.P. “ti aldaw ti pannakaisalakan.” Sipud idi, naitalek kadakuada ti annongen a mangipakaammo iti “sao ti pannakikappia.” Agingga ita, dagiti natda a napulotan a Kristiano itungtungpalda pay laeng ti “ministerio ti pannakikappia.” Ammoda a dagiti uppat nga anghel iti naimpadtuan a sirmata ni apostol Juan “siiirut a tengtenglenda ti uppat nga angin ti daga, tapno awan ti angin nga agpuyupoy iti daga.” Gapuna, ‘aldaw pay laeng ita ti pannakaisalakan’ ken “kangrunaan a makaay-ayo a tiempo.” (Apoc. 7:1-3) Gapu iti dayta, sipud idi rugrugi ti maika-20 a siglo, dagiti napulotan a natda sireregta nga itungtungpalda ti annongenda a “ministerio ti pannakikappia” agingga iti kaadaywan a paset ti daga.
11, 12. Kasano a dagiti napulotan a Kristiano idi rugrugi ti maika-20 a siglo impakitada nga ammoda ti tiempo a pagbibiaganda? (Kitaenyo ti ladawan iti panid 15.)
11 Kas pagarigan, nadakamat iti libro a Dagiti Saksi ni Jehova—Manangiwaragawag iti Pagarian ti Dios, a sakbay nga agtapog ti maika-20 a siglo, “sipipinget a pinati ni C. T. Russell ken ti kakaduana nga addadan iti tiempo ti panagani ket kasapulan a mangngegan dagiti tao ti mangwayawaya a kinapudno.” Ania ti inaramidda? Gapu ta ammoda nga agbibiagdan iti tiempo ti panagani, ti “kangrunaan a makaay-ayo a tiempo,” narikna dagitoy a kakabsat a saan nga umdas nga awisen laeng dagiti tattao kadagiti narelihiosuan a taripnong, banag a nabayagen nga ar-aramiden ti klero ti Kakristianuan. Imbes ketdi, dagiti napulotan a Kristiano pinadasda ti nadumaduma a praktikal a pamay-an tapno maisaknap ti naimbag a damag. Ti maysa kadagita ket ti nainsiriban a panangusarda iti kabaruan a teknolohia tapno mayadelantar ti trabahoda.
12 Tapno maisaknap ti naimbag a damag maipapan iti Pagarian, dayta a bassit a grupo dagiti naregta a ministro nagusarda kadagiti tract, pampleta, magasin, ken libro. Nagisaganada pay kadagiti sermon ken artikulo sa inwarasda dagita tapno mayimprenta kadagiti rinibu a diario. Nangyurnosda kadagiti programa a mangilawlawag iti Biblia a mangngegan kadagiti nasional ken internasional nga estasion ti radio. Nagaramid ken nagusarda kadagiti ladawan nga addaan kadagiti nairekord a sasao, sakbay pay a nagusar dagiti industria ti pelikula kadagiti kasta a pabuya para iti publiko. Ania ti resulta ti kasta a narayray a kinaregta? Adda itan ti nasurok a pito a milion a nangipangag ken nakidanggay a mangipakpakaammo iti mensahe a: “Makikappiakayo iti Dios.” Wen, dagidi a nagkauna nga adipen ni Jehova ket nagsayaat nga ulidan ti kinaregta iti laksid ti limitado a kasasaadda.
13. Ania ti panggep ti Dios a nasken nga ipapusotayo?
13 Agaplikar pay laeng ita dagiti sasao ni Pablo nga “itan ti kangrunaan a makaay-ayo a tiempo.” Anian a yamantayo a naipakitaan iti di kaikarian a kinamanangngaasi ni Jehova gapu ta naikkantayo iti gundaway a makangngeg ken umawat iti mensahe ti pannakikappia! Imbes nga agbalintayo a manangyaleng-aleng, ipapusotayo ketdi dagitoy a sasao ni Pablo: “Ipakaasimi met kadakayo a saanyo nga awaten ti di kaikarian a kinamanangngaasi ti Dios ket maikapiskayo iti panggepna.” (2 Cor. 6:1) Ti panggep ti di kaikarian a kinamanangngaasi ti Dios ket tapno ‘ikappia ti lubong iti bagina’ babaen ken Kristo.—2 Cor. 5:19.
14. Ania ti nasayaat a mapaspasamak iti adu a dagdaga?
14 Kaaduan a tattao a binulsek ni Satanas ket naisina pay laeng iti Dios ken saanda nga ammo ti panggep ti di kaikarian a kinamanangngaasi ti Dios. (2 Cor. 4:3, 4; 1 Juan 5:19) Ngem gapu iti kumarkaro a kasasaad ti lubong, adu ti agtignay no maisuro kadakuada a ti pannakaisina iti Dios ti ramut ti kinadakes ken panagsagaba ti tao. Uray kadagiti dagdaga a kaaduan kadagiti umilida ket saan nga interesado iti naimbag a damag nga ikaskasabatayo, adu itan ti umaw-awat iti dayta ken agtigtignayda tapno maikappiada iti Dios. Gapuna, matarusantay kadi nga itan ti tiempo nga agbalintayo nga ad-adda a naregta a mangipakaammo iti pakaasi a: “Makikappiakayo iti Dios”?
15. Imbes a dagiti mensahe a mangpalag-an laeng iti rikna ti ikasabatayo, ania ti kayattayo a maammuan ti amin a tattao?
15 Ti annongentayo ket saan laeng a mangibaga kadagiti tattao nga umadanida iti Dios tapno tulonganna ida iti amin a parikutda, iti kasta, lumag-an ti riknada. Adu ti agsapsapul iti kasta no makimisada, ken magagaran dagiti lider ti relihion a mangpennek kadagita a tarigagay. (2 Tim. 4:3, 4) Saan a dayta ti panggep ti ministeriotayo. Ti naimbag a damag nga ikaskasabatayo isu daytoy: Gapu iti ayat ni Jehova, sidadaan a pakawanenna dagiti salungasingtayo babaen ken Kristo. Iti kasta, maikappia dagiti tattao iti Dios manipud pannakaisinada Kenkuana. (Roma 5:10; 8:32) Ngem dandanin agpatingga ti “kangrunaan a makaay-ayo a tiempo.”
“Nasgedkayo Koma iti Espiritu”
16. Ania ti nakatulong ken Pablo a naaddaan iti kinatured ken kinaregta?
16 Kasanotayo ngarud a mapatanor ken mataginayon ti kinaregtatayo iti pudno a panagdayaw? Mabalin a managbabain wenno saan a maun-uni ti dadduma ken marigatanda a makilangen wenno mangyebkas iti riknada. Ngem nasayaat a laglagipentayo a ti kinaregtatayo ket saan laeng a kinarayray wenno kinagagar ken saan nga agdepende dayta iti personalidad ti maysa. Impatuldo ni Pablo no kasano a mapatanor ken mataginayon ti kinaregta idi indagadagna kadagiti padana a Kristiano: “Nasgedkayo koma iti espiritu.” (Roma 12:11) Dakkel ti akem ti nasantuan nga espiritu ni Jehova iti kinatured ken panagibtur ti apostol iti trabaho a panangasaba. Iti nasurok a 30 a tawen, sipud idi dinutokan ni Jesus agingga iti maudi a pannakaibalud ken pannakapapatayna idiay Roma, saan a bimmaaw ti kinaregta ni Pablo. Kanayon a nagpannuray iti Dios, a nangipaay kenkuana iti kasapulanna a bileg babaen ti espiritu. Kuna ni Pablo: “Ta iti amin a bambanag addaanak iti bileg gapu iti daydiay mangmangted kaniak iti pannakabalin.” (Fil. 4:13) Dakkel ti magunggonatayo no tuladentayo ti ulidanna!
17. Kasanotayo nga agbalin a ‘nasged iti espiritu’?
17 Ti literal a kaipapanan ti sao a “nasged” ket “agburburek.” (Kingdom Interlinear) Tapno agtultuloy nga agburek ti danum iti kaserola masapul nga agtultuloy a masungrodan. Umasping iti dayta, kasapulan met ti agtultuloy a panagayus ti espiritu ti Dios tapno agtultuloytayo a ‘nasged iti espiritu.’ Tapno maaramid dayta, aprobetsarentayo ti amin a probision nga ipapaay ni Jehova tapno mapabileg ti espiritualidadtayo. Kaipapanan dayta ti saan a panangliway iti panagdayawtayo kas pamilia ken kongregasion—panagbalin a regular iti personal ken sangapamiliaan a panagadal, panagkararag, ken pannakitimpuyog kadagiti padatayo a Kristiano. Dayta ti tumulong kadatayo a maaddaan iti “apuy” a mamagtalinaed kadatayo a kas man la “agburburek,” kanayon a ‘nasged iti espiritu.’—Basaen ti Aramid 4:20; 18:25.
18. Kas dedikado a Kristiano, ania a kalat ti rumbeng a nakaipamaysaantayo?
18 Ti dedikado a tao ket naan-anay a naipamaysa iti kalatna ken saan a nalaka a masinga wenno maupay iti panangragpatna iti dayta. Kas dedikado a Kristiano, kalattayo nga itungpal ti aniaman a kayat ni Jehova nga ipaaramid kadatayo, kas iti inaramid ni Jesus. (Heb. 10:7) Pagayatan ni Jehova ita nga agingga iti mabalin adu ti maikappia kenkuana. Sapay koma ngarud ta agbalintayo a naregta—kas panangtulad kada Jesus ken Pablo—iti daytoy kapatgan, wen, kaganatan a trabaho a maar-aramid ita.
Malagipyo Kadi?
• Ania a “ministerio ti pannakikappia” ti naitalek ken ni Pablo ken iti dadduma pay a napulotan a Kristiano?
• Kasano a ginundawayan dagiti napulotan a natda ti “kangrunaan a makaay-ayo a tiempo”?
• Kasano nga agbalin a ‘nasged iti espiritu’ dagiti Kristiano a ministro?
[Salsaludsod]
[Ladawan iti panid 12]
Di pulos nalipatan ni Pablo ti pannakisaritana ken Jesu-Kristo