“Koroni e Kinde Mowinjore”
“Koroni e Kinde Mowinjore”
“Neuru, koroni e kinde mowinjore; neuru, koroni e ndalo mar warruok.”—2 KOR. 6:2.
1. Ang’o momiyo onego wang’e gino manyaka watim e thuolo moro amora ma wan-go?
“GIK moko duto gin gi ndalo mowinjorenigi, weche duto manie bwo polo gin gi ndalogi.” (Ekl. 3:1) Suleman ne wuoyo kuom ber mar ng’eyo ndalo mowinjore gi timo tich moro amora makonyo—obed pur, dhi e wuoth, kata tudruok gi jomoko. Kata kamano, dwarore bende ni wang’e tich manyaka watim e thuolo moro amora ma wan-go. Tiende ni nyaka wang’e maler gigo monego waket mokwongo e ngima.
2. Ere kaka wanyalo ng’eyo ni sama Yesu ne lendo, nong’eyo maler tiend ndalo ma ne odakie?
2 Kane en e piny, Yesu nong’eyo maler tiend ndalo ma ne odakie kaachiel gi gino ma ne dwarore otim e ndalono. Nimar nong’eyo gigo moketo mokwongo e ngimane, nong’eyo ni kinde nosechopo ma weche mang’eny ma ne okor e wi Mesia nonego otimre. (1 Pet. 1:11; Fwe. 19:10) Ne en gi tich ma ne dwarore otim mondo omi fwenye maler ni en e Mesia ma ne okor. Ne nyaka otim neno chuth kuom adiera mar Pinyruoth, kendo choko jogo ma ne dhi locho kode e Pinyruoth. Kendo ne nyaka oket mise mar kanyakla mar Jokristo ma ne dhi bedo gi migawo mar lendo kaachiel gi timo ji jopuonjre e piny mangima.—Mari. 1:15.
3. Ng’eyo tiend kinde ma ne odakie nomiyo Yesu otimo ang’o?
3 Ng’eyo tiend ndalo ma ne odakie, nokonyo Yesu bedo gi kinda e timo dwaro mar Wuon mare. Nowacho ne jopuonjrene niya: “Keyo duong’, to jotich ema nok. E momiyo, kwauru Wuon keyo, mondo oor jotich odhi e keyone.” (Luka 10:2; Mal. 4:5, 6) Yesu nokwongo yiero ji 12, bang’e noyiero ji 70 kuom jopuonjrene, kendo nochikogi kaka ne dwarore gilendi, kae to noorogi mondo giland wach majaberni: “Pinyruodh polo osesudo machiegni.” To kuom Yesu owuon wasomo kama: “Ka ne Yesu otieko chiko jopuonjrene apar gariyogo, noa kanyo odhi puonjo kendo yalo e miechgi.”—Math. 10:5-7; 11:1; Luka 10:1.
4. Paulo noluwo ranyisi mar Yesu Kristo e yo mane?
4 Yesu noketo ne jolupne duto ranyisi malong’o chuth mar tiyo gi kinda koda chiwruok. Kinda mar Yesu ema jaote Paulo ne wuoyoe kane ojiwo Jokristo wetena kama: “Beduru jo ma luwo timna, kaka an bende aluwo tim Kristo.” (1 Kor. 11:1) Paulo noluwo ranyisi mar Kristo e yo mane? Yo maduong’ ahinya ne en kuom chiwruok thuth ne lando wach maber. E barupene ma nondiko ne kanyakla, wayudo kotiyo gi weche kaka, “timuru kinda maonge samuoyo,” “tiuru ni Ruoth,” “kutiyo matek pile e tich Ruoth,” kod “gimoro amora mutiyo, tiuru gi chunyu duto, kaka ni Ruoth.” (Rumi 12:11; 1 Kor. 15:58; Kol. 3:23) Wi Paulo ne ok owil ngang’ gi kaka Ruoth Yesu Kristo ne ofwenyorene kane en e yo madhi Damaski kod weche Yesu ma ne nyaka bed ni Anania nowachone niya: ‘Ng’atni en gir tichna moyier, ni mondo oter nyinga ir ogendini gi ruodhigi, kendo e nyim Jo-Israel.’—Tich 9:15; Rumi 1:1, 5; Gal. 1:16.
“Kinde Mowinjore”
5. Ang’o ma nojiwo Paulo lendo gi kinda?
5 Sama wasomo bug Tich Joote, wanyalo fwenyo chir kod kinda ma ne Paulo onyiso e tije mar lendo. (Tich 13:9, 10; 17:16, 17; 18:5) Paulo nong’eyo ni ne odak e kinde makende. Nowacho kama: “Neuru, koroni e kinde mowinjore; neuru, koroni e ndalo mar warruok.” (2 Kor. 6:2) Higa mar 537 Ka Ndalowa Podi, ema ne en kinde mowinjore ne jogo ma ne gin wasumbini e Babulon, nimar ne giduogo e pinygi. (Isa. 49:8, 9) Kata kamano, Paulo ne wuoyo kuom ang’o? Weche molworo ndikono konyowa ng’eyo gima Paulo ne nigo e paro.
6, 7. Jokristo mowal omi migawo mane maduong’ e kinde masani, to gin jomage matiyo sani kanyachiel gi Jokristo mowal?
6 Motelo e barupeno, Paulo nowuoyo kuom duong’ ma ne osemiye kaachiel gi Jokristo wetene mowal. (Som 2 Jo Korintho 5:18-20.) Ne olero ni, Nyasaye ne oluongogi ne tich moyangi, tiende ni, mondo gichop “tich mar kelo winjruok,” mondo gisa ji olos ‘winjruok gi Nyasaye.’ Timo kamano ne dwaro ni ji ochak olos osiep e kindgi gi Nyasaye kaka ne en kar chakruok.
7 Nyaka a ng’anjo ma ne otimore e Eden, dhano duto osebedo kopogore kendo bet mabor gi Jehova. (Rumi 3:10, 23) Bedo ni dhano osepogore gi Nyasaye osemiyo ok ging’eye, kendo mano osekelo chandruok koda tho. Paulo nondiko kama: “Wang’eyo ni chuech duto chur kaachiel, kendo neno rem nyaka kawuono.” (Rumi 8:22) Kata kamano, Nyasaye osekawo okang’ mar ‘sayo’ ji mondo giduog ire, kata loso winjruok kode. Mano e tich ma ne omi Paulo kaachiel gi Jokristo mowal wetene, e ndalo machon. ‘Kinde mowinjoreno’ ne dhi bedo “ndalo mar warruok” ne jogo ma ne oketo yie kuom Yesu. Jokristo duto mowal koda jowetegi ma gin ‘rombe mamoko’ matiyo kanyachiel kodgi, dhi nyime gwelo ji mondo obi oyud gweth kuom “kinde mowinjore.”—Joh. 10:16.
8. Ang’o mamiyo wach loso winjruok en gimiwuoro ahinya?
8 Gimomiyo wach loso winjruokno en gimiwuoro ahinya en ni, kata obedo ni ng’anjo mar dhano e Eden ema ne oketho winjruokno, Nyasaye owuon ema nokawo okang’ mar dwoko winjruokno. (1 Joh. 4:10, 19) Ang’o ma ne Nyasaye otimo? Paulo dwoko niya: “E i Kristo, Nyasaye ne miyo piny winjore kode, ka ok okwan ni ji richogi; kendo osemiyowa wach mar kelo winjruok.”—2 Kor. 5:19; Isa. 55:6.
9. Ang’o ma Paulo notimo kodwokogo erokamano kuom ng’wono mar Nyasaye?
9 Kokalo kuom misango mar rawar, Jehova noloso yo mondo jogo ma oketo yie, obi owenegi richogi kendo gichak gibed osiepene kata bedo gi winjruok kode kendo. E wi mano, ne ooro jootene mondo osa ji kamoro amora, mondo gilos kuwe gi Jehova ka kinde podi nitie. (Som 1 Timotheo 2:3-6.) Bang’ ng’eyo dwaro mar Nyasaye kendo ng’eyo tiend kinde ma ne odakie, Paulo notiyo matek ahinya e “tich mar kelo winjruok.” Dwaro mar Jehova pok olokore. Podi odwaro ni jogo mapok oloso winjruok kode mondo otim kamano. Weche ma Paulo nowacho ni, “koroni e kinde mowinjore,” kendo ni, “koroni e ndalo mar warruok,” podi tiyo. Mano kaka Jehova en Nyasaye ma kecho dhano kendo en gi ng’wono mogundho!—Wuok 34:6, 7.
Kik Ikawe “Kayiem Nono”
10. E kinde mosekalo koda sani, Jokristo mowal osekawo “ndalo mar warruok” kaka kinde mar timo ang’o?
10 Jogo ma ne okwongo yudo ng’wono mar Nyasaye ma dhano ok owinjore yudo, ne gin jogo ma “obedo e i Kristo.” (2 Kor. 5:17, 18) Kuom jogo, “ndalo mar warruok” ne ochakorenegi e Pentekost 33 E Ndalowa. Chakre kanyo, gisebedo joma omi migawo mar lando “wach mar kelo winjruok.” E kinde masani, Jokristo mowal mapod odong’ e piny, dhi nyime gi tiyo “tich mar kelo winjruok.” Ging’eyo ni malaike ang’wen ma jaote Johana noneno e fweny, podi omako “yembe ang’wen mag piny, mondo yamo kik kudhi e piny.” Omiyo, sani podi en “ndalo mar warruok,” kendo e “kinde mowinjore.” (Fwe. 7:1-3) Kuom mano, chakre e higini mag 1900 Jokristo mowal mapod odong’ e piny, osebedo ka tiyo gi kinda ahinya e “tich mar kelo winjruok” nyaka tung’ piny.
11, 12. E chak higini mag 1900, ere kaka Jokristo mowal nonyiso ni ne ging’eyo tiend kinde ma ne gidakie? (Ne picha e ite mar 15.)
11 Kuom ranyisi, mana kaka onyis e buk mar Mashahidi wa Yehova—Wapiga-Mbiu wa Ufalme wa Mungu, e chak higini mag 1900, “C. T. Russell kaachiel gi jowetene ne nigi adiera ahinya ni ne gidak e kinde mar keyo kendo ni ne dwarore mondo ji owinj adiera maresogi.” En okang’ mane ma ne gikawo kuom wachno? Bang’ ng’eyo ni ne gidak e kinde keyo, ma en “kinde mowinjore,” ne gineno ni tiyo mana tij gwelo ji obi e chokruok ma ne ipuonjoe wach Nyasaye, ne ok romo. Jotend dinde maluongore ni Jokristo, nosebedo katimo mana kamano. Jokristo mowalgo to nochako nono yore mamoko ma ne nyalo konyo e tij lando wach maber. Achiel kuom yorego ne en kuom tiyo gi dongruok mar masinde kata teknoloji e miyo tijno olandre.
12 Mondo omi giland wach maber mar Pinyruoth, kweth matinno mar owete ma ne jokinda, notiyo gi trakt, gasede, koda buge. Bende ne giiko twege koda puonj moko, kendo orogi mondo ogogi e gasede tara gi tara mag jopiny. Ne gitiyo gi redio mawinjre e pinje mogwaro, e lando Wach Nyasaye. Ne giloso kendo tiyo gi sinema ma nigi dwol, kata obedo ni dongruok ma kamano ne pok ochak tiyogo e piny. En nyak mane ma ne obetie nikech kinda maduong’ kamano? E kindegi, nitie ji madirom milion abiriyo moserwako wach, kendo gin bende gilando ne jomamoko ka giwachonegi niya: “Winjreuru gi Nyasaye.” Kuom adier, jotich Jehova ma kindego noketo ranyisi maber mar tiyo gi kinda kata obedo ni ne nitie pek moko ma ne giromogo.
13. En dwaro mane mar Nyasaye monego wakaw mapek?
13 Wach ma Paulo wacho ni, “koroni e kinde mowinjore” en wach mapod tiyo sani. Kaka jogo moseyudo ng’wono mar Jehova ma dhano ok owinjore yudo, wamor nimar osemiwa thuolo mar winjo kendo rwako wach makelo winjruok. Kar bet abeta maok wadewo, onego wakaw mapek weche Paulo, ma nowacho kama: “Wahombou bende ni kik uyud ng’wono [mar Nyasaye] kayiem nono.” (2 Kor. 6:1) Gimomiyo Nyasaye nyisowa ng’wono maok wawinjore yudo en nikech odwaro “miyo piny winjore kode” kokalo kuom Kristo.—2 Kor. 5:19.
14. Gin thuolo mage mapod nitie e pinje mang’eny?
14 Satan podi odino wang’ ji mang’eny, kendo gipogore mabor gi Nyasaye nimar ok ging’eyo gimomiyo Nyasaye nyiso dhano ng’wono maok giwinjore yudo. (2 Kor. 4:3, 4; 1 Joh. 5:19) Kata kamano, kaka weche me piny medo dhi marach, mano osemiyo ji mang’eny orwako wach, bang’ ka osenyisgi ni pogruok gi Nyasaye e gima kelo richo kod chandruok e ngima dhano. Kata mana e pinje ma ji mang’eny osebedo ka ok rwak wach mwalando, ng’enygi sani rwako wach maber kendo kawo okang’ mar loso winjruokgi gi Nyasaye. Be mano miyo wakawo mapek ni sani e kinde monego wati matek gi kinda momedore ka walando ne ji niya: “Winjreuru gi Nyasaye”?
15. Kar mana lando ne ji wach mamiyo giwinjo maber, en ang’o ma wadwaro mondo ji duto ong’e?
15 Tijwa ok en mana nyiso ji ni ka giduogo ir Nyasaye, to obiro konyogi tieko chandruogegi duto kendo miyo giwinj maber. Mano e gima ji mang’eny manyo ka gidhi e kanise, kendo kanisego tiyo gi wachno. (2 Tim. 4:3, 4) Mano ok e gimaduong’ momiyo walendo. Wach maber mwalando en ni, Jehova oikore weyo ne dhano richogi nikech herane kokalo kuom Kristo. Kuom mano, dhano nyalo kawo okang’ mar sudo machiegni gi Nyasaye kendo loso winjruok kode. (Rumi 5:10; 8:32) Kata kamano, “kinde mowinjore,” chiegni rumo.
“Ler mar Chunyu Mondo Orieny Pile”
16. Ang’o ma ne omiyo Paulo chir kaachiel gi kinda?
16 Ere kaka wanyalo bedo gi kinda kendo dhi nyime gi kindano ne lamo madier? Jomoko nyalo bedo gi wichkuot, kendo ginyalo yudo ka en gima tek wuoyo gi ji. Kata kamano, ber ng’eyo ni kinda ok en mana kido ma ng’ato nyiso gi oko koil e yor mor; kendo ok en kido ma inyuologo ng’ato. Paulo nonyiso kaka ng’ato nyalo bedo gi kinda kane owacho kama ne Jokristo wetene: “Ler mar chunyu mondo orieny pile.” (Rumi 12:11) Roho mar Jehova e gimaduong’ ma nokonyo jaoteno bedo gi chir kod sinani e tij lendo. Chakre kinde ma Yesu ne oluonge mobedo Jakristo nyaka e kinde ma ne onege e Rumi—higini mokalo 30—kinda mar Paulo ne ok odok chien. Kinde duto Paulo ne oketo geno kuom Nyasaye, ma kokalo kuom rohone, ne omiye teko ma ne dwarore. Nowacho kama: “Anyalo timo gik moko duto kuom en ma miya teko.” (Fili. 4:13) Mano kaka wanyalo yudo ber mogundho ka wapuonjore kuom ranyisi mare!
17. Ere kaka wanyalo miyo ‘chunywa orieny pile’?
17 Wach moloki ni ‘rieny’ tiende sie en “yienyo.” (Kingdom Interlinear) Mondo omi birika mar pi odhi nyime gi yienyo, dwarore ni mach osiki ka liel. Kamano bende, mondo omi ‘chunywa orieny pile,’ dwarore mondo wasiki kwayudo roho mar Nyasaye. Gima biro konyowa yudo rohono en dhi nyime tiyo gi yore duto ma Jehova oseketo mag tegowa e winjruokwa kode. Mano nyiso ni onego wakaw mapek lamo marwa mar joot koda mar kanyakla—timo puonjruokwa wawegi koda mar joot, wuoyo gi Nyasaye e lamo, kendo chokore gi Jokristo wetewa, ka watimo mago duto maok wabare. Mano biro konyowa bedo gi “mach” madwarore e miyo wadhi nyime “yienyo,” tiende ni wadhi nyime gi ‘chuny marieny pile.’—Som Tich Joote 4:20; 18:25.
18. Wan kaka Jokristo mosechiwore, en wach mane maduong’ monego waketie chunywa duto?
18 Ng’at mosechiwore ne wach moro en ng’ama keto chunye duto kuom wachno, kendo ok yot mondo gimoro ogal pache kuom luwo wachno. Wan kaka Jokristo mosechiwore, gimaduong’ mwaketoe chunywa duto en timo gimoro amora ma Jehova dwaro, mana kaka Yesu bende notimo. (Hib. 10:7) Sani, dwaro mar Jehova en ni ji mang’eny kaka nyalore olos winjruok kode. Omiyo, weuru mondo wati gi kinda duto ka waluwo ranyisi mar Yesu gi Paulo—e tiyo tijno madwarore moloyo, ee, tich monego otim mapiyo ahinya sani.
Be Iparo?
• “Tich mar kelo winjruok” ma ne omi Paulo kaachiel gi Jokristo mowal, ne en mane?
• Jokristo mowal kuom roho osetiyo nade maber gi “kinde mowinjore”?
• Jolendo ma Jokristo nyalo miyo nade ‘chunygi orieny pile’?
[Penjo mag Puonjruok]
[Picha manie ite mar 12]
Wi Paulo ne ok owil ngang’ gi kaka Ruoth Yesu Kristo nofwenyorene