“Tûn Hi Hun Lâwmawm Chu A Ni”
“Tûn Hi Hun Lâwmawm Chu A Ni”
“Ngai teh u, tûn hi hun lâwmawm chu a ni a; ngai teh u, tûn hi chhandamna nî chu a ni.”—2 KOR. 6:2.
1. Engtik lai pawha kan thawh tûr hna pawimawh ber chu engvângin nge kan hriat a ngaih?
“ENGKIM tân hian hun ruat a awm a, vân hnuaia thiltih zawng zawng tân hun remchâng a awm.” (Thur. 3:1) Solomona chuan lo neih lam emaw, zin vei vah lam emaw, sumdâwnna lam emaw, a nih loh leh mi dangte nêna inbiak pawhna lam a ni emaw, thil ṭha tih dâwn rêng rênga hun remchâng ṭha lai ber hriat a pawimawhzia a ziak a. Mahse, engtik lai pawha kan thawh tûr hna pawimawh ber hriat pawh a ngai bawk. Kawng danga sawi chuan, thil ngaih pawimawh hmasak tûr dik tak kan nei tûr tihna a ni.
2. Isua’n thu a hrilh lai khân a hun neih dân a hre chiang tih engtin nge kan hriat theih?
2 Isua chuan leia a awm lai khân a hun neih dân leh a thil tih ngaite a hre chiang hle. A thil ngaih pawimawh tûrte a hre chiangin, hun rei tak chhûng an lo nghah tawh Messia chungchâng hrilh lâwknate thlen famkim hun a lo thleng tawh tih a hria a ni. (1 Pet. 1:11; Thup. 19:10) Thutiam Messia a nihzia mite’n an hriat fiah theih nân hnathawh tûr a nei a. Lalram thutak chipchiar taka a hriattîr leh chu Lalrama a roluahpuitu tûrte a lâk khâwm chu a ngai a ni. Tin, kâwlkil thlenga thu hrilh leh zirtîr siam rawngbâwl hna thawktu tûr Kristian kohhran a din pawh a ngai bawk.—Mk. 1:15.
3. Hun neih dân a hriatna chuan Isua thiltih chu engtin nge a thunun?
3 Chu a thil hriat chuan Isua chu a Pa duhzâwng ṭhahnemngai taka thawk tûrin a chêttîr a. A zirtîrte hnênah chuan: “Buh seng tûr a tam hle a, nimahsela a thawktute an tlêm; chutichuan a buh seng tûra thawktu tûrte tîr tûrin buh Neitupa hnênah chuan ngên rawh u,” tiin a hrilh a ni. (Lk. 10:2; Mal. 4:5, 6) Isua chuan zirtîr 12 a thlang phawt a, chutah a zirtîrte zîng aṭanga 70 thlang lehin kaihhruaina chiang tak a pe a, thuchah phûrawm tak: “Vân ram chu a lo hnai ta,” tih chu hril tûrin a tîr chhuak a. Ama chungchângah chuan: “Isuan a zirtîr sâwm leh pahnihte chu thu a pêk zawh veleh chuta ṭang chuan an khuaah zirtîr leh thuhril tûrin a kal ta a,” tiin kan chhiar a ni.—Mt. 10:5-7; 11:1; Lk. 10:1.
4. Eng kawngin nge Paula chu Isua Krista zirtu a nih?
4 Isua chu ṭhahnemngaihna leh inpêkna kawngah a hnungzuitu zawng zawngte tân entawn tûr ṭha famkim a ni a. Chu tak mai chu a ni, tirhkoh Paula’n a unaute: “Mi zirtute ni rawh u, kei pawh Krista zirtu ka ni ang bawk hian,” tia a fuih laia a sawi chu. (1 Kor. 11:1) Eng kawngin nge Paula chu Krista zirtu a nih? A nih dân ber chu, chanchin ṭha hrilhna kawnga theih tâwp a chhuah hi a ni. Kohhranho hnêna Paula lehkha thawnah chuan “taihmâk kawngah chuan thatchhe suh ula,” tih te, “Lalpa rawng bâwl ula,” tih te, “Lalpa hna ṭhahnemngai taka thawk fovin awm ula,” tih te, leh “in tih apiang chu . . . Lalpa tân anga ti zâwkin, châk takin ti rawh u,” tih ṭawngkamte hi kan hmu a ni. (Rom 12:11; 1 Kor. 15:58; Kol. 3:23, 24) Paula chuan Damaska kawnga Lalpa Isua Krista a tawh ṭum leh zirtîr Anania kal tlanga Krista’n a hnêna a sawi: “Jentailte, lalte, Israela thlahte hnêna ka hming put luh nâna ka bêl ruat a ni,” tih chu a theihnghilh ngai lo.—Tirh. 9:15; Rom 1:1, 5; Gal. 1:16.
“Hun Lâwmawm Chu”
5. Paula chu ṭhahnemngai taka rawngbâwl tûrin engin nge chêttîr?
5 Tirhkohte bu kan chhiar chuan, rawngbâwlnaa Paula huaisenzia leh ṭhahnemngaihzia chu hmuh hmaih theih a ni lo. (Tirh. 13:9, 10; 17:16, 17; 18:5) Paula chuan hun pawimawh takah a awm tih a hre chiang hle a. Heti hian a sawi a ni: “Ngai teh u, tûn hi hun lâwmawm chu a ni a; ngai teh u, tûn hi chhandamna nî chu a ni,” tiin. (2 Kor. 6:2) B.C.E. 537 kum kha Babulon sal tângte tân chuan an rama kîr lehna hun lâwmawm a ni a. (Is. 49:8, 9) Mahse, heta Paula sawi hun lâwmawm hi eng nge ni? A chung leh hnuaia thute chuan hre thiam tûrin min ṭanpui a ni.
6, 7. Tûn laia hriak thih Kristiante hnênah eng chawimawina nge pêk a nih a, tute’n nge hriak thihte chu thawhpui?
6 A hma lama a lehkha thawn ziakah Paula chuan amah leh a unau hriak thihte hnêna pêk chawimawina ropui tak chungchâng a sawi a. (2 Korinth 5:18-20 chhiar rawh.) Chutah chuan, Pathianin anni chu thil engemaw bîk, “inremna rawngbâwl hna” thawk tûr leh mite chu “Pathian nên lo inrem rawh u,” tia ngên chiam tûra koh an nih thu a hrilhfiah a ni. Chu chu Pathian nêna inṭhianna siam ṭha leh tûra ngenna a ni.
7 Eden huana helna a chhuah aṭang khân mi zawng zawng chu Pathian lak ata an inmihran a. (Rom 3:10, 23) Chu inmihranna chuan mi nâwlpuite chu thlarau lam thim hnuaiah a dah a, hrehawm tawrhna leh thihnaah a hruai a ni. Paula chuan: “Thil siam zawng zawngte chu tûn thlengin rûm leh nauvei na tuarin an awm hlawm tih kan hre si a,” tiin a ziak a. (Rom 8:22) Mahse, Pathian chuan mite chu lo kîr leh tûr, a nih loh leh amah nêna inrem leh tûra fuih tûr emaw, “ngên chiam” tûr emawin hma a la tawh a. Chu tak chu a ni, Paula leh hriak thih Kristian a unaute hnêna kawltîr rawngbâwlna chu ni. Chu “hun lâwmawm” chu Isuaa rinna neitute tân chuan “chhandamna nî” a ni thei a. Hriak thih Kristian zawng zawngte leh an thawhpui an ṭhian, “berâm dang” te chuan chu “hun lâwmawm” chu hlâwkpui tûrin mite an sâwm zêl a ni.—Joh. 10:16.
8. Engin nge inrem leh tûra ngenna chu chhinchhiah tlâk tak nihtîr?
8 Inrem leh tûra ngenna a chhinchhiah tlâk lehzual chhan chu inmihranna chu lehlam aṭang chauhva—Eden huana mihring helna aṭanga—lo inṭan mah ni se, chu dinhmun siam ṭha leh tûra Pathianin hma a la hi a ni. (1 Joh. 4:10, 19) Engtin nge hma a lâk? Paula chuan: “Pathianin Kristaah chuan khawvêl hi amah nên inremin a siama an bawhchhiatnate chu bawhchhiatnaa ruatsak lovin, inremna thu min kawltîr kha” tiin a chhâng a ni.—2 Kor. 5:19; Is. 55:6.
9. Paula chuan Pathian lainatna a ngaihhlutzia lantîr nân eng nge a tih?
9 Pathian Jehova chuan tlanna inthâwina ruahmanin, chuta rinna lantîrtute chu an bawhchhiatnate ngaihdamna leh amah nêna inṭhian leh emaw, inrem leh emaw theihna kawng a hawng a. Chu bâkah, hmun tina mite chu a tlai hmaa amah nêna inrem leh tûra ngên tûrin a palaite a tîr bawk. (1 Timothea 2:3-6 chhiar rawh.) Pathian duhzâwng a hriat thiam a, hun pawimawh takah a awm tih a hriat bawk avângin, Paula chu ‘inremna rawngbâwl hnaah’ a inhmang zo ṭhak a ni. Tûnah pawh Pathian duhzâwng chu a la inthlâk chuang lo. Amah nêna mite an lo inrem chu a la duh reng a. Paula thusawi “tûn hi hun lâwmawm chu a ni,” tih leh “tûn hi chhandamna nî chu a ni” tih hi a la dik reng a ni. Pathian Jehova chu lainatnaa khat leh mi khawngaih thei tak a va ni êm!—Ex. 34:6, 7.
‘Sâwtpui Lovin’ Awm Suh
10. Hmân lai leh tûn laia hriak thih Kristiante tân “chhandamna nî” chuan eng awmzia nge a neih?
10 He khawngaihna lantîrna sâwtpui hmasatute chu ‘Kristaa awmte’ an ni a. (2 Kor. 5:17, 18) An tân chuan “chhandamna nî” chu C.E. 33 Pentikost nî khân a inṭan a ni. Chuta ṭang chuan, anni chu “inremna thu” puang chhuak tûra mawhphurhna pêk an ni. Tûn laiah hian, hriak thih Kristian a la bângte chuan “inremna rawngbâwl hna” chu an la thawk zêl a. Anni chuan tirhkoh Johana’n inlârnaa a hmuh vântirhkoh palite’n “khawmualah . . . thli rêng a tleh loh nân, lei thli pali chu chelhin” an awm tih an hria a. Chuvângin “chhandamna nî” leh “hun lâwmawm” a la ni reng a ni. (Thup. 7:1-3) He mi avâng hian, hriak thih a la bângte chuan kum zabi 20-na inṭan dâwn lamah “inremna rawngbâwl hna” chu kâwlkil tâwp thlengin taima takin an thawk a ni.
11, 12. Engtin nge kum zabi 20-na ṭan tirh vêla awm hriak thih Kristiante chuan hun pawimawh takah an awm tih an hriat chianzia an lantîr? (Milem en rawh.)
11 Entîr nân, Jehovah’s Witnesses—Proclaimers of God’s Kingdom lehkhabu-in a sawi angin, kum zabi 20-na inṭan tirhah, “C.T. Russell-a leh a ṭhiante chuan buh seng hunah an awm tih leh mite’n tizalêntu thutak an hriat a ngai tih chu an ring nghet tlat a.” Eng nge an tih tâk? Buh seng hun, “hun lâwmawm” takah an awm tih an hriat avângin, hêng unaute hian mite inkhâwma sâwm mai chu an duh tâwk lo. Kristianna rama sakhaw hruaitute chuan hun rei tak chhûng chutiang chuan an lo ti tawh a. Chu an tih dân zui ai chuan, chûng hriak thih Kristiante chuan chanchin ṭha theh darh dân kawng dang an dap ta zâwk a. Thil dang tam tak an hman bâkah, an rawngbâwlna tihzauh nân tûn lai thiamna tharte chu ṭha takin an hmang a ni.
12 Chûng mi tlêm tê ṭhahnemngai taka rawngbâwltute chuan Lalram chanchin ṭha theh darh nân tract te, pamphlet te, magazine te, leh lehkhabu te an hmang a. Thusawi leh thuziak tam tak an buatsaihin, chanchinbu tam taka chhuah atân an sem chhuak a ni. Tin, ram chhûng leh ram pâwn radio-ah pawh thusawite an thawn chhuak bawk. Anni chuan movie industry-in mipui vântlâng tâna ṭawng hriat theih cinema a chhuah hma pawhin, a hranga aw thunsa nêna hman kawp theih tûr cinema chu siam chhuakin an lo hmang der tawh a. Chutianga ṭhahnemngai taka an thawh ṭâng ṭângna chuan eng nge a rah chhuah? Tûnah hian: “Pathian nên lo inrem rawh u,” tih thu puan chhuah chhâng lêta puang chhuak lehchhâwngtu maktaduai sarih chuang an awm a. Chûng Pathian Jehova chhiahhlawh hmasate chu an tlêmin, thil tawn nei lo mah se, ṭhahnemngaihna kawnga entawn tûr ṭha an ni tih a chiang hle.
13. Pathian thiltum eng nge kan ngaih pawimawh ang?
13 “Tûn hi hun lâwmawm chu a ni,” tia Paula thusawi hi tûnah pawh a la dik reng a. Keini Pathian Jehova khawngaihna dawngtute hian inrem lehna thuchah hriat leh pawm theihna hun ṭha pêk kan ni hi kan lâwm hle a ni. Inthlahdaha awm ai chuan Paula thusawi belh: “Pathian khawngaihna chu sâwtpui lova in hmuh lohna tûrin, amah thawhpuiin kan ngên chiam a che u,” tih hi kan ngai pawimawh zâwk a ni. (2 Kor. 6:1) Pathian khawngaihna thiltum chu ‘Kristaah chuan khawvêl hi amah nên inrema siam’ hi a ni.—2 Kor. 5:19.
14. Ram tam takah eng hun remchângte nge inhawng?
14 Setana’n an mit a tihdelsak he khawvêla mi a tam zâwkte hi Pathian lak ata la inmihran rengin, a khawngaihna thiltum chu an hre lo. (2 Kor. 4:3, 4; 1 Joh. 5:19) Mahse, khawvêl dinhmun chhe zêlte avângin mi tam tak chuan mihringte sual chhan leh hrehawm tawrh chhan hi Pathian laka inmihran vâng a ni tih hrilh hriat chu an pawm a. Tûn hmaa mi tam zâwkin kan thu hrilh rawngbâwlna an ngaihsak lohna ramahte pawh tûnah chuan mi tam takin chanchin ṭha an pawmin, Pathian nêna inrem leh tûrin hma an la mêk a ni. Chuti a nih chuan, tûn hi: “Pathian nên lo inrem rawh u,” tih ngenna ṭhahnemngai lehzuala tlângaupui hun a ni tih kan hre thiam em?
15. Ngaih ṭhatna neihtîr thei thute hrilh ai chuan, hmun tina mite’n eng thu nge an hriat kan duh?
15 Kan hna chu mite hnêna Pathian lam an hawi chuan ani’n an harsatnaah ṭanpuiin, an ṭhatpui ang tih hrilh mai hi a ni lo. Chu chu mi tam takte biak ina an inkhâwm chhan a ni a, kohhran lahin chutiang mite mamawh phuhrûksak chu a lo châk hle bawk nên. (2 Tim. 4:3, 4) Chu chu kan rawngbâwlnain a tum chu a ni lo. Kan chanchin ṭha hrilh chu Pathian Jehova’n a hmangaihna avângin Krista zârah kan sualte a ngaidam duh tih hi a ni a. Chutiang chuan, mite chu Pathian laka an inmihranna ata an lo inrem leh thei ta a ni. (Rom 5:10; 8:32) Mahse, “hun lâwmawm” chu a tâwp thuai dâwn.
“Thlarau Kawngah Chuan Ṭhahnemngai Ula”
16. Paula’n huaisenna leh ṭhahnemngaihna a neih chhan ber chu eng nge ni?
16 A nih leh, biakna dik atâna ṭhahnemngaihna chu engtin nge kan neih theih ang a, kan neih zêl theih ang? Ṭhenkhat chu mi zakzum leh ṭawng tlêm tak an ni thei a, rual pâwl leh mahni rilru vei zâwng lan chhuahtîr chu harsa an ti mai thei. Mahse, ṭhahnemngaihna chu rilru vei zâwng emaw, phûrna emaw lan chhuahtîrna mai a ni lo va; pianpui miziaa innghat lah a ni hek lo tih hriat reng a ṭha a ni. Paula chuan: “Thlarau kawngah chuan ṭhahnemngai ula,” tia a Kristian unaute a fuih khân, ṭhahnemngaihna neih theih dân leh neih reng theih dân a târ lang a ni. (Rom 12:11) Tirhkohvin thu hrilh rawngbâwlnaa huaisenna leh chhelna a neih chhan ber chu Pathian Jehova thlarau ṭanpuina vâng a ni a. Isua kohna a dawn aṭanga Rom khaw tân ina a thih thleng—kum 30 chuang chhûng—chuan Paula ṭhahnemngaihna chu a kiam ngai lo. Thlarau kal tlanga a mamawh chakna petu Pathianah a innghat tlat reng a ni. Ani chuan: “Mi tichaktuah chuan engkim ka ti thei,” a ti. (Phil. 4:13) A entawn tûr siam zui chu kan va hlâwkpui dâwn êm!
17. Engtin nge ‘thlarau kawnga ṭhahnem kan ngaih’ theih?
17 Rom 12:11-ah tirhkoh Paula chuan tui chhuan so anga “so bawrh bawrh” sawina Grik thu mal a hmang a. Tui chhuang so bawrh bawrh tûr chuan mei chu a alh reng a ngai a ni. Chutiang bawkin, ‘thlarau kawnga ṭhahnemngai’ tûr chuan Pathian thlarau kan dawn reng a ngai a. Chu mi kan dawn theih dân chu thlarau lama kan chak nâna Pathian Jehova min châwmna zawng zawng hman ṭangkai hi a ni. A awmzia chu chhûngkua leh kohhrana Pathian biakna ngaih pawimawh hi a ni a—mahni leh chhûngkuaa zirna neih ziah te, ṭawngṭai ziah te, leh Kristian unaute nêna inkhâwmho ziah te hi a ni. Chûngte chuan meiin tui a ‘tihso bawrh bawrh’ ang bawkin, ‘thlarau kawnga ṭhahnemngai’ reng tûrin min ṭanpui ang.—Tirhkohte 4:20; 18:25 chhiar rawh.
18. Kristian inpumpêk kan nih angin, eng thiltum nge kan ûm ngar ngar ang?
18 Mi inpumpêk tak chuan thiltum pakhat a ûm ngar ngar a, chu a thiltum tihhlawhtlin nâna a beihna kawngah a rilru a pêngin, a lunghnual mai ngai lo. Kristian inpumpêk kan nih angin, kan tum ber chu Isua anga Pathian Jehova’n ti tûra min duh apiang tih hi a ni. (Heb. 10:7) Tûn laia Pathian Jehova duhzâwng chu mi a tam thei ang ber amah nêna an inrem leh hi a ni a. Chuvângin, Isua leh Paula entawnin, tûn laia thawh atâna hna pawimawh ber, a ni, hna hmanhmawhthlâk ber chu ṭhahnemngai takin i thawk ang u. (w10-E 12/15)
Kan Hre Chhuak Em?
• Paula leh hriak thih Kristian dangte hnêna kawltîr “inremna rawngbâwl hna” chu eng nge ni?
• Engtin nge hriak thih a la bângte chuan “hun lâwmawm” chu an hman ṭangkai?
• Engtin nge Kristian rawngbâwltute chuan ‘thlarau kawnga ṭhahnem an ngaih’ theih?
[Zirlai Atâna Zawhnate]
[Phêk 20-naa milem]
Paula chuan Damaska kawnga Lalpa Isua Krista a tawh ṭum chu a theihnghilh ngai lo