“Kiõ Ien Emõn”
“Kiõ Ien Emõn”
“Lo, kiõ ien emõn; lo, kiõ ran in lomor.”—2 KOR. 6:2.
1. Etke jej aikwij kile men eo eaurõktata im jej aikwij kõmõne?
“EOR ien ñõn jabrewõt men, im eor ien ñõn lemnok otemjej iomin lõñ ko.” (Ekk. 3:1) Solomon ear jeje kin aurõkin ar kile ien eo emõntata kin jabrewõt men ko eor tokjeir ñõn ar kõtõbrõki, einwõt kallip, itoitak, kõmõn business ko, ak bwebwenato iben ro jet. Meñe eindrein, jej aikwij bareinwõt jela kin ta jerbal eo eaurõktata jej aikwij kõmõne jabrewõt ien. Melelen bwe jej aikwij jela ta eo raurõktata ilo mour eo ar.
2. Ke Jisõs ear ber ion lõl, ewi wãwen an kar kwalok an kile bwe ear mour ilo ien ko raurõk?
2 Ke Jisõs ear ber ion lõl, ear kile bwe ear mour ilo ien ko raurõk im ta eo ear aikwij kõmõne. Ear jela kin men ko raurõktata ilo mour eo an, bwe emottok ien eo ñõn an kajejit kitien kanan ko kin Messaia eo. (1 Pit. 1:11; Rev. 19:10) Eor jerbal ko ear aikwij kõmõni ñõn kalikar ñõn armij ro bwe e Messaia eo kar kalimur kake. Ear aikwij kwalok nan kin mol eo kin Ailiñ in Anij im ainitok ro im renaj iroij iben ilo Ailiñ in ilo ran ko rej berotok. Im ear aikwij ejaak berberin congregation eo me enaj kõmõne jerbal eo ñõn kwalok nan im kõmõn dri kalor ro iaolepen lõl.—Mark 1:15.
3. An kar Jisõs kile bwe ear mour ilo ien ko raurõk, ewi wãwen ear jelet kõmõn ko an?
3 Kin an kar Jisõs kile bwe ear mour ilo ien ko raurõk, men in ear lap an kamakõt e bwe en kijejeto in kõmõnmõn ankilan Jemen. Ear jiroñ dri kalor ro an: “Elap jonikõn, a reiet dri marmir: inem komin jar im kajitõk iben Iroij an jonikõn, bwe En jilkinlok ro dri marmir ilo An jonikõn.” (Luk 10:2; Mal. 4:5, 6, UBS) Jisõs ear moktata kãlet 12 inem tokelik 70 jen ibwiljin dri kalor ro an, im ear lelok ñõn ir nan in tel ko im jilkinlok ir ñõn air kwalok nan kin ennan eo ekairujruj: “Ailiñ in lõñ ebak.” Ikijen Jisõs, Baibel eo ej ba: “Ke emwij an Jisõs jiroñ joñoul im ruo dri kaloran, Ej ilok jen ijo bwe En katakin im kwalok ñõn armij ilo jikin kwelok ko air.”—Matu 10:5-7; 11:1; Luk 10:1.
4. Ilo wãwen it Paul ear kajeoñwe Jisõs Kraist?
4 Jisõs ear joñok eo emõntata kin kijejeto im tiljek ñõn aolep dri kalor ro an. Eñin men eo dri jilik Paul ear konono kake ke ear rejañ dri tõmak ro mõtõn: “Komin dri kajeoñwe ña, einwõt ña ij bareinwõt dri kajeoñwe Kraist.” (1 Kor. 11:1) Ilo wãwen it Paul ear kajeoñwe Kraist? Wãwen eo elaptata kar ilo an kate e joñõn wõt an maroñ ñõn kwalok nan kin nuuj eo emõn. Ilo letter ko an Paul ñõn congregation ko, jej lo nan ko einwõt “komin jab jowõn,” ‘komin jerbal ñõn Jeova,’ “komin kijejeto ien otemjej ilo ami jerbal ñõn Iroij,” im “jabrewõt men eo komij kõmõne, komin kõmõne kin buru, einwõt ñõn Iroij.” (Rom 12:11; 1 Kor. 15:58, UBS; Kol. 3:23) Paul ear jab meloklok ien eo ear iion Iroij Jisõs Kraist ilo ial eo an lok ñõn Damaskõs im nan ko an Jisõs me Anenaiõs ear jiroñ e kake: “E juõn Aõ jãbi eo Ij kãlet e, bwe en bõklok eta iman mejen dri ailiñ ko, im kiñ ro, im ro nejin Israel.”—Jerb. 9:15; Rom 1:1, 5; Gal. 1:16.
“Kiõ Ien Emõn”
5. Ta eo ear kamakõt Paul ñõn an kijejeto ilo jerbal in kwalok nan?
5 Ñe jej riit buk in Jerbal, jenaj kile kin beran im kijejeto eo an Paul ke ear kwalok nan. (Jerb. 13:9, 10; 17:16, 17; 18:5) Paul ear kile bwe ear mour ilo ran ko raurõk. Ear ba: “Lo, kiõ ien emõn; lo, kiõ ran in lomor.” (2 Kor. 6:2) Ilo yiõ eo 537 mokta jen an kar Jisõs itok ñõn lõl, ear ien eo emõn ñõn an dri jebokwe ro ilo Babilõn jeblak ñõn kabijukneir. (Ais. 49:8, 9) Bõtab, Paul ear jitõñlok ñõn ta ke ear ba nan kein? Eon ko ibelakin nan ko an rej jibõñ kij ñõn jela kin ta eo ear lemnok kake.
6, 7. Ta jerammõn eo elap kar lelok ñõn Kristian dri kabit ro ranin, im wõn ro jet rej jerbal iben dri kabit ro?
6 Moktalok ilo letter eo an Paul, ear konono kin juõn jerammõn elap kar lelok ñõn e im Kristian dri kabit ro mõtõn. (Riit 2 Dri Korint 5:18-20, UBS.) Ear kemelele bwe Anij ear jitõñ ir ñõn juõn jerbal, eo im ej ñõn “kõmmõn bwe ro jet ren bareinwõt erom jeran” Anij. Men in ear melelen bwe ren bar jeblak im ejaak juõn jimjera emõn iben Anij.
7 Armij ro rar jino jenolok jen Jeova jen ien eo ear walok jumae eo ilo jikin kallip in Iden. (Rom 3:10, 23) Men in ear kõmõn bwe armij ro ren jaje kin Jeova im karõk ko an im tellok ir ñõn iñtan im mij. Paul ear je: “Je jela bwe aolepen men in kõmõn e mat im ñõr, im mat im iñtan ñõn ien in.” (Rom 8:22) Bõtab, Anij ear bõk buñten ne ko ñõn an rejañ ak “akwelab” ñõn armij ro bwe ren jeblak ñõn e ak bwe ren erom ro jeran. Eñin ej jerbal eo kar lelok ñõn Paul im Kristian dri kabit ro mõtõn ilo ien eo. ‘Ien in emõn’ emaroñ juõn “ran in lomor” ñõn aolep armij ro im rej tõmak ilo Jisõs. Aolep Kristian dri kabit ro im “s̃ip” ro jet mõtair, rej wõnmanlok wõt ilo air kir armij ro bwe ren bõk tokjen jen ‘ien in emõn’ ñõn air erom ro jeran Anij.—Jon 10:16.
8. Etke ejejuan nan in kir eo ñõn an armij ro jeblak ñõn Anij?
8 Men eo ejejuan kin nan in kir eo ñõn an armij ro jeblak ñõn Anij, ej bwe meñe armij ro rar kokkure kõtan eo air iben Anij kin kar jumae eo ear walok ilo jikin kallip in Iden, ak Anij mõke ear bõk buñten ne eo moktata ñõn kajime jorran in ear walok. (1 Jon 4:10, 19) Ta eo ear kõmõne? Paul ear uak im ba: “Anij ear kõmmõn bwe armij otemjej ren maroñ erom jeran kin Christ. Anij ear jab watõk im kõmmõn ekkar ñõn jerawiwi ko air, ak ear letok ñõn kim nan eo kin wãwen an kõmmõn bwe armij ren erom jeran.”—2 Kor. 5:19, UBS; Ais. 55:6.
9. Ewi wãwen Paul ear kwalok an kamolol kin tiriamokake eo an Anij?
9 Ilo an kar letok binmour eo, Jeova ear kõmõn bwe ro im rej jerbale tõmak eo air ren maroñ bõk jeorlok bwir kin jerawiwi ko air im bwe ren maroñ bõk juõn jimjera emõn iben. Bareinwõt, ear jilkinlok dri jerbal ro an im rej jutõk kin e bwe ren rejañ armij ro ilo jikin ko otemjej ñõn air kõmõn ainemõn iben ke ej or wõt ien. (Riit 1 Timote 2:3-6.) Kin an melele kin ankilan Anij im kile bwe ej mour ilo ran ko raurõk, Paul ear kate e joñõn wõt an maroñ ñõn “kõmmõn bwe ro jet ren bareinwõt erom jeran” Anij. Kõnan eo an Jeova ejañin oktõk. Ranin, Jeova ej kõnan wõt bwe armij ro ren oktõk im bõk juõn jimjera emõn iben. Nan ko an Paul bwe “kiõ ien emõn”im “kiõ ran in lomor” rej bar jerbal ilo ran kein. Emol, Jeova ej juõn Anij elap an tiriamokake im joij!—Ex. 34:6, 7.
Jab ‘Kajitokjen Ami Bõk Joij an Anij’
10. “Ran in lomor” eo ear melelen ta ñõn Kristian dri kabit ro ilo ien ko etto im ranin?
10 Ro moktata im rar bõk tokjen jen ien eo ebellok ñõn air erom jeran Anij kar ro im rar “koba ibben Christ.” (2 Kor. 5:17, 18, UBS) Ñõn rein, “ran in lomor” eo ear ijjino ilo ran in Pentekost eo ilo yiõ eo 33. Jen ien in, kar lelok ñõn rein jerbal eo ñõn kwalok “nan eo kin wãwen an kõmmõn bwe armij ren erom jeran” Anij. Ranin, bween Kristian dri kabit ro rej wõnmanlok wõt ilo air “kõmmõn bwe ro jet ren bareinwõt erom jeran” Anij. Rej kile bwe enjel ro emen ilo vis̃õn eo dri jilik Jon ear loe, rej “drebij emen kõto ko an lõl, bwe kõto en jab ukwi ion ene.” Kin men in, ranin ej bareinwõt “ran in lomor” im “ien emõn.” (Rev. 7:1-3) Kin un in, jen enañin jibuki yiõ ko remotlok, bween Kristian dri kabit ro rar kijejeto ilo air kõmõne jerbal eo ñõn “kõmmõn bwe ro jet ren bareinwõt erom jeran” Anij im rej kõmõne jerbal in iaolepen lõl.
11, 12. Ilo enañin jibuki yiõ ko remotlok, ewi wãwen dri Kristian dri kabit ro rar kile bwe rar mour ilo ien ko raurõk? (Lale pija eo ilo peij 15.)
11 Ñõn wanjoñok, einwõt kar kwalok ilo buk eo Dri Kennan ro an Jeova—Dri Keañ ro kin Ailiñ Eo, * enañin jibuki yiõ ko remotlok, “C. T. Russell im ro mõtõn rar lukkun tõmak bwe rar mour ilo ien jonikõn eo im bwe armij ro rar aikwij roñ kin mol eo.” Kin men in, ta eo rar kõmõne? Ilo air kile bwe rar mour ilo ien jonikõn eo me ej juõn “ien emõn,” rein rar jab baj kõnan kir wõt armij ro ñõn ien kabuñ ko air. Eñin men eo eto an dri tel in kabuñ ko me rej ba rej Kristian kõmõne. Ilo okõtõn men in, dri kabit ro rar jino bukot wãwen ko jet rekeie ñõn kajededlok nuuj eo emõn. Juõn ian wãwen ko rar loe kar ñõn air kortokjen kein jerbal ko rekãltata, einwõt computer ko im men ko jet, ñõn air kowõnmanlok jerbal eo air.
12 Ñõn air kajededlok nuuj eo emõn kin Ailiñ eo, juõn kumi edrik in dri kwalok ro rekijejeto rar jino kajerbal tract ko, booklet ko, magazine ko, im buk ko. Rar bareinwõt je katak ko im jilkinlok bwe ren likit ilo elõñ tausan nuuj peba ko. Bareinwõt, ilo elõñ ailiñ ko, rar kwalok katak ko jen Baibel eo ikijen air kajerbal radio ko. Rar kõmõn im kajerbal pija in aluij ko me eor ainiken armij ro im kajõñjõñ ko, meñe ilo ien eo business ko rejañin kar kõmõn pija in aluij rõt kein. Ta tokjen eo ear walok kin kijejeto eo air? Ranin, elõñlok jen jiljilimjuõn million armij ro rej mõnõnõ in kobalok im bõk kwonair ñõn air keañ kin ennan in: “Komin kõtlok bwe Anij en ukõt kom jen ami kijdrate ñõn ami ro jeran!” Emol, dri korijer rein an Jeova rej joñok eo emõn kin kijejeto meñe ear or joñõn maroñ im men ko ibeir.
13. Ta karõk eo an Anij jej aikwij bõk ñõn buruer?
13 Nan ko an Paul bwe “kiõ ien emõn” ej jerbal wõt ñõn ranin. Einwõt ro im emwij air bõk joij eo elap an Anij, jej lukkun kamolol bwe kar letok ñõn kij ien in ebellok ñõn ar mõnõnõ in eoroñ ennan eo ñõn jeblak ñõn Anij. Jen ar baj juburu wõt kin men ko jej roñjaki, jej aikwij bõk ñõn buruer nan kein an Paul: “[Kim] akwelap ñõn kom bwe en jab jitokjen ami bõk joij an Anij.” (2 Kor. 6:1) Karõk eo an Anij ej bwe “armij otemjej ren maroñ erom jeran” ikijen Kraist.—2 Kor. 5:19, UBS.
14. Ta ien ko rebellok ilo elõñ jikin ko?
14 Enañin aolep armij ro im Setan ej kabiloik ir, rej jenolok wõt jen Anij im rejjab jela kin karõk eo an. (2 Kor. 4:3, 4; 1 Jon 5:19) Bõtab, an nanalok wãwen ko ilo lõl in ear kõmõn bwe elõñ ren emakõt ñõn ennan eo ke kar kwalok ñõn ir bwe jenolok jen Anij ej unjen an armij ro nana im iñtan. Ilo jikin ko me enañin aolep armij ro rar jab itoklimo kin jerbal in kwalok nan eo ar, elõñ kiõ rej mõnõnõ in eoroñ nuuj eo emõn im bõk buñten ne ko ñõn air jeblak ñõn Anij. Inem, jej ke kile bwe kiõ ej ien eo ñõn ar kalaplok ar kijejeto in rejañ armij ro: “Komin kõtlok bwe Anij en ukõt kom jen ami kijdrate ñõn ami ro jeran”?
15. Jen ar baj kwalok wõt kin juõn ennan me enaj kamõnõnõ armij ro, ta eo jej kõnan bwe armij ro ilo jikin ko otemjej ren jela kake?
15 Jerbal eo ar ejjab ñõn ar baj jiroñ armij ro bwe elañe rej reilok ñõn Anij, enaj jibõñ ir kin aolep abañ ko air im enaj emõnlok wãwen air mour. Eñin men eo elõñ rej kõnan ñe rej etal ñõn imõn jar ko, im kabuñ kein rej mõnõnõ in kajejit kõnan in an armij ro bwe ren maroñ kareel ir ñõn kabuñ ko air. (2 Tim. 4:3, 4) Ejjab mejenkajik eo ar in kin jerbal in kwalok nan. Nuuj eo emõn jej kwalok nan kake ej bwe ilo yokwe, Jeova ej mõnõnõ in jeorlok jerawiwi ko an armij ro ikijen Kraist. Kin men in, kajjojo armij ro remaroñ erom ro jeran Anij. (Rom 5:10; 8:32) Bõtab, mõtõn jidrik enaj jemlok ‘ien in emõn.’
Kajur eo an Anij En Kõmõn Bwe “Komin Bõplolin”
16. Ta eo ear lap an jibõñ Paul ñõn kwalok beran im kijejeto?
16 Inem, ewi wãwen jemaroñ kadrek im drebij wõt ar kijejeto kin kabuñ eo emol? Jet remaroñ ejokok ak ejelok air nan im emaroñ bin ñõn air kwalok kin iñjake ko air ak kõmao iben ro jet. Bõtab, jej aikwij kememej bwe an juõn kijejeto ejjab wawa ion an kwalok iñjake ko an, an mõnõnõ, im ejjab wawa ion karkar ko karkarin. Paul ear kwalok kin wãwen eo juõn emaroñ kadrek im drebij wõt an kijejeto ke ear ba ñõn dri Kristian ro mõtõn bwe rej aikwij kõtlok bwe kajur eo an Anij en kõmõn bwe ren ‘bõplolir.’ (Rom 12:11) Kajur eo an Jeova ear lap an kar jibõñ dri jilik Paul bwe en beran im kijenmij wõt ilo jerbal in kwalok nan eo. Iomin elõñlok jen 30 yiõ ko, jen ien eo Jisõs ear kir Paul ñõn ien eo eliktata in an ber ilo kalbuj im kar mõn e ilo Rom, kijejeto eo an Paul ear jab driklok. Ien otemjej ear reilok ñõn Anij kin jibõñ, im ear kakajur Paul ikijen kajur eo An. Ear ba: “I maroñ in kõmõn men otemjej ilo Eo ej kakajur iõ.” (Pil. 4:13) Jemaroñ bõk elap tokjen ñe jej katak jen joñok in an Paul!
17. Ewi wãwen jemaroñ kõtlok bwe kajur eo an Anij en kõmõn bwe jen ‘bõplolid’?
17 Nan eo jinoin kar ukot “bõplolin” jene ej lukkun melelen “bulullul.” Ñõn kõmõn bwe en bulullul wõt dren eo, jej aikwij kõmõn bwe en urur wõt kijeek eo. Eindrein, ñõn kõmõn bwe jen ‘bõplolid,’ jej aikwij wõnmanlok wõt im bõk jibõñ jen kajur eo an Anij. Wãwen eo jemaroñ bõk jibõñ in ej ilo ar kortokjen aolep menin letok ko Jeova ej litok ñõn kakajurlok kõtan eo ar iben. Men in ej melelen bwe jej aikwij kaurõk ien kabuñ eo an baamle eo ar im an congregation eo ilo ar keini ar jar, katak iber mõke im iben baamle eo, im keini ar ber ilo ien kwelok ko iben dri Kristian ro mõtar. Men in enaj ilo kõkkar jibõñ kij bwe en or iber “kijeek” eo ñõn kõmõn bwe kijejeto eo ar en “bulullul” bwe jen maroñ drebij wõt ar ‘bõplolid.’—Riit Jerbal 4:20; 18:25.
18. Einwõt dri Kristian ro, ta mejenkajik eo jej aikwij lemnok wõt in kõmõne?
18 Eo im emwij an wujleplok an mour ej juõn eo ej lemnok wõt kin juõn mejenkajik im ejjab mõkõj an mad ak ebwer jen an jibarek mejenkajik in. Einwõt dri Kristian ro, mejenkajik eo ar ej ñõn ar kõmõni aolep men ko Jeova ekõnan bwe jen kõmõni, einwõt kar Jisõs. (Hib. 10:7) Ranin, ej ankilan Jeova bwe aolep armij ro ren erom ro jeran. Kin men in, jen kajeoñwe Jisõs im Paul ilo ar kijejeto in kõmõne jerbal in eaurõk im ej menin ekaiuriur ñõn ar kõmõne ranin.
[Footnotes]
^ Ejelok ilo kajin Majõl.
Kwoj Kememej Ke?
• Ta jerbal eo kar lelok ñõn Paul im Kristian dri kabit ro jet mõtõn?
• Ewi wãwen an kar bween Kristian dri kabit ro kortokjen “ien [eo] emõn”?
• Ewi wãwen Kristian dri kwalok ro remaroñ kõtlok bwe kajur eo an Anij en kõmõn bwe ren ‘bõplolir’?
[Study Questions]
[Caption on page 12]
Paul ear jab meloklok ien eo ear iion Iroij Jisõs Kraist