“Masã yaa bark wakate”
“Masã yaa bark wakate”
“Gese, masã yaa bark wakate. Gese, masã yaa fãagr daare.”—2 KOR. 6:2.
1. Bõe yĩng tɩ tar yõod tɩ sasa buud fãa bɩ d bãngd bũmb nins d sẽn segd n lʋɩɩs taoorã?
RĨM A SALOMO ra yeela woto: “Bũmb fãa tara a wakate. Bũmb nins fãa sẽn maand dũniyã zugã tara b wakate.” (Koɛ. 3:1) A Salomo gom-kãensã wilgdame tɩ tʋʋm-tɩrg fãa tara wakat sẽn zems ne-a. Wala makre, koobo, so-toaka, leebgo, la baa yẽsg meng tara a wakate. La baasgo, sasa buud fãa, segdame tɩ d bao n bãng tʋʋmd ning sẽn tar yõod n yɩɩdã, la a zems ne wakatã. Woto rat n yeelame tɩ d segd n bãngda bũmb nins d sẽn tog n lʋɩɩs taoorã vẽenega.
2. Bõe n kɩt tɩ d tõe n yeel t’a Zezi sẽn wa n moond koɛɛgã, a ra mii tʋʋmd ning sẽn da tar yõod la a zems ne wakat kãngã?
2 A Zezi sẽn wa n be tẽngã zugã, a ra mii tʋʋmd ning sẽn da tar yõod la a zems ne wakat kãngã. A sẽn da mi bũmb ning sẽn da segd n pak-a n yɩɩdã yĩnga, a ra miime tɩ wakat taame tɩ bãngr-goam nins sẽn gomd Mesi wã yell tɩ b ra sɩng n gũud b pidsgã wʋsg na n pidsi. (1 Pɩɛ. 1:11; Wil. 19:10) A ra segd n tʋma tʋʋm toɛy-toɛy tɩ kɩt tɩ nebã bãng vẽeneg tɩ yaa yẽ la Mesi ning b sẽn da pʋlem tɩ watame wã. A ra segd n sõnga zãma wã me tɩ b bãng Rĩungã sõma, la a bao neb nins sẽn na n wa naag-a n dɩ naamã. Sẽn paase, a ra segd n segla yɛlã tɩ b wa tõog n lugl kiris-neb tigingã sẽn na n moon koɛɛgã la b maan karen-biis dũniyã gill zugã.—Mark 1:15.
3. A Zezi sẽn da mi tʋʋmd ning sẽn zems ne a wakatã, kɩtame t’a maan bõe?
3 A Zezi sẽn da mi woto fãa wã yĩnga, kɩtame t’a ra maand a Ba wã raabã ne yẽesem. Daar a ye, a yeela a karen-biisã woto: “Tigsgã yaa wʋsgo, la tigisdbã yaa bilfu. Woto yĩnga, bɩ y kos tigsgã soab tɩ b tʋm tigisdb tɩ b kẽng b tigsgã.” (Luk 10:2; Mal. 3:23, 24) A Zezi yãka karen-biis 12 n kõ-b sagls takɩ, la a tʋm-b tɩ b tɩ moon koe-noogã. Rẽ poore, a wa n yãka bãmb 70 me n tʋme. A yeel-b lame tɩ b moon n wilg nebã tɩ “saasẽ soolem kolgame.” La bõe la yẽ mengã maan-yã? Biiblã yeela woto: ‘A sẽn wilg a karen-biis piig la a yiibã bõn-kãens n sɛ, a yii zĩ-kãng n kẽng n tɩ zãms nebã la a tɩ moon koe-noog bãmb tẽnsã pʋsẽ.’—Mat. 10:5-7; 11:1; Luk 10:1.
4. Wãn to la a Poll rɩk a Zezi Kirist togs-n-taare?
4 Tall yẽesem la f sak Wẽnnaam ne f sũur fãa wã wɛɛngẽ, a Zezi yaa mak-sõng sẽn ka to n kõ a karen-biisã fãa. Yaa rẽ yell la tʋm-tʋmd a Poll ra gomda, a sẽn wa n sagl a tẽed-n-taasã n yeel-b woto wã: “Bɩ yãmb yɩ mam togs-n-taas wa mam me sẽn yaa Kirist togs-n-taagã.” (1 Kor. 11:1) Wãn to la a Poll dɩk Kiristã togs-n-taare? Sẽn yɩɩd fãa, a maana a sẽn tõe tɛk koe-moonegã pʋgẽ. Lɛta nins a sẽn gʋls n tool tigims toor-toorã pʋsẽ, d yãta goam sẽn wilgd rẽnda. Wala makre, a sagla a tẽed-n-taasã woto: “Ra tʋm-y ne kʋɩɩng ye. Bɩ y wɩng n sak Zusoabã n maan bãmb tʋʋmd ne y sũyã fãa,” “wakat fãa bɩ y maan Zusoabã tʋʋmd wʋsgo,” “yãmb sẽn maand bũmb ninga fãa, bɩ y maan ne y sũyã fãa Zusoabã yĩnga.” (Rom 12:11; 1 Kor. 15:58; Kol. 3:23) A Poll pa tol n yĩm a sẽn seg Zusoab a Zezi Kirist Damas sorã zugã, la karen-biig a Ananias sẽn taas-a goam ninsã ye. A Zezi ra goma ne a Ananias a Poll yelle, la yaa vẽeneg t’a Ananias taasa a Poll gom-kãense. A Zezi ra yeel-a-la woto: “Yẽ yaa mam nin-tũusdg sẽn na n wilg neb sẽn ka zʋɩf buudu, la rĩm dãmba, la Israɛll yagensã mam yʋʋre.”—Tʋʋ. 9:15; Rom 1:1, 5; Gal. 1:16.
“Bark wakatã”
5. Bõe n kɩt t’a Poll tõog n moon koɛɛgã ne yẽesem?
5 D sã n karemd Tʋʋm sebrã, d yãta vẽeneg t’a Poll sɩd talla raood la yẽesem wʋsg koe-moonegã pʋgẽ. (Tʋʋ. 13:9, 10; 17:16, 17; 18:5) A ra mii tʋʋmd ning sẽn zems ne bãmb wakatã takɩ. Sɩd me, a yeela woto: “Gese, masã yaa bark wakate. Gese, masã yaa fãagr daare.” (2 Kor. 6:2) Yʋʋmd 537 sẽn deng a Zezi rogmã yɩɩ bark wakat n kõ zʋɩf rãmb nins sẽn da be yembd Babilonnã, bala yaa sasa kãng la b lebg n wa b ba-yirã. (Ezai 49:8, 9) La bõe la a Poll gomdã rat n yeele? A sẽn deng n gom bũmb nins yellã, n paas a sẽn yeel dẽ poorã sõngda tõnd tɩ d wʋm a gomdã võore.
6, 7. Tʋʋm-bʋg la b bobl kiris-neb nins sẽn paam vʋʋsem sõngã zaeebã, la rũndã-rũndã, ãnd dãmb n sõngd ne tʋʋmdã?
6 A Poll lɛtrã pʋgẽ, a goma zu-zẽkr yẽ ne a kiris-nin-taasã sẽn paam vʋʋsem sõngã zaeeb sẽn paam yelle. (Karm-y 2 Korẽnt dãmb 5:18-20.) A wilgame tɩ Wẽnnaam yãk-b lame n bobl-b “paasg tʋʋmde,” tɩ b segd n kos nebã tɩ b “sak Wẽnnaam paasgã,” rat n yeel tɩ b maneg b yell ne Wẽnnaam.
7 A Ãdem ne a Hawa kɩɩsgã tɛka, ninsaalbã fãa zãaga ne a Zeova. (Rom 3:10, 23) Woto kɩtame tɩ b fãa la bal pa mi Wẽnnaam la a raabã sõma, la kɩt me tɩ b namsdẽ la b kiidẽ. A Poll yeela woto: “Bõn-naandsã wẽeda siri, n namsd wa pag sẽn dat n dog tɩ ta masã.” (Rom 8:22) La Wẽnnaam maana yɛl toor-toor sẽn na yɩl n ‘kos’ nebã bɩ n sagl-b tɩ b lebg n wa a nengẽ, rat n yeel tɩ b maneg b yellã ne yẽ. Wakat kãng tɛkã, yaa tʋʋm-kãng la b bobl a Poll ne a kiris-nin-taasã sẽn paam vʋʋsem sõngã zaeebã. Wakat kãng sẽn yɩ “bark wakatã” sɩd yɩɩ “fãagr daar” n kõ neb nins sẽn tall tẽeb ne a Zezi wã. Kiris-neb nins sẽn paam vʋʋsem sõngã zaeebã, ne b tũud-n-taasã b sẽn boond tɩ “piis a taabã” sõngda taab n boond nebã tɩ b wa rɩ “bark wakatã” yõodo.—Zã 10:16.
8. Bõe n kɩt tɩ b sẽn boond nebã tɩ b wa maneg b yell ne Wẽnnaamã sɩd be yamleoogo?
8 Bũmb ning sẽn kɩt tɩ booll ning b sẽn taasd nebã n yetẽ tɩ b maneg b yell ne Wẽnnaamã be yamleoogã, yaa tɩ baa ne sẽn yaa ninsaalbã n yãk yam n kɩɩs Wẽnnaam Edɛn n zãag b mens ne-a wã, yaa Wẽnnaam meng n yɩ pipi n maan bũmb n na n maneg yellã. (1 Zã 4:10, 19) Bõe la Wẽnnaam maan-yã? A Poll yeela woto: “Yaa ne Kirist la Wẽnnaam yiis yell sẽn da be bãmb ne dũniyã sʋkã, n ka le geelgd bãmb beegrã ye, la bãmb basa paasg koɛɛgã ne tõndo.”—2 Kor. 5:19; Ezai 55:6.
9. Bõe la a Poll maan n wilg a mi-beoog ne Wẽnnaam a nimbãan-zoeerã yĩnga?
9 A Zeova sẽn kõ rondã, kɩtame tɩ neb nins fãa sẽn tẽed rondã tõe n paam b yel-wẽnã sugri, la b lebs n paam a zoodo. Sẽn paase, Wẽnnaam tʋma koe-moondb zĩig zãng tɩ b sagl nebã tɩ b wa maneg b yellã ne yẽ tɩ nan ket n tõeyã. (Karm-y 1 Tɩmote 2:3-6.) A Poll sẽn da mi Wẽnnaam daabã sẽn yaa a soabã, n paas a sẽn da mi tʋʋmd ning sẽn zems ne bãmb wakatã yĩnga, a tʋma “paasg tʋʋmdã” ne a sũur fãa n pa zoe yaams ye. Hal ne masã, a Zeova raabã pa toeem ye. A ket n boonda ãdem-biisã tɩ b wa maneg b yellã ne yẽnda. Rẽnd wa a Poll sẽn yeelã, rũndã-rũndã ket n yaa “bark wakat” la “fãagr daare.” Ad Wẽnnaam a Zeova nimbãan-zoeerã sɩd ka to ye!—Yik. 34:6, 7.
‘Ra bas-y bark ning y sẽn deeg Wẽnnaam nengẽ wã tɩ yɩ zaalem ye’
10. Pĩnd wẽndẽ la rũndã-rũndã, sẽn paam-b zaeebã sẽn mi tɩ b bee “fãagr daar” sasa wã, kɩtame tɩ b maand bõe?
10 Yaa neb nins sẽn na n wa tɩ naag Kiristã n dɩ naamã n yɩ pipi n maneg b yellã ne Wẽnnaam. (2 Kor. 5:17, 18, NW ) Nin-kãensã “fãagrã daar” sɩnga yʋʋmd 33 Pãntekotã sasa. Sẽn sɩng ne wakat kãnga, b bobl-b-la “paasg koɛɛg” b sẽn segd n moone. Rũndã-rũndã, sẽn paam-b vʋʋsem sõngã zaeeb n ket tẽngã zugã ket n tʋmda “paasg tʋʋmdã.” B miime tɩ malɛgs a naas nins b sẽn vẽneg tʋm-tʋmd a Zã t’a yã wã “yõka dũniyã sobd a naasã tɩ b ra wẽ dũniyã” ye. Rẽnd d ket n bee “fãagr daar” la “bark wakatã” sasa. (Wil. 7:1-3) Woto kɩtame tɩ yʋʋmd 1900 wã sẽnes tɛk n tãag masã, sẽn paam-b vʋʋsem sõngã zaeeb n ket tẽngã zugã tʋmda “paasg tʋʋmdã” ne yẽesem dũniyã ween-vɩɩsã fãa.
11, 12. Yʋʋmd 1900 wã sẽnese, wãn to la sẽn paam-b vʋʋsem sõngã zaeebã wilg tɩ b mii bũmb ning sẽn da zems ne b wakatã? (Ges-y fotã sẽn be sebrã neng 23)
11 Wala makre, les Témoins de Jéhovah : Prédicateurs du Royaume de Dieu sebrã wilgame tɩ yʋʋmd 1900 soabã loogr poor bilfu, rẽ t’a “Charles Russell ne a tʋmd-n-taasã kɩsa sɩd tɩ b vɩya tigsg wakate, la tɩ yaa tɩlae tɩ nebã wʋm fãagr koɛɛgã.” Rẽ kɩtame tɩ b maan bõe? Saam-bi-kãensã sẽn bãng tɩ b bee tigsg wakat sẽn yaa “bark wakatã” yĩnga, b pa tek boond nebã tɩ b wat b tigissẽ wã bal wa kiris-neb ne yʋʋrã taoor dãmb sẽn sɩng n maandẽ wã ye. Nin-kãensã sẽn paam vʋʋsem sõng zaeebã baoome n na n bãng b sẽn tõe n maan to-to n moon koɛɛgã sõma n paase. Wala makre, b tʋma ne tʋʋm-teed nins bãngdbã sẽn yiisdã sõma, n kɩt tɩ koɛɛgã mooneg paam pãnga.
12 Sẽn na yɩl n tõog n moon Rĩungã koe-noogã zĩig zãnga, nin-kãensã sõor sẽn da pa waoog tɩ b yaool n da tʋmd b tʋʋmdã ne yẽesmã sɩnga sɛb buud toor-toor yiisgu. B ra gʋlsda sõss buud toor-toor n kõt kiba-kɩtba, tɩ b yiisd zʋrno rãmb tusa pʋsẽ. Sẽn paase, b ra sõsda radio rãmbẽ, tɩ nebã tõe n kelg b sõssã dũniyã gill zugu. B maana filim buud sẽn da yaa imaaz rãmb sẽn yit n pʋgd taaba, la b rɩk goamã kasɛt zugu, tɩ imaaz rãmbã sã n yit bɩ yaa wa bãmb n gomde. La wakat kãng meng tɩ bãngdbã ra nan pa yiis filim sẽn naag ne goam ye. B sẽn tʋm ne yẽesem woto wã woma bi-bʋse? Rũndã-rũndã, na maan neb milyõ a yopoe n sak boollã, n naagd n moond koɛɛgã n sagend nebã tɩ b maneg b yellã ne Wẽnnaam. Hakɩka, a Zeova nin-kãensã kõo tõnd mak-sõng yẽesmã wɛɛngẽ, baa b sõorã la b bãngrã sẽn da paoodã.
13. Wẽnnaam daab bʋg yell la d pa segd n yĩmi?
13 Masã ket n yaa “bark wakat” wa a Poll sẽn yeelã. Tõnd sẽn paam t’a Zeova zoe d nimbãanegã, d sũy yaa noogo, bala kɩtame tɩ d paam n wʋm paasg koɛɛgã la d sak-a. Wall tɩ d tagsdẽ masã tɩ d seka d mensã, d modgd n tũuda a Poll saglg ning sẽn pʋgdã ne d sũur fãa. A yeela woto: “Tõnd sẽn yaa Wẽnnaam tʋmd-n-taasã yĩnga, tõnd kota yãmb tɩ y ra bas bark ning yãmb sẽn deeg Wẽnnaam nengẽ wã tɩ yɩ zaalem ye.” (2 Kor. 6:1, Kãab-paalgã Koe-noogo) Wẽnnaam nimbãan-zoeerã sẽn kɩt t’a rat n maan bũmb ningã yaa ‘yiis yell ning sẽn da be yẽ ne dũniyã sʋkã,’ Kirist maasem yĩnga.—2 Kor. 5:19.
14. Tẽns wʋsg pʋsẽ, nebã manesem lebga wãn ne koɛɛgã?
14 A Sʋɩtãan luda neb wʋsg yam tɩ kɩt tɩ b pa mi Wẽnnaam la a nimbãan-zoeerã sẽn kɩt t’a rat n maan bũmb ningã ye. (2 Kor. 4:3, 4; 1 Zã 5:19) La yɛlã sẽn tar kengr dũniyã zugã kɩtame tɩ wʋsg sak n deeg tɩ yaa ãdem-biisã sẽn zãag b mens ne Wẽnnaamã n kɩt tɩ b lebg wẽns la b namsdẽ wã. Baa tẽns nins pʋsẽ nebã sẽn da pa kelgd koe-noogã, masã, neb wʋsg sakd n kelgdame la b maand modgr buud toor-toor sẽn na yɩl n maneg b yellã ne Wẽnnaam. Dẽnd d segd n sak n deegame tɩ yaa masã la d tog n nang pãng n moon koɛɛgã ne yẽesem, n sagl nebã tɩ b maneg b yellã ne Wẽnnaam.
15. Wall tɩ d yet nebã bal tɩ b sã n bao Wẽnnaam b na n paama sũ-noogã, d ratame tɩ b bãng bõe?
15 Tõnd tʋʋmdã pa tek togs nebã tɩ b sã n bao Wẽnnaam, a na n sõng-b lame tɩ b tõog n mao ne b zu-loeesã la b paam sũ-noog ye. Neb wʋsg sẽn kẽnd wẽnd-dotẽ wã, yaa goam a woto buud la b rat n wʋme, tɩ b taoor dãmbã tũnugd ne rẽ n belgd-ba. (2 Tɩm. 4:3, 4) Tõnd pa moond koɛɛgã ne yam-kãngã buud ye. D sẽn moond koe-noogã yaa sẽn na yɩl n sõng nebã tɩ b bãng t’a Zeova sẽn nong-bã yĩnga, a tʋll n kõ-b-la b yel-wẽnã sugr Kiristã maasem yĩnga. Woto kɩtdame tɩ ned kam fãa tõe n bãng Wẽnnaam la a maneg a yellã ne yẽ. (Rom 5:10; 8:32) La baasgo, “bark wakatã” kolgda saabo.
“Yɩ-y neb sẽn pid ne vʋʋsem sõngã”
16. Sẽn yɩɩd fãa, yaa bõe n sõng a Poll t’a tall yẽesem la raoodo?
16 Wãn to la d tõe n paam yẽesem Wẽnnaam tʋʋmdã pʋgẽ la d kell n tall yẽesem kãnga? Neb kẽer tõe n zoeta yãnd wall b pa tõe goama, tɩ kɩt tɩ yaa toog ne-b tɩ b sõs ne nebã. La baasgo, bãng-y tɩ pa ned sẽn tõe goam yĩng bal la b tõe n yeel t’a tara yẽesem ye. Yẽesmã paoong pa tũud ne f sẽn yaa ned ning buudã me ye. A Poll wilga bũmb ning sẽn kɩtd tɩ ned lebg yẽeseng la a tõog n kell n tall a yẽesmã. A sagla a tẽed-n-taasã woto: “Yɩ-y neb sẽn pid ne vʋʋsem sõngã.” (Rom 12:11, NW ) Dẽnd sẽn yɩɩd fãa, yaa a Zeova vʋʋsem sõngã n kɩt t’a Poll tall raood la a tõog toog a koe-moonegã pʋgẽ wã. Hal a Zezi sẽn yãk a Pollã tɛk n tãag a yaoolem bãens roog kõom Rommã sẽn tũ ne a yõorã, rat n yeel tɩ sẽn yɩɩd yʋʋm 30 wã fãa pʋgẽ, a yẽesmã pa tol n boog ye. A Poll da teega Wẽnnaam t’a kõt-a pãng ne a vʋʋsem sõngã maasem. A yeela woto: “Mam tõee fãa ne a soab ning sẽn kõt maam pãngã maasem.” (Fil. 4:13, NW ) Hakɩka, d sã n dɩk a Poll mak-sõngã, na n naf-d-la wʋsgo!
17. Bõe la d tõe n maan n “yɩ neb sẽn pid ne vʋʋsem sõngã”?
17 Gom-bil ning b sẽn lebg Rom dãmb 12:11 wã pʋgẽ tɩ “pid ne vʋʋsem sõngã” võor meng yaa “kaeebo.” (Kingdom Interlinear) Wala makre, d sã n dogl rʋk ne koom bugmẽ n dat tɩ ket n kaeeda, rẽnda d tusd bugmã. Woto me, yɩl n “yɩ neb sẽn pid ne vʋʋsem sõngã,” rẽnda d paamd Wẽnnaam vʋʋsem sõngã wakat fãa. Woto baoodame tɩ d rɩt bũmb nins fãa a Zeova sẽn maan n na n paasd d tẽebã pãngã yõodo. Wala makre, d segd n wɩngda ne d zak pʋgẽ zaabr Biibl zãmsgã la d kẽnd tigissã. D segd n modgdame me n zãmsd Biiblã d ye, la ne d zakã rãmba. D wɩngd ne pʋʋsgã, la d nong d saam-biisã tũud-n-taare. Woto, wa bugmã tusb sẽn na n kɩt tɩ koomã ket n kaeedã, tõnd me sã n maand bõn-kãensã n pa vaandẽ, na n kɩtame tɩ d “yɩ neb sẽn pid ne vʋʋsem sõngã.”—Karm-y Tʋʋm 4:20; 18:25.
18. D sẽn yaa kiris-nebã, tʋʋm-bʋg n segd n pak tõnd n yɩɩda?
18 Ned sẽn dɩk a meng n kõ Wẽnnaam tara bũmb takɩ a sẽn date, tɩ yaa bõn-kãng n pak-a n yɩɩd sẽn ketã fãa, t’a pa basdẽ tɩ bũmb baa a ye tiis-a wall koms a raood t’a bas a sẽn datã pʋg-b ye. Tõnd sẽn yaa kiris-nebã, wa a Zezi, d sẽn baood yaa maan bũmb ning fãa a Zeova sẽn dat tɩ d maane. (Heb. 10:7) Rũndã-rũndã, a Zeova ratame tɩ d sõng neb wʋsg tɩ b tõog n maneg b yellã ne yẽ. Woto yĩnga, bɩ d fãa modg n dɩk a Zezi ne a Poll togs-n-taare, n tʋmd tʋʋm-kãngã sẽn tar yõod n yɩɩd tʋʋmd buud fãa wã ne yẽesem.
Y tẽrame bɩ?
• Tʋʋm-bʋg la b bobl a Poll ne kiris-neb a taabã sẽn paam vʋʋsem sõng zaeebã?
• Bõe la sẽn paam-b zaeebã n ket tẽngã zugã maand n wilgdẽ tɩ “masã yaa bark wakate”?
• Bõe la kiris-nebã tõe n maan n “yɩ neb sẽn pid ne vʋʋsem sõngã”?
[Zãmsgã sogsgã]
[Foto, seb-neng 20]
A Poll pa tol n yĩm a sẽn da seg Zusoab a Zezi Kiristã ye