“Issa Speċjalment Hu ż-Żmien Aċċettabbli”
“Issa Speċjalment Hu ż-Żmien Aċċettabbli”
“Ara! Issa speċjalment hu ż-żmien aċċettabbli. Ara! Issa hu jum is-salvazzjoni.” —2 KOR. 6:2.
1. Għala jeħtieġ nagħrfu x’inhi l-iktar ħaġa importanti li għandna nagħmlu f’ħin speċifiku?
“GĦAL kollox hemm żmien stabbilit; iva, kull ħaġa taħt is-smewwiet għandha waqtha.” (Ekk. 3:1) Salamun kien qed jikteb dwar l-importanza li wieħed jagħraf l-iktar żmien favorevoli għal kwalunkwe biċċa xogħol taʼ siwi—sew jekk għandha x’taqsam mal-biedja, mal-ivvjaġġar, man-negozju, jew mal-komunikazzjoni m’oħrajn. Madankollu, jeħtieġ nagħrfu wkoll x’inhu l-iktar xogħol importanti li għandna nagħmlu f’ħin speċifiku. Fi kliem ieħor, irid ikollna ċar f’moħħna x’inhuma l-prijoritajiet tagħna.
2. Kif nafu li meta Ġesù kien qed jipprietka, hu kien konxju ferm taż-żmien li kien qed jgħix fih?
2 Meta kien fuq l-art, Ġesù kien konxju ferm taż-żmien li kien qed jgħix fih u taʼ x’kien jeħtieġ jagħmel. Minħabba li kellu ċar f’moħħu x’kienu l-prijoritajiet tiegħu, hu kien jaf li ż-żmien tant mistenni għat-twettiq taʼ ħafna profeziji Messjaniċi kien wasal. (1 Pt. 1:11; Riv. 19:10) Sabiex jiċċara l-identità tiegħu bħala l-Messija mwiegħed, hu kellu xogħol x’jagħmel. Hu kellu jagħti xhieda bir-reqqa tal-verità tas-Saltna u jiġbor lil dawk li fil-futur kellhom ikunu werrieta tas-Saltna bi sħab miegħu. Ukoll, hu kellu jħejji l-pedament għall-kongregazzjoni Kristjana li l-membri tagħha kellhom iwettqu l-ippritkar u x-xogħol taʼ li jagħmlu dixxipli sa truf l-art.—Mk. 1:15.
3. Il-fatt li Ġesù kien konxju taż-żmien, kif effettwa l-azzjonijiet tiegħu?
3 Minħabba li kien konxju taż-żmien, Ġesù ħassu tassew imqanqal biex ikun żeluż fit-twettiq tar-rieda taʼ Missieru. Hu qal lid-dixxipli tiegħu: “Tassew, il-ħsad hu kbir, imma l-ħaddiema ftit. Għalhekk, itolbu bil-ħrara lil Sid il-ħsad biex jibgħat ħaddiema għall-ħsad tiegħu.” (Lq. 10:2; Mal. 4:5, 6) Ġesù l-ewwel għażel 12 u mbagħad 70 minn fost id-dixxipli tiegħu, tahom istruzzjonijiet speċifiċi, u bagħathom jippritkaw dan il-messaġġ li jqanqal: “Qorbot is-saltna tas-smewwiet.” U dwar Ġesù nnifsu naqraw: “Meta temm jagħti l-istruzzjonijiet lit-tnax-il dixxiplu tiegħu, Ġesù telaq minn hemmhekk biex jgħallem u jippriedka fil-bliet tagħhom.”—Mt. 10:5-7; 11:1; Lq. 10:1.
4. Pawlu b’liema mod imita lil Ġesù Kristu?
4 Ġesù kien eżempju perfett taʼ żelu u devozzjoni għas-segwaċi kollha tiegħu. Għal dan irrefera l-appostlu Pawlu meta ħeġġeġ lil sħabu fit-twemmin: “Imitaw lili, bħalma jien nimita lil Kristu.” (1 Kor. 11:1) Pawlu b’liema mod imita lil Kristu? Primarjament billi għamel l-almu tiegħu fl-ippritkar tal-aħbar tajba. Fl-ittri li Pawlu kiteb lill-kongregazzjonijiet, insibu espressjonijiet bħal “titnikkrux f’xogħolkom,” “tjassru għal Ġeħova,” “dejjem ikollkom ħafna x’tagħmlu fix-xogħol tal-Mulej,” u “kulma tagħmlu, agħmluh b’ruħkom kollha qisu għal Ġeħova.” (Rum. 12:11; 1 Kor. 15:58; Kol. 3:23) Pawlu qatt ma nesa meta fi triqtu lejn Damasku ltaqaʼ mal-Mulej Ġesù Kristu, u lanqas ma nesa l-kliem taʼ Ġesù li żgur kien qallu d-dixxiplu Ananija: “Dan ir-raġel hu strument magħżul biex iwassal ismi quddiem il-ġnus kif ukoll quddiem slaten u wlied Israel.”—Atti 9:15; Rum. 1:1, 5; Gal. 1:16.
Iż-Żmien Speċjalment Aċċettabbli
5. X’qanqal lil Pawlu jwettaq il-ministeru tiegħu biż-żelu?
5 Meta naqraw il-ktieb tal-Atti, ma nistgħux ma ninnotawx il-kuraġġ u ż-żelu li wera Pawlu meta wettaq il-ministeru tiegħu. (Atti 13:9, 10; 17:16, 17; 18:5) Pawlu għaraf l-importanza taż-żmien li kien jgħix fih. Hu qal: “Ara! Issa speċjalment hu ż-żmien aċċettabbli. Ara! Issa hu jum is-salvazzjoni.” (2 Kor. 6:2) Lura fis-sena 537 Q.E.K., kien iż-żmien aċċettabbli biex l-eżiljati f’Babilonja jmorru lura lejn art twelidhom. (Is. 49:8, 9) Imma Pawlu għal xiex kien qed jirreferi hawnhekk? Il-kuntest jgħinna naraw x’kellu f’moħħu.
6, 7. Liema unur kbir ngħata lill-Kristjani midlukin fi żmienna, u min qed jaħdem spalla maʼ spalla mal-midlukin?
6 Iktar kmieni fl-ittra tiegħu, Pawlu tkellem dwar unur kbir li ngħata lilu u lil sħabu l-Kristjani midlukin. (Aqra t-2 Korintin 5:18-20.) Hu spjega li ġew imsejħin minn Alla għal skop speċifiku, sabiex iwettqu “l-ministeru tar-rikonċiljazzjoni,” biex jitolbu bil-ħniena lin-nies ħalli ‘jerġgħu jitħabbu m’Alla.’ Dan kien ifisser li jerġgħu jiksbu l-ħbiberija jew l-armonija m’Alla.
7 Mindu seħħet ir-ribelljoni fl-Għeden, l-umanità kollha tbiegħdet minn Ġeħova. (Rum. 3:10, 23) Dan tefaʼ lill-umanità inġenerali fi dlam spiritwali u wassal għal tbatija u mewt. Pawlu kiteb: “Aħna nafu li s’issa l-ħolqien kollu għadu jokrob u jħoss l-uġigħ flimkien.” (Rum. 8:22) Iżda Alla ħa passi biex iħeġġeġ, fil-fatt “jitlob bil-ħrara,” lin-nies ħalli jerġgħu lura, jew jerġgħu jitħabbu miegħu. Dan kien il-ministeru fdat f’idejn Pawlu u sħabu l-Kristjani midlukin lura f’dak iż-żmien. Dan “iż-żmien aċċettabbli” jistaʼ jkun “jum is-salvazzjoni” għal dawk li jpoġġu fidi f’Ġesù. Il-Kristjani midlukin kollha u sħabhom, in-“nagħaġ oħrajn,” li qed jaħdmu spalla maʼ spalla magħhom, ikomplu jistiednu lin-nies biex jibbenefikaw miż-“żmien aċċettabbli.”—Ġw. 10:16.
8. X’inhu li jagħmel l-istedina għar-rikonċiljazzjoni notevoli?
8 Dak li jagħmel l-istedina għar-rikonċiljazzjoni iktar u iktar notevoli hu li għalkemm it-tort kien biss min-naħa tal-bnedmin—kaġunat mir-ribelljoni tal-bniedem fl-Għeden—Alla nnifsu ħa l-inizjattiva biex jirranġa s-sitwazzjoni. (1 Ġw. 4:10, 19) Hu x’għamel? Pawlu wieġeb: “Permezz taʼ Kristu, Alla kien qed jerġaʼ jħabbeb lid-dinja miegħu, billi m’għaddilhomx nuqqasijiethom, u fada f’idejna l-kelma tar-rikonċiljazzjoni.”—2 Kor. 5:19; Is. 55:6.
9. Pawlu x’għamel biex juri l-apprezzament tiegħu għall-ħniena t’Alla?
9 Peress li pprovda s-sagrifiċċju tal-fidwa, Ġeħova għamilha possibbli għal dawk li jeżerċitaw il-fidi biex jinħafrulhom dnubiethom u jerġgħu jiksbu ħbiberija jew armonija miegħu. Iktar minn hekk, hu bagħat lir-rappreżentanti tiegħu biex iħeġġu lin-nies kullimkien ħalli jerġgħu jitħabbu miegħu waqt li għad għandhom iċ-ċans. (Aqra l-1 Timotju 2:3-6.) Minħabba li kien fehem x’inhi r-rieda t’Alla u minħabba li għaraf iż-żmien li kien qed jgħix fih, Pawlu ntefaʼ b’ruħu u b’ġismu fil-“ministeru tar-rikonċiljazzjoni.” Ir-rieda taʼ Ġeħova ma nbidlitx. Hu għadu qed jistenna lil dawk in-nies li tbiegħdu minnu biex jerġgħu jitħabbu miegħu. Kliem Pawlu, “issa speċjalment hu ż-żmien aċċettabbli” u “issa hu jum is-salvazzjoni” għadu japplika sal-ġurnata tal-lum. Alla Ġeħova tassew hu ħanin u jagħder!—Eżo. 34:6, 7.
Titlifx “l-Iskop Tagħha”
10. “Jum is-salvazzjoni” xi jfisser għall-Kristjani midlukin fil-passat u fil-preżent?
10 L-ewwel uħud li bbenefikaw minn din l-espressjoni taʼ qalb tajba mhix mistħoqqa kienu dawk “f’unjoni maʼ Kristu.” (2 Kor. 5:17, 18) Għalihom, “jum is-salvazzjoni” beda f’Pentekoste tas-sena 33 E.K. Minn dakinhar ’l hawn, dawn l-uħud ġew fdati bl-inkarigu li jipproklamaw “il-kelma tar-rikonċiljazzjoni.” Illum, il-fdal tal-Kristjani midlukin għadhom qed iwettqu “l-ministeru tar-rikonċiljazzjoni.” Huma jirrikonoxxu li l-erbaʼ anġli li ra l-appostlu Ġwanni f’viżjoni profetika qed “iżommu sew l-erbat irjieħ taʼ l-art, biex l-ebda riħ ma jonfoħ fuq l-art.” B’hekk, għadu “jum is-salvazzjoni” u ż-żmien speċjalment aċċettabbli. (Riv. 7:1-3) Huwa għalhekk li l-fdal tal-midlukin ilhom mill-bidu tas-seklu 20 iwettqu biż-żelu l-inkarigu tal-“ministeru tar-rikonċiljazzjoni” sa truf l-art.
11, 12. Il-Kristjani midlukin fil-bidu tas-seklu 20 kif urew li kienu konxji taż-żmien li qed jgħixu fih? (Ara l-istampa f’paġna 15.)
11 Pereżempju, bħalma nsibu fil-ktieb Jehovah’s Witnesses—Proclaimers of God’s Kingdom, fil-bidu tas-seklu 20, “C. T. Russell u sħabu kienu konvinti ferm li kienu qed jgħixu fi żmien taʼ ħsad u li n-nies kellhom bżonn jisimgħu l-verità li ġġib ħelsien.” X’għamlu dwar dan? Peress li rrealizzaw li kienu qed jgħixu fi żmien taʼ ħsad, żmien speċjalment aċċettabbli, dawn l-aħwa ma kinux kuntenti li sempliċement jistiednu lin-nies jattendu xi laqgħa reliġjuża. Il-membri tal-kleru tal-Kristjaneżmu kienu ilhom jagħmlu proprju dan għal ħafna żmien. Minflok, dawn il-Kristjani midlukin bdew jiskopru modi prattiċi oħrajn kif ixerrdu l-aħbar tajba. Fost affarijiet oħrajn, huma għamlu użu għaqli mit-teknoloġija avanzata taʼ dak iż-żmien biex imexxu ’l quddiem ix-xogħol tagħhom.
12 Sabiex ixerrdu l-aħbar tajba tas-Saltna, il-membri taʼ dan il-grupp żgħir taʼ ministri żelużi kienu jużaw fuljetti, rivisti, u kotba. Kitbu wkoll prietki u artikli u qassmuhom biex jiġu stampati f’eluf taʼ gazzetti. Huma xandru programmi Skritturali fuq stazzjonijiet nazzjonali u internazzjonali tar-radju. Ipproduċew u użaw stampi jiċċaqalqu b’sawnd rekordjat sinkronizzat, saħansitra qabel ma l-industrija tal-films ħarġet għall-pubbliku stampi jiċċaqalqu u bis-sawnd. X’kien ir-riżultat taʼ dan iż-żelu b’persistenza? Illum, hemm madwar sebaʼ miljun ruħ li wieġbu għall-messaġġ: “Erġgħu tħabbu m’Alla” u li ngħaqdu fl-ipproklamar taʼ dan il-messaġġ. Tabilħaqq, dawn il-qaddejja bikrin taʼ Ġeħova kienu eżempji eċċellenti taʼ żelu minkejja ċ-ċirkustanzi tagħhom li jillimitawhom.
13. Liema skop t’Alla għandna nieħdu bis-serjetà?
13 L-istqarrija taʼ Pawlu “issa speċjalment hu ż-żmien aċċettabbli” għadha tgħodd. Aħna li esperjenzajna l-qalb tajba mhix mistħoqqa taʼ Ġeħova nħossuna grati li ngħatajna l-opportunità li nisimgħu u naċċettaw il-messaġġ taʼ rikonċiljazzjoni. Minflok ma nħossuna kuntenti kif aħna, aħna nieħdu bis-serjetà l-kliem li qal Pawlu: “Nitolbukom bil-ħrara wkoll biex ma taċċettawx il-qalb tajba mhix mistħoqqa t’Alla u titilfu l-iskop tagħha.” (2 Kor. 6:1) L-iskop tal-qalb tajba mhix mistħoqqa t’Alla hu li “jerġaʼ jħabbeb lid-dinja miegħu” permezz taʼ Kristu.—2 Kor. 5:19.
14. Liema opportunitajiet qed ikun hemm f’ħafna pajjiżi?
14 Il-biċċa l-kbira tal-bnedmin, mogħmijin minn Satana, għadhom imbegħdin minn Alla u ma jafux x’inhu l-iskop tal-qalb tajba mhix mistħoqqa t’Alla. (2 Kor. 4:3, 4; 1 Ġw. 5:19) Madankollu, il-kundizzjonijiet tad-dinja li sejrin mill-ħażin għall-agħar wasslu lil ħafna nies biex iwieġbu b’mod favorevoli. Dan seħħ meta ntwerew li l-fatt li wieħed ikun imbiegħed minn Alla hu l-għerq tal-ħażen u tat-tbatija umana. Anki f’pajjiżi fejn il-biċċa l-kbira tan-nies ilhom juru apatija lejn ix-xogħol tal-ippritkar tagħna, ħafna wħud issa qed jaċċettaw l-aħbar tajba u qed jieħdu azzjoni biex jerġgħu jitħabbu m’Alla. Għalhekk, qegħdin aħna nifhmu li dan hu ż-żmien għalina biex nistinkaw saħansitra b’iktar żelu ħa nsemmgħu l-istedina: ‘Erġgħu tħabbu m’Alla’?
15. Minflok ma nippritkaw messaġġ biex sempliċement in-nies iħossuhom tajjeb, xi rridu lin-nies kullimkien isiru jafu?
15 Xogħolna mhuwiex li sempliċement ngħidu lin-nies li jekk iduru lejn Alla, hu se jgħinhom fil-problemi kollha tagħhom u se jħossuhom aħjar. Ħafna nies ifittxu sempliċement dan meta jmorru l-knisja, u l-knejjes huma ħerqanin li jissodisfaw din ix-xewqa. (2 Tim. 4:3, 4) Dan mhuwiex l-iskop tal-ministeru tagħna. L-aħbar tajba li nippritkaw hi li Ġeħova, sforz l-imħabba li għandu, hu lest li jaħfer id-dnubiet permezz taʼ Kristu. B’hekk, individwi jistgħu ma jibqgħux iktar imbegħdin minn Alla u jerġgħu jitħabbu miegħu. (Rum. 5:10; 8:32) Iżda ż-żmien speċjalment aċċettabbli qed joqrob b’ħeffa kbira lejn tmiemu.
“Kunu Mħeġġin bl-Ispirtu”
16. X’għen lil Pawlu juri kuraġġ u żelu?
16 Mela, kif nistgħu niżviluppaw iż-żelu u nibqgħu żelużi għall-qima vera? Xi wħud għandhom mnejn ikunu mistħijin jew taʼ ftit kliem u forsi jsibuha diffiċli li jesprimu ruħhom jew ikunu soċjevoli. Madankollu, tajjeb li niftakru li ż-żelu mhuwiex sempliċement turija minn barra taʼ emozzjonijiet jew eċċitament; u lanqas ma jiddependi fuq il-personalità taʼ dak li jkun. Pawlu wera kif wieħed jistaʼ jiżviluppa ż-żelu u jibqaʼ żeluż meta ħeġġeġ lil sħabu l-Kristjani: “Kunu mħeġġin bl-ispirtu.” (Rum. 12:11) L-ispirtu taʼ Ġeħova kellu rwol importanti fil-kuraġġ u fl-istamina li kellu l-appostlu fix-xogħol tal-ippritkar. Mindu ġie msejjaħ minn Ġesù sakemm ġie mitfugħ il-ħabs għall-aħħar darba u nqatel bħala martri f’Ruma—perijodu taʼ iktar minn 30 sena—iż-żelu taʼ Pawlu ma battiex. Hu dejjem kien idur lejn Alla li permezz tal-ispirtu tiegħu kien jagħti lil Pawlu s-saħħa li kien jeħtieġ. Hu qal: “Għal kollox għandi s-saħħa permezz taʼ dak li jagħtini l-qawwa.” (Flp. 4:13) Kemm nistgħu nibbenefikaw jekk nitgħallmu mill-eżempju tiegħu!
17. Kif nistgħu nkunu “mħeġġin bl-ispirtu”?
17 Skont il-Kingdom Interlinear, il-kelma tradotta “mħeġġin” letteralment tfisser “inbaqbqu.” Sabiex l-ilma f’kitla jibqaʼ jbaqbaq hemm bżonn sors taʼ sħana kostanti. B’mod simili, biex inkunu “mħeġġin bl-ispirtu,” għandna bżonn l-ispirtu t’Alla b’mod kostanti. Mod kif nagħmlu dan hu billi nagħmlu użu mill-provvedimenti kollha li Ġeħova jagħtina biex isaħħaħna spiritwalment. Dan ifisser li nieħdu l-qima tal-familja u tal-kongregazzjoni bis-serjetà—inkunu regulari fl-istudju persunali u tal-familja, fit-talb, u fis-sħubija maʼ sħabna l-Kristjani. Dan se jgħinna biex ikollna “n-nar” ħalli nibqgħu “nbaqbqu,” u b’hekk inkunu “mħeġġin bl-ispirtu.”—Aqra Atti 4:20; 18:25.
18. Bħala Kristjani dedikati, fuq liema mira għandna nkunu ffokati?
18 Individwu dedikat ikun iffokat għalkollox fuq mira u ma jaljenax ruħu malajr jew jaqtaʼ qalbu faċilment milli jilħaq din il-mira. Bħala Kristjani dedikati, il-mira tagħna hi li nagħmlu kulma Ġeħova jridna nagħmlu, bħalma għamel Ġesù. (Ebr. 10:7) Illum, ir-rieda taʼ Ġeħova hi li kemm jistaʼ jkun nies jerġgħu jitħabbu miegħu. Għalhekk, ejja nistinkaw b’mod żeluż—billi nimitaw lil Ġesù u lil Pawlu—fl-iktar xogħol importanti, u tabilħaqq urġenti, li jrid isir illum.
Tiftakar Int?
• X’kien “il-ministeru tar-rikonċiljazzjoni” fdat f’idejn Pawlu u Kristjani midlukin oħrajn?
• Il-membri tal-fdal tal-midlukin kif għamlu użu tajjeb miż-żmien speċjalment aċċettabbli?
• Il-ministri Kristjani kif jistgħu jkunu “mħeġġin bl-ispirtu”?
[Mistoqsijiet taʼ Studju]
[Stampa f’paġna 12]
Pawlu qatt ma nesa meta ltaqaʼ mal-Mulej Ġesù Kristu