“Chelecha e Ngsel Taem el Ungilbesul ra Renguk”

“Mesang, chelecha e ngsel taem el ungilbesul ra renguk; mesang, chelecha e ngsils er cholsobel.”​—2 KORINTH 6:2.

1. Ngera uchul me ngkired el mo kerekikl el melilt a meklou a ultutelel el tekoi el doruul?

 “A BEK el tekoi el duubech el ngar tial beluulchad a duubech er sel belsechel el le ngiltii a Dios.” (Olisechakl 3:1) A Salomon a milluches el kirel a klungel a ultutelel a dolilt a taem el kirel a ngii di el tekoi el kirel ketmekill, el ua temel a omeruul el sers me a omerael me a siobai me a lechub e ngtaem el dongedecheduch er a rebebil. Me nguaisei, engdi kid a kmal kired el oterekokl a taem el kirel aike el meklou a ultutelel el ureor el kired el meruul. Me tiang a belkul a kmo, ngkmal kirel el mo ulterekokl a temed el meruul aike el meklou a ultutelel el ureor.

2. Kede mekerang e mo medengei el kmo a Jesus a mle medengelii a klungel a ultutelel a taem el lekiliei er ngii er sel taem er a lomerk er a klumech?

² Sera dirk el ngar tia el chutem a Jesus e ngkmal mle kerekikl el kirel a taem el lekiliei er ngii me aike el meklou a ultutelel el tekoi el mle kirel meruul. Me tia el klemedengei er ngii er aike el meklou a ultutelel el tekoi a uchul, e ngmle medengei el kmo a demiel a Messias a mle kirel el mo mutaut el oltirakl a ulaoch. (1 Petrus 1:11; Chocholt 19:10) Misei e ngmla er ngii a ureor el mle kirel meruul el mo meketeklii el mo er a rechad el kmo ngii a ngike el meltib er a ulaoch el mo Messias. Ngmle kirel el mo ungil el churrengelii a  klemerang el kirel a Renged e dirrek el mengudel er tirke el mo kldemel er a ureor er a Renged. Ngdirrek el miluchelii a ongdibel er a Rekristiano, el ngii a mo melemolem er a ureor el kirel a berkel a klumech me a omeruul er a remo disaiplo el mo lmuut er a bek el ulebongel er a beluulechad.​—Markus 1:15.

3. A klemedengei er a Jesus el kirel a taem el lekiliei er ngii, ngrirellii el mo meruul a ngerang?

³ Me sel klemedengei er a Jesus el kmo ngkmal mle orechudel a taem el lekiliei er ngii a uchul, me ngkmal mle blak a rengul el meruul a soal a Demal. Ngdilu er a redisaiplo er ngii el kmo: “A sim a klou, e ar uureor a mekesai; misei e bo molengit ra Rubak ra sim me lodureklterir ar uureor el kirel a sim er ngii.” (Lukas 10:2; Malakai 4:5, 6) Me a Jesus a ulemuchel el ngilteterir a 12 er a redisaiplo er ngii e a uriul e ngilelteterir a 70 er tir, e milsterir a ileakl el ulekrael el kirel a ureor e uldureklterir el mo omerk er tia el klumech el kmo: “A rengedel a eanged a kmedang.” Ngmelemolem a cheldecheduch el mesaod el kirel a Jesus el kmo: Ma “le merekong el mellach el uaisei rar truich ma terul Obengkel, e ngmorola er isei el kirel mo olisechakl e mengedecheduch lomerk a Tekoi ra ikel mats er tir.”​—Matteus 10:5-7; 11:1; Lukas 10:1.

4. Ngoeak a ngera el rolel e a Paulus a uluukerebai er a Jesus Kristus?

⁴ A Jesus a ulechotii a cherrungel el kerebai el kirel a blakerreng me a bltikerreng el kirir a rulebengkel. Tia el omeruul a lulsaod er ngii a apostol el Paulus er a lolisiich er a rekldemel er a klaumerang el kmo: “Kemiu bo moukerebai er ngak, el ua ingak loukerebai ra Kristus.” (1 Korinth 11:1) Ngoeak a ngera el rolel e a Paulus a uluukerebai er a Kristus? Ngmirruul er a ureor er a berkel a ungil chais el ngar er sel kot el tkurrebab el klisichel. Ngar er aike el babilengel el mo er aike el ongdibel, e ngsebeched el metik a belkul a tekoi el kmo: “Bo le blak a rengmiu el diak bo mesaik,” e “mosiou ra [Jehovah],” e “moitel a klisichiu el rokui el mo blak a rengmiu ra urerel a Rubak,” me a “ikel ngiidi le ngerang el moruul . . . e moruul el ngara reng el ua cho moruul el kirel a [Jehovah].” (Rom 12:11; 1 Korinth 15:58; Kolose 3:23) A Paulus a kmal dimlak el sebechel el obes er sel taem er a bo lodengelii a Jesus Kristus er a melengel a rael el mo er a Damaskus me a dirrek el aike el tekingel a Jesus el le dilu er a Ananias el kmo: “Ngikel chad a kngileltii el klekedall er chomerk ra ngklek el morar Chisentail, mar king, mar ngalek ra Israel.”​—Rellir 9:15; Rom 1:1, 5; Galatia 1:16.

“Ngsel Taem el Ungilbesul”

5. Ngerang a rirellii a Paulus el mo blak a rengul el meruul er a omesiungel?

⁵ Sel donguiu er a babier er a Rellir, e ngkmal mo bleketakl er a rengud er sel blekengel me a blakerreng er a Paulus er a loruul er a omesiungel. (Rellir 13:9, 10; 17:16, 17; 18:5) A Paulus a mle medengelii a klungel a ultutelel a taem el lekiliei er ngii. Ngdilu el kmo: “Mesang, chelecha e ngsel taem el ungilbesul ra renguk; mesang, chelecha e ngsils er cholsobel.” (2 Korinth 6:2) Sera rak er a 537 er uchei er a taem er a Kristus, e ngmle taem er a lluut el mo remei er a belurir tirke el mle blebaol er a Babilon. (Isaia 49:8, 9) Me a leuaisei, e a Paulus ngmillekoi el kirel a ngerang? A cheldecheduch a ngosukid el mo medengei el kmo ngngerang a mla er a uldesuel.

6, 7. Ngera el klou e chetengakl el tekoi a bla lenguu tirke el ngellitel el Kristiano er a chelecha el taem, e kuk rua techang a oureor el lobengterir a rengellitel?

⁶ Ngar er a uchelel a babilengel el mo er a Rekristiano, e a Paulus a milsaod el kirel a klou el techall el ngii me tirke el kldemel el ngellitel el Kristiano a ulebang. (Monguiu er a 2 Korinth 5:18-20.) Ngmilsaod el kmo tir a mlokedong er a Dios el kirel a ileakl el moktek, el mo meruul er a ngerechelir el “chomesumech el deleuill,” el mengeluch er a rechad me bo le “nguu chomesumech el deleuill ra Dios.” E tiang a belkul a kmo ngmo mesumech a delongelir a rechad me ngmo er ngii a budech er a delongelir tir me a Dios.

⁷ Sel taem er a lomuchel a ultok er a chelsel a sers er a Eden, e a klechad a mlo cheroid er a Jehovah. (Rom 3:10, 23) Tia el cherroid er a delongelel a klechad me a Jehovah a mla rullii a klechad me ngmengemikr a ulekrael er a Dios el luchul me a rechad a di chuarm er a ringel me a dirrek el kodall. A Paulus a milluches el kmo: “Kede medengei el kmo, a  bleob el rokui a dul ongingd e ngara ringel ra cheroll el me lmuut er chelechang.” (Rom 8:22) Engdi a Dios a mla rullii a klou el tekoi el “mengeluch” er a rechad el lmuut el mo er ngii e loruul er a budech er a delongelir el obengkel. Tiaikid ngii el omesiou el lulterekeklii er a Paulus me a rekldemel el Kristiano er a irechar. Me ‘sel ungilbesul taem’ a olechotel a “sils er cholsobel” el kirir tirke el otuil a klaumerang er tir er a Jesus. Me a rokui el ngellitel el Kristiano me tirke el sechelirir, el “ngodech el sib” el tir a oureor el obengterir, a melemolem el mengemedaol er a rechad el mo ngmai a klungiolir er tia el ‘ungilbesul el taem.’​—Johanes 10:16.

8. Ngera uchul me ngkmal klou a ultutelel a omesumech el deleuill er a delongelir a rechad me a Jehovah?

⁸ Me a okedong el mo er a rechad el mo sumechii a deleuill er tir me a Dios a kmal klou a ultutelel. Me alta e a telemellel a deleuill er a rechad me a Dios a dilubech el okiu a ultok er a chelsel a sers er a Eden, engdi a Dios a kilengei el lmuut el mo sumecheklii el mo ungil. (1 Johanes 4:10, 19) Me a Dios ngmilekerang er a losmechokl er tia el tekoi? A Paulus a onger el kmo: A “Dios a mlara Kristus e sumechii a delongelel a belulechad me ngii, el dimlak le basech a telucheklir ar chad ra belulechad, e ulterekeklii er kid a klumech el tekoi er chomesumech el deleuill.”​—2 Korinth 5:19; Isaia 55:6.

9. Ngerang mirruul a Paulus el olechotel a omereng el saul er ngii el kirel a klechubechub er a Dios?

⁹ A tenget el olubet el lekiltmeklii a Jehovah a mesterir a techellir tirke el rokui el oumerang el mo nguu a ngbetel a kngterir, e dirrek el mo sebechir el lmuut el sumechii a ungil deleuill er tir el obengkel a Jehovah. Me a lmuut el tang, ngulderecheterir a ruderechelel el mo melisiich er a rechad er a bek el beluu, me bo loruul er a ungil deleuill er tir el obengkel a Dios er a chelecha el dirk le ngar ngii a techellir. (Monguiu er a 1 Timoteus 2:3-6.) Sel klemedengei er a Paulus el kirel a soal a Dios, e dirrek el mle medengei el kmo ngorechudel el taem a uchul me ngdimlak el meterob el meruul er a “ngerechelel chomesumech el deleuill.” Ngdirkak el mengodech a moktek er a Jehovah el kirel a klechad. Ngdirk melemolem er a urungulel el soal a rechad a bo losumech er a ungil el deleuill el obengkel. Me a tekingel a Paulus el kmo, “chelecha e ngsel taem” me a dirrek el “chelecha e ngsils er cholsobel,” a kmal dirk klou a ultutelel er a chelecha taem. Me ngmera el dmeu a rengud el mo er ngii a techelled el mo oudios er a Dios el Jehovah, el ngii a kmal chubechub e dirrek el kmal oubltikerreng el kired!​—Exodus 34:6, 7.

Lak Mrellii Me “Bo Lak a Blkul”

10. Ngerang a belkul a “sils er cholsobel” el kirir a rengellitel el Kristiano er a irechar me chelecha el taem?

¹⁰ Tirke el kot el ngmo ngmai a klungiolir er tia el tekoi a tirke el mo ‘chad el ngara Kristus.’ (2 Korinth 5:17, 18) Me sel “sils er cholsobel” a ulemuchel el kirir er a taem er a Pentekost er a rak er a 33 er a taem er kid. Me sel taem el mei, e tirke el mla otaut a ngerechelir a merael el omerk er a “tekoi er chomesumech el deleuill.” Chelecha el taem er a rengellitel el Kristiano a dirk melemolem el meruul er a ‘ngerechelir er chomesumech el deleuill.’ Te medengei el kmo tirke el teua el anghel el ngar er a ues el lilsang a Johanes a “dechor ra ikel eual saus ra belulechad, el merrob a eolt ra ikel eual uchul a eolt ra belulechad, me lak loloko ra chutem.” Me chelechang e ngdirk taem er a “sils er cholsobel” me a dirrek el ‘taem el ungilbesul ra rengul’ a Jehovah. (Chocholt 7:1-3) Me tiaikid el klemedengei a uchul, me ngngar er a uchelel a 19 el dart rak er a taem er kid, e a rengellitel el chedal a Dios a millemolem el blak a rengrir el oltaut er a ‘ngerechelir er chomesumech el deleuill’ el mo er a bek el merekelel a beluulechad.

11, 12. Ngera el omerellir tirke el ngellitel el Kristiano er a uchelel a 19 el dart el rak a ulechotii el kmo ngorechudel el taem? (Momes er a siasing er a 17 el llel tia el makesin.)

¹¹ Ngar er a babier el Jehovah’s Witnesses​—Proclaimers of God’s Kingdom, e kede mesang el kmo, ngngar sel ulebengelel a 19 el dart el rak, e a “C. T. Russell me tirke el uluureor el obengkel a kmal mle mesisiich el oumerang el kmo te kiliei er a taem er a omeridm me a rechad a kmal mle kirir el rongesii a klemerang el tekoi.” Me te milekerang el kirel tia el tekoi? Tir el mle medengei el kmo te kiei er a taem er a omeridm, el ngii a ‘ileakl taem’ a uchul, me tirka el odam a milechesuar el kmo ngdiak di dongemedaol er a rechad el me teloi er aike el miting er a ongdibel e lemerekong. Tirke el mengeteklel a Klsuul Klechelid a kmal mla mo kemanget el taem el loruul er tia el tekoi. Engdi a rengellitel el Kristiano a bai ulemuchel el merriter a ungil el rolel e te omerk er a ungil el chais el mo er a rechad. Me nguldimukl er a betok el tekoi el lurruul, e te dirrek el uluusbech aike el beches el klekedall er a meklou el mesil el meleketek er tia el urerir el kirel a berkel a klumech.

 ¹² Me sel kekerei el cheldellir a reblak a rengrir el mesiou a uluusbech a babier el tract me a makesin me a dirrek el hong el mo ungil el merkii tia el ungil el chais er a Renged. Te dirrek el milluches a suobel me a cheldecheduch e uleltobed a betok el telael er ngii el okiu a simbung. E uleltobed a betok el cheldecheduch el kirel a omesodel a Bades el okiu a razio me aike el betok el rolel e ngsebechir el mengedecheduch er a buai el okiu a olekiungel. Te dirrek el mirruul a betok el mubi el ngar ngii a ongngak me a cheldecheduch er ngii, er a uchei er a lebo er ngii a kot el mubi er a beluu. Me ngngera dilubech e le ngblakerreng er tir a uchul? Chelecha el taem e te ngar ngii a kuk betok er a euid el miliol el chad el mla kongei er tia el tekoi e mla mo teloi er a rumerk er a klumech el mengelechel er a rechad el kmo: “Mnguu chomesumech el deleuill ra Dios.” Me ngkmal klemerang el tekoi, tirke el mesiungel a Jehovah er a ngar a mong a kmal ulechotii a ungil kerebai el kirel a blakerreng alta e te mle chelebangel a betok el omelsemai me a odechelakl er a klengar er tir.

13. Ngera el moktek er a Dios a kired el dolemii er a chelsel a rengud?

¹³ Me sel tekingel a Paulus el kmo “chelecha e ngsel taem” a kmal dirk klemerang el kirel a taem er kid. Kid el mla chormii sel diak el mekimd el klechubechub er a Jehovah a kmal oba omereng el saul el mlo er ngii a techelled el rongesii, e dirrek el kongei er a klumech el kirel a omesumech el deleuill er kid el obengkel a Dios. Me tiang a diak el belkul a kmo me chelechang e ngungiabesul a rokui el tekoi er kid, kede bai kmal blak a rengud el melatk er a klungel a ultutelel a tekingel a Paulus el kmo: A ki “kmal mengelechel er kemiu el kmo, lak mnguu a grazia ra Dios e bo lak a blkul.” (2 Korinth 6:1) Me sel moktek er a diak el mekimd el bltkil a rengul a Dios a soal el mo “sumechii a delongelel a belulechad me ngii” el okiu a Kristus.​—2 Korinth 5:19.

14. Ngera el ungil techall a meketmeklang er a chelsel a betok el beluu?

¹⁴ A klou el ildois er a rechad a dirk el longeuid er tir a Satan, me te dirk kiei el cheroid er a Dios me ngdiak lodengelii a moktek er sel diak el mekimd el bltkil a rengul. (2 Korinth 4:3, 4; 1 Johanes 5:19) Me nguaisei, engdi a blekeradel er a beluulechad el di merael el mo mekngit, a mla rulleterir a rechad el mo kongei er a klumech sel bo lodengei el kmo, a kngtil a klechad me a dirrek el ongarm a mo er ngii e le rechad el kiei el cheroid er a Dios. Me ngmo lmuut er aike el beluu el betok el chad el dimlak el semeriar er a ureor er a berkel a klumech, me te dirrek el mla mo kongei er a ungil el chais e mocha mesumech er a deleuill er tir me a Dios. Me ngbleketakl er a rengud el kmo chelecha el taem e ngkmal kired el lmuut el mo blak a rengud el ouchais er tia el klumech el mo er a rechad el kmo: “Bo mnguu chomesumech el deleuill ra Dios.”

15. Me kid el diak domerk er a klumech el di mo uchul a deuil a rengrir a rechad, ngbai soad a rechad a bo lodengelii a ngera el tekoi?

¹⁵ A ngerachel el mloterekokl er kid a diak di bo douchais er a rechad el kmo, a lsekum e te obult el mo er a Dios e ngmo olengeseu er tir el kirel a mondai er tir, e dirrek el mo uchul a deuil a rengrir. A rebetok a omes er a omeruul el mo er a ikelesia el kmo sel lebong, e ngsebechir el mo duoseb a rengrir er a mondai el lechelebangel, e tirke el mengeteklel a ikelesia a dirrek el melisiich aike el urungulir. (2 Timoteus 4:3, 4) E tia el omeruul a kmal diak el uchetemel a omesiunged. A ungil el chais el dolisechakl er ngii a meketmokl e le ngbltkil a rengul a Jehovah a uchul, me ngkilengei el lousubes a kngtid el okiu a Kristus. Me nguaisei, a derta er kid a mo mimokl er a klengit e mo nguu a omesumech el deleuill el obengkel a Dios. (Rom 5:10; 8:32) Me chelecha el taem el domekedong er ngii el kmo “ngsel taem el ungilbesul,” a kmal kmedang er a ulebengelel.

“Bo Mkard” el Okiu a Klisichel a Dios

16. Ngera el tekoi a ngilsuir a Paulus el mo oba blekeu me a ducherreng?

¹⁶ Me a leuaisei, e kede mekerang e mekurulii a blakerreng er kid el kirel a mera el omengull? A rebebil a locha sekemerur e dirrek el diak el meduch el mengedecheduch, me ngmo meringel er tir el olecholt aike el mera el ngar er a rengrir me a lechub e ngdiak el sal sebechir el omuchel el mengedecheduch er a rechad. Me a leuaisei, e ngungil a lak dobes el kmo a blakerreng  er kid a diak di lolechotel a klemeriarreng me a lechub e di lultuil er a blekerdelel a chad. A Paulus a ulechotii a rolel a domekeroul er a blakerreng er kid er a longelechel er a rekldemel el Kristiano el kmo: “Bo mkard” el okiu a klisichel a Dios. (Rom 12:11) Sel oureor el klisichel a Jehovah a mle uchul a blekeurreng me a ducherreng er a apostol el Paulus el kirel a ureor er a berkel a klumech. Ngar sel taem er a lekot el omekedong er ngii a Jesus el mo lmuut er a bo lemekelebus e lokodir er a beluu er a Rom, e ngmle bekord el 30 el rak a klemengetel a omesiungel, e a Paulus a dimlak a ta el bo lemechitechut a blakerreng er ngii. Ngmle blechoel el lolengit er a klisichel a Dios me lolisiich er ngii. E tia el omerellel a sebeched el mesang er a tekingel el kmo: “Ngsebechek el meruul a rokuil tekoi loeak a Kristus, el ngikel melisiich er ngak.” (Filipi 4:13) Me ngkmal betok el ungil el tekoi me a klungiaol a sebeched el ngmai sel dosuub el kirel a kerebil a Paulus!

17. Kede mekerang e mo sebeched el ‘kmard’ el kirel a omesiunged?

¹⁷ A tekoi el mloiuid el “kmard” a belkul a kmo “omrechorech.” (Kingdom Interlinear) A lsekum e ngsoad a lolemolem el omrechorech a mekeald, e ngkired el mecherei a ngau me ngmelemolem el kmard. Me ngdi osisiu, a lsoad el mo ‘kmard’ el kirel a omesiunged e ngkired el ousbech er sel diak el mekimd el oureor el klisichel a Dios. E tiang a sebeched el nguu el okiu sel dousbech aike el rokui el techall el bla lebeskid a Jehovah el mo melisiich er a ungil el deleuill er kid el obengkel. Me tiang a belkul a kmo ngkmal kired el mo blak a rengud el meruul er a omengull er kid el telungalek me a dirrek el ongdibel, el mo blechoel el mesuub el di kid el tang, e teloi er a omengull el telungalek, e dirrek el meluluuch, e mo er a bek el miting el obengterir a rekldemed el Kristiano. Aikaikid el tekoi a sebechel el ngosukid me ngmelemolem el ngar ngii a “ngau” el meruul er a mekeald me “ngomrechorech” el lolengeseu er kid el mo ‘kmard’ el kirel a omesiunged.​—Monguiu er a Rellir 4:20; 18:25.

18. Me kid el mla tuib a rengud el Kristiano, ngngera el melemalt el tekoi a kired el meruul er ngii?

¹⁸ A mla metecholb el chad el blak a rengul el meruul a melemalt el tekoi a meringel el mekesuseu me a lechub e bo lemechitechut a rengul e bo lak loruul a llemalt. Me kid el Kristiano a kired el mo blak a rengud el meruul a soal a Jehovah el ua omerellel a Jesus. (Hebru 10:7) Chelecha el taem e a Jehovah a kmal soal a rokui el chad a bo loruul er a ungil deleuill er tir el obengkel. Me a leuaisei, e bo leblak a rengud el oltirakl er a kerebil a Jesus me a Paulus, el meruul er tia el kmal klou a ultutelel el ureor, el ngii a kmal kirel el ketmekill er a chelecha el taem.

Ke Dirk Melatk?

• Ngera el ‘ngerachel er a chomesumech el deleuill’ a mloterekokl el mo er a Paulus me a rengellitel el Kristiano?

• Ngera el tekoi a bla leruul tirke el ngellitel el dirk ngar tia el chutem el kirel “sel taem el ungilbesul”?

• Te mekerang a Rekristiano el mesiungel a Dios e ‘mo kmard’ el kirel a omesiungir?

[Aike el Ker er a Suobel]

[Siasing el ngar er a 14 el llel]

A Paulus a kmal dimlak el sebechel el obes er sel taem er a bo lodengelii a Jesus Kristus