“Teia Taua Tuatau Tau Ra”

“I na, teia taua tuatau tau ra, teia taua rā e oraʼi ra.”​—2 KORI. 6:2.

1. Eaa ra tatou ka anoano ei kia kite eaa te mea puapinga roa atu ta tatou ka rave i tetai ua atu tuatau?

“E ATIANGA to te au mea katoa nei, e e tuatau to te au akakoroanga katoa i raro ake i te rangi nei.” (Kohe. 3:1) Te tata ra a Solomona no runga i te puapinga kia kite i te tuatau meitaki tikai no tetai ua atu mea puapinga—mei te tanutanu, teretere, pitiniti, me kore te komunikeiti anga ki tetai ke. Te anoano katoaia ra tatou kia kite eaa te angaanga puapinga roa atu ta tatou ka rave i tetai ua atu tuatau. Koia oki, kia taka meitaki e eaa te mea puapinga kia tatou.

2. Akapeea tatou e kite ei e ia Iesu e tutu aere ra, kua kite meitaki aia i te tuatau e noo ra aia?

² Iaia i te enua nei, kua kite meitaki a Iesu i te tuatau e noo ra aia e tana ka anoanoia kia rave. Te maramaanga e eaa te au mea puapinga i roto i tona oraanga, kua kite aia e kare e roa atu ka akatupuia te au totou e manganui no runga i te Mesia tei tapapaia ana no tetai tuatau roa. (1 Pete. 1:11; Apo. 19:10) E au angaanga tana ka rave kia kite te tangata e koia te Mesia taputouia. Ka akakitekite meitaki aia i te tuatua mou o te Patireia e te akaputu mai i te aronga ka tutara kapiti kiaia i roto i te Patireia i te tuatau ki mua. E ka akanoo aia i te tango no te putuputuanga Kerititiano, te ka rave i te angaanga tutuanga e te akariroanga i te au tangata ei pipi e tae ua atu ki te openga o te enua.​—Mare. 1:15.

3. Akapeea to Iesu kite anga i te tuatau i te akakeu anga i tana au angaanga?

 ³ Kua riro taua kite anga ra ei akamaroiroi anga pakari ia Iesu, te akakeu anga iaia kia rave maroiroi i te anoano o tona Metua. Kua akakite aia ki tana au pipi e: “Te maata ua nei te mou, te iti nei ra te aronga e kokoti: e teianei, e pure kotou i te Atu o te mou, kia unga mai aia i tetai aronga ei rave i taua mou nana ra.” (Luka 10:2; Mala. 4:5, 6) Kua iki a Iesu e 12 na mua e oti e 70 no roto mai i tana au pipi, kua oronga i te ikuikuanga taka meitaki, e kua tono atu ia ratou kia tutu aere i te karere mataora: “Te vaitata mai nei te basileia” o te rangi. No runga ia Iesu uaorai, ka tatau tatou e: “E oti akera [iaia te] akaue anga atu i tana aronga pipi tino ngauru ma rua ra, aere atura aia e apii, e e ako aere i roto i to ratou au oire.”​—Mata. 10:5-7; 11:1; Luka 10:1.

4. I roto i teea tu i aru ei a Paulo ia Iesu Karaiti?

⁴ E akaraanga apa kore a Iesu no te tu maroiroi e te inangaro maata i tana au pipi pouroa. Teia ta te apotetoro ko Paulo i tuatua te raurau anga aia i tona au taeake irinaki e: “E aru mai kotou iaku mei iaku katoa i aru i te Mesia nei.” (1 Kori. 11:1) I roto i teea tu i aru ei a Paulo ia Karaiti? Te mea maata, te rave maroiroi anga i te tutu aere i te tuatua meitaki. I roto i te au reta ta Paulo i tata ki te au putuputuanga, ka kite tatou i te au tuatua “eiaa e tavarevare i ta kotou angaanga,” “e tavini ia Iehova,” ‘kia maata te rave anga i te angaanga a te Atu,’ e ‘ta kotou au mea e rave ra, e rave ïa ma te ngakau katoa, mei te mea e na Iehova.’ (Roma 12:11, NW; 1 Kori. 15:58; Kolo. 3:23) Kare rava i ngaropoina ana ia Paulo tona aravei anga i te Atu ko Iesu Karaiti i runga i te mataara ki Damaseko, e te au tuatua a Iesu ta te pipi ko Anania i akakite kiaia: “E āriki ikiia oki aia naku, ei apai i toku ingoa ki mua i te aroaro o te au etene, e te ui ariki ra, e te tamariki na Iseraela ra.”—Anga. 9:15; Roma 1:1, 5; Gala. 1:16.

“Taua Tuatau Tau Ra”

5. Eaa tei akakeu ia Paulo kia rave maroiroi i tana angaanga orometua?

⁵ Te tatau anga i te puka o Angaanga, te kite meitaki ra tatou i te mataku kore e te maroiroi ta Paulo i akaari i te rave anga i tana angaanga orometua. (Anga. 13:9, 10; 17: 17; 18:5) Kua kite a Paulo i te puapinga o te tuatau e noo ra aia. Kua tuatua aia e: “I na, teia taua tuatau tau ra, teia taua rā e oraʼi ra.” (2 Kori. 6:2) I te mataiti 537 M.T.N., ko te tuatau tau te reira kia oki atu te au tuikaa i Babulonia ki to ratou ipukarea. (Isa. 49:8, 9) Inara eaa ta Paulo e taiku ra i konei? Ka tauturu te aerenga manako ia tatou kia kite i tana e manako ra.

6, 7. Eaa te akangateiteianga maata tei orongaia ki te au Kerititiano akatainuia i teia tuatau, e koai ma te angaanga kapiti ra ki te aronga akatainuia?

⁶ I roto i tana reta i mua atu ana, kua tuatua a Paulo i te akangateiteianga maata tei akaariia kiaia e tona au taeake Kerititiano akatainuia. (E tatau ia 2 Korinetia 5:18-20.) Kua akamarama aia e kua kapikiia ratou e te Atua no tetai akakoroanga takake, kia rave i te angaanga orometua ‘akaongi anga,’ e kia pati i te au tangata kia ‘akaongiia ki te Atua.’ Tera te aiteanga kia akatupu akaou i te pirianga me kore te akaau anga ki te Atua.

⁷ Mei te meameaau anga i Edene, kua akatakakeia te tangata ravarai mei ia Iehova. (Roma 3:10, 23) Kua tuku taua akatakake anga i te tangata ravarai ki roto i te poiri pae vaerua, taki atu ki te mamae e te mate. “Kua  kite oki tatou e, te ngunguru anake nei te au mea katoa i angaia mei te mamae anau ra e tae rava akenei i teianei rā,” i tata ei a Paulo. (Roma 8:22) Inara kua rave te Atua i te au takainga i te pati akatenga ki te au tangata kia oki mai, me kore kia akaongiia kiaia. Ko te angaanga orometua te reira tei orongaia kia Paulo e tona au taeake Kerititiano akatainuia i te reira tuatau. Ka riro “taua tuatau tau ra” e ko te “rā e oraʼi” no te aronga tei akarongo ia Iesu. Pouroa te au Kerititiano akatainuia e to ratou au oa, te “mamoe ke atu” te angaanga kapiti ra kia ratou, te pati ua nei rai i te au tangata kia puapingaia mei te “tuatau tau ra.”​—Ioa. 10:16.

8. Eaa ra te kapikianga kia akaongiia ei mea umere tikai?

⁸ E mea umere tikai te kapikianga kia akaongiia ki te Atua, noatu e na te tangata i akakino i to ratou pirianga ki te Atua i te meameaau anga i Edene—na te Atua uaorai i rave i te takainga mua i te akatikatika i te tarevake. (1 Ioa. 4:10, 19) Eaa tana i rave? Kua pau mai a Paulo e: “Ei roto te Atua i te Mesia i te akaongi anga i to teianei ao iaia uaorai, i te uri kore anga atu i ta ratou ara ia ratou; e kua tuku mai oki te tuatua akaongi ra ia matou nei.”—2 Kori. 5:19; Isa. 55:6.

9. Eaa ta Paulo i rave ei akaari i tona ariki anga ngateitei i to te Atua takinga meitaki?

⁹ Na te oronga mai anga i te atinga oko, kua tauturu a Iehova i te aronga e taangaanga ra i to ratou akarongo ki roto i te oko kia akakoreia ta ratou ara e kia rauka akaou te pirianga me kore te akaau kiaia. Pera katoa, kua tono aia i tona au komono kia akamaroiroi i te tangata i te au ngai ravarai kia akatupu i te au kiaia koi vai ei te tuatau. (E tatau ia 1 Timoteo 2:3-6.) Te marama anga i to te Atua anoano e te kite anga i te tuatau e noo ra aia, kua oronga maroiroi a Paulo iaia uaorai i roto i te angaanga orometua ‘akaongi anga.’ Kare to Iehova anoano i taui. Te vai nei rai to Iehova anoano no te tangata ravarai tei akatakakeia, kia akaongi mai kiaia. Te tau nei rai te au tuatua a Paulo e “teia taua tuatau tau ra” e “teia taua rā e oraʼi ra.” E Atua takinga meitaki e te tangi aroa a Iehova!​—Exo. 34:6, 7.

Eiaa e “Āriki Puapinga Kore Ua”

10. Eaa te aiteanga o “taua rā e oraʼi ra” no te au Kerititiano akatainuia, i te tuatau i topa e i teia tuatau?

¹⁰ Te aronga mua tei puapingaia mei teia aroa takinga meitaki, ko te aronga ‘tei roto anake i te Mesia.’ (2 Kori. 5:17, 18) Kua akamata “taua rā e oraʼi ra” no ratou i te Penetekote 33 T.N. Mei reira mai, kua orongaia ki taua aronga ra te angaanga no te akakitekite anga i te “tuatua akaongi.” Teia tuatau, te rave nei rai te toenga o te au Kerititiano akatainuia i te angaanga orometua ‘akaongi anga.’ Te kite ra ratou e ko te au angera e a ta te apotetoro ko Ioane i kite i roto i te orama totou ko ratou ‘te tāpu ra i nga matangi e a o te ao nei, kia kore te matangi e arara ki runga i te enua nei.’ Ko te reira rai “taua rā e oraʼi ra” e te “tuatau tau ra.” (Apo. 7:1-3) Mei te akamataanga mai o te 20 anere mataiti, kua rave maroiroi ana te toenga o te aronga akatainuia i te akatupu i te angaanga orometua ‘akaongi anga,’ ki te nga tuanga e a o te enua nei.

11, 12 Akapeea te au Kerititiano akatainuia i mua ake i te 20 anere mataiti i te akaari anga e kua kite ratou i te tuatau? (Akara i te tutu i te kapi 15.)

¹¹ Ei akaraanga, mei tei akakiteia i roto i te puka Jehovah’s Witnesses—Proclaimers of God’s Kingdom, i mua ake i te 20 anere mataiti, “kua irinaki a C. T. Russell e tona au oa e tei roto ratou i tetai tuatau kokoti anga e te anoanoia ra te au tangata kia akarongo mai i te tuatua mou akaora anga.” Eaa ta ratou i rave no runga i teia? Te kiteanga e tei roto ratou i tetai tuatau kokoti anga, “taua tuatau tau ra,” kare teia au taeake e mareka ua i te pati i te au tangata kia aere mai ki tetai akoanga akonoanga. E rave ua ana te au orometua o Kerititome i te reira. Kareka ra, kua akamata taua au Kerititiano akatainuia i te kimi i tetai au mataara tau no te akatotoa anga i te tuatua meitaki. Kapiti mai, kua  taangaanga meitaki ratou i te au tekinoroti ou kia akamaata atu i ta ratou angaanga.

¹² Ei akatotoa i te tuatua meitaki o te Patireia, kua taangaanga taua pupu meangiti o te au orometua maroiroi i te au aenga pepa, au pepa rikiriki, au makatini, e te au puka. Kua akapapa katoa ratou i te au akoanga e te au atikara no te au tauatini ua atu nuti pepa. Kua akakitekite aere ratou i te au porokaramu Tuatua Tapu ki runga i te ratio o te pa enua e i te au ngai katoatoa. Kua nenei ratou e kua taangaanga i te au teata e aru ra i te akatangi anga tei rekotiia, i mua roa ake ka akaari ei te ngai maani teata i te au teata akatangi anga ki te katoatoa. Eaa tei tupu mai no taua tu maroiroi ra? Teia tuatau, mei tetai itu mirioni tangata tei ariu mai e tei piri mai ki te akakitekite anga i te karere: ‘E akaongi ki te Atua.’ E tika rai, e akaraanga meitaki tikai taua au tavini mua o Iehova no te tu maroiroi noatu kare ratou e maata ana e kare e tukatau ana.

13. Eaa to te Atua akakoroanga ta tatou ka akamanako meitaki?

¹³ Te tika nei rai te tuatua a Paulo e “teia taua tuatau tau ra.” Te rekareka nei tatou tei kite i to Iehova aroa takinga meitaki e kua orongaia mai kia tatou te atianga kia akarongo e kia ariki i te karere no te akaongi anga. E akamanako meitaki ana tatou i te au tuatua a Paulo e aru maira e: “Te ako katoa atu nei matou te rave angaanga kapiti nei, ia kotou, e auraka kotou e āriki puapinga kore ua i te aroa ua o te Atua ra.” (2 Kori. 6:1) Te akakoroanga o te aroa ua o te Atua koia oki, ‘kia akaongi i to teianei ao kiaia uaorai’ na roto ia Karaiti.—2 Kori. 5:19.

14. Eaa te au tupuanga papu e raveia ra i te au enua?

¹⁴ Maataanga o te tangata, tei akapoiriia e Satani, te takake nei rai mei te Atua e kare e kite ana i te akakoroanga o te aroa ua o te Atua. (2 Kori. 4:3, 4; 1 Ioa. 5:19) Inara, kua akakeu te au turanga kino o teianei ao i te manganui kia ariu mai, te akaariia anga e ko te akatakake anga mei te Atua te tumu no te kino e te mamae o te tangata. I roto i te au enua kare te maataanga o te tangata e mareka mai ana i ta tatou angaanga tutuanga, manganui ra te ariki maira i te tuatua meitaki i teianei e te rave ra i te takainga kia akaongiia ki te Atua. Te marama ra ainei tatou e ko teia te tuatau kia rave maroiroi tatou i te akakitekite anga e: ‘E akaongi ki te Atua’?

15. Te tutu aere ua anga kia reka mai te au tangata, eaa ta tatou ka inangaro kia kite te au tangata i te ngai ravarai?

¹⁵ Ta tatou angaanga kare e ko te akakite ua ki te tangata e me uri ratou ki te Atua, ka tauturu aia ia ratou e to ratou au manamanata e ka meitaki mai ratou. Manganui te kimi ua ra i te reira me aere ratou ki te pure, e te inangaro ra te au akonoanga i te akatupu i teia inangaro. (2 Timo. 4:3, 4) Kare ko te reira te akakoroanga o ta tatou angaanga orometua. Te tutu aere nei tatou i te tuatua meitaki no to Iehova aroa e tona inangaro i te akakore i te ara na roto ia Karaiti. I reira e rauka ai i te au tangata tataki tai kia ariu mai e kia akaongiia ki te Atua. (Roma 5:10; 8:32) Inara te viviki maira te openga o “taua tuatau tau ra.”

“Kia Akakeuia ra e te Vaerua”

16. Eaa tei tauturu ia Paulo kia akaari i te mataku kore e te maroiroi?

¹⁶ Akapeea ra tatou me akatupu e me akono tamou i to tatou maroiroi no te akamorianga mou? Penei e tu akama to tetai pae me kore kare e tuatua maata ana e te ngata ra i te akakite i to ratou manako me kore kare e oaoa ana. Inara, e mea meitaki kia akamaara  e kare te tu maroiroi i te tu akaari ua i te mataora; e kare katoa no runga i te tu o te tangata. Kua akakite mai a Paulo i te tumu te raurau anga aia i tona au taeake Kerititiano e: “Kia akakeuia ra e te vaerua.” (Roma 12:11, NW) E tuanga maata ta te vaerua o Iehova no runga i te mataku kore e te maroiroi o te apotetoro i roto i te angaanga tutu anga. Mei te tuatau i kapikiia ai aia e Iesu ki tona tapekaanga openga e te tamateia anga i Roma—tere atu i te 30 mataiti—kare to Paulo maroiroi i ngaueue ana. Akara ua ana aia ki te Atua, tei na roto i te vaerua i te oronga mai anga i te maroiroi ta Paulo e anoano ra. Kua karanga aia e: “E tika iaku te au mea ravarai nei i te Mesia, ko tei akamaroiroi mai iaku nei.” (Phili. 4:13) Ka puapinga maataia tatou na te apiianga mei tona akaraanga!

17. Akapeea tatou me ‘akakeuia e te vaerua’?

¹⁷ I roto ia Roma 12:11, kua taangaanga te apotetoro ko Paulo i tetai tuatua Ereni te aiteanga tikai “pupu.” Kia pupu ua rai te tikata vai, ka anoanoia kia ka ua te ai. Mei te reira rai, “kia akakeuia ra e te vaerua,” ka anoano tatou kia aere ua mai te vaerua o te Atua. E rauka ai te reira, kia taangaanga meitaki tatou i te au mea ravarai ta Iehova i oronga mai kia akaketaketa ia tatou i te pae vaerua. Koia oki, e akamanako pakari i ta tatou akamorianga a te ngutuare e te putuputuanga—kia rave putuputu i taau uaorai apii e ta te ngutuare, te pure, e te uipa anga ma to tatou au taeake Kerititiano. Ka tauturu teia au mea ia tatou kia ‘akakeuia e te vaerua,’ mei te ai rai e akavera ua ra i te tikata vai.—E tatau ia Angaanga 4:20; 18:25.

18. Ei au Kerititiano, eaa te akakoroanga ta tatou ka akamanako meitaki?

¹⁸ Te tangata tei papetitoia, te akamanako meitaki ra i tetai akakoroanga e kare e tamanamanataia ana me kore e akaparuparuia ana i te aruaru anga i taua akakoroanga ra. Ei au Kerititiano, to tatou akakoroanga kia rave i ta Iehova e inangaro ra kia rave tatou, mei ta Iesu i rave. (Ebe. 10:7) To Iehova anoano i teia tuatau, kia akaongi i te au tangata e manganui kiaia. No reira, e angaanga maroiroi tatou—te aru anga ia Iesu raua ko Paulo—i te rave i teia angaanga puapinga e te rapurapu i teia tuatau.

Maara Ainei ia Koe?

• Eaa te angaanga orometua ‘akaongi anga’ tei orongaia kia Paulo e tetai atu au Kerititiano akatainuia?

• Akapeea te toenga o te aronga akatainuia i te taangaanga meitaki anga i “taua tuatau tau ra”?

• Akapeea te au orometua Kerititiano me ‘akakeuia e te vaerua’?

[Au Uianga Apii]

[Tutu i te kapi 12]

Kare rava i ngaropoina ana ia Paulo tona aravei anga i te Atu ko Iesu Karaiti