“O le Taimi Tonu Lenei e Talileleia Ai”

“Faauta! O le taimi tonu lenei e talileleia ai. Faauta! O le aso lenei o le faaolataga.”—2 KORI. 6:2.

1. Aiseā e manaʻomia ai ona tatou iloa mea e sili ona tāua e fai i le taimi sili ona talafeagai?

‘⁠E IAI le taimi ua atofaina mo mea uma, e iai foʻi le taimi mo mea uma e tutupu i lalo o le lagi.’ (Fai. 3:1) Na tusi Solomona e faatatau i le tāua o le mātaulia o le taimi e sili ona lelei mo so o se taumafaiga aogā: po o le faia o se faatoʻaga, faimalaga, faia o se pisinisi, po o le talanoa foʻi ma isi. E lē gata i lea, e tatau foʻi ona tatou iloa po o le ā le galuega e sili ona tāua e tatau ona faia i le taimi sili ona talafeagai. I se isi faaupuga, e tatau ona faatulaga saʻo mea e tatou te faamuamua.

2. A o talaʻi atu Iesu, e faapefea ona tatou iloa sa malamalama lelei o ia i le taimi na soifua ai?

² A o iai Iesu i le lalolagi, sa malamalama lelei o ia i le taimi na soifua ai ma le mea e manaʻomia ona ia faia. Sa manino lelei iā te ia mea e tatau ona faamuamua, ma na ia silafia ua oo mai le taimi e faataunuu ai le tele o valoaga ua leva ona valoia e faatatau i le Mesia. (1 Pete. 1:11; Faaa. 19:10) Sa iai le galuega e tatau ona ia faia, e faailoa atu ai o ia o le Mesia folafolaina. Sa tatau ona ia molimau māeʻaeʻa i le upu moni o le Malo, ma aoao mai i latou o le a pule faatasi ma ia i le Malo. E tatau foʻi ona ia faataatia le  faavae o le faapotopotoga Kerisiano lea o le a faaauauina le galuega talaʻi, ma le faia o soo e oo i tuluʻiga o le lalolagi.—Mare. 1:15.

3. Na faapefea ona gaoioi Iesu ona o lona silafia o le faanatinati o le taimi?

³ O le malamalama lelei o Iesu i le faanatinati o le taimi, na avea ma uunaʻiga malosi e maelega ai e faia le finagalo o lona Tamā. Na fetalai atu o ia i ona soo: “E moni, e tele le saito e seleseleina, a ua toʻaitiiti le ʻaufaigaluega. O lea, ia ʻaiʻoi atu ai i le Matai o le seleselega, ina ia aauina mai se ʻaufaigaluega mo lana seleselega.” (Luka 10:2; Mala. 4:5, 6) Na filifilia muamua e Iesu le toʻa 12, ona sosoo ai lea ma le toʻa 70 mai i ona soo, ma avatu faatonuga patino iā i latou, ma aauina atu e talaʻi le feʻau faagaeeloto: “Ua latalata mai le malo o le lagi.” A ua faapea mai le mau e uiga iā Iesu: “Ua uma ona avatu e Iesu faatonuga i ona soo e toʻasefulu lua, ona maliu atu lea o ia e talaʻi ma aʻoaʻo atu i isi aai.”—Mata. 10:5-7; 11:1; Luka 10:1.

4. O le ā le auala na faaaʻoaʻo ai Paulo iā Iesu Keriso?

⁴ Ua avea le maelega ma le filigā o Iesu, ma faaaʻoaʻoga e sili ona lelei mo ona soo e mulimuli ai. O le manatu lenā o loo taʻua e Paulo ina ua ia uunaʻia ona uso talitonu: “Ia faaaʻoaʻo iā te aʻu, e pei ona ou faaaʻoaʻo iā Keriso.” (1 Kori. 11:1) O le ā le auala na faaaʻoaʻo ai Paulo iā Keriso? I le faia o le mea sili e na te mafaia e talaʻi atu ai le tala lelei. I tusi a Paulo i faapotopotoga, o loo iai faaupuga e pei o le, “aua le faifaiaga i a outou galuega,” “ia outou pologa mo Ieova,” “ia tele pea mea e fai i le galuega a le Alii,” ma “e so o se mea e tou te faia, ia galue i ai ma le lotoatoa, e pei o loo faia iā Ieova.” (Roma 12:11; 1 Kori. 15:58; Kolo. 3:23) E lē mafai ona galo iā Paulo le faaali atu o le Alii o Iesu Keriso iā te ia i le auala i Tamaseko, ma ana fetalaiga e lē taumatea na taʻu atu e Anania iā te ia, e faapea: “O lenei tagata o le ipu ia ua filifilia mo aʻu, e talaʻi atu loʻu igoa i nuu ese faapea foʻi ma tupu, ma le fanauga a Isaraelu.”—Galu. 9:15; Roma 1:1, 5; Kala. 1:16.

‘Taimi Tonu e Talileleia Ai’

5. O le ā na uunaʻia ai Paulo e maelega i lana faiva?

⁵ Ua manino mai i le tusi o Galuega le lototele ma le maelega o Paulo i lana faiva. (Galu. 13:9, 10; 17:16, 17; 18:5) Na iloa lelei e Paulo le tāua o le taimi na soifua ai. Na faapea mai o ia: “Faauta! O le taimi tonu lenei e talileleia ai. Faauta! O le aso lenei o le faaolataga.” (2 Kori. 6:2) I le 537 T.L.M., o le taimi tonu lenā na toe taliu ane ai i lo latou atunuu, tagata Isaraelu na ave faapagota i Papelonia. (Isa. 49:8, 9) Peitaʻi, o le ā o loo faatatau i ai upu nei a Paulo? E tatou te malamalama pe a tagaʻi i isi fuaiupu o le mau.

6, 7. O le ā le faaeaga sili ua tuuina atu i Kerisiano faauuina i aso nei, ma o ai o loo galulue faatasi ma le ʻaufaauuina?

⁶ Muamua atu i lana tusi, ua taʻua ai e Paulo se faaeaga sili na tuuina atu iā te ia ma ana aumea Kerisiano faauuina. (Faitau le 2 Korinito 5:18-20.) Na ia faamatala mai, ua valaauina i latou e le Atua mo se fuafuaga faapitoa, o le faia lea o “le faiva o le leleiga,” ma ia ōle atu i tagata, “ia outou toe lelei ma le Atua.” O lona uiga, ia toe maua se faiā lelei ma le Atua.

⁷ Ua faaesea tagata uma mai iā Ieova talu ona fouvale le uluaʻi tagata i Etena.  (Roma 3:10, 23) O lenā faaesea, ua latou lē iloa ai o Ia ma lona finagalo, ma iʻu ai i mafatiaga ma le oti. Na faapea mai Paulo: “Ua tatou iloa o loo ōi faatasi pea ma tigā faatasi foafoaga uma e oo mai i aso nei.” (Roma 8:22) Ae ui i lea, ua faia e le Atua laasaga e ʻaiʻoi pe e “ōle” atu ai i tagata, ina ia toe foʻi mai e faia se leleiga ma Ia. O le faiva lenā na tuuina atu iā Paulo ma ona uso Kerisiano faauuina i lenā taimi. O lea la, e ono avea le ‘taimi tonu e talileleia ai,’ ma ‘aso o le faaolataga’ mo ē e faatuatua iā Iesu. I aso nei, o loo galulue Kerisiano faauuina uma ma a latou aumea o “isi mamoe,” e valaaulia pea tagata ina ia maua aogā o lenei ‘taimi tonu e talileleia ai.’—Ioa. 10:16.

8. Aiseā e mataʻina ai le ʻaiʻoi mai o le Atua e toe faia se leleiga ma ia?

⁸ E ese le mataʻina o le ʻaiʻoi mai o le Atua ina ia toe fai se leleiga ma ia, talu ai, ua faaleagaina le faiā a tagata ma le Atua ona ua fouvale le tagata i Etena. A o lea ua taulamua le Atua e toe faia se faaleleiga ma i latou. (1 Ioa. 4:10, 19) E faapefea? Ua tali mai Paulo: “Ua toe faaleleia e le Atua le lalolagi iā te ia e ala iā Keriso, ua lē taʻua iā i latou a latou agasala, a ua tuuina mai le upu o le leleiga iā i matou.”—2 Kori. 5:19; Isa. 55:6.

9. O le ā na faia e Paulo e faaalia ai lona talisapaia o le alofa mutimutivale o le Atua?

⁹ Na saunia e Ieova le taulaga togiola, lea ua mafai ai ona faamagaloina solitulafono a ē e faatuatua i ai, ma toe faia ai se leleiga ma ia. E lē gata i lea, na ia auina atu foʻi ona sui e uunaʻia tagata i atunuu uma, ina ia saʻilia le filemu ma ia, a o mafai. (Faitau le 1 Timoteo 2:3-6.) O le iloa e Paulo o le finagalo o le Atua ma lona malamalama i le vaitaimi na ola ai, na lē faavaivai ai o ia e faia le “faiva o le leleiga.” E leʻi suia le finagalo o Ieova. O loo finagalo pea le Atua ia toe maua e tagata i aso nei se faiā lelei ma ia. O loo aogā pea upu a Paulo: “O le taimi tonu lenei e talileleia ai” ma: “O le aso lenei o le faaolataga.” Maʻeu se Atua ina a alofa mutimutivale ma alofa fua, o Ieova!—Eso. 34:6, 7.

Aua Neʻi ‘Misia Lona Fuafuaga’

10. O le ā le uiga o le ‘aso o le faaolataga’ i Kerisiano faauuina i aso ua mavae, ma aso nei?

¹⁰ O i latou na muaʻi aogā i ai le agalelei faifua o le Atua, o ē ‘ua autasi ma Keriso.’ (2 Kori. 5:17, 18) Na amata i le Penetekoso 33 T.A., le ‘aso o le faaolataga’ mo i latou. E mai lava i lenā taimi, na tuuina atu ai iā i latou le galuega e folafola atu le “upu o le leleiga.” O loo faaauau pea ona faia e le vaega totoe o Kerisiano faauuina i aso nei le “faiva o le leleiga.” Ua latou iloa, o agelu e toʻafā na vaaia e le aposetolo o Ioane i le faaaliga faavaloaga, o loo “taofimau i matagi e fā o le lalolagi, ina ia lē agi atu i le laueleele.” O lea la, o loo avea pea le taimi nei ma ‘aso o le faaolataga,’ ma ‘taimi tonu e talileleia ai.’ (Faaa. 7:1-3) O le māfuaaga lea, talu mai le amatamataga o le 20 senituri, o loo galulue maelega le vaega totoe faauuina e faia le “faiva o le leleiga,” seʻia oo i tuluʻiga o le lalolagi.

11, 12. Na faapefea ona faaalia e Kerisiano faauuina i le amatamataga o le 20 senituri lo latou mataalia i le taimi? (Tagaʻi i le ata i le itulau e 15.)

¹¹ O se faataʻitaʻiga, ua taʻua i le tusi Jehovah’s Witnesses—Proclaimers of God’s Kingdom e faapea, i le amatamataga o le 20 senituri, “na matuā talitonu ai C. T. Russell ma ana aumea, ua latou iai i le taimi o le seleselega, ma e manaʻomia ona faalogo tagata i le upu moni o le saʻolotoga.” O le ā na latou faia? I le iloa o loo latou iai i le taimi o le seleselega, o le ‘⁠taimi tonu e talileleia ai,’ na manatu ai nei uso, e lē lava le tau ina valaaulia o tagata e ō mai i sauniga faalelotu. O le mea lenā ua leva ona faia e taʻitaʻi o lotu ua vavaeese mai le faa-Kerisiano moni. Ona saʻili loa lea e Kerisiano faauuina nisi auala e  faasalalau atu ai le tala lelei. O nisi o na mea, ua latou faaaogā lelei auala faaonapōnei e faaauiluma ai la latou galuega.

¹² Ina ia faasalalau atu le tala lelei o le Malo, na faaaogā ai e se vaega toʻaitiiti o faifeʻau maelega, ni savali, tamaʻi pepa, mekasini ma tusi. Na latou saunia foʻi lauga ma mataupu e faasalalau atu i le faitau afe o nusipepa. Na faasalalau atu lauga faale-Tusi Paia i leitiō a le atunuu ma isi atunuu. Na latou faia ma faaaogā ata e gaoioi ma tautatala, a o leʻi faia e le ʻaufaitifaga ata faapena mo le lautele. O ā iʻuga o na taumafaiga maelega ma le lē faavaivai? I aso nei, e tusa ma le fitu miliona tagata ua tali mai ma auai i le folafolaina atu o le feʻau: “Ia outou toe lelei ma le Atua.” Ioe, o na auauna a Ieova na amataina le galuega, ua avea ma faaaʻoaʻoga lelei o le maelega, e ui ina gata mai mea e latou te mafaia.

13. O le ā le fuafuaga a le Atua e tatau ona tatou faatāuaina?

¹³ O loo tumau pea le moni o upu a Paulo, “o le taimi tonu lenei e talileleia ai.” Ua tatou tofo i le agalelei faifua o Ieova, ma e lagona le lotofaafetai, ona ua maua le avanoa e faalogo ai ma talia le feʻau o le leleiga. O lea, e tatou te lē nofoaʻi ae faatāua upu nei a Paulo: “Ua matou ʻaiʻoi atu ai foʻi iā te outou, e aua neʻi talia le agalelei faifua o le Atua, ma misia ai lona fuafuaga.” (2 Kori. 6:1) O le fuafuaga o le agalelei faifua o le Atua, ia ‘⁠toe faalelei le lalolagi iā te ia’ e ala iā Keriso.—2 Kori. 5:19.

14. O ā avanoa ua iai nei i le tele o atunuu?

¹⁴ O le toʻatele o tagata ua faatauaso e Satani, o loo faaesea pea i latou mai i le Atua, ma lē iloa ai le fuafuaga o le agalelei faifua o le Atua. (2 Kori. 4:3, 4; 1 Ioa. 5:19) Ae peitaʻi, o le faateleina o tulaga leaga i le lalolagi, ua talia ai e le toʻatele le feʻau ina ua iloa, o le faaesea mai i le Atua, o le pogai lenā o mea leaga ma mafatiaga uma. E oo lava i atunuu e lē o ano mai le toʻatele i la tatou talaʻiga, ua talia nei le tala lelei ma gaoioi e toe faalelei ma le Atua. Po ua tatou malamalama la, o le taimi tonu lenei e tatou te matuā maelega ai e faailoa atu le ōlega: “Ia outou toe lelei ma le Atua”?

15. O le ā e tatou te mananaʻo ia iloa e tagata uma, nai lo o le talaʻi o se feʻau e na ona faafiafia ai i latou?

¹⁵ O la tatou galuega, e lē na o le taʻu atu i tagata afai e foʻi i le Atua, ona fesoasoani mai lea o ia i o latou faafitauli uma, ma faafiafia ai i latou. O le mea tonu lenā e mananaʻo ai le toʻatele o loo auai i lotu, ma ua taumafai lotu e faamalie lenā manaʻoga. (2 Timo. 4:3, 4) E lē o le autū lenā o la tatou faiva. O le tala lelei o loo tatou talaʻia, e faatatau i le alofa o Ieova, ma ua finagalo ai e faamagalo agasala a tagata, e ala iā Keriso. O lea, e lē toe faaesea ai tagata mai i le Atua, ae faia se leleiga ma ia. (Roma 5:10; 8:32) Peitaʻi, ua lata mai lava le iʻuga o le ‘⁠taimi tonu e talileleia ai.’

“Ia Maelega i la le Agaga”

16. O le ā le māfuaaga o le lototele ma le maelega o Paulo?

¹⁶ E faapefea la ona atiaʻe ma tumau lo tatou maelega mo le tapuaʻiga moni? O nisi e matamumuli ma e lē tautatala soo, e faigatā ai ona faaali atu uiga faaleuō ma māfana. A ia manatua, o le maelega e lē na o le faaali  atu o lagona o se tagata pe a naunau e fai se mea, e lē faalagolago foʻi i uiga o se tasi. Na taʻua e Paulo le auala e atiaʻe ma tausia ai le maelega o ona uso Kerisiano: “Ia maelega i la le agaga.” (Roma 12:11) E tele se vaega ua faia e le agaga o Ieova i le faatumauina o le lototele ma faaauau ai pea ona talaʻi. Na tumau pea le maelega o Paulo i le sili atu ma le 30 tausaga, talu mai le taimi na valaauina ai e Iesu, seʻi oo ina faafalepuipui ma faamaturoina i Roma. Na faalagolago o ia i le Atua o lē na foaʻi mai le malosi na ia manaʻomia. Na faapea mai o ia: “O mea uma lava, ua ou maua le malosi mai iā te ia o lē na foaʻi maia iā te aʻu le mana.” (Fili. 4:13) E tele ni aogā e tatou te aʻoaʻoina mai i lana faaaʻoaʻoga!

17. E faapefea ona tumau lo tatou “maelega i la le agaga”?

¹⁷ O le upu ua faaliliuina i le “maelega” i le mau lea, e uiga foʻi i le “pupuna.” (Kingdom Interlinear) Ina ia pupuna pea se tipoti vai, e tatau ona ola le eletise pe tafu pea le afi ia aasa. E faapena foʻi le “maelega i la le agaga,” e manaʻomia ona liligi mai pea le agaga o le Atua iā i tatou. O le auala e maua ai, o le faaaogā lea o sauniuniga uma ua faia e Ieova e faamalosia ai i tatou faaleagaga. O lona uiga, ia matuā faatāua tapuaʻiga a o tatou aiga ma le faapotopotoga, ia faia e lē aunoa au lava suʻesuʻega ma suʻesuʻega a le aiga, tatalo, ma auai i sauniga ma o tatou uso Kerisiano. E fesoasoani lenā mea e ola ai pea iā i tatou le “afi” faafaatusa, e tatou te “pupuna” ai pea ma tumau ai ona “maelega i la le agaga.”—Faitau le Galuega 4:20; 18:25.

18. I le avea o ni Kerisiano papatisoina, o le ā le sini e tatau ona tatou uaʻi atoatoa i ai?

¹⁸ O se tagata e uaʻi atoatoa atu i se sini, e taulaʻi pea i ai, ma e lē faigofie ona tosina ese pe faavaivai mai i le tuliloaina o lenā sini. O lo tatou sini o ni Kerisiano papatisoina, o le faia lea o so o se mea e finagalo Ieova e tatou te faia, e pei ona sa faia e Iesu. (Epe. 10:7) O le finagalo o Ieova i aso nei, ia faia e le toʻatele o tagata e mafai ai, se leleiga ma ia. O lea la, seʻi o tatou matuā maelega e faaaʻoaʻo iā Iesu ma Paulo, i le faia lea o lenei galuega e sili ona tāua ma faanatinati i aso nei.

E te Manatua?

• O le ā le “faiva o le leleiga” na tuuina atu iā Paulo ma isi Kerisiano faauuina?

• Na faapefea ona faaaogā lelei e le vaega totoe faauuina “le taimi tonu lenei e talileleia ai”?

• E faapefea ona “maelega i la le agaga” faifeʻau Kerisiano?

[Fesili mo le Suʻesuʻega]

[Ata i le itulau 12]

E leʻi galo iā Paulo le faaali atu o le Alii o Iesu Keriso iā te ia