“Sikhatsi Lesifanele Ngiso Lesi”

“Lalelani la, sikhatsi lesifanele ngiso lesi; lilanga lensindziso ngilo lona leli.”—2 KHOR. 6:2.

1. Kungani kufanele sikhetse kutsi ngukuphi lokubalulekile lokufanele sikwente ngesikhatsi lesitsite?

 “KONKHE kunesikhatsi sako, yonkhe intfo leyentekako inesikhatsi sayo lapha emhlabeni.” (Shu. 3:1) Solomoni abebhala ngekubaluleka kwekukhetsa sikhatsi lesifanele kute kwentiwe tintfo letibalulekile—kungaba kulima, kuvakasha, kucala libhizinisi, nobe kucoca nalabanye. Ngetulu kwaloko, natsi kufanele sikhetse kutsi ngumuphi umsebenti lobaluleke kakhulu lesingawenta ngesikhatsi lesitsite. Ngalamanye emagama, kufanele sati kutsi yini lebalulekile kitsi.

2. Sati njani kutsi ngesikhatsi alapha emhlabeni, Jesu abesicaphela sikhatsi labephila kuso?

² Ngalesikhatsi alapha emhlabeni, Jesu bekati kutsi uphila kusiphi sikhatsi kanye naloko lokwakufanele akwente. Kukhumbula kwakhe kutsi yini lebaluleke kakhulu kuye, kwamenta wati kutsi tiphrofetho letinyenti lebetimayelana naMesiya besetitawugcwaliseka. (1 Phet. 1:11; Semb. 19:10) Abenemsebenti wekutjela bantfu kutsi unguMesiya lotsenjisiwe. Bekufanele anikete bufakazi lobuphelele ngeMbuso waNkulunkulu futsi abutsele ndzawonye labo labebatawuba tindlalifa  kanye naye kulowo Mbuso. Jesu bekufanele asungule libandla lebuKhristu lebelitawuchubeka nemsebenti wekushumayela newekwenta bafundzi emhlabeni wonkhe.—Mak. 1:15.

3. Kucaphela kwaJesu sikhatsi labephila kuso, kwayitsintsa njani indlela labekenta ngayo tintfo?

³ Kucaphela kwaJesu kutsi abephila kusiphi sikhatsi kwamenta waba nemfutfo, kanye nenshisekelo yekwenta intsandvo yaBabe wakhe. Naku lakutjela bafundzi bakhe: “Kuvuna kukhulu, kodvwa tisebenti tincane. Thandazani kumnikati wekuvuna kutsi atfumele letinye tisebenti tekuvuna.” (Luk. 10:2; Mal. 4:5, 6) Jesu wacale wakhetsa labangu-12 waphindze wakhetsa labangu-70 kubafundzi bakhe, wabaniketa ticondziso, wabafundzisa kutsi bashumayele ngemlayeto lojabulisako lotsi: “Umbuso welizulu sewusondzele.” Naku lokunye lesiphindze sikufundze ngaJesu: ‘Kwatsi kube acedze kuyala bafundzi bakhe labebangu-12, wesuka lapho wayawufundzisa, washumayela emadolobheni akuleyo ndzawo.’—Mat. 10:5-7; 11:1; Luk. 10:1.

4. Pawula wamlingisa ngayiphi indlela Jesu Khristu?

⁴ Jesu abesibonelo lesihle kakhulu kubalandzeli bakhe sekuba nenshisekelo kanye nekutinikela. Naku umphostoli Pawula lakusho ngesikhatsi akhutsata lamanye emaKhristu: “Hambani etinyatselweni tami, njengobe nami ngihamba etinyatselweni taKhristu.” (1 Khor. 11:1) Pawula wamlingisa ngayiphi indlela Khristu? Ngalokuyinhloko, abenta konkhe lokusemandleni akhe kutsi ashumayele tindzaba letinhle. Etincwadzini latibhalela emabandla, sitfola emavi latsi “ningaphelelwa ngumdlandla,” ‘khontani iNkhosi,’ “nikhutsale emsebentini weNkhosi ngaso sonkhe sikhatsi,” kanye nalatsi “konkhe lenikwentako, kwenteni ngenhlitiyo, kube shangatsi nentela iNkhosi.” (Rom. 12:11; 1 Khor. 15:58; Khol. 3:23) Pawula akazange akukhohlwe loko lokwenteka nakahlangana neNkhosi Jesu Khristu ngesikhatsi ahamba aya eDamaseko, kanye nemavi aJesu lokungenteka wawatjelwa ngumfundzi Ananiyasi, latsi: “Lowo muntfu usitja sami lengisikhetsile kutsi siphatse libito lami kubetive nakumakhosi, nakubantfu baka-Israyeli.”—Imis. 9:15; Rom. 1:1, 5; Gal. 1:16.

“Sikhatsi Lesifanele”

5. Yini leyakhutsata Pawula kutsi ente umsebenti wekushumayela ngenshisekelo?

⁵ Nasifundza incwadzi yeMisebenti, sisibona ngalokucacile sibindzi kanye nenshisekelo Pawula layiveta ngesikhatsi enta umsebenti wekushumayela. (Imis. 13:9, 10; 17:16, 17; 18:5) Pawula wakucaphela kubaluleka kwesikhatsi labephila kuso. Watsi: “Lalelani la, sikhatsi lesifanele ngiso lesi; lilanga lensindziso ngilo lona leli.” (2 Khor. 6:2) Nga-537 B.C.E., bekusikhatsi lesifanele sekutsi labo labebatfunjelwe eBhabhulona babuyele eveni labo. (Isa. 49:8, 9) Pawula abekhuluma ngani lana? Loko lokucuketfwe ngulamavi kusisita sibone kutsi abecabangani.

6, 7. Ngumuphi umsebenti lobalulekile loniketwe emaKhristu lagcotjiwe lamuhla, futsi bobani labasebenta nawo?

⁶ Ekucaleni kwencwadzi yakhe, Pawula wakhuluma ngemsebenti lobalulekile lobewunikwe yena kanye nalamanye emaKhristu lagcotjiwe. (Fundza 2 Khorinte 5:18-20.) Wachaza kutsi bebabitwe nguNkulunkulu anenjongo lekhetsekile yekubanika ‘umsebenti wekubuyisana nalabanye,’ nobe kuncenga bantfu kutsi ‘babuyisane naNkulunkulu.’ Loku bekusho kuphindze ube ngumngani waNkulunkulu nobe kuba nekuthula naye.

⁷ Kusukela ekuhlubukeni kwase-Edeni, bonkhe bantfu baye bahlukaniswa naJehova. (Rom. 3:10, 23) Kwehlukaniswa naNkulunkulu  kuye kwabangela bonkhe bantfu kutsi bangamnaki Yena kanye netinjongo takhe, futsi loku kuholele ekuhluphekeni nasekufeni. Umphostoli Pawula wabhala: “Siyati kutsi kudzimate kube ngulesikhatsi indalo yonkhe iyabubula ngebuhlungu lobufana nemhelo.” (Rom. 8:22) Kodvwa Nkulunkulu utsatse tinyatselo tekukhutsata, nobe ‘kuncenga’ bantfu kutsi babuyisane naye. Lona bekungumsebenti lobewuphatsiswe Pawula kanye nalamanye emaKhristu lagcotjiwe angaleso sikhatsi. Leso “sikhatsi lesifanele” besingaba “lilanga lensindziso” kulabo lababa nekukholwa kuJesu. Onkhe emaKhristu lagcotjiwe kanye ‘naletinye timvu’ letisebenta kanye nawo, bachubeka bamema bantfu kutsi bazuze ‘kulesikhatsi lesifanele.’—Joh. 10:16.

8. Yini leyenta kuncengwa kwebantfu kutsi babuyisane naNkulunkulu kumangalise?

⁸ Lokuncengwa kwebantfu kutsi babuyisane naNkulunkulu kuyamangalisa kakhulu, ngobe ngisho nobe kungibo labanelicala lekonakala kwebuhlobo babo naNkulunkulu lokwabangelwa kuhlubuka kwase-Edeni—Nkulunkulu utsetse tinyatselo tekulungisa lowo monakalo. (1 Joh. 4:10, 19) Yini layentile? Pawula waphendvula: “Nkulunkulu ubuyisene nelive ngaKhristu. Bantfu akababambeli emagcubu ngetono tabo, kodvwa usiphatsise livi lekubuyisana.”—2 Khor. 5:19; Isa. 55:6.

9. Yini Pawula layenta kute akhombise kubonga ngemusa waNkulunkulu?

⁹ Ngekulungiselela umhlatjelo wesihlengo, Jehova wavula indlela yekutsi labo labanekukholwa batsetselelwe tono tabo baphindze babe nebuhlobo nobe kuthula naye. Ngetulu kwaloko, watfumela titfunywa takhe kute tikhutsate bonkhe bantfu kutsi babuyisane naye sikhatsi sisekhona. (Fundza 1 Thimothi 2:3-6.) Ngesizatfu sekutsi Pawula abeyicondza intsandvo yaNkulunkulu futsi acaphela sikhatsi labephila kuso, wasebenta ngenkhutsalo ‘emsebentini wekubuyisana nalabanye.’ Intsandvo yaJehova ayikashintji. Usafisa kutsi bantfu labehlukanisiwe naye bavuselele buhlobo babo naye. Emavi aPawula ekutsi “sikhatsi lesifanele ngiso lesi,” kanye nekutsi “lilanga lensindziso ngilo lona leli,” asasebenta nalamuhla. Jehova unguNkulunkulu lonemusa kanye neluvelo lolukhulu!—Eks. 34:6, 7.

‘Ningalahlekelwa Yinjongo Yawo’

10. “Lilanga lensindziso” liye lasho kutsini kumaKhristu lagcotjiwe, angesikhatsi lesengcile kanye newalamuhla?

¹⁰ Bantfu bekucala labazuza kulelitfuba lekubuyisana naNkulunkulu kwaba ngulabo ‘lebebamunye naKhristu.’ (2 Khor. 5:17, 18, NW.) Kubo, “lilanga lensindziso” lacala ngeliPhentekhoste la-33 C.E. Kusukela ngaleso sikhatsi, baye baniketwa umsebenti wekumemetela “livi lekubuyisana.” Lamuhla, insali yemaKhristu lagcotjiwe isachubeka ‘nemsebenti wekubuyisana nalabanye.’ Iyacaphela kutsi letingilosi letine umphostoli Johane latibona embonweni losiphrofetho “tibambe imimoya yomine yemhlaba kute kubete umoya lohhusha emhlabeni.” Ngako-ke, leli ‘kuselilanga lensindziso’ kanye ‘nesikhatsi lesifanele.’ (Semb. 7:1-3) Ngesizatfu saloku, kusukela ekucaleni kwelikhulu lema-20 leminyaka, insali yalabagcotjiwe iye yawufeza ngenshisekelo ‘umsebenti wekubuyisana nalabanye’ emhlabeni wonkhe.

11, 12. Ekucaleni kwelikhulu lesi-20 leminyaka, emaKhristu lagcotjiwe aveta njani kutsi abesicaphela sikhatsi labephila kuso? (Buka sitfombe lesisekhasini 23.)

¹¹ Njengobe kuvetiwe encwadzini letsi “OFakazi BakaJehova—Abamemezeli BoMbuso KaNkulunkulu,” ekucaleni kwelikhulu lesi-20 leminyaka, “C. T. Russell kanye nebangani bakhe bebakholelwa ngalokucinile ekutseni bebasesikhatsini sekuvuna kanye nekutsi bantfu bekudzingeka beve liciniso lelikhululako.” Yini labase bayayenta? Ngekucaphela kutsi basesikhatsini sekuvuna, ‘lokusikhatsi lesifanele,’ labazalwane abanetiswanga kumane bameme bantfu kutsi baye etinkonzweni tabo. Lena bekuyintfo bafundisi beTinkholo Letitsi TebuKhristu lebesebavele bayente sikhatsi lesidze. Kunaloko, lamaKhristu lagcotjiwe acala kufuna letinye tindlela letisebentako tekumemetela tindzaba letinhle. Lenye yato kwaba  kubusebentisa ngekuhlakanipha bucwephesha bangaleso sikhatsi kute batfutfukise umsebenti wabo.

¹² Kute kumenyetelwe tindzaba letinhle teMbuso, lelo cembu lelincane letikhonti letinenshisekelo belisebentisa emapheshana, tincwajana, bomagazini, kanye netincwadzi. Baphindze babhala tinshumayelo kanye netihloko letatishicilelwa etinkhulungwaneni temaphephandzaba. Bebasakata tinhlelo letimayelana nemiBhalo ngetiteshi temisakato takulelo live nobe tasemhlabeni wonkhe. Bebakha futsi basebentise titfombe letinyakatako letatisetjentiswa kanye nemisindvo letsetjuliwe leseceleni, ngisho nangembikwekutsi inkampani yemabhayisikobho yakhele bantfu titfombe letinyakatako letihambisana nemisindvo. Waba yini umphumela walenshisekelo yabo lengapheli? Lamuhla, kunebantfu labangaba tigidzi letisikhombisa labaye bawulalela futsi bawumemetela lomlayeto lotsi: “Buyisanani naNkulunkulu.” Letikhonti taJehova tasesikhatsini lesengcile betisibonelo lesihle sekuba nenshisekelo ngisho nobe betimbalwa futsi tite lokuhlangenwe nako.

13. Nguyiphi injongo yaNkulunkulu lokufanele siyinakisise?

¹³ Lamavi aPawula latsi “sikhatsi lesifanele ngiso lesi” aseliciniso nalamuhla. Tsine lesesiwubonile umusa waJehova lomkhulu siyajabula ngobe siye saniketwa litfuba lekuva nelekwemukela umlayeto wekubuyisana. Kunekutsi singabi nandzaba, sinakisisa emavi aPawula latsi: “Siyanincengisisa sitsi: Ningawemukeli umusa waNkulunkulu, bese nilahlekelwa yinjongo yawo.” (2 Khor. 6:1, NW.) Injongo yemusa waNkulunkulu lomkhulu ‘kubuyisana nelive’ ngaKhristu.—2 Khor. 5:19.

14. Nguyiphi intfutfuko leyentekako emaveni lamanyenti?

¹⁴ Bantfu labanyenti labaphumphutsekiswe nguSathane, behlukaniswe naNkulunkulu futsi abayinaki injongo yemusa wakhe. (2 Khor. 4:3, 4; 1 Joh. 5:19) Nanobe kunjalo, timo talelive letiya tiba timbi kakhulu tente labanyenti basabela nabatjengiswa kutsi kwehlukaniswa naNkulunkulu ngiko lokubangele bubi kanye nekuhlupheka kwebantfu. Ngisho nasemaveni lapho bantfu bakhona bebete inshisekelo ngemsebenti wetfu wekushumayela, labanyenti kubo sebayatemukela tindzaba letinhle futsi sebatsatsa sinyatselo sekubuyisana naNkulunkulu. Siyacaphela yini kutsi nyalo sikhatsi sekutsi sibe nenshisekelo lenkhulu ekumemeteleni sicelo lesibalulekile ‘sekubuyisana naNkulunkulu’?

15. Kunekutsi sishumayele umlayeto lowenta bantfu bajabule, yini lesifuna bantfu kuyo yonkhe indzawo bayati?

¹⁵ Umsebenti wetfu awusiko kumane sitjele bantfu kutsi nababuyela kuNkulunkulu, utawubasita bacatulule tinkinga labanato futsi abente bative bancono. Nguloko bantfu labanyenti labasuke bakufuna nabaya esontfweni, futsi emasontfo atimisele kugcwalisa leso sifiso. (2 Thim. 4:3, 4) Lona akusiwo umgomo wemsebenti wetfu. Tindzaba letinhle lesitishumayelako timayelana nekutsi, ngelutsandvo lwakhe, Jehova utimisele kutsetselela tono ngaKhristu. Ngaleyo ndlela, bantfu bangakwati kukhululeka ekuhlukanisweni naNkulunkulu, babuyisane naye. (Rom. 5:10; 8:32) Nanobe kunjalo, “sikhatsi lesifanele” sesiya ekupheleni.

‘Vutsani Emoyeni’

16. Yini leyasita Pawula kutsi abe nesibindzi kanye nenshisekelo?

¹⁶ Singayakha futsi siyilondvolote njani inshisekelo yetfu ngekukhonta kweliciniso? Labanye kungenteka kutsi banemahloni futsi abasibo  bantfu labatsandza kukhuluma, ngako bangase bakutfole kumatima kuveta imiva yabo nobe kuba nebungani. Nanobe kunjalo, kuhle kukhumbula kutsi inshisekelo ayisiwo nje umuva lobonakala ngaphandle nobe kujabula; futsi ayiyi ngebuntfu betfu. Pawula waveta indlela yekwakha kanye nekulondvolota inshisekelo ngesikhatsi akhutsata emaKhristu labekanye nawo: ‘Vutsani emoyeni!’ (Rom. 12:11) Umoya waJehova ngiwo lowadlala indzima lenkhulu ekwenteni lomphostoli kutsi abe nesibindzi kanye nekubeketela emsebentini wekushumayela. Kusukela ngalesikhatsi abitwa nguJesu, kuya ekuboshweni kanye nasekushushisweni kwakhe eRoma—kwaba yiminyaka lengetulu kwa-30, futsi inshisekelo yakhe ayizange iphele. Abehlala atsembele kuNkulunkulu, labemcinisa ngemoya wakhe. Pawula watsi: ‘Nginemandla ekwenta konkhe ngaloyo longicinisako.’ (Fil. 4:13, NW.) Natsi singazuza kakhulu ngekufundza esibonelweni sakhe!

17. ‘Singavutsa’ njani ‘emoyeni’?

¹⁷ Ligama lelihunyushwe ngekutsi ‘vutsani,’ ngekwe-Kingdom Interlinear lisho “kubila.” Kute sigcine emanti lasegedleleni abila, kufanele sibe nemlilo lowenele. Ngendlela lefananako, kute ‘sivutse emoyeni,’ kufanele sihlale sinemoya waNkulunkulu. Kute sikwati kuwutfola, kufanele sisebentise konkhe loko Jehova lasiniketa kona kute asicinise ngekwakamoya. Loko kusho kutsi kufanele sikutsatse njengalokubalulekile kukhonta kwemndeni kanye nekwelibandla—sibe naso njalo sifundvo lesitichubela sona kanye nesemndeni, sithandaze ngaso sonkhe sikhatsi, futsi sihlangane njalo nalamanye emaKhristu. Kwenta kanjalo kutawusisita sibe ‘nemlilo,’ lotawusenta sihlale ‘sibila,’ futsi ‘sivutsa emoyeni.’—Fundza Imisebenti 4:20; 18:25.

18. NjengemaKhristu latinikele, nguyiphi intfo lokufanele siyinake kakhulu?

¹⁸ Umuntfu lotinikele uyayati intfo layifunako, futsi akaphatamiseki nobe advumateke kamelula ekuyifuneni. Tsine njengemaKhristu latinikele sifuna kwenta konkhe loko Jehova lafuna sikwente, njengobe naJesu enta. (Heb. 10:7) Intsandvo yaJehova lamuhla, ikutsi bantfu labanyenti babuyisane naye. Ngako-ke, asitimisele kutsi silingise Jesu kanye naPawula, kulomsebenti lophutfuma kangaka lokufanele wentiwe lamuhla.

Usakhumbula?

• Ngumuphi ‘umsebenti wekubuyisana nalabanye’ lowaniketwa Pawula kanye nalamanye emaKhristu lagcotjiwe?

• Insali yemaKhristu lagcotjiwe isisebentisa kahle ngayiphi indlela “sikhatsi lesifanele”?

• Tikhonti letingemaKhristu ‘tingavutsa njani emoyeni’?

[Imibuto Yesihloko Lesifundvwako]

[Sitfombe ekhasini 20]

Pawula akazange akukhohlwe loko lokwenteka nakahlangana neNkhosi Jesu Khristu