“Ka Hegen Je I Lu Shighe U Doon ye”
“Ka Hegen Je I Lu Shighe U Doon ye”
“Nenge, ka hegen je i lu shighe u doon ye, nenge ka hegen i lu iyange i myom kpaa ye.”—2 KOR. 6:2.
1. Gba u se fa kwagh u a hembe lun hange hange u se er hen ma shighe keng sha ci u nyi?
“HANMA kwagh ngu a ayange na; man shighe kpaa ngu sha ci u hanma kwagh sha won.” (Orpa. 3:1) Solomon yange nger kwagh ne sha u tesen er i lu a inja u or a fa shighe u a hembe doon u nana er ma kwagh u injaa yô, a lu sule kahan shin zende shin kpenga u eren shin u lamen a mbagenev kpaa. Nahan kpa, shi gba u se fa tom u ú hembe lun hange hange u se er keng, hen ma shighe yô. Inja na yô, gba u se fa kwagh u a hembe lun se a inja la a wanger se.
2. Er nan ve se fe ser shighe u Yesu lu pasen kwagh la yange fa shighe u lu ker la wang-na?
2 Shighe u Yesu lu shin tar la, a fa shighe u lu ker la man kwagh u gba u una er la kpa vighe vighe. Er fa akaa a a hemba lun un hange hange hen shighe la wang yô, yange fa je ér lu shighe u akaaôron a profeti a sha kwagh u Mesiya la aa kure sha mi je la. (1 Pet. 1:11; Mpa. 19:10) Yange gba u una er tom u pasen ior sha u ve fa wang er un lu Mesiya u ityendezwa la yô. Yange gba u una pase mimi u sha kwagh u Tartor la sha gbashima shi una kohol mba vea za tema tor a na ken Tartor la yô. Shi yange gba u una wa imaagh ki tiônnongo u Kristu, u lu u una er tom u geman ior hingir mbahenen, a ar ken ikighir i tar la.—Mar. 1:15.
3. Er Yesu fa shighe u lu ker la yô, kwagh la mgbegha un u eren nena?
3 Er Yesu fa shighe u lu ker la yô, kwagh la mgbegha un u eren ishima i Ter na sha gbashima. A kaa a mbahenen nav ér: “Sunda yô, ngee, kpa mbatomov yô, gema mba ciôn tsô; nahan yô, sôn nen Ter u sunda A̱ tindi mbatomov ken sunda Na.” (Luka 10:2; Mal. 4:5, 6) Yesu yange hii tsuan iorov 12, shi va tsua mbagenev 70 ken atô u mbahenen nav, na ve akaawan a wasen ve u eren tom la, maa tindi ve ér ve za pase loho u sagher iyol ne, ve kaan ér: “Tartor u Sha mgbôghom ve.” Í ôr kwagh u Yesu iyol na ér: “Yesu wa mbahenen Nav mba pue kar uhar mbara kwagh been yô, A mough heregh kera, sha u za tesen man u ôron kwaghaôndo ken agar a ve.”—Mat. 10:5-7; 11:1; Luka 10:1.
4. Paulu lu or u kaven Kristu sha nyi gbenda?
4 Yesu ver mbadondon un ikyav i vough i lun a gbashima shi nan ishima sha tom. Ka kwagh u apostoli Paulu lu ôron shighe u kaa a mbananjighjigh a na imôngo ér: “Lu nen mbakaven mo er mo kpaa, m kaven Kristu nahan” je la. (1 Kor. 11:1) Paulu lu or u kaven Kristu sha nyi gbenda? Gbenda u vesen u yange eren kwagh ne yô, lu sha u pasen loho u dedoo la kpoghuloo, tangen iyol ga. Ken uwashika mba Paulu nger hen atôônanongo la, se nenge a asember ker, er “Uwer u̱ de gbe ne sha gbashima ga,” man “shiren nen Ter tom” man “eren nen tom u Ter ngegh je sha hanma shighe cii,” man “Hanma kwagh u ne eren cii yô, eren nen un, i̱ lu sha ishima i môm er ka sha ci u Ter nahan. “ (Rom. 12:11; 1 Kor. 15:58; Kol. 3:23) Mayange Paulu hungur shighe Ter Yesu Kristu ande hen a na sha gbenda u zan Damaseku man mkaanem ma Yesu, ma a shi nan kpa lu orhenen Anania ôr un la ga, ma kaa ér: “Gadia un ka ikyagh ki i tsegh ki sha ci Wam sha u una zende a iti Yam sha ishigh ki atôatyev man utor kua Mbaiserael serael kpaa yô.”—Aer. 9:15; Rom. 1:1, 5; Gal. 1:16.
“Shighe u Doon”
5. Kanyi yange i mgbegha Paulu u pasen kwagh sha gbashima?
5 Aluer se ôr takerada u Aerenakaa yô, se nenge a gbashima man ishimataver i Paulu lu a mi sha tom na u pasen kwagh la wang. (Aer. 13:9, 10; 17:16, 17; 18:5) Paulu yange kav er shighe u lu ker la lu shighe u injaa yô. A kaa ér: “Nenge, ka hegen je i lu shighe u doon ye, nenge ka hegen i lu iyange i myom kpaa ye.” (2 Kor. 6:2) Ken inyom i 537 C.S.Y. (Cii man Shighe u Yesu) la, lu shighe u doon u Mbayuda mba ve due ken uikyangen ken tar u Babilon la vea hide ken tar ve yô. (Yes. 49:8, 9) Kpa lu kwagh u nyi Paulu lu ôron heene? Kwaghôron u Paulu la jimin cii una wase se u fan awashima na.
6, 7. Ka ian i civirigh i nyi i ne Mbakristu mba i shighe ve mkurem mbara nyiana, man ka unô ve lu eren tom a mba i shigh ve mkurem la ityôô?
6 Paulu vande ôron kwagh u ian i civirigh i í na un kua Mbakristu mbagenev mba i shighe ve mkurem la ken washika na ne. (Ôr 2 Mbakorinte 5:18-20.) A pase ér Aôndo yila ve jighilii sha u ve pase “loho u mhim,” ve zamber a ior ér “i̱ hime [ve] a Aôndo.” Inja i kwagh la yô, lu u wasen ior sha u ve hide shi ve yar ikyar a Aôndo shin ve lu a na ken mzough.
7 Hii shighe u ihyembeato nyôr ken Eden la je, uumace hingir paleghaa a Aôndo. (Rom. 3:10, 23) Mlu u paleghaa la na yô, uumace cii nyôr ken ime i ken jijingi, hingir u vea yaan ican shi vea kpeen. Paulu nger ér: “Gadia se fa akaa a i gbe a sha won cii la nga kinen imôngo nga toghor zan zan hegen.” (Rom. 8:22) Kpa Aôndo gema er kwagh u kaan ior, man jim je yô, u zamber ior ér ve hide hen a na, i̱ hime ve a na. Lu loho u i na Paulu kua Mbakristu mba ve kpa i shighe ve mkurem sha ayange la je la. “Shighe u doon” la gema lu “iyange i myom” hen mba ve na Yesu jighjigh yô. Mbakristu mba i shigh ve mkurem la cii kua “iyôngo igen,” i i lu akar a ve, ve eren tom a ve ityô la mba lôhôn ior her ér ve zua a iwasen hen “shighe u doon” ne.—Yoh. 10:16.
8. Kanyi i ne ve mlehe u i lu lôhôn ior ér ve va hime a Aôndo la i lu kwagh u vesene?
8 Er i hii ve mlehe u i lu lôhôn ior ér ve hime a Aôndo la a lu kwagh u vesen yô, ka sha ci u, shin er lu uumace hemba ato ken Eden ve, ve hingir ityough gondo a Aôndo nahan kpa, Aôndo iyol na gema er kwagh u himen iyongo la. (1 Yoh. 4:10, 19) A er nyi? Paulu na ikyar ér: “Aôndo lu ken Kristu, lu himen tar a iyol Na, kera na ve ibo sha mbamper mba ve per tindi la ga, shi A na se loho u mhim la sha ikyev kpaa.”—2 Kor. 5:19; Yes. 55:6.
9. Paulu yange er nyi u tesen ér un ngu a iwuese sha mhôônom ma Aôndoo?
9 Er Yehova na nagh ku ipaan yô, a ver ian sha er mba ve ne jighjigh cii a de ve asorabo ve, nahan vea hime a Aôndo shi vea hide a ya ikyar a na shi vea lu a na ken mzough yô. Heela tseegh ga, a tindi mbatomov nav sha u ve kaa a ior mba sha tar cii ér ve hime iyongo a Aôndo hegen u ian i lu her ne. (Ôr 1 Timoteu 2:3-6.) Paulu kaven awashima u Aôndo man shighe u lu ker la yô, a er tom u pasen “loho u mhim” ne sha gbashima. Awashima u Yehova gema ga. Nyian kpa, sar un u uumace mba ve lu paleghaa a na la ve hime a na. Mkaanem ma Paulu man ma a inja her, ma kaa ér: “Nenge, ka hegen je i lu shighe u doon ye, nenge ka hegen i lu iyange i myom kpaa ye”. Yehova ka Aôndo u mhôôn kpen kpen!—Eks. 34:6, 7.
“I̱ De Lu Gbilinkwagh Ga”
10. “Iyange i myom” la ngi a inja hen Mbakristu mba i shigh ve mkurem mba tsuaa mbara man mba nyian nena?
10 Ior mba ve hii zuan a iwasen sha ian i himen a Aôndo ne yô, lu mba ve lu “ken Kristu” la. (2 Kor. 5:17, 18) Hen mban yô, “iyange i myom” la hii sha iyange i Pentekosti u inyom i 33 la. Hii shighe la je, i wa amba la tom u yôôn “loho u mhim la” sha ikyev. Nyian ne, asande a Mbakristu mba i shigh ve mkurem mba ve shi her la mba eren “tom u mhim la” her. Ve fa er mbatyomov mba unyiin mba apostoli Yohane nenge a ve ken mpase u sha mnenge la ‘ve ker ahumbe a anyiin a sha tar la’ her, ‘sha u ma ahumbe a̱ de pever shin tar ga’ yô. Sha nahan yô, “shighe u doon” man “iyange i myom kpaa” la ngi a bee ga. (Mpa. 7:1-3) Sha ityôkyaa ne yô, hii ken mhii u derianyom u sha 20 la je, asande a mba i shigh ve mkurem la mba eren “tom u mhim” la aren ken azongo a tar ne a gban ica la.
11, 12. Mbakristu mba i shigh ve mkurem mbara yange ve tese ér ve fa shighe u ve lu ker la sha mhii u derianyom u sha 20 la nena? (Nenge foto u sha peeji 15 la.)
11 Ikyav i tesen yô, er i tese ken takerada u i yer ér Jehovah’s Witnesses—Proclaimers of God’s Kingdom la nahan, derianyom u sha 20 la yange hiin yô, “C. T. Russell man akar a na na jighjigh taveraa ér ve mba ken shighe u sunda, nahan a gba u ior vea ungwa mimi u pasen ior tuhwan la.” Tsô ve er nyi sha kwagh nee? Er anmgbianev mban kav ér ve mba ken shighe u sunda, u a lu “shighe u doon” la yô, ve nenge ér u lôhôn a lôhô ior ér ve va kohol hen ijiir i môm sha u ungwan loho la tseegh kuma ga. Lu kwagh u mbahemenev mba Mbakristu mbaaiev vanden eren anyom anyom je la. Kpa Mbakristu mba i shigh ve mkurem mbara gema hii u keren igbenda igen i samber a loho u dedoo. Môm ken akaa a yange ve er yô, ve yar tom a iwavaren i hen shighe la sha ci u mzehemen u tom ve la.
12 Annongo u mba pasen kwagh sha gbashima la yar tom a utrak man ityakerada i kiriki man umagazin kua ityakerada i vesen sha u samber a loho u dedoo u Tartor la. Shi ve nger ilyoho man ungeren kpishi ve na i gber ken upipambaabaver udubu udubu. Ve pase mkaanem ma ken Ruamabera sha mtôm ma redio ken ityar kposo kposo kua mtôm ma redio ma tar cii ungwan la kpaa. Ve er usenema mba kuran ikyenge shi tesen foto u ior er ve zenden sha ve eren akaa shi ve lamen la, cii ve ikyômpeni i eren ufiim va mase duen a ufiim mba tesen foto u ior er ve zenden sha ve eren akaa shi ve lamen la ye. Lu nyi i due ken gbashima ve u taveraa nee? Nyian ne, ior mba kuman umiliôn utaankaruhar nahan ve vengese mlehe ve la shi ve kohol ve, mba yôôn loho shon a ve imôngo ér: “I̱ hime ne a Aôndo.” Sha kpôô yô, mbaciviraôndo mba tsuaa mbara ver se ikyav i dedoo i lun a gbashima sha tom, shin er akaa a tagher ve ban ga nahan kpaa.
13. Ka awashima u Aôndo u nyi i doo u se lu a mi ken ishima?
13 Nyian kpa, mkaanem ma Paulu ôr wener “hegen ka shighe u doon” la ma a inja. Se mba i ne se mlumun u sha mhôôn u Yehova yô, se mba a iwuese kpishi er i ne se ian i ungwan loho u mhim ne shi lumun u nahan. Se haa iyol inya ga, kpa se tôô mkaanem ma Paulu seer ôron man ser ka asenge ga; ma kaa ér: “Se mba wan ne kwagh ser, mngohol u ne ngohol mlumun u sha mhôôn u Aôndo yô, i̱ de lu gbilinkwagh ga.” (2 Kor. 6:1) Awashima u mhôônom ma Aôndo yô, ka u “himen tar a iyol Na” ken Kristu.—2 Kor. 5:19.
14. Ka aan a nyi a lu bughun ken itiar kpishi?
14 Satan pir uumace kpishi ashe, nahan mba paleghaa a Aôndo her shi ve fa awashima u mhôônom nam ga. (2 Kor. 4:3, 4; 1 Yoh. 5:19) Nahan kpa, er tar u lu vihin seer a seer yô, ka a tese mbagenev ér ka er uumace ve lu paleghaa a Aôndo ve akaabo kua atsan a tseren uumace cii shin tar ne yô, ve ungwa. Ken itiar i ior kpishi ve soon u keghen ato a kwaghpasen wase ga je kpa, mbakpishiv mba ngohol loho u dedoo ne shi nôngon sha er vea hime a Aôndo yô. Sha nahan yô, se kav er shighe ne i lu shighe u se seer nan ayol a ase sha u samber a zamber ne sha gbashima ser: “I̱ hime ne a Aôndo” kpa?
15. Se mba pasen loho ser i doo ior u ungwan tsô ga, kpa se soo u wasen ior cii ser ve fa nyi?
15 Tom wase yô, ka u gban kaan a ior tsô ser, aluer vea hide hen Aôndo yô, una bee a uzayol vev cii nahan, a lu ve guda ga. Ka kwagh u a ne ve ior kpishi ve ze adua je la, nahan ucôôci kpa girim ve iyol u nan ve akaa a ve soo la. (2 Tim. 4:3, 4) Se yô ka awashima u tom wase u pasen kwagh la ga. Loho u dedoo u se pasen yô, ser, dooshima u Yehova a lu a mi la na yô, a kegh iyol u den asorabo sha ikyev i Kristu. Sha nahan yô, ior vea fatyô u duen ken mlu u ve lu paleghaa a Aôndo la kera geman himen a na. (Rom. 5:10; 8:32) Nahan kpa, “shighe u doon” ne ngu yemen oo u za been.
“Luun Nen Mbatseen Asema [sha Jijingi]”
16. Kanyi yange i wase Paulu u lun a vangertiôr shi pasen kwagh sha gbashima?
16 Se er nan ve se za hemen u lun a gbashima sha kwagh u mcivir u mimi? Alaghga mbagenev vea cian ashe sha marami ve je, shin vea lu ior mba lamen kpishi ga, nahan alaghga a taver ve u eren kwagh gbugh gbu gbugh shin pasen er i lu ve ken ishima la gbar gbar. Nahan kpa, gba u se umbur ser gbashima ka di kwagh u tesen er ishima i lu se ker la sha iyol shin tesen msaanyol wase tsô ga, shi gbashima har sha aeren a or kpaa ga. Paulu tese kwagh u una wase se u lun a gbashima la zum u a wa mba ve lu Mbakristu a na imôngo la kwagh ér: “Luun nen mbatseen asema [sha jijingi, NW]” la. (Rom. 12:11) Jijingi u Yehova yange wase apostoli ne kpishi u wan ishima ken tom na u pasen kwagh la. Hii shighe u Yesu yila un la zan zan shighe u i va kar wuhen un ken gaadi ken gar u Roma shi i wua un, i kohol cii i hembe anyom 30 la, Paulu gba uwer sha tom ga. Paulu suur sha Aôndo hanma shighe cii, nahan Aôndo na un agee sha jijingi na. Paulu kaa ér: “M ngu a agee a eren akaa cii je ken Un u A taver mo ne.” (Fil. 4:13) Aluer se dondo ikyav ve yô, kwagh la una wase se kpishi je!
17. Se er nan ve se ‘iv a icighan jijingii’?
17 Inja i ishember i ken zwa Grika i Paulu yar tom a mi la kpôô kpôô yô ér u “pughur.” Aluer se jiidi mngerem shin tsua yô, saa se kenden usu ve ma a za hemen u pughur ye. Kape u se zan hemen u ‘lun mba tseen asema [sha jijingi, NW]’ la kpa i gbe u se luun a jijingi u Aôndo hanma shighe ve se kôrcio je la. Kwagh u se er ve se zua a jijingi u Aôndo yô, ka u eren tom a akaa a Yehova a ne se sha u taver se ken jijingi la cii. Sha nahan yô, gba u se tôô mcivir u hen tsombor man u ken tiônnongo la ser ka beerkwagh ga, se henen kwagh sha tseeneke wase kua hen tsombor shi se eren msen hanma shighe shi se kohol imôngo a Mbakristu mbagenev. Kwagh la una wase se u tseen ishima sha jijingi, er usu u i we sha u mngerem ma za hemen u pughur nahan.—Ôr Aerenakaa 4:20; 18:25.
18. Er se lu Mbakristu mba i er se batisema yô, doo u se har ishima yase sha awashima u nyi?
18 Or u i er nan batisema yô, ka or u nan ver ishima i nan cii sha awashima môm, u nan lumun ér ican i dan nan shin i na nan iyolkpen sha u kuren awashima la ga yô. Er se lu Mbakristu mba i er se batisema yô, awashima wase ka u eren nyityôkwagh i Yehova a soo ér se er cii, vough er Yesu kpa er nahan. (Heb. 10:7) Awashima u Yehova nyian yô, ka u ior kpishi mba ve fetyô cii, ve hime a na. Sha nahan yô, se er nen tom u hange hange man u ú hingir torough torough nyian ne sha gbashima, er Yesu man Paulu kpa ve er nahan.
Ú Umbur Kpa?
• Kanyi i lu “tom u mhim” u yange i na Paulu man Mbakristu mba i shigh ve mkurem mbagenev laa?
• Asande a mba i shigh ve mkurem la er tom a “shighe u doon” la nena?
• Mbakristu mba i er ve batisema vea er nyi ve vea ‘iv a icighan jijingii’?
[Mbampin mba ngeren u henen]
[Foto u sha peeji 12]
Mayange Paulu hungur shighe u Ter Yesu Kristu ande hen a na la ga