“Ecino Ncobeni Nceciindi Ceelede”
“Ecino Ncobeni Nceciindi Ceelede”
“Amubone! Ecino ncobeni nceciindi ceelede. Amubone! Obuno mbobuzuba bwalufwutuko.”—2 KO. 6:2.
1. Ino ncintu nzi cipati ncotweelede kucita?
“ZINTU zyoonse zilijisi ciindi cazyo, amakani oonse aansi alijisi mazuba aao.” (Muk. 3:1) Solomoni wakalemba mbociyandika kuzyiba ciindi ceelede cakucita zyintu mbuli kulima, kuswaya, makwebo naa kubandika abantu bambi. Nokuba boobo, tuyandika kuzyiba mulimo uyandika kapati kucita aciindi ceelede. Munzila imwi, tweelede kubona mulimo ngotweelede kucita kusaanguna.
2. Ino tuzyiba buti kuti Jesu naakali kukambauka wakalicizyi ciindi ncaakali kupona?
2 Naakali anyika, Jesu wakalicizyi ciindi ncaakali kupona alimwi ancakeleede kucita. Akaambo kakuti wakalizyi ncaakeelede kucita, wakalizyi kuti ciindi ncaakali kulangila cakuti businsimi bwabu Mesiya buzuzikizigwe bwakali afwaafwi. (1 Pe. 1:11; Ciy. 19:10) Wakali amulimo wakuzibya bantu kuti nguwakali Mesiya wakasyomezyegwa. Wakeelede kwaambilizya makani mabotu a Bwami akubunganya baabo mbakeelede kuya kulela limwi mu Bwami. Alimwi wakeelede kutalisya mbungano ya Banakristo yakeelede kubeleka mulimo wakukambauka akupanga basikwiiya munyika yoonse.—Mk. 1:15.
3. Ino Jesu wakacita nzi akaambo kakuzyiba ciindi ncaakali kupona?
3 Akaambo kakuti wakalizyi ciindi ncaakali kupona, eeci cakapa kuti Jesu abeleke canguzu mukucita kuyanda kwa Bausyi. Wakaambila basikwiiya bakwe kuti: “Ncobeni, mulimo wakutebula mupati, pele basimilimo mbasyoonto. Aboobo amulombe Simalelo wabutebuzi kuti atume basimilimo mumulimo wakwe wakutebula.” (Lk. 10:2; Malk. 4:5, 6) Kusaanguna, Jesu wakasala basikwiiya bali 12 kumane bali 70 akubapa malailile, amane wakabatuma kuti bakakambauke mulumbe uukkomanisya wakuti: “Bwami bwakujulu bwaswena afwaafwi.” Kweelana ambwaakaamba Jesu, tubala kuti: “Lino Jesu naakamana kupa malailile kuli basikwiiya bakwe bali kkumi ababili, wakazwa ooko akuunka kuyooyiisya akukambauka muminzi yabo.”—Mt. 10:5-7; 11:1; Lk. 10:1.
4. Ino muunzila nzi Paulo mwaakali kumwiiya Jesu Kristo?
4 Jesu wakali cikozyano cibotu cabusungu akulyaaba kuli baabo boonse bamutobela. Eeci ncakali kwaamba mwaapostolo Paulo nakali kwaambila basyominyina kuti: “Amwiiye ndime mbubonya andime mbondiiya Kilisito.” (1 Ko. 11:1) Ino munzila nzi Paulo mwakali kumwiiya Kristo? Wakacita zyoonse nzyakali kukonzya kucita kutegwa akambauke makani mabotu. Mumagwalo Paulo ngaakali kulembela mbungano tujana majwi aakuti “amube basungu, mutabi batolo pe,” “amubelekele Jehova cakulitakata mbuli bazike,” “lyoonse kamujisi zinji zyakucita mumulimo wa Mwami” alimwi “kufwumbwa ncomucita, amucicite camoyo woonse mbuli kuti mubelekela Jehova.” (Lom. 12:11; 1 Ko. 15:58; Kol. 3:23) Paulo tanaakaciluba cakamucitikila nibakaswaangana a Mwami Jesu Kristo munzila naakali kuya ku Damasko, amajwi ngaakamba Jesu ngaakali kwaambila Ananiya sikwiiya wakwe kuti amwaambile Paulo kuti: “Mwaalumi ooyu ncibelesyo ncindasala kuti akaambilizye zyina lyangu kuli bamasi akubami alimwi akubana ba Isilayeli.”—Mil. 9:15; Lom. 1:1, 5; Gal. 1:16.
“Ecino Ncobeni Nceciindi Ceelede”
5. Ino ncinzi cakapa Paulo kuti abeleke cabusungu mumulimo wakukambauka?
5 Notubala bbuku lya Milimo tulabona Paulo mbwakali sicamba alimwi ambwaakali musungu naakali kukambauka. (Mil. 13:9, 10; 17:16, 17; 18:5) Paulo wakalicizyi mbocakali kuyandika ciindi ncakali kupona. Wakaamba kuti: “Amubone! Ecino ncobeni nceciindi ceelede. Amubone! Obuno mbobuzuba bwalufwutuko.” (2 Ko. 6:2) Kaindi mu 537 B.C.E., nceciindi bantu bakatoledwe buzike ku Babuloni nobakeelede kujokela kwabo. (Is. 49:8, 9) Pele ino Paulo wakali kwaamba nzi aawa? Ncaakali kwaamba mucibalo cilakonzya kutugwasya kuzyiba ncaakali kuyeeya.
6, 7. Ino ncoolwe nzi ncibapegwa bananike Banakristo, alimwi aababo babeleka aabananike mazuba aano?
6 Kumatalikilo alugwalo lwakwe, Paulo wakaamba coolwe ncobakapedwe Banakristonyina bananike. (Amubale 2 Bakolinto 5:18-20.) Wakapandulula kuti bakaitwa a Leza kuti bacite “mulimo wakuyanzanya,” alimwi bakalomba bantu kuti ‘bayanzane a Leza.’ Eeci cakapa kuti batalike kumvwana alimwi a Leza.
7 Kuzwa ciindi nobakazanga mu Edeni, bantu boonse bakaleka kumvwana a Jehova. (Lom. 3:10, 23) Akaambo kakumuzangila capa kuti bantu banji batamuzyibi Leza amakanze aakwe, calo capa kuti kabapenga akufwa. Paulo wakalemba kuti: “Tulizyi kuti zilenge zyoonse zilatongela lyoonse akuba amacise caantoomwe kusikila lino.” (Lom. 8:22) Pele Leza wabweza ntaamu yakuti abalombe bantu kuti bapiluke kulinguwe naa kuti batalike kumvwana anguwe. Ooyu ngomulimo ngobakapedwe Paulo ababelesinyina Banakristo bananike eeco ciindi. Eeci “nceciindi ceelede” cikonzya kuba “buzuba bwalufwutuko” kuli baabo bamusyoma Jesu. Boonse Banakristo bananike ambobabeleka limwi “[ba]mbelele zimbi,” babelekela antoomwe kutegwa bazumanane kutamba bantu kuti bagwasyigwe ‘muciindi ceelede.’—Joh. 10:16.
8. Ino nkaambo nzi kutambwa kuti tumvwane a Leza ncokuyandika kapati?
8 Ikutamba bantu kuti batalike kumvwana a Leza kulayandika kapati nokuba kuti boonse bakajatikizyigwa ikuleka kumvwana a Leza akaambo kakuzanga kwakacitika mu Edeni, Leza lwakwe nguwakapa kuti batalike kumvwana alimwi. (1 Jo. 4:10, 19) Ino ncinzi ncibakacita? Paulo wakaingula kuti: “Kwiinda muli Kilisito Leza wakali kuyanzanya nyika kulinguwe mwini, katacibapi mulandu wazibi zyabo, alimwi wakatupa mulumbe waluyanzano oolu.”—2 Ko. 5:19; Is. 55:6.
9. Ino Paulo wakatondezya buti kuti wakalumba akaambo kalubomba ndwaakamutondezya Leza?
9 Kwiinda mucinunuzyo cacipaizyo, Jehova wakapa kuti aabo basyomeka kabalekelelwa zibi zyabo akuzumanana kumvwana anguwe. Kuyungizya waawo, wakatuma baiminizi bakwe kuti bagwasye bantu munyika yoonse kuti kabamvwana aanguwe neciciliko ciindi. (Amubale 1 Timoteyo 2:3-6.) Kuzyiba ncaakali kuyanda kucita Leza akubona ciindi ncaakali kupona, Paulo wakabeleka canguzu “[mu]mulimo wakuyanzanya.” Ikuyanda kwa Jehova takunacinca pe. Amazuba aano kuyanda kwa Jehova nkwakuti katumvwana anguwe. Majwi aa Paulo aakuti: “Lino nceciindi ceelede” alimwi “lino mbobuzuba bwalufwutuko” aciyandika kapati. Elo kaka Leza Jehova ulaaluzyalo alimwi mutete moyo!—Kul. 34:6, 7.
“Mutatambuli Luzyalo lwa Leza Cabuyo”
10. Ino “buzuba bwalufwutuko” bwaamba nzi ku Banakristo bananike bakaindi abaabo bacipona mazuba aano?
10 Bakasaanguna kugwasyigwa kulubomba oolu mbabaabo “[ba]kamantene a Kilisito.” (2 Ko. 5:17, 18) Kuli mbabo, “buzuba bwalufwutuko” bwakatalika mu Pentekoste 33 C.E. Kuzwa ciindi eeco ibali boobu bakapegwa mulimo wakwaambilizya “mulumbe waluyanzano.” Mazuba aano, bamucaala Banakristo bananike bacuubeleka “mulimo wakuyanzanya.” Bakazyiba kuti bangelo bone mbaakabona mwaapostolo Johane mucilengaano cakasinsimwa “baajata myuuwo yone yanyika, kuti luuwo lutaungi ansi nikuba kulwizi nikuba kumusamu.” Aboobo bucili “buzuba bwalufwutuko” alimwi “ecino ncobeni nceciindi ceelede.” (Ciy. 7:1-3) Nkaambo kaako, kuzwa mumyaanda yamyaka ya 20 bamucaala bananike babeleka canguzu “[mu]mulimo wakuyanzanya” muzyibeela zyoonse zya cisi.
11, 12. Ino bananike Banakristo mbuti mbobakatondezya kuti bakali cibwene ciindi kumatalikilo amyaanda yamyaka ya 20? (Amubone cifwanikiso apeeji 15.)
11 Mucikozyanyo, mbuli mbokutondezyedwe mubbuku lyakuti Jehovah’s Witnesses—Proclaimers of God’s Kingdom, kumatalikilo amyaanda yamyaka ya 20, “C. T. Russell abeenzyinyina bakali kusyoma kuti bali muciindi cakutebula akuti bantu bayandika kasimpe kakonzya kubaangulula.” Ino ncinzi ncibakacita akaambo kaceeci? Akaambo kakuzyiba kuti cakali ciindi cakutebula, ibakwesu aaba tiibakali kutamba buyo bantu kuti baboole kumiswaangano yambungano pele ‘eeci ncobeni nceciindi ceelede.’ Basololi bamu Zikombelo mbobakali kucita oobo kwaciindi cilamfwu. Muciindi caboobo, aabo bananike Banakristo bakatalika kujana nzila zimbi zyakukambauka makani mubotu. Akati kazyintu zibakali kucita bakazibelesya kabotu zyintu zipangwa mazuba aano kutegwa mulimo wabukambausi uzumanane.
12 Ikutegwa makani mabotu a Bwami azumanane aaka kabunga kabantu basungu bakatalika kubelesya matulakiti, mamagazini, mabbuku. Alimwi twaambo ntubakali kulemba twaakali kusimbwa mumiteende iili zyuulu. Bakali kumwaya mulumbe wamu Magwalo awailesi yacisi aya nyika yoonse. Bakali kutondezya zifwanikiso kumwi kabapandulula zili azifwanikiso, eeci cakacitika bamakkampani kabatana cita oobo. Ino ncinzi cakacitika akaambo kabusungu bwabo? Aano mazuba kuli bantu bali 7 milyoni ibautambula mulumbe ooyu alimwi ibasangana mukwaambilizya mulumbe wakuti: ‘Bayanzane a Leza.’ Masimpe aaba babelesi ba Jehova bakutaanguna bakali cikozyanyo cibotu cakuba basungu nokuba kuti kuli zyakali kubapenzya.
13. Ino ncinzi ncotweelede kuzyiba kujatikizya kuyanda kwa Leza?
13 Ikaambo nkakaamba Paulo kakuti “ecino ncobeni nceciindi ceelede” kacibeleka asunu. Iswebo notwabona luzyalo lwa Jehova, tulalumba akaambo kakuti twakapegwa coolwe cakumvwa akuzumina mulumbe waluyanzano. Muciindi cakukkutila azyintu nzyotuzyi kale, tweelede kuyeeya majwi aa Paulo aatobela aakuti: “Tulamukumbila, kuti luzyalo lwa-Leza ndumutambwide lutabi lwabuyo.” (2 Ko. 6:1) Leza uyanda “kuyanzanya nyika kulinguwe mwini” kwiinda muli Kristo.—2 Ko. 5:19.
14. Ino ncoolwe nzi cajanika mumasena manji?
14 Bantu banji wakaboofwaazya Saatani, tabamvwani a Leza alimwi tabaazyi makanze aakwe. (2 Ko. 4:3, 4; 1 Jo 5:19) Akaambo kazyintu ziya bubija munyika, ibanji balazumina kuti kutatobela malailile aa Leza kwapa kuti bantu kabacita zyintu zibi alimwi kabapenga. Masena oomo mobataubikkili maano mulimo wakukambauka, ibanji mazuba aano balaatambula makani mabotu alimwi balacita oobo kwiinda mukuyanzana a Leza. Sena tulicibwene kuti eeci nceciindi cakubeleka canguzu mukwaambilizya mulumbe uuyandika kapati wakuti: ‘Muyanzane a Leza’?
15. Ino ncinzi ncotweelede kukambaukila bantu muciindi cakubaambila buyo makani aabakkomanisya?
15 Imulimo wesu tauli wakwaambila buyo bantu kuti, ikuti naa bamutobela Leza uyakubagwasya kumana mapenzi aabo alimwi baya kumvwa mbubo-mbubo. Ibanji ncibayandaula eeco muzikombelo alimwi azyalo zikombelo zilasoleka canguzu kugwasya bantu aaba. (2 Ti. 4:3, 4) Aaya taali ngamakanzeesu notucita mulimo wesu. Makani mabotu ngotukambauka ngakuti, Jehova ulacita oobo akaambo kakubayanda alimwi ulilibambide kulekelela zibi zyabo kwiinda muli Kristo. Aboobo, bantu balakonzya kuleka kuyungwa akutalika kuyanzana a Leza. (Lom. 5:10; 8:32) “Ecino ncobeni nceciindi ceelede” alimwi ino-ino cilamana.
“Myoyo Yanu Ipye Kukumanina Mwami Milimo”
16. Ino ncinzi cakamugwasya Paulo kuba sicamba akuba musungu?
16 Ino mbuti mbotukonzya kuba basungu akuzumanana kucita oobo mubukombi bwakasimpe? Bamwi bali aansoni naa tabaambauli-ambauli, eeci cilakonzya kubakatazya kwaambaula cakulikwaya. Nokuba boobo, inga cagwasya kuyeeya kuti busungu takuli kuli tondezya buyo kuti ulikkomene naa tokkomene, naa tacili mbuli muntu mbwabede. Paulo wakabaambila Banakristonyina mbubakonzya kuba alimwi akuzumanana kuba basungu naakati: “Amupye moyo akaambo kamuuya.” (Lom. 12:11) Muuya wa Jehova wakamugwasya mwaapostolo kuba sicamba akuliyumya mumulimo wakukambauka. Kuzwa ciindi naakaitwa a Jesu kusikila naakabikkwa muntolongo akujaigwa ku Roma, Paulo wakaliyumya kwamyaaka iinda ku 30 alimwi tanaakaleka kuba musungu. Paulo wakali kulangila kuli Leza lyoonse, walo wakamuyumya kwiinda mumuuya wakwe. Wakaamba kuti: “Muzyintu zyoonse ndilijisi nguzu kwiinda muli yooyo uundipa nguzu.” (Flp. 4:13) Tulakonzya kugwasyigwa kapati kuti twaiya cikozyanyo cakwe.
17. Mbuti mbotukonzya ‘kupya moyo akaambo kamuuya’?
17 Kulugwalo lwa Baloma 12:11, mwaapostolo Paulo wakabelesya bbala lya Giliki lyaamba kubila. Kutegwa meenda azumanana kubila mumupika, mulilo taweelede kuzima. Mbubwenya buyo, kutegwa tuzumanane ‘kupya moyo akaambo kamuuya’ tuyandika muuya wa Leza ciindi coonse. Kutegwa eeci cikonzyeke tweelede kubelesya zyintu zyoonse Jehova nzyatupa zikonzya kutuyumya kumuuya. Eeci caamba kubikkila maano kukukomba kwamumukwasyi akumbungano, alimwi tweelede kucita ciiyo cesu tobeni, kukomba kwamumukwasyi, kupaila alimwi akuswaangana a Banakristoma lyoonse. Zyintu eezyi zilakonzya kutugwasya ‘kupya moyo akaambo kamuuya,’ mbuli mulilo uubizya mupika wameenda.—Amubale Milimo 4:20; 18:25.
18. Mbuli Banakristo balyaabide, ino nimbaakani nzi njotweelede kuba aanjiyo?
18 Muntu uulyaabide nguyooyo ujisi mbaakani akwizuzikizya. Mbotuli Banakristo balyaabide, mbaakani yesu njakucita zyintu zyoonse Jehova nzyayanda kuti tucite mbuli Jesu mbwakacita. (Heb. 10:7) Mazuba aano kuyanda kwa Jehova nkwakuti bantu boonse batalike kuyanzana anguwe. Aboobo, atube basungu mbuli Jesu a Paulo mumulimo ooyu uyandika kapati, weelede kucitwa cakufwambaana mazuba aano.
Sena Muciyeeyede?
• Ino “mulimo wakuyanzanya” wakapegwa kuli Paulo a Banakristonyina bananike, mulimo nzi?
• Ino bamucaala bananike bacibelesya buti ‘ciindi ceelede’?
• Mbuti babelesi Banakristo mbobakonzya ‘kupya moyo akaambo kamuuya’?
[Mibuzyo yaciiyo]
[Cifwanikiso icili apeeji 12]
Paulo tanaakaluba cakamucitikila nobakaswaangana a Mwami Jesu Kristo