«Chiyu wa nkilhtamaku akxni lakgchan»
«Chiyu wa nkilhtamaku akxni lakgchan»
«Kaʼukxilhtit, chiyu wa nkilhtamaku akxni lakgchan, chiyu wa nkilhtamaku lantla miliʼakgaputaxtutkan.» (2 COR. 6:2)
1. ¿Tuku xlakata liwana naʼakxilhaw komo lu xlakaskinka tuku natlawayaw kkilatamatkan?
«PUTUM tuku tlawaputunkan xlikgalhit xkilhtamaku, putum tuku tlawakan unu katiyatni na xlikgalhit xkilhtamaku» (Ecl. 3:1.) Salomón tsokgli umakgolh tachuwin, wa pi xlakaskinka nalaksakaw tukuya kilhtamaku tlakg tlan wi tuku natlawayaw kilatamatkan, akxni nachanananaw, napaxialhnanaw, natlawayaw negocios chu nakatachuwinanaw amakgapitsin. Pero na kilikatsitkan tukuya taskujut nema tlakg xlakaskinka kilitlawatkan, maski tuwa tuku titaxtumaw o tlan wilaw. Uma nakinkamakgtayayan nalakkaxwiliyaw tuku tlakg xlakaskinka kilitlawatkan.
2. ¿Tuku likatsiyaw pi Jesús liwana xkatsi pi xchanit kilhtamaku akxni xlimakgantaxtit xwanit tuku xliyawakanit?
2 Jesús liwana xkatsi pi xchanitta kilhtamaku xlimakgantaxtit xwanit tuku xlimakaminkanit. Liwana xkatsi tuku tlakg xlakaskinka xlitlawat, xkatsi pi xchanitta kilhtamaku xkgantaxtukgolh tuku xlichuwinankanit xlakata Mesías (1 Ped. 1:11; Apo. 19:10). Lhuwa tuku xlitlawat xwanit, xmasiyalh pi wa Mesías nema xwankanit pi namin, lhuwa xlichuwinalh xlakata Tamapakgsin chu xkamamakgstokgli tiku xʼamakgolh tamapakgsinankgo. Chu na xlilaksakat xwanit tiku xmatsukikgolh congregación xla kstalaninanin, tiku xʼamakgolh lichuwinankgo Dios chu xkamakgalhtawakgakgolh latamanin asta niku tlakg lakgamakgat (Mar. 1:15).
3. ¿Tuku tlawalh Jesús xlakata xkatsi pi xchanitta kilhtamaku namakgantaxti taskujut nema xlakgayawakanit?
3 Uma tuku xkatsi Cristo makgtayalh xatapaxuwan xtlawalh xtalakaskin xTlat. Kawanilh kstalaninanin: «Lhuwa tachananat, pero lakskujnin ni lu chalhuwa. Wa xlakata kaskinitit xMalana tachananat xlakata namakamin lakskujnin» (Luc. 10:2, NM; Mal. 4:5, 6). Maski lhuwa tiku kstalanikgo, kalaksakli kgalhkutiy chu alistalh tutupuxumakaw. Pulana kawanilh tuku xlitlawatkan, alistalh kamalakgachalh nalichuwinankgo uma lu tlan tamakatsin: «Wa xtapakgsin akgapun, talakatsuwinitta». ¿Chu tuku tlawalh? Biblia kinkawaniyan: «Akxni nchu makgatsputulh Jesús maxkikgolh limapakgsin nkgalhakutuy xlimakgalhtawakgat, [...] anta ntiʼalh masiyuy, chu akgchuwinan» kkachikinin (Mat. 10:5-7; 11:1; Luc. 10:1).
4. ¿La nachuna xtlawa Pablo chuna la Jesucristo?
4 Xkgawasa Dios kinkamakgxtakgnin tlan liʼakxilhtit xlakata lu lhuwa lichuwinalh Dios chu lu kakninanilh. Wa tama tuku lichuwinalh Pablo akxni kawanilh xnatalan: «Kaʼukxilhtit lantla kit klama, xtachuna lantla kit kukxilhtima, chu ktlawama lantla tilatamalh [...] Jesús» (1 Cor. 11:1). ¿La nachuna xtlawa Pablo chuna la Jesús? Pablo na lhuwa xlichuwinan xalakwan xalaksasti tamakatsinin, wa xlakata akxni kamalakgachanilh cartas congregaciones tlan kawanilh natalanin «ni nalhkititnanatit», “kaskujnitit kinTlatikan” Jehová, «xlenkgalhin lhuwa kaskujnaniw kiMalanakan» chu «xlipaks wa ntu natlawayatit, xlipaks mintapaxuwankan nalitlawayatit, xtachuna mpi wa [Jehová] skujnanipatit» (Rom. 12:11; 1 Cor. 15:58; Col. 3:23). Apóstol xlakapastakaku pi kiMalanakan Jesús tasiyanilh akxni xʼama kDamasco chu na xlakapastaka tuku wanilh Ananías xlakata Jesús xmakatsininit: «Wa yuma nti klilaksaknit namakgawaniy naliyan nkintukuwini kxlakatinkan xaʼakgmakgat chixkuwin, chu laktlanka reyes, chu xkilhtsukut Israel» (Hech. 9:15; Rom. 1:1, 5; Gál. 1:16).
«Chiyu wa nkilhtamaku akxni lakgchan»
5. ¿Tuku xlakata Pablo lu lhuwa xlichuwinama Dios?
5 Akxni likgalhtawakgayaw libro xla Hechos liwana akxilhaw la Pablo ni xpekuan chu lhuwa lichuwinalh Dios (Hech. 13:9, 10; 17:16, 17; 18:5). ¿Tuku xlakata chuna xtlawa? Xlakata xkatsi pi lu xlakaskinka chu ni lhuwa kilhtamaku xtsankga. Wa xlakata wa: «Kaʼukxilhtit, chiyu wa nkilhtamaku akxni lakgchan, chiyu wa nkilhtamaku lantla miliʼakgaputaxtutkan» (2 Cor. 6:2). Akxni tsokgka uma texto xkilhchanima kata 537 akxni nina xmin Jesús, kata akxni israelitas tiku xkachilinkanit kBabilonia xtaspitparakgolh kʼIsrael (Isa. 49:8, 9). Pero ¿tuku xwamputun apóstol akxni lichuwinalh uma texto? Tuku wa pulana chu alistalh nakinkamakgtayayan nakatsiyaw.
6, 7. ¿Tukuya lanka talakgalhaman kamaxkikanit la uku tiku kalaksakkanit naʼankgo kʼakgapun, chu tiku na kamakgtayakgo?
6 Nina lhuwa versículos Pablo xlichuwinanita lanka talakgalhaman nema xmakgamakglhtinanit chu amakgapitsi kstalaninanin Cristo tiku xkalaksakkanit naʼankgo kʼakgapun (kalikgalhtawakga 2 Corintios 5:18-20). Lichuwinalh pi Dios xlilaksaknit xlakata wi tuku xmakgantaxtilh. Xlitlawat xwanit «taskujut lantla nalimalakatsuwikgoy[...] amakgapitsin nti ni xputsakgoy Dios» chu xkawanilh latamanin “katalakatsuwinikgolh Dios”. Uma wamputun pi xkawanilh tlan xtalalimparakgolh Dios.
7 Akxni Adán chu Eva ni kgalhakgaxmatkgolh Jehová kjardín xaʼEdén tamakgatlinikgolh (Rom. 3:10, 23). Akxni tamakgatlinkgolh Dios tsukukgolh patinankgo chu nikgolh. Chuna la wa Pablo: «Katsiyaw mpi xlipaks ntamalakatsukun [o latamanin], makxtum jalhpanikgoy, chu makxtum tatlakgajkgoy asta chu» o la uku (Rom. 8:22). Pero Dios lakpuwa nakawani chu asta kaskini latamanin kalakgminkgolh chu tlan katalalinkgolh. Wa uma taskujut nema xlakgayawakanit apóstol Pablo kxapulana siglo chu nachuna kstalaninanin Cristo tiku xkalaksakkanit. Ama «nkilhtamaku akxni [na]lakgchan» xʼama wan «nkilhtamaku lantla miliʼakgaputaxtutkan» o tlan xlakgtaxtukgolh putum tiku xkanajlanikgolh Jesús. La uku tiku kalaksakkanit naʼankgo kʼakgapun chu xcompañeros tiku litaxtukgo «amakgapitsi borregos» chuntiyaku kawanimakgolh latamanin pi la uku lamaw «nkilhtamaku akxni lakgchan» (Juan 10:16, NM).
8. ¿Tuku litasiya pi Jehová tlan likatsi xlakata kawanima latamanin tlan katalalinkgolh?
8 ¿Tuku xlakata lu tlan pi xkawanimaka latamanin katalakatsuwinikgolh Dios? Xlakata maski wa chixku makgxtakgli Dios akxni ni kgalhakgaxmatnilh, wa Jehová tiku pulana wi tuku tlawalh xlakata latamanin tlan xtalalimparakgolh (1 Juan 4:10, 19). ¿Chu la tlawalh? Pablo kinkawaniyan: «Dios, xpalakata nCristo, xlimalakatsuwimakgo ntachixkuwitat nti ni xpaxkikgoy, nialh lakgalhinanin xliʼukxilhkgoy, na kin nti nkinkamakuintajlinitan ntachuwin ntu nalimalakatsuwikgoyaw nti ni paxkikgoy Dios» (2 Cor. 5:19; Isa. 55:6).
9. ¿La limasiyalh Pablo pi xpaxtikatsini Dios xlakata xlakgalhaman?
9 Akxni kinkalilakgmaxtun xKgawasa, Jehová tlawalh pi latamanin tiku xkanajlanikgolh tlan xkatapatika xtalakgalhinkan chu tlan xtalalimparakgolh Dios. Na kamalakgachalh tiku xlichuwinankgolh xtukuwani xlikalanka kakilhtamaku chu xkawanikgolh latamanin tlan katalalinkgolh Jehová xlakata ananku kilhtamaku (kalikgalhtawakga 1 Timoteo 2:3-6). Akxni Pablo katsilh tuku xlakaskin Dios, chu la xlilakaskinka xwanit uma taskujut akxni xlama, xliputum xlitliwakga tlawalh «ntaskujut lantla nalimalakatsuwikgo[...] amakgapitsin nti ni xputsakgoy Dios». Dios chuntiya lakaskin pi latamanin katalakatsuwinikgolh. Chuntiyaku kamakgtayaputun. Tuku tiwa apóstol Pablo chuntiyaku xaxlikana: «Chiyu wa nkilhtamaku akxni lakgchan, chiyu wa nkilhtamaku lantla miliʼakgaputaxtutkan» ¡Jehová lu xalakgalhamana chu tlan likatsi! (Éxo. 34:6, 7.)
«Chuntiyaku kamakgantaxtitit xtalakaskin»
10. ¿Tuku kilhchanima «nkilhtamaku lantla miliʼakgaputaxtutkan» xpalakata tiku xkalaksakkanit kxapulana siglo chu xala uku?
10 Tiku pulana litamakgtayakgo uma tapaxkit nema ni kinkamininiyan wa tiku «makxtum tawanit [o tawilakgolh] nCristo» (2 Cor. 5:17, 18). “Nkilhtamaku lantla xliʼakgaputaxtukgolh” tsukulh kPentecostés kkata 33. Ama kata asta la uku kalakgayawakanit naliʼakgchuwinankgo «ntu nalimalakatsuwikgoy[...] nti ni paxkikgoy Dios». La uku ananku kKatiyatni tiku kalaksakkanit chu tlawamakgolh «ntaskujut lantla nalimalakatsuwikgoy[...] amakgapitsin nti ni xputsakgoy Dios». Xlakan katsikgo pi kgalhatati ángeles nema maʼakxilhnika apóstol Juan «nti xmachokgomakgo nkgamputati un xala katiyatna lakimpi ni tsinu naʼunan nkatiyatna». Nina sputa «nkilhtamaku lantla miliʼakgaputaxtutkan», «nkilhtamaku akxni lakgchan» (Apo. 7:1-3). Wa xlakata, akxni tsukulh siglo XX tiku xʼakgataxtukgo nema kalaksakkanit naʼankgo kʼakgapun lhuwa lichuwinamakgolh «ntaskujut lantla nalimalakatsuwikgoy[...] amakgapitsin nti ni xputsakgoy Dios» xlikalanka kakilhtamaku.
11, 12. Akxni kajku xtsukuma siglo XX, ¿la limasiyakgolh tiku xkalaksakkanit pi xkatsikgo pi xchanitta kilhtamaku lu nalichuwinankgo Dios? (Kaʼakxilhti dibujos kpágina 17.)
11 Kawiliw akgtum liʼakxilhtit, chuna la lichuwinan libro Los testigos de Jehová, proclamadores del Reino de Dios, akxni xtalakatsuwimaja siglo XX, «Russell chu tiku xtatamakxtumikgo liwana xkatsikgo pi xlamakgolh xkilhtamaku akxni xlitamakit tuku tamakgalanit chu latamanin xlikgaxmatatkan tuku xaxlikana nema xʼama kalakgmaxtu». ¿Tuku tlawakgolh? Xlakata xkatsikgo pi horaja xwanit namakikgo tuku xtamakgalanit, «nkilhtamaku akxni lakgchan», ni kaj kawanikgolh latamanin kaʼankgolh ktamakxtumit xla xtakanajlakan. Pero sacerdotes na akglhuwata kata kaj xkawanikgo latamanin katamakxtumikgolh. Umakgolh kstalaninanin Cristo tiku xkalaksakkanit putsakgolh atanu la tlan xlichuwinankgolh tamakatsin xlakata Tamapakgsin. Na limaklakaskinkgolh xalaksasti máquinas nema aku xtaxtumakgolh.
12 Xlakata tlan xlichuwinankgolh xalakwan xalaksasti tamakatsinin, umakgolh ni lhuwa kstalaninanin Cristo xlimaklakaskinkgo tratados, folletos, revistas chu libros. Nachuna xtsokgkgo taʼakgchuwin nema xtaxtukgo kmaklhuwa miles periódicos. Na xʼakgchuwinankgo kradio nema xtakgaxmata klhuwa países chu akxni cine ni xtakgaxmata, tlawakgolh akgtum película niku xtasiya chu xtakgaxmata tuku xtawan. ¿La kitaxtulh xlakata lhuwa skujkgolh? La uku wilakgolh akgtujun millones tiku tlawanikgolh kuenta chu na lichuwinamakgolh uma tamakatsin: «Katalakatsuwinitit Dios». Chuna kitaxtuma kaj xlakata makgapitsi kstalaninanin Cristo tiku kalaksakkanit lu xlichuwinankgo Dios maski tuwa tuku xtitaxtumakgolh.
13. ¿Tukuya tastakyaw xlakata tuku lakkaxwilinit Dios kuenta kilitlawatkan?
13 La uku chuntiyaku xlikana tuku lichuwinalh Pablo: «Akxni nkilhtamaku, luwa chunata lakgchan». Lu paxtikatsiniyaw Jehová pi kinkapaxkiyan maski ni kinkamininiyan, tlawalh nakgaxmataw tamakatsin niku kinkawaniyan tlan katalaliw. Nikaj nalhkititnanaw, lu kilikgalhakgaxmatatkan uma xtastakyaw Pablo: «Kkaskiniyan pi ni kajwatiya namakgamakglhtinantit xtapaxkit Dios nema ni kinkamininiyan wata chuntiyaku kamakgantaxtitit xtalakaskin» (2 Cor. 6:1). Jehová kinkapaxkiyan maski ni kinkamininiyan: «Xpalakata nCristo, xlimalakatsuwimakgo ntachixkuwitat» (2 Cor. 5:19).
14. ¿Tuku tlawamakgolh latamanin klhuwa países?
14 Lhuwa latamanin chuntiyaku kaʼakgskgawinit Satanás, tamakgatlinikgonit xMalakatsukinakan chu ni katsikgo tuku lakaskin Dios akxni kinkalimasiyaniyan tapaxkit nema ni kinkamininiyan (2 Cor. 4:3, 4; 1 Juan 5:19). Maski chuna wilakgolh, lhuwa latamanin tlan makgamakglhtinankgo tamakatsin xlakata akxilhkgo la wi kakilhtamaku, pi tlakg talhuwima tuku nitlan chu tapatin, chu katsikgo pi putum tuku lama kaj wa xkuenta chixku xlakata ni kgalhakgaxmatli Dios. Chuna lama asta kpaíses niku ni kgaxmatputunkan xalakwan xalaksasti tamakatsinin, lhuwa tiku kgaxmatmakgolh chu tlawakgo tuku talakaskin xlakata tlan natalalinkgo Jehová. ¡Akinin liwana katsiyaw pi wa uma kilhtamaku tlakg kiliskujatkan xlakata namastayaw uma tamakatsin: «Katalakatsuwinitit Dios»!
15. Akinin nikaj kawaniyaw latamanin tuku tlan nalimakgkatsikgo, ¿tuku lakaskinaw kakatsinikgolh?
15 Taskujut nema tlawamaw ni kajwatiya kawaniyaw latamanin, pi komo natalakatsuwinikgo Dios, nakamakgtaya nalakkaxtlawakgo putum xtaʼakglhuwitkan chu tlakg tlan namakgkatsikgo. Wa lakaskinkgo lhuwa latamanin nakawanikan ksikulan, chu xpastores chuna kawanikgo (2 Tim. 4:3, 4). Akinin ni wa tama tuku tlawayaw akxni lichuwinanaw Dios. Tamakatsin nema lichuwinanaw wa pi xlakata Jehová kinkapaxkiyan, kinkatapatiyan kintalakgalhinkan xpalakata Cristo tamakamastalh kimpalakatakan. Akxni chuna natlawayaw tlan natalalinaw Dios (Rom. 5:10; 8:32). Pero, «wa nkilhtamaku akxni lakgchan» atsinu tsankga nakgalhsputata.
«Xʼespíritu Dios xatapaxuwan nakamaskujuyan»
16. ¿Tuku makgtayalh Pablo xlakata ni xpekualh chu lhuwa xlichuwinalh Dios?
16 ¿Tuku tlan natlawayaw xlakata tlakg nalichuwinanaw xaxlikana takanajla? Wilakgolh tiku pekuankgo o ni lhuwa chuwinankgo wa xlakata ni wankgo tuku lakpuwankgo chu ni lu katalalinkgo amakgapitsin. Pero kalakapastakwi pi tiku xlikana tataya xaxlikana takanajla ni kaj lu paxuwa o litasiya xlakata la xtayat. Pablo lichuwinalh tuku tlawa pi chatum kstalanina Cristo nalimasiya pi xlikana tataya xaxlikana takanajla: «Kamastatit talakaskin pi xʼespíritu Dios xatapaxuwan nakamaskujuyan» (Rom. 12:11, NM). Wa espíritu santo makgtayalh Pablo xlakata ni xpekualh chu maxkilh litliwakga xlakata tlan xmakgantaxtilh xtaskujut nema xlakgayawakanit. Putum puxumakaw kata nema titaxtulh, akxni Jesús laksakli naʼan kʼakgapun asta tamaknuka kpulachin chu mapatinika kRoma putum kilhtamaku xatapaxuwan lichuwinalh Dios. Kajwatiya Dios lipawa chu limakgtayalh xʼespíritu santo. Wa xlakata lichuwinalh: «Kkgalhiy litliwakga nema putum kmatlaniy, xlakata tiku kimaxkiy litliwakga» (Fili. 4:13, NM). ¡Lhuwa tuku tlan nakatsiniyaw xlakata Pablo!
17. ¿Tuku kamakgtaya kstalaninanin Cristo xlakata “xʼespíritu Dios xatapaxuwan nakamaskuju”?
17 Anta kRomanos 12:11 Pablo limaklakaskin akgtum tachuwin xagriego nema xatotonaco wamputun tuku «pupuma». Kalichuwinaw chuchut. ¿Tuku talakaskin xlakata chuntiya napupu? Natalakaskin xlenkgalhin nakgalhi lhkuyat. Nachuna, xlakata kstalaninanin Cristo “xʼespíritu Dios xatapaxuwan nakamaskuju”, talakaskin pi putum kilhtamaku nakgalhikgo espíritu santo. ¿La tlan namakgamakglhtinanaw? Liwana nalitamakgtayayaw putum tuku Jehová kinkamaxkiyan xlakata namatliwakglhaw kintakanajlakan. Lu xlakaskinka kiliʼakxilhatkan kintakaknikan, kkinchikkan chu kcongregación, uma wamputun pi nalimaxtuyaw kilhtamaku akxni kiʼakstukan nakgalhtawakgayaw chu natakgalhtawakgayaw kifamiliajkan, natlawayaw oración chu naʼanaw ktamakxtumit. Komo chuna natlawayaw, nakitaxtu la akxni “lhkuyat” mapupinan chu xʼespíritu Dios xatapaxuwan nakinkamaskujuyan (kalikgalhtawakga Hechos 4:20 chu 18:25).
18. ¿Tukuya taskujut tlawaputunaw akinin kstalaninanin Cristo?
18 Akinin kstalaninanin Cristo xliputum kilatamatkan kiliskujnitkan Dios, uma wamputun pi liwana nalakapastakaw namakgantaxtiyaw tuku tlawaputunaw, ni namastayaw talakaskin wi tuku natlawa nialh kuenta natlawayaw o nakinkamaxlajwaniyan. ¿Chu tuku makgantaxtiputunaw? Tlawaputunaw xtalakaskin Dios chuna la tlawalh Jesús (Heb. 10:7). Jehová lakaskin pi lhuwa latamanin tlan katalalinkgolh. Wa xlakata katlawaw la tlawalh Jesús chu Pablo chu xliputum kilatamatkan katlawaw taskujut nema tlakg xlakaskinka chu lakapara xlitatlawat la uku.
¿Lakapastaka?
• ¿Tuku kilhchanima «ntaskujut lantla nalimalakatsuwikgoy[...] amakgapitsin nti ni xputsakgoy Dios» nema lakgayawaka Pablo chu amakgapitsi kstalaninanin Cristo tiku kalaksakkanit?
• ¿La likatsiyaw pi tiku kalaksakkanit chu lamakgolhku kKatiyatni liwana limaklakaskimakgolh “nkilhtamaku lantla liʼakgaputaxtut”?
• ¿Tuku kamakgtaya kstalaninanin Cristo xlakata “xʼespíritu Dios xatapaxuwan nakamaskujuy”?
[Takgalhskinin]
[Epígrafe xla página 14]
Pablo xlakapastaka akxni tasiyanilh kiMalanakan Jesucristo