“Sweswi Ngopfu-ngopfu I Nkarhi Lowu Amukelekaka”

“Maswivo! Sweswi ngopfu-ngopfu i nkarhi lowu amukelekaka. Maswivo! Sweswi i siku ra ku ponisiwa.”—2 KOR. 6:2.

1. Ha yini hi fanele hi tiva nchumu wa nkoka swinene lowu hi faneleke hi wu endla hi nkarhi wo karhi?

“XIN’WANA ni xin’wana xi ni nkarhi wa xona lowu vekiweke, ni nkarhi wa mhaka yin’wana ni yin’wana ehansi ka matilo.” (Ekl. 3:1) Solomoni a a tsala malunghana ni ndlela leyi swi nga swa nkoka ha yona ku tiva nkarhi lowunene wo endla ntirho wihi ni wihi wa risima—ku nga ha va ku rima, ku teka riendzo, ku endla bindzu kumbe ku vulavurisana ni van’wana. Nilokoswiritano, na hina hi fanele hi tiva leswaku hi wihi ntirho wa nkoka swinene lowu hi faneleke hi wu endla hi nkarhi wo karhi. Hi marito man’wana, hi fanele hi swi tiva leswaku hi rhangisa yini evuton’wini.

2. Hi swi tivisa ku yini leswaku loko Yesu a ri karhi a chumayela, a a wu tekela enhlokweni nkarhi lowu a a hanya eka wona?

² Loko Yesu a ha ri laha misaveni, a a wu tekela enhlokweni nkarhi lowu a a hanya eka wona ni leswi a a fanele a swi endla. Leswi a a swi tiva kahle leswi a a fanele a swi rhangisa, a a swi xiya leswaku nkarhi wa leswaku ku hetiseka vuprofeta byo tala lebyi a ku ri khale byi profetiwile malunghana na Mesiya, se a wu fikile. (1 Pet. 1:11; Nhlav. 19:10) A ku ri ni ntirho lowu a a fanele a wu endla, lowu a wu ta endla leswaku vanhu va swi tiva leswaku hi yena Mesiya la tshembisiweke. A a fanele a nyikela vumbhoni bya rixaladza hi Mfumo ni ku hlengeleta  vanhu lava a va ta va vadyandzhaka swin’we na yena eMfun’weni. Naswona a a fanele a veka masungulo ya vandlha ra Vukreste leri a ri ta endla ntirho wo chumayela ni ku endla vanhu vadyondzisiwa ku ya fika emakun’wini ya misava.—Mar. 1:15.

3. I yini leswi Yesu a swi endleke hileswi a a wu tekela enhlokweni nkarhi lowu a a hanya eka wona?

³ Leswi Yesu a a wu tekela enhlokweni nkarhi lowu a hanya eka wona, u susumeteleke ku hisekela ku endla ku rhandza ka Tata wakwe. U byele vadyondzisiwa vakwe a ku: “Hakunene, ntshovelo i wukulu, kambe vatirhi a hi vangani. Hikokwalaho kombelani N’wini wa ntshovelo leswaku a rhumela vatirhi entshovelweni wa yena.” (Luka 10:2; Mal. 4:5, 6) Yesu u rhange a hlawula vadyondzisiwa va 12 ivi endzhakunyana a hlawula va 70, a va nyika swiletelo leswi kongomeke kutani a va rhuma leswaku va ya chumayela rungula leri tsakisaka leri nge: “Mfumo wa matilo wu tshinele.” Malunghana na Yesu ha hlaya: “Loko . . . a heta ku nyika swiletelo eka vadyondzisiwa vakwe va 12, a suka kwalaho ku ya dyondzisa ni ku chumayela emitini ya vona.”—Mat. 10:5-7; 11:1; Luka 10:1.

4. Pawulo u ve mutekeleri wa Yesu Kreste hi ndlela yihi?

⁴ Yesu u vekele valandzeri vakwe hinkwavo xikombiso lexi hetisekeke xo hiseka ni xa ku tinyiketela. Muapostola Pawulo a a vulavula hi mhaka yoleyo loko a khutaza vapfumeri-kulobye a ku: “Mi va vatekeleri va mina, tanihi leswi mina ndzi nga mutekeleri wa Kreste.” (1 Kor. 11:1) Pawulo u n’wi tekelele njhani Kreste? U n’wi tekelele hi ku endla hinkwaswo leswi a nga swi kotaka loko swi ta emhakeni yo chumayela mahungu lamanene. Eka mapapila lawa Pawulo a ma tsaleleke mavandlha, hi kuma marito yo fana ni lama nge, “mi nga lolohi entirhweni wa n’wina,” “mi va mahlonga ya Yehovha,” “nkarhi hinkwawo mi va ni swo tala swo swi endla entirhweni wa Hosi” ni lama nge “xin’wana ni xin’wana lexi mi xi endlaka, xi endleni hi moya-xiviri hinkwawo kukota loko mi xi endlela Yehovha.” (Rhom. 12:11; 1 Kor. 15:58; Kol. 3:23) Pawulo a nga swi rivalanga leswi n’wi humeleleke loko a ri endleleni yo ya eDamaska ni marito ya Yesu lawa mudyondzisiwa Ananiya a faneleke a n’wi byele wona lama nge: “Wanuna loyi i xibya lexi hlawuriweke eka mina lexi nga ta yisa vito ra mina eka matiko swin’we ni le ka tihosi ni le ka vana va Israyele.”—Mint. 9:15; Rhom. 1:1, 5; Gal. 1:16.

‘Nkarhi Lowu Amukelekaka Ngopfu-ngopfu’

5. I yini leswi susumeteleke Pawulo ku chumayela hi ku hiseka?

⁵ Loko hi hlaya buku ya Mintirho, hi xi vona kahle xivindzi ni ku hiseka loku Pawulo a ku kombiseke loko a endla vutirheli byakwe. (Mint. 13:9, 10; 17:16, 17; 18:5) Pawulo u swi xiyile leswaku nkarhi lowu a a hanya eka wona a wu ri wa nkoka. U te: “Maswivo! Sweswi ngopfu-ngopfu i nkarhi lowu amukelekaka. Maswivo! Sweswi i siku ra ku ponisiwa.” (2 Kor. 6:2) Hi 537 B.C.E., a ku ri nkarhi lowu amukelekaka wa leswaku vanhu lava a va ri evuhlongeni eBabilona va tlhelela etikweni ra rikwavo. (Esa. 49:8, 9) Kambe Pawulo a a vulavula hi yini laha? Mongo wu hi pfuna ku vona leswi a a swi anakanya.

6, 7. Hi rihi lunghelo lerikulu leri namuntlha ri nyikiweke Vakreste lava totiweke, naswona i vamani lava tirhisanaka na vona?

⁶ Emahlweninyana eka papila rakwe, Pawulo u vulavule hi lunghelo lerikulu leri yena swin’we ni Vakreste-kulobye lava totiweke va nyikiweke rona. (Hlaya 2 Vakorinto 5:18-20.) U hlamusele leswaku a va vitaniwe hi Xikwembu hikwalaho ka xikongomelo xo karhi, leswaku va ta endla “vutirheli bya ku vuyelelana,” va tlhela va kombela vanhu leswaku va “[vuyelelana] ni Xikwembu.” Sweswo a swi vula ku tlhela va va ni vunghana kumbe va tirhisana ni Xikwembu.

⁷ Endzhaku ka ku xandzuka ka le Edeni, vanhu hinkwavo va hambanisiwe na Yehovha. (Rhom. 3:10, 23) Ku hambanisiwa ka vanhu ni Xikwembu ku  endle leswaku va nga vi na mhaka na xona swin’we ni xikongomelo xa xona, leswi endleke leswaku va xaniseka va tlhela va fa. Pawulo u tsarile: “Ha swi tiva leswaku ntumbuluko hinkwawo wu hambeta wu konya ni ku vaviseka swin’we ku ta fika sweswi.” (Rhom. 8:22) Kambe Xikwembu xi teke magoza leswaku xi khongotela vanhu, entiyisweni xi “kombela” vanhu leswaku va tlhelela eka xona, kumbe va vuyelelana na xona. Byolebyo a ku ri vutirheli lebyi Pawulo ni Vakreste-kulobye lava totiweke a va nyikiwe byona hi nkarhi wolowo. “Nkarhi [wolowo] lowu amukelekaka” a wu ta va “siku ra ku ponisiwa” eka lava kombisaka ripfumelo eka Yesu. Vakreste hinkwavo lava totiweke swin’we ni vanakulobye va vona va “tinyimpfu tin’wana” lava tirhisanaka na vona, va ya emahlweni va rhamba vanhu leswaku va vuyeriwa eka “nkarhi lowu amukelekaka.”—Yoh. 10:16.

8. I yini lexi endlaka leswaku xirhambo xa ku vuyelelana ni Xikwembu xi va xa nkoka?

⁸ Xirhambo xa leswaku vanhu va vuyelelana ni Xikwembu i xa nkoka swinene hikuva hambileswi vanhu ku nga vona va onheke vuxaka bya vona ni Xikwembu hikwalaho ka ku xandzuka loku veke kona aEdeni, Xikwembu hi xona lexi tekeke goza ku sungula leswaku vanhu va tlhela va va ni vuxaka na xona. (1 Yoh. 4:10, 19) Xana xi endle yini? Pawulo u hlamule a ku: “Xikwembu ha Kreste xi endle leswaku misava yi vuyelelana na xona, a xi yi hlayeli swivi swa yona, naswona xi hi nyike rito ra ku vuyelelana.”—2 Kor. 5:19; Esa. 55:6.

9. Pawulo u endle yini ku kombisa leswaku wa ti tlangela tintswalo ta Xikwembu?

⁹ Hi ku lunghiselela gandzelo ra nkutsulo, Yehovha u endle leswaku lava kombisaka ripfumelo va rivaleriwa swidyoho swa vona naswona va tlhela va va ni vunghana kumbe ku tirhisana na yena. Ku tlula kwalaho, u rhumele vayimeri vakwe leswaku va khutaza vanhu hinkwako-nkwako leswaku va va ni ku rhula na yena loko va ha swi kota. (Hlaya 1 Timotiya 2:3-6.) Leswi Pawulo a a twisisa ku rhandza ka Xikwembu nileswaku nkarhi lowu a a hanya eka wona a wu ri wa nkoka, u tirhe hi matimba eka “vutirheli bya ku vuyelelana.” Ku rhandza ka Yehovha a ku cincanga. Wa ha rhandza leswaku vanhu lava hambanisiweke na yena va tlhela va va ni vuxaka na yena. Marito ya Pawulo lama nge, “sweswi ngopfu-ngopfu i nkarhi lowu amukelekaka” ni lama nge, “sweswi i siku ra ku ponisiwa” ma ha tirha. Hakunene Yehovha i Xikwembu xa tintswalo ni ntwela-vusiwana!—Eks. 34:6, 7.

U Nga ‘Hupi Xikongomelo Xa Wona’

10. “Siku ra ku ponisiwa” a ri vula yini eka Vakreste lava totiweke va le nkarhini lowu hundzeke ni va sweswi?

¹⁰ Vanhu lava rhangeke va vuyeriwa eka musa lowu lowu nga faneriwiki a ku ri lava nga “ni vun’we na Kreste.” (2 Kor. 5:17, 18) Eka vona, “siku ra ku ponisiwa” ri sungule hi Pentekosta ya 33 C.E. Ku sukela hi nkarhi wolowo ku ya emahlweni, vanhu volavo va nyikiwe ntirho wo twarisa “rito ra ku vuyelelana.” Ninamuntlha, masalela ya Vakreste lava totiweke ma ha endla “vutirheli bya ku vuyelelana.” Ma swi xiya leswaku tintsumi ta mune leti muapostola Yohane a ti voneke exivonweni xa vuprofeta ti “khome timheho ta mune ta misava swi tiya, leswaku ku nga vi na mheho leyi hungelaka emisaveni.” Hikwalaho, ka ha ri “siku ra ku ponisiwa” ni “nkarhi lowu amukelekaka [ngopfu-ngopfu].” (Nhlav. 7:1-3) Hikwalaho ka xivangelo lexi, ku sukela eku sunguleni ka lembe-xidzana ra vu-20, masalela ya vatotiwa a ma ri karhi ma endla “vutirheli bya ku vuyelelana” hi ku hiseka ku fika etindhawini ta le kule ta misava.

11, 12. Eku sunguleni ka lembe-xidzana ra vu-20, Vakreste lava totiweke va swi kombise njhani leswaku a va wu tekela enhlokweni nkarhi lowu a va hanya eka wona? (Vona xifaniso eka tluka 15.)

¹¹ Hi xikombiso, hilaha swi vuriweke hakona ebukwini leyi nge Timbhoni Ta Yehovha I Vahuweleri Va Mfumo Wa Xikwembu, loko lembe-xidzana ra vu-20 ri tshinela, “C. T. Russell ni vanakulobye vakwe a va kholwa hi mbilu hinkwayo leswaku a va ri enkarhini wa ntshovelo ni leswaku vanhu a va fanele va twa ntiyiso lowu ntshunxaka.” Va endle yini hi mhaka leyi? Leswi a va swi xiya leswaku a va ri enkarhini wa ntshovelo, ku nga “nkarhi lowu amukelekaka [ngopfu-ngopfu],” vamakwerhu lava va vone swi nga enelanga ku rhambela vanhu eminhlanganweni ya vukhongeri. Vafundhisi va Vujagana se a va ri ni nkarhi wo leha va ri karhi va endla sweswo. Ku ri na sweswo, Vakreste volavo lava totiweke va sungule ku lava tindlela tin’wana leti tirhaka to twarisa mahungu lamanene. Hi xikombiso, va yi tirhise hi vutlhari thekinoloji leyi a yi famba emahlweni hi nkarhi wolowo leswaku va yisa ntirho wa vona emahlweni.

 ¹² Leswaku ntlawa wolowo lowutsongo wa vatirheli lava hisekaka wu twarisa mahungu lamanene ya Mfumo, wu tirhise swiphephana, timagazini ni tibuku. Wu tlhele wu tsala tinkulumo ni swihloko kutani wu swi yisa leswaku swi ya kandziyisiwa eka maphepha-hungu ya magidi. A wu haxa minongonoko leyi sekeriweke eMatsalweni eka swiya-ni-moya swa le tikweni leri a wu tshama eka rona swin’we ni swa le matikweni man’wana. Wu humese ni ku tirhisa swifaniso leswi tshuka-tshukaka leswi nga ni mpfumawulo lowu rhekhodiweke, emahlweni ko va vaendli va tifilimi va humesela vanhu swifaniso leswi nga ni mpfumawulo. Byi ve byihi vuyelo bya ku hiseka koloko lokukulu? Namuntlha ku ni vanhu va kwalomu ka nkombo wa timiliyoni lava hlanganyelaka eku twariseni ka rungula leri nge: “Vuyelelanani ni Xikwembu.” Entiyisweni, malandza wolawo ya Yehovha ya khale ma veke xikombiso lexinene xa ku hiseka hambileswi a ma nga talanga naswona a ma nga ri na ntokoto.

13. Hi xihi xikongomelo xa Xikwembu lexi hi faneleke hi xi tekela enhlokweni?

¹³ Marito ya Pawulo lama nge, “sweswi ngopfu-ngopfu i nkarhi lowu amukelekaka” ma ha ri ntiyiso. Hina lava hi voneke musa lowu nga faneriwiki wa Yehovha ha tsaka hileswi hi nyikiweke nkarhi wo twa ni ku amukela rungula ra ku vuyelelana. Ematshan’weni yo titwa hi enerisekile, hi ma tekela enhlokweni marito lama landzelaka ya Pawulo: “Ha mi kombela nakambe leswaku mi nga amukeli musa lowu nga faneriwiki wa Xikwembu kutani mi hupa xikongomelo xa wona.” (2 Kor. 6:1) Xikongomelo xa musa lowu nga faneriwiki wa Xikwembu i ku endla leswaku “misava yi vuyelelana na xona” hi ku tirhisa Kreste.—2 Kor. 5:19.

14. Hi swihi swiendlakalo leswi tsakisaka leswi humelelaka ematikweni yo tala?

¹⁴ Vunyingi bya vanhu lava pfariweke mahlo hi Sathana, va ha hambanisiwe ni Xikwembu naswona a va xi tivi xikongomelo xa musa lowu nga faneriwiki wa xona. (2 Kor. 4:3, 4; 1 Yoh. 5:19) Hambiswiritano, swiyimo swa misava leswi yaka swi nyanya swi endle leswaku vanhu vo tala va amukela mahungu lamanene loko va kombisiwa leswaku ku hambanisiwa ni Xikwembu hi swona swi vangaka leswaku vanhu va endla leswi hombolokeke va tlhela va xaniseka. Ni le matikweni lawa vanhu vo tala a va nga wu tsakeli ntirho wa hina wo chumayela, vo tala sweswi va amukela mahungu lamanene naswona va teka goza ro vuyelelana ni Xikwembu. Kutani, xana ha swi twisisa leswaku lowu i nkarhi wa leswaku hi swi hisekela swinene ku twarisa xikombelo lexi nge: “Vuyelelanani ni Xikwembu”?

15. Ematshan’weni ya leswaku hi chumayela rungula leri nyanyulaka vanhu, hi lava leswaku vanhu hinkwako-nkwako va tiva yini?

¹⁵ Ntirho wa hina a hi ku byela vanhu ntsena leswaku loko va tirhela Xikwembu xi ta va pfuna eka swiphiqo swa vona hinkwaswo naswona va ta titwa va antswa. Vo tala va yela sweswo ntsena etikerekeni, naswona tikereke ti tiyimiserile ku enerisa ku navela koloko. (2 Tim. 4:3, 4) Yoleyo a hi yona pakani ya vutirheli bya hina. Mahungu lamanene lawa hi ma chumayelaka i ya leswaku Yehovha u tiyimiserile ku rivalela swidyoho hi ku tirhisa Kreste hikwalaho ka leswi a nga ni rirhandzu. Hikwalaho, vanhu va nga swi kota ku vuyelelana ni Xikwembu. (Rhom. 5:10; 8:32) Hambiswiritano, “nkarhi lowu amukelekaka [ngopfu-ngopfu]” wu le kusuhi ni ku hela.

“Mi Pfurha Hi Moya”

16. I yini lexi pfuneke Pawulo leswaku a va ni xivindzi a tlhela a hiseka?

¹⁶ Kutani, xana hi nga tshama hi ri karhi hi hisekela vugandzeri bya ntiyiso hi ndlela yihi? Van’wana va nga ha va va ri ni tingana hi ntumbuluko kumbe va nga vulavuli ngopfu naswona swi nga ha va tikela ku kombisa ndlela leyi va titwaka ha yona kumbe ku va ni xinghana. Hambiswiritano, i swinene ku tsundzuka leswaku ku hiseka a hi ku kombisa ntsena erivaleni ndlela leyi munhu a titwaka ha yona kumbe ku nyanyuka; naswona a  ku titsheganga hi vumunhu lebyi munhu a nga na byona. Pawulo u kombise ndlela yo tshama hi ri karhi hi hiseka loko a khutaza Vakreste-kulobye a ku: “Mi pfurha hi moya.” (Rhom. 12:11) Moya wa Yehovha wu n’wi pfune swinene muapostola loyi leswaku a va ni xivindzi naswona a tiyisela entirhweni wo chumayela. Ku sukela enkarhini lowu Pawulo a vitaniweke ha wona hi Yesu ku fikela enkarhini lowu a khotsiweke ha wona ro hetelela a tlhela a dlawela ripfumelo rakwe eRhoma, ku nga malembe lama tlulaka 30—a nga tshikanga ku hiseka. Minkarhi hinkwayo Pawulo a a titshege hi Xikwembu, lexi hi ku tirhisa moya a xi n’wi nyika matimba lama lavekaka. U te: “Eka swilo hinkwaswo ndzi ni ntamu hikwalaho ka loyi a ndzi nyikaka matimba.” (Filp. 4:13) Hi nga vuyeriwa swinene loko hi dyondza swo karhi eka xikombiso xakwe!

17. I yini leswi nga hi pfunaka leswaku hi “pfurha hi moya”?

¹⁷ Rito leri hundzuluxeriweke ri va “pfurha” hi ku kongoma ri vula “ku vila.” (Bibele ya Kingdom Interlinear) Leswaku mati lama nga eketleleni ma tshama ma ri karhi ma vila, ku laveka ndzilo lowu hambetaka wu pfurha. Hilaha ku fanaka, leswaku hi “pfurha hi moya,” hi fanele hi tshama hi ri karhi hi kuma moya wa Xikwembu. Hi nga kuma moya wolowo hi ku tirhisa malunghiselelo hinkwawo lawa Yehovha a ma endleke leswaku a hi tiyisa hi tlhelo ra moya. Sweswo swi vula ku teka dyondzo ya hina ya ndyangu ni minhlangano ya vandlha swi ri swa nkoka—hi va ni dyondzo ya munhu hi yexe ni ya ndyangu nkarhi na nkarhi, hi khongela nkarhi na nkarhi naswona hi hlangana nkarhi na nkarhi ni Vakreste-kulorhi. Malunghiselelo lawa ma ta hi pfuna leswaku hi “pfurha hi moya,” ku fana ni ndzilo lowu endlaka leswaku mati lama nga eketleleni ma tshama ma ri karhi ma “vila.”—Hlaya Mintirho 4:20; 18:25.

18. Leswi hi nga Vakreste lava tinyiketeleke, xi fanele xi va xihi xikongomelo xa hina?

¹⁸ Munhu la tinyiketeleke hi loyi a dzikiseke mianakanyo yakwe eka xikongomelo xo karhi naswona a nga kavanyeteki hi ku olova kumbe ku hetiwa matimba leswaku a nga ha xi hetisisi. Leswi hi nga Vakreste lava tinyiketeleke, xikongomelo xa hina i ku endla xin’wana ni xin’wana lexi Yehovha a lavaka leswaku hi xi endla, hilaha Yesu a endleke hakona. (Hev. 10:7) Namuntlha, ku rhandza ka Yehovha hileswaku vanhu vo tala swinene va vuyelelana na yena. Hikwalaho, a hi tirheni hi ku hiseka entirhweni lowu wa nkoka swinene, lowu nga wa xihatla lowu faneleke wu endliwa namuntlha, hi tekelela Yesu na Pawulo.

Wa Tsundzuka Xana?

• A ku ri yini “vutirheli bya ku vuyelelana” lebyi a byi nyikiwe Pawulo ni Vakreste van’wana lava totiweke?

• Masalela ya vatotiwa ma wu tirhise njhani hi ndlela leyinene “nkarhi lowu amukelekaka [ngopfu-ngopfu]”?

• Vatirheli lava nga Vakreste va nga “pfurha hi moya” hi ndlela yihi?

[Swivutiso Swa Dyondzo]

[Xifaniso lexi nga eka tluka 12]

Pawulo a nga swi rivalanga leswi n’wi humeleleke loko a ri endleleni yo ya eDamaska