“Ereray e Re Awa ni Nge Ayuwegey Got”

“Ereray e re awa ni nge ayuwegey Got, daba’ e erera’ e re rran ni ngan thap ngak Got!”​—2 KOR. 6:2.

1. Mang nib t’uf ni ngad nanged e re maruwel ni th’abi ga’ fan ni ngad rin’ed ni gubin ngiyal’?

 “GUBIN ban’en ni bay ngal’an ni ki mada’ nga ngal’an e tin ma buch u fayleng.” (Ekl. 3:1, NW) Be weliy Solomon u roy murung’agen feni ga’ fan ni ngan dugliy ngal’an ni ngan rin’ ban’en ndemtrug ko milay’, fa milekag, fa siyobay, fa ngal’an ni ngan non. Machane kub t’uf ni ngad nanged e re maruwel ni th’abi ga’ fan ni thingar da rin’ed ni gubin ngiyal’. Ere n’en ni be yip’ fan e thingar da nanged ko mang e ngad mon’eged.

2. Uw rogon ni kad nanged ni nap’an ni i machib Jesus ma rib tamilangan’ u rarogon e ngiyal’ ni immoy riy?

² Nap’an ni immoy Jesus u fayleng, ma rib tamilangan’ u rarogon e ngiyal’ nem ni immoy riy, ma manang e n’en nib t’uf ni nge rin’. Bochan nib tamilangan’ ko mang e nge mon’eg ma aram fan ni manang ni ke taw nga nap’an ni nge lebug e pi yiiy u murung’agen fare Messiah ni ke n’uw nap’an ni un sonnag ni nge lebug. (1 Pet. 1:11; Rev. 19:10) Bay e maruwel ni nge rin’ ni aram e nge ayuweg e girdi’ ni ngar nanged ni ir fare Messiah ni kan micheg. Thingari machibnag e tin riyul’ u murung’agen Gil’ilungun Got me kunuy e piin ni yad ra un ngak ko gagiyeg ko re Gil’ilungun nem.​—Mark 1:15.

3. Mang e rin’ Jesus ni bochan e manang rarogon e ngiyal’ nem ni immoy riy?

³ Bochan ni manang Jesus rarogon e ngiyal’  ni immoy riy, ma aram fan ni i rin’ e tin nib m’agan’ e Chitamangin ngay nib pasig. I yog ngak pi gachalpen ni gaar: “Woldug e ba ga’ ni ba ga’ yang, machane piin girdien e maruwel ni nge kunuy nge tay nga naun e ba lich. Ere mmeybilgad ngak e en ni ir e suwon e woldug ngki pi’ boch girdien e maruwel ngar muruwliyed e re woldug rok nem nge af nga naun.” (Luke 10:2; Mal. 4:5, 6) Som’on e mel’eg Jesus 12 u fithik’ pi gachalpen ma tomur riy me mel’eg 70, me yog ngorad e n’en ni ngar rin’ed me pi’rad ni ngar machibnaged e re thin ni baaray ni gaar: “Gagiyeg rok Got e ke chugur.” Ma be weliy e Bible murung’agen Jesus ni gaar: “Faani yog Jesus e pi n’ey ngak fa ragag nge l’agruw i gachalpen nge mu’, me chuw u rom nge yan ni nge fil e thin rok Got ngak e girdi’ me machib u lan e pi binaw nib chugur ko gin’em.”​—Matt. 10:5-7; 11:1; Luke 10:1.

4. Mang kanawo’ e i folwok Paul rok Jesus Kristus riy?

⁴ I dag Jesus e kanawo’ ni nge fol pi gachalpen riy u rogon ni i par nib pasig mab yul’yul’. Ireray e n’en ni be yip’ apostal Paul fan u nap’an ni non ngak e piin taareb e michan’ rorad ni gaar: “Um folwokgad rog, ni bod rogon ni gu be folwok rok Kristus.” (1 Kor. 11:1) Mang kanawo’ e i folwok Paul rok Jesus Kristus riy? Bin th’abi ga’ fan e aram e i rin’ e tin rayog rok ni nge machibnag fare thin nib fel’. U lan e pi babyor ni i yoloy nga i pi’ ko pi ulung kakrom e i tay fapi thin ngay ni “dab um malmalgad,” nge “mpigpiggad ngak Somol ni gimed ba pasig ngay u lanin’med,” nge “gubin ngiyal’ ma nguum muruwliyed e maruwel romed ni fan ngak Somol,” nge “demtrug e n’en ni gimed ra ngongliy ma ngam tedan’med ngay, ni gowa gimed be maruwel rok Somol.” (Rom. 12:11; 1 Kor. 15:58; Kol. 3:23) Ku de pag Paul talin fa ngiyal’ i n’em ni m’ug Somol Jesus Kristus ngak u nap’an ni bay u daken e kanawo’ ni be sor i yan nga Damaskus nge fapi thin ni yog Jesus ngak Ananias ni nge yog ngak ni gaar: “Kug turguy ni nge pigpig ngog, ni ir e nge fek fithingag i yan ngak e piin ni gathi yad piyu Israel nge piin ni pilung, nge ngak e girdi’ nu Israel.”​—Acts 9:15; Rom. 1:1, 5; Gal. 1:16.

Fare “Awa ni Nge Ayuwegey Got”

5. Mang e k’aring Paul ni nge machib nib pasig?

⁵ Faan gad ra beeg fare babyor ni Acts, ma gad ra nang riy rogon ni i machib Paul nib pasig ma da i rus. (Acts 13:9, 10; 17:16, 17; 18:5) Ba tamilang u wan’ Paul rarogon e ngiyal’ ni immoy riy. I yog ni gaar: “Ereray e re awa ni nge ayuwegey Got, daba’ e erera’ e re rran ni ngan thap ngak Got.” (2 Kor. 6:2) Nap’an e duw ni 537 B.C.E., ma aram e ngiyal’ ni sul e girdi’ ni ur moyed ni kalbus u Babylon nga taferad. (Isa. 49:8, 9) Machane mang e be yip’ Paul fan? Faan gad ra fal’eg i yaliy e tin som’on nge tin tomur e thin ma ra ayuwegdad ni ngad nanged e n’en ni be lemnag.

6, 7. (a) Mang tow’ath e kan pi’ ngak e pi Kristiano ni kan dugliyrad e ngiyal’ ney? (b) Mini’ e yad be maruwel girdien fachi ulung u taabang?

⁶ U tabolngin e babyor rok Paul me weliy murung’agen ba tow’ath ni kan pi’ ngorad e pi Kristiano ni kan dugliyrad. (Mu beeg e 2 Korinth 5:18-20.) I yog ni ke piningrad Got ni ngar rin’ed ban’en nib ga’ fan ni aram e ngar “guyed rogon e tin ni ka ba’ e girdi’ ngkur manged pi tafager rok” Got mar weniggad ngorad ni ngar “manged pi tafager rok.” Re n’ey e be yip’ fan ni ngar fel’gad u wan’ Got.

⁷ Ka nap’an e togopuluw nni tay u Eden me par gubin e girdi’ nib mal’af rok Jehovah. (Rom. 3:10, 23) Bochan e re n’em ma ke par e  girdi’ ndar nanged murung’agen Got ma aram fan ni yad be gafgow ma yad be yim’. I yoloy Paul ni gaar: “Gadad manang ni urngin e tin ni ke sunumiy Got e be gel’gel’ ko amith ni bod rogon e amith ko gargel, ni kab kakrom i yib ke mada’ ko chiney.” (Rom. 8:22) Machane be ‘wenig’ Got ngak e girdi’ ni ngar sulod ngak ara ngar manged tafager rok. Ireram e maruwel ni kan pi’ ngak Paul nge pi Kristiano ni kan dugliyrad kakrom. Re “awa” nem e aram e ngiyal’ ni nge thap e piin nib mich Jesus u wan’rad ngak Got. Gubin e Kristiano ni kan dugliyrad nge “yugu boch e saf” ni yad be maruwel u taabang e yad be pining e girdi’ ni nge yib angin fare “awa” ngorad.​—John 10:16.

8. Mang nrib fel’ fare n’en ni yibe pining e girdi’ ni ngar manged tafager rok Got?

⁸ Fare pong ni yibe tay ni yibe pining e girdi’ ni ngar manged fager rok Got e rib manigil ni bochan e yugu aram rogon ni girdi’ e yad e kar kirebnaged e tha’ u thilrad Got ni bochan e togopuluw nni tay ngak Got u Eden, ma ke rin’ Got boch ban’en ni nge pithig e re magawon nem. (1 John 4:10, 19) Mang e ke rin’? I fulweg Paul ni gaar: “Got e be m’ag e tafager ngak urngin e girdi’ u daken Kristus. I Got e daki ta’ u wan’ e denen rorad ni nge togopluw ngorad, ma ke pi’ e thin riy ngomad nga rogon nra ngongliyrad ngar manged pi tafager rok.”​—2 Kor. 5:19; Isa. 55:6.

9. Mang e rin’ Paul ni nge dag nib ga’ fan e runguy rok Got u wan’?

⁹ Fare biyul ni pi’ Jehovah e ke bing e kanawo’ ngak e piin nra michan’rad ni ngan n’ag fan e denen rorad mar fel’gad u wan’. Ki pi’ be’ ni owchen ni nge yog ko girdi’ ni nge gapas thilrad Got ko ngiyal’ ni ka bay e tayim riy. (Mu beeg e 1 Timothy 2:3-6.) Bochan ni manang Paul e n’en nib m’agan’ Got ngay maku manang rarogon e ngiyal’ ni immoy riy, ma aram fan ni i maruwel nib pasig ni nge pingeg e girdi’ ‘ngar manged pi tafager’ rok Got. Dawori thil e n’en nib m’agan’ Got ngay. Ka be pi’ e tayim ko girdi’ ni ngar bad ngak nge fel’ e tha’ u thilrad. Fapi thin ni yog Paul ni “ereray e re awa ni nge ayuwegey Got” nge “erera’ e re rran ni ngan thap ngak Got” e ka bay rogon ngodad e ngiyal’ ney. Riyul’ ni Jehovah reb e Got ni ma runguyey!​—Ex. 34:6, 7.

Dab Da ‘Paged nge Maadab’

10. Mang rogon fare rran ni ngan thap ngak Got ngak e pi Kristiano ni kan dugliyrad kakrom nge chiney?

¹⁰ Piin ni yib angin e re runguy ney ngorad ko som’on e aram e piin ni kar ‘taab girdi’gad Kristus.’ (2 Kor. 5:17, 18) Pi girdi’ ney e ra ‘thapgad ngak Got’ u nap’an e duw ni Pentekost ko 33 C.E. Ma ka aram nap’an ni kan pi’ fare maruwel ngorad ni ngar ‘machibnaged ni Got e be m’ag e tafager ngak urngin e girdi’.’ Ngiyal’ ney e ku be weliy e piin ni kar mageygad ko pi Kristiano ni kan dugliyrad ngak e girdi’ rogon ni ‘ngar manged pi tafager rok Got.’ Yad manang ni fa aningeg i engel ni guy apostal John u nap’an nni pilyeg e changar rok e “kar taleged fa aningeg i nifeng nu fayleng, ni bochan e nge dab ki thow e nifeng u daken e fayleng.” Ere ireray e ngiyal’ ni ngan ‘thap ngak Got’ maku ireray fare ‘awa.’ (Rev. 7:1-3) Aram fan nu tabolngin e bin 20 e chibog keb i mada’ ko chiney ni be machib e piin ni kar mageygad ko piin ni kan dugliyrad ni yad ba pasig ma yad be weliy ngak e girdi’ u ga’ngin e fayleng rogon ni ‘ngar manged pi tafager rok Got.’

11, 12. Uw rogon ni dag e pi Kristiano ni kan dugliyrad ni ur moyed u tabolngin e bin 20 e chibog ni yad manang rarogon e ngiyal’ ni ur moyed riy? (Mu guy e sasing ko page 17.)

¹¹ Bod ni be yog fare babyor ni Jehovah’s Witnesses​—Proclaimers of God’s Kingdom, nu tungun e bin 20 e chibog, me “mich u wan’ C. T. Russell nge piin ni yad ba muun ngak ni yad bay u ngal’an e mokun woldug mab t’uf ni nge rung’ag e girdi’ e tin riyul’.” Ere mang e kar rin’ed? Bochan ni kar nanged ni yad bay u ngal’an e mokun woldug ara fare “awa’,” ma aram fan ni lemnag e pi walag nem nde gaman ni ke mus ni goo muulung e ngaur ted. Pi tayugang’ ko pi yurba’ i teliw ko Kristiano ni googsur e ke n’uw nap’an ni aram rogon e n’en  ni yad ma rin’. Machane pi Kristiano nem ni kan dugliyrad e ra tababgad i gay boch e kanawo’ ni ngar machibnaged fare thin nib fel’ riy. Kur fanayed e llowan’ ko science ni ngar mon’ognaged e maruwel rorad.

¹² I wereg e re ulung i tamachib nem boch e tract, nge yu ken e babyor ko girdi’. Kur ngongliyed boch e welthin ngaur ted nga lan boch e shimbung. Mu kur ngongliyed boch e program ngaun cheleg u radio. Kur ngongliyed boch e kachido nrayog ni ngan yaliy. Mang angin e pasig ni i tay e pi walag ney? Ngiyal’ ney e bay sogonap’an medlip e milyon e girdi’ ni yad be machibnag fare thin ni gaar: “Ngam paged Got nge pingegmed e toogor rok ngam manged pi tafager rok.” Riyul’ ni ke dag e pi tapigpig rok Jehovah e kanawo’ nib fel’ ni yira folwok riy ni yugu aram rogon ni boor ban’en ndar salapgad riy.

13. Mang e n’en nib m’agan’ Got ngay ni ngad lemnaged?

¹³ Fare bugithin ni yog Paul ni gaar, “ereray e re awa ni nge ayuwegey Got,” e dawori thil. Gadad e piin ni kad thamiyed e runguy rok Jehovah e gad be pining e magar ngak ni bochan e ke yog ni ngad rung’aged fare thin u murung’agen rogon ni ngad manged e pi tafager rok Got. Dabi pag rogon e pagan’ rodad ya ngad folgad ko fapi thin ni yog Paul ni gaar: “Gamad be wenig ngomed ni be lungumad: ke yog ngomed e tow’ath ni pi’ Got, ere thingar dab mpaged nge maadab.” (2 Kor. 6:1) Fan e re n’ey e bochan ni baadag Got ni nge ‘m’ag e tafager ngak urngin e girdi’’ u daken Kristus.​—2 Kor. 5:19.

14. Mang maruwel e ke mab e kanawo’ riy u boor e nam?

¹⁴ Yooren e girdi’ e ke tay Satan lanin’rad u fithik’ e lumor ma yad be par ni yad ba mal’af rok Got ma dar nanged fan e runguy rok. (2 Kor. 4:3, 4; 1 John 5:19) Machane bochan ni ke gel e kireb u fayleng ma aram fan ni boor e girdi’ ni kar motoyilgad u nap’an ni kan weliy ngorad ni kenggin e kireb nge gafgow ni be tay e girdi’ e bochan ni yad be par ni yad ba mal’af rok Got. Mus ko pi nam ni gathi ri baadag e girdi’ riy e machib e boor e girdi’ riy e chiney ni yad be motoyil ko fare thin nib fel’ ma yad be gay rogon ni ngar manged fager rok Got. Ere, gad manang ni ireray e ngiyal’ ni ngad pasiggad i weliy ko girdi’ ni ‘ngar paged Got nge pingegrad e toogor rok ngar manged pi tafager rok,’ fa?

15. Mang e gad baadag ni nge nang e girdi’ u gubin yang, ko bin ni kemus ni ngad machibnaged yad nge fel’ lanin’rad?

¹⁵ Maruwel rodad e gathi kemus ni nga dogned ko girdi’ ni faan yad ra sap ngak Got ma ra ayuwegrad ko pi magawon rorad mar felfelan’gad. Boor e girdi’ ni aram e n’en ni yad ma yaliy u nap’an ni yad ra yan nga galesiya, maku aram e n’en ni ma rin’ e pi yurba’ i teliw i yan. (2 Tim. 4:3, 4) Machane, gadad e gathi aram e n’en ni gad be nameg ko machib ni gad be tay. Ya gad be yog ko girdi’ nrayog ni nge n’ag Jehovah fan e denen rorad u daken Kristus. Kemus rogon ma dab ki par e girdi’ ni yad ba mal’af rok Got me yog nra manged tafager rok. (Rom. 5:10; 8:32) Machane, fare “awa ni nge ayuwegey Got” riy e ke chugur ni nge mus.

“Mpigpiggad ngak Somol ni Gimed Ba Pasig Ngay u Lanin’med”

16. Mang e ayuweg Paul ni nge pasig me par nde rus?

¹⁶ Ere uw rogon ni ngad pasiggad ko bin riyul’ e liyor? Boch i gadad e ba tamra’ ma ba  mo’maw’ ngorad ni ngar nonad ko girdi’. Machane ba fel’ ni nge dab da paged talin ni pasig e gathi kemus ni ma m’ug ko ngongol rok be’ ara fel’ngin. Ya ke tamilangnag Paul rogon ni nge m’ug ni gad ba pasig u nap’an ni gaar ngak e piin Kristiano: “Mpigpiggad ngak Somol ni gimed ba pasig ngay u lanin’med.” (Rom. 12:11) Gelngin Jehovah nib thothup e ku aram e n’en ni ayuweg Paul nge par nda i rus ma be k’adan’ u nap’an e machib. Nap’an ni pining Jesus ni nge mang reb i gachalpen nge mada’ ko yay ni tomur e kalbus nni tay ngak min li’ u Roma, ma da i malmal ko pigpig ni i tay ngak Got. Gubin ngiyal’ ni sap ngak Got ni nge pi’ gelngin. I gaar: “Demtrug e mit i n’en ni gu ra mada’nag ma ba’ gelngig ni ke pi’ Kristus nrayog ni gu par riy.” (Fil. 4:13) Ere faan gad ra fal’eg i lemnag e re n’ey ma ra yib angin ngodad!

17. Uw rogon ni ngad ‘pigpiggad ngak Somol ni gad ba pasig ngay u lanin’dad’?

¹⁷ Fare bugithin ni “pasig” e be yip’ fan “ban’en ni be ligil.” Faanra nge par ba tipot i ran ni be ligil, ma thingari fel’ e nifiy ngay. Ere ku arrogon ni faanra ngad ‘pigpiggad ngak Somol ni gad ba pasig ngay u lanin’dad,’ mab t’uf gelngin Got nib thothup rodad. Rogon ni nge yog e re gelngin nem ngodad e aram e ngad maruwelgad ko pi n’en ni ke ngongliy Jehovah rogon ke tay ni fan e nge ayuweg e michan’ rodad. Re n’ey e be yip’ fan ni ngaud ted e fol Bible ni tabinaw, ma ngaud meybilgad, ma gad be un ko muulung ni gubin ngiyal’. Aram e n’en nra ayuwegdad ni ngad ‘pigpiggad ni gadad ba pasig ngay u lanin’dad’ ni bod rogon fare “nifiy” nra ayuweg fare tipot nga i par ni be “ligil.”​—Mu beeg e Acts 4:20; 18:25.

18. Gad e Kristiano ni kad ognaged gadad e susun ni mang e nge m’on u wan’dad?

¹⁸ Be’ ni ke ognag ir nga ban’en e ke par ni ir e ba m’on u wan’ ma ke mo’maw’ ni nge sor laniyan’ nga bang. Gadad e piin ni kad ognaged gadad ngak Got e n’en nib m’on u wan’dad e aram e ngad rin’ed e n’en ni baadag Jehovah ni ngad rin’ed, ni bod ni i rin’ Jesus. (Heb. 10:7) N’en nib m’agan’ Jehovah ngay e aram e nge mang fager rok urngin e girdi’ nrayog. Ere ngad pasiggad ni gad gubin ma gad folwok rok Jesus nge Paul ngad rin’ed e re maruwel ney nrib ga’ fan.

Ka Ga Manang?

• Mang fare thin u murung’agen rogon ni ngan ‘mang pi tafager rok’ Got nni pi’ ngak Paul nge ku boch e Kristiano ni kan dugliyrad ni ngar machibnaged?

• Uw rogon ni be fanay e piin ni kar mageygad ko fachi ulung fare “awa ni nge ayuwegey Got” riy nib fel’ rogon?

• Uw rogon ni nge pigpig e pi tamachib ni Kristiano ni yad ba ‘pasig ngay u lanin’rad’?

[Study Questions]

[Picture on page 14]

De pag Paul talin fa ngiyal’ i n’em ni m’ug Somol Jesus Kristus ngak