«Bejlaʼeʼ letiʼ le jach maʼalob kʼiinoʼ»
«Bejlaʼeʼ letiʼ le jach maʼalob kʼiinoʼ»
«Bejlaʼeʼ letiʼ le jach maʼalob kʼiinoʼ, bejlaʼeʼ [...] u kʼiinil [salvación].» (2 COR. 6:2)
1. ¿Baʼaxten unaj u yilik máak baʼaxoʼob kʼaʼabéet u tsʼáaik táanil ichil u kuxtal?
SALOMONEʼ tu tsʼíibtaj: «Way yóokʼol kaabeʼ yaan junsúutuk utiaʼal u yúuchul tuláakal baʼax» (Ecl. 3:1). Lelaʼ tu yaʼalaj utiaʼal u yeʼesik u kʼaʼabéetil u yéeyik máak tubeel u tiempoil utiaʼal u beetik tuláakal baʼal, jeʼex u yúuchul paakʼáal, u jóokʼol máak xíimbal, maan, koonol wa u tsikbal yéetel u maasil. Baʼaleʼ unaj u kanik máak u yil baʼax maas kʼaʼabéet u yáax beetik mantatsʼ. Lelaʼ jeʼel u yáantkoʼon utiaʼal k-ilik baʼax unaj k-tsʼáaik táanil ichil k-kuxtaleʼ.
2. ¿Bix k-ojéeltik Jesuseʼ u yojel tiʼ baʼax tiempoiloʼob kuxaʼan kaʼachi?
2 Le tiaʼan Jesús way Luʼumoʼ jach u yojel kaʼach baʼax tiempoiloʼob kuxaʼan, bey xan baʼax meyajiloʼob unaj u yáax beetik. Tu kanaj u yil baʼax unaj u tsʼáaik táanil, tumen u yojel tsʼoʼok u kʼuchul u kʼiinil u béeychajal tuláakal le profecíaʼob ku tʼaanoʼob tiʼ le Mesíasoʼ (1 Ped. 1:11; Apo. 19:10). Letiʼeʼ unaj u tsʼáaik ojéeltbil letiʼ le Mesías aʼalaʼan u taaloʼ, u kʼaʼaytik u maʼalob péektsilil le Reino tiʼ yaʼab máakoʼoboʼ yéetel u muchʼik le máaxoʼob kun gobernar tu yéeteloʼ. Tsʼoʼoleʼ kʼaʼabéet u muchʼik le yáax máaxoʼob kun tsaypachtik utiaʼal u kʼaʼaytkoʼob yéetel u kaʼanskoʼob uláakʼ máakoʼob tiʼ tuláakal yóokʼol kaab (Mar. 1:15).
3. ¿Baʼax tu beetaj Jesús tumen u yojel baʼax tiempoiloʼob kuxaʼan kaʼachi?
3 Le baʼax u yojel Jesusoʼ le péeks u tsʼáa u yóol u beet baʼax utstutʼaan u Taata. Letiʼeʼ tu yaʼalaj tiʼ u disipuloʼob: «Jach tu jaajileʼ sen yaʼab le kool kʼaʼabéet u joʼocholoʼ, baʼaleʼ le j-meyajoʼoboʼ jach junpʼíitoʼob. Le beetikeʼ kʼáat óolteʼex tiʼ u yuumil le kooloʼ ka u túuxt uláakʼ j-meyajoʼob utiaʼal jooch» (Luc. 10:2; Mal. 4:5, 6.) Táanileʼ tu yéeyaj doce juntúulal disipuloʼob, tsʼoʼoleʼ ka tu yéeyaj uláakʼ setenta. Ka tsʼoʼok u tsoliktiʼob baʼax ken u beetoʼobeʼ tu túuxtaj u kʼaʼaytoʼob: «Tsʼoʼok u náatsʼal u [reinoil] kaʼan». Baʼaleʼ ¿baʼax túun tu beetaj letiʼ? Le Bibliaoʼ ku yaʼalik: «Jesuseʼ le ka tsʼoʼok u tsʼáaik tsolxikinoʼob tiʼ u doce j-kaanbaloʼobeʼ, lukʼ teʼeloʼ ka bin kaʼansaj yéetel [kʼaʼaytaj] tu kaajiloʼob le luʼumoʼ» (Mat. 10:5-7; 11:1; Luc. 10:1).
4. ¿Bix úuchik u beetik Pablo jeʼex tu beetil Jesucristoeʼ?
4 U Hijo Dioseʼ tu yeʼesaj tiʼ tuláakal u disipuloʼob bix unaj u tsʼáaik u yóoloʼob u meyajtoʼob Dios. Lelaʼ letiʼe baʼax tu yeʼesaj Pablo tiʼ le sukuʼunoʼob úuchjeakil le ka tu yaʼalajtiʼob le tʼaanoʼobaʼ: «Kuxleneʼex jeʼel bix in kuxtal tenoʼ, jeʼel bix teneʼ táan in kuxtal jeʼel bix u kuxtal Cristoeʼ» (1 Cor. 11:1). ¿Bix úuchik u beetik Pablo jeʼex tu beetil Jesuseʼ? Letiʼe úuchik u jach tsʼáaik u yóol u kʼaʼayt le maʼalob péektsiloʼ. Le oʼolal teʼ cartaʼob tu túuxtaj tiʼ le múuchʼuliloʼoboʼ tu yaʼalajtiʼob: «Maʼ a maʼakʼóoltaleʼex tiʼ le baʼaxoʼob ka beetkeʼexoʼ». «Meyajteʼex Jéeoba bey palitsileʼexeʼ», «meyajneneʼex [...] yaʼab mantatsʼ tiʼ u meeyjul Yuumtsil» yéetel «jeʼel baʼalak ka a beeteʼexeʼ, beeteʼex yéetel utsil óolal, bey táan a meyajtikeʼex Yuumtsileʼ» (Rom. 12:11, NM; 1 Cor. 15:58; Col. 3:23). Maʼ tuʼubtiʼ le úuchik u chíikpajal Jesucristo tiʼ tu bejil Damascooʼ, mix le baʼax tu yaʼalaj Jesús ka aʼalaʼaktiʼ tumen Ananíasoʼ: «Le máakoʼ in yéeymaj utiaʼal ka u tsikbalt in kaabaʼ tiʼ u kajnáaliloʼob yaanal luʼumoʼob, tiʼ [reyoʼob yéetel], tiʼ le israeliloʼob xanoʼ» (Hch. 9:15; Rom. 1:1, 5; Gal. 1:16).
«Bejlaʼeʼ letiʼ le jach maʼalob kʼiinoʼ»
5. ¿Baʼaxten jach tu tsʼáaj u yóol Pablo u meyajt Dios?
5 Ken k-xok u libroil Beetaʼanoʼobeʼ k-ilik bix úuchik u tsʼáaik u yóol Pablo u meyajt Dios (Hch. 13:9, 10; 17:16, 17; 18:5). ¿Baʼaxten jach tu tsʼáaj u yóol? Tumen u yojel tiʼ baʼax tiempoiloʼob kuxaʼan kaʼachi. Le oʼolal tu yaʼalaj: «Bejlaʼeʼ letiʼ le jach maʼalob kʼiinoʼ, bejlaʼeʼ [...] u kʼiinil [salvación]» (2 Cor. 6:2). Le tʼaanoʼobaʼ meyajnaj utiaʼal u yúuchul tʼaan tiʼ le ka jóokʼ le israelitaʼob tu luʼumil Babilonia utiaʼal u suutoʼob Jerusalén tu jaʼabil 537 táanil tiʼ u taal Jesús (Isa. 49:8, 9). Baʼaleʼ ¿tiʼ baʼax ku tʼaan Pablo teʼ tekstoaʼ? Le baʼax tsʼoʼok u yáax aʼalikoʼ ku yáantkoʼon k-naʼate.
6, 7. ¿Baʼax jatsʼuts páajtalil tsʼaʼab tiʼ le sukuʼunoʼob yéeyaʼanoʼoboʼ, yéetel máaxoʼob áantikoʼob?
6 Tu tsʼoʼokbal le capítulo cincooʼ, Pabloeʼ tʼaanaj tiʼ le jatsʼuts meyaj kʼubéentaʼabtiʼ yéetel tiʼ uláakʼ sukuʼunoʼob yéeyaʼanoʼob utiaʼal u binoʼob kaʼanoʼ (xokaʼak 2 Corintoiloʼob 5:18-20). Tu yaʼaleʼ yéeyaʼaboʼob tumen Dios utiaʼal u beetkoʼob junpʼéel meyaj. Unaj u beetkoʼob «u meeyjul le kaʼa bisajbail[oʼ]» yéetel u kʼáat óoltikoʼob tiʼ le máakoʼoboʼ: «Bisabaʼex tu kaʼatéen yéetel Jajal Dios». Lelaʼ ku yeʼeskeʼ kʼaʼabéet u invitarkoʼob le máakoʼob utiaʼal ka u yil u kaʼa biskubaʼob yéetel Diosoʼ.
7 Ka kʼebanchaj le yáax wíinikoʼob tu jardinil Edenoʼ, náachchajoʼob tiʼ Jéeoba (Rom. 3:10, 23). Le oʼolal joʼopʼ u muʼyajoʼob yéetel kíimoʼob. Pabloeʼ tu yaʼalaj: «K-ojel tak bejelaʼeʼ tuláakal le baʼaloʼob u beetmaj Jajal Diosoʼ ku yáakam yéetel ku mukʼyaj jeʼel bix juntúul koʼolel táan u síijsajeʼ» (Rom. 8:22). Baʼaleʼ Dioseʼ tu chʼaʼatuklaj u invitartik yéetel u kʼáat óoltik tiʼ le máakoʼob ka u kaʼa natsʼubaʼob tu yiknal utiaʼal u kaʼa biskubaʼob tu yéeteloʼ. Lelaʼ letiʼe baʼax kʼaʼabéet u tsʼáaik ojéeltbil Pablo yéetel u maasil sukuʼunoʼob yéeyaʼanoʼob teʼ yáax siglooʼ. «Le jach maʼalob kʼiinoʼ» «u kʼiinil» utiaʼal u salvartikuba tuláakal le máaxoʼob ku tsʼáaik u fejoʼob tiʼ Jesusoʼ. Teʼ kʼiinoʼobaʼ le sukuʼunoʼob yéeyaʼanoʼob yéetel le «uláakʼ tamanoʼob[oʼ]» láayliʼ táan u yaʼalikoʼob tiʼ le máakoʼob ka u yiloʼob «jach maʼalob kʼiin» kuxlikoʼon utiaʼal u salvartikubaʼob xanoʼ (Juan 10:16).
8. ¿Baʼaxten jach jatsʼuts le u invitacionil «kaʼa bisajbail» ku tsʼaʼabaloʼ?
8 ¿Baʼaxten jach jatsʼuts le u invitacionil «kaʼa bisajbail» ku tsʼáaikoʼoboʼ? Tumen kex letiʼe wíinik tu náachkuntuba tiʼ Jéeobaoʼ, letiʼ aʼalik tiʼ le máakoʼob ka u kaʼa natsʼubaʼob tu yiknaloʼ (1 Juan 4:10, 19). ¿Bix úuchik u beetik? Pabloeʼ ku yaʼalik: «Jajal Dioseʼ táan u beetik u kaʼa biskuba tuláakal yóokʼol kaab tu yéeteleʼ tu yoʼolal Cristo, maʼatan u beetik u cuentail u kʼeeban máakoʼob; tiʼ toʼon túuneʼ tu kʼubéentaj ka k-tsʼáa ojéeltbil u maʼalob péektsil[il] le kaʼabisajbailaʼ» (2 Cor. 5:19; Isa. 55:6).
9. ¿Bix úuchik u yeʼesik Pablo jach ku tsʼáaik u nib óolalil u yutsil Dios?
9 Úuchik u túuxtik u Hijo kíimil t-oʼolaleʼ, Jéeobaeʼ tu tsʼáaj u páajtalil u perdonartaʼal u kʼeeban le máaxoʼob yaan u fejoʼob tiʼoʼ, beyoʼ ku páajtal u kaʼa biskubaʼob tu yéetel. Tsʼoʼoleʼ tu túuxtaj aʼalbil tiʼ tuláakal máakoʼob yóokʼol kaab ka u natsʼubaʼob tu yiknal teʼ kʼiinoʼob láayliʼ yaan u tiempoiloʼ (xokaʼak 1 Timoteo 2:3-6). Ka tu naʼataj Pablo baʼax u kʼáat Dios ka u beet, bey xan tiʼ baʼax tiempoil kuxaʼaneʼ, tu jach tsʼáaj u yóol u tsʼáa «ojéeltbil u maʼalob péektsil le kaʼabisajbailaʼ». Dioseʼ maʼ u kʼex bix u tuukuliʼ. Láayliʼ u kʼáat ka u natsʼuba le máakoʼob tu yiknaloʼ. «Bejlaʼeʼ [láayliʼ] letiʼ le jach maʼalob kʼiinoʼ, bejlaʼeʼ [...] u kʼiinil [salvación]», jeʼex úuchik u yaʼalik Pablooʼ. ¿Máasaʼ Jéeobaeʼ jach uts yéetel ku chʼaʼiktoʼon óotsilil? (Éxo. 34:6, 7.)
Maʼ u xuʼulul a béeykuntkeʼex le baʼax oʼolal ku tsʼaʼabalteʼex u yutsil Diosoʼ
10. ¿Bix u yilaʼal «u kʼiinil [salvación]» tumen le sukuʼunoʼob yéeyaʼanoʼob úuchjeakil yéetel teʼ kʼiinoʼobaʼ?
10 Le máaxoʼob tu yáax kʼamoʼob u yutsil Diosoʼ letiʼe sukuʼunoʼob kun múuchʼ meyajoʼob yéetel Cristooʼ (2 Cor. 5:17, 18). Utiaʼal letiʼobeʼ «u kʼiinil [le salvacionoʼ]» káaj teʼ Pentecostés tiʼ u jaʼabil 33 tiʼ le yáax siglooʼ. Desde teʼ kʼiinoʼob jeʼeloʼ kʼubéentaʼabtiʼob ka u tsʼaʼob «ojéeltbil u maʼalob péektsil[il] le kaʼabisajbail[oʼ]». Teʼ kʼiinoʼob xanaʼ láayliʼ pʼaatal way Luʼum jujuntúul sukuʼunoʼob yéeyaʼanoʼob táan u tsʼáaikoʼob «ojéeltbil u maʼalob péektsi[lil] le kaʼabisajbail[oʼ]». Letiʼobeʼ tu naʼatoʼobeʼ le kantúul angeloʼob ilaʼab tumen apóstol Juanoʼ «táan u kʼatikoʼob u beel [u] kanpʼéel iikʼiloʼob luʼum tu yoʼolal maʼ u yustaj mix junpʼéel iikʼ yóokʼol luʼum». «U kʼiinil [salvacionoʼ]» maʼ tsʼoʼokokiʼ, bejlaʼeʼ láayliʼ «letiʼ le jach maʼalob kʼiinoʼ» (Apo. 7:1-3). Le oʼolal desde tu káajbal le siglo 20, u yalab tiʼ le sukuʼunoʼob yéeyaʼanoʼoboʼ, jach tu tsʼáaj u yóoloʼob u kʼaʼaytoʼob «u maʼalob péektsil[il] le kaʼabisajbail» tiʼ tuláakal yóokʼol kaaboʼ.
11, 12. Tu káajbal le siglo 20, ¿bix úuchik u yeʼesik le sukuʼunoʼob yéeyaʼanoʼob ku naʼatkoʼob tiʼ baʼax kʼiiniloʼob kuxaʼanoʼob kaʼachi? (Ilaʼak le fotoʼob yaan teʼ táan juʼun 15.)
11 Jeʼex u yaʼalik le libro Los testigos de Jehová, proclamadores del Reino de Dios, le taʼaytak u káajal le siglo 20, «Russell yéetel le máaxoʼob ku meyajoʼob yéeteloʼ, ku creerkoʼob kaʼacheʼ kuxaʼanoʼob tu kʼiiniloʼob le joochoʼ, tumen kʼaʼabéet u yojéeltaʼal tumen u maasil le u jaajil jeʼel u jáalkʼabtikoʼoboʼ». ¿Baʼax túun tu beetoʼob? Tumen tu tsʼáajoʼob cuenta kuxaʼanoʼob tu kʼiiniloʼob le jooch, wa «le jach maʼalob kʼiinoʼ», maʼ chéen tu invitartoʼob le máakoʼob ka u muchʼubaʼob tu yéeteloʼoboʼ. Tumen leloʼ letiʼe baʼax úuch joʼopʼok u beetaʼal tumen u nuuktakil u maasil religionoʼoboʼ. Baʼaxeʼ le sukuʼunoʼob yéeyaʼanoʼoboʼ joʼopʼ u kaxtikoʼob uláakʼ bix jeʼel u tsʼáaikoʼob ojéeltbil u maʼalob péektsilil le Reinooʼ. Joʼopʼ u meyajtiʼob le baʼaloʼob túumbentak ku jóoʼloʼoboʼ.
12 Utiaʼal u kʼaʼaytikoʼob le maʼalob péektsiloʼ, le junpʼíit sukuʼunoʼobaʼ meyajnajtiʼob tratadoʼob, folletoʼob, revistaʼob yéetel libroʼob. Tsʼoʼoleʼ tu jóoʼsoʼob tsoltʼaanoʼob yéetel uláakʼ baʼaxoʼob ku yaʼalik le Biblia tiʼ u milesil periodicoʼoboʼ. Tu máansoʼob xan kaʼansajoʼob tiʼ le Biblia tiʼ radio ku yuʼubaʼal kaʼach tak tuláakʼ luʼumiloʼob, yéetel teʼ kʼiinoʼob maʼatech u yuʼubaʼal u tʼaan le máakoʼob teʼ cineʼoboʼ, tu jóoʼsoʼob peliculaʼob ku yuʼubaʼal u tʼaan le máaxoʼob ku chíikpajloʼoboʼ. ¿Baʼax utsil tu kʼamoʼob yoʼolal le yaʼabach meyaj tu beetoʼoboʼ? Bejlaʼeʼ yaan siete millones juntúulal máakoʼob tsʼoʼok u kʼamkoʼob le invitacionoʼ yéetel táan xan u yaʼalikoʼob tiʼ u maasil: «Bisabaʼex tu kaʼatéen yéetel Jajal Dios». Tuláakal lelaʼ béeychaj tumen le sukuʼunoʼob yéeyaʼanoʼoboʼ jach tu tsʼáaj u yóol u bisoʼob le maʼalob péektsil kex maʼ chéen chʼaʼabil úuchik u beetkoʼoboʼ.
13. ¿Baʼax tsolnuʼukil tu tsʼáaj Pablo unaj k-chʼaʼik en cuentail?
13 Jeʼex úuchik u yaʼalik Pablooʼ: «Bejlaʼeʼ letiʼ le jach maʼalob kʼiinoʼ». Toʼoneʼ jach kiʼimak k-óol úuchik u yeʼesiktoʼon u yutsil Jéeoba, tumen tu tsʼáajtoʼon u páajtalil k-uʼuyik le maʼalob péektsil utiaʼal k-kaʼa bisikba tu yéeteloʼ. K-ilik k-beetik le baʼax tu yaʼalaj Pabloaʼ: «Maʼ a kʼamkeʼex u nojoch utsil wa maʼ kun seguer a béeykuntkeʼex le baʼax oʼolal ku tsʼaʼabalteʼexoʼ» (2 Cor. 6:1, NM). Jéeobaeʼ ku yeʼesik u yutsil tumen u kʼáat ka u kaʼa bisuba «tuláakal yóokʼol kaab tu yéetel» «tu yoʼolal Cristo» (2 Cor. 5:19).
14. ¿Baʼax táan u beetik yaʼabach máakoʼob tiʼ jejeláas luʼumiloʼob bejlaʼeʼ?
14 U maas yaʼabil le máakoʼob bejlaʼaʼ láayliʼ pixaʼan u tuukuloʼob tumen Satanaseʼ, náach yaniloʼob tiʼ le Máax beetmiloʼoboʼ yéetel maʼ u yojloʼob baʼax oʼolal ku yeʼesik u yutsil Diosiʼ (2 Cor. 4:3, 4; 1 Juan 5:19). Kex beyoʼ, yaʼabeʼ ku kʼamik le maʼalob péektsil ken u yiloʼob tsʼoʼok u jach kʼastal baʼaxoʼob ku beetaʼal way yóokʼol kaabeʼ bey xan yoʼolal le sen muʼyajiloʼoboʼ, yéetel ken u yojéeltoʼob tuláakal lelaʼ ku yúuchul tumen maʼ tu beetaʼal baʼax ku yaʼalik Dios tumen wíinik. Tak teʼ tuʼuxoʼob óoliʼ maʼatech u kʼaʼamal kaʼach le maʼalob péektsiloʼ, bejlaʼeʼ yaʼab máaxoʼob táan u kʼaʼamik yéetel táan u joʼopʼol u biskubaʼob yéetel Jéeoba. ¿K-naʼatik wa bejlaʼeʼ u kʼiinil k-jach k-tsʼáaik óol utiaʼal k-aʼalik tiʼ le máakoʼoboʼ: «Bisabaʼex tu kaʼatéen yéetel Jajal Dios»?
15. ¿Baʼax jach tu jaajil k-kʼáat ka u yojéelt u maasil?
15 Toʼoneʼ maʼ chéen táan k-aʼalik tiʼ u maasil ka u natsʼubaʼob yiknal Dios utiaʼal ka áantaʼakoʼob u aktáantoʼob le talmiloʼob yéetel utiaʼal ka yanak kiʼimak óolaltiʼobiʼ. Tumen leloʼ letiʼe baʼax u kʼáat u yuʼub yaʼabach máakoʼob tu iglesiaʼoboʼ, yéetel letiʼe baʼax ku yaʼalaʼaltiʼob xan tumen u pastoroʼoboʼ (2 Tim. 4:3, 4). U jaajileʼ maʼ letiʼe baʼax oʼolal k-kʼaʼaytik le maʼalob péektsiloʼ. Le maʼalob péektsil k-kʼaʼaytikoʼ ku yeʼeskeʼ yoʼolal u yaabilaj Jéeobaeʼ, u kʼáat u perdonart k-kʼeeban yoʼolal Cristo. Beyoʼ jeʼel u páajtal k-kaʼa natsʼikba yiknal Dios utiaʼal k-bisikba tu yéeteleʼ (Rom. 5:10; 8:32). Baʼaleʼ «le jach maʼalob kʼiinoʼ» taʼaytak u tsʼoʼokol.
«Chuʼupkeʼex yéetel kiliʼich muukʼ»
16. ¿Baʼax áant Pablo utiaʼal u seguer u tsʼáaik u yóol u maas meyajt Dios?
16 ¿Bix jeʼel u béeytal k-maas eʼesik celo yoʼolal u jaajil adoracionoʼ? Yanoʼobeʼ suʼlakoʼob yéetel maʼ séeb u tʼaanoʼobiʼ, le oʼolal talam u yilik u tsikbaloʼob bey xan u biskubaʼob yéetel u maasil. Baʼaleʼ unaj k-kʼaʼajsikeʼ le celooʼ maʼatech u yeʼesik máak chéen tumen maʼ suʼlakiʼ wa yoʼolal bix u modosiʼ. Pabloeʼ tu yaʼalaj baʼax kʼaʼabéet utiaʼal u yeʼesaʼal celo tumen juntúul máax meyajtik Dios, tu yaʼalaj: «Chuʼupkeʼex yéetel kiliʼich muukʼ» (Rom. 12:11, NM). Le kiliʼich muukʼoʼ tu yáantaj Pablo utiaʼal maʼ u sajaktal u beet le meyaj tsʼaʼabtiʼ tumen Diosoʼ. Le oʼolal letiʼeʼ tu jach tsʼáaj u yóol u kʼaʼayt le maʼalob péektsil ichil le treinta jaʼaboʼob máan desde ka tʼaʼan tumen Jesús tak le ka kʼaʼal yéetel ka kíimsaʼab tu kaajil Romaoʼ. Mantatsʼ tu kʼáataj u yáantaj Dios, le oʼolal áantaʼab yéetel le kiliʼich muukʼoʼ. Le beetik tu yaʼalaj: «Yanten u muukʼil utiaʼal in beetik tuláakal baʼal, tu yoʼolal le Máax tsʼáaikten u páajtalil in beetkoʼ» (Fili. 4:13, NM). ¿Máasaʼ jach yaʼab baʼax jeʼel k-kanik tiʼ letiʼeʼ?
17. ¿Baʼax áantik le máaxoʼob meyajtik Dios utiaʼal ka chuʼupkoʼob «yéetel kiliʼich muukʼ[oʼ]»?
17 Le tʼaan griego ku suʼutul «chuʼupkeʼexoʼ», u kʼáat u yaʼal «táan u look» (Bover-Cantera). Tuukulnakoʼon tiʼ le jaʼoʼ. ¿Baʼax kʼaʼabéet utiaʼal maʼ u xuʼulul u look? Kʼaʼabéet maʼ u tuʼupul yáanal. Utiaʼal ka chuʼupkoʼon xan «yéetel kiliʼich muukʼ[eʼ]» kʼaʼabéettoʼon kiliʼich muukʼ mantatsʼ. Baʼaleʼ ¿bix jeʼel u yantaltoʼoneʼ? Kʼaʼabéet k-kʼamik tuláakal le baʼaxoʼob ku tsʼáaik Jéeoba utiaʼal k-muʼukʼaʼankúuntik k-fejoʼ. Le oʼolal jach unaj k-tsʼáaik k-óol xook ich familiail bey xan t-juunal, k-payalchiʼ tiʼ Jéeoba mantatsʼ yéetel k-bin teʼ muchʼtáambaloʼoboʼ, tumen leloʼobaʼ táakaʼanoʼob ichil k-adorartik Dios. Leloʼobaʼ jeʼel u yáantkoʼon utiaʼal maʼ u tuʼupul le «kʼáakʼ» beetik «k-look» wa k-chuʼupul «yéetel kiliʼich muukʼ[oʼ]» (xokaʼak Beetaʼanoʼob 4:20 yéetel 18:25).
18. ¿Baʼax jach unaj k-tsʼáaik k-óol k-beete?
18 Toʼoneʼ unaj k-jach kʼubik k-óol k-meyajt Dios, le oʼolal k-kanáantik maʼ u náayal mix u lúubul k-óol. ¿Baʼaxten k-beetik beyoʼ? Tumen k-kʼáat k-beet baʼax ku yaʼalik Dios, jeʼex tu beetil Jesuseʼ (Heb. 10:7). Jéeobaeʼ u kʼáat ka u kaʼa natsʼuba tu yiknal u maas yaʼabil máakoʼob ku páajtal. Le oʼolal unaj k-beetik jeʼex tu beetil Jesús yéetel Pabloeʼ, unaj k-jach tsʼáaik k-óol k-beet le meyaj maas jach unaj u séeb beetaʼal teʼ kʼiinoʼobaʼ.
¿Kʼajaʼan wa tech?
• ¿Baʼax u kʼáat u yaʼal «u meeyjul le kaʼa bisajbail» kʼubéentaʼab tiʼ Pablo yéetel u maasil sukuʼunoʼob yéeyaʼanoʼoboʼ?
• ¿Bix k-ojéeltik le sukuʼunoʼob yéeyaʼanoʼob pʼaatloʼob way Luʼumaʼ jach u tsʼaamaj u yóoloʼob meyaj teʼ «jach maʼalob kʼiin[aʼ]»?
• ¿Baʼax áantik le máaxoʼob meyajtik Dios utiaʼal ka chuʼupkoʼob «yéetel kiliʼich muukʼ[oʼ]»?
[U kʼáatchiʼiloʼob le xookoʼ]
[U tsolajil le oochel teʼ táan juʼun 12]
Pabloeʼ maʼ tuʼubtiʼ le úuchik u chíikpajal Jesucristo tiʼoʼ