Maʼ bidxiña dxi gacané Jiobá binni

«Dxandí ma bidxiña dxi acané be binni, ne yanna ri nga na be ulá be laacaʼ.» (2 COR. 6:2)

1. Xiñee naquiiñeʼ gánnanu xii nga ni jma risaca gúninu lu xquendanabáninu.

 «PARA guiráʼ cosa nuu tiempu, dede para gaca guiráʼ cosa ni nuu lu guidxilayú.» (Ecl. 3:1.) Salomón bicaa ca diidxaʼ ca ora guníʼ pabiáʼ naquiiñeʼ cuinu ti tiempu para gúninu cada cosa lu xquendanabáninu, casi ora chigudxíʼbanu xiixa, chuunu de viaje, chigúninu xiixa negocio ne ora guinínenu xcaadxi binni. Peru laaca naquiiñeʼ gánnanu xii nga dxiiñaʼ ni jma risaca gúninu ratiica nuunu. Nga zacané laanu gúninu cani primé.

2. Ximodo nánnanu biene Jesús xi tiempu ngue nabani.

² Dxi bibani Jesús lu Guidxilayú riʼ, laa gunna dxichi xi tiempu ngue nabani, ne xi dxiiñaʼ naquiiñeʼ guni. Jesús biiyaʼ chaahuiʼ xii nga ca cosa ni jma risaca ni naquiiñeʼ guni, purtiʼ biénebe maʼ bidxiña tiempu gaca cani na stale de ca diidxaʼ riguixhená ni cuzeeteʼ de Mesías (1 Ped. 1:11; Apo. 19:10). Tobi de laacani nga, gusihuínnibe laabe nga nácabe Mesías ni bieeteʼ gueeda que, guiniʼbe de Reinu stiʼ Dios ne gutagulisaabe cani chiguni mandarné laabe. Ne laaca napa xidé quíxhebe modo guni guiráʼ ca xpínnibe dxiiñaʼ, purtiʼ laacaʼ nga chigucheechecaʼ diidxaʼ lu guidubi Guidxilayú ne gusiidicaʼ binni para gaca discípulo (Mar. 1:15).

3. Xi biʼniʼ Jesús purtiʼ nanna xi tiempu ngue nabani.

³ Cumu nanna Cristu xi tiempu ngue  nuu la? ngue bicaa laa guni ni na Bixhoze né stale gana. Sicaríʼ gúdxibe ca discípulo stibe: «Ma stale binni cabeza si ucaa diaga stidxa Dios. Tu güi ni nga huaxiéʼ. Yanna lainaba lu Dios guseenda stale tu guni dxiiña ca, ti laa nga xpixuaana ni» (Luc. 10:2; Mal. 4:5, 6). De lade ca xpínnibe gulibe doce de laacaʼ ne despué gulibe setenta. Bisiénesibe laacaʼ xi naquiiñeʼ gúnicaʼ la? biseendabe laacaʼ para guiniʼcaʼ caadxi diidxaʼ nabé galán: «Ma zeda dxiña dxi guni mandar Dios». Yanna, xi bíʼnibe yaʼ. Biblia na: «Ne biluxe gudxi si Jesús ca discípulu que xi naquiiñe guni ca la? biree de raqué zeʼ, ziusiidi ne zigüí stiidxa Dios ndaani xquidxi irá cabe» (Mat. 10:5-7; 11:1; Luc. 10:1).

4. Ximodo biʼniʼ Pablu cásica biʼniʼ Jesús.

⁴ Jesús bisaana ti ejemplu galán para chinanda guiráʼ ca xpinni, laani nga gucheechecaʼ diidxaʼ né stale gana ne guni adorarcaʼ Dios. Ne ngapeʼ nga ni bizeeteʼ Pablu ora bicaa ca diidxaʼ riʼ ra nuu ca xpinni Cristu: «Lachinanda ejemplu stinne casi zinanda ejemplu sti Cristu» (1 Cor. 11:1). Ximodo biʼniʼ Pablu cásica biʼniʼ Jesús yaʼ. Primé la? purtiʼ bíʼnibe stipa biaʼ gúndatiʼ para gucheechebe ca diidxaʼ nacubi ne galán que. Ngue runi, lu ca carta bicaabe ra nuu ca neza binni ridagulisaa de dxiqué gunda gúdxibe laacaʼ ca diidxaʼ riʼ: «Cadi ichaaba tu», «laguni xhiiña Señor ne stale gana», «qué chuʼ dxi usaana tu de guni tu xhiiña Señor biaʼ ra ganda tiʼ» ne «irá ni guni tu la? laguni ni de idubi ladxidó to, casi ñaca xhiiña Señor cayuni tu, cadi xhiiña binni» (Rom. 12:11; 1 Cor. 15:58; Col. 3:23). Qué ñuu dxi nusiaandaʼ apóstol que dxi biree Señor Jesucristu lube ora zebe Damasco, ne laaca qué nusiaandabe ni gudxi Jesús Ananías gabi laabe: «Uyé purti ma ulié laabe chi güi né be ca judíu stiidxaʼ, ne cani cadi judíu, ne ca rey» (Hech. 9:15; Rom. 1:1, 5; Gál. 1:16).

Yánnapeʼ nga tiempu cayacané Jiobá binni

5. Xiñee bicheecheʼ Pablu diidxaʼ né stale gana.

⁵ Ora guidúʼndanu libru stiʼ Hechos ruuyaʼ dxíchinu pabiáʼ nadxibalú guca Pablu ora bicheeche diidxaʼ ne bíʼnibe ni né stale gana (Hech. 13:9, 10; 17:16, 17; 18:5). Xiñee bíʼnibe zaqué yaʼ. Purtiʼ nabé risaca gúnibe dxiiñaʼ que tiempu nabánibe que. Ngue runi guniʼbe: «Ne dxandí ma bidxiña dxi acané [Dios] binni, ne yanna ri nga na be ulá be laacaʼ» (2 Cor. 6:2). Lu iza 537 ante de ca dxi stiʼ Jesús nga guca ni na ca diidxaʼ riʼ, purtiʼ tiempu que nga chiguiree ca israelita de Babilonia para guibiguétacaʼ xquídxicaʼ (Isa. 49:8, 9). Peru xi gucalaʼdxiʼ apóstol que niníʼ ne ca diidxaʼ riʼ yaʼ. Xcaadxi textu ni cuzeeteʼ de relatu riʼ zacané laanu gánnanu xi laani.

6, 7. Xi dxiiñaʼ nabé risaca maʼ gucuaa ca xpinni Cristu ni bibí pur espíritu santu de yanna riʼ, ne tuu nga cani cayacané laacabe.

⁶ Lu caadxi versículo ante, Pablu maca guníʼ pabiáʼ risaca dxiiñaʼ ni gucuaa ne ni gucuaa xcaadxi xpinni Cristu ni bibí pur espíritu santu (biindaʼ 2 Corintios 5:18-20). Pablu bisiene gulí Dios laacabe para gúnicabe ti dxiiñaʼ ni maʼ gudixhe gaca. Naquiiñeʼ chécabe para «güi né [cabe] binni stiidxa [Dios] para ganda chuʼ né ca laabe tobi si» sti biaje ne guinábacabe binni «uyubi [...] chuʼ né [...] Dios tobi si». Ni na ca diidxaʼ ca nga guyubi ca binni ca chuʼcaʼ galán né Dios ne gaca xhamígucaʼ laabe sti biaje.

⁷ Ora bidxiidéchecabe Jiobá ndaaniʼ jardín ni guyuu Edén que, ca binni que bixélecaʼ de Jiobá (Rom. 3:10, 23). Ne ra bixélecabe de  Dios, bidxaagalúcabe stale guendananá ne gúticabe. Casi guníʼ Pablu: «Nuu né ni [bizáʼ Dios] ti yuuba roʼ, casi ti gunaa ora chi xhana, ruuna dede ricaalaʼdxiʼ» (Rom. 8:22). Peru Dios gudixhe ique guni invitar ca binni guidxilayú, dede gunábabe laacaʼ, guibiguétacaʼ né laabe sti biaje. Ngue nga dxiiñaʼ ni gupa Pablu dxiqué ne xcaadxi xpinni Cristu ni bibí ne espíritu santu. Tiempu que nga maʼ «bidxiña dxi acané [Dios] binni» para «ulá be» cani gapa fe Jesús. Ca dxi stinu riʼ, ca xpinni Cristu ni bibí pur espíritu santu ne «xcaadxi dendxu» cadi cusaana de guni invitarcaʼ binni para guicaacaʼ ndaayaʼ, purtiʼ maʼ «bidxiña dxi acané [Dios] binni» (Juan 10:16).

8. Xiñee nabé risaca nga chuʼné binni Dios tobi si.

⁸ Xiñee nabé risaca nga chuʼné binni Dios tobi si yaʼ. Purtiʼ neca binni guidxilayú nga bicheené Dios para bixeleʼ de laabe la? primé Jiobá nga bisihuinni racalaʼdxiʼ guseeguʼ brecha ni nuxheleʼ binni de laa (1 Juan 4:10, 19). Ximodo bíʼnibe ni yaʼ. Pablu na: «Pur ni biʼni Cristu, biyubi [Dios] chuʼ né [...] binni tobi si, ne ma qué zaguu be cuenta ni huachee né ca laabe. Nga na stiidxa be ni bisaana né be laadu güi né du binni» (2 Cor. 5:19; Isa. 55:6).

9. Ximodo bisihuinni Pablu rudii xquíxepeʼ Dios pur bilaselaʼdxiʼ laa.

⁹ Jiobá biseendaʼ Jesús para gati pur laanu, pur nga maʼ zanda guiaxa ca pecadu stiʼ binni ne chuʼcaʼ gaxha de Dios pa gápacaʼ fe lu ni biʼniʼ Dios ca. Ne biseendabe ca xpínnibe lu guidubi naca guidxilayú para gábicaʼ binni gúnicaʼ stipa pur chuʼcaʼ galán ne laabe laga nuuruʼ tiempu (biindaʼ 1 Timoteo 2:3-6). Dxi maʼ biene Pablu xii ngue racalaʼdxiʼ Dios, ne pabiáʼ risaca tiempu nabánibe que la? de guidubi ladxidoʼbe bisiidibe binni xi naquiiñeʼ guni «para chuʼ né [Dios] tobi si» sti biaje. Caʼruʼ guchaa diʼ Dios ni naguixhe ique guni. Ne qué huasaanabe de gacanebe binni guidxilayú. Biáʼsipeʼ ca diidxaʼ ni guníʼ apóstol Pablu: «Dxandí ma bidxiña dxi acané [Dios] binni, ne yanna ri nga na be ulá be laacaʼ». ¡Nabé riá Jiobá binni ne rilaseláʼdxibe laacaʼ! (Éxo. 34:6, 7.)

Cadi gusaana de gusihuínninu guca Dios nachaʼhuiʼ né laanu

10. Xi dxiiñaʼ biʼniʼ ca xpinni Cristu ni bibí de dxiqué ne xi cayuni cani nabani yanna, tiempu culá Dios binni.

¹⁰ Ca xpinni Cristu, «cani ma nuu né laabe tobi si» nga cani primé ribeendú ni galán pur guendanachaʼhuiʼ stiʼ Dios (2 Cor. 5:17, 18). Bizulú bilá Dios laacabe lu Pentecostés stiʼ iza 33. Dede dxiqué gucuaacabe dxiiñaʼ de gusiidicabe binni xi naquiiñeʼ guni para «chuʼ né [Dios] tobi si». Zacá nga laani, ca dxi stinu riʼ nuuruʼ xpinni Cristu ni bibí pur espíritu ndaaniʼ Guidxilayú riʼ ni cayuíʼnecaʼ binni «stiidxa [Dios] para ganda chuʼ né ca laabe tobi si». Laacabe riénecabe nuu tapa ángel ni biʼyaʼ apóstol Juan lu ti visión ni «cucueeza ca bi, ti cadi lica undubi bi lu guidxilayú». Dede yanna caʼruʼ guiluxe diʼ dxi «ulá» Dios binni ne «dxi acané be» laacaʼ (Apo. 7:1-3). Nga runi, dede dxi bizulú siglu XX, lu guidubi naca Guidxilayú ca xpinni Cristu ni bibí pur espíritu cadi cusaanacaʼ de güínecaʼ binni «stiidxa [Dios] para ganda chuʼ né ca laabe tobi si».

11, 12. Dxi bizulú siglu XX, ximodo bisihuinni ca xpinni Cristu ni bibí biénecaʼ xi tiempu ngue nabánicaʼ. (Biiyaʼ ca foto ni zeeda lu yaza 15.)

¹¹ Casi na libru Los testigos de Jehová, proclamadores del Reino de Dios, dxi mayaca guzulú siglu XX, «Russell ne cani runiné dxiiñaʼ biʼniʼ crecaʼ maʼ nabézacaʼ tiempu para guiziidiʼ binni ne tiempu naquiiñeʼ gunadiágacaʼ cani dxandíʼ rusiidiʼ Biblia ti ganda guilacaʼ». Xi guiráʼ bíʼnicabe yaʼ. Cumu bidiicabe cuenta maʼ nabánicabe «dxi acané [Dios] binni», ni zeeda gaca casi tiempu riasa cosecha la? qué ñabisícabe binni chigucaadiaga cani rusiidicabe. Nga nga ni cayuni ca xaíque yuʼduʼ ca dede maʼ raca stale siglu. Peru ca xpinni Cristu ni bibí que bizulú biyúbicaʼ xcaadxi modo para gucheechecaʼ stiidxaʼ Reinu. Lade cani bíʼnicabe nga biquiiñecabe guiráʼ ca cosa nacubi caree para gúnicabe dxiiñaʼ que.

¹² Para ganda gucheechecabe diidxaʼ,  grupuhuiiniʼ de xpinni Cristu ni nabé runi dxiiñaʼ que, biquiiñecaʼ tratadu, folletu, revista ne libru. Laaca bicaacabe libana ne xcaadxi tema ni biree lu mil de periódicu. Laaca gúpacabe hora para gusiidicabe binni de Biblia lu radiu ne bicaadiaga binni laacabe xquídxicabe ne xcaadxi guidxi roʼ, ne dxi caʼruʼ chuʼ ridxi lu cine ni guyuu dxiqué, laacabe gunda bíʼnicabe ti clase película ra nuu tuuxa ni caníʼ laga cadiʼdiʼ película que. Xi guleendúcabe pur guiráʼ stipa bíʼnicabe sin nidxágacabe yaʼ. Yanna riʼ maʼ nuu gadxe millón de binni ni maʼ gucuaa invitación ca ne cayábicaʼ binni «uyubi [...] chuʼ né [...] Dios tobi si». Ne cayaca guiráʼ nga purtiʼ biʼniʼ ca xpinni Cristu ni bibí que dxiiñaʼ né stale gana neca bidxagalucaʼ stale guendanagana.

13. Xi conseju cadi naquiiñeʼ gusiáʼndanu de modo guca Dios nachaʼhuiʼ né laanu.

¹³ Dede yanna cayaca ni na ca diidxaʼ guníʼ Pablu riʼ: «Dxandí ma bidxiña dxi acané [Dios] binni». Guizáʼ rudiʼnu xquíxepeʼ Jiobá, purtiʼ pur gúcabe nachaʼhuiʼ né laanu zanda gucaadiáganu ni cusiidibe para ganda chúʼnenu laabe tobi si sti biaje. Lugar de guyadxísinu xi cayaca, casi runi tuuxa ni guiidxináʼ si la? ricaanu conseju stiʼ Pablu riʼ de guidubi ladxidoʼno: «Canaba du laatu usihuinni tu cadi pur gana si uca be nachaʼhui ne laatu» (2 Cor. 6:1). Yanna, pa cadi pur gana si guca Dios nachaʼhuiʼ né laanu, xiñee bíʼnibe ni yaʼ. Bíʼnibe ni para «chuʼ né be binni tobi si» pur «ni biʼni Cristu» (2 Cor. 5:19).

14. Xi cayaca ndaaniʼ stale guidxi.

¹⁴ Stale binni nuseeguʼ Binidxabaʼ lucaʼ, nuucaʼ zitu de Dios ni bizáʼ laacaʼ ne qué gánnacaʼ xi naguixhe ique Dios guni pur guendanachaʼhuiʼ stiʼ (2 Cor. 4:3, 4; 1 Juan 5:19). Neca zacá la? stale binni ni nuu lu guidubi Guidxilayú riná gucaadiaga Dios ora ruuyaʼ modo nabani binni guidxilayú, ra zeʼ dxi zidale guendaquéiquiiñeʼ ne yuubaʼ, ne ora gánnacaʼ cayaca guirani purtiʼ bidxiideche binni Dios. Ne dede ca guidxi roʼ ni qué riná ganna de stiidxaʼ Reinu, stale binni de ca guidxi ca cucaadiágacaʼ ni ne cayúnicaʼ ni canabaʼ Jiobá laacaʼ para chúʼnecaʼ laabe tobi si. Ñee riénenu yanna nga tiempu naquiiñeʼ gúninu jma stipa para guni invitarnu binni «uyubi [...] chuʼ né [...] Dios tobi si» la?

15. Lugar de gábisinu binni diidxaʼ ni quixhedxí ladxidóʼ, xi racaláʼdxinu guiziidicabe.

¹⁵ Ora maʼ cayúninu dxiiñaʼ stinu, qué rábisinu ca vecinu stinu zacané Dios laacaʼ né guiráʼ ca guendanagana sticaʼ ne ziuucaʼ galán pa chuʼcaʼ gaxha de laabe. Purtiʼ ngapeʼ nga ni ruyubi stale binni ndaaniʼ ca yuʼduʼ stiʼ, ne ca pastor ni nuu ndaaniʼ ca yuʼduʼ ca rábicaʼ ni laacabe (2 Tim. 4:3, 4). Peru cadi nga diʼ nga ni racaláʼdxinu ora maʼ zigucheechenu diidxaʼ. Laanu rusíʼdinu laacabe nadxii Jiobá guiráʼ binni, ne pur ni biʼniʼ Cristu zutiidilaʼdxiʼ Dios ca donda stinu. Zacá nga casi ñaca nuséʼgunu brecha ni nuxheleʼ binni de Dios para chuʼcaʼ gaxha de laabe (Rom. 5:10; 8:32). Peru «dxi acané [Dios] binni» laaca mayaca guiluxe ni.

«Laguni xhiiña Señor ne stale gana»

16. Xi gucané apóstol Pablu gaca nadxibalú ne guni ni na Dios né stale gana.

¹⁶ Xi zanda gúninu para cadi gusaananu de gúninu adorarnu Dios jneza yaʼ. Nuu tu natuí ne qué riniʼpeʼ, pur nga qué randa riniʼcaʼ ni racaláʼdxicaʼ ne raca nagana para laacaʼ gápacaʼ xhamígucaʼ. Peru naquiiñeʼ guietenaláʼdxinu ndiʼ: cadi purtiʼ si gusihuínninu nuunu nayecheʼ nga guininu cayúninu ni na Dios né stale  gana, laaca qué zanda diʼ gúninu ni purtiʼ si nápanu caadxi guenda sicarú. Pablu guníʼ xii nga ni racané ti xpinni Cristu para guni ni na Dios né stale gana: «Laguni xhiiña Señor ne stale gana» (Rom. 12:11). Pablu biʼniʼ xhiiñaʼ Señor né stale gana purtiʼ gucané espíritu santu laa gucheeche diidxaʼ sin guidxibi. Lu treinta iza ni gudiʼdiʼ dede dxi guniʼné Jesús laabe hasta dxi biseguyoocabe laabe ne biiticabe laabe Roma, qué ñuu dxi nusaanabe de ñúnibe ni na Dios ne stale gana. Qué nusaanabe de ninábabe gacané Dios laabe, ne laa biquiiñeʼ espíritu stiʼ para bidii laabe stipa ni caquiiñebe. Nga runi guniʼbe: «Intiisi zanda gune purti nuu né [Dios] naa ne racané naa» (Fili. 4:13). ¡Stale nga ni zanda guizíʼdinu de ejemplu stibe!

17. Xi racané ca xpinni Cristu para ganda gúnicaʼ xhiiñaʼ Dios ne stale gana.

¹⁷ Lu Romanos 12:11 ca biquiiñeʼ Pablu ti diidxaʼ griegu ni riníʼ «candaabiʼ». Guzéʼtenu ti ejemplu. Xi caquiiñeʼ gúninu para gusindáʼbinu nisa ni daʼ ndaaniʼ ti guisu yaʼ. Caquiiñeʼ uguʼnu gui xaʼnaʼ ni. Zacaca nga naquiiñeʼ guni ca xpinni Cristu. Para ganda gúnicabe xhiiñaʼ Dios né stale gana la? caquiiñecabe espíritu santu gatigá. Peru ximodo zanda guicaanu ni yaʼ. Iquiiñeʼ chaahuinu guiráʼ ni rudii Jiobá laanu para iguidxi fe stinu. Cadi naquiiñeʼ gusaana de guni adorarnu Dios, naquiiñeʼ gúninu ni ora nuunu ralídxinu, ne ora maʼ nuunu lade ca binni ridagulisaa. Ne rúninu nga ora qué rusaana de guidúʼndanu Biblia stúbinu ne guidúʼndanenu binnilídxinu, guni orarnu ne chuunu ca guendaridagulisaa ca. Pa gúninu zacá la? zeeda gácacani casi ti gui ni qué zudii lugar gusaana de gúninu ni na Dios né stale gana (biindaʼ Hechos 4:20 ne 18:25).

18. Xi dxiiñaʼ naquiiñeʼ guni ca xpinni Cristu.

¹⁸ Laanu, ca xpinni Cristu ruzúʼbanu stiidxaʼ Dios de guidubi ladxidoʼno, purtiʼ racaláʼdxinu gúninu xiixa, ne qué rudiʼnu lugar chuʼ ni gucueeza laanu o cuee gana laanu. Xii nga racaláʼdxinu gúninu yaʼ. Gúninu ni na Jiobá cásica biʼniʼ Jesús ni (Heb. 10:7). Jiobá racalaʼdxiʼ pa ñanda si guiráʼ binni ñuuné laabe tobi si sti biaje. Nga runi, chinándanu ejemplu stiʼ Jesús ne Pablu ne cadi gusaananu de gúninu dxiiñaʼ jma risaca ne ni jma caquiiñeʼ gaca ca dxi stinu riʼ.

Rietenalaʼdxuʼ la?

• Xi dxiiñaʼ gucuaa Pablu ne xcaadxi xpinni Cristu ni bibí.

• Ximodo nánnanu jneza modo caquiiñeʼ ca xpinni Cristu ni bibí ni nabani yanna riʼ tiempu cayacané Dios binni.

• Xi zacané ca xpinni Cristu gúnicaʼ ni na Dios né stale gana.

[Guendarinabadiidxaʼ stiʼ párrafo]

[Dibuju/foto ni zeeda lu yaza 12]

Qué ñuu dxi nusiaandaʼ Pablu dxi biree Señor Jesucristu lú