!Yumi Singsing Blong Presem Jehova!

‘Oltaem long laef blong mi, . . . bambae mi stap sing blong presem God blong mi.’—SAM 146:2.

1. ?Wanem i pulum yangfala Deved blong wokem sam singsing we oli stap long buk blong Ol Sam?

TAEM Deved i yangfala, hem i spenem plante taem blong lukaot long ol sipsip blong papa blong hem, klosap long Betlehem. Long taem ya, Deved i save lukluk ol wok we Jehova i mekem we oli nambawan olgeta, olsem: ol sta long skae, “ol wael anamol,” mo “ol pijin.” Ol samting we Deved i luk oli gat bigfala paoa long hem. Oli pulum hem blong wokem ol singsing we oli tajem hat, blong presem God ya we i mekem ol nambawan samting ya. Plante long ol singsing we Deved i wokem oli stap long buk blong Ol Sam. *—Ridim Ol Sam 8:3, 4, 7-9.

2. (a) ?Miusik i save gat paoa olsem wanem long man? Yu traem givim wan eksampol. (b) ?Yumi save lanem wanem long saed blong fasin fren we Deved i gat wetem Jehova, taem yumi ridim Ol Sam 34:7, 8 mo Ol Sam 139:2-8?

² Ating long taem ya nao, Deved i lanem blong plei miusik. Hem i plei gud, taswe King Sol i askem long hem blong i kam plei gita long hem. (Prov. 22:29) Miusik blong Deved i mekem tingting blong king ya we i trabol i kam kwaet, olsem we wan gudfala miusik i save mekem tede. Taem Deved i plei gita, “king i harem gud bakegen.” (1 Saml. 16:23) Yes, Deved i man blong plei miusik mo blong raetem ol singsing. Mo from we hem i ona gud long God, ol singsing we hem i wokem oli givhan long plante man kam kasem tede. !Yu traem tingbaot samting ya! Tede, bitim 3,000 yia afta we Deved i bon, plante milian man oli harem gud yet blong ridim ol Sam we hem i wokem. Tingting blong olgeta i kam strong taem oli ridim olgeta, nomata we oli gat wanem problem mo oli stap long wanem ples long wol.—2 Kron. 7:6; ridim Ol Sam 34:7, 8; 139:2-8; Amos 6:5.

Miusik i Joen Wetem Tru Wosip

3, 4. ?Wanem plan we Deved i mekem long saed blong miusik blong presem God?

³ Deved i gat gudhan blong plei miusik mo hem i yusum fasin ya long beswan rod, hemia blong leftemap nem blong Jehova. Afta we Deved i kam king blong Isrel, hem i mekem plan se bambae i gat ol man blong singsing mo plei miusik long haos tapolen blong Hae God. I gat 4,000 Livaet we wok blong olgeta i blong “presem Hae God.” Hemia i bitim wan long evri ten Livaet we oli wok long haos blong God. Mo 288 blong olgeta ‘oli tren gud, oli savegud ol fasin blong singsing.’—1 Kron. 23:3, 5; 25:7.

⁴ Deved nomo i wokem plante singsing we ol Livaet oli stap plei mo singsing long olgeta. Sipos wan man Isrel i stap taem ol Livaet oli stap singsing long ol Sam blong Deved, bambae ol singsing ya oli mas tajem hat blong hem. Biaen, taem oli karem Bokis ya we i Saen blong Promes blong Hae God i kam long Jerusalem, Deved “i talem long ol lida blong ol Livaet blong oli jusumaot sam man blong olgeta blong oli singsing mo oli plei long gita mo bras simbol blong mekem ol singsing blong glad.”—1 Kron. 15:16.

5, 6. (a) ?Long taem we Deved i stap rul, from wanem ol man oli laekem tumas miusik? (b) ?From wanem yumi save se miusik i wan impoten samting long wosip blong ol man Isrel bifo?

⁵ ?From wanem ol man Isrel long taem blong Deved oli laekem tumas blong plei miusik mo singsing? ?Oli laekem from we king i wan man blong plei miusik? Nogat. I gat wan narafala risen. Risen ya i kam klia plante handred yia biaen, taem king Hesekia i mekem we ol Livaet oli gohed bakegen long wok blong olgeta long haos blong God. Long  2 Kronikel 29:25, yumi ridim se: “Nao king [hemia Hesekia] i mekem olsem we Hae God i bin soemaot long King Deved bifo, long tok ya we Profet Gad, mo Profet Natan, tufala i bin talemaot long hem. Hem i talem long ol Livaet we oli man blong mekem kwaea, blong oli tekem ol gita mo simbol mo ol narafala instramen blong olgeta olsem we King Deved i mekem bifo, oli kam stanap long yad blong haos ya.”

⁶ Yes, Jehova i talem long ol profet blong hem blong oli talem long ol man we oli wosipim hem, se oli mas singsing blong presem hem. Ol man blong singsing long laen blong ol pris oli no save mekem ol narafala wok, from we oli mas wokem ol singsing mo ating lanem olgeta tu.—1 Kron. 9:33.

7, 8. Taem yumi singsing, ?wanem i impoten moa i winim we yumi savegud fasin blong singsing?

⁷ Maet yu talem se, “!Mi mi no save sing gud nating! !Sipos mi bin stap long taem bifo, neva bambae oli putum mi wetem olgeta we oli save singsing gud long haos tapolen!” Be i no evri Livaet we oli save singsing gud. Folem 1 Kronikel 25:8, i gat samfala we oli “stap lan yet.” I gud blong makem tu, se maet i gat sam man long ol narafala laen blong Isrel we oli save plei gud mo singsing gud, be Jehova i talem se i wok blong ol Livaet nao blong lukaot long miusik. Yumi save se nomata we sam Livaet oli “tren gud” mo sam oli stap “lan yet,” be evriwan we tingting blong olgeta i stap strong long God oli mekem bes blong olgeta long wok ya.

⁸ Deved i laekem miusik, mo i gat gudhan blong plei. ?Be olsem wanem? ?Sipos man i gat gudhan long wan wok, hemia nao samting we God i luk? Nogat. Long Sam 33:3 (NW), Deved i raetem se: “I gud yufala i wokem wan niufala sing, yufala i singsing long Jehova. Yufala i mekem bes blong yufala blong plei gud long gita, mo yufala i glad, yufala i singsingaot bigwan.” Tingting we i stap long vas ya i klia: Samting we i impoten, hemia blong ‘mekem bes blong yumi’ blong presem Jehova.

Miusik Afta Long Taem Blong Deved

9. Yu traem talem samting we maet yu luk mo harem sipos yu bin stap wetem ol man Isrel, blong openem haos blong God long taem we Solomon i stap rul.

⁹ Long taem we Solomon i stap rul, miusik i wan bigfala haf blong tru wosip. Taem ol man Isrel oli openem haos blong God, i gat wan bigfala hip blong man we oli plei miusik mo singsing, wetem 120 man we oli stap blu long trampet. (Ridim 2 Kronikel 5:12.  *) Baebol i talem se: “Nao ol man ya blong singsing oli stap sing, mo ol pris ya oli stap blu long trampet, . . . we i mekem singsing blong olgeta i gud we i gud tumas. Olgeta oli stap sing blong presem Hae God, . . . ‘from we hem i gud tumas. Oltaem bambae hem i lavem yumi, gogo i no save finis.’” Taem oli singsing finis, “wantaem nomo, klaod we i saen we i saen i kam fulap long haos ya,” hemia i soemaot we Jehova i glad long wosip ya we oli mekem long hem. !Tru ya, sipos yumi bin stap long taem ya blong harem voes blong plante taosen man we oli stap singsing wetem ol trampet, bambae yumi sapraes bigwan!—2 Kron. 5:13.

10, 11. ?Wanem i soemaot se ol Kristin long taem bifo oli joenem miusik wetem wosip blong olgeta?

¹⁰ Ol faswan Kristin tu oli joenem miusik wetem wosip blong olgeta. I tru we ol Kristin long taem bifo oli no mekem wosip long haos tapolen no long haos blong God, be oli mekem long haos blong ol man. From we plante man oli agensem olgeta mo from sam narafala trabol bakegen, i no isi blong ol Kristin oli joen long wan gudfala ples blong mekem wosip. Be nating, oli singsing yet blong presem God.

¹¹ Aposol Pol i leftemap tingting blong ol Kristin brata blong hem long Kolosi, se: “Oltaem yufala i mas . . . stap sing long God long Ol Sam mo ol him, mo ol sing blong presem God.” (Kol. 3:16) Afta we oli sakem Pol mo Saelas long kalabus, “tufala i stap prea, mo tufala i stap singsing long ol sing blong presem God.” Tufala i mekem olsem nating se tufala i no gat wan singbuk. (Wok 16:25) ?Sipos oli sakem yu long kalabus, yu ting se yu yu save rimemba hamas singsing long singbuk blong yumi?

12. ?Yumi save soemaot olsem wanem se yumi tinghae long ol singsing long singbuk blong yumi?

¹² Naoia we yumi luk se miusik i wan impoten samting long wosip blong yumi, i gud yumi wanwan i askem se: ‘?Mi mi stap tinghae long miusik? ?Mi mi traehad oltaem blong kam eli long ol miting mo ol asembli blong joen wetem ol brata mo  sista long fas singsing, mo mi mi singsing wetem fulhat blong mi? ?Olsem wanem long singsing we i kam afta long Tiokratik Skul mo bifo long Miting Blong Kingdom Wok, mo hemia afta long pablik tok mo bifo long Wajtaoa Stadi? ?Ol pikinini blong mi oli tingbaot taem ya olsem wan janis blong aot long jea blong olgeta, maet blong wokbaot smol blong stretem leg blong olgeta? ?Mi mi tijim olgeta blong oli no tingting olsem?’ Fasin blong singsing i wan haf blong wosip blong yumi. Yes, nomata we yumi “tren gud” no yumi “stap lan yet,” yumi evriwan yumi save singsing blong presem Jehova, mo yumi mas mekem olsem.—Skelem wetem 2 Korin 8:12.

Laef i Jenis, Mo Ol Samting We Yumi Nidim i Jenis

13, 14. ?From wanem i gud blong singsing wetem fulhat blong yumi long ol miting blong kongregesen? Yu save talem wan eksampol.

¹³ Bitim 100 yia bifo, magasin ya Zion’s Watch Tower i eksplenem from wanem ol sing long singbuk blong yumi oli impoten tumas. Hem i talem se: “Taem ol man blong God oli singsing long saed blong trutok, hemia i wan gudfala rod blong mekem trutok i go insaed long maen mo hat blong olgeta.” Plante long ol tok blong ol sing blong yumi oli stanap long ol vas blong Baebol. Ale, taem yumi lanem ol tok blong olgeta, hemia i wan nambawan rod blong mekem trutok i stap gud long hat blong yumi. Plante man we oli kam long ol miting blong fastaem, oli harem se ol singsing we evriwan long kongregesen oli singim wetem fulhat blong olgeta, oli tajem hat blong olgeta bigwan.

¹⁴ Long wan naet long yia 1869, C.T. Russell i stap kambak long haos blong hem afta we hem i finis long wok, nao hem i harem ol man oli stap singsing long wan rum we i stap aninit long wan haos. Long taem ya, hem i ting se neva bambae hem i save faenem trutok long saed blong God. From samting ya, hem i tekem desisen blong spenem taem blong hem long ol bisnes blong hem. Hem i ting se sipos hem i mekem plante mane, bambae hem i save halpem ol man we oli sot long sam samting, nating sipos hem i no save rod blong halpem olgeta blong save trutok long saed blong God. Brata Russell i go long rum ya we i no naes nating mo i gat plante smok blong rod olbaot long hem, nao hem i luk se wan jos seves i stap gohed long ples ya. Hem i sidaon mo i lesin. Biaen, hem i raetem se, sipos God i givhan long hem, wanem we hem i harem long naet ya ‘hem i naf blong mekem bilif blong hem we i slak, i kam strong bakegen se Baebol i kamaot long God.’ Yumi makem se singsing nao i pulum Brata Russell blong kam long miting ya.

15. ?Wanem sam niufala save we i mekem se yumi nidim wan niufala singbuk?

¹⁵ Taem ol yia oli stap pas, save we yumi gat long sam vas blong Baebol i kam moa klia. Ol Proveb 4:18 i talem se: “Rod we ol stret man oli stap wokbaot long hem, fasin blong hem i olsem eli moning, we i stat brok delaet, we oltaem, ol samting oli stap kam klia moa, gogo i delaet gud, mo san i kam antap.” Ale, laet ya i mekem se sam toktok we i stap long ol singsing blong yumi oli mas jenis tu. Samwe long 25 yia i pas nao we ol Witnes blong Jehova long plante ples long wol oli yusum singbuk ya we nem blong hem Mekem Singsing long Jeova. * Long yia we buk ya i kamaot kam kasem tede, laet blong trutok i stap kam moa klia long plante  samting, mo sam tok we i stap long singbuk ya i no moa stret. Yu traem tingbaot. Yumi no moa talem se “ol frut blong tabu spirit,” be yumi talem se “frut blong tabu spirit.” Mo yumi no moa talem se Jisas i stap seraotem ol sipsip long ol nani naoia, be hem i wan samting we bambae i hapen long fiuja nomo. From ol jenis olsem long saed blong ol tijing, i klia we yumi nidim wan niufala singbuk blong yumi.

16. ?Niufala singbuk bambae i givhan long yumi olsem wanem, blong yumi save folem advaes blong Pol long Efesas 5:19?

¹⁶ From risen ya mo sam narafala risen bakegen, Hed Kampani i agri blong mekem wan niufala singbuk we nem blong hem Yumi Singsing Long Jeova. I gat 135 singsing nomo long niufala buk ya. Naoia we yumi no moa gat plante tumas singsing blong lanem, bambae i isi moa blong lanem baehat ol toktok blong sam long ol sing ya. Hemia i laenap wetem advaes we Pol i talem long Efesas 5:19.—Ridim.

Yu Save Soemaot Se Yu Laekem Tumas Ol Singsing Ya

17. ?Wanem ol tingting we oli save halpem yumi blong yumi no fraet mo sem, taem yumi singsing long kongregesen?

¹⁷ ?Olsem wanem? ?Yumi mas letem fraet mo sem i blokem yumi blong yumi no singsing long ol Kristin miting blong yumi? Nogat. Yu traem tingbaot: Long saed blong fasin blong toktok, ?i tru se plante taem yumi “mekem mastik” no? (Jem. 3:2) Be yumi no lego wok blong prij long ol haos wanwan, from we yumi mestem samtaem long toktok blong yumi. Yumi gohed nomo blong presem Jehova. Long sem fasin, yumi no mas lego fasin ya blong singsing blong presem God from we maet yumi no singsing gud, be yumi gohed nomo. Jehova i “mekem maot blong man,” mo hem i glad tumas blong lesin, taem yumi yusum voes blong yumi blong singsing blong presem Hem.—Eks. 4:11.

18. ?Wanem i givhan long plante brata mo sista blong oli lanem ol niufala singsing?

¹⁸ CD ya we nem blong hem Sing to Jehovah—Piano Accompaniment, i givhan long plante brata mo sista blong oli lanem ol niufala singsing. Yumi harem gud tumas taem yumi lesin long ol miusik long CD ya. Sipos yu lesin long hem oltaem long haos mo yu folem long singbuk blong yu, bambae yu save lanem ol toktok blong ol singsing ya. Mo bambae yu no fraet blong singsing strong long Haos Kingdom.

19. ?Wanem ol defren wok we ol brata oli mas mekem blong rerem ol miusik blong ol asembli blong yumi?

¹⁹ I isi nomo blong yumi no tinghae long miusik we i stap kamaot long ol spesel dei asembli, ol seket asembli, mo ol distrik asembli. Ol brata oli wok had blong mekemrere ol miusik ya. Afta we oli jusum ol miusik, oli mas raetem gud long pepa, olsem nao, ol 64 man blong Watchtower we oli plei miusik, oli save plei folem pepa ya. Ol man we oli plei miusik oli spenem plante aoa blong lukluk bakegen long  ol pepa blong ol singsing ya mo lanem olgeta, mo afta, blong rikodem long ol ples blong miusik blong yumi long Patterson, long Niu Yok. Ten long ol brata mo sista ya oli stap afsaed long Yunaeted Stet. Olgeta evriwan ya oli harem se i wan blesing blong joen long wok ya, blong mekemrere ol nambawan miusik blong ol asembli mo ol narafala bigfala miting blong yumi. Yumi save soemaot se yumi tinghae long bigfala wok ya we oli mekem wetem lav. Taem jeaman blong asembli i askem long yumi blong sidaon mo lesin, i gud yumi mekem olsem. Yumi stap kwaet mo lesin gud long ol miusik we ol brata mo ol sista ya oli hadwok blong mekemrere.

20. ?Yu yu gat strong tingting blong mekem wanem naoia?

²⁰ Jehova i stap lesin gud taem yumi singsing blong presem hem. Hem i glad we i glad blong harem singsing blong yumi. Taem yumi kam wanples blong mekem wosip, i gud yumi singsing wetem fulhat blong yumi blong mekem Jehova i harem gud. !Yes, nating se yumi tren gud no yumi stap lan yet, i gud yumi “singsing blong presem Hae God!”—Sam 104:33.

[Ol futnot]

?Wanem Tingting Blong Yu?

• ?Wanem ol eksampol long taem blong Baebol, we oli soemaot se miusik i wan bigfala haf blong wosip blong yumi?

• ?Yu yu luk se, taem yumi singim ol sing long singbuk blong yumi wetem fulhat blong yumi, yumi stap obei long tok blong Jisas long Matiu 22:37?

• ?Wanem sam rod blong soemaot se yumi tinghae long ol sing long singbuk blong yumi?

[Kwestin]

[Tok blong pija long pej 29]

?Olsem wanem sipos ol pikinini oli wantem aot long jea blong olgeta long taem blong singsing, be i no gat nid blong oli mekem olsem? ?Yu yu blokem olgeta?

[Tok blong pija long pej 30]

?Taem yu stap long haos, yu yu stap lanem ol toktok blong ol niufala singsing?