Japurahéikena Jehovápe!
Japurahéikena Jehovápe!
‘Che rekove pukukue aja apurahéita Ñandejárape.’ (SAL. 146:2)
1. Mbaʼépa omomyivaʼekue Davídpe ohai hag̃ua umi purahéi Jehovápe?
IMITÃME David ohasavaʼekue hetaiterei óra oñangarekóvo itúva ovechakuérare Belén ypýpe. Umícha jave haʼe omaña ha ojepyʼamongetamivaʼekue umi mbyja oĩva arapýre, umi ‘mymba oikóva ñúre’, ‘guyrakuéra ovevéva yvágare’ ha ambue mbaʼe Ñandejára ojapovaʼekuére. Haʼe ohecharamoiterei Jehová rembiapokue ha upévare oñepyrũ ohai umi purahéi igustopa jepéva, omombaʼeguasu hag̃ua Chupe. Sálmospe jatopa hetaiterei purahéi haʼe ojapovaʼekue (elee Salmo 8:3, 4, 7-9). *
2. a) Mbaʼéichapa Saúl oñeñanduvaʼekue ohendúvo David músika? b) Heʼiháicha Salmo 34:7, 8 ha Salmo 139:2-8 mbaʼéichapa oĩvaʼekue David Jehová renondépe?
2 Upe tiémpope oiméne David oñembokatupyryve opurahéi ha ombopu porãve hag̃ua árpa. Upévare ojeguerahavaʼekue chupe opurahéi hag̃ua Saúlpe (Pro. 22:29). Upe rréi ningo ojepyʼapyháre oiko ha umi músika ombopúva David ombopyʼaguapy chupe, ojapoháicha jepi avei ñanderehe umi músika pu rory. Ohendu jave umi purahéi ha árpa pu “Saúl [...] opytuʼu ha oñeñandu porãve” (1 Sam. 16:23, ÑÑB). Umi músika porãite David ohai ha opuraheivaʼekue omombaʼeguasu hag̃ua Ñandejárape koʼag̃aite peve ojeguerohory. Ohasáramo jepe tres mil áño rasa David onase hague, opaichagua tapicha ha oparupigua pyʼỹinte olee umi sálmo ikatu hag̃uáicha ipyʼaguapy ha iñesperánsa (2 Cró. 7:6; elee Salmo 34:7, 8 ha 139:2-8; Amós 6:5).
Ojepurahéi oñemombaʼeguasu hag̃ua Ñandejárape
3, 4. Mbaʼe mbaʼépa ojapovaʼekue David oñemombaʼeguasu hag̃ua Ñandejárape purahéi rupive?
3 David akóinte opuraheivaʼekue omombaʼeguasu hag̃ua Jehovápe. Upéicha rupi ojupírõ guare Israel mburuvicháramo heʼi ojepuraheivaʼerãha Jehová rógape. Upearã oiporavo umi 38.000 levíta apytégui 4.000-pe “ogueropurahéi hag̃ua Ñandejárape”. Ha umívagui oĩ jey 288 ‘oñehekomboʼevaʼekue ha ikatupyrýva purahéipe’ (1 Cró. 23:3, 5; 25:7).
4 Umi levíta opuraheivaʼekue heta músika David ohaipyre. Oiméne ovyʼaitéraʼe umi isrraelíta ohendúva chupekuéra opurahéi jave! Ikatu avei ñanemanduʼa mbaʼépa ojapovaʼekue David pe árka del pákto ojeguerahátarõ guare Jerusalénpe. Upérõ ‘haʼe heʼi umi levíta ruvichakuérape oiporavo hag̃ua iñermanokuéra apytégui umi opurahéiva ha oiporúvape imbaʼepu, mbaraka, árpa ha platíllo, ha opurahéi kyreʼỹ hag̃ua’ (1 Cró. 15:16).
5, 6. a) Mbaʼérepa oñemombaʼete umi purahéi David oisãmbyhyha tiémpope? b) Mbaʼérepa jaʼekuaa iñimportánte hague pe purahéi oñemombaʼeguasu hag̃ua Ñandejárape?
5 Péro mbaʼére piko umi isrraelíta omombaʼete umi músika? Noiméipa Davídpe ogustaiterei rupínte? Nahániri, oĩ peteĩ mbaʼe iñimportantevéva. Upéva jahechakuaa upe oikovaʼekuére Ezequías tiémpope; upérõ oñepyrũ jey vaʼekue oñemombaʼeguasu Ñandejárape itémplope. Ezequías ‘omohenda levitakuérape Jehová róga guasúpe, platíllo, mbaraka ha árpa reheve, heʼi haguéicha David, Gad ha proféta Natán. Koʼã mbaʼe Jehová voi ojerure iprofetakuéra juru rupi’ (2 Crónicas 29:25, ÑÑB).
6 Jahechaháicha Jehová oiporu umi profétape heʼi hag̃ua hembiguaikuérape oñemombaʼeguasuvaʼerãha chupe purahéi rupive. Ha ikatu hag̃uáicha koʼã levíta itiempove ohai ha oñensaja porã hag̃ua umi músika, ndojapoivaʼerã ambue tembiapo ojapóva umi ótro levíta. Upéicha umi isrraelíta ohechauka mbaʼeichaitépa iñimportánte chupekuéra g̃uarã umi purahéi omombaʼeguasúva Ñandejárape (1 Cró. 9:33).
7, 8. Mbaʼéichapa japuraheivaʼerã umi kántiko?
7 Péro ikatu oĩ opensáva: “Umi levíta ningo imboʼepyre, che katu apurahéi vaieterei. Ni guaʼuhápe ndachejaichéne umi levíta ikatupyryvéva apytépe”. Upéicha ñapensáramo tuicha ñanepytyvõta heʼíva 1 Crónicas 25:8, upépe heʼi umi levíta apytépe oĩ hague heta temimboʼe oñepyrũ ramóva opurahéi. Péro, ndaiporiete mbaʼe piko ambue trívupe opurahéi porãva? Katuete oĩneraʼe, upéicharamo jepe Jehová oiporavo umi levítape ojapo hag̃ua ko tembiapo ha haʼekuéra opurahéi ipyʼaite guive, tahaʼe jepe raʼe ikatupyrýva térã oñepyrũ ramóva.
8 David opuraheikuaavaʼekue ha ovyʼa voi ojapóvo upéva. Upéicharamo jepe ani ñapensa Jehová oguerohoryha umi opuraheikuaávapente. Salmo 33:3-pe David heʼivaʼekue: “Pembopu hatãkena ha vyʼapópe [pepurahéi]”. Upéicharõ, jahechakuaa iñimportanteveha ñañehaʼãmbaite japurahéi Jehovápe ñande pyʼaite guive.
Mbaʼéichapa ojeporuvaʼekue umi purahéi David omano rire
9. Mbaʼépa jahecha ha ñahenduvaʼerãmoʼã jaikórire Salomón tiémpope?
9 Salomón oisãmbyhyha tiémpope ojepuraheivaʼekue avei Jehovápe oñemombaʼeguasu hag̃ua Chupe. Pór ehémplo ojejapopa rire pe témplo ombopu peteĩ orkésta ndetuichapa jepéva, oĩháme 120 ombopúva trompéta (elee 2 Crónicas 5:12). La Biblia omombeʼu umi saserdóte opurahéiva ha ombopúva trompéta, ‘omombaʼeguasu hague oñondivepa Ñandejárape’. Ha opurahéivo heʼi: “Haʼe ipyʼaporã, ha iporiahuvereko oĩ opaite árape”. Ha upe rire Ñandejára “róga henyhẽ peteĩ araígui”, upéva ohechauka Jehová oguerohoryha upe ojejapóva. Oiméne omopirĩmbáraʼe umi isrraelítape ohendúvo mbaʼeichaitépa ipu joja asy umi trompéta ha umi purahéi! (2 Cró. 5:13, ÑÑB.)
10, 11. Mbaʼérepa jaekuaa umi kristiáno ypykue omombaʼeguasu hague Ñandejárape purahéi rupive?
10 Umi kristiáno ypykue opuraheivaʼekue avei omombaʼeguasu hag̃ua Ñandejárape. Péro noñembyatýi témplope, síno hogakuérarupi. Ha sapyʼánte ojepersegi chupekuéra, upéicharamo jepe akóinte omombaʼeguasu hikuái Jehovápe purahéi rupive.
11 Avei apóstol Pablo omokyreʼỹ umi kristiáno Colosayguápe: ‘Peñohekomboʼe ha peñomokyreʼỹ salmokuéra, purahéi ha ñemboʼe rupi, ha peagradese Ñandejárape pende pyʼaite guive’ (Col. 3:16, ÑÑB). Ha oñemoingérõ guare Pablo ha Sílaspe kárselpe “oñemboʼe ha opurahéi” Ñandejárape, ha hiʼarive upérõ ndojeguerekói peteĩ purahéi ryru (Hech. 16:25). Jahechávo ko ehémplo tekotevẽ ñañeporandumi: “Ajegueraha sapyʼárõ kárselpe, mboy kántikopa ikatúne apurahéi de memória?”.
12. Mbaʼéichapa ikatu jahechauka ñamombaʼeha umi kántiko?
12 Opa koʼã mbaʼére jahechakuaa iñimportantetereiha japurahéi Jehovápe. Upévare iporã ñañeporandumi: “Amombaʼépa umi kántiko? Añehaʼãmbaitépa ag̃uahẽ voi rreunionhápe ha umi aty guasúpe ikatu hag̃uáicha apurahéi? Apurahéipa che pyʼaite guive? Oiméramo che família, mbaʼéichapa ohecha hikuái pe kántiko ojepurahéiva oñemohuʼã hag̃ua Eskuéla Jaiporukuaa Hag̃ua la Biblia ha omoñepyrũva Aty Ñanemboʼéva Japredika Hag̃ua? Ha mbaʼéichapa ohecha pe kántiko ojepurahéiva opa rire diskúrso púvliko ha oñepyrũvo Ñemañaha Ñehesaʼỹijo? Amboʼépa chupekuéra umi kántiko noñemoĩriha ñapuʼã hag̃ua ñane asiéntogui jajapo oimeraẽ mbaʼe térã jajetepyso hag̃ua?”. Aníkena ñanderesarái japurahéi jave ñamombaʼeguasuhañaína Jehovápe. Ha upéva enterovéva ñañehaʼãvaʼerã jajapo, oiméramo jepe japuraheikuaa térã nahániri (embojoja 2 Corintios 8:12 rehe).
Heta mbaʼe oñekambia ohóvo
13, 14. Mbaʼérepa iñimportánte japurahéi kyreʼỹ rreunionhápe? Emombeʼu peteĩ ehémplo.
13 Ojapóma 100 áño rasa rrevísta Ñemañaha (upérõ hérava ingléspe Zionʼs Watch Tower) heʼi hague mbaʼérepa iñimportanteterei umi kántiko: “Japurahéirõ umi mbaʼe ñaaprendéva la Bíbliagui opytave ñane akãme ha opoko ñane korasõre”. Umi purahéipe jatopa hetaiterei mbaʼe oñeguenohẽva la Bíbliagui, upévare ñañehaʼãmbaitevaʼerã ñaaprende ha jaikuaa de memória ikatúva guive. Avei iñimportánte japurahéi kyreʼỹ, upéva ningo ohecharamoiterei jepi umi oñepyrũva oho Salónpe.
14 Ñapensamína mbaʼépa oikovaʼekue peteĩ pyharépe áño 1869-pe. Charles Russell oukuévo itraváhogui ohendu ojepuraheijoaha peteĩ sótanope. Upémarõ oguejy ha ohechakuaa peteĩ rrelihión ojapoha upépe irreunión. Upe koty ivai ha ijyvytimbopáramo jepe haʼe oguapy ojapysaka hesekuéra. Charles Russell hetáma oñehaʼãvaʼekue oikuaa Ñandejárape, péro nahesakãporãi chupe umi mbaʼe oĩva la Bíbliape, upévare odesidi oñemeʼẽmbaite itraváhopente. Haʼe oimoʼã ndaikatumoʼãveimaha oipytyvõ hapichakuérape oñemoag̃ui hag̃ua Ñandejárare, péro opensa iplátaramo ikatuha omeʼẽ chupekuéra oikotevẽva. Heta áño ohasa rire haʼe heʼi: “Upe pyharépe ahenduvaʼekue ha Ñandejára chepytyvõ rupi, ajerovia jey la Biblia ouha chugui”. Jahechakuaa upéicharõ umi purahéi omomýi hague chupe oñembyaty hag̃ua Ñandejára siervokuérandi.
15. Mbaʼérepa tekotevẽ raʼe oñembopyahu ñande purahéi ryru?
15 Heta mbaʼe oñemyesakãve ohóvo la Bíbliagui. Heʼi voi ningo Proverbios 4:18: “Ipotĩva rape koʼẽtĩcha hesakã ha hesakãve ohóvo omimbipa peve”. Upévare ñane tiémpope tekotevẽ oñekambia avei umi mbaʼe japurahéiva. Ojapóma veinticinco áño ojejapo hague pe purahéi ryru jaiporúva ramoite peve, hérava Canten alabanzas a Jehová. * Péro upe guive koʼág̃a peve hetaiterei mbaʼéma hesakãve ñandéve ha upévare oĩ ñeʼẽ koʼág̃a ndojeporuvéimava. Pór ehémplo yma ojeʼémi “nuevo orden”, koʼág̃a jaʼe “nuevo mundo”. Avei ndojeʼevéima Jehová rérare “vindicado”, síno “santificado”. Upéicha rupi tekotevẽ kuri oñembopyahu ñande purahéi ryru.
16. Mbaʼéichapa ñanepytyvõta pe purahéi ryru pyahu jajapo hag̃ua Efesios 5:19 heʼíva?
16 Cuerpo Gobernante ohesaʼỹijo rire koʼãva ha ambue mbaʼe, heʼi ojejapo hag̃ua peteĩ purahéi ryru pyahu hérava Cantemos a Jehová. Péro koʼág̃a 135 purahéinte oreko, upévare pyaʼeve ikatúta ñaaprende umi kántiko. Péicha jajapóta apóstol Pablo heʼivaʼekue Efesios 5:19-pe (elee).
Jahechaukákena ñamombaʼeha umi purahéi
17. Mbaʼépa ñanepytyvõta ponove jakyhyje japurahéi hag̃ua rreunionhápe?
17 Ojepurahéi jave umi kántiko heta oĩ okirirĩnteva okyhyjégui ojavýrõ g̃uarã, péro oĩ porã piko oñepensa upéicha? Nahániri, la Biblia heʼi porã voi ‘opavave jajavyha heta mbaʼépe’ (Sant. 3:2, ÑÑB). Ñañeʼẽ jave ningo jajavýnte avei, upéicharamo jepe akóinte ñamombaʼeguasu Jehovápe jahávo ñamomarandu héra ogahárupi. Ha mbaʼére piko upéicharõ japurahéi vai rupínte nañamombaʼeguasumoʼãi Chupe? Ñanemanduʼavaʼerã Haʼe voi ‘omeʼẽ hague ijururã yvypórape’ ha oipotaha japurahéi chupe (Éxo. 4:11).
18. Mbaʼépa jajapovaʼerã opyta hag̃ua ñane akãme umi kántiko?
18 Heta idiómapema ojejapo umi dísko Cantemos a Jehová (coro y orquesta), ha ipype oĩ heta músika oñembopu ha ojepurahéiva. Koʼãva ningo igustoiterei ñahendu, ha pyʼỹinte jajapóramo upéva saʼi saʼípe ikatútama ñaaprende de memória umi purahéi pyahu. Heta kántiko ojehai ikatu hag̃uáicha ñanemanduʼa pyaʼeve heʼívare, upévare japurahéivo peteĩ párte jaikuaáma mbaʼépa oúta upe rire. Iporãitevaʼerã upéicharõ ñañehaʼãramo japurahéi ñahendu jave koʼã gravasión. Jajapóramo upéicha opytátama ñane akãme umi músika ha kyreʼỹme japurahéita Salónpe.
19. Mbaʼeichaitépa oñembaʼapo ojeprepara hag̃ua umi músika ñahendúva jepi oñepyrũ mboyve ñande aty guasu?
19 Oñepyrũ mboyve umi aty guasu katuete oñemoĩ jepi umi músika pu rory, péro ñambyasýramo jepe heta vése noñepenaguasúi umívare. Heta ningo oñembaʼapo koʼãvare ojeprepara hag̃ua. Pór ehémplo, ojeporavo umi músika ha upe rire ojehecha mbaʼéichapa ombopúta pe orkésta Watchtower, oĩháme 64 ermáno ha ermána. Káda uno oiporu hetaiterei tiémpo oñensaja ha upéi ojegraváma hag̃ua Patterson-pe (Nueva York). Koʼã ermáno omombaʼeterei ojeporavo haguére chupekuéra oprepara hag̃ua umi músika. Umi 64 apytégui, 10 oviaha hetãgui Estados Unidos peve ograva hag̃ua. Ajépa jaagradesete chupekuéra! Péro mbaʼéichapa ikatu jahechauka ñamombaʼeha hembiapokuéra ñaime jave ñande aty guasúpe? Iporãta jaháramo jaguapy upe omoakãva heʼi vove ñandéve ha ñahendu trankílo porã umi músika mborayhúpe ojepreparavaʼekue.
20. Mbaʼépa ñañehaʼãvaʼerã enterove jajapo?
20 Jehovápe g̃uarã iñimportanteterei ñañembyaty ñamombaʼeguasu hag̃ua chupe, ha ohendu ñande purahéi. Upévare, oiméramo jepe japuraheikuaa térã nahániri, japurahéikena Jehovápe ñande pyʼaite guive ñambopyʼarory hag̃ua chupe! (Sal. 104:33.)
[Nóta]
^ párr. 1 Iporã ñanemanduʼa mil áño rupi omano rire David, oĩ hague hetaiterei ánhel omomarandúva umi ovecharerekuápe Jesús onase hague. Upérõ haʼekuéra oñangareko ijovechakuérare Belén ypýpe (Luc. 2:4, 8, 13, 14).
^ párr. 15 Ko purahéi ryru oguereko 225 purahéi ha ojejapovaʼekue cien idióma rasápe.
Ndépa mbaʼe ere?
• Emombeʼu umi ehémplo ohechaukáva ymaite guive ojepuraheiha oñemombaʼeguasu hag̃ua Jehovápe.
• Mbaʼérepa jaʼekuaa japurahéiramo ñande pyʼaite guive umi kántiko ñakumpliha avei Mateo 22:37 heʼíva?
• Mbaʼéichapa ikatu jahechauka ñamombaʼeha umi kántiko?
[Porandu ñahesaʼỹijóva]
[Nóta oĩva taʼanga ndive páhina 23]
Ñañemoñeʼẽpa ñane famíliape ani hag̃ua opuʼã reínte ojepurahéi aja umi kántiko?
[Nóta oĩva taʼanga ndive páhina 24]
Ñañensajápa ñande rógape umi purahéi pyahu ñaaprende hag̃ua de memória?