Kantaanyo ni Jehova!

“Mangipaayakto iti samiweng iti Diosko bayat nga addaak.”​—SAL. 146:2.

1. Ania ti nangtignay iti agtutubo a ni David a mangputar iti sumagmamano kadagiti kantana?

 BAYAT ti kinaagtutubo ni David, adu nga oras ti binusbosna a nangaywan iti arban ni tatangna kadagiti away iti asideg ti Betlehem. Bayat a bambantayanna dagiti karnero, makitkitana dagiti nakaskasdaaw a parsua ni Jehova: ti namituen a langit, “dagiti animal iti nawayang a tay-ak,” ken “dagiti tumatayab ti langit.” Napalalo ti panagamangana kadagita nga uray la a natignay a mangputar kadagiti makatukay-puso a kankanta a mangidaydayaw iti Nangaramid kadagita a nakaskasdaaw a bambanag. Adu kadagiti pinutar ni David ti masarakan iti libro Dagiti Salmo. a​—Basaen ti Salmo 8:3, 4, 7-9.

2. (a) Ania ti mabalin nga epekto ti musika iti maysa a tao? Mangted iti pagarigan. (b) Ania ti maadaltayo maipapan iti relasion ni David ken ni Jehova manipud iti Salmo 34:7, 8 ken Salmo 139:2-8?

² Nalabit a bayat dagidi a tiempo a napasayaat  ni David ti abilidadna iti musika. Kinapudnona, nagbalin nga eksperto ta naayaban pay nga agtokar iti arpa iti sanguanan ni Ari Saul. (Prov. 22:29) Ti musika ni David ket makapabang-ar iti maburburiboran nga ari, a kas iti masansan nga epekto dagiti napintas a musika kadagiti tattao ita. Tunggal agtokar ni David, ‘magin-awaan ni Saul ket naimbag dayta kenkuana.’ (1 Sam. 16:23) Napateg pay laeng agingga ita dagiti pinutar daytoy a kumakanta, tumutokar, ken mannurat iti kanta nga adipen ti Dios. Panunotenyo daytoy! Nasurok a 3,000 a tawen kalpasan ti pannakayanak ni David, minilion a tattao ita a nagduduma ti kasasaadda iti biag ken agnanaed iti intero a daga ti regular a mangbasbasa kadagiti salmo ni David tapno maliwliwa ken maaddaanda iti namnama.​—2 Cron. 7:6; basaen ti Salmo 34:7, 8; 139:2-8; Amos 6:5.

Ti Nagpateg a Paset ti Musika iti Pudno a Panagdayaw

3, 4. Ania dagiti urnos a naaramid tapno mairaman ti musika iti pudno a panagdayaw idi kaaldawan ni David?

³ Adda talento ni David, ken inusarna dayta iti kasayaatan a pamay-an​—tapno idaydayawna ni Jehova. Idi nagari iti Israel, inyurnosna a mairaman ti napintas a musika kadagiti maar-aramid a panagserbi iti tabernakulo. Nasurok nga apagkapullo ti amin a Levita nga agserserbi iti templo​—agdagup iti 4,000​—ti natudingan kas “manangipaay iti daydayaw,” a pakairamanan ti 288 a “nasanay iti kanta ken Jehova, nalaingda unay amin.”​—1 Cron. 23:3, 5; 25:7.

⁴ Adu kadagiti tinokar ken kinanta dagiti Levita ti pinutar a mismo ni David. Matukay la ketdi ti puso ti asinoman nga Israelita a presente kadagiti okasion a makanta dagiti salmo ni David. Idi naipan idiay Jerusalem ti lakasa ti tulag, “kinuna . . . ni David iti papanguluen dagiti Levita nga isaadda ti kakabsatda a kumakanta buyogen dagiti pagtokar iti kanta, dagiti pagtokar nga adda kuerdasna ken dagiti arpa ken dagiti piangpiang, nga agtokarda iti napigsa tapno mangpataudda iti uni ti panagrag-o.”​—1 Cron. 15:16.

5, 6. (a) Apay a nagpateg ti musika bayat ti panagari ni David? (b) Kasanotayo nga ammo a napateg ti paset ti musika iti pudno a panagdayaw iti nagkauna nga Israel?

⁵ Apay a nagpateg ti musika idi kaaldawan ni David? Gapu kadi ta kumakanta ken tumutokar ti ari? Saan. Ti makagapu ket naipalgak sinigsiglo kalpasanna, idi a ti nalinteg nga ari a ni Ezekias insublina dagiti maar-aramid a panagserbi iti templo. Mabasatayo iti 2 Cronicas 29:25: “[Ni Ezekias] insaadna dagiti Levita idiay balay ni Jehova, nga addaan kadagiti piangpiang, addaan kadagiti pagtokar nga adda kuerdasna ken addaan kadagiti arpa, babaen ti bilin ni David ken ni Gad a managsirmata ti ari ken ni Natan a mammadto, ta babaen idi iti ima ni Jehova a ti bilin naadda babaen kadagiti mammadtona.”

⁶ Wen, babaen kadagiti propeta, imbilin ni Jehova kadagiti agserserbi kenkuana nga isu ket idaydayawda babaen ti kanta. Dagiti parakanta iti napadian a tribu saanda a mairaman kadagiti annongen a maikalikagum iti dadduma a Levita tapno adda umdas a tiempoda nga agputar ken nalabit agensayo.​—1 Cron. 9:33.

7, 8. Apay a saan laeng a ti talentotayo ti napateg no iti panagkantatayo kadagiti kanta ti Pagarian?

⁷ Mabalin a maikunayo, ‘No panagkanta ti pagsasaritaan, sigurado a saanak a kas kadagidiay nalaing a kumakanta idi idiay tabernakulo!’ Ngem saan nga amin a kumakanta a Levita ket eksperto. Sigun iti 1 Cronicas 25:8, adda met dagiti “agsursuro.” Mabalin nga adda met dagiti nalalaing a tumutokar ken kumakanta iti dadduma a tribu ti Israel, ngem dagiti Levita ti tinudingan ni Jehova iti daytoy nga annongen. Makasiguradotayo a ‘nalaingda’ man wenno ‘agsursuroda,’ naimpusuan nga intungpal ti amin a matalek a Levita ti annongenda.

⁸ Pagaayat ni David ti musika ken nalaing iti dayta. Ngem ti laeng kadi talentotayo ti napateg iti Dios? Insurat ni David iti Salmo 33:3: “Aramidenyo ti kasayaatan a panagtokaryo kadagiti kuerdas a nabuyogan iti narag-o a panagdir-i.” Nalawag a ti napateg ket ti ‘panangaramidtayo iti kasayaatan’ wenno iti amin a kabaelantayo a mangidaydayaw ken Jehova.

 Ti Paset ti Musika Kalpasan ti Panawen ni David

9. Iladawanyo no ania koma ti nakita ken nangngegyo no natabunuanyo ti inagurasion ti templo bayat ti panagturay ni Solomon.

⁹ Bayat ti panagturay ni Solomon, nagpateg ti paset ti musika iti pudno a panagdayaw. Iti inagurasion ti templo, adda kompleto nga orkestra, a pakairamanan dagiti 120 a tumutrumpeta. (Basaen ti 2 Cronicas 5:12.) Ibaga kadatayo ti Biblia a “nagmaymaysa dagiti tumutrumpeta [nga amin ket papadi] ken dagiti kumakanta iti panangipangngeg iti maysa nga uni iti panangidaydayaw ken panagyaman ken Jehova, . . . ‘ta isu naimbag, ta ti naayat a kinamanangngaasina ket agingga iti tiempo a di nakedngan.’” No mangrugin dayta a naragsak nga uni, “ti met laeng balay napno iti ulep,” a mangipasimudaag iti anamong ni Jehova. Anian a makaparagsak ken nakaskasdaaw a mangngegan ti agtutunos nga uni ti amin a trumpeta agraman ti timek ti rinibu a kumakanta!​—2 Cron. 5:13.

10, 11. Ania ti mangipakita a ti musika ket paset ti panagdayaw dagiti nagkauna a Kristiano?

¹⁰ Maus-usar met ti musika iti panagdayaw dagiti nagkauna a Kristiano. Siempre, saan a kadagiti tabernakulo wenno templo ti pagtataripnongan dagiti Kristiano idi umuna a siglo no di ket kadagiti pagtaengan. Gapu iti pannakaidadanes ken dadduma pay a kasasaad, masansan a saan a nasayaat ti lugar a pagtataripnonganda. Kaskasdi, dagidi a Kristiano indaydayawda ti Dios babaen ti kanta.

¹¹ Indagadag ni apostol Pablo kadagiti padana a Kristiano idiay Colosas: ‘Itultuloyyo a bagbagaan ti maysa ken maysa babaen kadagiti salmo, daydayaw iti Dios, naespirituan a kankanta buyogen ti kinaparabur.’ (Col. 3:16) Idi naibalud da Pablo ken Silas, ‘nagkarkararagda ken indaydayawda ti Dios babaen iti kanta,’ nupay awan ti pagkantaanda. (Ara. 16:25) No bilang ta maibaludka, mano a kanta ti Pagarian ti kabesadom a kantaen?

12. Kasanotayo a maipakita ti panangipategtayo kadagiti kanta ti Pagarian?

¹² Yantangay nagpateg ti paset ti musika iti panagdayawtayo, nasayaat nga isaludsodtayo iti bagitayo: ‘Ipakpakitak kadi ti apresasionko iti dayta? Ikagkagumaak kadi ti nasapa a sumangpet kadagiti gimong, asamblea, ken kombension tapno madanggayak dagiti kakabsat iti panglukat a kanta, ken naimpusuan kadi ti panagkantak? Ipagpaganetgetko kadi kadagiti annakko a ti panagkanta iti nagbaetan ti Teokratiko nga Eskuelaan ti Panagministro ken Gimong ti Serbisio wenno iti nagbaetan ti palawag publiko ken Panagadal iti Pagwanawanan ket saan nga intermision isu a dida pumampanaw iti tugawda nga awan gapgapuna, nalabit tapno aginat?’ Ti panagkanta ket paset ti panagdayawtayo. Wen, ‘nalaingtayo’ man wenno “agsursuro,” kabaelantayo amin ti agdadanggay nga agkanta a mangidaydayaw ken ni Jehova, ken rumbeng nga aramidentayo dayta.​—Idilig ti 2 Corinto 8:12.

Agbaliw ti Kasapulan Bayat ti Panaglabas ti Tiempo

13, 14. Apay a napateg ti naimpusuan a panagkanta bayat dagiti gimong iti kongregasion? Iyilustraryo.

¹³ Nasurok a 100 a tawen ti napalabasen, inlawlawag ti Zion’s Watch Tower ti maysa a rason no apay a nagpateg dagiti kanta ti Pagarian. Kunana: “Ti panangkanta iti kinapudno ket nagsayaat a pamay-an a mangipasagepsep iti kinapudno kadagiti isip ken puso dagiti adipen ti Dios.” Adu kadagiti liriko iti kantatayo ti naibatay kadagiti teksto iti Biblia isu a ti panangikabesatayo iti sumagmamano a kanta ket nagsayaat a pamay-an tapno mayukuok iti pusotayo ti kinapudno. Masansan a matukay ti puso dagiti damo a timmabuno kadagiti gimongtayo gapu iti naimpusuan a panagkanta ti kongregasion.

¹⁴ Maysa a rabii idi 1869, bayat ti panagawid ni C. T. Russell manipud iti pagtrabahuanna, adda nangngegna nga agkakanta iti uneg ti maysa a patakder. Iti daydi a tiempo,  kombinsido a dina pulos masarakan ti kinapudno maipapan iti Dios. Gapuna, inkeddengna nga ipamaysa ti panawenna iti negosio tapno makaurnong iti kuarta. Pampanunotenna a mabalinna nga usaren dayta a pangtulong kadagiti tattao iti material a kasapulanda uray no dina matulongan ida iti naespirituan. Simrek ni Kabsat Russell iti natapuk ken nasipnget a siled ket nakitana nga adda maang-angay a narelihiosuan a taripnong. Nagtugaw ken nagdengngeg. Idi agangay, insuratna a ti nangngegna iti daydi a rabii ket umdasen, babaen ti panangiwanwan ti Dios, a mangparayray iti kimmapuy a pammatina iti Biblia nga impaltiing ti Dios. Imutektekanyo a ti panagkanta ti immuna a nakaatrakaran ni Kabsat Russell a mapan iti taripnong.

15. Ania dagiti limmawag a pannakaawat a nangiturong iti pannakapabaro ti pagkantaan?

¹⁵ Iti panaglabas ti tiempo, limmawag ti pannakaawattayo iti Kasuratan. Kuna ti Proverbio 4:18: “Ti dana dagidiay nalinteg ket kas iti naraniag a lawag a lumawlawag a lumawlawag agingga nga immaldaw unayen.” Dagita a limmawag a pannakaawat ti nangiturong kadagiti panagbalbaliw iti pamay-an a ‘panangikantatayo iti kinapudno.’ Iti napalabas a 25 a tawen, dagiti Saksi ni Jehova iti adu a pagilian tinagiragsakda nga inusar ti pagkantaan a napauluan iti Agkanta ti Daydayaw ken Jehova. b Kadagiti tawen sipud idi damo a naipablaak dayta a libro, limmawag ti pannakaawattayo iti adu a topiko, ket saanen a maitutop ti dadduma a sasao a nausar iti dayta a pagkantaan. Kas pagarigan, saantayon nga us-usaren ti termino a “baro nga urnos,” no di ket “baro a lubong.” Ken ibagbagatayo itan a ti nagan ni Jehova ket “masantipikar,” imbes a “maalangon.” Nalawag a no doktrina ti pagsasaritaan, masapul a mapabaron ti pagkantaantayo.

16. Kasano a ti baro a pagkantaantayo tulongannatayo a mangyaplikar iti balakad ni Pablo iti Efeso 5:19?

¹⁶ Gapu iti dayta ken iti dadduma pay a rason, inaprobaran ti Bagi a Manarawidwid ti pannakaipablaak ti baro a pagkantaan a napauluan iti Kantaanyo ni Jehova. Nagbalin laengen a 135 dagiti kanta iti baro a pagkantaan. Gapu ta bimmassiten dagiti kanta a sursuruen, nalaklakatayon nga ikabesa dagiti liriko ti sumagmamano a kanta iti baro a pagkantaan. Maitunos dayta iti balakad ni Pablo iti Efeso 5:19.​—Basaen.

Maipakitayo ti Panangipategyo

17. Ania ti makatulong kadatayo tapno ditay maamak a mabainan no agkantatayo iti kongregasion?

¹⁷ Ipalubostayo kadi a ti panagamaktayo a mabainan ti manglapped kadatayo nga agkanta iti napigsa bayat dagiti Nakristianuan a gimong? Panunotenyo daytoy: No maipapan iti panagsao, saan kadi a “maitibkoltayo amin iti adu a daras”? (Sant. 3:2) Ngem ditayo ipalubos a ti panagkamalitayo nga agsao ti manglapped kadatayo a mangidaydayaw ken Jehova iti binalaybalay. Apay koma ngarud a gapu laeng ta saan a napintas ti bosestayo ket ditayon  idaydayaw ti Dios babaen ti kanta? Ni Jehova, a “nangituding iti ngiwat maipaay iti tao,” ket maragsakan a makangngeg iti bosestayo a mangidaydayaw kenkuana babaen iti kanta.​—Ex. 4:11.

18. Mangted kadagiti singasing no kasano a makabesadoyo dagiti liriko dagiti kanta.

¹⁸ Dagiti CD a napauluan iti Sing to Jehovah​—Vocal Renditions ket magun-odanen iti adu a lenguahe. Naglaon dagitoy kadagiti baro a kanta a kinanta ti koro a nadanggayan iti napintas nga orkestra. Makaay-ayo a denggen dagita a musika. Kanayonyo koma a denggen dagitoy tapno maikabesayo dagiti liriko ti sumagmamano a baro a kanta. Naputar dagiti liriko ti adu a kanta iti pamay-an a no kantaenyo ti maysa a linia, nalabit ammoyon ti sumaruno. Gapuna, no patokarenyo dagiti CD, apay a diyo danggayan dagiti agkankanta? No nakabesadoyon dagiti liriko ken ti musika iti pagtaenganyo, awan duadua a dakdakkel ti kompiansayo nga agkanta iti Kingdom Hall.

19. Kasano a naisagana dagiti musika dagiti kanta ti Pagarian?

¹⁹ Mabalin a tagtagilag-anentayo laeng dagiti musika a maipatpatokar kadagiti aldaw ti espesial nga asamblea, asamblea sirkito, ken kombension distrito. Ngem panunotenyo a dakkel a trabaho ti pannakaisagana dagita. Mapili nga umuna ti musika, sa siaannad a maurnos ti pannakatokar ti orkestra a tokaren ti 64 a miembro ti orkestra ti Watchtower. Adu nga oras ti busbosen dagiti tumutokar a mangadal iti material, agensayo, ken kalpasanna, agirekord iti estudio idiay Patterson, New York. Sangapulo kadagitoy a kakabsat ket saan nga agnanaed iti Estados Unidos. Ibilangda amin a pribilehio ti makiraman a mangpataud iti nagpintas a musika agpaay kadagiti nateokratikuan nga okasion. Mabalintayo nga ipakita ti panangipategtayo iti panagsakripisioda. No ti tserman iti asamblea ken kombensiontayo awisennatayo nga agtugaw ken agimdeng kadagiti musika a siaayat a naisagana, agtulnogtayo koma iti dayta.

20. Ania ti determinado nga aramidenyo?

²⁰ Imdengan ken napateg ken Jehova dagiti kantatayo a mangidayaw kenkuana. Maparagsaktayo ti pusona babaen ti napigsa ken naimpusuan a panagkantatayo no agtataripnongtayo para iti panagdayaw. Wen nalaingtayo man wenno agsursuro, ‘kantaantayo ni Jehova’!​—Sal. 104:33.

[Footnotes]

Ania ti Makunayo?

• Ania dagiti pagarigan idi panawen ti Biblia a mangipakita a napateg ti paset ti musika iti panagdayawtayo?

• Ania ti nakitayo a pagnaigan ti panangtungpal iti bilin ni Jesus iti Mateo 22:37 ken ti naimpusuan a pannakiraman iti panagkanta kadagiti kanta ti Pagarian?

• Ania ti sumagmamano a pamay-an a maipakitayo ti panangipategyo kadagiti kanta ti Pagarian?

[Salsaludsod]

[Ladawan iti panid 23]

Laplapdanyo kadi dagiti annakyo a pumanaw iti tugawda nga awan gapgapuna bayat ti panagkanta?

[Ladawan iti panid 24]

Ikabkabesayo kadi dagiti liriko dagiti baro a kantatayo iti pagtaenganyo?