Suile Kẹ Jihova!

“Mẹ rẹ suile ujiro kẹ Ọghẹnẹ mẹ no mẹ gbẹ rọ akpọ na.”—OL. 146:2.

1. Eme ọ lẹliẹ Devidi kere ilezi riẹ jọ?

 OKENỌ Devidi ọ jọ uzoge, ọ jẹ hae jọ obọ ẹwọ raha euwa buobu rẹrote igodẹ ọsẹ riẹ kẹle Bẹtlẹhẹm. Nọ ọ jẹ sẹro igodẹ na, o wo oke nọ o je ro muẹrohọ iruo igbunu Jihova: idhiwu nọ e vọ avọ isi, “erao awọ nọ e rọ obọ ẹwọ,” gbe “erao ora obọ ehru.” Eware nọ ọ ruẹ i duobọte ei udu te epanọ oma o rọ wọe kere emamọ ile ujiro kẹ Ọnọ ọ ma eware igbunu nana. Ile buobu nọ Devidi o kere e rrọ obe Ilezi. *—Se Olezi 8:3, 4, 7-9.

2. (a) Ẹvẹ ile e rẹ sai kpomahọ ohwo? Kẹ oriruo. (b) Eme ma rẹ sae jọ Olezi 34:7, 8 gbe Olezi 139:2-8 wuhrẹ kpahe usu nọ Devidi o wo kugbe Jihova?

 ² O wọhọ nọ evaọ etoke nana Devidi o ro zihe ruọ ọgba-ile. Evaọ uzẹme, o kporo ile te epanọ a ro zizie ei re o kporo urete kẹ Sọl Ovie na. (Itẹ 22:29) Ile Devidi e lẹliẹ oma were ovie na, wọhọ epanọ emamọ ile e rẹ were omai nẹnẹ na. Oke kpobi nọ Devidi o kporo urete riẹ, “oma o vẹ were Sọl, jẹ ga e.” (1 Sam. 16:23) No anwọ oke yena ze rite inẹnẹ, ile nọ Devidi o kere i ri kiekpo ho. Dai roro kpahe onana! Nẹnẹ, dede nọ Devidi o whu vrẹ ikpe idu esa (3,000) no, ima ahwo buobu evaọ otọakpọ na soso a gbe bi rovie kpohọ ilezi Devidi na kẹ omosasọ gbe ẹruore.—2 Irv. 7:6; se Olezi 34:7, 8; 139:2-8; Emọs 6:5.

Abọ nọ Ile I Wo Evaọ Egagọ Uzẹme

3, 4. Ọruẹrẹfihotọ vẹ a ru rọkẹ ile-esuọ evaọ edẹ Devidi?

³ Devidi o wo onaa, yọ ọ rehọ onaa riẹ ru iruo evaọ edhere nọ ọ mai woma kpobi, koyehọ, ọ rehọ onaa riẹ wha orro se Jihova. Nọ a rehọ Devidi mu ovie Izrẹl no, o ru re ile-esuọ e jọ abọjọ egagọ evaọ uwou-udhu na. Evaọ usu ahwo Livai idu ene (4,000) nọ i je ru iruo evaọ uwou-udhu na, ahwo egba-ivẹ gbe udhone gbe eree (288) họ enọ “a wuhrẹ rọ kẹ ilesuọ rọ kẹ ỌNOWO,” yọ enana a jọ ‘ahwo nọ e riẹ kpahe ile ziezi.’—1 Irv. 23:3, 5; 25:7.

⁴ Devidi omariẹ họ ọnọ o kere ile buobu nọ ahwo Livai na a jẹ so. Ababọ avro, oma o jẹ hae were ohwo Izrẹl kpobi nọ ọ gaviezọ kẹ ile Devidi na. Uwhremu na, nọ a jẹ rehọ okọ ọvọ na ziọ Jerusalẹm, “Devidi ọ tẹ . . . ta kẹ isu ahwo Liva na re a ha ahwo no udevie imoni rai ze nọ a rẹ suile a je kporo ekuakua ikporakporo, irete, ekpata, gbe imikiri, re i do edo oghọghọ.”—1 Irv. 15:16.

5, 6. (a) Fikieme a ro se ile-esuọ gboja tere evaọ oke esuo Devidi? (b) Ẹvẹ ma rọ riẹ inọ a jọ egagọ se ile-esuọ gboja gaga evaọ oke emọ Izrẹl?

⁵ Fikieme a rọ jọ oke Devidi se ile-esuọ gboja tere? Kọ nwani fikinọ ovie na ọ jọ ọgba-ile? Ijo, ẹjiroro ọfa ọ jariẹ, onọ a dhesẹ via nọ ikpe buobu e vrẹ no evaọ okenọ Hẹzikaya emamọ ovie na ọ wariẹ rehọ egagọ efuafo mu evaọ etẹmpol na. Ma jọ 2 Iruẹru-Ivie 29:25 se nọ: ‘Hẹzikaya ọ tẹ rehọ ahwo Livai avọ igede, gbe ekpata te irete fihọ eva uwou ỌNOWO na, wọhọ epanọ ujaje Devidi gbe Gad ọruẹaro Devidi gbe Netan ọruẹaro na o rọ; keme ujaje na o rọ ỌNOWO na nọ u no unu eruẹaro na ze.’

⁶ Ẹhẹ, Jihova ọ rehọ ẹkwoma eruẹaro riẹ ta kẹ enọ e be gọe re a rehọ ile jiri ei. A mi egba-ile na iruo efa nọ ahwo Livai edekọ a je ru re a sae rehọ oke rai kpobi ruẹrẹ oma kpahe kẹ ile-esuọ.—1 Irv. 9:33.

7, 8. Nọ ma tẹ be suile ukoko na, eme ọ mae r’oja vi onaa?

⁷ Ẹsejọhọ whọ rẹ sae ta nọ: “Mẹ hae jọ evaọ oke yena, mẹ hae jọ usu egba-ile na ha enọ e jẹ so ile ziezi evaọ uwou egagọ na.” Rekọ orọnọ ahwo Livai kpobi a jọ egba-ile he. Wọhọ epanọ 1 Iruẹru-Ivie 25:8 o ta, ejọ e jariẹ nọ i je wuhrẹ. Oware ofa nọ who re roro kpahe họ ẹsejọhọ ahwo jọ nọ a riẹ ile ẹso gaga a jọ erua efa erọ Izrẹl, rekọ ahwo Livai họ enọ Jihova ọ salọ kẹ ile-esuọ. O rẹ sai mu omai ẹro inọ te enọ e riẹ ziezi te enọ i je wuhrẹ, ahwo Livai na kpobi a se iruo ile-esuọ rai na gb’oja ziezi!

 ⁸ Ile e jẹ were Devidi yọ ọ riẹ ile ekporo ziezi. Kọ onaa ile ọvo họ oware nọ Ọghẹnẹ o re rri? Eva Ahwo Kọlọsi 3:23, Pọl o kere nọ: ‘Rehọ eva awere, ru iruo kpobi nọ i te owhẹ, wọhọ ẹsenọ who bi ru ai kẹ Ọnowo na, orọnikọ ahwo ho.’ Ẹme na ọ rrọ vevẹ: Oware nọ Jihova o re rri họ ma be rọ evawere jiri ei jẹ gọe no eva ze.

Abọ nọ Ile I Wo nọ Oke Devidi O Vrẹ No

9. Dhesẹ oware nọ whọ hae ruẹ je yo o hae jọnọ whọ jariẹ okenọ a jẹ rọ etẹmpol na mudhe evaọ oke esuo Solomọn.

⁹ Evaọ oke esuo Solomọn, ile i wuzou gaga evaọ egagọ efuafo. Okenọ a jẹ rọ etẹmpol na mudhe, egba-ile buobu e jariẹ, yọ enọ i je kporo enware ọvo i bu te udhozeza (120). (Se 2 Iruẹru-Ivie 5:12.) Ebaibol e ta nọ “ikporo-enhware [nọ aikpobi a jọ izerẹ] gbe esuile na” a jẹ so lele ekwakwa ikporakporo jẹ rọ “ejiro kẹ ỌNOWO na ‘keme o re wowoma, keme uyoyou owhawha riẹ o rẹ jọ bẹdẹ bẹde.’” Nọ edo ile na o do lahwe no “ẹgho ọ tẹ vọ uwou” na, onọ u dhesẹ inọ ile na e were Jihova. Dai roro epanọ o jọ omawere te re a yo edo enware yena kpobi avọ egba-ile idu buobu nọ e jẹ rọ urru ovo so lele ai na.—2 Irv. 5:13.

10, 11. Eme o dhesẹ inọ Ileleikristi ikpe-udhusoi ọsosuọ a jẹ suile evaọ egagọ rai?

¹⁰ Ileleikristi ikpe-udhusoi ọsosuọ a jẹ suile evaọ egagọ re. Iwou ahwo a jẹ hai kokohọ orọnikọ iwou-udhu hayo etẹmpol ho. Fiki ukpokpoma gbe eware efa, a jẹ hae lẹlẹ kokohọ. Ghele na, a jẹ suile ro jiri Ọghẹnẹ.

¹¹ Pọl ọ tuduhọ inievo obọ Kọlọsi awọ nọ: ‘Wha wuhrẹ ohwohwo avọ ilezi gbe ile avọ uyere orọkẹ Ọghẹnẹ.’ (Kọl. 3:16) Nọ a fi Pọl avọ Saelas họ uwou-odi, a “jẹ lẹ jẹ so ile kẹ Ọghẹnẹ,” dede nọ a wo obe-ile he. (Iruẹru 16:25) A te fi owhẹ họ uwou-odi, bro ile mai whọ rẹ sae so uzuzou?

12. Ẹvẹ ma rẹ sai ro dhesẹ nọ ile mai e rẹ ghaghae k’omai?

¹² Nọ ile e r’oja tere evaọ egagọ mai na, ma rẹ nọ oma mai nọ: ‘Kọ me se ile gb’oja ziezi? Kọ mẹ be hae daoma kaki te iwuhrẹ gbe ikokohọ re me kuomagbe inievo mẹ suole emuhọ na, jẹ suole na no udu ze? Kọ mẹ be tuduhọ emọ mẹ awọ re a siọ okenọ a rẹ rọ suile avivẹ evaọ iwuhrẹ mai na ba erri wọhọ oke eriosehọ hayo okenọ a rẹ rọ kpama ruọ otafe gheghe?’ Ile-esuọ yọ abọjọ egagọ mai. Ẹhẹ, ma tẹ make rrọ egba-ile hayo ma bi wuhrẹ, u fo re mai kpobi ma ku irru mai kugbe jiri Jihova.—Wawo 2 Ahwo Kọrint 8:12.

Nọ Oke O Be Nyaharo na Yọ Otoriẹ Mai U Bi Nwene

13, 14. Erere vẹ ọ riẹ re ma rọ udu mai kpobi suile evaọ iwuhrẹ ukoko? Kẹ oriruo.

¹³ Bu vi ikpe udhusoi (100) nọ i kpemu, Zion’s Watch Tower o fodẹ oware jọ nọ o lẹliẹ ile mai wuzou gaga. O ta nọ: “Re a rehọ eme Ebaibol na suile yọ uvi edhere nọ uzẹme na u re ro te udu gbe iroro ahwo Ọghẹnẹ.” Ebaibol a si eme buobu nọ e rrọ obe-ile mai no ze, fikiere eme ọ ile na nọ ma re wuhrẹ yọ obọdẹ edhere nọ uzẹme na u re ro te omai udu. Evaọ ẹsibuobu, ile mai i duobọte udu ahwo nọ e ziọ ewuhrẹ mai evaọ oke ọsosuọ no.

¹⁴ Owọwọ ẹdẹjọ evaọ 1869, nọ C. T. Russell o je no iruo kpozi, o te yo edo ile nọ a be jọ uwou jọ so. Evaọ oke yena, ọ jọ udu  riẹ ku ei họ no inọ o gbe ti duku uzẹme na kpahe Ọghẹnẹ hẹ. Fikiere ọ tẹ rọ oma kẹ iruo riẹ, bi roro inọ o te koko ugho họ ziezi, ọ te sai fi obọ họ kẹ enọ akpọ ọ be bẹ o tẹ make rọnọ ọ te sai fi obọ họ kẹ ae riẹ Ọghẹnẹ hẹ. Brọda Russell ọ tẹ ruọ uwou na nọ o rrọ ovuovu na jẹ ruẹ inọ ichọche a be jọ etẹe ru. Ọ tẹ keria jẹ gaviezọ. O kere uwhremu na inọ avọ obufihọ Ọghẹnẹ, eme nọ o yo evaọ aso yena “e wariẹ tua ẹrọwọ riẹ nọ o whrehe kpobi no inọ obọ Ọghẹnẹ Ebaibol na i gine no ze.” Muẹrohọ inọ ile nọ Brọda Russell o yo e kake wọe kpohọ etẹe.

15. Inwene vẹ evaọ otoriẹ mai u ru rie kiehọ re ma nwene obe-ile mai?

¹⁵ Nọ oke o be nyaharo na, a bi ru eria Ikereakere nọ i vẹro vẹre he vevẹ. Itẹ 4:18 o ta inọ: “Edhere enọ i kiẹrẹ ọ wọhọ elo irioke, nọ u re he lo gahọ ri te udevie uvo.” Ẹnyaharo nọ ma bi wo evaọ otoriẹ Ebaibol na o be lẹliẹ omai nwene eme ile mai jọ. O vrẹ ikpe 25 no nọ Isẹri Jihova evaọ ekwotọ buobu a be rọ rehọ obe-ile na Suile Ujiro kẹ Jihova rọ suile. * Anwẹnọ a ro siobọno obe-ile yena, otoriẹ mai kpahe eware buobu u nwene no, yọ eme jọ nọ e rrọ obe-ile yena i gbe w’iruo ho. Wọhọ oriruo, vẹre ma jẹ hae ta nọ uyoyou, oghọghọ, gbe udhedhẹ yọ ibi ẹzi na, rekọ enẹna kọ abọ sa-sa ọrọ ubi ẹzi na. Yọ a ti ru odẹ Jihova fo orọnikọ a te kpare iẹe kpehru hu. O rrọ vevẹ inọ fikinọ otoriẹ mai evaọ eware buobu u nwene no, ẹgwọlọ ọ riẹ re ma nwene obe-ile mai.

16. Ẹvẹ obe-ile okpokpọ mai na u ti ro fi obọ họ kẹ omai lele ohrẹ Pọl nọ o rrọ Ahwo Ẹfẹsọs 5:19?

¹⁶ Fiki onana gbe ẹjiroro efa, Ugboma Esuo na u kuenu kẹ ekere obe-ile okpokpọ nọ odẹ riẹ o rrọ Suile kẹ Jihova. Ile udhozeza gbe ikpegbisoi (135) e rrọ obe-ile okpokpọ mai na. Nọ orọnọ ile nọ ma ti wuhrẹ i bu hu na, ma tuduhọ owhai awọ re wha riẹ ile ekpokpọ na jọ uzuzou. Onana o rọwo kugbe ohrẹ Pọl nọ o rrọ Ahwo Ẹfẹsọs 5:19.—Sei.

Whọ rẹ Sai Dhesẹ nọ Ile na E Were Owhẹ

17. Eme ọ rẹ sai fi obọ họ k’omai kpairoro vrẹ omovuọ nọ ma tẹ be suile evaọ iwuhrẹ?

¹⁷ Kọ omovuọ inọ ma wo emamọ uvo ho o rẹ whaha omai ile-esuọ evaọ obọ iwuhrẹ? Rri ẹme na enẹ: Kọ o gbẹ rrọ uzẹme inọ ẹme ọ rẹ thọ omai kpobi unu ẹsejọ? (Jem. 3:2) O make rrọ ere na, ma gbẹ be rọ unu mai na ro jiri Jihova n’uwou  ruọ uwou ghele. Kọ eme jabọ ma gbẹ rọ suile kẹ Ọghẹnẹ hẹ o tẹ make rọnọ uvo mai u woma tere he? O rẹ were Jihova, ọnọ “ọ ma unu ohwo” na, re ọ gaviezọ nọ ma be rọ irru mai rọ suile ujiro kẹe.—Ọny. 4:11.

18. Fodẹ eware jọ nọ e rẹ sai fi obọ họ k’owhẹ riẹ ile na.

¹⁸ Ukoko u siobọno ile mai nọ a rrọ unu so nọ a ru fihọ idiski evaọ evẹrẹ jọ. Ahwo buobu a kuomagbe so ile ekpokpọ na avọ ikporakporo nọ i lele i rai. A so rai evaọ oghẹrẹ nọ e rẹ rọ were ezọ gaga. Gaviezọ kẹ ae unuẹse buobu; onana u ti fi obọ họ kẹ owhẹ riẹ ile ekpokpọ na jọ uzuzou. Oghẹrẹ nọ a kere eme nọ e rrọ ile na buobu họ, nọ whọ tẹ so uhie ọsosuọ no, iroro ra e rẹ ta kẹ owhẹ eme nọ e be te jọ uhie avivẹ. Fikiere nọ who te bi kporo idiski na, daoma so lele iei. Whọ tẹ jọ obọ uwou riẹ ile na ziezi no, whọ te rrọ ududu so ae evaọ obọ Ọgwa Uvie.

19. Didi iruo a be hai ru fihọ ile mai nọ a be hai kporo na?

¹⁹ Ohwo ọ gbẹ yọroma ha, ọ rẹ sai rri ile nọ a be hai kporo evaọ obọ ikokohọ mai na vo. Ukoko u ru iruo gaga fihọ ile na. Nọ a tẹ salọ ile na no, a vẹ rehọ ae kẹ inievo mai nọ i bu te 64 nọ e rrọ ẹko-iruo ikporakporo evaọ obọ Ebẹtẹle obọ America re a kporo ai. Inievo na a vẹ rọ edẹ buobu ruẹrẹ oma kpahe kẹ ile na, ukuhọ riẹ a vẹ jọ oria nọ ma rẹ jọ kporo ile kporo ai fihọ idiski evaọ Patterson, New York. Inievo 10 evaọ usu inievo yena a be tubẹ rria otọ America ha. Inievo na kpobi a rri rie wọhọ uvẹ-ọghọ re a kporo emamọ ile nọ ma re ro ru ikokohọ mai. Ma re dhesẹ inọ iruo rai e d’omai ẹro. Nọ ohwo-agbara okokohọ ọ tẹ ta inọ ma keria re ma gaviezọ kẹ ile nọ a nabi kporo fiki mai na, j’oma keria re ma gaviezọ ziezi.

20. Eme whọ gba riẹ mu inọ who re ru?

²⁰ Jihova ọ be hae gaviezọ kẹ ile nọ ma be so ro jiri ei. E r’oja kẹe. Ma rẹ sai ru udu riẹ ghọghọ ẹkwoma ile nọ ma rẹ so no udu mai kpobi ze nọ ma te kuomagbe. Ẹhẹ, t’oma rrọ egba-ile hayo ma bi wuhrẹ, j’oma suile kẹ Jihova.—Ol. 104:33.

[Oruvẹ-obotọ]

Eme Who Roro?

• Iriruo vẹ evaọ oke anwae i dhesẹ inọ ile-esuọ e r’oja gaga evaọ egagọ mai?

• Ẹvẹ whọ sai ro dhesẹ inọ eme ọ Jesu nọ e rrọ Matiu 22:37 gbe udu kpobi nọ ma rẹ rọ so ile mai e rọwo kugbe ohwohwo?

• Idhere jọ vẹ ma sai ro dhesẹ inọ ma rri ile mai ghaghae?

[Enọ Uwuhrẹ]

[Uwoho nọ o rrọ ẹwẹ-obe avọ 23]

Kọ whọ be tuduhọ emọ ra awọ re a jọ gb’owhẹ nọ a tẹ be so ile?

[Uwoho nọ o rrọ ẹwẹ-obe avọ 24]

Kọ whọ be jọ obọ uwou wuhrẹ ile ekpokpọ mai na?