Jehova erinarsorfigiuk!
Jehova erinarsorfigiuk!
“Guutiga erinalimmik unnersiutigissavara inuutillunga.” — TUSSIAAT 146:2.
1. Daavip tussiaasiornissaminut suut killinneqaatigai?
DAAVI nukappiaraalluni nalunaaquttap-akunnerpassuini Betlehemip eqqaani narsaatiniittarpoq ataatami savaataanik paarsilluni. Savaatinik paarsinermini Jehovap pinngortitarsua tassaniittullu alutornangaartut qimerloorsinnaavai: qilammi ulloriarpassuit, “nersutit nujuartat” ‘qilaallu timmiai’. Takusani tamaasa ima killinneqaatigitigisarpai tupinnartunik tamakkuninnga Pinngortitsisumik unnersiutiginnissutinik tiguartinnartunik taalliortarluni, noqartilimmik nipilersuutigaluni. Taalliat taakkua ilarpassui Tussiaatiniipput. * — Atuakkit Tussiaat 8:4, 5, 8-10.
2. (a) Nipilersukkat inummut qanoq sunniuteqarsinnaappat? Assersuuteqarit. (b) Tussiaat 34:8, 9 aamma Tussiaat 139:2-8 Daavip Jehovamut attaveqarnera pillugu sumik ilinniarfigisinnaavavut?
2 Tamatuma nalaaniugunartoq Daavi nipilersortartutut pikkorissiartorpoq. Ima nipilersullaqqitsigilerpoq kunngimut Saulimut kukkilattariarsoriartoqquneqartalerluni. (Ussatit 22:29) Daavip nipilersugai kunngip erloqissutillip taassuma eqqissiallaatigisarpai, soorluttaaq nipilersukkat nuannersut ullumikkut inunnut taamatut sunniuteqartartut. Daavi nipilersoraangat, tamanna “Saulip ilorraallaatigisarpaa”. (1 Samueli 16:23) Nipilersortartup taalliortullu Guutimik mianerinnittup taassuma erinarsuusiai suli ullumikkut inunnut sunniuteqangaartarput. Allaat ullumikkut, Daavip inunngorneranit ukiut 3000-it qaangiutereerneranni, inuit millionillit inuiaqatigiinni qanorluunniit inissisimaffillit nunarsuarmillu tamarmeersut Daavip tussiaasiaanik atuartarput tuppallersaatigiumallugit neriuuteqalissutigiumallugillu. — 2 Nalunaarsuutit 7:6; atuakkit Tussiaat 34:8, 9; 139:2-8; Amosi 6:5.
Nipilersornerup pallorfiginninnermi ilumoortumi pingaaruteqassusia
3, 4. Daavip nalaani illernartumik kiffartornermi nipilersorneq erinarsornerlu qanoq aaqqissuunneqarsimappat?
3 Daavi piginnaaneqarpoq, piginnaaninilu ajunnginnerpaamik atorpai — tassa Jehovamik ataqqinartitsinermut. Daavip Israelimut kunnginngoreerami nipilersukkat tusarnersut illernartuummi kiffartornermut ilaalernissaat isumagaa. Levikkuusut illernartuummi kiffartortut tamarmik qulerarterutaannit amerlanerusut — 4000-it — unnersiutiginnittartussanngortinneqarput, taakkualu ilaat 288-it ‘guutisiornermi tussiartartussatut sungiusarsimasuupput, pikkorissuinnaviit’ (1990). — 1 Nalunaarsuutit 23:3, 5; 25:7.
4 Erinarsuutit Levikkut atortagaasa ilarpassui Daavip nammineq erinniaralugillu taalliarai. Israelikkut ilaasa Daavip tussiaasiaasa atorneqarneranni najuunnissaminnut periarfissallit tusakkatik killitsissutigisarsimassavaat. Kingusinnerusukkut angerutsip illerfia Jerusalemiliaanneqarmat “Daavip Levikkut siulersuisui naalakkerpai qatanngutitik tussiartartut sassarteqqullugit nipilersuusisartillugit kukkilattarissanik, sianaanik cymbelinillu. Taakku nipilersortussaapput nuannaarnertik erinarsornikkut misinnartinniarlugu.” — 1 Nalunaarsuutit 15:16.
5, 6. (a) Sooq nipilersorneq erinarsornerlu Daavip naalakkersuinerani taama pingaartinneqartigippat? (b) Qanoq ililluta nalunngilarput nipilersorneq erinarsornerlu itsaq Israelimi pallorfiginninnermi pingaaruteqartut?
5 Sooq nipilersorneq erinarsornerlu Daavip nalaani taama pingaartinneqartigippat? Kunngip nipilersortartuunera tamatumunnga pissutaaginnarpa? Naamik, allamik pissuteqarpoq ukiut hundredellit arlallit tamatuma kingorna kunngip naapertuilluartup Hizkijap naalaffimmi kiffartorneq atuutilerseqqimmagu paasinarsisinneqartumik. Nalunaarsuutit aappaat 29:25-mi ima allassimavoq: “Hizkijap Levikkut cymbelinik kukkilattarissanillu sianaanillu nipilersuutillit [Jehovap] naalaffiani inissippai, soorlu Daavi kunngillu siulittuisartua Gadi pruffiitilu Natani taamaaliortaqqusisimasut, [Jehovami] nammineq pruffiitimigut taama peqqusisimammat.”
6 Aap, Jehovap pruffiitini aqqutigalugit pallorfiginnitsini peqquai erinarsorlutik unnersiutigisassagaanni. Allaat erinarsortartut palaseqatigiinneersut Levikkoqatimik allat pisussaaffigisaasa ilaannik suliaqartussaajunnaartinneqartarput, erinarsugassaminnik piareersaanissamut taakkualu sungiusarnissaannut piffissaqarsinnaaniassammata. — 1 Nalunaarsuutit 9:33.
7, 8. Erinarsuutinik Naalagaaffilersaarutinik erinarsornermut tunngatillugu pikkorissusermit piginnaaneqarnermillu pingaaruteqarnerusoq suua?
7 Immaqali ima eqqarsarputit: “Uanga illernartuummi erinarsortartunut pikkorissunut ilaatinneqarsimanavianngikkaluarpunga!” Erinarsortartulli Levikkuusut ilaannaat erinarsornermut pikkorissuupput. Nalunaarsuutit siulliit 25:8 naapertorlugu aamma ‘ilinniartoqarpoq’ (1990). Aamma imaassinnaavoq Israelikkut naggueqatigiissortaasa ilaanni allani nipilersullaqqissoqarlunilu erinarsullaqqissoqartoq, Jehovalli Levikkut illernartuummi nipilersornermut erinarsornermullu tunngasunik suliassippai. Qularutiginngilluinnarsinnaavarput Levikkut tamarmik, ‘pikkorissuugaluarunik’ ‘ilinniartuugaluarunilluunniit’, suliassamik tamatuminnga suliaqarnerminni sapinngisartik tamaat iliuuseqartarsimassasut.
8 Daavi nipilersornermik nuannarisaqarpoq, aamma nipilersullaqqissuuvoq. Piginnaanillilli kisiisa Guutip pingaartippai? Kolossemiut 3:23-mi Paulusi ima allappoq: “Qanorluunniit iliorussi taamaaliortaritsi uummammit pisumik — [Jehovamut], inunnut pinnasi.” Erseqqippoq pingaaruteqarnerpaaq tassaasoq Jehovamik unnersiutiginnikkaanni “uummammit pisumik” erinarsortarnissaq.
Nipilersornerup Daavip kingorna pingaaruteqassusia
9. Salomo kunngiutillugu naalaffiup atoqqaartinneqarnerani najuussimasuuguit suut takullugillu tusaasimassagaluarnerlugit oqaluttuariuk.
9 Salomop naalakkersuinerata nalaani nipilersorneq erinarsornerlu pallorfiginninnermi ilumoortumi assut pingaaruteqarsimapput. Naalaffimmik atoqqaartitsinermi nipilersoqatigiissuaqarpoq palasinik 120-nik qarlortartartulinnik. (Atuaruk 2 Nalunaarsuutit 5:12). Biibilimi allassimavoq “qarlortartut tussiartullu ataatsikkut [appittut] ataatsimoorlutik [Jehova] unnersiutigalugu qutsaviginiarlugu . . . ‘Ajunngitsuuvoq, unneqqarissusia atavoq naassaanngitsumik!’ Taava naalaffik . . . nuissap ulikkaarpaa,” tamannalu takussutissaavoq Jehovap akuerinninneranut. Qarlortartut erinarsortullu ‘ataatsikkut appillutik’ Jehovamik unnersiutiginnittut tusarnaarlugit qanoq tusarnertigalutillu mianerinninnartigisimassappat! — 2 Nalunaarsuutit 5:13.
10, 11. Sumit erserpa kristumiut siulliit guutisiornerminni erinarsortarsimanerat?
10 Kristumiut siulliit aamma guutisiornerminni erinarsortarput. Soorunami ukiuni hundredelinni siullerni Guutimut kiffaasut illernartuutiniunngitsoq naalaffinniunngitsorlu, angerlarsimaffinnili, Guutimik pallorfiginninniarlutik naapeqatigiittarput. Malersugaaneq allallu pissutaallutik naapeqatigiiffigisartagaat pitsaanerpaaneq ajorput. Taamaakkaluartorli Guuti erinarsorlutik unnersiutigisarpaat.
11 Apustilip Paulusip qatanngutini kristumiut Kolossemiittut ima kajumissaarpai: “[Oqaaqqissaaqatigiittaritsi] tussiutit unnersiutiginnissutillu tussiutaasallu atorlugit Guuti qujaniarfigalugu uummatissinni.” (Kolossemiut 3:16) Paulusi Silasilu parnaarussaagamik erinarsuutaateqanngikkaluarlutik ‘qinullutillu Guutimut erinalinnik unnersiutiginnilerput’. (Apustilit Suliaat 16:25) Parnaarussaagaluaruit erinarsuutit Naalagaaffilersaarutit qassit alanngaarsinnaassagaluarpigit?
12. Erinarsuutinik Naalagaaffilersaarutinik pingaartitsinerput qanoq ersersissinnaavarput?
12 Erinarsorneq nipilersornerlu pallorfiginninnermi ilumoortumi pingaaruteqarmata imminut ima aperisariaqarpugut: ‘Erinarsukkat nipilersukkallu taakku pingaartinneqartariaqarnerattut pingaartippakka? Ataatsimiinnernut, ataatsimeersuaararnernut ataatsimeersuarnernullu sapinngisara tamaat inortuinaveersaartarpunga qatanngutikka erinarsuummik aallarniutaasumik erinarsoqatigisarsinnaaniassagakkit? Erinarsorusussuseqarluarlunga misigissuseqarlungalu erinarsortarpunga? Meeqqakka paasitinniartarpakka Teokratiimik Ilinniarfiup oqaluussinermullu tunngasumik ataatsimiinnerup akornanni imaluunniit tamanut ammasumik oqalugiaatip aamma Napasuliaq Alapernaarsuiffik-mik atuaqqissaaqatigiinnerup akornanni erinarsorneq unillatsiarnerunanilu pisariaqanngitsumik anisaqattaarfissaanngitsoq?’ Erinarsorneq pallorfiginninnitsinnut ilaavoq. Aap, ‘pikkorissuugaluarutta’ ‘ilinniartuugaluaruttaluunniit’ tamatta Jehovamik unnersiutiginneqatigiissinnaallutalu unnersiutiginneqatigiittariaqarpugut. — Naleqqiuguk 2 Korinthimiut 8:12.
Piffissap ingerlanerani pisariaqartitavut allanngortarput
13, 14. Ilagiit ataatsimiinneranni qamannga pisumik erinarsorneq qanoq pingaaruteqartigaa? Assersuuteqarit.
13 Ukiut 100-t sinnerlugit matuma siorna atuagassiami Zion’s Watch Tower-imi erinarsuutit Naalagaaffilersaarutit taama pingaaruteqartiginerannut pissutaasut ilaat ima eqqaaneqarpoq: “Sallusuissut pillugu erinarsorneq sallusuissummik Guutip innuttaasa isumaannut uummataannullu isertitsissutissaalluarpoq.” Erinarsuutitsinni taallat ilarpassui Biibiliminngaanneersuupput, taamaammat taakkua ilaannaannilluunniit alanngaarisinnaalerniarneq sallusuissummik uummammiuliussinissamut periusissaalluarpoq. Ataatsimiinnitsinnut najuuteqqaartut najuuttut qamannga pisumik erinarsornerat killinneqaatigingaartarpaat.
14 1869-imi Charles Taze Russellip unnuit ilaanni sulereerluni angerlarluni illut ilaanni tussiarpaluttoqartoq tusaalerpaa. Tamatuma nalaani taanna isumaqalersimavoq Guuti pillugu sallusuissut paasinngisaannartussaallugu. Aalajangersimavoq piffissani tamaat suliffimminut atorniarlugu. Isummersimavoq aningaasarsioruni inuit anersaakkut ikiorsinnaanngikkaluarlugit timikkut pisariaqartitaannik ikiulaarsinnaassallugit. Qatanngut Russell inimut tarrajuttumut ipertuumut tassunga iserpoq; sunaaffaana upperisarsiornermut tunngasumik ataatsimiittoqartoq. Ingippoq tusarnaalerlunilu. Kingusinnerusukkut allappoq unnuk taanna tusakkani “pissutigiinnarlugit Biibilip Guutimit isumassarsiarititaaneranik upperinnippiarunnaaraluarluni Guutip siulersuineratigut upperinneqqilerluni”. (Jehovas Vidner — forkyndere af Guds rige, qupp. 44) Maluginiaruk qatanngutip Russellip erinarsorpaluk ataatsimiittunukarusulissutigigaa.
15. Sooq erinarsuutitaarnissarput pisariaqalersimava?
15 Biibilimut tunngasunik eqqornerusumik paasinnittoqaraangat naqqiissuteqartoqartarpoq. Ussatit 4:18-imi ima allassimavoq: “Iluartup aqqusininnguata assigaa ullaap qaammalernera qaammarissiartortoq ulloqeqqaaneratut qaamatigilerserluni.” Qaammarissiartornerata kingunerisaanik erinarsuutit taallartaannik naqqiinissaq pisariaqarluinnalertarpoq. Ukiuni 25-ni kingullerni nunat ilarpassuini Jehovap Nalunaajaasuisa erinarsuutit Jehova erinarsorlusi unnersiutigisiuk *-mik qulequtallit atortarnerat nuannaarutigisarsimavaat. Taakkua saqqummersinneqarneranniilli qaamaneq arlalitsigut qaammarissiartorsimavoq, taamaammallu oqariartaatsit erinarsuutini atorneqartut ilaat paasisanut eqqornerusunut naapertuukkunnaarsimapput. Assersuutigalugu ullumikkut oqarneq ajorpugut Jehovap aqqa ‘akitsisinneqartoq’, oqartarpugulli ‘illernarsisinneqartoq’. Erseqqippoq erinarsuutit ullumikkut paasineqarsimasunut naleqqunnerusut pisariaqartinneqartut.
16. Uagut Paulusip Efesosimiut 5:19-imi siunnersuutaa qanoq malissinnaavarput?
16 Tamatuminnga allanillu pissuteqarlutik Siulersuisoqatigiit erinarsuutinik nutaanik Syng for Jehova *-mik qulequtalinnik saqqummersitsinissaq akueraat. Erinarsuutini nutaani erinarsuutit ikilisinneqarsimapput 135-iinnanngortillugit. Maanna erinarsuutit ikinnerulermata taakkua ilaannaasaluunniit taallaat alanngaarsinnaalersinnaassagaluarpavut. Tamanna Paulusip Efesosimiut 5:19-imi siunnersuutaanut naapertuuppoq. — Atuaruk.
Pingaartitsinerit ersersissinnaavat
17. Ilagiit ataatsimiinnerini erinarsoqataanaveersaannginnissamut suna iluaqutigisinnaavarput?
17 Erinalunneq pissutigalugu kristumiut ataatsimiinnerini qamannga pisumik erinarsoqataanaveersaassaagut? Manna eqqarsaatigeriaruk: Oqalukkaangatta “tamatta amerlasuunik kukkussuteqartarpugut”, ilaa? (Jaaku 3:2) Taamaakkaluartorli oqalunnitsigut naammalluinnanngitsuunerput illumiit illumut oqaluussinermi Jehovamik unnersiutiginninnissamut akornutaatinneq ajorparput. Taava sooq erinnatsigut naammalluinnanngitsuunerput erinarsorluta Guutimik unnersiutiginninnissatsinnut akornutaatissavarput? Jehovap, ‘inunnik qaneqartitsisup’, imminik unnersiutiginnilluta erinarsoraangatta erinnatsinnik tusarnaarnissaq nuannarisarpaa. — 2 Mosesi 4:11.
18. Qatanngutit ilarpassuisa erinarsuutit nutaat erinaasa ilikkarnissaannut suna iluaqutigisimavaat?
18 Qatanngutit ilarpassuisa nipilersukkat Syng for Jehova — klaverakkompagnement-imeersut Napasuliap Alapernaarsuiffiup nittartagaanit pisortatigoortumit www.pr418.com-imit downloaderneqarsinnaasut iluaqutigisimavaat. Nipilersukkanik taakkuninnga tusarnaarneq nuannersupilussuusarpoq. Nipilersukkat taakku tusarnaakulasarukkit erinarsuutit nutaat erinaat ilikkarsinnaassavatit.
19. Erinarsuutini Naalagaaffilersaarutini erinnat immiunneqarnerat qanoq suliaatigisarpa?
19 Ataatsimeersuaararnerni ataatsimeersuarnernilu katersuukkaangatta immaqa nipilersukkat atorneqartartut taamaattussaannartut isumaqarfigeqqajaasarpavut. Nipilersukkanik taakkuninnga piareersaaneq immiussinerlu suliarujussuupput. Erinnat atorneqartussat toqqarneqareeraangata Napasuliap Alapernaarsuiffiup nipilersoqatigiivinut 64-inik nipilersortartulinnut atugassanngorlugit aaqqissuunneqartarput. Tamatuma kingorna nipilersortartut nalunaaquttap-akunnerparpassuini erinnat ilinniartarpaat, taava sungiusaqatigiittarput naggataatigullu immiussisarfitsinni Pattersonimi New Yorkimiittumi immiussisarlutik. Qatanngutit taakkua ilaat qulit USA-p avataani najugaqarput. Nipilersoqatigiinniittut tamarmik nipilersukkanik teokratiimut tunngatillugu katerisimaarnitsinni tusarnaagassianik immiusseqataanertik immikkut pisinnaatitaaffittut isigaat. Qatanngutit taakkua taamatut asannittuliornerannik qujamasuutiginninnerput ersersissinnaavarput. Ataatsimeersuarnitsinni aqutsisup ingiffissatsinnukaqqugaangatigut ingerlaannaq taamaaliortariaqarpugut nipilersukkallu, qatanngutit nalunaaquttap-akunnerpassuini uagut pilluta piareersarsimasaat, tusarnaaqqissaarlugit.
20. Illit sunissat aalajangiusimaviuk?
20 Jehovap maluginiartarpaa erinarsorluta unnersiutigigaangatsinni. Pingaartittarpaa. Jehova nuannaartittarsinnaavarput pallorfiginiarlugu qaqugukkulluunniit katersuukkaangatta uummatikkut iluunngarluta erinarsoqataasarnitsigut. Aap, ‘pikkorissuugaluarutta’ ‘ilinniartuugaluaruttaluunniit’ ‘Jehova erinarsorfigisartigu’! — Tussiaat 104:33. (w10 12/15-E)
[Quppernerup ataani ilanngussat]
^ imm. 1 Soqutiginarpoq inngilerpassuit Daavip toquneranit ukiut tusindillit qaangiuttut Missiarsip inunngornera savanik paarsisunut Betlehemip eqqaani narsaatiniittunut nalunaarutigimmassuk. — Lukasi 2:4, 8, 13, 14.
^ imm. 15 Erinarsuutit 225-usut oqaatsinut 100-nit amerlanerusunut nutserneqarsimapput. Kalaallisut erinarsuutit 160-it saqqummersinneqarsimapput.
^ imm. 16 Erinarsuutit Syng for Jehova-mik qulequtallit kalaallisut suli saqqummersinneqanngillat.
Qanoq akissavit?
• Oqaluttuanit Biibilimiittunit sorlernit erserpa nipilersornerup erinarsornerullu pallorfiginninnermi pingaaruteqarnerat?
• Jiisusip Matthæusi 22:37-mi peqqussutaanut naalanneq erinarsuutinillu Naalagaaffilersaarutinik qamannga pisumik erinarsorneq qanoq imminnut attuumassuteqarpat?
• Ilaatigut qanoq ersersissinnaavarput erinarsuutinik Naalagaaffilersaarutinik pingaartitsinerput?
[Atuaqqissaarnermi apeqqutit]
[Qupp. 29-mi assiliartaq]
Meeqqatit paasitinniartarpigit erinarsortoqarnerani pisariaqanngitsumik anisaqattaartassanngitsut?
[Qupp. 30-mi assiliartaq]
Erinarsuutit Naalagaaffilersaarutit alanngaarniartarpigit?
