Tuyimbidila Yave

“Nyimbidila Nzambi ame, wau ngina una.”—NKU. 146:2.

1. Nki kiafila Davidi mu yimbila nkunga?

MUNA kileke kiandi, Davidi ntangwa yayingi kakalanga mu nzanza lukufi ye Beteleme mu vungula mameme ma s’andi. Ekolo kalunga-lunganga mameme, Davidi wamonanga lekwa yayingi kasema o Yave nze, ntetembwa kun’ezulu, “bulu ya futa” ye “nuni z’ezulu.” Ina kamonanga yansivikisanga kikilu yo kumfila mu yimbila nkunga mu kembelela o Mvangi a lekwa yayi. Miayingi muna nkunga kayimbila Davidi tulenda mio solola muna nkand’a Nkunga. * —Tanga Nkunga 8:3, 4, 7-9.

2. (a) E nkunga adieyi milenda vanga kwa konso muntu? Yik’e nona. (b) Adieyi tulenda longoka muna Nkunga 34:7, 8 ye Nkunga 139:2-8 mu kuma kia ngwizani a Davidi yo Yave?

² Davidi nanga mu kolo kiaki kia zingu kiandi katoma longoka yimbila. Wau  vo nyimbidi ambote kakala, wabokelwa mu kwenda sikila Saulu wa ntinu e kokolo. (Nga. 22:29) E nkunga kayimbilanga o Davidi miavuvikanga kikilu ntim’a ntinu, nze una e nkunga miambote mivuvikilanga e ntima mia wantu o unu. Konso ntangwa o Davidi kasikanga kokolo, ‘Saulu wamonang’o wete.’ (1 Sam. 16:23) E nkunga mina kakubika o nyimbidi ndioyo wa mumpumina-Nzambi miakinu miamfunu yamu unu. Yindula diambu edi: O unu, vioka mvu 3.000 tuka Davidi kawutukila, ulolo wa wantu muna fulu yayingi ova nza, mu nkunga mia Davidi besololwelanga lufwiaulwisu ye vuvu.—2 Tus. 7:6; tanga Nkunga 34:7, 8; 139:2-8; Am. 6:5.

Fulu kia Nkunga Muna Nsambil’aludi

3, 4. Nkia nkubika za yimbila zavangwa muna lumbu ya Davidi?

³ Davidi nyimbidi ambote kakala, wasadila ngangu zandi za yimbila mu kembelela Yave. Vava kakituka se ntinu a Isaele, Davidi wasikidisa salu ya saba kumosi ye nkunga miambote. Tezo kia 4.000 m’Anelevi bakala ye kiyekwa kia ‘kembelelanga Yave.’ Muna lutangu lwalu, 288 “balongok’o yimbidila Yave, awonso bakunkuka.”—1 Tus. 23:3, 5; 25:7.

⁴ Davidi nkunga miayingi kakubika mina miayimbilanga Anelevi. Aneyisaele ana bakalanga y’elau dia wá nkunga mia Davidi vava miayimbilwanga, bakasakeswanga kwa mana bawanga. Kuna kwalanda, vava e nkele ekangu yanatwa kuna Yerusaleme, “Davidi ovovese akuluntu a Anelevi vo, batumb’abunzi au s’ayimbidi, ye sekwa ye nsambi ye kokolo ye yimbalu, basika yo tatula ndinga kuna kiese.”—1 Tus. 15:16.

5, 6. (a) Ekuma o yimbila kwasilwanga e sungididi muna luyalu lwa Davidi? (b) Aweyi tuzayidi wo vo yimbila mfunu kwakala muna Isaele yankulu?

⁵ Ekuma o yimbila kwasilwanga e sungididi muna lumbu ya Davidi? Nga i mu kuma kia sia vo ntinu ntozi a nkunga kakala? Ve. Vakala ye kuma kiakaka eki kiazayakana muna tandu yalanda, vava Kizekeya wa Ntinu kavutulwisa e nsambila muna tempelo. Muna 2 Tusansu 29:25 tutanganga vo: “[Kizekeya] osidi Alevi muna nzo a Yave ye kimbalu ye nsambi ye kokolo, una kakanikin’o Davidi, yo Ngadi wa moni a ntinu, yo Natani wa ngunza: kadi i nkanikinu a Yave muna ngunza zandi.”

⁶ Elo, Yave muna ngunza zandi wafilanga asambidi andi mu kunkembelela muna nkunga. Ayimbidi muna makanda m’anganga ke bavewanga salu yawonso ko ina yavewanga Anelevi akaka kimana bakala ye ntangwa yafwana muna kubika nkunga yo longoka mio.—1 Tus. 9:33.

7, 8. Adieyi disundidi o mfunu muna yimbila nkunga mia Kintinu?

⁷ Olenda vova vo, “wau vo ayimbidi ambote bayimbilanga muna saba, nanga kiadi kala mu buka kiau ko.” Kansi, ke Anelevi awonso ko bazaya toma yimbila. Nze una usonganga e sono kia 1 Tusansu 25:8, vakala mpe ye ‘alongoki.’ Diamfunu mpe mu zaya vo vakala mpe y’awana bazaya toma yimbila muna makanda makaka ma Isaele, kansi o Yave kw’Anelevi kaka kavana kiyekwa kia yimbila. Tulenda kala ye ziku vo kiakala awana “bakunkuka,” i sia vo ana bazaya toma yimbila yovo ‘alongoki,’ Anelevi awonso akwa kwikizi bayangalelanga kiyekwa kiau.

⁸ Davidi wazolanga yimbila yo kituka se nyimbidi ambote. Nga o zaya toma yimbila diau disundidi o mfumu kwa Nzambi? Muna Kolosai 3:23, Paulu wasoneka vo: “Konso kina nusala, nusala ye nsi a ntima, nze kuna kwa [Yave] ke kwa wantu ko.” E mbut’a diambu i diadi: Yave ovavanga vo twayimbila ye “nsi a ntima” yawonso muna kunkembelela.

 Fulu kia Nkunga Vava Davidi Kafwa

9. Yika dina wadi mona yo wa kele vo wakala muna tempelo vava yasunzulwa muna luyalu lwa Solomo.

⁹ Muna luyalu lwa Solomo, o yimbila diambu diamfunu diakala muna nsambil’aludi. Vava kiasunzulwa e tempelo, vakala ye buka ki’ayimbidi kumosi ye 120 m’awana basikanga e mpungi. (Tanga 2 Tusansu 5:12.) Muna Nkand’a Nzambi tutanganga vo “asiki a mpungi [awonso anganga] y’ayimbidi bakala kumosi, ezu dimosi diwakana muna sanisa yo tonda Yave, . . . oku vo, oyandi wambote: kadi o walakazi wandi wakwele mvu.” Ekolo kiayimbilwanga e nkunga miami miakiese, “e nzo yazala y’etuti,” muna songa vo Yave wayangalela nkunga miami. Ekwe kiese diakala mu wá e ndinga z’awana basikanga e mpungi kumosi ye ulolo w’ayimbidi.—2 Tus. 5:13.

10, 11. Adieyi disonganga vo Akristu a tandu kiantete basadilang’e nkunga muna nsambila?

¹⁰ Akristu a tandu kiantete basadilanga mpe e nkunga muna nsambila. Ke balunganenanga mu saba ko ngatu mu tempelo, kansi mu nzo za wantu. Muna kuma kia lubangamu, o kutakana diambu diampasi diakala kwa yau. Kana una vo i wau, Akristu awaya bakembelelanga Nzambi muna nkunga.

¹¹ Paulu wa ntumwa wakasakesa mpangi zandi Akristu kuna Kolosai vo: ‘Nutemoziana muna . . . nkunga, ye ngimbila zakimwanda; nuyimbilanga kuna kwa Nzambi.’ (Kol. 3:16) Vava Paulu ye Sila basiwa mu pelezo, bayantika ‘sambila yo yimbidila Nzambi’ kana una vo ke bakala ye nkand’a nkunga ko. (Mav. 16:25) Kele vo osilu mu pelezo, nkunga nkwa mia Kintinu olenda yimbila muna ntu?

12. Aweyi tulenda songela luyangalalu lweto muna nkunga mia Kintinu?

¹² Wau vo nkunga mivwidi fulu kiamfunu muna nsambila, diambote twakiyuvula: ‘Nga iyangalelanga mio? Nga isianga ngolo za lwaka mu ola yambote muna tukutakanu twakete ye twampwena kimana yayimbila kumosi ye mpangi zame z’akala ye z’akento e nkunga wantete? Nga iyimbilanga ye kiese kiawonso? Nga ikasakesanga wan’ame mu lembi badikila e ntangw’a yimbila vava kifokokanga e Sikola ya Salu kia Kimfumu yo yantika Lukutakanu lwa Salu yovo vava kifokokanga elongi dia nkangu yo yantika Elongi di’Eyingidilu nze ntangw’a vundu ina balenda sisa kunda yau mu kwenda nana malu?’ O yimbila diambu diamfunu muna nsambila. Muna kuma kiaki, diakala vo tuzeye toma yimbila yovo tu alongoki, yeto awonso tufwete yikakesanga ndinga zeto mu kembelela Yave.— Tezanesa ye 2 Korinto 8:12.

Mambu Malenda Soba Ekolo Ntangwa Iviokanga

13, 14. Ekuma o yimbila kwinina o mfunu muna tukutakanu? Yik’e nona.

¹³ Se vioka tezo kia 100 za mvu, Eyingidilu diasonga o mfunu a nkunga mieto mia Kintinu. Diavova vo: “O yimbila nkunga i mpila yambote ya kotesela e ludi muna ngindu ye ntima mia nkangu a Nzambi.” Mvovo miayingi mia nkunga mieto, mu Nkand’a Nzambi mitukanga. Muna kuma kiaki, o longoka e mvovo mina muna nkunga miami ilenda kala mpila yambote ya kotesela e ludi muna ntima mieto. Nkumbu miayingi, awana bekwizanga mu tukutakanu tweto mu nkumbu antete, betoma kasakeswanga vava bewanga e nkunga miyimbilwanga muna nkutakani.

¹⁴ Muna mvu wa 1869, vava Charles Taze Russell katuka kuna salu muna masika, wawá wantu bayimbilanga mu nzo. Muna kolo kiakina kia zingu kiandi, wadimbula e vuvu vo kalendi diaka solola ludi ko mu kuma kia Nzambi. Muna kuma  kiaki, wayivana muna kinkita kadi wayindulanga vo kele vo obakidi nzimbu zayingi, olenda lungisa nsatu za nitu za wantu ayingi, kana una vo kalendi kubasadisa ko muna mwanda. Mpangi Russell wakota muna nzo yayina yazala ye mbundukutu ye tombe, yo mona vo wantu basambilanga mo. Wavwanda yo yantika wá mana mavovwanga. Kuna kwalanda, wasoneka vo mana kawá muna fuku wauna “mamfila, muna lusadisu lwa Nzambi, mu siamisa lukwikilu lwandi muna Nkand’a Nzambi.” Tumwene vo edi diatunta mpangi Russell mu kwenda mu lukutakanu i nkunga kawá.

15. Nkia umbakuzi wafila mu vaikisa nkand’a nkunga wampa?

¹⁵ Ekolo ntangwa iviokanga, mambu mayingi mesingikwanga muna umbakuzi weto wa Nkand’a Nzambi. Muna Ngana 4:18 tutanganga vo: “E ngyend’a nsongi nze ntemo ankezimi, ukwenda nungunang’aka yamu ntangw’anlungu.” Muna kuma kia ntemo unungunukanga, divavanga vo twasingika emiaka mvovo mia nkunga mieto. Mu mvu 25 miviokele, Mbangi za Yave mu nsi zayingi basadilanga o nkand’a nkunga wakala yo ntu a diambu mu kimputu vo Cantemos Louvores a Jeová. * Tuka nkanda wau wavaikisilwa, mambu mayingi masobele kala. Mvovo miayingi mina muna nkanda wau wa nkunga ke misadilwanga diaka ko. Kasikil’owu, o mvovo “nova ordem” (nkubik’ampa) ke usadilwanga diaka ko, kansi “novo mundo” (nz’ampa) tusadilanga. Ka tuvovanga diaka ko vo nkumbu a Yave “yitundidikwa,” kansi “yizitiswa.” Elo, muna kuma kia umbakuzi wau, divavanga vo emiaka mvovo mia nkunga mieto miasingikwa.

16. O Nkand’ampa wa nkunga aweyi ukutusadisila mu landa luludiku lwa Paulu muna Efeso 5:19?

¹⁶ Muna kuma kiaki ye yakaka, Buka kia Selo Yambuta babaka nzengo za vaikisa nkanda wampa una ye ntu a diambu vo Tuyimbidila Yave. Lutangu lwa nkunga muna nkanda wampa lwakulwilu mu 135 dia nkunga. Wau vo nkunga miakete kaka tulongoka, ke dikala diampasi ko mu zaya e mvovo mia nkunga miampa. Ediadi ngwizani dina yo luludiku lwa Paulu muna Efeso 5:19.—Tanga.

Songa vo Oyangalelanga Nkunga Mieto

17. Adieyi dilenda kutusadisa mu lembi kala ye nsoni za yimbila muna tukutakanu?

¹⁷ Nga tufwete yambula vo e nsoni zatusimba twalembi yimbilanga muna tukutakanu tw’Akristu? Yindula edi: Nga ke dialudi ko vo ‘yeto awonso tutang’e sakuba’ muna mvovo? (Yak. 3:2) Kana una vo i wau, ke tuyambulanga ko vo lembi kala walunga muna mvovo kwatusimba twalembi kembelela Yave muna nzo ye nzo. Ekuma ozevo tufwete yambulwila vo lembi kala ye ndinga  yambote kwatusimba mu lembi kembelela Nzambi muna nkunga? Yave ona “wavanga nu’a muntu” otoma yangalalanga vava tusadilanga e ndinga zeto muna kunyimbidila.—Luv. 4:11.

18. Yika una olenda longokela e mvovo mia nkunga.

¹⁸ E CD ina yo ntu a diambu mu kimputu vo Cantemos a Jeová—Orquestra e Coral, ivaikiswanga mu ndinga zayingi. Muna CD yayi muna ye nkunga miampa miayimbilwa. Diakiese kikilu dikalanga mu wá e nkunga miami. Kala ye fu kia wanga e nkunga miami. Muna mpila yayi, olongoka yimbila nkunga miayingi miampa. E mvovo mia nkunga miami miatoma kubikwa mu mpila ina olenda sungamena e mvovo mia nlonga ulende ekolo oyimbilanga. Muna kuma kiaki, vava owanga e CD, diambote ngeye mpe wayimbilanga. Avo okedi ye fu kia wá e nkunga miami kuna nzo, oyangalela mio yimbila kun’Eseka dia Kintinu.

19. Nkia ngolo zivangwanga muna kubika e nkunga mieto mia Kintinu?

¹⁹ Diasazu mu veza e nkunga tuwanga muna tukutakanu tweto twa lumbu kimosi, twa zunga ye twa mvivu. Salu kiayingi kisalwanga mu kubika nkunga miami. Vava e nkunga misolwanga, mpangi 64 bena muna buka ki’ayimbidi kia Watchtower betoma kubikanga una beyimbidila e nkunga miami. Ayimbidi awaya ntangwa yayingi beviokesanga mu fimpa yo longoka e nkunga miami. I bosi, bebandulanga mio muna CD kuna estúdios zeto kuna Patterson, Nova York. Kumi muna mpangi zazi z’akala ye z’akento ke bezingilanga ku Estados Unidos ko. Bebadikilanga dio s’elau dia kubika nkunga miami misadilwanga muna tukutakanu. Tufwete songa luyangalalu lweto muna ngolo bevanganga ampangi awaya. Vava o mfidi a lukutakanu kekutulombanga vo twabaka e fulu yeto, tufwete wo vanganga yo wunikina e nkunga miami mikubikwanga ye zola kwawonso.

20. Adieyi i kani diaku?

²⁰ Yave otoma yangalalanga vava tukunkembelelanga muna nkunga kadi mfunu mina kwa yandi. Tulenda yangidika ntim’andi muna yimbilanga ye nsi a ntim’eto wawonso vava tukutakananga mu kunsambila. Elo, kiakala vo tuzeye toma yimbila yovo tu alongoki, yambula ‘twayimbidila Yave.’—Nku. 104:33.

[Mvovo Vana Yand’a lukaya]

Adieyi Obenze?

• Nkia nona ya nz’ankulu isonganga vo e nkunga mivwidi fulu kiamfunu muna nsambila?

• Nkia ngwizani ina vana vena lemvokela nkanikinu a Yesu una muna Matai 22:37 yo yimbila nkunga mia Kintinu ye nsi a ntima wawonso?

• Aweyi tulenda songela luyangalalu lweto muna nkunga mia Kintinu?

[Yuvu ya Longoka]

[Foto ina muna lukaya lwa 23]

Nga osimanga wan’aku mu lembi sisa kunda yau vava kiyimbilwanga?

[Foto ina muna lukaya lwa 24]

Nga olongokanga e nkunga mieto miampa kuna nzo?