Mu Opelele Jehova!

“Ni ka opelela Mulimu wa ka za ku mu lumba, ha ni nze ni li teñi.”—SAMU 146:2.

1. Ki lika mañi ze ne susumelize mutangana Davida ku ñola ze ñwi za lisamu za hae?

DAVIDA ha naa sa li mucaha, naa tandanga lihola ze ñata kwa mafulisezo a naa li bukaufi ni Betelehema ili kwa naa lisezanga mitapi ya ndatahe. Davida ha naa nzaa babalela lingu, naa kona ku iponela misebezi ya Jehova ye makaza: linaleli, “libatana za mwa naheñi,” ni “linyunywani za mwa lihalimu.” Za naa boni ne li mu susumelize hahulu kuli mane a ñola lipina ze tabisa ze lumbeka Mubupi wa lika ze komokisa zeo. Lipina ze ñata za naa ñozi Davida li fumaneha mwa buka ya Lisamu. *—Mu bale Samu 8:3, 4, 7-9.

2. (a) Lipina li kona ku ama cwañi mutu? Mu fe mutala. (b) Lu kona ku itutañi ka za bulikani bwa naa na ni bona Davida ni Jehova kwa Samu 34:7, 8 ni Samu 139:2-8?

² Ku bonahala kuli yeo ki yona nako ya naa ekelize Davida kwa bukwala bwa hae bwa ku  opela. Naa bile muopeli ya bukwala hahulu kuli mane naa memilwe kuli a yo lizezanga Mulena Saule harepa. (Liprov. 22:29) Lipina za Davida ne li tobanga pilu ya mulena yo ya naa ziyelehile, sina lipina ze nde mo li tobelanga lipilu za batu kacenu. Davida ha naa lizezanga Saule harepa ya hae, ‘Saule naa ikutwanga kuli ki mbubombubo, mi naa ikutwanga hande.’ (1 Sam. 16:23) Lipina za naa ñozi muopeli ya naa saba Mulimu yo, li bile za butokwa ku to fita ni la kacenu le. Ha mu nahanisise taba ye latelela. Hamulaho wa lilimo ze fitelela 3,000 ku zwa fa naa pepezwi Davida, batu ba bañata-ñata kacenu ba ba mwa miinelo ye fapana-fapana ili ba ba pila mwa libaka ze shutana-shutana mwa lifasi, ba balanga lisamu za Davida kuli ba kone ku omba-ombiwa ni ku fumana sepo.—2 Makol. 7:6; mu bale Samu 34:7, 8; 139:2-8; Amo. 6:5.

Lipina ki za Butokwa Mwa Bulapeli Bwa Niti

3, 4. Ki litukiso lifi ze ne ezizwe mwa miteñi ya Davida za ku opelanga lipina mwa bulapeli bwa niti?

³ Davida naa na ni buikoneli mi naa itusisize bona kwa ku eza nto ya butokwa—ili ku kanyisa Jehova. Davida ha sa bile mulena wa Isilaele, naa lukisize kuli ku opelwange lipina ze munati ka nako ya lisebelezo za kwa tabernakele. Mwahalaa Malivi kaufela be ne ba sebelezanga mwa tempele, ne ku ketilwe Malivi ba 4,000 be ne ba filwe musebezi wa “ku lumbeka,” mi ba 288 “ne ba itutile ku opelela Muñaa Bupilo, kikuli likwala kaufela za ku opela.”—1 Makol. 23:3, 5; 25:7.

⁴ Lipina ze ñata ze ne opelwanga ni ku lizwa ki Malivi ne li ñozwi ki Davida. Ku bonahala kuli Maisilaele be ne ba fumanehanga ka nako ye ne ku opelwanga lipina za Davida ne ba susumezwanga ki manzwi a zona. Aleka ya bulikani ha se i tisizwe mwa Jerusalema, “Davida a bulelela manduna a Malivi kuli ba beye mwa musebezi batu ba ba ka opela, nze ba na ni liopeliso ze lizwa, kikuli tumbuli ni liharepa ni likambeliso, kuli ba lize ka maata, mi ba tiise kwa manzwi, ku opela ka tabo.”—1 Makol. 15:16.

5, 6. (a) Ki kabakalañi lipina ha ne li li za butokwa mwa puso ya Davida? (b) Lu ziba cwañi kuli lipina ne li ngiwa ku ba za butokwa mwa bulapeli bwa mwa Isilaele wa ikale?

⁵ Ki kabakalañi lipina ha ne li li za butokwa mwa miteñi ya Davida? Kana ne li ka libaka feela la kuli mulena ne li muopeli? Batili. Ku na ni libaka le liñwi le ne li bonahezi hamulaho wa lilimo-limo muta Mulena Ezekiasi naa kalisize sinca lisebelezo za mwa tempele. Kwa 2 Makolonika 29:25, lu bala kuli: “[Ezekiasi] a beya Malivi mwa Ndu ya Muñaa Bupilo, nze ba sweli likambeliso, ni tumbuli, ni liharepa, mwa naa laelezi Davida, ni Gadi muboni wa mulena, ni mupolofita Natani. Kakuli taelo ne zwile ku Muñaa Bupilo ka bapolofita.”

⁶ Kaniti Jehova, ka ku itusisa bapolofita ba hae, naa laezi balapeli ba hae kuli ba mu lumbekange ka lipina. Mane baopeli ne ba lukuluzwi kwa misebezi ye ne ba tokwa ku eza Malivi ba bañwi ilikuli ba bange ni nako ye likani ya ku ñola lipina ze nca mi mwendi ni ku itukisezanga zona.—1 Makol. 9:33.

7, 8. Ha lu opela lipina za luna za Mubuso, ki nto mañi ya butokwa hahulu ku fita ku ba ni bukwala kwa ku opela?

⁷ Mu kana mwa li: “Na ha ni koni ku opela sina likwala zeo ze ne opelanga kwa tabernakele!” Kono ne si baopeli kaufela ba Malivi be ne ba li likwala. Liñolo la 1 Makolonika 25:8 li bonisa kuli ne ku na ni be ne ba sa “lutiwa.” Hape lu swanela ku lemuha kuli mwendi ne ku na ni baopeli be ne ba cuukile hahulu mwa masika a mañwi a Isilaele, kono Jehova naa file Malivi musebezi wa ku opela. Lwa kona ku ba ni buikolwiso bwa kuli ku si na taba kuli ne ku na ni ‘be ne ba luta ba bañwi’ ni ‘be ne ba lutiwa,’ Malivi kaufela be ne ba sepahala ne ba ikatalize ku peta musebezi o ne ba filwe.

⁸ Davida naa lata lipina mi naa li sikwala. Kono kana bukwala ki bona feela bwa  butokwa ku Mulimu? Paulusi naa ñozi cwana kwa liñolo la Makolose 3:23: “Se mu eza kaufela, mu si eze ka pilu [kaufela], inge mu ezeza Mulena isi batu.” Taba ye lu ituta kwa liñolo leo ki ye: Nto ya butokwa ki ya kuli lu opelange “ka pilu” kaufela ha lu lumbeka Jehova.

Mo ne li Itusisezwanga Lipina Hamulaho wa Miteñi ya Davida

9. Ha mu taluse ze ne mu ka bona ni ku utwa kambe ne mu fumanehile kwa kakulo ya tempele ka nako ya puso ya Salumoni.

⁹ Mwa puso ya Salumoni, lipina ne li itusiswanga hahulu mwa bulapeli bo bu kenile. Ka nako ye ne i kakulwa tempele, ne ku na ni sikwata sa balizi, mi mwahalaa bona ne ku na ni ba 120 be ne ba lizanga litolombita. (Mu bale 2 Makolonika 5:12.) Bibele i lu bulelela kuli “ba ba liza [be ne ba li baprisita kaufelaa bona] ni ba ba opela, ha ba se ba kopanya manzwi cwalo, ne ku utwahala ike linzwi la mutu a li muñwi le li lumbeka ni ku loka Muñaa Bupilo . . . kakuli u na ni musa; kakuli sishemo sa hae ki sa kamita.” Mulumo wa lipina ha u se u kambami kwahalimu, “ndu ya tala lilu,” ili ku bonisa kuli Jehova naa tabezi lipina zeo. Kaniti, ne li nto ye nyakalalisa ni ye makaza ku utwa mulumo wa litolombita zeo kaufela ni mulumo wa baopeli ba ba eza likiti-kiti inze ba sholoka hamoho sina mutu a li muñwi!—2 Makol. 5:13.

10, 11. Ki nto mañi ye bonisa kuli Bakreste ba pili ne ba opelanga lipina mwa bulapeli?

¹⁰ Bakreste ba pili ni bona ne ba opelanga lipina mwa bulapeli. Balapeli ba mwa miteñi ya baapositola ne ba sa kopanelangi mwa litende kamba litempele, kono ne ba kopanelanga mwa mandu a batu. Nihaike kuli ne ba nyandiswa mi ne ba talimana ni butata bo bu shutana-shutana, Bakreste bao ne ba lumbekanga Mulimu ka lipina.

¹¹ Muapositola Paulusi naa susuelize mizwale ba hae ba mwa Kolose be ne ba li Bakreste kuli: ‘Mu kutazane ka lisamu, ka milumbeko, ni ka lipina za moya, mu nze mu opelela Mulimu ka buitumelo.’ (Makolo. 3:16) Paulusi ni Silasi ha se ba lengilwe mwa tolongo, ba ba ni “milapelo, mi ne ba opelela Mulimu lipina” nihaike kuli ne ba si na buka ya lipina. (Lik. 16:25) Ha ne mu ka nepelwa mwa tolongo, ki lipina ze kai za Mubuso ze ne mu ka kona ku opela mwa toho?

12. Lu kona ku bonisa cwañi kuli lu nga lipina za luna za Mubuso kuli ki za butokwa?

¹² Bakeñisa kuli lipina ki za butokwa mwa bulapeli bwa luna, lu swanela ku ipuza kuli: ‘Kana ni nga lipina za Mubuso kuli ki za butokwa? Kana na ikatazanga ku itahanela kwa mikopano ya puteho, ya mipotoloho, ni ya likiliti kuli ni yo opela hamoho ni mizwale ni likaizeli ba ka pina ya ku kwalula ni ku opela ka mafulofulo? Kana na susuezanga bana ba ka kuli ba zibe kuli nako ya ku opela pina mwa Mukopano wa Sebelezo hamulaho wa Sikolo sa Bukombwa sa Teokratiki kamba hamulaho wa ngambolo ya nyangela, haki nako ya kuli ba yange fande ku yo ikotolola?’ Ku opela ki kalulo ya bulapeli bwa luna. Kaniti ku si na taba kuli lu “likwala” kamba lu sa ‘ituta,’ kaufelaa luna lwa kona ku opela ni ku swalisana hamoho mwa ku lumbeka Jehova, mi lwa swanela ku eza cwalo.—Mu bapanye 2 Makorinte 8:12.

Ze lu Tokwa za Cincanga Nako ha I Nze I Ya

13, 14. Ki kabakalañi ha ku li kwa butokwa ku opela ka pilu kaufela ha lu li kwa mikopano? Mu fe mutala.

¹³ Lilimo ze fitelela 100 kwamulaho, magazini ya Zion’s Watch Tower ne i talusize le liñwi la mabaka lipina za luna za Mubuso ha li li za butokwa. Ne i ize: “Ku opela ka za niti ki ye ñwi ya linzila ze nde ze tusa kuli niti i be mwa minahano ni lipilu za batu ba Mulimu.” Manzwi a lipina za luna a mañata a tomile fa litimana za mwa Mañolo. Kacwalo ku ituta feela nihaiba manzwi a lipina li sikai ku kona ku ba nzila ye nde hahulu ye kona ku tahisa kuli niti i tome mibisi mwa lipilu za luna.  Hañata, batu ba ba fumanehanga lwa pili kwa mikopano ya luna, ba susumezwanga hahulu ki muopelelo o munde wa puteho.

¹⁴ Manzibwana a mañwi ka silimo sa 1869, bo C. T. Russell ne ba utwile manzwi a batu be ne ba opela ku zwelela mwa muyaho o muñwi ha ne ba kutela kwa ndu ku zwa kwa musebezi. Ka nako yeo ya mwa bupilo bwa bona, ne ba ikolwisize kuli ha ba na ku fumana niti ka za Mulimu. Kacwalo ne ba ikatulezi ku zwisezapili pisinisi ya bona ka ku hupula kuli ha ne ba ka fumana mali, ne ba ka kona ku tusa batu ku fumana za ku ipilisa ka zona nihaike kuli ne ba sa koni ku ba tusa ku ituta niti ka za Mulimu. Muzwale Russell a kena mwa muyaho wo, o no tezi masila mi a fumana batu be ne ba eza lisebelezo za bulapeli. A ina fafasi ni ku teeleza. Hasamulaho, naa ñozi kuli litaba za naa utwile busihu bo ni tuso ya naa mu file Mulimu, ‘ne li mu tusize ku tiisa tumelo ya hae ye ne fokozi ya kuli Bibele i tahile ka moya wa Mulimu.’ Mu lemuhe kuli ku opela kwa batu ki kona ku ne ku tisize kuli Muzwale Russell a ye kwa mukopano wo.

15. Ki kabakalañi buka ya lipina ye nca ha ne i tokwahala?

¹⁵ Nako ha i nze i ya, kutwisiso ya luna ya Mañolo ya bolosolwanga. Liñolo la Liproverbia 4:18 li bulela kuli: “Nzila ya ba ba lukile i swana sina liseli la lizazi, le li ya li ekezeha, mane ku yo fita fa musihali o mutuna.” Liseli ha li ekezehanga li tahisanga kuli manzwi e lu “opela ka za niti” a cinciwe. Ka lilimo ze 25 ze felile, Lipaki za Jehova mwa linaha ze ñata ba ikozi ku itusisa buka ya lipina ya Mu Opelele Jehova Milumbeko. * Ku zwa ka nako ye ne i hatiselizwe buka yeo lwa pili, liseli ne li nze li ekezeha mwa litaba ze ñata, mi ze ñwi za lipulelo ze ñozwi mwa buka ya lipina yeo ha li sa lumelelana ni kutwisiso ya luna ya cwale. Kaniti, buka ya lipina ye nca ne i tokwa ku lukiswa kuli litaba ze ku yona li zamaelele ni litaba ze lu itutile mwa Mañolo.

16. Buka ya luna ya lipina ye nca, i ka lu tusa cwañi ku latelela kelezo ya Paulusi ye kwa Maefese 5:19?

¹⁶ Ka mabaka ao ni mabaka a mañwi, Sitopa se si Etelela ne si lumelelize kuli buka ya lipina ye nca ya Mu Opelele Jehova i hatiswe. Palo ya lipina ze mwa buka ye nca yeo li kusufalizwe ku to fita fa 135. Kabakala kuli lipina ze mwa buka ya luna yeo ki ze nyinyani, lwa kona ku peta manzwi a ze ñwi za lipina ze nca zeo. Mi nto yeo i lumelelana ni kelezo ya Paulusi ye ñozwi kwa Maefese 5:19, ye li: ‘Mu ikambolele ka lisamu ni ka lipina ni ka lifela za moya, mu nze mu opela ni ku lumbeka Mulena ka lipilu za mina.’

Mwa Kona ku Bonisa Buitumelo

17. Ki lika mañi ze kona ku lu tusa kuli lu si ke lwa tuhelela maswabi a luna ku lu palelwisa ku opela hamoho ni puteho?

¹⁷ Kana lwa swanela ku palelwa ku opela lipina za luna kwa mikopano ya Sikreste  kabakala ku utwa maswabi? Mu nyakisise taba ye: Kana haki niti kuli “kaufela lu fosa mwa linto ze ñata,” inge cwalo ku ze lu bulela? (Jak. 3:2) Kono ku sa petahala kwa luna mwa lipulelo ha ku lu palelwisi ku lumbeka Jehova fa ndu ni ndu. Kacwalo, kana lwa swanela ku palelwa ku lumbeka Mulimu ka lipina kabakala kuli ha lu na manzwi a mande a ku opela? Jehova, yena “ya ezize mulomo wa mutu,” wa tabela ku teeleza ha lu mu lumbeka ka manzwi a luna.—Ex. 4:11.

18. Ki nto mañi ye tusize mizwale ni likaizeli ku ituta mulilelo wa lipina ze nca?

¹⁸ Matapa a ñozwi kuli Sing to Jehovah—Piano Accompaniment a tusize mizwale ni likaizeli ba bañata ku ituta lipina ze nca. Ku teeleza kwa lipina ki nto ye tabisa luli. Haiba mu teelezanga kwa lipina ze nca zeo ha mu li kwa ndu ni ku latelela mwa buka ya mina ya lipina, mu ka ituta mulilelo wa zona mi mu ka kona ku li opela ha mu li kwa Ndu ya Mubuso.

19. Ki lika mañi ze eziwanga kuli lipina za luna za Mubuso li konwe ku lukiswa?

¹⁹ Ku bunolo ku keshebisa lipina ze lizwanga kwa mikopano ya luna ya lizazi le li ipitezi, ya mipotoloho, ni ya likiliti. Ku ezwanga buikatazo bo butuna kuli lipina zeo li konwe ku lukiswa. Lipina ha se li ketilwe, li swanelwa ku ñolwa hande ka tokomela kuli sitopa sa Watchtower sa balizi ba 64 si kone ku liza lipina zeo. Ku zwa fo, balizi ba tandanga lihola ze ñata ku nyakisisa lipina zeo ze ba ka itukiseza ni ku li liza kwa mastudio a luna a kwa Patterson, ili mwa New York. Ba ba lishumi kwa mizwale ni likaizeli bao ha ba pili mwa United States. Mizwale ni likaizeli bao kaufela ba ikutwanga kuli ki tohonolo ku liza lipina ze itusiswanga kwa mikopano ya luna. Lwa kona ku bonisa buitumelo kwa buikatazo bo ba ezize ka lilato. Muina-situlo ha lu mema kuli lu ine ni ku teeleza inze lu kuzize kwa lipina zeo ze lukisizwe ka lilato ha lu li kwa mikopano ya luna ya mipotoloho ni ya likiliti, haike lu ezange cwalo.

20. Ki nto mañi ye mu ka tiiseza ku eza?

²⁰ Jehova wa teelezanga kwa lipina za luna za milumbeko. U li nga kuli ki za butokwa. Lwa kona ku tabisa pilu ya hae ka ku opelanga ka lipilu za luna kaufela ka nako ni nako ye lu kopana kuli lu mu lapele. Kaniti, ku si na taba kuli lu likwala kamba lu ba ba ituta, lu ‘opelele Jehova.’—Samu 104:33.

[Litaluso za kwatasi]

Mu Hupula Cwañi?

• Ki mitala ifi ya mwa Bibele ye bonisa kuli lipina ki za butokwa mwa bulapeli bwa luna?

• Ki swalisano ifi ye mu bona kuli i teñi mwahalaa ku utwa manzwi a Jesu a kwa Mateu 22:37 ni ku opela lipina za Mubuso ka pilu kaufela?

• Ki lifi linzila ze ñwi ze lu kona ku bonisa ka zona buitumelo kwa lipina za luna za Mubuso?

[Lipuzo za Tuto]

[Siswaniso se si fa likepe 23]

Kana mwa hanisanga bana ba mina ku zwela-zwelanga fande ka nako ya pina?

[Siswaniso se si fa likepe 24]

Kana mwa itutanga manzwi a lipina za luna ze nca ha mu li kwa ndu?