Mwimbilenu Yehova!
Mwimbilenu Yehova!
“Nukuseñaña Nzambi yami neyi hinichidi hohu.”—MAS. 146:2.
1. Yumanyi yamusañumwini mukwenzi Davidi kwimba masamu indi amakwawu?
MUMAFUKU awukwenzi windi, Davidi wazatileña maora amavulu mumasaña kwakwihi naBetelemi nakubiña nyikoku yawatata yindi. Chabiñileñayi nyikoku, Davidi wamweneña nyidimu yaYehova yayiwahi yaleñayi: tutumbwa twamwiwulu, ‘anyama amumpata,’ “niatujila ahaluzwizu.” Yuma yamweniyi yamuhizumwishili chikupu chakwila watachikili nikwimba tumina twakuzañalesha twakumushimeka nachu Nleñi waleñeli iyi yuma yakuhayamisha. Tumina twatuvulu twembiliyi Davidi atusoneka mumukanda waMasamu. *—Tañenu Masamu 8:3, 4, 7-9.
2. (a) Tumina twakwashaña ñahi muntu? Shimunenu chakutalilahu. (b) Chumanyi chitukudizila kuwubwambu waDavidi naYehova haMasamu 34:7, 8 niMasamu 139:2-8?
2 Hadaha iyi diyi mpinji yaswejeliyi Davidi kukuluka yitembi mukwimba. Wakulukili yitembi chikupu, chakwila, Mwanta Sawulu wamutambikili nindi yamwimbileña kadada. (Yish. 22:29) Tumina twembileñayi Davidi twawundishileña muchima wamwanta wadiña muyihuñu, neyi chochitwawundishaña nyichima yawantu makonu. Mpinji yejima yembileñayi Davidi hachisanji, ‘Sawulu yotiya nihi-i yokola nikukola spiritu yatama yimufuma nikumufuma.’ (1 Sam. 16:23) Tumina twembileñayi iwu ñimbi nawa nsoneki wamutiyileña Nzambi woma tuchidi twalema nimakonu. Toñojokenu! Makonu, munahiti yaaka yakubadika 3,000 kufuma havwalikiliyi Davidi, antu amavulu mumatuña ejima adi nakukala kwashiyashana nawa atañaña masamu asonekeliyi Davidi kulonda adikundejeña nikuchiñeja.—2 Kushi. 7:6; tañenu Masamu 34:7, 8; 139:2-8; Amosa 6:5.
Tumina Twalema Nankashi Mukudifukula Kwalala
3, 4. Indi ntanjikilu yakwimba tumina twajila mumafuku aDavidi yadiña ñahi?
3 Davidi wadiña nachawana chakwimba, nawa wachizatishili munjila yayiwahi, yakumuhameka Yehova. Chekalililiyi mwanta wawaIsarela, Davidi waloñesheli nindi tumina twatuwahi twikaleña hakachi kanyidimu yelileñawu hatabanaka. Alevi ejima akalakeleña nyidimu yahatembeli, antu akushika ku 4,000, ayinkeli mudimu ‘wakuhameka’ nawa añimbi 288 “afundishiluwu kumwimbila Yehova wowu ejima eluka nankashi kwimba.”—1 Kushi. 23:3, 5; 25:7.
4 Davidi wasonekeli tumina twatuvulu twembileñawu Alevi. A Isarela ejima adiña nakukooleka kwakwikalaku hampinji yembileñawu masamu aDavidi, atela ahizumukileña chikupu namasamu atiyileñawu. Chimwahitili mpinji, chaleteluwu chimbañu chachitiyañenu kuYerusalema, “Davidi hakuhosha nawakulumpi awaLevi nindi, Kunjikenu ana kwenu akwakwimba nayuma yakwimba nachu, niyisanji, nitudada, nimachakayi, mudimu wakwimba chakola nakutwala izu dawu kwiwulu namuzañalu.”—1 Kushi. 15:16.
5, 6. (a) Muloñadi antu chashililuwu maana kukwimba tumina mumafuku aDavidi? (b) Tuneluki ñahi netu tumina twadiña twalema nankashi mukudifukula muIsarela wakushankulu?
5 Muloñadi antu chashililuwu maana kukwimba tumina mumafuku aDavidi? Indi kwiji muloña wakwila mwanta wadiña mukwakwimba tumina? Inehi, kwadiña chuma chikwawu chaleñeleli, chenjili nakushimunawu henohu mwahita dehi yaaka yayivulu hampinji yatachikiliyi cheñi Mwanta Hezekiya waloña nyidimu yahatembeli. Hamukanda wa 2 Kushindulula 29:25, twatañañahu netu: Hezekiya “hakusha aLevi mwitala daYehova namachikayi, nayisanji, natudada, mwomwayilejeliyi Davidi, nimukwakumona wamwanta Gadi, nikaprofwetu Natani; muloña Yehova wayilejeli kutunwa twawatuprofwetu twindi.”
6 Eñañi, kuhitila mudi atuprofwetu twindi, Yehova walejeli akwakudifukula indi kumuhameka natumina. Akakwimba amuyisaka yawatupristu ayilekesheli nikuzata nyidimu yazatileñawu Alevi amakwawu kulonda ekaleña nampinji yeneni yakusoneka tumina, sweje-e dinu, yakuhitulukamu.—1 Kushi. 9:33.
7, 8. Chumanyi chasweja kulema hakwimba tumina twaWanta chinabadiki hakwiluka kwimba?
7 Hadaha munateli kuhosha nenu, “Ami hinateli kwikala hakachi kawañimbi akuluka yitembi embileña chiwahi hatabanakaku!” Ilaña bayi neyi Alevi ejima adiña añimbi akuluka yitembuku. Kwesekeja nansona ya 1 Kushindulula 25:8, hakachi kawu hadiña ‘nialejeleñawu.’ Twatela kwiluka cheñi netu kwadiña añimbi elukishili kwimba chikupu niañimbi amakwawu afumini munyitaña yawaIsarela, ilaña Yehova wayinkeli Alevi mudimu wakwimba tumina. Tuneluki netu hela chakwila amakwawu adiña ‘akuluka yitembi’ hela ‘alejeleñawu,’ Alevi ejima ashinshika azatileña mudimu wayinkeluwu nañovu yawu yejima.
8 Davidi wakeñeli tumina nawa wadiña welukisha kwimba. Komana kwikala nachawaana dichuma chalema kudi Nzambi? HaMasamu 33:3, Davidi wasonekeli nindi: ‘Imbenu chachiwahi nakuvumisha chacheni.’ Chikuma chinatiyakani: Chuma chalema ‘yowu kwimba chachiwahi’ hakumushimeka Yehova.
Kwimba Tumina Hanyima Yakufwa kwaDavidi
9. Lumbululenu yuma yimwadi kumona nikutiya neyi mwayili kuchidika chakuhana hatembeli muchiyuulu chaSolomoni.
9 Muchiyuulu chaSolomoni, tumina twadiñi nakuzata mudimu weneni hakudifukula kwalala. Hakuhana tembeli, kwadiñi izanvu dawañimbi embileña chiwahi, nizanvu dawañimbi akweti yisanji nkawawu mwadiñi jimpuña 120. (Tañenu 2 Kushindulula 5:12.) Bayibolu yahoshaña nawu “akwakwimba mpuña [wonsu wawu adiñi atupristu] niakwakwimba tumina anayi dehi mumu hiyakuvwakuka nezu dimu nakutiyakana nakumuhameka nakumusakilila Yehova, . . . nawu, Himuwahi, luwi lwindi lwahaya nyaka.” Chelili anatwali dehi mazu awu hamu hewulu, “itala hidikwinzala nevu,” dikwila nawu Yehova watiyili kuwaha. O kuwaha nimuzañalu watiyileñawu hakutiya kuvuma kwampuña hamu nawakwakwimba amavulu adiña nakuvwakukila hamu!—2 Kushi. 5:13.
10, 11. Chumanyi chinakumwekesha nawu akwaKristu akusambila embileña tumina hakudifukula?
10 Tumina atuzatishileña cheñi hakudifukula kudi akwaKristu akusambila. Ilaña, akwakudifukula amuyaaka nkulakaji yakusambila, ahumañeneña mumatala awantu bayi neyi mutabanaka hela mutembeluku. Hamuloña wakuyikabisha nikukala kukwawu, kakavulu maluña kwahumañeneneñawu hiyadiña maluña amawahiku. Hela chochu, awa akwaKristu amuhamekeleña Nzambi natumina.
11 Kapostolu Pawulu wakonkomweneni amana kwindi akwaKristu muKolose nindi: “Mudikonkomwenaña muntu namukwawu namasamu, natumina, nitumina twawuspiritu, nakumwimbila Nzambi naluwi.” (Kol. 3:16) Chelili aPawulu niSilasi anayishi dehi mukaleya, atachikili “kulomba nakumwimbila Nzambi tumina,” hela chakwila hiyadiña namukanda wakamina kakwimbamuku. (Yil. 16:25) Neyi ayikasa mukaleya, tumina tuñahi twaWanta tumwatela kwimbila kumutu?
12. Tunateli kumwekesha ñahi netu twalemesha tumina twetu twaWanta?
12 Chineli tumina twalema nankashi hakudifukula, twatela kudihula netu: ‘Komana nalemesha chikupu tumina? Komana nashikaña swayi kukupompa kwachipompelu, kweneni, nikupompa kwankambi nakwimbila hamu nawamana kwetu niahela kamina kakwenzunwina, nikwimba namuzañalu waweni? Komana nalejaña anyanami nami bayi amoneña mpinji yakwimba kamina neyi tunamanishi dehi Shikola yaMudimu waTeokalatiki nakutachika Kupompa kwaMudimu hela neyi tunamanishi dehi mpanji yawantu amavulu hitukutachika Kudiza Kaposhi Kakutalila neyi himpinji yakunookaku, hela mpinji yakwimajala, nakolojola nyendu hanziku?’ Kwimba himbadi yakudifukula kwetu. Eñañi, hela ‘twakuluka yitembi’ hela ‘anakutudizisha,’ wonsu wetu twatela kwimbila hamu nakumushimeka Yehova.—Esekejenu 2 Akorinda 8:12.
Yuma Yitwakeñaña Yahimpikaña Mukuhita Kwampinji
13, 14. Indi kwimba namuzañalu kwalema ñahi hakupompa kwachipompelu? Lumbululenu.
13 Yaaka yakubadika ha 100 yinahituhu, magazini yaZion’s Watch Tower yalumbulwili chikuma chimu chaleñelaña tumina twetu twaWanta twikali twalema nankashi. Yahosheli nawu: “Kwimba nsañu yalala hinjila yayiwahi yakuhembelamu chalala muyitoñojoka nimunyichima yawantu jaNzambi.” Mazu adi mutumina twetu ashindamena hamazu amuNsona, dichi neyi twiluka mazu adi mutumina tukwawu yinateli kwikala njila yayiwahi yakuhembelamu chalala munkelelu yanyichima yetu. Antu amavulu enzaña kukupompa kwetu katachi ahizumukaña chikupu natumina tutwembaña muchipompelu.
14 Ifuku dimu namelela mu 1869, hampinji yafumineñayi kumudimu C. T. Russell watiyili antu anakwimba mwitala daheshina. Haniyi mpinji, welukili nindi hamba kamwiluka Nzambi chikupuku. Dichi wafuukwiluhu kusha maana kumudimu windi wakulanda nakulandulula, watoñojokeleña nindi neyi yekala namali, wakakwashaña atuzweñi hela chakwila hakutwesha kuyikwasha kuspirituku. Mana kwetu Russell weñilili munidi itala mwadiña majilu nimwidima nawa wawanini akwansakililu anakupompa. Washakamini nakutiyilila. Nkumininaku wasonekeli nindi yuma yatiyiliyi hawuna wufuku “yadiña yashikila, nawukwashu waNzambi, yakolesheli cheñi chikuhwelelu chindi chazeyeli chakañenyeña kukuhwelela nindi Bayibolu ayonena kudi Nzambi.” Kwimba dikwamukokweli Mana kwetu Russell nakwiñila mwapompeleleñawu.
15. Kuhimpikanyi kwakutiyisha chahosha nsona kunaleteshi mukanda wetu wakamina awusoneki chachiha?
15 Mukuhita kwampinji, tunakutiyisha chahosha Nsona. Mukanda waYishimu 4:18 wahosha nawu: “Hakwila njila yawantu aloña yidi neyi mwaana wahakucha, wayaña nakutooka nichikushika itañwa mwiwulu.” Kutoñeka kwachejeji kunakuleñela tuhimpeña njila ‘yitwembilañamu nsañu yalala.’ Hadi yaaka 25 yinahituhu, aYinsahu jaYehova mumatuña amavulu azatishileña mukanda wakamina kadiña namutu wahosheleña nawu Imbenu Nakumuhameka Yehova. * Dichi hayaaka yinahituhu kufuma hedishiluwu iwu mukanda katachi, chejeji chinatwalekuhu nakutoñekela hansañu jajivulu, nawa mazu amakwawu itwazatishileña mumukanda wakamina twaleka dehi kuyizatisha. Chakutalilahu, twaleka dehi kuhosha netu “chiyuulu chachiha” ilaña twahoshaña netu “ituña dadiha.” Nawa ichi tunakuhosha netu ijina daYehova “akadilemesha,” bayi neyi “akadiyiñishaku.” Mwalala, kwesekeja nachalala, dichinaleñeli mukanda wetu wakamina awusoneki chachiha.
16. Indi mukanda wetu wakamina wamuha wukutukwasha ñahi kulondela kufumba kwaPawulu kwekala haAefwesesa 5:19?
16 Hamuloña wayumiyi niyuma yikwawu, Izaza Dalombolaña detejeli kusoneka mukanda wakamina wawuha wudi namutu wunakwila nawu Mwimbilenu Yehova. Muniwu mukanda wawuha mudi tumina 135. Chineli mudi tumina twantesha tutwatela kudiza, twatela kuhembela mazu adi mutumina tukwawu twatuha kunyitu. Iyi nsañu yinesekani nakufumba kwaPawulu kwasonekawu haAefwesesa 5:19.—Tañenu.
Munateli Kumwekesha Kusakilila
17. Chumanyi chikutukwashaku kulonda tubuleña kutiya nsonyi hakwimba muchipompelu?
17 Komana twatela kukañanya kwimba nañovu hakupompa kwawakwaKristu netu tukutiya nsonyi? Toñojokenuhu muniyi njila: Munhoshelu yetu, komana ‘hitwaluwaña muyuma yayivuluku’? (Yak. 3:2) Ilaña, twatwalekañahu nakumuhameka Yehova kwitala nikwitala hela chakwila twaluwañeshaña mukuhosha. Hela chakwila mazu ajonjela hakwimba hitwatela kuleka kumuhameka Nzambi mutuminaku. Yehova, “wamwinkeli muntu kanwa,” watiyaña kuwaha hakutiya chitwembaña nakumuhameka.—Kwid. 4:11.
18. Shimunenu njila jimwatela kulondela hakudiza mazu adi mutumina.
18 Mumadimi amavulu anatuñi ma CD atumina tukweti mutu wunakwila nawu Mwimbilenu Yehova—Mumazu. Hanawa ma CD hadi tumina tunembuwu chachiwahi nayisanji nimumazu. Mukudiluñisha nankashi hakutiyilila kunitu tumina. Ikalenu nampinji yakutiyilila kunitu tumina; chikuyikwashaku kudiza swayi mazu adi mutumina tukwawu twatuha. Mazu adi mutumina twatuvulu anayisoneki munjila yakwila chimwemba musululu watachi, munateli kwiluka mazu akulondelahu. Hakuvumisha ma CD, mwatela kwimba nakulondejamu. Neyi kwitala mudiza mazu nawa mwiluka chinakuvuma tumina, mukwimbaña namuzañalu Mwitala daWanta.
19. Njilanyi jalondelañawu hakuloñesha tumina twaWanta twakadi mazu?
19 Chekala chaswayi kudiwula tumina twakadi mazu tutwembaña hamafuku akupompa kwadimena, kupompa kwañinza, nihakupompa kwankambi. Ilaña amana kwetu azataña nañovu chikupu hakuloñesha itu tumina. Chatondawu tumina tukwimbawu, akusoneka chachiwahi mwakuvumishilawu yisanji hakwila añimbi 64 awaWatchtower embi nayisanji. Kuhiñahu añimbi ombaña mpinji yeneni yakuhituluka mutumina tukudizawu nawa nkumininaku akukwataña mazu mumatala etu mwakwatilañawu mazu mumusumba waPatterson, New York. Amana kwetu niahela ikumi ashakamaña muUnited States wanyi. Ilaña wonsu wawu amonaña nawu hikukooleka kweneni hakwimba itu tumina twatuwahi twakuzatisha hakupompa. Anetu nawa twatela kwikala namuchima wakusakilila hanyidimu yadikitañawu. Dichi neyi cheyamani wahakupompa kwanyanya hela kweneni yatuleja nindi tutiyililenu kutumina, twatela kushakama swayi-swayi nakutiyilila kutumina tunatuloñesheluwu chachiwahi chakadi kuleta ipumba.
20. Chumanyi chimunafuukuluhu kwila?
20 Yehova watiyaña chitwamwimbilaña tumina nakumuhameka. Tumina twalema kumesu indi. Tunateli kuzañalesha muchima windi kuhitila mukwimba nañovu namuchima wejima neyi tunenzi nakudifukula. Eñañi, hela chakwila twakuluka yitembi hela tudi atudizi, twatela ‘kumwimbila Yehova’!—Mas. 104:33.
[Tumazu twaheshina]
^ Chimwahitili yaaka nkulakaji ikumi kufuma hafwiliyi Davidi, añelu amavulu ashimwini kuvwalika kwaMesiya kudi atubiña abiñileña nyikoku yawu mumasaña kwakwihi naBetelemi.—Luka 2:4, 8, 13, 14.
^ Tumina twejima twadiña muniwu mukanda twadiña 225 mumadimi 100.
Munatoñojokuhu Nenudi?
• Yakutalilahwinyi yakunyima yamwekeshaña nawu tumina twekala twalema nankashi mukudifukula kwetu?
• Kunuñañananyi kumwamonaña hakwovwahila lushimbi lwaYesu lwasonekawu haMatewu 22:37 nakwimba namuchima wejima tumina twaWanta?
• Munjilanyi mutwatela kumwekeshela kusakilila hatumina twetu twaWanta?
[Malwihu aKuzatisha haKudiza]
[Mwevulu wudi hefu 23]
Komana mwakaanishaña anyanenu kwideka hampinji yakwimba kamina?
[Mwevulu wudi hefu 24]
Komana mwadizaña mazu amutumina twetu twatuha kwitala?