Jehova Chawimawiin Hla Sa Rawh!
Jehova Chawimawiin Hla Sa Rawh!
“Ka dam chhûng zawngin LALPA chu ka fak ang.”—SAM 146:2.
1. Engin nge tleirâwl Davida chu fakna hlate phuah tûra chêttîr?
DAVIDA chuan a tleirâwl laiin Bethlehem khaw kianga phûlah a pa berâmte vêngin hun tam tak a hmang a. Berâm a vên pah chuan Pathian Jehova thil siam ropui tak tak: arsi bawm chiai mai vân te, “ram sate,” leh “chunglêng sava” te chu a thlîr thei a ni. Chûng a thil hmuhte chuan a rilru an khawih êm avângin, hêng thil ropui takte Siamtu fakna hla mawi rilru la takte hi a phuah hial a. A hla phuah tam tak chu Bible-a Sâm-ah hian kan hmu thei a ni. *—Sâm 8:3, 4, 7-9 chhiar rawh.
2. (a) Rimawi chuan mi chungah eng nghawng nge a neih theih? Entîrna pe rawh. (b) Sâm 34:7, 8 leh Sâm 139:2-8 aṭang hian Jehova nêna Davida inlaichînna chungchâng eng nge kan zir theih?
2 Rimawi lama Davida thiamna chu berâm a vên laia a neih a nih ngei a rinawm. A lo thiam tâk êm avângin, Lal Saula tâna ṭingṭang kaihsak tûra sâwm a ni hial a ni. (Thuf. 22:29) Davida rimawi tum chuan tûn laia rimawi ṭhate ang bawkin lal rilru chu a thawi dam sawng sawng mai a. Davida’n rimawi a tumsak apiangin “Saula chu a lo harh a, a ṭha leh ṭhîn” a ni. (1 Sam. 16:23) He Pathian ṭih mi rimawi tum thiam leh hla phuah thiam tak hla phuahte hi tûn thlengin a la hlu reng a ni. Hei hi han ngaihtuah teh! Tûn lai, Davida pian hnu kum 3,000 chuangah pawh, khawvêl hmun hrang hrang leh mi chi hrang hrangte chuan thlamuanna leh beiseina an hmuh theih nân Davida fakna hlate chu an chhiar nawn fo ṭhîn a ni.—2 Chro. 7:6; Sâm 34:7, 8; 139:2-8 chhiar rawh; Amos. 6:5.
Biakna Dika Rimawi Hmun Chan Pawimawh Tak
3, 4. Davida hun laiin Pathian biakna rimawi tum dân tûr chungchâng ruahmanna eng nge siam a nih?
3 Davida chuan talent a nei ṭha a, chu chu kawng ṭha ber, Pathian Jehova chawimawi nân a hmang a ni. Israel lal a nih hnu chuan biak bûka rawngbâwlnaah rimawi nalh taka tum pawh a telh a. Biak in rawngbâwlnaa tel Levi-ho zînga hmun sâwma ṭhena hmun khat aia tam chu “LALPA faktu tûrte” atâna ruat an ni a, “LALPA tâna hla sak zir, thiamsa tawh” mi 288-te nên an vaiin 4,000 vêl an ni.—1 Chro. 23:3, 5; 25:7.
4 Levi-ho sak hla tam tak chu Davida phuah a ni a. Davida fakna hlate an sak laia awm ve thei Israel mi tupawh chu an thil ngaihthlâk chuan an rilru a khawih hle ngei ang. A hnua thuthlung bâwm Jerusalema lâk a nih khân, “Davidan Levi-ho puipate chu an unaute zînga mi hla sa mite, thil tum rîk mi perhkhuang te, ṭingṭang te, dârbenthek te nêna ring tak leh hlim taka hla sa tûrin a ruattîr” a ni.—1 Chro. 15:16.
5, 6. (a) Engvângin nge Davida lal laiin rimawi lam nasa taka ngaihsak a nih? (b) Hmân lai Israel rama Pathian biaknaah rimawiin hmun pawimawh tak a chang tih engtin nge kan hriat theih?
5 Engvângin nge Davida hun lai khân rimawi lam nasa taka ngaihsak a nih? Lalber chu rimawi tum mi a nih vâng em ni? Ni lo ve, ngaihsak chhan dang a awm a, chu chu kum zabi tam tak a liam hnu, Lal fel Hezekia’n biak ina rawngbâwlna a ṭan ṭhat leh khân a lo lang a ni. Chronicles pahnihna 29:25-ah heti hian kan chhiar: “[Hezekia chuan] Davida leh lal zâwlnei Gada leh zâwlnei Nathana thupêk angin LALPA inah chuan Levi-ho dârbenthek te, perhkhuang te, ṭingṭangte tum tûrin a dah a; thupêk chu a zâwlnei te hmanga LALPA pêk a ni si a,” tiin.
6 Ni e, Pathian Jehova chuan a zâwlneite kal tlangin amah betute chu hla leh rimawia amah chawimawi tûrin a hrilh a ni. Puithiam chi zînga hlasatute phei chu hla phuah leh zir nâna hun tam tâwk an neih theih nân Levia dangte thawh ṭhin hna dangte ata awltîr an ni hial a ni.—1 Chro. 9:33.
7, 8. Kan Lalram hlate sak chungchângah, thiamna aiin eng nge pawimawh zâwk?
7 Heti hian i ti mai thei, “Zai lamah hi chuan puan ina zai mi mithiamte zînga chhiar tel theih ka ni hauh lo vang!” tiin. Mahse, Levi-ho zawng zawng pawh zai thiam leh rimawi tum thiam an ni vek bîk lo. Chronicles pakhatna 25:18-in a sawi angin ‘zirtute’ pawh an awm ve a ni. Israel thlah dangte zîngah rimawi lam leh zai lam thiam tak tak an awm ve ngei ang tih chu chhinchhiah tlâk tak a ni a, mahse Jehova chuan rimawi lam khawih tûrin Levi-ho a ruat a ni. “Thiamsa tawh” an ni emaw, ‘zirtu’ an ni emaw pawh ni se, Levi-ho mi rinawm zawng zawngte chuan an hna chu rilru tak zetin an thawk ang tih kan ring tlat thei a ni.
8 Davida chuan rimawi a ngaina hle a, a thiam hle bawk. Mahse, chu thiamna ringawt chu em ni, Pathian tâna pawimawh chu? Sâm 33:3-ah Davida chuan heti hian a ziak a ni: “Thâwm nasa tak nên thiam takin tum rawh u,” tiin. A sawi tum chu a chiang hle: Jehova chawimawina kawnga a pawimawh ber chu ‘thiam tak,’ a nih loh leh theih tâwp chhuaha kan ti hi a ni.
Davida Hnua Rimawi Hman A Nih Dân
9. Solomona lal laia biak in hlannaah tel ve ni ta la, chuta i thil hmuh tûr leh hriat tûrte chu sawi rawh.
9 Solomona rorêl lai chuan, biakna thianghlimah rimawi chu nasa taka hman a ni a. Biak in hlannaah phei chuan rimawi ropui tak rem a tel a, chutah chuan hmuia hamrîk lam chi-ah ringawt pawh tawtawrâwt hâmtu 120 lai an awm a ni. (2 Chronicles 5:12 chhiar rawh.) Bible chuan “puithiamte zînga tawtawrâwt hâmtute leh hla satuten LALPA fakna leh lâwm thu sawi nâna an tum rîk chu ri khat ang maiin a hriat a, . . . ‘Ani chu a ṭha si a, a ngilneihna chu kumkhuain a awm dâwn a ni,’ tia LALPA an han fak” thu min hrilh a ni. Chu rimawi hlimawm tak chu tuma, an han zai veleh chuan Jehova pawmzia târ lan nân “in chu chhûmin a khat ta mup mup mai a.”—2 Chro. 5:13.
10, 11. Kristian hmasate’n hla leh rimawi an hmang a ni tih engin nge târ lang?
10 Kristian hmasate pawhin hla leh rimawi chu Pathian biaknaah an hmang bawk a. Anni chu biak bûk emaw, biak in (temple) emawah inkhâwm lovin, mi mal inah an inkhâwm ṭhîn ngei mai. Tihduhdahna leh thil dangte avângin, dinhmun ṭha lo tak hnuaiah an inhmu khâwm ṭhîn a. Chuti chung pawhin, Pathian fakna hlate chu an sa a ni.
11 Tirhkoh Paula chuan Kolossa khuaa awm a Kristian unaute chu: “Fakna hla te, Pathian hla te, thlarau lam hla tea inzirtîrin inzilh tawn ula, thinlungah khawngaihna neiin Pathian chu hla saksak rawh u,” tiin a fuih a. (Kol. 3:16) Paula leh Silate pawh tân ina khung an nih khân, hla bu nei lo mah se “Pathian hnênah an ṭawngṭai a, hla an sa” a ni. (Tirh. 16:25) Tân ina khung ni ta la, Lalram hla eng zât nge en lova i sak theih ang?
12. Kan Lalram hlate kan hlutzia engtin nge kan lantîr theih?
12 Hla leh rimawi hian biaknaah hmun pawimawh tak a chan avângin, heti hian kan inzâwt tûr a ni: ‘Ka hlut tûr ang takin ka hlut em? Inkhâwmna leh inkhâwmpuinaah te chuan unaute ruala a hawnna hla sa thei tûra thlen hma tum tlatin, rilru tak zetin ka zai em? Ka fate chu Theocratic Rawngbâwlna School leh Rawngbâwlna Inkhâwm inkâr emaw, vântlâng thusawi leh Vênnainsâng Zirna inkâr emawa hla sak hun chu rei lo te chhûng chawlh lawkna hun emaw, tho chhuaka han zîk mar vêlna hun emaw anga thlîr lo tûrin ka fuih em?’ tiin. Hla sak hi Pathian kan biakna pêng pakhat a ni. Ni e, “thiamsa tawh” kan ni emaw, ‘zirtu’ kan ni emaw ka vaiin Jehova fak nân aw kan chhuah rual theiin, kan chhuah rual tûr a ni bawk.—2 Korinth 8:12 nên khaikhin rawh.
Hun A Inthlâk Ang Zêlin Kan Mamawh A Inthlâk
13, 14. Kohhran inkhâwma thinlung tak zeta zaina hian hlutna eng nge a neih? Hrilhfiah rawh.
13 Kum 100 aia tam liam ta khân, Zion Watch Tower chuan kan Lalram hlate a pawimawh hle chhan a hrilhfiah a. Heti hian a sawi a ni: “Thutak ṭanchhana phuah hlate sak hi Pathian mite rilru leh thinlung thlen theihna kawng ṭha tak a ni,” tiin. Kan hla thu tam takte hian Bible châng a ṭanchhan a, chuvângin hla ṭhenkhat tal en lova sak theih chu thinlunga thutak sawh ngheh dân kawng ṭha tak a ni. A vawi khatna atâna rawn inkhâwmtu chu kohhrana thinlung leh tih tak zeta kan zaina hian a khawih hle ṭhîn a ni.
14 Kum 1869 tlai khat chu, C. T. Russell-a chuan a hnathawhna aṭanga a hâwn kawngah, in hnuai hall pakhat aṭanga zai thâwm chu a hria a. Chutih lai chuan, Pathian chungchâng thutak a hmuh chhuah theih a ring lo va. Chuvângin sumdâwnna lama inpêk tlat a tum tawh a; a ngaihtuah dân chuan sum tlêm azâwng a neih chuan mite chu thlarau lama a ṭanpui thei lo a nih pawhin tisa lamah tal a ṭanpui thei dâwn a ni. Unau Russell-a chu, chu in hnuai pik taka awm hall-ah chuan a va lût a, sakhaw lama inkhâwmna an lo nei tih a hmu chhuak a. Tichuan, va ṭhuin a ngaithla ta a. A hnuah chuan, chu mi tlaia a thu hriat chu “Pathian ṭanpuina zârah Bible hi thlarauva thâwk khum a nihzia a rinna sawh ngheh leh nân a ṭha tâwk a ni” tih a ziak a ni. Chu inkhâwma tel tûra Unau Russell-a hîptu chu an hla sak hi a ni tih chhinchhiah ang che.
15. Thutak hriatna lama siam ṭhatna eng hian nge hla bu siam ṭhat chu ngaihtîr?
15 Hun a liam zêl chuan Bible thute kan hriatna pawh siam ṭhat chhoh zêl a lo ni a. Thufingte 4:18 chuan: “Mi felte kawng erawh chu chhûn ên lai tak pawha êng zual deuh deuh, êng fîm tak ang a ni,” a ti. Chûng hriatna êng zual deuh deuhte avângin, ‘a saka kan sak thutak’ pawh chu siam ṭhat a lo ngai ta a. Kum 25 kal ta chhûng khân ram tam taka awm Jehova Thuhretute chuan Jehova Fakin Zai Rawh U * tih hla bu chu an lo hmang tawh a. Chu lehkhabu kan hman hnu chuan, thu tam tak chungchânga kan hriatna êng chu a êng zual deuh deuh va, chuvângin hla bu-a kan ṭawngkam hman ṭhenkhat chu thlâk a lo ngai ta a ni. Entîr nân, “kalhmang thar” ti tawh lovin, “khawvêl thar” tih kan hmang tawh zâwk a. Tin, Jehova hming tân “thiam chantîr” tih hmang tawh lovin, “tihthianghlim” tih kan hmang tawh zâwk bawk a ni. Thurin lam thil aṭanga thlîr chuan kan hla bu hi tûn lai hriatna nêna inmila siam a ngai a ni tih a chiang hle.
16. Engtin nge kan hla bu thar chuan Ephesi 5:19-a Paula fuihna zâwm tûrin min ṭanpui ang?
16 Hêng leh a chhan dangte avângin, Governing Body chuan Jehova Chawimawiin Hla Sa Rawh tih hla bu thar siam chu a remti a. Hla bu thar-ah chuan hla 55 chauh a awm a ni. Hla zir tûr kan neih tlêm tâk zâwk avângin, hla thar ṭhenkhat tal chu a ziak en lovin kan sa thei ngei ang. Chu chu Ephesi 5:19-a Paula fuihna kan hmuh nên a inrem a ni.—Chhiar rawh.
Hla Tharte I Duhzia I Lantîr Thei
17. Eng thil chhût dânin nge kohhrana hla sak chungchângah zai thiam loh avânga zai hrehna chu paih bo tûra min ṭanpui thei?
17 Zai thiam loh chu Kristian inkhâwmnaa zai ngam loh phah nân kan hmang tûr a ni em? Heti hian han ngaihtuah teh: Thu kan sawi hian “thil tam tak kan tisual fo ṭhîn” a ni lâwm ni? (Jak. 3:2) Chuti chung pawhin, kan ṭawngkam thiam loh chu in tin kala Pathian Jehova chawimawi loh phah nân kan hmang chuang lo. Chutiang a nih si chuan, engvângin nge zai thiam loh chu hlaa Pathian chawimawi loh phah nân kan hman bîk ang? ‘Mihringte kâ siamtu’ Pathian Jehova chuan amah fakna hla saa aw kan chhuah ngaihthlâk chu nuam a ti a ni.—Ex. 4:11.
18. Hla thute hriat theih dân tûr rawtna ṭhenkhat pe rawh.
18 Sâpṭawnga chhuah CD, Sing to Jehovah—Vocal Renditions chu ṭawng hrang hrangin a hmuh theih tawh a. Chutah chuan rimawi leh zaipâwl anga sak hla thar a awm a ni. Rimawi remte chu ngaihthlâk a nuam hle a. Ngaithla nawn fo rawh; chutiang chuan hla thar hla thu engemaw zât chu i hre thei ang. Hla thu tam takte chu a châng hmasa han saka a dawta mi tûr ngaih ruat theih nghâl tûr khawpa phuah rem a ni a. Chuvângin CD i play hian zaipâwl ruala zai ve chu engvângin nge i tum loh vang? In lamah hla thu leh a thlûk i lo thiam tawh chuan, Kingdom Hall-ah inring tâwk takin i zai thei ang.
19. Rimawia rem kan Lalram hlate chu eng anga buatsaih nge ni?
19 Bial inkhâwmpui te, special inkhâwmpui te, leh district inkhawmpui tea kan play ṭhin rimawite ngaihthlâk liam ve mai mai chu a awlsam hle a. Chutiang rimawite buatsaih chu a buaithlak hle. Rimawia rem tûr hlate thlan fel a nih hnuah, Watchtower rimawi tum pâwl mi 64-te rem dân tûr chu fîmkhur taka ziak chhuah a ni a. Tichuan, rimawi lam thiam mite chuan nakina an zir a, a tâwpa Patterson, New York-a an thun tûr an thu ziak chhuah ennawn nân dârkâr tam tak an hmang a ni. Chûng unaute zînga sâwmte chu United States pâwn lama mi an ni a. An zain theocratic thilthleng atâna rimawi mawi tak siam theihna hun remchâng an neih chu an hlut hle. An thawhrimna kan hlutzia chu kan inkhâwmpuia chairman-in duhsakna nêna buatsaih rimawi ngaithla tûra min sâwm huna ṭhut hmun rem fel nghâlin kan lantîr thei a ni.
20. Eng nge tih tlat i tum?
20 Pathian Jehovah chuan amah chawimawina hla kan sakte chu a ngaithla a. Chûng chu a ngai pawimawh a ni. Pathian be tûra kan kalkhâwm apiang hian tih tak zeta zaiin a thinlung kan tilâwm thei a ni. Ni e, thiamsa tawh kan ni emaw, zirtu kan ni emaw “LALPA chawimawiin hla” i sa ang u!—Sâm 104:33. (w10-E 12/15)
[Footnote-te]
^ par. 1 Ngaihvenawm takin, Davida thih hnu kum zabi sâwmah, vântirhkoh rual chuan Bethlehem khaw kiang phûla berâm vêngtute hnênah chuan Messia a pian thu an rawn puang a ni.—Lk. 2:4, 8, 13, 14.
^ par. 15 Hla 225 awmna hla bu chu ṭawng 100 chuanga neih a ni.
Eng Nge I Ngaih Dân?
• Bible hun laia eng entîrnate hian nge Pathian biaknaah rimawiin hmun pawimawh tak a chang tih târ lang?
• Matthaia 22:37-a Isua thupêk zawm leh Lalram hlate tih tak zeta sak hian eng inzawmna nge a neih?
• Lalram hlate kan ngaihhlutzia lantîr theih dân kawng ṭhenkhat chu engte nge ni?
[Zirlai Atâna Zawhnate]
[Phêk 29-naa milem]
I fate chu hla sak laia ṭûl lo taka kal chhuak lo tûrin i zirtîr em?
[Phêk 30-naa milem]
Kan hla bu thara hla thute chu in lamah i zir em?