Зарут Йегъовӕйӕн!
Зарут Йегъовӕйӕн!
«Зардзынӕн мӕ Хуыцауӕн, цалынмӕ цӕрон, уӕдмӕ» (ПС. 146:2).
1. Давид йӕ псаломтӕй иуӕй-иутӕ цӕмӕн ныффыста?
ДАВИД хӕрзӕрыгонӕй, йӕ фыды фыстӕ хизгӕйӕ, бирӕ рӕстӕг ӕрвыста быдыры Вифлееммӕ хӕстӕг. Йӕ фыстӕ хизгӕйӕ-иу каст, Йегъовӕ цы диссӕгтӕ сфӕлдыста, уыдонмӕ дӕр: стъалыджын арвмӕ, «хъӕддаг сырдтӕм» ӕмӕ «уӕларвон мӕргътӕм». Уыдӕттӕм кӕсгӕйӕ-иу йӕ зӕрдӕ афтӕ ныррухс, ӕмӕ-иу Йегъовӕйы йе сконд хъуыддӕгты тыххӕй зарджытӕй кадджын кодта. Йӕ зарджытӕн сӕ фылдӕр сты Псаломты чиныджы *. (Бакӕс Псалом 8:3, 4, 7–9.)
2. а) Музыкӕ адӕймагыл куыд ӕндавы? Ӕрхӕсс цӕвиттон. ӕ) Давид Йегъовӕмӕ цы зӕрдӕ дардта, уый Псалом 34:7, 8 ӕмӕ Псалом 139:2–8 куыд зыны?
2 Давид, ӕвӕццӕгӕн, уыцы рӕстӕг зӕрдиагӕй архайдта, цӕмӕй хъисфӕндырыл цӕгъдын хорз сахуыр уыдаид. Уый афтӕ хорз цӕгъдын райдыдта, ӕмӕ йӕ уый тыххӕй паддзахы галуанмӕ фӕхуыдтой, цӕмӕй Саулӕн хъисфӕндырыл цагътаид (Ӕмб. 22:29). Саул-иу тыхст куы уыди, ӕмӕ-иу ын Давид куы цагъта, уӕд-иу йӕ зӕрдӕ ӕрсабыр. Абон дӕр хорз музыкӕ афтӕ ӕндавы адӕймагыл. Давиды цагъдӕй-иу Саулӕн «фенцондӕр, йӕ зӕрдӕ-иу бахъӕлдзӕг» (1 Сам. 16:23). Уыцы иузӕрдион адӕймаджы зарджытӕ ӕнусты сӕрты махмӕ дӕр ӕрхӕццӕ сты. Кӕд Давиды мӕлӕтыл 3 000 азӕй фылдӕр рацыд, уӕддӕр бирӕ бӕстӕты милуантӕн Давиды псаломтӕ сты удӕнцой ӕмӕ ныфсы хос (2 Аз. 7:6; бакӕс Псалом 34:7, 8; 139:2–8; Амос 6:5).
Музыкӕйӕн уыд стыр ахадындзинад
3, 4. Давиды рӕстӕджы музыкӕйӕн раст дины цавӕр ахадындзинад уыд?
3 Давид уыд курдиатджын адӕймаг ӕмӕ йӕ курдиатӕй пайда кодта, цӕмӕй Йегъовӕйы кадджын кодтаид. Израилы паддзах куы сси, уӕд бацархайдта, цӕмӕй-иу левиттӕ Хуыцауы цатыры куы лӕггад кодтой, уӕд-иу рӕсугъд музыкӕ цагътаиккой. Левиттӕн сӕ дӕсӕм хай, 4 000 адӕймаджы, нысангонд уыдысты, цӕмӕй «Йегъовӕйы кадджын кодтаиккой», «Йегъовӕйӕн зарын» кӕй сахуыр кодтой, уыцы 288 «дӕсны» зарӕггӕнӕгимӕ (1 Аз. 23:3, 5; 25:7).
4 Левиттӕ цы музыкӕ цагътой ӕмӕ цы зарджытӕ зарыдысты, уыдонӕй бирӕтӕ Давид йӕхӕдӕг ӕрымысыд. Давиды зарджытӕ-иу алкӕй зӕрдӕмӕ дӕр фӕцыдысты. Фӕстӕдӕр, бадзырды чырын Иерусалиммӕ куы бахастой, уӕд «Давид левитты хистӕртӕн загъта, зӕгъгӕ, уе ’фсымӕртӕн, зарӕггӕнджытӕн, зӕгъут, цӕмӕй музыкалон инструменттимӕ – хъисфӕндыртимӕ, дыууадӕстӕнон фӕндыртимӕ ӕмӕ ӕрхуы тӕбӕгътимӕ слӕууой ӕмӕ хъӕрӕй цӕгъдой, ӕмӕ цины зӕлтӕ дардмӕ хъуысой» (1 Аз. 15:16).
5, 6. а) Давиды рӕстӕджы музыкӕйӕн ахӕм стыр ахадындзинад цӕмӕн уыд? ӕ) Рагон Израилы музыкӕйӕн раст дины стыр ахадындзинад кӕй уыд, уый кӕцӕй зонӕм?
5 Паддзах Давиды рӕстӕджы музыкӕйӕн ахӕм стыр ахадындзинад цӕмӕн уыд? Давид музыкӕйыл ӕнувыд кӕй уыд, уый тыххӕй? Нӕ, уымӕн уыди ӕндӕр аххосаг. Ӕмӕ йӕ базонӕн ис, ӕнусты фӕстӕ иузӕрдион паддзах Езеки цы бардзырд радта, уымӕй. Йӕ бардзырдмӕ гӕсгӕ та хъуамӕ кувӕндоны ногӕй лӕггад кӕнын райдыдтаиккой. Уый тыххӕй 2 Азфыстыты 29:25 кӕсӕм: «Езеки левитты ӕрхуы тӕбӕгътимӕ, хъисфӕндыртимӕ ӕмӕ дыууадӕстӕнон фӕндыртимӕ слӕууын кодта Йегъовӕйы хӕдзары раз – Давид, стӕй Гад, паддзахӕн цӕстылуайӕнтӕ уынӕг чи уыд, уый, ӕмӕ пехуымпар Нафан куыд бафӕдзӕхстой, уымӕ гӕсгӕ, уымӕн ӕмӕ афтӕ бафӕдзӕхста Йегъовӕ йӕ пехуымпарты уылты».
6 Йегъовӕ йӕ пехуымпарты уылты йӕ лӕггадгӕнджытӕн дзырдта, цӕмӕй йын кады зарджытӕ кодтаиккой. Сауджынтӕй зарӕггӕнджытӕ чи уыд, уыдоны-иу иннӕ куыстытӕй ссӕрибар кодтой. Афтӕмӕй-иу сын фаг рӕстӕг уыди, цӕмӕй-иу ног зарджытӕ ӕмӕ цӕгъдтытӕ ӕрхъуыды кодтаиккой ӕмӕ-иу сӕ ахуыр кодтаиккой (1 Аз. 9:33).
7, 8. Паддзахады зарджытӕ куы фӕзарӕм, уӕд Хуыцау сӕйрагдӕр цӕмӕ фӕкӕсы?
7 Чи зоны зӕгъай, цатыры-иу чи зарыд, уыцы левиттӕ зарынмӕ дӕсны уыдысты, ӕмӕ сӕ ӕз никуы аййафдзынӕн, зӕгъгӕ. Фӕлӕ левиттӕ иууылдӕр зарынмӕ дӕсны нӕ уыдысты. 1 Азфыстыты 25:8 куыд фыст ис, афтӕмӕй дзы уыди, «нырма ахуыр чи кодта», ахӕм левиттӕ дӕр. Зӕгъын ма хъӕуы уый дӕр, ӕмӕ иннӕ израилӕгты ’хсӕн дӕр кӕй уыди, хорз чи цагъта ӕмӕ рӕсугъд чи зарыд, ахӕмтӕ дӕр. Фӕлӕ Йегъовӕ ӕрмӕстдӕр левиттӕн радта бар, цӕмӕй цатыры цагъдтаиккой ӕмӕ зарыдаиккой. Иузӕрдион левиттӕ уыцы хъуыддаджы дӕсны уыдысты, ӕви нырма ахуыр кодтой, уӕддӕр цы арӕзтой, уый зӕрдиагӕй кодтой.
8 Давид музыкӕ бирӕ уарзта, тынг арӕхст зарынмӕ дӕр ӕмӕ цӕгъдынмӕ дӕр. Фӕлӕ йӕм цымӕ Хуыцау ӕрмӕст уыцы курдиаты тыххӕй дардта хорз зӕрдӕ? Псаломы 33:3 фыст ис: «Фӕндыры хъистыл зӕрдиагӕй ӕрцӕгъдут ӕмӕ хъӕлдзӕгӕй зарут». Уӕдӕ Хуыцау кӕсы, адӕймагӕн йӕ курдиӕттӕм нӕ, фӕлӕ йын зӕрдиагӕй лӕггад кӕны ӕви нӕ, уымӕ.
Музыкӕ Давиды фӕстӕ
9. Йегъовӕйӕн кувӕндон куы нывонд кодтой, уыцы рӕстӕг ды дӕр уым куы уыдаис, уӕд дзы цы федтаис ӕмӕ цы фехъуыстаис?
9 Паддзах Соломоны рӕстӕджы дӕр музыкӕйӕн раст дины стыр ахадындзинад уыди. Кувӕндон Йегъовӕйӕн куы нывонд кодтой, уӕд дзы уыд ӕнӕхъӕн оркестр. Уыцы оркестры уыди 120 сауджыны ӕмӕ уадындзтӕй уасыдысты. (Бакӕс 2 Азфыстытӕ 5:12.) Библийы фыст ис: «Йегъовӕйы кадджын кӕнгӕйӕ ӕмӕ йын арфӕ кӕнгӕйӕ уадындзты зӕлтӕ ӕмӕ зарӕггӕнджыты хъӕлӕстӕ куы баиу сты ӕмӕ... [сауджынтӕ] Йегъовӕйы кадӕн куы ныззарыдысты, „уымӕн ӕмӕ у хӕларзӕрдӕ, уымӕн ӕмӕ ӕнустӕм у йе ’нувыд уарзт“, зӕгъгӕ, уӕд Йегъовӕйы хӕдзар мигъӕй байдзаг». Кувӕндон мигъӕй кӕй байдзаг, уымӕй рабӕрӕг, Йегъовӕ сӕ райгонд кӕй уыди. Хӕрзаг, уадындзты цагъд ӕмӕ мингай зарӕггӕнджыты хъӕлӕстӕ куы баиу сты, уӕд адӕмӕн сӕ хъуын арц слӕууыд! (2 Аз. 5:13).
10, 11. Кӕцӕй йӕ зонӕм, фыццаг чырыстӕтты рӕстӕг дӕр музыкӕйӕн стыр ахадындзинад кӕй уыд, уый?
10 Фыццаг чырыстӕтты заман дӕр музыкӕйӕн уыд стыр ахадындзинад. Кӕй зӕгъын ӕй хъӕуы, чырыстӕттӕ цатыры йе та кувӕндоны не ’мбырд кодтой, фӕлӕ хӕдзӕртты. Кӕд сӕ фӕдыл зылдысты ӕмӕ ӕндӕр зындзинӕдтӕ дӕр ӕвзӕрстой, уӕддӕр Хуыцауы сӕ зарджытӕй кадджын кодтой.
11 Апостол Павел колоссаг ӕфсымӕртӕн загъта: «Кӕрӕдзийы... фидар кӕнут псаломтӕй, кады зарджытӕй ӕмӕ зӕрдӕмӕхъаргӕ дины зарджытӕй ӕмӕ Йегъовӕйӕн зӕрдӕбынӕй зарут» (Кол. 3:16). Павелы ӕмӕ Силӕйы ахӕстоны куы бакодтой, уӕд «куывтой ӕмӕ Хуыцауы кадӕн зарыдысты», кӕд сӕм зарджыты чиныг нӕ уыд, уӕддӕр (Ап. хъ. 16:25). Зӕгъӕм дӕу дӕр ахӕстоны сбадын кодтой, уӕд цымӕ Паддзахады зарджытӕй цал зарӕджы ӕрхъуыды кӕнис?
12. Паддзахады зарджытӕн кӕй аргъ кӕнӕм, уый куыд ис равдисӕн?
12 Абон дӕр нӕ лӕггады музыкӕйӕн стыр ахадындзинад кӕй ис, уымӕ гӕсгӕ хорз уаид, нӕхи куы бафӕрсиккам: «Ӕз дӕр ын аргъ кӕнын? Фембӕлдтӕм ӕмӕ конгресстӕм афоныл ӕрбацӕуын, ӕмӕ мӕ хотӕ ӕмӕ ме ’фсымӕртимӕ фыццаг зарӕг азарын? Зӕрдӕбынӕй фӕзарын? Мӕ сывӕллӕтты ахуыр кӕнын, цӕмӕй сӕ бынаты лӕууой ӕмӕ дзӕгъӕл рацу-бацу ма кӕной, Хуыцауы Ныхас хъусынгӕнджыты скъолайы, науӕд ӕргом раныхасы фӕстӕ куы фӕзарӕм, уӕд?» Паддзахады зарджытӕ зарын хауы нӕ лӕггадмӕ. Зарынмӕ «дӕсны» стӕм ӕви «нырма ахуыр кӕнӕм», уӕддӕр нӕ бон у иумӕ Йегъовӕйӕн кады зарджытӕ кӕнын. Ӕмӕ хъуамӕ афтӕ кӕнгӕ дӕр кӕнӕм. (Абар 2 Коринфӕгтӕм 8:12.)
Рӕстӕг куыд цӕуы, афтӕ алцыдӕр ивы
13, 14. Ӕмбырды фембӕлдты зӕрдӕбынӕй зарын ахсджиаг цӕмӕн у? Ӕрхӕсс цӕвиттон.
13 Паддзахады зарджытӕ ахсджиаг цӕмӕн сты, уый тыххӕй иу-100 азы размӕ «Сионы Хъахъхъӕнӕн мӕсыг»-ы фыст уыд: «Хуыцауы адӕм рӕстдзинады тыххӕй зарджытӕ куы фӕзарынц, уӕд рӕстдзинад сӕ зонды ӕмӕ сӕ зӕрдӕты тынгдӕр ныффидар вӕййы». Нӕ зарджытӕй бирӕтӕн сӕ ныхӕстӕ сты Библийӕ ист, ӕмӕ дзы иуӕй-иутӕ куы сахуыр кӕнӕм, уӕд рӕстдзинад нӕ зӕрдӕты арфдӕр ахъардзӕн. Арӕх, не ’мбырдтӕм фыццаг хатт чи ӕрбацӕуы, уыдоны зӕрдӕмӕ тынг фӕцӕуы, зӕрдӕбынӕй кӕй фӕзарӕм, уый.
14 1869 азы Ч. Т. Расселл иу изӕр куыстӕй хӕдзармӕ куы фӕцӕйцыд, уӕд фехъуыста, иу хӕдзары пъадвалӕй зарын кӕй цыди. Уыцы рӕстӕг Расселл йӕхинымӕр хъуыды кодта, Хуыцауы тыххӕй рӕстдзинад кӕй никуы базондзӕн. Ӕмӕ йӕхицӕн загъта, зӕгъгӕ, мӕ хъарутӕ мӕ куыстмӕ саразон ӕмӕ ӕхца бакусон. Ӕмӕ кӕд адӕмӕн мӕ бон нӕу Хуыцауы ссарынӕн баххуыс кӕнын, уӕддӕр сын ӕхцайӕ баххуыс кӕндзынӕн. Ӕфсымӕр Расселл уыцы рыгӕйдзаг ӕмӕ талынг пъадвалмӕ ныххызт ӕмӕ федта, ӕмбырд дзы кӕй уыд, уый. Расселл дӕр ӕрбадт ӕмӕ байхъуыста, цы дзы дзырдтой, уымӕ. Уыцы изӕр цы фехъуыста, уый тыххӕй фӕстӕдӕр ныффыста: «Уый уыд Хуыцауы разамынд. Ӕмӕ мын баххуыс кодта, цӕмӕй мӕ лӕмӕгъ уырнындзинад бафидар уыдаид ӕмӕ баууӕндыдаин, Библи Хуыцауӕй кӕй у, ууыл». Уӕдӕ ӕфсымӕр Расселл зарын кӕй фехъуыста, уый фӕрцы ӕмбырдмӕ бацыд.
15. Ног зарджыты чиныг цӕмӕн бахъуыд рауадзын?
15 Рӕстӕг куыд цыди, афтӕ Библийы ахуырӕдтӕ хуыздӕр ӕмбарын райдыдтам. Ӕмбисӕндты 4:18 фыст ис: «Рӕстгӕнджыты фӕндаг у хуры рухсы хуызӕн – уыцы рухс кӕны тынгӕй-тынгдӕр, цалынмӕ хур йӕ тӕмӕны нӕ бацӕуы, уӕдмӕ». Рӕстдзинады рухс ирдӕй-ирддӕр кӕй кӕны, уымӕ гӕсгӕ нӕ зарджыты чиныджы дӕр бахъуыд ивындзинӕдтӕ скӕнын. Бирӕ бӕстӕты Йегъовӕйы Ӕвдисӕнтӕ фӕстаг 25 азы пайда кодтой чиныгӕй «Зарут Иегъовӕйы кадӕн» *. Ацы чиныг мыхуыры куы рацыд, уӕдӕй абонмӕ Библийӕ цавӕрдӕр ахуырӕдтӕ хуыздӕр кӕй бамбӕрстам, уымӕ гӕсгӕ зарджыты ныхӕстӕй иуӕй-иутӕй нал пайда кӕнӕм. Зӕгъӕм, зӕронд англисаг зарджыты чиныджы фыст уыд Йегъовӕйы ном «сбӕлвырд уыдзӕн», ныр та пайда кӕнӕм ныхас «срухс уыдзӕн»-ӕй. Уӕдӕ куыд федтам, афтӕмӕй бахъуыд ног зарджыты чиныг рауадзын.
16. Павел Ефесӕгтӕм 5:19 цы уынаффӕ радта, уый нӕ бон куыд у ӕххӕст кӕнын?
16 Ацы ӕмӕ ӕндӕр аххосӕгты тыххӕй Разамонӕг совет уынаффӕ рахаста, цӕмӕй мыхуыры рацӕуа ног зарджыты чиныг «Зарут Йегъовӕйӕн». Ног чиныджы ис 135 зарӕджы. Ӕмӕ хорз уаид ног зарджытӕй иу цалдӕр куы сахуыр кӕниккам. Афтӕмӕй ӕххӕст кӕндзыстӕм, Павел Ефесӕгтӕм 5:19 цы уынаффӕ радта, уый. (Бакӕс ӕй.)
Нӕ зӕрдӕмӕ кӕй цӕуынц, уый куыд равдисӕм
17. Цы нын баххуыс кӕндзӕн, цӕмӕй ӕмбырды фембӕлдты зарын ма ӕфсӕрмы кӕнӕм?
17 Чырыстон фембӕлдты иннӕтӕ куы фӕзарынц, уӕд ды дӕр фӕзарыс ӕви ӕфсӕрмы фӕкӕныс? Дзургӕ-дзурын «не ’ппӕт дӕр арӕх фӕрӕдийӕм» (Иак. 3:2). Ныхасӕй чи нӕ рӕдийы, ахӕм нӕ иу дӕр нӕй, фӕлӕ уӕддӕр хӕдзарӕй-хӕдзармӕ куы фӕцӕуӕм, уӕд Йегъовӕйы фӕкадджын кӕнӕм. Уӕдӕ кӕд зарынмӕ дӕсны не стӕм, уӕддӕр нӕ уый хъуамӕ ма къуылымпы кӕна заргӕйӕ Хуыцауы кадджын кӕнын. Йегъовӕ – «адӕймагӕн дзых чи радта», уый – тынг фӕцин кӕны, йӕ кадӕн ын куы фӕзарӕм, уӕд (Рац. 4:11).
18. Ног зарджытӕ куыд ис ахуыр кӕнӕн?
18 Цы ног диск рацыд, «Зарут Йегъовӕйӕн – Фортепиано», зӕгъгӕ, уый ӕххуыс кӕны бирӕ хотӕ ӕмӕ ӕфсымӕртӕн ног зарджытӕ ахуыр кӕнынӕн. Уыцы мелодитӕм хъусынӕй адӕймаг не ’фсӕды. Хӕдзары сӕм арӕх куы хъусай ӕмӕ зарджыты чиныгмӕ куы кӕсай, уӕд сӕ тагъд сахуыр кӕндзынӕ ӕмӕ Паддзахады залы уӕндондӕрӕй зардзынӕ.
19. Цӕмӕй Паддзахады зарджыты мелодитӕ оркестр ацӕгъда, уый тыххӕй цы саразынц?
19 Нӕ конгрессты программӕйы размӕ цы музыкӕ фӕцӕгъды, уымӕ арӕх хъусгӕ дӕр нӕ фӕкӕнӕм. Фӕлӕ йӕ бацӕттӕ кӕныныл ӕфсымӕртӕ бирӕ бафыдӕбон кӕнынц. Музыкӕ куы равзарынц, уӕд ма йыл бакусынц, цӕмӕй йӕ оркестр ацӕгъда. Хъахъхъӕнӕн Мӕсыджы Ӕхсӕнады оркестры ис 64 музыканты. Уыдон бирӕ рӕстӕг фӕахуыр кӕнынц уыцы цӕгъдтытӕ, ӕмӕ сӕ ӕппынфӕстаг ныффыссынц нӕ студиты Паттерсоны (штат Нью-Йорк). Уыцы музыканттӕй дӕс Иугонд Штатты нӕ цӕрынц. Уыдон иууылдӕр сӕхицӕн стыр кадыл нымайынц, конгресстӕн рӕсугъд цӕгъдтытӕ кӕй бацӕттӕ кӕнынц, уый. Ӕмӕ хорз уаид, сӕ фыдӕбонӕн сын куы аргъ кӕниккам. Уӕдӕ-иу конгрессы программӕйы размӕ ӕфсымӕр куы зӕгъа, ныртӕккӕ музыкӕ райхъуысдзӕн, зӕгъгӕ, уӕд-иу нӕ бынӕтты сбадӕм ӕмӕ-иу лӕмбынӕг байхъусӕм, не ’мчырыстӕттӕ нын зӕрдиагӕй кӕй бацӕттӕ кӕнынц, уыцы музыкӕмӕ.
20. Дӕ фидар фӕнд цы у?
20 Йегъовӕ лӕмбынӕг фӕхъусы, куыд зарӕм ӕмӕ йӕ куыд кадджын кӕнӕм, уымӕ. Йегъовӕ зарджытӕм уӕлӕнгай цӕстӕй нӕ кӕсы. Йегъовӕйы кадӕн алкӕддӕр зӕрдӕбынӕй куы зарӕм, уӕд ын афтӕмӕй йӕ зӕрдӕ рухс кӕндзыстӕм. Уӕдӕ зарынмӕ дӕсны стӕм ӕви нырма ахуыр кӕнӕм, уӕддӕр зӕрдӕбынӕй «Йегъовӕйӕн зарӕм» (Пс. 104:33).
[Фиппаинӕгтӕ]
^ 1 абз. Давиды мӕлӕтӕй мин азы куы рацыди, уӕд быдыры фыййӕуттӕм фӕзынд тынг бирӕ зӕдтӕ. Уыдон Хуыцауы кадджын кодтой ӕмӕ сын фехъусын кодтой, Мессийӕ кӕй райгуырд, уый. Уыцы фыййӕуттӕ дӕр сӕ фыстӕ хызтой Вифлееммӕ хӕстӕг быдыры (Лук. 2:4, 8, 13, 14).
^ 15 абз. Зарджыты чиныг ӕнӕхъӕнӕй, 225 зарӕджы, рацыд 100 ӕвзагӕй фылдӕрыл.
Куыд хъуыды кӕныс?
• Нӕ лӕггады музыкӕйӕн стыр ахадындзинад кӕй ис, уый Библийӕ куыд зыны?
• Матфейы 22:37 цы фӕдзӕхст ис, уый куыд хауы, Паддзахады зарджытӕ зӕрдӕбынӕй зарын кӕй хъӕуы, уымӕ?
• Нӕ зарджытӕн кӕй аргъ кӕнӕм, уый куыд ис равдисӕн?
[Фарстатӕ ахуыр кӕнынӕн]
[Ныв 23 фарсыл]
Дӕ сывӕллӕтты зарӕджы рӕстӕг рацу-бацу кӕнын фӕуадзыс?
[Ныв 24 фарсыл]
Нӕ ног зарджытӕ хӕдзары фӕахуыр кӕныс?
