Kantaan si Jehova!

“Kantaan ko so Dios ko diad interon bilay ko.”​—SAL. 146:2, MAUNG A BALITA.

1. Antoy amakiwas ed tobonbalon si David ya ikompos so arum ed saray salmo to?

SANEN tobonbalo ni si David, sikatoy lanang a walad uma ya asingger ed Betlehem pian pastolan iray karnero nen ama to. Legan ton babantayan so pulok, naoobserbaan toy makapakelkelaw iran palsa nen Jehova: say mabitewen a katawenan, “saray ayayep ed lawak,” tan “saray kamanokan ed tagey.” Naapresyan tuloy nen David iray anengneng to. Kanian, sikatoy apakiwas a mankompos na makapatenyeg na liknaan iran kanta na panangidayew ed Nanggawa na sarayan alay abig a bengatla. Dakel ed saray komposisyon nen David et naromog ed libro a Salmo. *​—Basaen so Salmo 8:3, 4, 7-9.

2. (a) Antoy nayarin epekto na musika ed sakey a too? Mangiter na alimbawa. (b) Antoy naaralan tayo nipaakar ed relasyon nen David ed si Jehova diad Salmo 34:7, 8 tan Salmo 139:2-8?

² Nayarin legan na sayan panaon et apaaligwas  a maong nen David so abilidad to bilang sakey a musikero. Diad tua, ontan lay inkadunong to kanian sikatoy inimbitaan a manogtog na arpa ed si Arin Saul. (Uli. 22:29) Say musika nen David et makaligliwa ed nagogonigon ya ari, a singa saray balibalin musika ed panaon tayo. Kapagno manogtog lay David, ‘naimasmasan tan onabig si Saul.’ (1 Sam. 16:23) Saray komposisyon na sayan matakot ed Dios a managtogtog tan managsulat na kanta et makanakana ni anggad natan. Isip yo pa labat! Natan, a masulok lan 3,000 taon so apalabas kayari inkianak nen David, regular a babasaen na minilyon a totoo manlapud nanduruman kultura tan bansa so salmo to pian naligliwa tan nawalaay ilalo.​—2 Awa. 7:6; basaen so Salmo 34:7, 8; 139:2-8; Amos 6:5.

Musika​—Importante ed Dugan Panagdayew

3, 4. Nen panaon nen David, panon ya inyuksoy iray musikan parad si Jehova?

³ Agaylay dunong nen David, tan inusar to itan ya abilidad to ed sankaabigan a paraan​—pian igloria si Jehova. Sanen nagmaliw ya ari na Israel si David, inyuksoy to ya ilaktip iray mararakep a musika diad panaglingkor ed tabernakulo. Masulok a kakaplo na amin a manlilingkor ya Levita​—manga 4,000 ed sikara​—so niasain a “mangigalgalang,” kaibay 288 ya “impasal ed panagkanta ed Jehova, salanti amin a marunong.”​—1 Awa. 23:3, 5; 25:7.

⁴ Kinompos a mismo nen David so dakel ed saray kanta a tinogtog tan kinansion na saray Levita. Seguradon atenyeg so puso na saray Israelitan apribilehyoan ya akadngel ed saray kinantan salmo nen David. Diad saginonor, sanen inawit ed Jerusalem so kaban na sipan, “si David nansalita ed manunaan na saray Levita pian turoen da so saray agagi ra na managkanta, pati saray kagawaan ed panagtogtog, saray salterio tan saray arpa tan saray cimbalo, a paknolen a maksil tan mangitagey na boses ed liket.”​—1 Awa. 15:16.

5, 6. (a) Akin et ontan lan kaimportante so musika diad uley nen David? (b) Antoy pakapatnagan ya say musika et importantin kabiangan na panagdayew na saray Israelita?

⁵ Akin et ontan lan kaimportante so musika ed panaon nen David? Kasin lapud say ari et sakey a musikero? Andi, wala ni arum a rason a nipaamta kayari na pigaran siglo sanen impawil na matunong ya Arin Hezekias so panaglingkor ed templo. Oniay nabasa tayo ed 2 Awaran 29:25: “Impasen to [si Hezekias] so saray Levita ed abung nen Jehova pati saray cimbalo, pati saray salterio, tan pati saray arpa, unong ed ganggan nen David, tan si Gad a managnengneng na ari, tan si Natan a propeta, ta say ganggan nanlapu ed Jehova ed panamegley na saray propeta to.”

⁶ On, panamegley na saray propeta et ingganggan nen Jehova iray lingkor to a sikatoy idayew da diad panganta. Saray komakanta manlapud tribu na saserdote et nalibre ni ingen ed saray kimey a kakaukolanen ed arum a Levita ta pian magenap so panaon da a mankompos tan manpasal.​—1 Awa. 9:33.

7, 8. Sano kakansionen tayo ray Kingdom song, anto so mas importante nen say abilidad?

⁷ Nayarin ibaga yon: “No panangansion lay pantotongtongan, seguradon agak nakaiba ed saramay marurunong a mangansion ed tabernakulo!” Balet ta aliwan amin ed saray Levitan musikero et eksperto. Unong ed 1 Awaran 25:8, wala met ed sikaray ‘manaaral’ ni labat. Nayarin wala ni ray mas maong a musikero tan komakansion ed arum a tribu na Israel, balet saray Levita so inyasain nen Jehova ed musika. Makaseguro tayo ya sineryoso na amin a matoor ya Levita so kimey da, ‘marunong’ man ira odino ‘manaaral’ ni labat.

⁸ Labalabay nen David so musika tan sikatoy marundunong ed satan. Balet kasin say abilidad labat so importante ed Dios? Insulat  nen David: “Pasya yoy pantogtog, a bansagan yoy maksil a boses.” (Sal. 33:3, NW) Malinew so punto: Say importante et ‘pasyaen tayo’ so pangidayew ed si Jehova.

Musika​—Kayari Panaon nen David

9. No sakey ka’d saray akaatendi ed inagurasyon na templo nen uley nen Solomon, anto kasi anengneng tan nadngel mo?

⁹ Legan na uley nen Solomon, say musika et talagan importantin kabiangan na malinis a panagdayew. Diad inagurasyon na templo, walay orkestra a say managtrumpeta da et 120. (Basaen so 2 Awaran 5:12.) Ibabaga na Biblia a saraman a ‘managtrumpeta [ya amin da et saserdote] tan managkanta et singa saksakey, diad impanggawa ray sakey a tanol ya arengel diad panangigalang tan pisasalamat ed si Jehova, ta sikatoy maong; ta say abig na linawa to magnayon lawas.’ Et kayarin tuloy na satan a makapaliket a musika, ‘say abung apanoy lurem,’ a mangipapatnag ed panangabobon nen Jehova. Segurado a balibalin dengelen so impankasakey na amin a trumpeta tan boses na nilibon komakanta!​—2 Awa. 5:13.

10, 11. Antoy mangipapanengneng a kabiangan ed panagdayew na saray Kristiano nensaman so musika?

¹⁰ Say musika et kabiangan met na panagdayew na saray inmunan Kristiano. Siempre, saratan a managdayew nen inmunan siglo et agnantitipon ed saray tabernakulo odino templo, noagta diad kaabungan. Anggano pinasegsegang ira tan dakel so asagmak dan kairapan, siansia nin dinayew day Dios panamegley na kanta.

¹¹ Pinaseseg nen apostol Pablo iray kaagian to diad Colosas: “Itultuloy yon . . . bilinen so sakey tan sakey diad panamegley na saray salmo, saray panangidayew ed Dios, mararakep iran espiritual a kanta.” (Col. 3:16) Sanen nipriso si Pablo tan Silas, sikaray ‘nampikasi tan nankanta na panangidayew ed Dios,’ anggano anggapoy songbook da. (Gawa 16:25) No bilang ta nipriso ka, pigaran Kingdom song so memoryadom a kantaen?

12. Panon tayon nipanengneng ya aapresyaen tayo ray Kingdom song?

¹² Lapud say musika et importante ed panagdayew tayo, maabig no tepetan tayoy inkasikatayo: ‘Kasin aapresyaen ko itan? Kasin gagawaen koy anggaay nayarian kon onsabi ed dugan oras pian makapibansag ak ed saray agagi diad panlukas a kanta, tan impapuso kasi so panangansion ko? Kasin bibilinen ko ray ana’ko ya agda ipapasen so kanta ed baetan na Teokratikon Eskuelaan Parad Ministeryo tan Pantitipon Parad Panagserbi odino say kanta ed baetan na Paliwawa Parad Publiko tan Panagaral na Panag-Bantayan a pankanawnawan ompaway anggan agmet kaukolan, pian lagi et niyunat day salisali ra?’ Say panangansion et kabiangan na panagdayew tayo. On, ‘marunong’ itayo man odino ‘manaaral’ ni labat, sarag tan nepeg ya usaren tayoy boses tayo diad pangidayew ed si Jehova.​—Ikompara so 2 Corinto 8:12.

Manguuman so Pankaukolan Diad Ilalabas na Panaon

13, 14. Akin et importante so impapuson panangansion diad aral? Iyilustra.

¹³ Masulok a 100 taon la’d apalabas, impaliwawa na Zion’s Watch Tower so sakey ed saray rason no akin et importantin tuloy iray Kingdom song tayo. Inkuan na satan: “Say pangikansion ed katuaan et maabig a paraan pian nasabi kanonotan tan kapusoan na totoo na Dios.” Dakel ed saray liriko na kanta tayo et base ed saray teksto ed Kasulatan. Kanian, say sankaabigan a paraan pian ontanek ed puso tayo so katuaan et say panaral na anggan pigara ed sarayan kanta. Maslak ed saray pilpilimero day miaral et apakiwas a maong lapud impapuson panangansion na kongregasyon.

¹⁴ Sakey a labi nen 1869, sanen pasempet lay C. T. Russell manlapud trabaho, nadngel  to ray mangakansion diad sakey a basement. Diad saman a panaon, agto la iilaloan a naromog to ni katuaan nipaakar ed Dios. Kanian, nandesisyon ya iyupot to lay panaon to ed trabaho, ta inisip to a no makatipon la, natulongan to ray totoo ed materyal a pankaukolan da anggano agto ra natulongan ya nakabat so Dios. Linmoob si Brother Russell ed saman a marabok tan ambilunget a basement tan naamtaan ton wala manayay relihyoson pantitipon diman. Sikatoy yinmurong tan dinmengel. Diad saginonor, insulat to a say nadngel to ed saman a labi et “magenap la pian, diad tulong na Dios, napabiskeg lamet so kinmapuy a pananisia [to] ed pinuyanan na Dios a Biblia.” Imanoen a say manunan akalay interes nen Brother Russell ed saman a pantitipon et say impangansion da.

15. Akin et kaukolan ya umanen so songbook tayo?

¹⁵ Diad ilalabas na panaon, walaray ginawan pananguman ed pakatalos tayo ed Kasulatan. Inkuan na Uliran 4:18: “Say basbas na matunong sikato so singa liwawa na kabuasan, ya onsinag ya onsinag angga ed nagnap ya agew.” Lapud isisinag na liwawa, kaukolan a walaray umanen diad “pangikansion ed katuaan.” Diad linmabas a 25 taotaon, inusar na saray Tasi nen Jehova ed nanduruman bansa so songbook ya apauloan na Mankanta na Saray Panangidayew ed si Jehova. * Manlapu la nen nipalapag itan a libro, sinminag lan sinminag so liwawa ed pigaran tema na Biblia, tan arum ed saray terminon inusar ed satan a songbook et agla matukoy. Alimbawa, agti la ibabagan “balon uksoy,” noagta “balon mundo.” Tan say ibabaga tayo la natan et “napasantos” so ngaran nen Jehova, aliwan “niyalangon.” Malinew a lapud saratan a balon liwawa, kaukolan ya umanen so songbook tayo.

16. Panon itayon natulongan na balon songbook pian natumbok so simbawa nen Pablo diad Efeso 5:19?

¹⁶ Lapud satan tan arum ni ran rason, inaprobaan na Mananguley ya Ulop so pangitarya na balon songbook ya apauloan na Kantaan si Jehova. Walay 135 a kanta ed sayan balon songbook. Lapud daiset lay kansion ya aralen tayo, mas mainomay tayon nimemorya so liriko na anggan pigara ed saray balon kanta. Mitunosan iya ed samay simbawa nen Pablo diad Efeso 5:19.​—Basaen.

Nipanengneng Moy Apresasyon Mo

17. Antoy makatulong pian agtayo nababaingan a mangansion diad kongregasyon?

¹⁷ Kasin lapud nababaingan tayo et makalkalna lay pangansion tayo ed aral? Isip mo pa iya: Agta no nipaakar ed pananalita, “amin tayo et naynay a nalilingo”? (Sant. 3:2) Balet, agtayo aabuloyan itan a kakapuyan a mamatunda ed panangidayew tayo’d si Jehova  diad panagkabkaabungan. Kanian, akin et agtayo dayewen si Jehova diad pangansion anggano ipapasen tayon aliwan marakep so boses tayo? Si Jehova, a “nanggawa na sangi’ too,” et naliliketan ya ondengel sano mangansion itayo na panangidayew ed sikato.​—Exo. 4:11.

18. Mangiter na saray suhestion no panon ya naaral iray liriko na kanta tayo.

¹⁸ Wala met iray intaryan CD ya apauloan na Sing to Jehovah​—Vocal Renditions diad nanduruman lenguahe. Marakdakep so impanogtog na orkestra tan impangansion na sakey a grupo ed satan. Kanian, balibali iratan a dengelen. Pian maganom a naaral so liriko na anggan pigara ed saray balon kanta tayo, lanang mon dengelen iratan. Dakel ed saratan a kanta et kinompos diad paraan a no kansionen moy sakey a linya, singano amtam la no antoy onsublay. Kanian no papatogtogen mo iratan, akin ta no bansagan mon kansionen? No kabisadoen moy liriko tan musika diad abung, seguradon sarasarag mo lay mangansion diad Kingdom Hall.

19. Panon ya imprepara na orkestra iray Kingdom song tayo?

¹⁹ No maminsan et mainomay a nibaliwala iray musikan ipapatogtog ed espisyal tan sirkiton asemblea, tan ed saray distriton kombension. Nansagpotan a maong so impangiprepara ed saraya. No apili lay musika, mankompos la ra na piyesa a togtogen na 64 a membro na orkestra na Watchtower. Dakel a panaon so usaren na saray musikero pian aralen iray piyesa ya ipasal da, insan da la i-rekord ed studio tayo diad Patterson, New York. Samplora ed sarayan agagi et aliwan taga’d Estados Unidos. Amin ira et ipapasen dan pribilehyo ya akaiba ira ed pangitarya na marakdakep a musika parad saray pantitipon tayo. Komon ta ipanengneng tayoy apresasyon tayo ed saray maaron sagpot da. No onggapo lan mansalitay tsirman ed saray asemblea tan kombension tayo, onyurong tayo lan tampol tan dengelen so musikan maar-aron imprepara parad sikatayo.

20. Antoy determinado yon gawaen?

²⁰ Iimanoen nen Jehova iray kanta a panangidayew ed sikato. Importante iratan ed sikato. Napaliket tayoy puso to diad maligsan pangansion tayo sano mantitipon parad panagdayew. On, marunong itayo man a mangansion odino andi, “kantaan [tayo] si Jehova”!​—Sal. 104:33.

[Saray paimano ed Leksab]

Antoy Nikuan Mo?

• Antoray alimbawa ed Biblia a mangipapanengneng ya importante so musika ed panagdayew tayo?

• Antoy koneksion na pangunor ed ganggan nen Jesus a walad Mateo 22:37 ed impapuson pangansion na saray Kingdom song?

• Panon tayon nipanengneng so apresasyon tayo’d saray Kingdom song?

[Tepetepet Parad Panagaral]

[Litrato ed pahina 23]

Kasin bibilinen mo ray anak mon ag-ompapaway legan na panangansion no agmet kaukolan?

[Litrato ed pahina 24]

Aaralen mo kasi iray liriko na balon kanta tayo diad abung?