Jehová Diosman takinachik

“Kawsanaykama Tata Diosta jatunchasaj. Kanaykamaqa Diosniyman takisaj.” (SAL. 146:2.)

1. ¿Imataq Davidta wakin salmosta qillqananpaq tanqarqa?

DAVIDQA, waynuchu kachkaspa tatanpa ovejasninta Belén llaqtap qayllanpi achkha watasta michirqa. Ovejasta michichkaspaqa, chʼaskasta, “kʼita animalesta”, “phawajkunata”, Diospa wak ruwasqasninta ima, qhawarqa. Chaykunata rikusqanqa, takiykunata qillqananpaq tanqarqa, chay sumaq imasta Ruwaqta jatunchananpaq. Achkha takiykunasninqa, Salmos libropi kachkan (Salmo 8:3, 4, 7-9, ñawiriy). *

2. a) ¿Imaynataq takiykunata uyarispa sientekunchik? Sutʼinchay. b) Salmo 34:7, 8; Salmo 139:2-8 pʼitispi, ¿imatataq David, Jehovawan allinpi kasqanmanta yachakunchik?

² Davidqa, ovejerito kachkaspachá astawan  sumaqta takiyta, tocayta ima, yachakurqa. Payqa, arpata sumaqta tocayta yachasqanrayku rey Saulpaq tocapunanpaq waqyarisqa karqa (Pro. 22:29). May kʼachituta tocasqanrayku, Saulta llakiyninpi sunqucharqa, kunanpis sumaq takiykunaqa sunqunchikta kusirichin. Saulqa, arpata tocasqanta uyarispa “yuyayninman kutirej [chayri sunquchakuq], walejyajtaj” (1 Sam. 16:23). David takiykunata qillqasqanta, tocasqanta, takisqanta ima, yuyarikullanchikpuni. Arí, David paqarikusqanmantapacha kunankama kimsa waranqa watas kuraqña pasaptinpis, tukuy layamanta, tukuyniqmantataq achkha runas, qillqasqan salmospi, sunquchayta, sumaq suyakuyta ima, tarinku (2 Cró. 7:6; Salmo 34:7, 8; 139:2-8, ñawiriy; Amós 6:5).

Chiqa yupaychaypiqa, takiykunata may jatunpaq qhawanchik

3, 4. Davidpa tiemponpi, ¿imatataq chiqa yupaychaypi takiykunata churakunanpaq ruwakurqa?

³ David sumaqta takiyta yachasqanwanqa, Jehovata jatunchaq. Chantapis, Israelta kamachichkaptinqa, Diosta yupaychanapaq toldopi imaschus ruwakusqanpi kʼacha takiykunata churachirqa. Chantá, 38.000 levitasmantaqa, 4.000 levitas tocanasninkuwan “Tata Diosta yupaychanankupaj” akllasqa karqanku. Chaykunamantataq 288 levitas Jehovaman takinankupaq wakichisqa karqanku, tukuyninkutaq “takinasmanta sumaj” yachaqkuna karqanku (1 Cró. 23:3, 5; 25:7).

⁴ Chay levitasqa, Davidpa qillqasqan salmosta takirqanku, tocarqanku ima. Chaypi kachkaq israelitasqa, sumaqta tocasqankuta, takisqankuta ima, uyarispa, ¡maytachá sunquchakuq kanku! Chaymanta qhipamanqa, Diospa trato ruwasqan arcata Jerusalenman apanankupaq, “David kamachillarqataj levitaspa kamachejkunankuta, paykuna ukhumanta maskʼanankuta takejkunata, tocanasnintinta, salteriosniyojta, arpasniyojta, platillosniyojta ima, sinchʼita jatun kusiywan takinankupaj” (1 Cró. 15:16).

5, 6. a) ¿Imaraykutaq David kamachichkaptin takiykunata may sumaqpaq qhawakuq? b) ¿Imaynamantataq israelitas Diosta takiykunawan yupaychasqankuta yachanchik?

⁵ ¿Imaraykutaq David kamachichkaptin takiykunata may sumaqpaq qhawakuq? David sumaqta tocayta, takiyta ima, ¿yachasqanraykuchu? Mana. Ezequiasqa, aswan qhipaman watiqmanta templopi Diosta yupaychayta sayarichichkaptin, imaptinchus takiykunata churakusqanta rikuchin. Kay 2 Crónicas 29:25 pʼitipi, nin: “Rey Ezequiasqa Tata Diospa Templompi churallarqataj levitasta platillosniyojta, salteriosniyojta, arpasniyojta ima, imaynatachus kamacherqa rey David, profeta Gat, jinataj profeta Natanpis, ajinata. Chay kamachisqataqa Tata Diospuni qosqa profetasninnejta”, nispa.

⁶ Arí, Jehovaqa, profetasninniqta, kamachisnin takiykunawan jatunchanankuta kamachirqa. Chantapis, takiq levitasqa, wakin ruwanasta mana ruwaqchu kanku. Ajinamantaqa, musuq takiykunata qillqaq kanku, sumaqtataq wakichikuq kanku (1 Cró. 9:33).

7, 8. Jehovaman takinapaq, ¿sumaq takiqkunapunichu kananchik tiyan?

⁷ Ichá jinata nisunman: “Ñuqaqa mana allinta takiyta atinichu, Diosta yupaychanapaq toldopi sumaqta takiyta yachaqkunamanta kanaypaq, ¡nichá akllawankumanchu karqa!”, nispa. Chaywanpis, mana tukuy levitaschu sumaq takiqkuna, tocaqkuna ima, karqanku. Kay 1 Crónicas 25:8 pʼitipiqa, yachaqakuqkunapis kasqankuta nin. Chantá, wak aylluspipis sumaq takiqkuna, tocaqkuna ima, kallarqankutaq. Chaywanpis Jehovaqa, levitasllata chayta ruwanankupaq akllarqa. Paykuna sumaqta takiyta yachaqkuna chayri yachaqakuqkunalla kaptinkupis, tukuy sunqunkuwan chayta ruwaq kanku.

⁸ Davidqa sumaqta takiq, tocaq ima, chayta ruwaspataq mayta miskʼichikuq. Chaywanpis Diosqa, mana sumaq takiqkunapuni kanatachu munan. Kay Colosenses 3:23, 24 pʼitispi Pablo qillqarqa: “Tukuy ima ruwanaykichejta  tukuy sonqo allinta ruwaychej, Señorpaj jina, ama runapaj jinaqa”, nispa. Arí, Jehovata yupaychanapaqqa, “tukuy sonqo” takinanchik aswan allin.

David kamachisqanmanta qhipaman takiykuna

9. Salomón kamachichkaptin Diosman templota jaywachkaptinku takiykunata takisqankuta, tocasqankuta ima, uyarispa, ¿imaynataq sientekusunman karqa?

⁹ Salomón kamachichkaptinpis, chiqa Diostaqa, takiykunawan yupaychaq kanku. Sutʼincharinapaq, Diosman templota jaywachkaptinkuqa, juk qutu tocaqkuna, pachak iskay chunka cornetata tocaqkunawan tocarqanku (2 Crónicas 5:12, ñawiriy). Biblia nisqanmanjinaqa, cornetata tocaqkuna —tukuyninku sacerdotes karqanku— takiqkunawan, “tukuyninku[...] uj kunkallata takerqanku Tata Diosta yupaychaspa, graciasta qospataj”. Jinatataq takirqanku: “Tata Diosqa may kʼachamin, munakuynintaj wiñaypajmin”, nispa. Takiyta tukuptinkukamataq “temploman uj phuyu juntʼaykorqa”, chaytaq Dios takisqankuta may allinpaq qhawasqanta rikuchirqa. Achkha cornetasta tocasqankuta, takisqankuta ima, uyariqkunaqa, ¡maytachá kusikurqanku! (2 Cró. 5:13.)

10, 11. ¿Imaynatataq ñawpa siglomanta cristianos, Diosta takiykunawan yupaychasqankuta yachanchik?

¹⁰ Ñawpa siglomanta cristianosqa, Diosta takiykunallawantaq yupaychaq kanku. Paykunaqa, mana templospichu, nitaq Diosta yupaychana toldospichu tantakuq kanku, manaqa wasisllapi. Wakin kutiqa, qhatiykachasqa chayri wak chʼampaykunapi rikukuspapis, Diostaqa takiykunawan yupaychallarqankupuni.

¹¹ Pabloqa, Colosasmanta cristianosman “tukuy sonqo salmoswan, himnoswan [chayri Diosman takiykunawan], Espirituman jina takiykunawan ima”, sunquchanakunankuta nirqa (Col. 3:16). Chantapis, Pablo, Silaswan carcelpi wisqʼasqa kachkaptinkuqa, mana takina libroyuq kaptinkupis unayta “Diosmanta mañakusharqanku, takisharqankutaj” (Hech. 16:25). Sapa juk tapurikuna: “Wisqʼasqa kaptiy, ¿machkha takiykunatataq takinaypaq yuyarikuyman?”, nispa.

12. ¿Imaynatá Reinomanta takiykunata may sumaqpaq qhawasqanchikta rikuchinchik?

¹² Chiqa religionpi takiykunawanpuni Diosta yupaychananchik kasqanrayku, tapurikuna: “¿Sumaqpaqchu Reinomanta takiykunata qhawani? Tantakuykunapi, jatun tantakuykunapi ima, hermanoswan khuska qallariypi takiyta takinaypaq, ¿kallpachakunichu tiemponpi chayanaypaq? ¿Tukuy sunquchu takini? Diosmanta Parlayta Yachanapaq tantakuypi, Willayta Yachanapaq tantakuypi, Tukuypaq tantakuypi, Torremanta Qhawaq revistamanta Yachaqanapaq tantakuypi ima, takikusqanta, ¿imaynatá familiay qhawan? ¿Yachachinichu wawasniyman mana samarinapaqchu takikusqanta?”, nispa. Diosta, takiykunawanpuni yupaychana kasqanta, ni jaykʼaq qunqanachu. “Takiyta sumaqta yachaptinchikpis” chayri “yachaqakuqkunalla” kaptinchikpis, tukuyninchik takisqanchikwan Jehovata jatunchayta atinchik, chaytataq ruwananchikpuni tiyan (2 Corintios 8:12, kikinchay).

Imatachus necesitasqanchikqa, tiempo pasasqanmanjina mana kikinchu

13, 14. ¿Imaraykutaq tukuy sunqu tantakuykunapi takinanchik tiyan? Sutʼinchariy.

¹³ Kay Torremanta Qhawaq revistaqa, inglés qallupi pachak watas ñawpaqta, imaraykuchus Reinomanta takinas may sumaq kasqanta jinata sutʼincharqa: “Diospa kamachisninqa, takispa chiqa yachachiykunata umanchikpi, sunqunchikpi ima, sumaqta japʼikuyta atinchik”, nispa. Achkha takiykuna Bibliamanta urqhusqa kasqanrayku, umanchikpi japʼikuptinchikqa, chiqa yachachiykuna sunqunchikpi qhipakun. Chayrayku, wakin takiykunallatapis japʼiqananchikqa, ¡may allin  kanqa! Tantakunapaq Wasiman ñawpaq kutirayku riqkunaqa, chaypi tukuy sunqu takisqankuta uyarispa tʼukuchkaq qhipakunku.

¹⁴ Kay 1869 watapiqa, Charles Russell llamkʼayninmanta wasinman kutipuchkaspa, juk wasi urap ukhunpi takiykunata takichkasqankuta uyarisqa. Chay kutipaqqa, Diosmanta chiqa yachachiykunata maskʼaspa saykʼusqaña, chayrayku llamkʼaynillanmanña qukunanta nisqa. Runasta, Diosmanta yachakunankupaq mana yanapayta atispaqa, llamkʼaspa ganasqallanwanpis imatachus necesitasqankupi yanapayta yuyasqa. Chaywanpis, chay wasi uraman uraykuspa, Diosta yupaychanankupaq tantakuyta ruwachkasqankuta rikusqa. Chay wasi, chʼichi, polvo juntʼasqa kaptinpis uyarinanpaq tiyaykukusqa. Watasninmantaq jinata qillqarqa: “Chay kutipaqqa, Bibliata Dios yuyaychasqanmanta iskayrayachkarqani, chaywanpis chay chʼisipi uyarisqayqa, watiqmanta iñiyniyta kallpachanaypaq yanapawarqa”, nispa. Rikunchikjina payqa, takiykunata uyarispa chay tantakuyman rirqa.

15. ¿Imaraykutaq wak takina librota wakichikunan karqa?

¹⁵ Tiempo pasasqanmanjinaqa, Bibliap yachachiykunasninta aswan sutʼita entiendenchik. Proverbios 4:18 nin: “Cheqan runaspa ñanninkoqa sutʼiyamuyta inti llojsimushaj jina, pʼunchayamusqanman jinari astawan kʼancharin”, nispa. Diospa yachachiykunasninta astawan sutʼinchakusqanrayku, mana chay takiykunallatapunichu “chiqa kaqta takinapaq” takisunman. Jehovamanta sutʼinchaqkunaqa, iskay chunka phichqayuq watastaña, Canten alabanzas a Jehová * nisqa libritumanta takirqanchik. Chaywanpis, chay libritu rikhurisqanmantapacha wakin yachachiykuna astawan sutʼinchakusqanrayku, wakin rimaykunata manaña uqharikunchu. Sutʼincharinapaq, castellanopiqa chay libritupi “nuevo mundo” rimay rikhurinanmantaqa, “nuevo orden” rimay rikhurirqa. Chantapis wakin takiykunapiqa, Diospa sutinmanta parlaspa “santificado” rimay rikhurinanmantaqa, “vindicado” rimay rikhurirqa. Rikunchikjina wakin yachachiykuna sutʼinchakusqanrayku, wak takina libro necesitakurqa.

16. ¿Imaynatá musuq takina libro Efesios 5:19 pʼiti nisqanmanjina ruwanapaq yanapawasun?

¹⁶ Chayrayku Diospa Llaqtanta Kamachiqkunaqa, musuq takina libro ruwakunanta nirqanku, chay librotaq Jehová Diosman takinachik sutikun. Kunanqa, chay libropi 135 takiykunallaña tiyan, chayrayku chay takiykunap rimaykunasninta wakillantapis umanchikpi japʼiqayta atillasunña. Kay yuyaychayqa, Pablo Efesios 5:19 (ñawiriy) pʼitipi nisqanmanjina kachkan.

Agradecesqas kasqanchikta rikuchina

17. ¿Imataq qutuchakuypi mana manchachikuspa takinapaq yanapawasun?

¹⁷ Takiykunata takikuchkaptin pantaykunanchikta yuyaspa, ¿chʼinllachu qhipakuna  kanman? Mana. Parlachkaptinchikqa, “tukuyninchej ashkha kutita pantanchej”, ¿icharí? (Sant. 3:2.) Chaywanpis, mana chayraykuchu Jehovata wasimanta wasi willaspa jatunchayta saqinchik. Tʼukuriy, ¿mana sumaqta takisqanchikraykuchu Diosta takiykunawan mana jatunchasunman? Jehová, “runaman simita qorqa”, chayrayku payman takisqanchikta uyarispaqa, mayta kusikun (Éxo. 4:11).

18. ¿Imataq achkha hermanosta takiykunata japʼiqanankupaq yanaparqa?

¹⁸ Jehová Diosman takinachik (pianowan khuska) nisqa discosqa, achkha hermanosta chay takiykunata yachaqakunankupaq yanaparqa. Chay discosqa, uyarinapaq may kʼachitus. Wasinchikpi sapa kuti chayta uyarispa takinanchik libritumanta takisun chayqa, rimaykunasninta japʼiqayta atisun. Ajinamanta Tantakunapaq Wasipi mana manchachikuspa takiyta atisun.

19. ¿Imaynatataq Reinomanta takiykunata orquestapi wakichinku?

¹⁹ Juk pʼunchaypaq jatun tantakuypi, iskay pʼunchaypaq jatun tantakuypi, jatun tantakuykunapi ima, kʼacha takiykunata uyarinapaq tocachikun. Ichapis chaytaqa, mana uyarillanchikpischu, chaywanpis chayta ruwanapaqqa mayta llamkʼakun. Ñawpaqtaqa, ima takiytachus tocakunanta akllakun, chantataq imaynatachus tocakunanta qillqakun, chaytataq orquesta Watchtower nisqa graban, tocaqkunaqa, 64 hermanos, hermanas ima, kanku. Paykunaqa, sapa jukninku tocanankupaq sumaqta wakichikunku, chantataq Patterson (Nueva York) llaqtapi grabanapaq wasipi grabanku. Paykunamanta chunka hermanosqa, suyunkumantapacha Estados Unidosman rinku, tukuyninkutaq tantakuykunasninchikpaq takinasta wakichisqankuta may jatunpaq qhawanku. Ñuqanchikqa, paykunata mayta agradecekunchik. Chaywanpis, ¿imaynatá jatun tantakuykunapi mayta llamkʼasqankuta sumaqpaq qhawasqanchikta rikuchisunman? Tiyanasninchikpi tiyanata nikusqantawanpacha tiyakuspa, munakuywan chay grabasqasta wakichipuwasqanchikta sumaqta uyarispa ima.

20. ¿Imatataq ruwananchik tiyan?

²⁰ Diosqa, payta yupaychanapaq takiptinchik sumaqta uyarin, may sumaqpaqtaq qhawan. Chayrayku, sumaqta takiyta yachaspapis chayri yachaqakuqkunalla kaspapis, Jehovap sunqunta kusichinapaq, ¡tukuy sunqu Jehová Diosman takinachik! (Sal. 104:33.)

[Sutʼinchaykunasnin]

¿Imatá niwaq?

• Diosta takiykunawan yupaychana kasqanta, ¿imaynatá Biblia rikuchin?

• ¿Imaynatataq Mateo 22:37 pʼitipi Jesuspa kamachisqan, Reinomanta takiykunata tukuy sunquwan takisqanchikwan kikinchakun?

• ¿Imaynatá Reinomanta takiykunata may sumaqpaq qhawasqanchikta rikuchinchik?

[Tapuykuna]

[23 paginapi dibujo/foto]

Wawasninchikta tantakuykunapi takichkaptinchik, mana qhasillapaq maymanpis lluqsinankuta, ¿ninchikchu?

[24 paginapi dibujo/foto]

Wasinchikpi musuq takiykunata umanchikpi, ¿japʼiqachkanchikchu?