Jehová Diospaqyá takisun

“Kawsanaykamam takispa Diosniyta alabasaq.” (SAL. 146:2.)

1. ¿Imataq Davidta kallpancharqa Salmos libropi tarikuq takikunata qellqananpaq?

DAVID mozo kasqanpiqa, ¡hayka tiempotachá pasarqa Belenpa hichpanpi taytanpa ovejanta michispan! Ovejakunata michispanmi qawarqa lucerokunata, ‘purun animalkunata’, ‘pawaq animalkunata’ hinaspa Diospa admirakuypaq wakin unanchasqankunatapas. Chaykunawan admirakuspanmi tukuy sonqonmanta qellqarqa tukuy ima unanchaq Jehová Diosta alabanapaq takikunata. Kunanmi achka takinkunata Salmos libropi tarinchik (leey Salmo 8:3, 4, 7-9). *

2. a) ¿Imaynatam takikunaqa tarichiwanchikman? Huk ejemplowan willamuy. b) Salmo 34:7, 8 hinaspa Salmo 139:2-8 nisqanman hina, ¿imaynataq Davidqa tarikurqa Jehová Dioswan?

² Oveja michisqan tiempopichá Davidqa  takikuna allin tocayta yacharurqa. Chayraykum invitarqaku rey Saulpaq arpata tocaq rinanpaq (Pro. 22:29). Sumaqllaña tocasqanwanmi reypa llakisqa sonqon hawkayaykuq, chaynam kunanpas runakunaqa tarikunku allin takikunawanqa. Arpata uyarispanmi “Saulqa manaña ñakarispan allinyaykuq” (1 Sam. 16:23). Davidpa qellqasqan hinaspa takisqan sumaqllaña takikunaqa kunankamapas runakunataqa hinallam yanapachkan. Kunanpas 3.000 wata Davidpa nacesqanmanta pasaruptinpas, millonnintin runakunam maymanta chaynataq imayna kaspankupas consuelota hinaspa suyakuyta maskanku Davidpa qellqasqan takikunapi (2 Cro. 7:6; leey Salmo 34:7, 8 hinaspa 139:2-8; Amos 6:5).

¿Imaynam takikuna kanan cheqap religionpi?

3, 4. ¿Imatam David rurarqa Diospaq takikuna kananpaq?

³ Davidmi tocay yachasqanta haykapipas servichikurqa Jehová Diosta hatunchananpaq. Israelpa reynin kaspanmi encargakurqa Diospa yachanan karpanpi imapas rurakusqan sumaqllaña takiwan rurakunanpaq. Chay 38.000 levitakunamantam 4.000 akllasqa karqaku ‘Diosta alabanankupaq’. Paykunamantam 288 levitakuna “Diosman takinankupaq yachachisqa” karqaku (1 Cro. 23:3, 5; 25:7).

⁴ Davidpa qellqasqan takikunatam levitakunaqa achkata takirqaku. Takiptinku chaypi tarikuq israelitakunaqa ancha admirasqachá karqaku. Diospa contraton baulta Jerusalenman apanankupaq tiempo chayaramuptinmi, ‘Leviy casta runakunapa jefenkunata’ David kamachirqa “castamasinkunamanta takiqkunata tocanantintakama churanankupaq, churarqakuqa takispa kusikuywan taksa arpakunawan, hatun arpakunawan chaynataq platillokunawan compañanankupaqmi” (1 Cro. 15:16).

5, 6. a) ¿Imanasqataq David kamachiptinqa takikuna ancha allin kananpaq tukuyta rurarqaku? b) ¿Imakunataq qawachiwanchik israelitakunapa yupaychayninkupi takikuna ancha allin kasqanmanta?

⁵ ¿Imanasqataq David kamachiptinqa takikuna ancha allin kananpaq tukuyta rurarqaku? ¿Payta llumpayta gustaptillanchu? Manam chaynachu. Karqam huk ancha allin razon, ima kasqanmantam qawachisqa karqa pachaknintin watakuna pasaptin, Diosta yupaychanapaq templopi ruranankuta kaqmanta rey Ezequias rurachiptin. Chay allin reypa rurasqanmantam 2 Cronicas 29:25 nin: ‘Churarqam Leviy casta runakunata [. . .] Diospa templonpi platillontinta, hatun arpantinta hinaspa taksa arpantinta. Chaynataqa rurarqa Davidpa hinaspa Diosmanta willakuq Gadpawan [. . .] Natanpa kamachikusqanman hinam. Tayta Diosmi chaykunata willachirqa paymanta willakuqkunawan’, nispa.

⁶ Chaynamá karqa, willakuqninkunawanmi Jehová Diosqa yachachirqa takikunawan serviqninkuna alabanankupaq. Takiq levitakunaqa manañam huk ruraykunataqa ruraqkuchu, chaynapi takikunata qellqanankupaq tiempoyoq kanankupaq hinaspa yaqapaschá ensayanankupaqpas (1 Cro. 9:33).

7, 8. ¿Ima ruraytaq aswan allinqa Diosta alabanapaq takiptinchikqa?

⁷ Icha pipas ninman: “Ñoqaqa manam allin takiqchu kani. Manachá haykapipas akllawanmankuchu karqa Diospa yachanan karpanpi allin takiqkunamanta huknin kanaypaqqa”, nispa. Levitakunaqa manam llapankuchu allin takiy yachaq karqaku. 1 Cronicas 25:8 versiculopim willawanchik discipulo otaq chayllaraq takiy yachaqkunapas kasqanmanta. Yuyarinanchiktaqmi, wakin ayllukunapi allin tocaqkunawan takiqkuna kaptinpas, Diosqa Leviy ayllumanta kaqkunallatam chaypaq akllarqa. Segurom kachwan paykuna allin otaq chayllaraq takiy yachaq kaspankupas, tukuy sonqonkuwan rurasqankumanta.

 ⁸ Davidqa allin tocaq hinaspa taki kuyaqmi karqa, ichaqa manamá chaywanqa piensanachu allin takiqta Dios astawan chaninchasqantaqa. Salmo 33:3 versiculopim kikin rey kaynata qellqarqa: ‘[Kallpanchakuychik] qaparispa suma-sumaqtaraq tocanaykichikpaq’, nispa. Nisqanmantam kayta yachanchik: Jehová Diosta alabaptinchik aswan allin rurayqa tukuy sonqomanta ruranapaq kallpanchakuymi.

Davidpa kamachisqan qepata takikuna

9. Salomonpa gobiernasqan tiempopi kaspaqa, ¿imatam qawachwan hinaspa uyarichwan karqa Diosman templo qosqa kaptin?

⁹ Salomonpa kamachisqan tiempopim, Diosta yupaychanapaq taki ancha allin karqa. Ejemplopaq, templota qespirachispanku Diosman qosqa kaptinmi 120 karqaku cornetilla tocaqkuna (leey 2 Cronicas 5:12). Bibliam willawanchik cornetillakunata tocaq sacerdotekunawan takiqkuna ‘huk vozlla Tayta Diosta alabasqankumanta hinaspa graciasta qosqankumanta’. Takispankum nirqaku: “Allin kasqanraykuyá Tayta Diosta alabaychik”, nispa. Kusikuywan takiyta tukuruptinkum ‘Diospa templonman puyu huntaykurqa’, chaymi qawachirqa paypa agradonpaq kasqanta. ¡Maynatachá chaypi kaqkunaqa admirakurqaku waranqantin runakuna takiptinku hinaspa chunkantin cornetillakunata tupaqninpi tocasqankuta uyarispankuqa! (2 Cro. 5:13.)

10, 11. ¿Imaynatam yachanchik punta cristianokuna takita servichikuspa Dios yupaychasqankuta?

¹⁰ Punta pachak watapi cristianokunapas takitam servichikurqaku Diosta yupaychasqankupi. Manam templokunapichu nitaq yupaychanapaq carpakunapichu huñunakurqaku, aswanqa hukkunapa wasillankupim. Manamá munasqankuman hinachu wakinpiqa huñunakurqaku, qatikachasqa kaspanku hinaspa imakuna kaptinpas. Chayna kaptinpas, manam qonqaqkuchu takispa Dios alabaytaqa.

¹¹ Pablom Colosaspi kaq cristianokunata nirqa ‘yupaychana takikunawan, cantokunawan hinaspa espiritumanta kaq takikunawan’ kallpanchanakunankupaq (Col. 3:16). Pablowan Silas presochasqa kaspankum Diosta achka tiempo “mañakuspanku paypaq takichkarqaku”, takinanku libronku mana kaptinpas (Hech. 16:25). Ejemplonkupi piensaspa tapukusun: “Presocharuwaptinku, ¿hayka takikunatataq umallaymanta yuyayta atiyman?”, nispa.

12. ¿Imaynatam qawachinchik Diosta yupaychanapaq takita chaninchasqanchikta?

¹² Cheqap religionpi kaqkunapaq takiy ancha allin kasqanrayku tapukusun: “¿Valorniyoqtachu qawani takikunata? ¿Kallpanchakunichu huñunakuykunaman hinaspa asambleakunaman tiempowan chayaspay iñiqmasiykunawan qallariyninpi takinaypaq? ¿Ganaswanchu takini? ¿Imaynatam familiay takiyta qawan Diosmanta Yachachinapaq Escuela tukuruptin hinaspa Diosta Servinapaq Huñunakuy qallariptin chaynataq lliw runakunapaq kaq discurso tukuruptin hinaspa Llaqta Cuidaq Revistamanta Estudio qallariptin? ¿Warmaykunata yachachinichu takina ratoqa mana puririnapaq otaq mana chutapakunapaq kasqanta?”. Ama haykapipas qonqasunchu takiyqa yupaychayninchikpa parten kasqanta. Chaynallam ‘maestro kaptinchikpas’ otaq ‘discipulo kaptinchikpas’. Llapallanchikmi obligasqa kachkanchik hinaspa atichwanmi Diosta alabanapaq huk sonqolla takiytaqa (tupachiy 2 Corintios 8:12).

Tiempoqa cambianmi chaynataq necesitasqanchikpas

13, 14. ¿Imanasqataq huñunakuykunapi kusisqa takiyqa ancha allin? Huk ejemplowan willamuy.

¹³ Pachak wata puntataraqmi inglespi lloqsimuq kay revista willarqa Diospaq takikuna imanasqa ancha allin kasqanmanta, nirqam: “Cheqap yachasqanchikmanta takiymi Dios serviqkunapa yuyayninchikpiwan  sonqonchikpi allinta takyachin”, nispa. Yaqa llapan takisqanchik palabrakunaqa Bibliamantam horqosqa kachkan, chaymi umallamanta yachaptinchikqa aswan sonqonchikpi takyan. ¡Chaymi allinpuni kanman umallamanta wakillantapas yachayqa! Iñiqmasinchikkunapa tukuy sonqonkumanta wakin congregacionkunapi takisqankum, Huñunakunanchik Salonman chayllaraq riq runakunata admirachin.

¹⁴ Yuyarisun 1869 watapi huk tuta ima pasasqanta. Mozo Charles Russellmi llamkasqanmanta wasinman kutichkaspam, uku wasipa cuartonpi uyarirurqa Dios yupaychana takita. Chay tiempopaqqa Diosmanta yachay munasqanpim hukmanyasqa tarikurqa hinaspam tantearurqa negociollanpiña ocupakunanpaq. Jehová Diosmanta yachanankupaq runakuna yanapayta mana atisqanta piensaspanmi, munarqa negocionpi ganasqan qollqewan necesitasqankupi yanapayllataña. Takisqanku cuartoman yaykuruspanmi cuentata qokurqa Dios yupaychasqankumanta. Mana allin arreglasqa chaynataq polvollaña kaptinpas, uyarinanpaqmi tiyaykurqa. Watakuna pasaptin qellqasqanman hinaqa, chay tuta uyarisqanmi “Diospa yanapayninwan kaspam yanaparqa Biblia Diospa palabran kasqanmanta manaña iskayrayananpaq”. Taki uyarisqanmi huñunakuyman rinanpaq puntata kallpancharqa.

15. ¿Imanasqataq takinanchik librota huktaña rurakurqa?

¹⁵ Tiempopa pasasqanman hinam Bibliamanta aswan allinta entiendenchik. Proverbios 4:18 nirqaña: “Allin ruraqkunapa vidanqa chayraq achikyamuchkaq hinam. Inti qespiramuspan aswan-aswan punchawyaruq hinam”, nispa. Bibliamanta aswan allinta entiendesqanchikraykum cambiananchik “cheqapmanta takisqanchikpipas”. Achka nacionkunapim Jehová Diospa testigonkunaqa yaqa 25 watakunaña Canten alabanzas a Jehová sutiyoq takina librota servichikurqaku. * Chay libro rurakusqanmanta kunankamaqa entiendesqanchikkunam achka cambiarun, chaymi rimasqanchik wakin palabrakunaqa manaña allinñachu. Hinaptinmi cambiana karqa takinanchik libropipas.

16. ¿Imaynatam takinapaq mosoq libronchik yanapawasun Efesios 5:19 nisqanta kasukunapaq?

¹⁶ Chaykuna hinaspa huk razonkunaraykum Jehová Diospa Llaqtanpi Punta Apaqkuna tantearqaku Jehová Diospaqyá takisun sutiyoq mosoq takina librota rurakunanpaq. Kunanqa 135 takikunallañam kachkan, chaymi yanapawasun wakillantapas umallamanta yachanapaq. Kay consejoqa tupachkan Pablopa Efesios 5:19 (leey) nisqanwanmi.

Agradecekusqanchikta qawachisun

17. ¿Imataq yanapawasun congregacionpi takispanchik pantaruyta mana manchakunapaq?

¹⁷ ¿Pantaruyta manchakuspachu upallalla  kananchik takisqanchik tiempopi? ¡Manamá! Rimaspanchikqa “llapallanchikmi achkaqpi pantaq kanchik” (Sant. 3:2). Ichaqa manamá chayraykuchu wasin-wasin predicaspa Dios alabaytaqa saqenchik. Hinaptinqa, ¿imanasqataq takispa Jehová Dios hatunchayta saqerusun mana allin takiq kasqanchikta piensaspaqa? ‘Runaman simita qoq’ Jehová Diosqa kusikunmi payta alabananchikpaq takiptinchik (Exo. 4:11).

18. ¿Imataq yanapawasun takikunapa letrankunata yacharunapaq?

¹⁸ Cantemos a Jehová (acompañamiento de piano) sutiyoq discom achka iñiqmasinchikkunata yanapachkan mosoq takikunata yachanankupaq. Kay discota uyariyqa ancha sumaqllañam. Wasikipi sapa kuti uyarispayki takinayki libropi qatipaptikiqa, yanapasunkim letrankunata yachanaykipaq hinaspa huñunakunanchik Salonpi confianzawan takinaykipaqpas.

19. ¿Imakunatam ruranku Diosta alabanapaq takinchikkunata grabanankupaq?

¹⁹ Huk, iskay hinaspa kimsa punchaw asambleakunapim uyarinapaq churanku sumaqllaña tocasqanku grabasqa takikunata. Wakinpiqa mana valorniyoqta hinam qawachwan achka tiempopi rurasqankuta. Puntataqa takikunatam akllanku hinaspañataq huk takilla hina kananpaq chay takikunata hukllawanku, chaytam soqta chunka tawayoq iñiqmasinchikkuna tocanku (orquesta Watchtower). Sapakamam achka tiempota servichikunku ima tocanankuwan ensayanankupaq hinaspa grabanku Patterson (Nueva York) law grabana wasipi. Llapankumantaqa chunkam nacionninkumanta rinanku Estados Unidosman, paykunaqa anchatam chaninchanku asambleanchikkunapaq takikuna ruraypi yanapasqankuta. Anchatam paykunata agradecekunchik. ¿Imaynatam kallpanchakuspa rurasqankumanta agradecesqa kasqanchikta asambleanchikkunapi qawachichwan? Tiyananchikpaq niwaptinchik chaylla tiyananchikpiña tarikuspa chaynataq kuyakuywan takikuna tocasqankuta atencionwan uyarispa.

20. ¿Imata ruranapaqmi kallpanchakunanchik?

²⁰ Diosninchikqa uyariwanchikmi yupaychanapaq huñunakuspa takisqanchiktaqa. Paypaqqa ancha valorniyoqmi. Chaynaqa, kusikuywan takispa sonqonta kusichisun. Allin takiy yachaq kaspapas otaq chayllaraq yachaq kaspapas, ¡Jehová Diospaqyá takisun! (Sal. 104:33.)

[Willakuykuna]

¿Imatam piensanki?

• Bibliapi, ¿ima ejemplokunam qawachin Dios yupaychaypi takisqanchik ancha allin kasqanmanta?

• ¿Imaynatam tupan Mateo 22:37 nisqanta kasukuyqa takinchikkunata tukuy sonqowan Diospaq takiywan?

• ¿Imakunata ruraspam qawachinchik Diospaq takisqanchikta ancha chaninchasqanchikta?

[Kay yachachikuypa tapukuyninkuna]

[23 kaq paginapi dibujo]

¿Ninchikchu takisqanchik tiempopi warmanchikkuna tiyasqankumanta yanqa mana lloqsinankupaq?

[24 kaq paginapi dibujo]

¿Wasinchikpi yachachkanchikchu mosoq takinchikkunata?